Amor p’e Palabra di Dios Ta Trece Beneficio
“Stima [sabiduria], i lo e protehá bo. . . . Lo e glorificá bo pasobra bo ta bras’é.”—PROVERBIONAN 4:6, 8.
1. Kico berdadero amor p’e Palabra di Dios ta encerá?
TA ESENCIAL pa un cristian lesa Bijbel. Sin embargo, djis les’é so riba su mes no ta demostrá amor p’e Palabra di Dios. Ke tal si un persona ta lesa Bijbel anto despues practicá cosnan cu Bijbel ta condená? Obviamente, e no stima e Palabra di Dios den e manera cu e escritor di Salmo 119 a stim’é. Amor p’e Palabra di Dios a hiba e salmista na biba na armonia cu su rekisitonan.—Salmo 119:97, 101, 105.
2. Ki beneficionan ta bini di sabiduria basá riba e Palabra di Dios?
2 Biba na armonia cu e Palabra di Dios ta rekerí ahuste constante den bo manera di pensa i di biba. Un curso asina ta reflehá sabiduria di Dios, loke ta nificá haci aplicacion práctico di conocimentu i comprendimentu cu bo a gana for di studia Bijbel. “Stima [sabiduria], i lo e protehá bo. Consider’é di hopi balor, i lo e halsa bo. Lo e glorificá bo pasobra bo ta bras’é. Lo e duna bo cabes un krans di encanto; un corona di bunitesa lo e otorgá bo.” (Proverbionan 4:6, 8, 9) Ki un animacion excelente pa desaroyá amor p’e Palabra di Dios i pa lagu’e guia bo! Ken lo no kier ta protehá, halsá i glorificá?
Protehá for di Daño Duradero
3. Mas cu nunca promé, pakico mester protehá cristiannan, i for di ken?
3 Den ki manera e sabiduria cu bo ta gana dor di studia i aplicá e Palabra di Dios ta protehá bo? Na promé lugá, e ta protehá bo di Satanas e Diabel. Jesus a siña su siguidónan pidi pa libra nan for dje malbado, Satanas. (Mateo 6:13) Awe, ta mas urgente cu nunca pa incluí e peticion aki den nos oracionnan. Satanas i su demoñonan a ser sacá for di shelu despues di 1914, i p’esei Satanas tin “gran rabia, sabiendo cu e tin un periodo di tempu corticu.” (Revelacion 12:9, 10, 12) Awor aki, despues di tantu aña asina, lo e mester ta cushi di rabia ya cu e ta bringando en bano contra esnan “cu ta warda e mandamentunan di Dios i cu tin e trabou di duna testimonio di Jesus.”—Revelacion 12:17.
4. Con cristiannan ta ser protehá for di preshon i trampanan satánico?
4 Den su rabia, Satanas ta sigui provocá problema p’e ministernan cristian aki i ta fomentá persecucion violento of causa otro obstáculo pa nan actividad. Tambe e kier lok proclamadónan di Reino pa enfocá riba cosnan manera prominencia mundano, un bida trankil, búskeda di posesion material i corementu tras di placer, en bes di riba e trabou di predicá e Reino. Kico ta protehá Dios su sirbidónan fiel di entregá na preshon di Satanas of di cai den su trampanan? Claro cu oracion, un relacion personal íntimo cu Jehova i fe den e cumplimentu sigur di su promesanan ta vital. Pero tur esakinan ta conectá na un conocimentu dje recordatorionan dje Palabra di Dios i un determinacion pa haci caso di nan. E recordatorionan aki ta bini dor di lesa Bijbel i publicacionnan pa studia Bijbel, asistí na reunionnan cristian, haci caso di conseho bíblico for di un compañero creyente, of simplemente dor di meditá huntu cu oracion riba principionan di Bijbel cu e spiritu di Dios ta trece na nos mente.—Isaías 30:21; Juan 14:26; 1 Juan 2:15-17.
