Laga Nos Aborecé Loke Ta Malbado

JEHOVA ta un Dios santu. Den tempunan antiguo e tabata “e Santu di Israel,” i como tal el a exigí pa Israel ta limpi, sin mancha. (Salmo 89:18) El a bisa su pueblo scogí: “Boso tin cu resultá di ta santu, pasobra ami ta santu.” (Levítico 11:45) Ken cu kier a “subi n’e ceru di Jehova” tabatin cu ser “inocente den su mannan i limpi di curason.” (Salmo 24:3, 4) Esei a nificá mas cu meramente evitá actonan pecaminoso. El a nificá “odia maldad.”—Proverbionan 8:13.

Amorosamente, Jehova a prescribí leynan detayá di manera cu e nacion di Israel por a identificá i evitá malecho. (Romanonan 7:7, 12) E leynan aki a incluí instruccionnan estricto tocante moralidad. Adulterio, actonan homosexual, incesto i actonan sexual cu bestia tur a ser identificá como contaminadornan spiritual profano. (Levítico 18:23; 20:10-17) Esnan culpabel di tal actonan degradá a ser cortá for dje nacion di Israel.

Ora e congregacion di cristiannan ungí a bira “e Israel di Dios,” normanan moral similar a ser prescribí pa nan. (Galationan 6:16) Cristiannan tambe tabatin cu “aborecé loke ta malbado.” (Romanonan 12:9) E palabranan di Jehova na Israel a aplicá na nan tambe: “Boso mester ta santu, pasobra ami ta santu.” (1 Pedro 1:15, 16) Tal prácticanan profano manera fornicacion, adulterio, actonan homosexual, actonan sexual cu bestia i incesto no tabatin mag di corumpí e congregacion cristian. Esnan cu a nenga di stop di participá den cosnan asina lo a ser excluí for dje Reino di Dios. (Romanonan 1:26, 27; 2:22; 1 Corintionan 6:9, 10; Hebreonan 13:4) Den e “último dianan” aki, e mésun normanan ta aplicá n’e “otro carnénan.” (2 Timoteo 3:1; Juan 10:16) Como resultado, cristiannan ungí i otro carnénan ta forma un pueblo limpi i saludabel, capas pa carga e nomber di nan Dios como Testigonan di Jehova.—Isaías 43:10.

Manteniendo e Congregacion Limpi

Na contraste, e mundu ta consentí cu tur sorto di inmoralidad. Aunke cristiannan berdadero ta diferente, nan no mester lubidá cu hopi persona cu awor ta sirbi Jehova, un tempu tabata den e mundu. Tin hopi cu, promé cu nan a conocé nos Dios santu, no tabata comprendé pakico nan no mester a satisfacé e deseonan i fantasianan di nan carni pecaminoso, entregando nan mes completamente na un “estado baho di corupcion.” (1 Pedro 4:4) Apostel Pablo, despues cu el a describí e prácticanan repugnante di hende degradá dje nacionnan, a bisa: “Esei ta loke algun di boso tabata.” No obstante, el a sigui, bisando: “Pero boso a ser labá limpi, pero boso a ser santificá, pero boso a ser declará hustu den e nomber di nos Señor Jesucristo i cu e spiritu di nos Dios.”—1 Corintionan 6:11.

Ki un declaracion consolador esei ta! Kico cu un persona a haci anteriormente den bida, e ta cambia ora e glorioso bon nobo tocante Cristo afectá su curason. E ta ehercé fe i ta dedicá su mes na Jehova Dios. For dje ora ei padilanti e ta hiba un bida moralmente puru, labá limpi den bista di Dios. (Hebreonan 9:14) E picánan cu el a cometé anteriormente ta ser pordoná, i e por ‘forsa padilanti p’e cosnan cu tin su dilanti.’a—Filipensenan 3:13, 14; Romanonan 4:7, 8.

