Keda Okupá Durante e Parti Final di “e Último Dianan”

 1. Kiko ta konvensé nos ku nos ta bibando den “e último dianan”?

SI BO a nase despues di 1914, bo a biba henter bo bida durante “e último dianan” di e sistema di kosnan akí. (2 Tim. 3:1) Nos tur a tende di e susesonan ku Hesus a profetisá pa e tempu akí: guera, skarsedat di kuminda, temblor, pèst, oumento di maldat i persekushon di e pueblo di Yehova. (Mat. 24:3, 7-9, 12; Luk. 21:10-12) Nos a mira tambe ku hende ta komportá nan mes manera apòstel Pablo a profetisá. (Wak e kuadro “Awendia Hende Ta . . . ”) Nos, komo Testigunan di Yehova, ta konvensí ku nos ta bibando den “e último dianan.”—Mik. 4:1.

 2. Ki ta algun pregunta ku nos mester haña nan kontesta?

² Komo ku asina tantu tempu a pasa desde 1914, nos mester ta bibando aworakí den e parti final di “e último dianan.” E fin di e sistema di kosnan akí ta serka, p’esei nos mester haña kontesta pa e siguiente preguntanan importante: Ki suseso lo tuma lugá na final di “e último dianan”? I kiko Yehova ta ferwagt pa nos hasi segun ku nos ta warda riba e susesonan ei?

 3. Segun e profesia na 1 Tesalonisensenan 5:1-3, ki proklamashon e nashonnan lo hasi?

³ Lesa 1 Tesalonisensenan 5:1-3. Den e versíkulonan ei, Pablo ta papia tokante “e dia di Yehova.” Esei ta referí na e periodo di tempu ku lo kuminsá ku e atake riba “Babilonia e Grandi,” e imperio mundial di religion falsu, i ku lo kulminá ku Armagedon. (Rev. 16:14, 16; 17:5) Djis promé ku “e dia” ei kuminsá, e nashonnan lo proklamá ku nan a logra “Pas i siguridat!” (Algun tradukshon ta bisa: “Tur kos ta trankil i seif.”) Tin biaha e lidernan polítiko ta usa ekspreshon similar ora nan ta papia di mantené i mehorá relashon entre e nashonnan.b Pero, e anunsio di “pas i siguridat” ku Beibel ta papia di dje lo ta diferente. Dikon? Ora ku e lidernan polítiko anunsiá esei, hende lo kere ku nan a logra hasi mundu un lugá mas safe i sigur. Pero en realidat, “diripiente destrukshon lo bini riba nan instantáneamente” durante “tribulashon grandi.”—Mat. 24:21.

 4. (a) Kiko nos no sa tokante e anunsio di “pas i siguridat”? (b) Kiko sí nos sa kaba tokante e anunsio ei?

⁴ Nos no sa kiko lo pone e lidernan polítiko hasi e anunsio di “pas i siguridat” ni kon nan lo hasi e anunsio ei. I nos no sa si lo ta djis un proklamashon òf un seri di anunsio. Sea kual sea e kaso, esaki sí nos sa: Lider humano no por trese pas mundial, pues, nan anunsio lo no engañá nos. Mas bien, ta riba e anunsio ei nos a bin ta warda pa basta tempu. Esei ta e señal ku “e dia di Yehova” ta a punto di kuminsá!

 5. Kon 1 Tesalonisensenan 5:4-6 ta yuda nos pa nos ta kla pa “e dia di Yehova”?

⁵ Lesa 1 Tesalonisensenan 5:4-6. Pablo ta animá nos pa hasi sigur ku nos ta kla pa “e dia di Yehova.” Nos no mester “sigui drumi manera otro hende.” Ma, nos mester “keda lantá” i keda alerta. Por ehèmpel, nos mester hasi sigur pa keda neutral i nunka mete ku asuntu polítiko. Si nos mete ku eseinan, nos por bira “parti di mundu.” (Huan 15:19) Nos sa ku e Reino di Dios ta e úniko speransa pa pas mundial.

 6. Kiko nos ke yuda otro hende hasi, i dikon?

⁶ Aparte di hasi sigur ku nos mes ta keda lantá, nos ke yuda otro hende tambe lanta for di soño pa nan por komprondé loke Beibel ta bisa ku lo pasa den mundu. Nos mester hasi esei aworakí pasobra unabes tribulashon grandi kuminsá, lo ta muchu lat pa nan kuminsá sirbi Yehova. Ta p’esei nos trabou di prediká ta asina urgente!c

 7. Kiko Yehova ta ferwagt pa nos hasi?

⁷ Den e poko tempu ku a sobra promé ku Yehova su “dia” kuminsá, e ta ferwagt pa nos keda okupá den e trabou di prediká. Nos tin ku hasi sigur ku nos tin “hopi di hasi den e trabou di Señor.” (1 Kor. 15:58) Ora Hesus tabata papia tokante tur e susesonan importante ku lo tuma lugá durante e último dianan, el a profetisá loke nos, komo sirbidó di Dios, lo hasi. El a bisa: “Ademas, mester prediká e bon notisia den tur nashon promé.” (Mar. 13:4, 8, 10; Mat. 24:14) Pensa riba esaki: Kada biaha ku bo bai den sirbishi, bo ta partisipá den kumplimentu di e profesia bíbliko ei!

