Bo Ta Siguiendo un Curso di Birtud?

“Cualkier birtud cu tin i cualkier cos digno di alabansa cu tin, sigui considerá e cosnan aki.”—FILIPENSENAN 4:8.

 1. Kico ta bicio, i pakico e no a contaminá Jehova su adoracion?

BICIO ta degradacion of corupcion moral. El a penetrá den tur parti dje mundu den cua nos ta biba. (Efesionan 2:1-3) Sin embargo, Jehova Dios lo no permití su adoracion limpi ser contaminá. Publicacionnan cristian, reunionnan, asambleanan i congresonan ta duna nos spiertamentu oportuno contra conducta perverso. Nos ta ricibí yudansa bíblico sano pa yuda nos “pega na loke ta bon” den bista di Dios. (Romanonan 12:9) P’esei, como organisacion, Testigonan di Jehova ta haci esfuerso pa keda limpi i practicá birtud. Pero kico di nos individualmente? Sí, abo ta siguiendo un curso di birtud?

 2. Kico ta birtud, i pakico esfuerso ta necesario pa practicá birtud?

² Birtud ta excelencia moral, bondad, accion i pensamentu corecto. E no ta un cualidad pasivo sino unu activo i positivo. Birtud ta enbolbé mas cu evitá picá; e ta nificá sigui un curso di loke ta bon. (1 Timoteo 6:11) Apostel Pedro a exhortá compañeronan cristian: “Agregá na boso fe, birtud.” Den ki manera? Dor di “contribuí como reaccion [na Dios su promesanan precioso] tur esfuerso sincero.” (2 Pedro 1:5) Debí na nos naturalesa pecaminoso, berdadero esfuerso ta necesario pa practicá birtud. Tog, individuonan temeroso di Dios di pasado a haci esei, asta ora nan a enfrentá obstáculonan inmenso.

El A Sigui un Curso di Birtud

 3. Di ki clase di actonan malbado Rey Acas tabata culpabel?

³ E Scritura ta contené hopi relato di esnan cu a sigui un curso di birtud. Por ehempel, considerá birtuoso Ezekías. Su tata, Rey Acas di Huda, evidentemente a adorá Molec. “Binti aña di edad Acas tabatin ora el a cuminsá reina, i pa dieseis aña el a reina den Jerusalem; i e no a haci loke tabata recto den bista di Jehova su Dios manera David su antepasado. I el a anda den e caminda dje reynan di Israel, i el a laga asta su mes yu homber pasa dor di candela, conforme cu e cosnan detestabel dje nacionnan cu Jehova a expulsá pa causa dje yunan di Israel. I el a sigui sacrificá i haci huma di sacrificio den e lugánan haltu i riba e ceritunan i bou di tur palu yen di blachi.” (2 Reynan 16:2-4) Algun hende ta pretendé cu ‘pasamentu dor di candela’ a nificá un of otro sorto di purificacion ritual i no sacrificio humano. Sin embargo, e buki Molech—A God of Human Sacrifice in the Old Testament, skirbí dor di John Day, ta comentá: “Tin evidencia den fuentenan clásico i púnico [cartagines], i tambe evidencia arkeológico, pa e existencia di sacrificio humano . . . den e mundu cananeo, pues no tin motibu pa duda e referencianan di Testament Bieu [na sacrificio humano].” Ademas, 2 Crónicanan 28:3 ta bisa specíficamente cu Acas “a procedé na kima su yu hombernan den candela.” (Compará cu Deuteronomio 12:31; Salmo 106:37, 38.) Esta malbado e actonan ei tabata!

