Incita Otro na Amor i Na Obranan Excelente—Con?

“Laga nos considerá un e otro pa incitá otro na amor i na obranan excelente, . . . animá un e otro, i tantu mas segun cu boso ta contemplá e dia yegando cerca.”—HEBREONAN 10:24, 25.

 1, 2. (a) Pakico tabata importante p’e cristiannan di promé haña consuelo i animacion den nan reunimentu huntu? (b) Cua conseho di Pablo a mustra e necesidad pa reuní huntu?

NAN a reuní den secreto, agrupá huntu tras di porta cerá na lock. Pafó, peliger tabata loer nan tur caminda. Nan Lider, Jesus, a caba di ser ehecutá públicamente, i el a spierta su siguidornan cu nan lo no ser tratá mihó cuné. (Juan 15:20; 20:19) Pero miéntras cu nan tabata papia den tono abou di nan kerido Jesus, siendo huntu mester a por lo ménos laga nan sinti nan mas sigur.

² Segun cu e añanan a pasa, cristiannan a enfrentá tur clase di prueba i persecucion. Mescos cu e disipelnan ei di promé, nan a saca consuelo i animacion for di reunimentu huntu. Pues, apostel Pablo a skirbi na Hebreonan 10:24, 25: “Laga nos considerá un e otro pa incitá otro na amor i na obranan excelente, sin bandoná nos reunimentu huntu, manera algun tin e custumber, sino animá un e otro, i tantu mas segun cu boso ta contemplá e dia yegando cerca.”

 3. Pakico lo bo bisa cu Hebreonan 10:24, 25 ta mas cu solamente un mandamentu pa cristiannan reuní huntu?

³ E palabranan ei ta muchu mas cu un mandamentu pa sigui reuní huntu. Nan ta duna un norma divinamente inspirá pa tur reunimentu cristian—i realmente, pa cualkier ocasion ora cristiannan ta asociá huntu. Awe mas cu nunca, ora nos ta contemplá claramente Jehova su dia yegando cerca, e presionnan i peligernan dje sistema malbado aki ta haci’é imperativo pa nos reunionnan por ta manera un refugio sigur, un fuente di fortalesa i animacion pa tur. Kico nos por haci pa garantisá esaki? Wel, laga nos examiná Pablo su palabranan cuidadosamente, haciendo tres pregunta principal: Kico ta nificá “considerá un e otro”? Kico ta nificá ‘incitá un e otro na amor i na obranan excelente’? Finalmente, con nos por “animá un e otro” den e tempu difícil aki?

“Considerá Un e Otro”

 4. Kico ta nificá “considerá un e otro”?

⁴ Ora Pablo a urgi cristiannan pa “considerá un e otro,” el a usa e verbo griego ka·ta·no·eʹo, un forma intensificá dje expresion comun “percibí.” E Theological Dictionary of the New Testament ta bisa cu e ta nificá “dirigí henter bo mente na un obheto.” Segun W. E. Vine, e por nificá tambe “comprendé completamente, considerá atentamente.” Pues ora cristiannan ta “considerá un e otro,” nan ta mira no solamente e superficie sino nan ta usa tur nan facultadnan mental i ta purba mira mas profundo.—Compará cu Hebreonan 3:1.

 5. Kico ta algun aspecto di un persona cu kisas no ta ser observá mesora, i pakico nos mester considerá esakinan?

⁵ Nos tin cu corda cu un persona tin hopi mas aden cu loke un mirada superficial di su aparencia, obranan of personalidad por revelá. (1 Samuel 16:7) Hopi biaha un temperamentu ketu ta cubri sintimentunan profundo of un sentido di humor agradabel. Anto, tambe, antecedencia ta varia hopi. Algun hende a pasa den experencianan teribel den nan bida; otronan ta wantando n’e momentonan aki situacionnan cu nos lo haña ta difícil pa imaginá. Cuantu biaha sa sosodé cu nos iritacion riba algu peculiar di un ruman ta desparcé ora nos haña sa mas tocante e persona su antecedencia of circunstancianan.—Proverbionan 19:11.