 8. Kon nos sa ku e trabou di prediká ta sigui progresá?

⁸ Tur aña, mas hende ta skucha e bon notisia di Reino. E kantidat di publikadó di Reino a oumentá durante e último dianan. Na 1914, tabatin 5.155 publikadó den 43 pais. Awe, nos ta mas o ménos 8.5 mion publikadó den 240 pais! Pero, nos trabou no a kaba ainda. Nos mester sigui bisa hende ku ta e Reino di Dios so por resolvé e problemanan di humanidat.—Sal. 145:11-13.

 9. Dikon nos mester sigui prediká e mensahe di Reino?

⁹ Nos lo sigui prediká te ora Yehova bisa nos: “Ta kla.” Kuantu tempu a sobra pa hende siña konosé Yehova Dios i Hesukristu? (Huan 17:3) Nos no sa. Loke sí nos sa ta ku promé ku tribulashon grandi kuminsá, tur hende ku ta “dispuesto pa aseptá e bèrdat ku ta hiba na bida eterno” ainda tin chèns pa sirbi Yehova. (Echo. 13:48) Kon nos por yuda nan promé ku ta lat?

10. Ki yudansa Yehova ta duna nos pa siña hende e bèrdat?

¹⁰ Yehova, pa medio di su organisashon, ta dunando nos tur loke nos mester pa siña hende e bèrdat. Por ehèmpel, tur siman nos ta haña entrenamentu na e reunion di den siman. Ei nos ta siña kiko pa bisa na e promé kòmbersashon i rebishita i kon pa dirigí estudio di Beibel. Yehova su organisashon tambe a perkurá e publikashonnan den nos Kaha di Hèrmènt (Teaching Toolbox). E publikashonnan ei ta yuda nos . . .

• kuminsá kòmbersashon,

• lanta interes di hende,

• motivá nan pa siña mas di Beibel,

• siña e bèrdat na un studiante di Beibel i

• invitá hende interesá pa bishitá nos website i Salòn di Reino.

Klaru ku no ta sufisiente pa djis tin e hèrmèntnan ei. Nos mester sa kon pa usa nan tambe.d Por ehèmpel, si despues di un kòmbersashon ameno ku un hende interesá, bo laga un tratado òf revista p’e, lo e tin algu pa lesa te ora bo tuma kontakto kuné atrobe. Kada un di nos tin e responsabilidat di keda okupá tur luna den e trabou di prediká.

11. Dikon a diseñá e sekshon Kurso di Beibel Online?

¹¹ Yehova ta yuda hende haña e bèrdat na otro manera tambe. Laga nos analisá e Kurso di Beibel Online riba jw.org^®. Dikon a diseñá e sekshon ei? Pasobra tur luna, rònt mundu un kantidat grandi di hende ta buska kurso di Beibel riba Internet. E kursonan riba nos website por yuda e hendenan ei kuminsá siña tokante e bèrdat di e Palabra di Dios. Ademas, algun hende ku bo ta papia kuné ta vasilá pa aseptá un kurso di Beibel. Si ta asina, mustra nan e sekshon ei riba nos website òf manda nan un link pa e kurso.e Si ta posibel, bo por mustra nan e kurso na un idioma ku nan ta komprondé.

12. Kiko un hende por siña for di e Kurso di Beibel Online?

¹² Nos Kurso di Beibel Online ta trata tema manera: Beibel i su outor, e personahenan prinsipal di Beibel i e mensahe di Beibel tokante un mihó futuro. Kada tema tin lès ku ta siña hende . . .

• kon Beibel por yuda nan,

• ken Yehova, Hesus i e angelnan ta,

• dikon Dios a krea hende i

• dikon tin sufrimentu i maldat.

E kurso ta splika tambe kon Yehova lo . . .

• kaba ku sufrimentu i morto,

• resusitá e mortonan i

• remplasá gobièrnu humano inútil ku e Reino di Dios.

13. Akaso e kurso online ta remplasá un estudio di Beibel? Splika.

¹³ E kurso online no ta remplasá un estudio di Beibel. Hesus a duna nos e privilegio di hasi disipel. Nos ke pa hende interesá hasi e lèsnan online, apresiá loke nan ta siña i haña gana di sa mas. Si esei sosodé, kisas nan lo aseptá pa un publikadó duna nan un estudio di Beibel. Na final di kada lès, ta pidi e kursista pa yena i manda un petishon pa asina un hende por bin yud’é siña mas di Beibel. Tur dia, via nos website, nos ta risibí for di rònt mundu un promedio di 230 petishon pa estudio di Beibel. Ta masha importante pa hende haña estudio di Beibel di forma personal!

