Tene Bo “Speransa di Salbacion” Briyante!

“Tene bistí . . . como helm e speransa di salbacion.”—1 TESALONICENSENAN 5:8.

 1. Con “e speransa di salbacion” ta yuda nos wanta?

ESPERANSA cu lo e salba por yuda un hende wanta asta bou dje circunstancia di mas difícil. Un víctima di naufragio cu ta drif riba un pida palu por perseverá hopi mas largu si e sa cu tin yudansa na caminda. Mescos, pa miles di aña caba, speransa den “e salbacion di Jehova” a sostené homber i muhernan di fe den tempu difícil, i nunca e speransa aki no a hiba na desilusion. (Exodo 14:13; Salmo 3:8; Romanonan 5:5; 9:33) Apostel Pablo a compará “e speransa di salbacion” cu “e helm” di un cristian su armadura spiritual. (1 Tesalonicensenan 5:8; Efesionan 6:17) Sí, e echo cu nos tin sigur cu Dios lo salba nos, ta protehá nos facultad mental i ta yuda nos keda cu sano huicio apesar di adversidad, oposicion i tentacion.

 2. Den ki maneranan “e speransa di salbacion” ta un parti fundamental di adoracion berdadero?

² “Speransa den futuro no tabata algu típico dje mundu pagano,” e mundu cu a rondoná e cristiannan di promé siglo, segun The International Standard Bible Encyclopedia. (Efesionan 2:12; 1 Tesalonicensenan 4:13) Sin embargo, “e speransa di salbacion” ta un elemento básico di adoracion berdadero. Con asina? Di promé, salbacion di Jehova su sirbidónan tin di haber cu su propio nomber. E salmista Asaf a resa: “Yuda nos, o Dios di nos salbacion, pa motibu dje gloria di bo nomber; i libra nos.” (Salmo 79:9; Ezekiel 20:9) Ademas, confiansa den e bendicionnan cu Jehova a primintí ta esencial pa por tin un bon relacion cuné. Pablo a expresá esei dje siguiente manera: “Sin fe ta imposibel pa agrad’é bon, pasobra esun cu ta acudí na Dios mester kere cu e ta existí i cu e ta bira e recompensador di esnan cu ta busk’é cu empeño.” (Hebreonan 11:6) Ademas, Pablo a splica cu un dje motibunan principal cu Jesus a bini na tera tabata pa hende repentí por haña salbacion. El a declará: “Fiel i merecedor di pleno aceptacion ta e palabra di cu Cristo Jesus a bini na mundu pa salba pecadó.” (1 Timoteo 1:15) I apostel Pedro a referí na salbacion como ‘e fin [of resultado final] di nos fe.’ (1 Pedro 1:9) Claramente, ta apropiado pa nos spera salbacion. Pero kico salbacion ta precis? I ki rekisito tin pa nos obten’é?

Kico Salbacion Ta?

 3. Ki tipo di salbacion e sirbidónan di Jehova den tempu di antigwedad a experimentá?

³ Den e Scritura Hebreo, generalmente “salbacion” kier men rescate of liberacion for di opresion, of for di un morto violento of prematuro. Por ehempel, yamando Jehova “e Percurador di escape,” David a bisa: “Mi Dios ta mi baranca. . . . Mi lugá di refugio, mi Salbador; di violencia bo ta salba mi. Jehova, Esun cu mester ser alabá lo mi yama, i di mi enemigunan lo mi ser salbá.” (2 Samuel 22:2-4) David tabata sa cu Jehova ta scucha ora Su sirbidónan fiel ta sclama pa yudansa.—Salmo 31:22, 23; 145:19.

 4. Ki speransa di bida den futuro sirbidónan di Jehova pre-cristian tabatin?

⁴ E sirbidónan di Jehova pre-cristian tambe a carga speransa di biba den futuro. (Job 14:13-15; Isaías 25:8; Daniel 12:13) De echo, hopi dje promesanan di rescate cu tin den e Scritura Hebreo a profetisá un salbacion mayor, unu cu lo hiba na bida eterno. (Isaías 49:6, 8; Echonan 13:47; 2 Corintionan 6:2) Den tempu di Jesus, hopi hudiu a spera di biba pa semper, pero nan a nenga di aceptá Jesus como e clave pa realisá nan speransa. Jesus a bisa e lidernan religioso di su tempu: “Boso ta scudriñá e Scritura, pasobra boso ta kere cu pa medio di nan boso lo tin bida eterno; i ta net nan ta duna testimonio tocante mi.”—Juan 5:39.

