Onrando Nos Mayornan di Edad Avansá

 1. Kico nos debe nos mayornan, i p’esei con nos mester sinti i actua pa cu nan?

“SCUCHA bo tata cu a causa bo nacementu, i no despreciá bo mama simplemente pa motibu cu el a bira bieu,” e homber sabí di hopi tempu pasá a consehá. (Proverbionan 23:22) Kisas bo ta bisa, ‘Ami lo nunca haci esei!’ En bes di despreciá nos mama—of nos tata—mayoria di nos ta sinti un amor profundo pa nan. Nos ta reconocé cu nos debe nan hopi. Na promé lugá, nos mayornan a duna nos bida. Aunke Jehova ta e Fuente di bida, sin nos mayornan nos simplemente lo no a existí. No tin nada cu nos por duna nos mayornan cu ta mésun precioso cu bida mes. Anto, djis pensa dje sacrificio propio, inkietudnan, gastunan, i atencion amoroso enbolbí den yuda un mucha a lo largu dje caminda di infancia te na hende grandi. P’esei ta ki razonabel, cu e Palabra di Dios ta consehá: “Onra bo tata i bo mama . . . pa por bai bon cu bo i bo por dura un tempu largu riba tera”!—Efesionan 6:2, 3.

 2. Con yunan adulto por paga e “debido compensacion” na nan mayornan?

² Apostel Pablo a skirbi na cristiannan: “Laga [yunan of nietunan] siña promé pa practicá debocion piadoso den nan mes cas i sigui paga un debido compensacion na nan mayornan i abuelonan, pasobra esaki ta aceptabel den bista di Dios.” (1 Timoteo 5:4) Yunan adulto ta ofrecé e “debido compensacion” aki dor di mustra aprecio p’e añanan di amor, trabou i cuido cu nan mayornan i abuelonan a dedicá na nan. Un manera cu yunan por haci esaki ta dor di reconocé cu mescos cu tur otro hende, esnan di edad avansá mester di amor i confiansa—hopi bes desesperadamente. Mescos cu nos tur, nan mester sinti nan apreciá. Nan mester sinti cu nan bida ta bale la pena.

 3. Con nos por onra mayornan i abuelonan?

³ Pues nos por onra nos mayornan i abuelonan dor di laga nan sa cu nos ta stima nan. (1 Corintionan 16:14) Si nos mayornan no ta bibando cu nos, nos mester corda cu comunicá cu nan por nificá hopi pa nan. Un carta alegre, un yamada di telefon, of un bishita por contribuí mashá na nan goso. Miyo, kende ta biba na Hapon, a skirbi tempu e tabatin 82 aña di edad: “Mi yu muher [kende su esposo ta un minister biahero] ta bisá mi: ‘Mama, por fabor “biaha” cu nos.’ E ta manda pa mi e nomber dje congregacion i e number di telefon caminda nan por ser localisá cada siman. Mi por habri mi mapa i bisa: ‘An. Awor nan ta aki!’ Semper mi ta gradicí Jehova p’e bendicion di tin un yu asina.”

 4. Con e tradicion religioso hudiu a animá insensibilidad pa cu mayornan di edad avansá?

⁴ Ta posibel cu onra bo mayornan tambe ta enbolbé percurá pa nan necesidadnan material? Sí. Hopi bes esei ta enbolbí. Den tempu di Jesus e lidernan religioso hudiu a mantené e tradicion cu si un persona declará cu su placa of propiedad tabata “un don dedicá na Dios,” el a ser librá for dje responsabilidad di us’é pa cuida su mayornan. (Mateo 15:3-6) Ki insensitivo! Eigenlijk, e lidernan religioso ei tabata animando e hendenan pa no onra nan mayornan sino pa trata nan cu desprecio dor di nenga egoistamente nan necesidadnan. Nunca nos kier haci esei!—Deuteronomio 27:16.

 5. Apesar di provisionnan hací dor di gobiernu den algun pais, pakico onra bo mayornan tin biaha ta incluí duna yudansa financiero?