 4. Con Ezekías a comportá su mes den un ambiente yen di bicio?

⁴ Con a bai cu Ezekías den e ambiente yen di bicio aki? Salmo 119 ta digno di nos atencion, pasobra algun hende ta kere cu Ezekías a componé e salmo ei, i cu el a haci esaki tempu cu ainda e tabata prins. (Salmo 119:46, 99, 100) P’esei kisas su circunstancianan ta ser indicá cu e palabranan: “Asta prinsnan a sinta; contra mi nan a papia un cu otro. En cuanto bo sirbidó, e ta intensamente interesá den bo disposicionnan reglamentario. Mi alma no por a drumi di desconsuelo.” (Salmo 119:23, 28) Rondoná pa practicantenan di religion falsu, Ezekías kisas a bira un obheto di bofon entre miembronan dje palacio real, asina tantu cu tabata difícil p’e pega soño. Tog, el a sigui un curso di birtud, cu tempu el a bira rey, i “a sigui haci loke tabata recto den bista di Jehova . . . Den Jehova e Dios di Israel el a confia.”—2 Reynan 18:1-5.

Nan A Practicá Birtud

 5. Ki pruebanan Daniel i su tres compañeronan a enfrentá?

⁵ Ehemplar tambe den birtud tabata Daniel i su tres compañeronan hebreo, yamá Hananías, Misael i Azarías. Nan a ser sacá for di nan patria i exiliá pa Babilonia. E cuater hóbennan a ricibí nombernan babilonio—Béltsasar, Sadrac, Mesac i Abednego. A ofrecé nan “e alimentonan exkisito dje rey,” incluyendo cuminda cu tabata prohibí bou dje Ley di Dios. Ademas, nan a ser obligá pa pasa un curso di entrenamentu di tres aña relacioná cu “e forma di skirbi i lenga dje caldeonan.” Esaki a enbolbé mas cu simplemente siña un otro idioma, pasobra probablemente aki e término “caldeonan” a indicá e clase educá. Pues, e hóbennan hebreo aki a ser exponé na siñansanan babilónico pervertí.—Daniel 1:1-7.

 6. Pakico nos por bisa cu Daniel a sigui un curso di birtud?

⁶ Apesar di presionnan enorme pa nan adaptá, Daniel i su tres compañeronan a preferá birtud riba bicio. Daniel 1:21 ta bisa: “Daniel a sigui te n’e promé aña di Ciro e rey.” Sí, Daniel “a sigui” como un sirbidó birtuoso di Jehova pa mas cu 80 aña—atrabes dje subida i caida di diferente rey poderoso. El a permanecé fiel na Dios apesar dje intriganan i complotnan di funcionarionan corupto di gobiernu i e bicionan sexual cu a saturá e religion babilónico. Daniel a keda sigui un curso di birtud.

 7. Kico nos por siña for dje curso cu Daniel i su tres compañeronan a sigui?

⁷ Nos por siña hopi for di Daniel i su compañeronan temeroso di Dios. Nan a sigui un curso di birtud i a nenga di ser absorbá dor dje cultura babilónico. Aunke nan a haña nombernan babilónico, nunca nan a perde nan identidad como Jehova su sirbidónan. De echo, rond di 70 aña despues, e rey di Babilonia a dirigí su mes na Daniel usando su nomber hebreo! (Daniel 5:13) Atrabes di henter su bida, Daniel a nenga di comprometé asta den asuntunan chikitu. Como un persona hóben, el a “determiná den su curason cu lo e no contaminá su mes cu e alimentonan exkisito dje rey.” (Daniel 1:8) Sin duda e posicion aki di Daniel i su tres compañeronan pa no comprometé a fortalecé nan pa sobrebibí e pruebanan di bida-i-morto cu nan a enfrentá despues.—Daniel, capítulo 3 i 6.

Siguiendo un Curso di Birtud Awe

 8. Con hóbennan cristian por resistí di bira parti dje mundu di Satanas?

⁸ Mescos cu Daniel i su tres compañeronan, e pueblo di Dios awe ta resistí di bira parti dje mundu malbado di Satanas. (1 Juan 5:19) Si bo ta un hóben cristian, bo por ta experenciando presion fuerte for di bo pareunan pa imitá nan gustunan extremo den bistí, areglo personal i música. Sin embargo, en bes di sigui tur último moda of estilo cu ta bira ‘in,’ para firme, i no laga bo mes “ser formá segun e sistema di cosnan aki.” (Romanonan 12:2) “Rechasá maldad i deseonan mundano i biba cu sano huicio i husticia i debocion piadoso.” (Tito 2:11, 12) E cos importante no ta e aprobacion di bo pareunan sino aprobacion di Jehova.—Proverbionan 12:2.

