E peliger nuclear kitá pa semper!
UN BIDA den miedu insaludabel no ta loke Dios kier pa humanidad. Como “e Dios feliz,” e kier pa nan disfruta di paz i biba den siguridad—en fin, ser feliz. (1 Timoteo 1:11) Den un mundo yen di peliger nuclear, esei ta claramente imposibel.
“Paz i siguridad”—un falsedad
Ta keda bisto cu e peliger nuclear no a desaparece. Sin embargo, apesar di inketud político, económico, i social, en general e nacionan ta parce optimista. Un esfuerzo continuo pa elimina e peliger ta keda bisto desde e Aña Internacional di Paz di NU na 1986.
E boletín na inglés, E Boletín di Científico Atómico durante e último diez aña a hala atrás wijzer di su horloshi indicando fin di mundo for di 3 minut promé cu meianochi te na 17 minut promé cu meianochi—locual ta su manera di indica e probabilidad di gera nuclear. Na 1989 e Instituto pa Investigacion pa Paz Internacional di Estocolmo a bisa cu e “speranza pa resolve conflicto pacíficamente ta mihor fundá cu den cualkier otro aña desde e fin di Gera Mundial II.”
Den aña reciente Nacion Uní a ser fortalecí pa trata cu conflicto internacional continuo. Éxito di Nacion Uní no ta total, pero a ser suficiente pa contribui ne spiritu general di optimismo. Probablemente den e futuro lo tin mas desaroyo nobo i exitoso. E grito di “paz i siguridad” probablemente lo bira mas duro i mas intenso. Nan asta por bira mas creíbel.
Pero, tene cuidao! E spiertamento bíblico tá: “Ki ora cu nan bisa: ‘Paz i siguridad!’ anto destruccion di ripiente lo ser riba nan instantáneamente mescos cu dolor di angustia riba muher den estado; i nan lo no scapa di ningun manera.” Asina, grito di “paz i siguridad” lo siñala e tempo di Dios “pa causa e ruina di esnan cu [pa medio di contaminacion, sea contaminacion nuclear i otro] ta ruina e tera.”—1 Tesalonicense 5:3, 4; Revelacion 11:18.
Tuma nota cu e Bijbel no ta bisa cu e nacionan lo alcanza “paz i siguridad.” Aparentemente nan lo papia tocante dje na moda distinto, expresando optimismo i un conviccion cu nan no a sinti na antes. E posibilidad pa alcanza paz i siguridad lo parce di ser mas cerca cu nunca na antes. Apesar dje peliger nuclear continuo, e nacionan lo ser calmá pa cai den un sintimento falso di siguridad.
Sin embargo, cristian berdadero lo no ser gañá. Cu interés intenso nan ta cuminza mira mas ayá cu paz i siguridad humano na algo mihor!
Paz i siguridad—lo berdadero
Segun Salmo 4:8, berdadero paz i siguridad ta ser hayá solamente den arreglo di Jehova Dios: “Den paz lo mi subi mi cama i també drumi, pasobra abo, sí, abo so, O Jehova, ta hacími biba den siguridad.” Cualkier grito di “paz i siguridad” expresá for di contexto dje arreglo dje Reino di Jehova Dios ta solamente falso. E no por alcanza nada di balor duradero.
Mitá solucion no ta adecuado pe Reino di Dios bao di Cristo. E gobierno divino lo no simplemente reduci e cantidad di arma nuclear sino lo eliminánan totalmente i tur otro arma di gera. Salmo 46:9 ta priminti: “E ta haci gera para te na extremidad dje tera. E ta kibra boog i ta corta lanza na pida pida; e ta kima garoshi cu candela.”
Di igual manera, peliger cu fayo di reactor nuclear of cu basura radioactivo ta presentá lo ser algo di pasado. Di otro manera e sigiente palabra lo no ta e berdad: “Nan realmente lo sinta, cada un bao di su ramada i bao di su mata di figu, i lo no tin ningun pa hácinan tembla; pasobra e boca di Jehova di ehército a bisé.” Dios no por gaña. Nos no tin motibo pa duda su palabra.—Miqueas 4:4; Tito 1:2.
Bo kier goza dje prospecto di biba den un mundo den locual e peliger nuclear a ser kitá pa semper? Bo por, pasobra e Palabra di Dios ta declara claramente requisito di dje. Ora bo ta siña tocante nan i ta biba di acuerdo cu nan, un dia bo por tene e gozo di bisa cu un suspiro di alivio: “E peliger nuclear—a caba por fin!”
[Caption on page 6]
U.S. National Archives photo
[Caption on page 7]
Paz lo reina den e mundo nobo di Dios sin ningun peliger nuclear
[Caption on page 7]
M. Thonig/H. Armstrong Roberts