Jehova a pordoná David repentí di homicidio i adulterio, i El a pordoná Manases repentí pa idolatria inmoral i hopi dramamentu di sanger. (2 Samuel 12:9, 13; 2 Crónicanan 33:2-6, 10-13) Nos por ta berdaderamente gradicidu cu e ta cla pa pordoná nos tambe si nos repentí i acerk’é cu sinceridad i humildad. Tog, apesar cu Jehova a pordoná David i Manases, e dos hombernan aki—i Israel huntu cu nan—tabatin cu biba cu e consecuencianan di nan actonan pecaminoso. (2 Samuel 12:11, 12; Jeremías 15:3-5) Di un manera similar, aunke Jehova ta pordoná pecadornan repentí, nan accionnan por tin consecuencianan cu no por ser evitá.

Consecuencianan Inevitabel

Por ehempel, un homber cu ta hiba un bida di libertinahe inmoral i ta contraé AIDS por aceptá e berdad i cambia su bida te cu e ta alcansá dedicacion i bautismo. Awor e ta un cristian spiritualmente limpi cu tin un relacion cu Dios i un speransa maraviyoso pa futuro; pero ainda e tin AIDS. Cu tempu e por muri dje malesa, un consecuencia tristu pero inevitabel di su conducta anterior. Pa algun cristian e efectonan di inmoralidad grosero di pasado por persistí den otro maneranan. Pa añanan despues di nan bautismo, tal bes p’e resto di nan bida den e sistema di cosnan aki, nan lo por tin cu lucha contra impulsonan di nan carni pa bai bek na nan estilo di bida inmoral di ántes. Cu yudansa di Jehova su spiritu, hopi ta logra resistí. Pero nan tin cu hiba un bataya constante.—Galationan 5:16, 17.

Personanan asina no ta peca tanten cu nan ta controlá nan impulsonan. Pero si nan ta dje sexo masculino, nan por dicidí sabiamente pa no ‘percurá pa alcansá’ responsabilidad den e congregacion miéntras cu ainda nan tin cu lucha contra impulsonan carnal fuerte. (1 Timoteo 3:1) Pakico? Pasobra nan sa dje confiansa cu e congregacion ta pone den e ancianonan. (Isaías 32:1, 2; Hebreonan 13:17) Nan ta realisá cu e ancianonan ta ser consultá riba hopi asuntu íntimo i tin cu trata situacionnan delicado. Lo no ta ni amoroso, ni sabí, ni razonabel pa un persona cu ta hibando un lucha constante contra deseonan carnal impuru, percurá pa alcansá un posicion asina di responsabilidad.—Proverbionan 14:16; Juan 15:12, 13; Romanonan 12:1.

Pa un homber cu tabata un abusador sexual di mucha promé cu el a ser bautisá, por tin un otro consecuencia. Ora e siña e berdad, e ta repentí i ta haci cambio, i no ta trece e picá cruel ei den e congregacion. Despues di esei e por haci bon progreso, vence su impulsonan incorecto completamente, i asta ser incliná pa ‘percurá pa alcansá’ un posicion di responsabilidad den e congregacion. Pero, kico si ainda e ta conocí den e comunidad como un ex-abusador sexual di mucha? Lo e ta ‘ireprensibel, . . . teniendo un excelente testimonio for di hende di pafó, . . . siendo liber di acusacion’? (1 Timoteo 3:1-7, 10; Tito 1:7) No, lo e no ta. P’esei, lo e no cualificá pa privilegionan di congregacion.

Ora un Cristian Dedicá Peca

Jehova ta comprendé cu nos ta débil i cu asta despues di bautismo nos por cai den picá. Apostel Juan a skirbi n’e cristiannan di su tempu: “Mi ta skirbi boso e cosnan aki pa boso no cometé picá. I tog, si un hende cometé un picá, nos tin un yudante cerca e Tata, Jesucristo, un hustu. I e ta un sacrificio di reconciliacion pa nos picánan, pero no pa esnan di nos so sino tambe pa esnan di henter e mundu.” (1 Juan 2:1, 2) Sí, riba base dje sacrificio di Jesus, Jehova lo pordoná cristiannan bautisá cu cai den picá—si nan repentí di curason i bandoná nan curso robes.