 5. Kico salbacion ta nificá den un sentido completo?

⁵ Pa medio di Jesus, Dios a revelá e nificacion completo di salbacion. E ta encerá liberacion for di gobernacion di picá, sclabitud na religion falsu, e mundu bou di control di Satanas, miedu di hende, i asta miedu di morto. (Juan 17:16; Romanonan 8:2; Colosensenan 1:13; Revelacion 18:2, 4) Finalmente, pa Dios su sirbidónan fiel, e salbacion di Dios ta nificá no únicamente liberacion for di opresion i afliccion, sino tambe e oportunidad di haña bida eterno. (Juan 6:40; 17:3) Jesus a siña cu pa un “trupa chikitu,” salbacion ta nificá cu nan lo resucitá pa bida celestial pa participá den gobernacion di Reino huntu cu Cristo. (Lucas 12:32) Pa resto di humanidad, salbacion ta nificá restoracion n’e bida perfecto, i e relacion perfecto cu Dios cu Adam i Eva a gosa di dje den e hofi di Eden promé cu nan a peca. (Echonan 3:21; Efesionan 1:10) Bida eterno den e condicionnan paradísico ei tabata Dios su propósito original pa humanidad. (Génesis 1:28; Marco 10:30) Pero, con ta posibel pa restorá nos na e condicionnan ei?

E Base pa Salbacion—E Rescate

 6, 7. Ki papel Jesus ta hunga den nos salbacion?

⁶ Ta pa medio dje sacrificio di rescate di Cristo so salbacion eterno ta posibel. Di con? Bijbel ta splica cu ora Adam a peca, el a “bende” su mes i tur su desendientenan, incluso nos, na picá. P’esei, sin un rescate humanidad lo no tin ningun speransa válido. (Romanonan 5:14, 15; 7:14) E sacrificionan di bestia bou dje Ley di Moises a prefigurá e echo cu Dios lo a percurá un rescate pa henter humanidad. (Hebreonan 10:1-10; 1 Juan 2:2) Jesus ta esun cu a cumpli cu e ilustracionnan profético ei mediante su sacrificio. Promé cu Jesus su nacementu e angel di Jehova a anunciá: “Lo e salba su pueblo di nan picánan.”—Mateo 1:21; Hebreonan 2:10.

⁷ Jesus a nace milagrosamente di bírgen Maria, i como e Yu di Dios, e no a heredá morto for di Adam. E echo aki, ademas di su carera di fieldad perfecto, a duna su bida e balor necesario pa cumpra humanidad bek for di morto i picá. (Juan 8:36; 1 Corintionan 15:22) Diferente for di tur otro hende, Jesus no tabata condená pa muri pa motibu di picá. El a bini na mundu cu e meta specífico “pa duna su alma como rescate en cambio pa hopi.” (Mateo 20:28) Despues cu el a haci esei i ta awor resucitá i entronisá, Jesus ta den posicion pa duna salbacion na tur hende cu yena Dios su rekisitonan.—Revelacion 12:10.

Kico Ta Rekerí pa Obtené Salbacion?

 8, 9. (a) Con Jesus a contestá e pregunta di un hóben gobernante ricu tocante salbacion? (b) Con Jesus a usa e ocasion aki pa siña su disipelnan?

⁸ Un biaha, un gobernante israelita hóben ricu a puntra Jesus: “Kico mi tin cu haci pa heredá bida eterno?” (Marco 10:17) Kisas su pregunta a reflehá e pensamentu hudiu comun den su tempu, esta, cu Dios ta exigí cierto bon obra, i cu dor di efectuá suficiente di nan bo por gana salbacion cerca Dios. Pero e tipo di debocion ei mediante obra lo por bini di motivacionnan egoista. E tipo di obranan ei no a logra duna un speransa sigur di salbacion, pasobra ningun ser humano imperfecto por a ègt cumpli cu Dios su normanan.

⁹ Contestando e pregunta dje homber, Jesus a djis cord’é cu e mester obedecé Dios su mandamentunan. E hóben gobernante a sigurá Jesus mesora cu el a obedecé nan desde su hubentud. Su contesta a motivá Jesus pa sinti amor p’e. Jesus a bis’é: “Un solo cos bo falta: Bai, bende loke bo tin i duna na hende pober, i lo bo tin tesoro den shelu, i bin, sea mi siguidó.” Pero e hóben a bira bai tur tristu, “pasobra e tabata doño di hopi propiedad.” Despues di esei Jesus a enfatisá na su disipelnan cu demasiado apego na artículonan dje mundu aki por stroba hende di obtené salbacion. El a agregá cu niun hende no por obtené salbacion dor di su esfuerso propio. Pero Jesus a trankilisá nan bisando: “Cu hende esei ta imposibel, pero no ta asina cu Dios, pasobra tur cos ta posibel pa Dios.” (Marco 10:18-27; Lucas 18:18-23) Con salbacion ta posibel?