 6. Cua ta algun manera den cua nos por yega na conocé un e otro mihó, i ki bon resultado esei por tin?

⁶ Naturalmente, esaki no ta nificá cu sin cu nos a ser invitá nos mester entremeté den otro hende su asuntunan personal. (1 Tesalonicensenan 4:11) Tog, nos siguramente por mustra interes personal den un e otro. Esaki ta enbolbé mas cu un simpel saludo na Salon di Reino. Pakico no scoge un hende cu lo bo kier conocé mihó i papia cuné pa un par di minuut promé of despues di reunion? Mihó ainda, “sigui e curso di hospitalidad” dor di invitá un of dos ruman na bo cas pa algun pasaboca simpel. (Romanonan 12:13) Mustra interes. Scucha. Djis dor di puntra con un individuo a yega na conocé i stima Jehova por revelá masha tantu. Sin embargo, bo por siña asta mas dor di traha huntu den e ministerio di cas-pa-cas. Considerando un e otro den tal maneranan lo yuda nos desaroyá berdadero sintimentu pa otro, of empatia.—Filipensenan 2:4; 1 Pedro 3:8.

‘Incitá Un e Otro’

 7. (a) Con Jesus su siñansa a afectá hende? (b) Kico a haci su siñansa asina dinámico?

⁷ Ora nos ta considerá un e otro, nos ta mihó prepará pa incitá, pa urgi un e otro na accion. Ancianonan cristian en particular ta hunga un papel clave den e aspecto aki. Na un ocasion ora Jesus a papia públicamente, nos ta lesa: “E efecto tabata cu e multitudnan a keda asombrá di su manera di siña.” (Mateo 7:28) Na un otro ocasion asta algun soldat cu a ser mandá pa arest’é a bai for di dje bisando: “Nunca un otro hende a papia asina aki.” (Juan 7:46) Kico a haci Jesus su siñansa asina dinámico? Manifestacionnan di emocionalismo? No; Jesus a papia cu dignidad. Sin embargo, semper el a mik pa alcansá curason di su oyentenan. Pasobra el a considerá hende, e tabata sa exactamente con pa motivá nan. El a usa ilustracionnan bibu i simpel cu a reflehá e realidadnan di bida di tur dia. (Mateo 13:34) Di igual manera, esnan cu ta cumpli cu asignacionnan na nos reunionnan mester imitá Jesus dor di duna presentacionnan caluroso, entusiástico i motivador. Mescos cu Jesus, nos por haci esfuerso diligente pa haña ilustracionnan cu ta cuadra cu nos auditorio i ta alcansá nan curason.

 8. Con Jesus a incitá otronan pa medio di ehempel, i con nos lo por imit’é den e aspecto aki?

⁸ Sirbiendo nos Dios, nos tur por incitá un e otro pa medio di ehempel. Jesus siguramente a incitá su oyentenan. El a stima e trabou dje ministerio cristian i a exaltá e ministerio. El a bisa cu e tabata manera cuminda p’e. (Juan 4:34; Romanonan 11:13) Tal entusiasmo por ta contagioso. Bo por laga bo goso den e ministerio di igual manera bira bisto pa otronan? Miéntras cu bo ta evitá cuidadosamente un tono di broma, compartí bo bon experencianan cu otronan den e congregacion. Ora bo ta invitá otronan pa traha cu bo, mira si bo por yuda nan haña berdadero placer den papia cu otronan tocante nos Magnífico Creador, Jehova.—Proverbionan 25:25.

 9. (a) Cua ta algun método pa incitá otronan cu nos lo kier evitá, i pakico? (b) Kico mester motivá nos pa duna di nos mes den Jehova su sirbishi?