5. Den ki maneranan sabiduria basá riba e Palabra di Dios ta protehá nos?
5 Esnan cu ta stima e Palabra di Dios ta ser protehá den otro maneranan tambe. Por ehempel, nan ta evitá e angustia emocional i enfermedadnan físico cu ta resultá for di cosnan manera uso di droga i di tabaco, i inmoralidad sexual. (1 Corintionan 5:11; 2 Corintionan 7:1) Nan no ta contribuí na relacionnan tenso dor di haci redu of papia malu cu otro. (Efesionan 4:31) Ni nan no ta bira víctima di duda dor di investigá e filosofianan engañoso dje sabiduria di mundu. (1 Corintionan 3:19) Dor di stima e Palabra di Dios, nan ta protehá for di cosnan cu lo por pone nan perde nan relacion cu Dios i e speransa di bida eterno. Nan ta keda ocupá den yuda nan próhimo pone fe den e promesanan maraviyoso cu Bijbel ta contené, sabiendo cu asina nan lo ‘salba tantu nan mes como esnan cu ta scucha nan.’—1 Timoteo 4:16.
6. Con sabiduria basá riba e Palabra di Dios por protehá nos asta bou di circunstancianan difícil?
6 Ta cierto cu tur hende—asta esnan cu stima e Palabra di Dios—ta sometí na “tempu i suceso imprevisto.” (Eclesiástes 9:11) Ta inevitabel cu algun di nos lo pasa den desaster natural, enfermedad serio, accidente of morto prematuro. Tog, nos ta protehá. Ningun calamidad no por causa daño permanente na un persona cu di berdad ta stima e Palabra di Dios. P’esei, nos no mester ta demasiado preocupá tocante kico por pasa den futuro. Despues cu nos a tuma tur precaucion razonabel, ta mihó laga asuntunan den man di Jehova i no permití e insiguridad dje bida djawe horta nos di pas. (Mateo 6:33, 34; Filipensenan 4:6, 7) Corda cu ora Dios “haci tur cos nobo,” e promesa di un resureccion i di un mihó bida lo cumpli sigur.—Revelacion 21:5; Juan 11:25.
Duna Prueba cu Bo Ta “Bon Tera”
7. Ki ilustracion Jesus a conta e multitud cu a bini pa tend’é?
7 Den un di Jesus su comparacionnan, el a resaltá e importancia di tin un punto di bista corecto dje Palabra di Dios. Segun cu Jesus tabata proclamá e bon nobo rond Palestina, multitud di hende a bini pa tend’é. (Lucas 8:1, 4) Sin embargo, no ta tur hende a ègt stima e Palabra di Dios. Sin duda, hopi a bini pa tend’é pasobra nan kier a mira milager of pasobra nan a gusta su manera maraviyoso di siña. P’esei, Jesus a conta e multitud un ilustracion: “Un sembradó a sali pa sembra su simia. Wel, segun e tabata sembra, un parti di nan a cai cant’i caminda i a ser trapá, i e paranan di shelu a com’é. Un otro parti a cai riba baranca, i, despues di a spruit, a seca pa falta di humedad. Un otro parti a cai den sumpiña, i e sumpiñanan a crece cuné i a sofok’é. Un otro parti a cai den bon tera, i, despues di a spruit, a producí fruta cu shen bes.”—Lucas 8:5-8.
8. Den Jesus su ilustracion, kico ta e simia?
8 Jesus su comparacion a mustra cu lo tin diferente reaccion riba e predicacion dje bon nobo, dependiendo dje condicion di curason dje oyente. E simia cu ta ser sembrá ta “e palabra di Dios.” (Lucas 8:11) Of, manera un otro relato dje comparacion ta bisa, e simia ta “e palabra dje reino.” (Mateo 13:19) Jesus por a usa ámbos expresion, ya cu e tema dje Palabra di Dios ta e Reino celestial bou di Jesucristo como Rey pa medio di cua Jehova lo vindicá su soberania i santificá su nomber. (Mateo 6:9, 10) Básicamente anto, e simia ta e mensahe dje bon nobo den Bijbel, e Palabra di Dios. Testigonan di Jehova ta resaltá e mensahe di Reino aki segun cu nan ta sembra simia imitando e Sembrador original, Jesucristo. Ki reaccion nan ta haña?