10. Ki condicionnan nos mester cumpli cuné pa nos obtené salbacion?

¹⁰ Salbacion ta un regalo di Dios, pero e no ta bini automáticamente. (Romanonan 6:23) Tin algun condicion básico cu tur individuo mester cumpli cuné pa por cualificá p’e regalo ei. Jesus a bisa: “Dios a stima mundu asina tantu cu el a duna su Yu unigénito, pa tur cu ehercé fe den dje no sea destruí sino haña bida eterno.” I apostel Juan a agregá: “Esun cu ehercé fe den e Yu tin bida eterno; esun cu ta desobedecé e Yu lo no mira bida.” (Juan 3:16, 36) Ta bisto cu Dios ta rekerí fe i obedencia di tur persona cu ta spera di obtené salbacion eterno. Cada persona individual mester tuma e decision di aceptá e rescate i sigui e pasonan di Jesus.

11. Con un hende imperfecto por gana Jehova su aprobacion?

¹¹ Ya cu nos ta imperfecto, nos inclinacion natural no ta pa obedecé, i ta imposibel pa nos obedecé perfectamente. Ta p’esei Jehova a percurá un rescate pa cubri nos picánan. Sin embargo, nos mester haci un esfuerso continuo pa biba na armonia cu Dios su camindanan. Manera Jesus a bisa e hóben gobernante ricu, nos mester warda Dios su mandamentunan. Si nos haci esei nos lo haña no solamente Dios su aprobacion, sino un gran goso tambe, pasobra “su mandamentunan no ta un carga pisá”; nan ta “un refrescamentu.” (1 Juan 5:3; Proverbionan 3:1, 8) Tog no ta fácil pa keda tene n’e speransa di salbacion.

“Hiba un Lucha Duru pa e Fe”

12. Con e speransa di salbacion ta fortalecé un cristian p’e resistí tentacionnan inmoral?

¹² Disipel Hudas kier a skirbi e promé cristiannan tocante “e salbacion cu [nan tabatin] en comun.” Sin embargo, e ambiente inmoral cu a reina a obligu’é consehá su rumannan pa nan “hiba un lucha duru pa e fe.” Sí, pa gana salbacion, no ta suficiente pa bo tin fe, pega n’e fe cristian berdadero i obedecé ora tur cos ta bai fácil. Nos debocion na Jehova mester ta suficiente fuerte pa yuda nos resistí tentacion i influencia inmoral. Pero, exceso i perversionnan sexual, falta di respet pa autoridad, division i duda tabata corumpí e condicion mental i moral dje congregacion di promé siglo. Pa yuda nan combatí e tipo di tendencianan ei, Hudas a urgi su compañeronan cristian pa tene nan meta cla den nan mente: “Stimánan, dor di edificá boso mes riba boso santísimo fe, i haci oracion cu spiritu santu, mantené boso den e amor di Dios, miéntras cu boso ta spera e misericordia di nos Señor Jesucristo cu bida eterno na bista.” (Hudas 3, 4, 8, 19-21) E speransa di gana salbacion por a fortalecé nan den nan lucha pa keda limpi den sentido moral.

13. Con nos por mustra cu nos no a keda sin cumpli cu e propósito di Dios su bondad inmerecí?

¹³ Jehova Dios ta spera conducta moral ehemplar di parti di esnan cu e lo concedé salbacion. (1 Corintionan 6:9, 10) Pero, cumpli cu Dios su normanan moral no kier men cu nos lo cuminsá husga otronan. No ta nos ta dicidí e destino eterno di otro sernan humano. Mas bien, ta Dios lo haci esei, manera Pablo a bisa e griegonan na Aténas: “El a fiha un dia den cua e tin e propósito di husga e tera habitá den husticia dor di un homber ken el a nombra,” Jesucristo. (Echonan 17:31; Juan 5:22) Si nos ta biba pa medio di fe den e rescate di Jesus nos no tin nodi teme un dia di huicio binidero. (Hebreonan 10:38, 39) Loke ta importante ta pa nos nunca “aceptá e bondad inmerecí di Dios [nos reconciliacion cuné pa medio dje rescate] i keda sin cumpli cu su propósito” dor di permití nos mes ser tentá pa pensa i actua na moda robes. (2 Corintionan 6:1) Ademas, dor di yuda otronan gana salbacion, nos ta mustra cu nos no a keda sin cumpli cu e propósito di Dios su misericordia. Con nos por yuda nan?