 9. Ki presionnan cristiannan lo por tin cu enfrentá den e mundu di comercio, i con nan mester comportá nan mes?

⁹ Cristiannan adulto tambe ta enfrentá presionnan i mester practicá birtud. Comerciantenan cristian por ser tentá pa usa métodonan cuestionabel of pa ignorá reglamentunan di gobiernu i leynan di impuesto. Sin embargo, sin importá con competidónan comercial of coleganan di trabou ta comportá nan mes, “nos ta deseá na comportá nos mes onradamente den tur cos.” (Hebreonan 13:18) Bijbel ta exigí di nos pa ta onrado i hustu cu doño di trabou, empleado, cliente i gobiernunan seglar. (Deuteronomio 25:13-16; Mateo 5:37; Romanonan 13:1; 1 Timoteo 5:18; Tito 2:9, 10) Laga nos haci esfuerso tambe pa ta ordená den nos asuntunan di negoshi. Dor di tene registronan exacto i pone acuerdonan por escrito, hopi biaha nos por prevení malcomprendimentunan.

Mantené Bo Mes Alerto!

10. Pakico ta necesario pa nos ‘mantené nos mes alerto’ ora ta trata dje música cu nos ta scoge?

¹⁰ Salmo 119:9 ta resaltá un otro aspecto di keda birtuoso den bista di Dios. E salmista a canta: “Con un hóben lo limpia su caminda? Dor di mantené su mes alerto conforme cu bo palabra.” Un di Satanas su armanan mas eficas ta música, como cu e tin poder pa excitá emocionnan. Lamentablemente, algun cristian a keda sin ‘mantené nan mes alerto’ ora ta trata di música, i ta sinti nan atraé na su formanan extremo, manera rap i ‘heavy metal.’ Algun por razoná cu tal música no ta perhudicá nan of cu nan no ta presta atencion n’e letra. Otronan ta bisa cu nan simplemente ta disfrutá di un ritmo fuerte of di e zonido duru di guitara. Sin embargo, pa cristiannan e asuntu no ta si algu ta agradabel of no. Nan preocupacion ta si e ta “aceptabel pa Señor.” (Efesionan 5:10) Por lo general, música heavy metal i rap ta promové bicionan manera palabra malu, fornicacion i asta satanismo—cosnan cu siguramente no tin lugá den e pueblo di Dios.a (Efesionan 5:3) Hóben of bieu, nos cada un lo haci bon di meditá riba e pregunta aki, Cu e música cu mi ta scoge, mi ta siguiendo un curso di birtud of bicio?

11. Con un cristian por mantené su mes alerto relacioná cu programa di television, video i películanan?

¹¹ Hopi programa di television, video i película ta promové bicio. Segun un prominente sikiatra di mucha, ‘hedonismo, sexualidad, violencia, golosidad i egoismo’ ta predominá den mayoria dje películanan cu ta ser producí awe. P’esei, pa nos mantené nos mes alerto nos mester ta selectivo tocante kico nos ta scoge pa wak. E salmista a pidi den oracion: “Haci mi wowonan pasa bai pa nan no mira loke ta inútil.” (Salmo 119:37) Un hóben cristian yamá Joseph a aplicá e principio aki. Ora un cierto película a cuminsá pasa sex i violencia cu luho di detaye, el a bandoná e teater. E tabatin bergwensa di haci esaki? “Absolutamente cu no,” Joseph ta bisa. “Mi a pensa riba Jehova promé i pa agrad’é.”