⁵ Den hopi pais awe, programanan social apoyá dor di gobiernu ta percurá pa algun dje necesidadnan material di esnan di edad avansá, manera cuminda, paña i dak. Ademas di esei, esnan di edad avansá mes kisas tabata por a pone un banda algun recurso pa den nan behes. Pero si e provisionnan aki caba of no resultá di ta suficiente, yunan ta onra nan mayornan dor di haci loke nan por pa percurá p’e necesidadnan dje mayornan. Eigenlijk, cuidando mayornan di edad avansá ta un prueba di debocion piadoso, esta, e persona su debocion na Jehova Dios, e Originador dje areglo di famia.

 6. Ki areglo di bibienda algun a haci afin di percurá p’e necesidadnan di nan mayornan?

⁶ Hopi yu adulto a respondé n’e necesidadnan di nan mayornan enfermo cu amor i sacrificio propio. Algun di nan a tuma nan mayornan den nan mes cas of a muda pa ta cerca di nan. Otronan a bai biba cerca nan mayornan. Frecuentemente, areglonan asina a resultá di ta un bendicion pa tantu e mayornan como e yunan.

 7. Pakico ta bon pa no actua purá ora di tuma decisionnan en cuanto mayornan di edad avansá?

⁷ Sin embargo, tin biaha, cambionan asina no tin un bon resultado. Pakico? Kisas debí cu decisionnan ta ser tumá muchu purá of ta ser basá solamente riba emocion. “Esun huicioso ta considerá su pasonan,” Bijbel ta spierta sabiamente. (Proverbionan 14:15) Por ehempel, suponé cu bo mama di edad avansá tin dificultad bibando su so i bo ta pensa cu kisas lo e beneficiá dor di bin biba huntu cu bo. Considerando bo pasonan huiciosamente, lo bo por considerá lo siguiente: Kico ta su necesidadnan concreto? Tin servicionan social privá of di estado cu ta ofrecé un solucion alternativo aceptabel? E mes kier muda? Si e kier esei, den ki maneranan su bida lo ser afectá? Lo e tin cu bai laga amigunan atras? Con esaki lo por afect’é emocionalmente? Bo a papia tocante e cosnan aki cuné? Con un mudamentu asina lo afectá abo, bo casá, bo propio yunan? Si bo mama tin mester di cuido, ken lo percurá pa esei? Por compartí e responsabilidad? Bo a considerá e asuntu cu tur e miembronan di famia directamente enbolbí?

 8. Cu ken lo bo por consultá ora di dicidí con pa yuda bo mayornan di edad avansá?

⁸ Siendo cu e responsabilidad pa cuido ta enbolbé tur e yunan den un famia, kisas ta sabí pa tene un reunion di famia di manera cu tur por participá den tuma decisionnan. Papiando cu e ancianonan den e congregacion cristian of cu amigunan cu a enfrentá un situacion similar tambe kisas lo ta útil. “Tin frustracion di plannan caminda no tin papiamentu confidencial,” Bijbel ta spierta, “pero den e multitud di consehero tin logro.”—Proverbionan 15:22.

9, 10. (a) Apesar di nan edad avansá, ki consideracion mester ser mustrá na esnan di edad avansá? (b) Sin importá ki paso un yu adulto tuma na fabor di su mayornan, kico semper e mester duna nan?

⁹ Onrando nos mayornan di edad avansá ta rekerí empatia i comprension. Segun cu e añanan di behes ta trece consecuencianan serio, esnan di edad avansá kisas lo haña cu ta bira mas i mas difícil pa cana, come i corda. Kisas nan mester di yudansa. Hopi bes e yunan ta bira demasiado preocupá tocante nan mayornan su siguridad i ta trata na percurá guia. Pero esnan di edad avansá ta adultonan cu henter un bida di sabiduria i experencia acumulá, henter nan bida cuidando nan mes i tumando nan propio decisionnan. Nan identidad i respet propio kisas ta drei rond di nan papel como mayor i adulto. Mayornan cu ta sinti cu nan mester entregá control di nan bida na nan yunan kisas ta bira deprimí of rabiá. Algun ta sinti nan ofendí i ta resistí loke nan tal bes ta mira como esfuersonan pa horta nan di nan independencia.