⁹ Sin embargo, sea cauteloso pa no incitá otronan den e manera incorecto. Por ehempel, sin cu nos sa nos por haci nan sinti nan culpabel di no ta haciendo mas tantu. Sin mal intencion nos por brongosá nan dor di compará nan desfaborablemente cu otronan cu tin un participacion mas grandi den actividadnan cristian, of nos por asta establecé normanan rígido i menospreciá esnan cu no ta cualificá. Cualkier dje métodonan aki lo por move algun na accion pa un tempu, pero Pablo no a skirbi, ‘Incitá otro na culpa i na obranan excelente.’ No, nos mester incitá otro na amor, anto e obranan lo sigui impulsá pa un bon motivacion. Ningun hende mester ser motivá na promé lugá dor di loke otronan den e congregacion lo pensa tocante dje si e no ta cumpli cu e expectativanan.—Compará cu 2 Corintionan 9:6, 7.

10. Pakico nos mester corda cu nos no ta doño riba e fe di otronan?

¹⁰ Incitá un e otro no kier men controlá un e otro. Aunke apostel Pablo tabatin hopi autoridad duná dor di Dios, humildemente el a recordá e congregacion corintio: ‘Nos no ta doño riba boso fe.’ (2 Corintionan 1:24) Si mescos cuné nos realisá humildemente cu no ta nos tarea pa determiná cuantu otronan mester haci den sirbishi na Jehova, of pa regulá nan concenshi pa nan den otro decisionnan personal, nos lo evitá di bira “demasiado hustu,” sin goso, rígido, negativo of incliná na regla. (Eclesiastes 7:16) Tal cualidadnan no ta incitá; nan ta oprimí.

11. Kico a impulsá e dunamentu di contribucion den e dianan dje construccion dje tabernáculo di Israel, i con esei lo por ta e caso den nos tempu?

¹¹ Nos kier pa tur esfuerso den Jehova su sirbishi ser hací den e mésun spiritu manera den Israel antiguo ora donacionnan tabata necesario p’e construccion dje tabernáculo. Exodo 35:21 ta bisa: “Anto nan a bini, tur kende su curason a impuls’é, i nan a trece, tur kende su spiritu a incit’é, Jehova su contribucion p’e trabou.” Nan no tabata obligá dor di forsanan externo, sino impulsá dor di forsanan interno, for di curason. Realmente, e palabra hebreo literalmente ta bisa aki cu “tur hende kende su curason a lant’é” a duna tal regalonan. (Letra cursivo ta di nos.) Bayendo mas aleu, laga nos haci esfuerso pa lanta curason di un e otro ki ora cu nos ta huntu. Jehova su spiritu por haci sobrá.

‘Animá Un e Otro’

12. (a) Cua ta algun nificacion dje palabra griego traducí como “animá”? (b) Con Job su compañénan a faya pa anim’é? (c) Pakico nos mester abstené nos mes di husga un e otro?

¹² Ora Pablo a skirbi cu nos mester ‘animá un e otro’ el a usa un forma dje palabra griego pa·ra·ka·leʹo, cua por nificá tambe ‘fortalecé, consolá.’ Den e version Setenta Griego, e mésun palabra aki a ser usá na Job 29:25, caminda Job a ser describí como un persona cu ta consolá esnan na luto. Irónicamente, ora Job mes tabata bou di prueba severo, e no a ricibí tal animacion. Su tres “consoladornan” tabata asina ocupá husgand’e i dunand’e reprendimentu cu nan no a comprend’é of sinti p’e. Realmente, den tur nan papiamentu, ni sikiera un biaha nan no a dirigí nan mes na Job usando su nomber. (Haci contraste cu Job 33:1, 31.) Evidentemente, nan a mir’é mas como un problema cu como un persona. Nada straño cu Job a sclama na nan den frustracion: “Si solamente boso almanan a existí caminda mi alma ta”! (Job 16:4) Di igual manera awe, si bo kier animá un persona, mustra empatia! No husga. Romanonan 14:4 ta bisa, “ken bo ta pa husga e criá di un otro? Pa su mes doño e ta para of e ta cai. En berdad, lo e haci’é para, pasobra Jehova por haci’é para.”