9. Kico ta e nificacion dje simia cu ta cai (a) cant’i caminda? (b) den baranca? (c) den sumpiña?
9 Jesus a bisa cu un parti dje simia ta cai cant’i caminda i ta ser trapá. Esaki ta referí na hende cu ta demasiado ocupá p’e simia di Reino saca rais den nan curason. Promé cu nan por desaroyá un amor p’e Palabra di Dios, “Diabel ta bini i ta kita e palabra for di nan curason pa nan no kere i ser salbá.” (Lucas 8:12) Un parti dje simia ta cai riba baranca. Esaki ta referí na hende cu e mensahe di Bijbel ta atraé, pero cu no ta lagu’e influenciá nan curason. Ora oposicion bini of ora nan tin problema pa aplicá conseho di Bijbel, “nan ta kita cai” pasobra nan no tin rais. (Lucas 8:13) Tin tambe esnan cu ta tende e palabra pero e “ansha i rikesa i placernan dje bida aki” ta aplastá nan. Cu tempu, mescos cu planchi bruhá den mata di sumpiña, “nan ta ser sofocá completamente.”—Lucas 8:14.
10, 11. (a) Ken e bon tera ta representá? (b) Kico nos tin cu haci pa ‘retené’ e Palabra di Dios den nos curason?
10 Finalmente, tin e simia cu ta cai den bon tera. Esaki ta nificá hende cu ta ricibí e mensahe cu “un curason excelente i bon.” Di mes, cada un di nos lo kier kere cu nos ta cai den e categoria aki. Pero den e análisis final, ta Dios su punto di bista ta conta. (Proverbionan 17:3; 1 Corintionan 4:4, 5) Su Palabra ta bisa cu e echo cu nos tin “un curason excelente i bon” ta algu cu nos ta duna prueba di dje mediante nos accionnan di awor te na nos morto of te ora Dios trece un fin n’e mal sistema di cosnan aki. Si nos reaccion inicial n’e mensahe di Reino ta positivo, esei ta bon. Pero, esnan cu tin un curason excelente i bon ta aceptá e Palabra di Dios i “ta reten’é i ta producí fruta cu awante.”—Lucas 8:15.
11 E único manera sigur pa retené e Palabra di Dios den nos curason ta dor di les’é i studi’é personalmente i huntu cu compañeronan creyente. Esei ta encerá probechá plenamente dje alimento spiritual cu e canal nombrá pa cuida e interesnan spiritual di Jesus su berdadero siguidónan, ta percurá p’e. (Mateo 24:45-47) Pa medio di esei, amor ta motivá esnan cu ta retené e Palabra di Dios den nan curason pa “producí fruta cu awante.”
12. Kico ta e fruta cu nos tin cu producí cu awante?
12 Ki fruta e bon tera ta producí? Den naturalesa, simia ta crece bira mata cu ta producí fruta cu ta contené e mésun tipo di simia, cu por plama e ora ei pa sigui duna mas fruta. Di igual manera, pa esnan cu tin un curason excelente i bon, e simia dje palabra ta crece den nan i ta haci nan progresá spiritualmente te ora nan, na nan turno, por sembra e simia den curason di otro hende. (Mateo 28:19, 20) I nan trabou di sembra ta marcá pa awante. Jesus a mustra e importancia di awante den sembra ora el a bisa: “Esun cu a wanta te na fin ta esun cu lo ser salbá. I e bon nobo aki dje reino lo ser predicá den tur e tera habitá como testimonio pa tur nacion; i e ora ei e fin lo yega.”—Mateo 24:13, 14.