¹⁰ No tin solucionnan fácil pa problemanan asina, pero ta un bondad pa permití mayornan di edad avansá cuida nan mes i tuma nan mes decision te n’e grado posibel. Ta sabí pa no tuma decisionnan tocante loke ta mihó pa bo mayornan sin papia cu nan promé. Nan kisas a perde hopi debí na behes. Permití nan pa ta mas independiente posibel. Kisas lo bo ripará cu ménos bo purba na controlá bo mayornan su bida, mas mihó bo relacion cu nan lo ta. Nan lo ta mas felis, i abo tambe. Asta si ta necesario pa insistí riba cierto cosnan pa nan bon, onrando bo mayornan ta rekerí pa bo duna nan e dignidad i respet cu nan merecé. E Palabra di Dios ta consehá: “Dilanti cabei blancu bo mester lanta, i bo mester mustra consideracion p’e homber di edad avansá.”—Levítico 19:32.

11-13. Si un relacion di un yu adulto cu su mayornan no tabata bon den pasado, con e por trata tog cu e desafio di cuida nan den nan añanan di behes?

¹¹ Tin biaha un problema cu yunan adulto ta enfrentá den onra nan mayornan di edad avansá ta enbolbé e relacion cu nan tabatin cu nan mayornan tempu cu e yunan adulto tabata mas yong. Kisas bo tata tabata un persona indiferente i sin amor, bo mama tabata dominante i severo. Kisas ainda bo ta sintí bo frustrá, rabiá of ofendí debí cu nan no tabata e mayornan cu bo tabata kier pa nan ta. Bo por surpasá sintimentunan asina?a

¹² Basse, kende a lanta na Finlandia, ta relatá: “Mi tata di criansa tabata un oficial di SS den Alemania nazi. E tabata rabia masha lihé, i e ora ei e tabata peligroso. El a bati mi mama hopi biaha den mi presencia. Un biaha ora el a rabia cu mi, el a zwai su faha i a dal mi den mi cara cu e hespu. El a dal mi asina duru cu mi a cai boltu over dje cama.”

¹³ Sin embargo, tabatin otro aspectonan di su caracter. Basse ta agregá: “Di otro banda, el a traha hopi duru i no a spar su mes pa cuida e famia materialmente. Nunca el a demostrá na mi e cariño di tata, pero mi tabata sa cu e tabata emocionalmente perhudicá. Su mama a sak’é for di cas tempu e tabata un mucha chikitu. El a lanta bringando i a drenta guera siendo hóben. Mi por a comprendé te na cierto grado i no a culp’é. Ora mi a crece bira mas grandi i mi tata a bira malu, mi tabata kier a yud’é mas tantu cu mi tabata por te na su morto. No tabata fácil, pero mi a haci loke mi tabata por. Mi a trata di ser un bon yu homber te na su morto, i mi ta kere cu el a aceptá mi como tal.”

14. Cua texto bíblico ta aplicá den tur situacion, incluyendo esnan cu ta presentá ora di cuida mayornan di edad avansá?

¹⁴ Den situacionnan di famia, mescos cu den otro asuntunan, e conseho di Bijbel ta aplicá: “Bisti boso cu e tierno cariño di compasion, bondad, humildad di mente, suavedad, i gran pacenshi. Sigui soportá otro i pordoná otro libremente si cualkier un tin un motibu pa keha contra un otro. Mescos cu Jehova a pordoná boso libremente, asina boso tambe haci mescos.”—Colosensenan 3:12, 13.

15. Pakico tin biaha ta penoso pa cuida mayornan?

¹⁵ Cuidando un mayor enfermo ta trabou duru, enbolbiendo hopi tarea, hopi responsabilidad, i oranan largu. Pero e parti mas difícil hopi bes ta emocional. Ta un pena pa mira bo mayornan perde nan salú, memoria i independencia. Sandy, cu ta di Puerto Rico, ta relatá: “Mi mama tabata e núcleo di nos famia. Tabata masha doloroso pa mir’é sufri i pa cuid’é. Promé el a cuminsá cocochá; despues e tabatin mester di un garoti, despues un ‘looprek’, despues un rolstoel. Despues di esei el a bira progresivamente mas malu te ora cu el a fayecé. El a haña cancer di wesu i tabatin mester di cuido constante—di dia i anochi. Nos tabata bañ’é, dun’é cuminda na boca i lesa p’e. Esei tabata masha difícil—specialmente emocionalmente. Ora mi a realisá cu mi mama tabata muriendo, mi a yora pasobra mi a stim’é asina tantu.”

16, 17. Ki conseho por yuda un dunador di cuido mantené un punto di bista balansá di cosnan?