13, 14. (a) Di ki berdad fundamental nos mester convencé nos rumannan afin di consolá nan? (b) Con Daniel a ser fortalecí dor di un angel?

¹³ Un forma di pa·ra·ka·leʹo i su sustantivo relacioná ta ser traducí como “consuelo” na 2 Tesalonicensenan 2:16, 17: “Ademas, laga nos Señor Jesucristo mes i Dios nos Tata, kende a stima nos i a duna consuelo eterno i bon speransa pa medio di bondad inmerecí, consolá boso curason i haci boso firme den tur bon obra i palabra.” Nota cu Pablo ta conectá e pensamentu di cu nos curason ta ser consolá cu e berdad fundamental cu Jehova ta stima nos. Pues laga nos animá i consolá un e otro dor di confirmá tal berdad importante.

¹⁴ Na un ocasion profeta Daniel tabata asina molestiá despues cu el a mira un vision spantoso cu el a bisa: “Mi mes dignidad a ser cambia riba mi na ruinamentu, i mi no a retené ningun poder.” Jehova a manda un angel kende vários biaha a recordá Daniel cu e tabata “masha deseabel” den bista di Dios. Kico tabata e resultado? Daniel a bisa e angel: “Bo a fortalecé mi.”—Daniel 10:8, 11, 19.

15. Con ancianonan i superintendentenan biahero ta balansá encomendacion cu coreccion?

¹⁵ Ata aki, anto, un otro manera pa animá otronan. Encomendá nan! Ta masha fácil pa cai den un actitud mental crítico i severo. Ta cierto cu tin biaha coreccion por ta necesario, specialmente dor di ancianonan i superintendentenan biahero. Pero lo ta beneficioso pa nan si nan ser recordá pa nan animacion caluroso en bes di pa un actitud di piki pieu.

16. (a) Ora di animá esnan deprimí, pakico hopi biaha no ta suficiente pa simplemente urgi nan pa haci mas den Jehova su sirbishi? (b) Con Jehova a yuda Elías ora e tabata deprimí?

¹⁶ Particularmente esnan cu ta deprimí mester di animacion, i Jehova ta spera di nos como compañénan cristian pa ta un fuente di yudansa—specialmente si nos ta anciano. (Proverbionan 21:13) Kico nos por haci? E contesta kisas no ta asina simpel manera bisa nan pa haci mas den Jehova su sirbishi. Pakico? Pasobra esei por implicá cu nan depresion ta debí cu nan no ta haciendo suficiente. Esei generalmente no ta e caso. Profeta Elías un biaha tabata asina profundamente deprimí cu el a deseá di muri; sin embargo esaki a sosodé den un tempu ora e tabata sumamente ocupá den su sirbishi na Jehova. Con Jehova a trata cuné? El a manda un angel pa duna yudansa práctico. Elías a expresá su sintimentunan profundo na Jehova, revelando cu el a sinti cu e tabata mes inútil cu su antepasadonan defuntu, cu su trabou tabata completamente en bano, i cu e tabata totalmente solitario. Jehova a scuch’é i a consol’é cu demostracionnan inspirador di temor di Su poder i cu siguransa cu e siguramente no tabata solitario i cu e trabou cu el a cuminsá lo ser completá. Tambe Jehova a primintí di duna Elías un compañé p’e entrená kende cu tempu lo sigui’é.—1 Reynan 19:1-21.