“Producí Fruta den Tur Bon Obra”
13. Ki oracion Pablo a expresá cu ta conectá fruta cu conocimentu dje Palabra di Dios?
13 Apostel Pablo tambe a papia dje necesidad pa producí fruta, i el a conectá producí fruta cu e Palabra di Dios. El a pidi den oracion pa su compañeronan creyente “ser yená cu e conocimentu exacto di [Dios] su boluntad den tur sabiduria i comprendimentu spiritual, pa boso cana di un manera digno di Jehova afin di agrad’é plenamente segun cu boso ta sigui producí fruta den tur bon obra.”—Colosensenan 1:9, 10; Filipensenan 1:9-11.
14-16. Na armonia cu Pablo su oracion, ki fruta esnan cu ta stima e Palabra di Dios ta producí?
14 Asina Pablo ta mustra cu gana conocimentu di Bijbel no ta e meta final. Mas bien, amor p’e Palabra di Dios ta motivá nos pa “cana di un manera digno di Jehova” dor di sigui “producí fruta den tur bon obra.” Ki bon obra? Predicá e bon nobo di Reino ta e asignacion sobresaliente pa cristiannan den e último dianan aki. (Marco 13:10) Ademas, esnan cu ta stima e Palabra di Dios ta haci nan best pa duna sosten financiero regularmente n’e obra aki. Nan tin deleite den e privilegio aki, sabiendo cu “Dios ta stima un dunadó alegre.” (2 Corintionan 9:7) Nan contribucionnan ta bai pa cubri e gastunan di funcionamentu di e mas cu shen facilidadnan di Betel for di cua ta dirigí e actividad di predicá e Reino, i di cua algun ta producí Bijbel i literatura bíblico. Tambe, nan contribucionnan ta yuda cubri e gastunan di congresonan cristian grandi i e actividadnan di superintendente biahero, misionero i otro evangelisadónan di tempu completo.
15 Otro bon obra ta encerá e construccion i mantencion di centronan di adoracion berdadero. Amor p’e Palabra di Dios ta motivá su adoradónan pa haci sigur di no descuidá Salonnan di Asamblea i Salonnan di Reino. (Compará cu Nehemías 10:39.) Siendo cu e nomber di Dios ta aparecé riba fachada dje edificionan ei, ta vital pa tene tantu paden como pafó limpi i atractivo i p’e conducta di esnan cu ta adorá Dios den e salanan ei no trece reproche. (2 Corintionan 6:3) Algun cristian ta den un posicion pa haci mas. Amor p’e Palabra di Dios ta impulsá nan pa biaha distancianan largu pa por yuda construí lugánan di adoracion nobo den partinan dje tera caminda tin un necesidad pa motibu di pobresa of un falta di abilidad.—2 Corintionan 8:14.
16 “Producí fruta den tur bon obra” ta encerá tambe cumpli cu obligacionnan di famia i mustra interes den compañeronan cristian. Amor p’e Palabra di Dios ta motivá nos pa keda atento p’e necesidadnan di esnan “relacioná cu nos den e fe” i pa “practicá debocion na Dios den [nos] mes famia di cas.” (Galationan 6:10; 1 Timoteo 5:4, 8) Den e contexto aki, ta un bon obra pa bishitá esnan enfermo i consolá esnan cu ta na luto. I esta un obra excelente ancianonan di congregacion i Comiténan di Contacto cu Hospital ta haci ora nan ta yuda individuonan cu ta enfrentá situacionnan médico difícil! (Echonan 15:29) Tambe tin un cantidad creciente di desaster—algun di nan natural i otronan causá pa imprudencia humano. Cu yudansa dje spiritu di Dios, Testigonan di Jehova a traha un bunita testimonio den hopi parti di tera di ta duna yudansa rápidamente na compañeronan creyente i otro víctimanan di desaster i accidente. Tur esakinan ta bon fruta cu esnan cu ta stima e Palabra di Dios ta manifestá.