¹⁶ Si bo hañá bo den un situacion similar, kico bo por haci pa enfrent’é cu éxito? Scucha Jehova mediante lesamentu di Bijbel i papia cuné mediante oracion lo yudá bo mashá. (Filipensenan 4:6, 7) Den un manera práctico, haci sigur cu bo ta come cumindanan nutritivo i trata na haña suficiente descanso. Dor di haci esaki, lo bo ta den un mihó condicion, tantu emocionalmente como físicamente, pa cuida bo persona stimá. Kisas bo por areglá un periodo di sosiegu i alivio for dje rutina diario. Asta si vacansi no ta posibel, tog ta sabí pa programá algun tempu pa relahá. Afin di pasa algun tempu for di e mayor enfermo, lo por ta posibel pa bo haci areglo pa un otro persona keda cu bo mayor enfermo.

¹⁷ No ta straño pa dunadornan di cuido cu ta adulto tene expectativanan irazonabel di nan mes. Pero no sintí bo culpabel pa loke bo no por haci. Den algun circunstancia kisas bo mester confia e cuido di un stimá di bo na un cas di cuido. Si bo ta un dunador di cuido, pone expectativanan razonabel pa bo mes. Bo mester balansá e necesidadnan no solamente di bo mayornan sino tambe di bo yunan, bo casá i di bo mes.

18, 19. Cua promesa di apoyo Jehova a haci, i cua experencia ta mustra cu e ta cumpli cu e promesa aki?

¹⁸ Mediante su Palabra, e Bijbel, Jehova amorosamente ta percurá guia cu por yuda un persona mashá den cuida su mayornan di edad avansá, pero esei no ta e único yudansa cu e ta percurá. “Jehova ta cerca di tur esnan cu ta inbok’é,” e salmista a skirbi bou di inspiracion. “Lo e tende nan sclamacion pa yudansa, i lo e salba nan.” Jehova lo salba, of conserbá, esnan fiel di dje atrabes di asta e situacionnan mas difícil.—Salmo 145:18, 19.

¹⁹ Myrna, na Filipínas, a siña esaki ora e tabata cuida su mama, kende a bira incapacitá dor di un atake celebral. “No tin nada mas tristu cu mira un stimá di bo sufri, incapas pa bisá bo na unda e ta sinti dolor,” Myrna ta skirbi. “Esei tabata mescos cu mir’é hoga poco-poco, i no tabatin nada cu mi por a haci. Hopi biaha mi tabata cai na rudia i papia cu Jehova tocante con cansá mi tabata. Mi a sclama manera David, kende a roga Jehova pa pone su lágrimanan den un boter i cord’é. [Salmo 56:8] I manera Jehova a primintí, el a duná mi e fortalesa cu mi tabatin mester. ‘Jehova a yega di ta manera un apoyo pa mi.’”—Salmo 18:18.

20. Ki promesanan bíblico ta yuda dunadornan di cuido keda optimista, asta si esun cu nan ta cuidando muri?

²⁰ Hende a yega di bisa cu percurá pa mayornan di edad avansá ta un “cuenta sin un final felis.” Apesar di asta e mihó esfuersonan den dunamentu di cuido, esnan di edad avansá por muri, manera a pasa cu Myrna su mama. Pero esnan cu ta confia den Jehova sa cu morto no ta e fin tristu dje cuenta. Apostel Pablo a bisa: “Mi tin speransa pa cu Dios . . . cu lo bai tin un resureccion di tantu e hustunan como e inhustunan.” (Echonan 24:15) Esnan cu a perde mayornan di edad avansá den morto ta haña consuelo den e speransa di resureccion huntu cu e promesa di un mundu nobo agradabel cu Dios lo traha den cua “morto lo no t’ei mas.”—Revelacion 21:4.

21. Ki bon resultadonan ta bini di onra mayornan di edad avansá?

²¹ Sirbidornan di Dios tin un aprecio profundo pa nan mayornan, aunke nan mayornan kisas a bira bieu. (Proverbionan 23:22-24) Nan ta onra nan. Haciendo esaki, nan ta experenciá loke e proverbio inspirá ta bisa: “Bo tata i bo mama lo alegrá, i esun cu a duna lus na bo lo ta gososo.” (Proverbionan 23:25) I mas cu tur cos, esnan cu ta onra nan mayornan di edad avansá tambe ta agradá i ta onra Jehova Dios.