E Papel di Studio i Meditacion

12. Pakico studio personal i meditacion ta necesario afin di sigui un curso di birtud?

¹² No ta suficiente pa evitá mal cosnan. Sigui tras di birtud ta enbolbé tambe studia i meditá riba e bon cosnan registrá den e Palabra di Dios pa nos por aplicá su principionan hustu den nos bida. “Cuantu mi ta stima bo ley!” e salmista a sclama. “Henter dia largu e ta mi interes intenso.” (Salmo 119:97) Studio personal di Bijbel i di publicacionnan cristian ta parti di bo programa semanal? Ta cierto cu pa traha tempu pa studio diligente dje Palabra di Dios i pa meditá huntu cu oracion riba dje por ta un desafio. Pero hopi biaha ta posibel pa cumpra tempu for di otro actividadnan. (Efesionan 5:15, 16) Tal bes e oranan trempan di mainta lo sirbí bo bon como un tempu pa oracion, studio i meditacion.—Compará cu Salmo 119:147.

13, 14. (a) Pakico meditacion ta baliosísimo? (b) Meditando riba ki textonan por yuda nos aborecé inmoralidad sexual?

¹³ Meditacion ta baliosísimo, pasobra e ta yuda nos retené loke nos ta siña. Mas importante, e por yuda desaroyá puntonan di bista piadoso. Pa ilustrá: Ta un cos pa sa cu Dios ta prohibí fornicacion, pero ta henteramente un otro cos pa ‘aborecé loke ta malu i pega na loke ta bon.’ (Romanonan 12:9) Nos realmente por sinti e manera cu Jehova ta sinti pa cu inmoralidad sexual dor di meditá riba textonan clave di Bijbel, manera Colosensenan 3:5, cu ta urgi: “P’esei, mata boso miembronan di curpa cu ta riba tera pa loke ta fornicacion, impuresa, apetit sexual, deseo perhudicial, i cudishi, locual ta idolatria.” Puntra bo mes: ‘Ki clase di apetit sexual mi tin cu mata? Kico mi mester evitá cu lo por lanta deseo impuru? Tin cambionan cu mi tin cu haci den e manera cu mi ta trata cu hende dje sexo opuesto?’—Compará cu 1 Timoteo 5:1, 2.

¹⁴ Pablo ta urgi cristiannan pa abstené for di fornicacion i pa ehercé dominio propio pa asina “ningun hende yega te n’e punto di perhudicá i abusá dje derechonan di su ruman.” (1 Tesalonicensenan 4:3-7) Puntra bo mes: ‘Pakico cometé fornicacion ta perhudicial? Ki daño lo mi causa mi mes of un otro persona si mi peca den esaki? Con lo mi ser afectá spiritualmente, emocionalmente i físicamente? Kico di individuonan den e congregacion cu a violá e ley di Dios i cu no a repentí? Con a bai cu nan?’ Dor di tuma na pechu loke e Scritura ta bisa tocante conducta asina, esei por profundisá nos odio contra loke ta malu den bista di Dios. (Exodo 20:14; 1 Corintionan 5:11-13; 6:9, 10; Galationan 5:19-21; Revelacion 21:8) Pablo ta bisa cu un fornicadó ‘no ta menospreciá hende, sino Dios.’ (1 Tesalonicensenan 4:8) Cua cristian berdadero lo menospreciá su Tata celestial?

Birtud i Asociacion

15. Ki papel asociacion ta hunga den nos siguimentu di un curso di birtud?

¹⁵ Un otro yudansa pa práctica birtud ta bon asociacion. E salmista a canta: “Mi ta socio di tur esnan cu sí ta temé bo [Jehova], i di esnan cu ta warda bo ordunan.” (Salmo 119:63) Nos tin mester dje asociacion saludabel cu ta ser suministrá na reunionnan cristian. (Hebreonan 10:24, 25) Si nos isolá nos mes, nos por bira egocéntrico den nos manera di pensa, i bicio lo por dominá nos fácilmente. (Proverbionan 18:1) Sin embargo, compañerismo cristian caluroso, por fortalecé nos determinacion pa practicá birtud. Naturalmente, nos tin cu vigilá tambe contra mal asociacion. Nos por ta cordial cu bisiña, colega di trabou i coleganan studiante. Pero si nos realmente ta cana di un manera sabí, nos lo evitá di pega muchu na esnan cu no ta sigui un curso di birtud cristian.—Compará cu Colosensenan 4:5.