Un ehempel di esaki a ser mirá den e congregacion di promé siglo na Corinto. Apostel Pablo a tende di un caso di incesto den e congregacion recien formá ei, i el a duna instruccion p’e homber en cuestion ser expulsá. Mas despues, e pecador a repentí, i Pablo a exhortá e congregacion pa restor’é. (1 Corintionan 5:1, 13; 2 Corintionan 2:5-9) Asina, pa medio dje poder sanador di Jehova su bondad inmerecí i e balor haltu di Jesus su sacrificio di rescate, e homber a ser limpiá di su picá. Cosnan similar por sosodé awe. Ma, atrobe, asta si un persona bautisá cu cometé un picá serio, repentí i ta ser pordoná den bista di Jehova, ainda su picá por sigui tin consecuencianan.—Proverbionan 10:16, 17; Galationan 6:7.

Por ehempel, si un mucha muher dedicá cometé fornicacion, e por lamentá su acto amargamente i cu tempu ser restorá na salú spiritual cu e yudansa dje congregacion. Pero kico si e sali na estado debí na su inmoralidad? E ora ei e no por scapa dje echo cu henter su bida ta cambia pa loke el a haci. Un homber cu cometé adulterio kisas ta repentí i no ta ser expulsá. Pero su casá inocente tin base bíblico pa divorciá di dje, i e esposa por scoge pa haci esei. (Mateo 19:9) Si e hacié, e homber, aunke Jehova a pordon’é, lo biba p’e resto di su bida cu e consecuencia grave aki di su picá.—1 Juan 1:9.

Kico si un homber divorciá di un manera baho di su esposa p’e por casa cu un otro muher? Tal bes cu tempu lo e repentí i ser restorá den e congregacion. Cu pasamentu di tempu e por haci progreso i “forsa padilanti te na madures.” (Hebreonan 6:1) Pero tanten cu su promé esposa no haña un casá, e ruman homber lo no cualificá pa sirbi den un posicion di responsabilidad den e congregacion. E no ta “esposo di un solo esposa” pasobra e no tabatin base bíblico pa divorciá di su promé esposa.—1 Timoteo 3:2, 12.

Esakinan no ta motibunan poderoso pakico un cristian mester cultivá un repudio pa loke ta malbado?

Kico di un Abusador Sexual di Mucha?

Kico si un cristian adulto bautisá molestiá un mucha sexualmente? E pecador ta asina malbado cu Jehova nunca mas lo pordon’é? No necesariamente. Jesus a bisa cu ‘blasfemia contra e spiritu santu’ tabata imperdonabel. I Pablo a bisa cu no ta keda ningun sacrificio pa picá pa un persona cu ta practicá picá deliberadamente apesar di ta conocé e berdad. (Lucas 12:10; Hebreonan 10:26, 27) Pero ningun caminda Bijbel no ta bisa cu un cristian adulto cu abusá sexualmente di un mucha—sea den incesto of di otro manera—no por ser pordoná. En berdad, su picánan por ser labá limpi si e repentí sinceramente di curason i cambia su conducta. Sin embargo, kisas e tin cu sigui lucha cu e mal impulsonan carnal cu el a cultivá. (Efesionan 1:7) I por tin consecuencianan cu e no por evitá.

Dependiendo dje ley dje pais caminda e ta biba, e abusador sexual probablemente lo tin cu sinta un castigu di prizon of enfrentá otro sancionnan di parti di Estado. E congregacion lo no proteh’é for di esaki. Ademas, e homber a revelá un debilidad serio cu di awor padilanti lo mester tene cuenta cuné. Si e ta parce di ta repentí, lo e ser animá pa haci progreso spiritual, participá den sirbishi di veld, asta duna parti den e Scol di Ministerio Teocrático i partinan cu no tin di haber cu dunamentu di siñansa den e Reunion di Sirbishi tal como demostracionnan. Sin embargo, esaki no ta nificá cu lo e cualificá pa sirbi den un posicion di responsabilidad den e congregacion. Kico ta e motibunan bíblico pa esaki?