Compartí e Speransa di Salbacion

14, 15. Ken Jesus a asigná pa anunciá e bon nobo di salbacion?

¹⁴ Citando profeta Joël, Pablo a skirbi: “Tur cu inbocá e nomber di Jehova lo ser salbá.” Anto el a agregá: “Sin embargo, con nan lo inbocá esun den ken nan no a pone fe? Con, na nan turno, nan lo pone fe den esun di ken nan no a tende? Con, na nan turno, nan lo tende sin un hende pa predicá?” Un par di versículo mas despues, Pablo ta mustra cu fe no ta bini di mes, sino ta “sigui loke a tende,” esta “e palabra tocante Cristo.”—Romanonan 10:13, 14, 17; Joël 2:32.

¹⁵ Ken lo hiba “e palabra tocante Cristo” p’e nacionnan? Jesus a asigná e trabou ei na su disipelnan, esnan cu a ser siñá tocante e “palabra” ei caba. (Mateo 24:14; 28:19, 20; Juan 17:20) Ora nos participá den e trabou di predicá e Reino i haci disipel, nos ta haciendo net loke apostel Pablo a papia di dje, e biaha aki citando Isaías: “Ki bunita ta e pianan di esnan cu ta declará bon nobo di bon cosnan!” Asta si hopi hende keda sin aceptá e bon nobo cu nos ta hiba, tog nos pia ta “bunita” pa Jehova.—Romanonan 10:15; Isaías 52:7.

16, 17. Ki meta dòbel nos trabou di predicá ta logra?

¹⁶ Dor di cumpli cu e comision aki nos ta sirbi dos propósito importante. Di promé, mester predicá e bon nobo pa Dios su nomber sea halsá, i pa esnan cu kier haña salbacion por sa unda pa acudí. Pablo a comprendé e aspecto aki dje comision. El a declará: “Realmente Jehova a duna nos e mandamentu cu e palabranan aki: ‘Mi a nombra bo como lus dje nacionnan, pa bo ser un salbacion te na extremidad di tera.’” Pues, como disipel di Cristo, cada un di nos tin cu participá den hiba e mensahe di salbacion n’e hendenan.—Echonan 13:47; Isaías 49:6.

¹⁷ Di dos, predicacion dje bon nobo ta forma e base pa Dios su huicio hustu. Tocante e huicio ei, Jesus a bisa: “Ora e Yu di hende yega den su gloria, i tur e angelnan huntu cuné, e ora ei lo e sinta riba su trono glorioso. I tur e nacionnan lo ser reuní dilanti dje, i lo e separá hende un for di otro, mescos cu un wardadó ta separá carné for di cabritu.” Apesar cu e husgamentu i e separacion lo tuma lugá “ora e Yu di hende yega den su gloria,” e trabou di predicá ta duna hende awe e oportunidad di reconocé e rumannan spiritual di Cristo i asina traha pa apoyá nan, pa nan propio salbacion eterno.—Mateo 25:31-46.

Tene “Pleno Siguransa dje Speransa”

18. Con nos por tene nos “speransa di salbacion” briyante?

¹⁸ Ademas, nos participacion activo den e trabou di predicá ta un manera tambe pa yuda nos tene nos speransa briyante. Pablo a skirbi: “Nos ta deseá pa cada un di boso mustra e mésun diligencia afin di tene pleno siguransa dje speransa te na fin.” (Hebreonan 6:11) Pues, ohalá nos tur bisti “como helm e speransa di salbacion,” cordando cu “Dios no a asigná nos n’e rabia, sino pa gana salbacion mediante nos Señor Jesucristo.” (1 Tesalonicensenan 5:8, 9) Laga nos duna debido atencion n’e spiertamentu di Pedro tambe: “Fortificá boso mente pa actividad, mantené boso sano huicio completamente; pone boso speransa riba e bondad inmerecí cu lo ser duná na boso.” (1 Pedro 1:13) Tur cu haci asina lo mira nan “speransa di salbacion” cumpli henteramente!

19. Kico nos lo considerá den e siguiente artículo?

¹⁹ Entre tantu, ki punto di bista nos mester tin di e tempu cu a sobra p’e sistema aki? Con nos por usa e tempu ei pa obtené salbacion pa nos mes i pa otronan? Nos lo considerá e preguntanan aki den e siguiente artículo.

Bo Por Splica?

• Pakico nos tin cu tene nos “speransa di salbacion” briyante?

• Kico salbacion ta encerá?

• Kico nos mester haci pa ricibí e don di salbacion?

• Kico nos trabou di predicá ta logra na armonia cu Dios su propósito?

[Plachinan na página 10]

Salbacion kier men mas cu djis ser librá for di destruccion