16. Con e aplicacion di 1 Corintionan 15:33 por yuda nos sigui un curso di birtud awe?

¹⁶ Pablo a skirbi: “Mal asociacion ta daña custumbernan útil.” Haciendo e declaracion aki, e tabata spiertando creyentenan cu nan por a perde nan fe dor di asociá cu esnan cu a pretendé cu nan ta cristian, pero cu a rechasá e siñansa bíblico tocante resureccion. E principio tras di Pablo su spiertamentu ta aplicá na nos asociacionnan tantu paden como pafó dje congregacion. (1 Corintionan 15:12, 33) Naturalmente, nos no kier evitá asociacion cu nos rumannan spiritual pa motibu cu nan no ta eens cu un of otro opinion puramente personal cu nos tin. (Mateo 7:4, 5; Romanonan 14:1-12) No obstante, cautela ta necesario si algun ruman den congregacion ta participá den conducta cuestionabel of ta desplegá un spiritu amargo of kehoso. (2 Timoteo 2:20-22) Ta sabí pa keda cerca di esnan cu ken nos por disfrutá di “un intercambio di estímulo.” (Romanonan 1:11, 12) Esaki lo yuda nos sigui un curso birtuoso i keda riba “e caminda di bida.”—Salmo 16:11.

Keda Sigui un Curso di Birtud

17. Segun Númeronan capítulo 25, ki desaster a bini riba e israelitanan, i ki les esaki ta siña nos?

¹⁷ Djis promé cu e israelitanan a tuma posesion dje Tera Primintí, miles di nan a scoge pa sigui un curso di bicio—i a experenciá desaster. (Númeronan, capítulo 25) Awe, Jehova su pueblo ta pará n’e drempel dje hustu mundu nobo. Esnan cu ta sigui rechasá e bicionan dje mundu aki lo tin e privilegio bendicioná di drenta den e mundu nobo ei. Como hende imperfecto, nos por tin mal inclinacionnan, pero Dios por yuda nos sigui e guia hustu di su spiritu santu. (Galationan 5:16; 1 Tesalonicensenan 4:3, 4) P’esei laga nos presta atencion n’e spiertamentu di Hosué na Israel: “Teme Jehova i sirbié liber di falta i den e berdad.” (Hosué 24:14) Temor reverencial di desagradá Jehova lo yuda nos sigui un curso birtuoso.

18. Relacioná cu bicio i birtud, kico mester ta e determinacion di tur cristian?

¹⁸ Si ta bo deseo di curason pa agradá Dios, sea determiná pa tuma e spiertamentu di Pablo na pechu: “Cualkier cos cu ta berdadero, cualkier cos cu ta di consideracion serio, cualkier cos cu ta hustu, cualkier cos cu ta decente, cualkier cos cu ta amabel, cualkier cos cu tin bon reputacion, cualkier birtud cu tin i cualkier cos digno di alabansa cu tin, sigui considerá e cosnan aki.” Si bo haci esaki, kico lo ta e resultado? Pablo a bisa: “Practicá esakinan; i e Dios di pas lo ta cu [bo].” (Filipensenan 4:8, 9) Sí, cu yudansa di Jehova bo por rechasá bicio i sigui un curso di birtud.

[Nota]

Puntonan pa Repaso

◻ Kico ta necesario pa por sigui un curso di birtud?

◻ Bou di ki circunstancianan Ezekías, Daniel i e tres hebreonan a permanecé birtuoso?

◻ Con nos por ta manera Daniel den resistí e mañanan di Satanas?

◻ Pakico cristiannan tin cu mantené nan mes alerto relacioná cu entretenimentu?

◻ Ki papel studio, meditacion i asociacion ta hunga den sigui un curso di birtud?

[Plachi na página 15]

Hóben Ezekías a sigui un curso di birtud maske e tabata rondoná pa adoradónan di Molec

[Plachinan na página 17]

Cristiannan tin cu mantené nan mes alerto ora ta trata di entretenimentu