Un dje motibunan ta cu un anciano mester tin “dominio propio.” (Tito 1:8) Ta cierto cu ningun di nos tin un dominio propio perfecto. (Romanonan 7:21-25) Pero un cristian adulto dedicá cu cai den e picá di abusu sexual di mucha ta revelá un debilidad carnal innatural. Experencia a mustra cu un adulto asina por wel abusá di otro mucha despues. Ta cierto cu no ta tur abusador di mucha ta ripití e picá, pero hopi sí ta hacié. I e congregacion no por lesa curason pa bisa probablemente ken sí i ken no lo no abusá di mucha atrobe. (Jeremías 17:9) P’esei, Pablo su conseho na Timoteo ta aplicá cu énfasis special den e caso di adultonan bautisá cu a abusá sexualmente di mucha: “Nunca pone bo mannan lihé riba ningun hende; ni ser participante den e picánan di otronan.” (1 Timoteo 5:22) P’e proteccion di nos yunan, un homber di ken ta conocí cu el a yega di abusá sexualmente di mucha, no ta cualificá pa un posicion di responsabilidad den e congregacion. Ademas, e no por ta un pionero ni sirbi den ningun otro sirbishi special di tempu completo.—Compará cu e principio na Exodo 21:28, 29.

Algun por puntra, ‘Acaso algun no a cometé otro tipo di picá i aparentemente a repentí, pa despues nan ripití nan picá atrobe?’ Sí, esei a yega di sosodé, pero tin otro factornan pa considerá. Si, por ehempel, un individuo haci un avance inmoral cerca un otro adulto, e adulto lo mester ta capas pa resistí su avancenan. Muchanan ta muchu mas fácil pa engañá, confundí of terorisá. Bijbel ta papia dje falta di sabiduria di un mucha. (Proverbionan 22:15; 1 Corintionan 13:11) Jesus a usa mucha como un ehempel di inocencia humilde. (Mateo 18:4; Lucas 18:16, 17) E inocencia di un mucha ta incluí un falta completo di experencia. Mayoria mucha ta habrí, ansioso pa agradá otro hende, i pues vulnerabel pa abusu di parti di un adulto cu mente maligno kende nan conocé i ta confia. P’esei, e congregacion tin un responsabilidad dilanti Jehova pa protehá su muchanan.

Muchanan bon entrená ta siña obedecé i onra nan mayornan, ancianonan i otro adultonan. (Efesionan 6:1, 2; 1 Timoteo 5:1, 2; Hebreonan 13:7) Lo ta un perversion escandaloso si un dje figuranan di autoridad aki malusá e mucha ei su confiansa inocente pa asina seducié of fors’é pa someté su mes na actonan sexual. Esnan cu a ser abusá sexualmente den e manera aki hopi biaha ta lucha pa añanan largu pa superá e trauma emocional cu ta resultá for di dje. P’esei, un abusador sexual di mucha ta suheto n’e disiplina i restriccionnan severo dje congregacion. No e echo cu e no tin un posicion como figura di autoridad ta importante sino, mas bien, e puresa sin defecto dje congregacion.—1 Corintionan 5:6; 2 Pedro 3:14.

Si un abusador sexual di mucha repentí sinceramente, lo e reconocé e sabiduria di aplicá principionan bíblico. Si e berdaderamente siña aborecé loke ta malbado, lo e detestá loke el a haci i lucha pa evitá di ripití su picá. (Proverbionan 8:13; Romanonan 12:9) Ademas, e siguramente lo gradicí Jehova pa e grandesa di Su amor, como resultado di cua un pecador repentí, manera e, ainda por adorá nos Dios santu i spera pa ta entre “e rectonan” cu lo biba pa semper riba tera.—Proverbionan 2:21.

[Notas]

[Komentario na página 28]

Aunke Jehova ta pordoná pecadornan repentí, nan accionnan por tin consecuencianan cu no por ser evitá