Mi Mester Bai Fia Sèn?

E DICHO akí ta bon konosí pa hendenan ku ta biba na Ost Afrika. Sin duda, hendenan na otro parti di mundu tambe tin e mesun pensamentu akí. Bo tambe ta sinti asina ora bo fia sèn serka un amigu òf otro kaminda? Maske tin biaha esei por parse un bon idea, kiko ta e riesgonan di bai fia sèn?

Un otro dicho afrikano ta mustra nos kiko ta e problema prinsipal. E ta bisa: “Fiamentu ta kibra amistat.” En bèrdat, debe por daña nos relashon ku nos famia- i amigunan. Hopi biaha, maske nos tin e intenshon di paga bèk, no ta semper kos ta bai manera nos a plania. Por ehèmpel, si nos no paga na tempu, esun ku a fia nos por tuma nos na malu, i esaki por kousa tenshon, asta entre nos famia i su famia. Pues, fiamentu por kousa frikshon. P’esei ta bon pa nos konsider’é komo un último rekurso i no komo un solushon fásil pa nos problemanan.

Fiamentu di sèn por daña nos amistat ku Dios tambe. Kon asina? Pa kuminsá, Beibel ta bisa ku ta hende malbado ta nenga di paga nan debe bèk. (Salmo 37:21) Tambe e ta bisa bon kla ku “e fiadó ta bira esklabo di esun ku ta fi’é.” (Proverbionan 22:7) Pues, e fiadó mester realisá ku e tin e obligashon di kaba di paga loke el a fia. Un otro dicho afrikano ku tambe a resultá di ta bèrdat ta bisa: “Si bo fia pia di un hende, bo tin ku bai kaminda e ke bai.” Loke e dicho akí ke laga nos komprondé ta ku un hende ku tin hopi debe, no ta liber pa hasi loke e ke.

Ta masha importante anto pa nos paga bèk mas pronto posibel loke nos a fia. Si no, tardi òf trempan, nos lo haña nos ku problema. Laga debe akumulá por tin konsekuensianan serio, manera angustia, anochinan sin drumi, strès, hopi overtaim, pleitamentu entre pareha i asta divorsio, pa no papia mes di demandanan legal òf posibel enkarselashon. P’esei, ta bon pa nos sigui e konseho sabí di Romanonan 13:8: “No debe ningun hende nada; úniko debe ku boso tin ta di stima otro.”

En bista di tur esaki, nos no mester ta purá pa fia sèn. Ta sabí pa puntra bo mes: Di bèrdat mi mester fia sèn? Mester mi mester di dje pa salba mi negoshi pa mi por sigui kuida mi famia? Òf mi ta un poko golos i ke biba for di mi forsa? Den mayoria di kaso, ta mihó bo keda kontentu ku loke bo tin en bes di fia sèn.

Naturalmente, por tin eksepshon, manera ora ta trata di un emergensia i ta parse ku no tin niun otro opshon. Si bo disidí di fia mes, mustra ku bo ta un persona onesto i konfiabel. Kon bo por hasi esei?

Di promé, no probechá di un hende djis pasobra ta parse ku e tin moda. Nos no mester pensa ku un persona ku ta parse bon pará ta obligá di yuda nos finansieramente. Tampoko nos no mester sinti ku nos no tin nodi di paga nan bèk, pasobra nan no tin mester di e plaka. No envidiá esnan ku ta parse di ta den un mihó situashon ekonómiko ku nos.—Proverbionan 14:30.

Despues ku bo a fia sèn, sòru di pag’é bèk i hasi esei mas pronto posibel i manera boso a palabrá. Si e persona ku a fia bo sèn no a stipulá un tempu fiho pa paga bèk, abo mes sugerí esei i kumpli ku e palabrashon ei. Ta konsehabel pa pone e palabrashon pretu riba blanku pa evitá kualke malkomprondementu. (Yeremías 32:9, 10) Si ta posibel, paga e hende bèk en persona ya asina bo por gradisié. Ora bo ta paga bèk puntualmente, bo ta evitá frikshon i ta mantené un bon relashon ku e persona ku a fia bo. Hesus a bisa den su Sermon Riba Seru: “Simplemente, laga boso ‘sí’ ta sí, i boso ‘nò,’ nò.” (Mateo 5:37) Ademas, kòrda semper riba e asina yamá Regla di Oro: “Tur loke boso ke pa hende hasi ku boso, boso tambe mester hasi ku nan.”—Mateo 7:12.

Beibel ta duna un bon remedi pa kura e deseo di fia plaka. E ta bisa: “Un kos ta sigur: deboshon na Dios ta di gran probecho, basta nos ta satisfecho ku loke nos tin.” (1 Timoteo 6:6) Ku otro palabra, keda kontentu ku loke bo tin por skapa bo di tur e problemanan ku fiamentu por trese kuné. Klaru ku no ta fásil pa keda satisfecho ku loke bo tin den e mundu djawe ku ta preshoná nos pa satisfasé nos deseonan mesora. Ta na momentonan asina nos tin ku demostrá “deboshon na Dios.” Den ki sentido?

Tuma, por ehèmpel, un pareha kristian kasá di Asia. Tempu ku nan tabata mas yòn, nan tabata ègt atmirá hende ku tabatin nan propio kas. Pues, nan a disidí di kumpra nan mes kas i a finansi’é ku sèn ku nan a spar huntu ku sèn ku nan a fia na banko i serka famia. Sinembargo, no a dura mashá ku nan a bin realisá ku nan pagonan mensual haltu tabata muchu pisá pa nan. Nan a kuminsá traha mas i mas tantu. Komo resultado, nan no tabata sobra tempu pa dediká na nan yunan. E esposo a bisa: “E strès, doló i falta di soño tabata manera un baranka pisá riba mi kabes. Mi tabata sinti mi sofoká.”

Ku tempu, nan a bin kòrda e konseho ku tin na 1 Timoteo 6:6, i nan a disidí ku e úniko solushon tabata pa bende nan kas. A dura dos aña pa nan por a libra nan mes di tur debe. Ki lès e pareha akí a saka for di e eksperensia ei? Nan a bisa: “Ta un protekshon pa mira e kosnan material manera Dios ta mira nan.”

Hopi hende konosé e dichonan afrikano tokante e riesgonan di hinka bo kurpa den debe, pero tòg nan ta sigui fia. Despues di a konsiderá e konsehonan di Beibel menshoná den e artíkulo akí, lo ta sabí pa bo pensa bon riba e pregunta: ‘Mi mester bai fia sèn?’