14. Segun Mateo 28:19 i 20, kiko nos tin ku purba di hasi, i dikon?

¹⁴ Lesa Mateo 28:19, 20. Ora nos ta dirigí estudio di Beibel, nos mester hasi esfuerso pa ‘hasi hende disipel i siña nan kumpli ku tur loke Hesus a manda.’ Nos mester yuda nan komprondé ku ta importante pa nan skohe pa sirbi Yehova. Esei ta nifiká ku nos mester purba di animá nan pa apliká loke nan ta siña, dediká nan bida na Yehova i batisá. Di e manera ei so nan por sobrebibí e dia di Yehova.—1 Ped. 3:21.

15. Kiko nos no tin tempu pa hasi, i dikon?

¹⁵ Manera nos a menshoná anteriormente, a keda masha tiki tempu promé ku e fin di e sistema di kosnan akí. P’esei, nos no tin tempu pa sigui studia Beibel ku hende ku realmente no ta mustra ku nan tin gana di bira disipel di Kristu. (1 Kor. 9:26) Nos trabou ta urgente! Ainda falta hopi hende ku mester skucha e mensahe di Reino promé ku ta demasiado lat.

16. Segun Revelashon 18:2, 4, 5 i 8, kiko nos tur mester hasi? (Wak tambe e nota.)

¹⁶ Lesa Revelashon 18:2, 4, 5, 8. E versíkulonan ei ta mustra algu mas ku Yehova ta ferwagt pa nos hasi. Tur kristian berdadero mester hasi sigur ku di ningun manera nan no ta enbolbí ku religion falsu. Kisas, promé ku un studiante di Beibel a haña e bèrdat, e tabata miembro di un religion falsu. Probablemente e tabata asistí na nan sirbishi religioso i a partisipá den nan aktividatnan òf tabata kontribuí finansieramente. Promé ku aprob’é komo un publikadó no-batisá, e mester kibra tur laso ku ta konekt’é ku religion falsu. E mester skirbi i manda un karta di renunsia na e iglesia ku e tabata bai òf kualke organisashon ku ta parti di religion falsu.f

17. Ki tipo di trabou un kristian lo no hasi, i dikon?

¹⁷ Un kristian berdadero ta hasi sigur ku su trabou no tin nada di haber ku religion falsu. (2 Kor. 6:14-17) Por ehèmpel, lo e no traha pa un iglesia. Ademas, un kristian ku ta traha pa un negoshi ku mester hasi un trabou di emergensia na un edifisio òf lugá ku ta promové adorashon falsu, mester disidí kiko pa hasi. E artíkulo menshoná den e nota na pia di página lo ta di gran yudansa p’e. I si e ta traha riba su mes, ta klaru ku lo e no ofresé su servisio na instansia ligá ku religion falsu, ni aseptá un kontrakt di trabou for di nan. Dikon e asuntu akí ta asina serio pa nos? Pasobra nos no ke tin parti den e aktividatnan òf pikánan di organisashon religioso ku ta impuru den bista di Dios.—Isa. 52:11.g

18. Kon un ruman a pega na e prinsipionan di Beibel tokante su trabou?

¹⁸ Algun aña pasá, un kontratista a ofresé un ansiano ku tabatin su mes negoshi un djòp chikitu di karpinté na un iglesia den e stat kaminda e ruman ta biba. E kontratista tabata sa ku e ruman semper a bisa ku lo e no traha na un iglesia. Pero, e biaha akí e kontratista tabata desesperá; e no por a haña niun hende pa hasi e trabou. Apesar di esei, e ruman a pega na e prinsipionan di Beibel i a nenga e trabou. E siguiente siman, e korant lokal a publiká potrèt di un otro karpinté ta pega un krus na e iglesia. Si nos ruman no a pega na e prinsipionan di Beibel i si el a aseptá e trabou ei, ta su potrèt lo tabata den korant. Bo por imaginá kon esei lo a daña su reputashon den kongregashon? I kon bo ta kere Yehova lo a sintié?

19-20. (a) Kiko nos a siña te awor? (b) Kiko mas nos mester sa?

¹⁹ Segun profesia di Beibel, e siguiente suseso importante ku pronto lo tuma lugá ta ku e lidernan polítiko lo anunsiá ku nan a logra “pas i siguridat.” Debí na loke Yehova a siña nos, nos sa ku realmente e nashonnan lo no logra berdadero pas. Kiko nos mester hasi promé ku e lidernan polítiko proklamá “pas i siguridat” i “tribulashon grandi” kuminsá? Yehova ta ferwagt pa nos keda okupá den e trabou di prediká e mensahe di Reino i sigui hasi esfuerso pa hasi mas disipel. Na mes momento, nos mester keda leu for di tur religion falsu. Esei ta inkluí ku nos mester stòp di ta miembro di religion falsu i no aseptá niun trabou ku ta ligá kuné.

²⁰ Tin mas suseso ku lo tuma lugá durante e parti final di “e último dianan.” I tin mas kos ku Yehova ta ferwagt pa nos hasi. Kiko eseinan ta, i kon nos por prepará nos mes pa tur e kosnan ku ta bini den futuro serkano? Nos lo bai mira esei den e siguiente artíkulo.