17. Con un anciano lo por animá un ruman cu ta excesivamente crítico cu su mes?

¹⁷ Ki animador! Laga nos di igual manera animá esnan entre nos cu ta emocionalmente perturbá. Busca pa comprendé nan dor di scucha! (Santiago 1:19) Duna consuelo bíblico adaptá na nan necesidadnan individual. (Proverbionan 25:11; 1 Tesalonicensenan 5:14) Pa animá esnan cu ta excesivamente crítico cu nan mes, ancianonan por ofrecé bondadosamente evidencia bíblico cu Jehova ta stima i ta considerá nan di masha balor.a Considerando e rescate por ta un medio poderoso pa animá esnan cu ta sinti nan mes sin balor. Un persona cu ta pena riba un cierto picá di pasado kisas mester ser mustrá cu e rescate a purifik’é si el a repentí berdaderamente i a rechasá cualkier práctica asina henteramente.—Isaías 1:18.

18. Con e siñansa dje rescate mester ser usá pa animá un ruman cu a bira víctima di un otro, manera dor di violacion sexual?

¹⁸ Naturalmente, un anciano lo duna atencion n’e caso particular p’e por usa e siñansa ei corectamente. Considerá un ehempel: Cristo su sacrificio di rescate a ser prefigurá dor di sacrificionan di animal dje Ley di Moises, cua a ser rekerí pa e expiacion di tur picá. (Levítico 4:27, 28) Sin embargo, no tabatin un stipulacion cu un víctima di violacion sexual mester a haci un ofrenda pa picá asina. E ley a bisa cu nan no “mester a haci nada” pa castigu’é. (Deuteronomio 22:25-27) Pues awe, si un ruman muher a ser atacá i violá i esaki a haci’é sinti su mes sushi i sin balor, lo ta apropiado pa enfatisá su necesidad dje rescate pa limpia su mes dje picá ei? Siguramente cu no. E no a peca ora el a ser asaltá. Ta e violador a peca i e ta esun cu mester ser limpiá. Sin embargo, e amor cu Jehova i Cristo a demostrá percurando e rescate por ser usá como evidencia cu e mucha muher no a ser contaminá den bista di Dios dor di un otro hende su picá sino cu e ta precioso pa Jehova i ta permanecé den su amor.—Compará cu Marco 7:18-23; 1 Juan 4:16.

19. Pakico nos no mester spera cu tur asociacion cu nos rumannan lo ta animador, pero kico mester ta nos determinacion?

¹⁹ Sí, sea cual sea un individuo su situacion den bida, sin importá ki circunstancianan doloroso por oscurecé su pasado, e mester por haña animacion den e congregacion di Jehova su pueblo. I lo e haña esei si individualmente nos haci esfuerso pa considerá un e otro, incitá un e otro i animá un e otro ki ora cu nos asociá huntu. Sin embargo, ya cu nos ta imperfecto, nos tur ta faya de bes en cuando pa haci esei. Inevitablemente, nos ta desapuntá un e otro, i asta ta causa dolor na un e otro tin biaha. Purba di no concentrá riba otro su fracasonan den e aspecto aki. Si bo ta concentrá riba limitacionnan, bo ta core rísico di bira demasiado crítico riba e congregacion i por asta cai den net e trampa cu Pablo tabata asina ansioso pa yuda nos evitá, esta, di bandoná nos reunimentu huntu. No laga esei sosodé nunca! Segun cu e sistema bieu aki ta bira mas i mas peligroso i opresivo, laga nos determiná firmemente pa haci loke nos por pa haci nos asociacion n’e reunionnan edificante—i tantu mas segun cu nos ta contemplá e dia di Jehova yegando cerca!

[Notanan]

Con Lo Bo Contestá?

◻ Pakico ta vital pa nos reunionnan i asociacion ser animador den e último dianan aki?

◻ Kico ta nificá considerá un e otro?

◻ Kico ta nificá incitá un e otro?

◻ Kico animá un e otro ta enbolbé?

◻ Con esnan deprimí i abatí lo por ser animá?

[Plachi na página 16]

Hospitalidad ta yuda nos yega na conocé un e otro mihó

[Plachi na página 18]

Ora Elías tabata deprimí, Jehova a consol’é bondadosamente