Glorioso Beneficionan pa Futuro
17, 18. (a) Kico e sembramentu di simia di Reino ta logra? (b) Esnan cu ta stima e Palabra di Dios pronto lo ta testigo di ki sucesonan impactante?
17 E sembramentu di simia di Reino ta sigui trece gran beneficio pa humanidad. Den añanan recien mas cu 300.000 persona pa aña a laga e mensahe di Reino saca rais den nan curason te n’e grado cu nan a dedicá nan bida na Jehova i a simbolisá esaki pa medio di bautismo bou di awa. Ki un futuro glorioso ta spera nan!
18 Stimadónan dje Palabra di Dios sa cu djis aki Jehova Dios lo tuma accion pa engrandecé su nomber. “Babilonia e Grandi,” e imperio mundial di religion falsu, lo ser destruí. (Revelacion 18:2, 8) Anto, Jesucristo e Rey lo caba cu esnan cu ta nenga di biba na armonia cu e Palabra di Dios. (Salmo 2:9-11; Daniel 2:44) Despues di esei, e Reino di Dios lo trece alivio permanente for di crímen, guera i otro desaster. Lo no tin nodi consolá hende mas pa motibu di dolor, enfermedad i morto.—Revelacion 21:3, 4.
19, 20. Ki futuro glorioso ta warda esnan cu di berdad ta stima e Palabra di Dios?
19 E ora ei esnan cu ta stima e Palabra di Dios lo realisá glorioso bon obra! Sobrebibientenan di Armagedon lo cuminsá cu e tarea gososo di transformá e tera aki den un paradijs. Nan lo tin e privilegio emocionante di prepará p’e necesidadnan di hende morto cu awor ta sosegá den graf i cu ta biba den e memoria di Dios, cu e prospecto di participá den e resureccion dje mortonan. (Juan 5:28, 29) Durante e tempu ei, instruccion perfecto lo bini p’e habitantenan di tera for dje Señor Soberano Jehova, mediante su Yu halsá, Jesucristo. ‘Lo habri rolnan’ cu ta revelá Jehova su instruccionnan pa bida den e mundu nobo.—Revelacion 20:12.
20 Na Jehova su debido tempu, e cuerpo completo di fiel cristiannan ungí lo ricibí nan recompensa celestial como “co-heredero cu Cristo.” (Romanonan 8:17) Durante e Reino di Mil Aña di Cristo, lo elevá tur hende riba tera cu ta stima e Palabra di Dios na perfeccion di mente i curpa. Despues cu nan resultá fiel bou di un prueba final, lo recompensá nan cu bida eterno i nan “lo tin e glorioso libertad dje yunan di Dios.” (Romanonan 8:21; Revelacion 20:1-3, 7-10) Ki un tempu maraviyoso esei lo ta! En berdad, sea Jehova a duna nos un speransa celestial of unu terenal, amor duradero pa su Palabra i un determinacion pa biba na armonia cu sabiduria divino lo protehá nos. I den futuro ‘lo e glorificá nos pasobra nos ta bras’é.’—Proverbionan 4:6, 8.
Bo Por Splica?
◻ Con amor p’e Palabra di Dios lo protehá nos?
◻ Kico ta e simia di Jesus su ilustracion, i con ta sembr’é?
◻ Con nos por duna prueba di ta “bon tera”?
◻ Ki beneficionan stimadónan dje Palabra di Dios por anticipá?
[Plachi na página 16]
E simia di Jesus su ilustracion ta representá e mensahe dje bon nobo cu e Palabra di Dios ta contené
[Rekonosementu]
Garo Nalbandian
[Plachi na página 17]
Testigonan di Jehova ta imitá e Gran Sembrador
[Plachi na página 18]
Sobrebibientenan di Armagedon lo disfrutá dje frutanan di tera