“Hasi Tur Kos pa e Gloria di Dios”

KOMO ku nos a dediká nos bida na Dios i ta su sirbidó, nos mester reflehá e gloria di Yehova den tur loke nos ta bisa i hasi. Apòstel Pablo a menshoná un prinsipio ku por guia nos. El a skirbi: “Sea ku boso ta kome, bebe òf kiko ku boso ta hasi, hasi tur kos pa e gloria di Dios.” (1 Kor. 10:31) Esaki ta nifiká ku nos tin ku obedesé e normanan hustu di Yehova. E normanan akí ta un refleho perfekto di su personalidat. (Kol. 3:10) Pues, komo un pueblo santu, nos mester imitá Dios.—Efe. 5:1, 2.

² Awe tambe tur kristian mester ta santu, meskos ku tabata e kaso den e nashon di Israel. Apòstel Pedro a skirbi: “Komo yu obediente, no laga e deseonan ku boso tabatin tempu ku boso no tabata konosé Dios forma boso mas. Mas bien, di akuerdo ku Esun Santu ku a yama boso, bira santu den tur boso kondukta, pasobra ta pará skirbí: ‘Boso mester ta santu, pasobra ami ta santu.’” (1 Ped. 1:14-16) Esaki ta nifiká ku tur kristian tin ku keda sin mancha, liber di piká i sushedat ku ta komun den mundu. Nan a ser apartá pa sirbishi sagrado na Yehova.—Éks. 20:5.

³ Awor, kon nos por keda santu den bista di Dios? Nos mester obedesé e leinan di Yehova i pega na su prinsipionan. E leinan i e prinsipionan akí ta deskribí bon kla den e Skritura Santu. (2 Tim. 3:16) Ora nos a studia Beibel, nos a siña tokante Yehova i kon e ta pensa i aktua, i nos a sinti nos motivá pa hala serka dje. Nos estudio di Beibel a yuda nos mira e importansia di pone e Reino di Dios na promé lugá den nos bida i di kumpli ku boluntat di Dios den tur kos. (Mat. 6:33; Rom. 12:2) Esei a enserá ku nos mester bisti e personalidat nobo.—Efe. 4:22-24.

⁴ No semper ta fásil pa pega na Yehova su normanan hustu. Dikon? Pasobra nos atversario, Satanas e Diabel, ta buska moda di alehá nos for di e bèrdat. Fuera di esei, nos tin ku lucha kontra mal influensia di e mundu akí i nos propio tendensianan pekaminoso. Pa nos kumpli ku nos dedikashon, nos mester lucha i hasi berdadero esfuerso. Beibel ta bisa ku nos no mester keda sorprendí ora nos haña nos ku prueba i oposishon. Nos tin ku sufri pa kousa di hustisia. (2 Tim. 3:12) Pero e pruebanan akí ta indikashon ku nos ta kumpliendo ku boluntat di Dios i pa e motibu ei, nos por ta felis.—1 Ped. 3:14-16; 4:12, 14-16.

⁵ Aunke Hesus tabata perfekto, el a siña obedensia atraves di e kosnan ku el a sufri. Nunka e no a sukumbí na e tentashonnan di Satanas ni nunka el a anhelá e kosnan di mundu. (Mat. 4:1-11; Huan 6:15) Nunka a bini na Hesus su mente pa bai kontra e prinsipionan di Dios. Aunke mundu a odi’é pa motibu di su fieldat, semper el a pega na e normanan hustu di Yehova. Djis promé ku su morto, Hesus a spièrta su disipelnan ku mundu lo odia nan tambe. For di e tempu ei padilanti, e kristiannan a eksperensiá hopi sufrimentu.Sinembargo, e echo ku e Yu di Dios a vense mundu ta duna nan hopi kurashi.—Huan 15:19; 16:33; 17:16.

⁶ Pa nos no bira parti di mundu, nos tin ku kumpli ku e normanan hustu di Yehova, meskos ku nos Maestro a hasi. Ademas, nos mester evitá di partisipá den e asuntunan polítiko i sosial di mundu, i resistí su ambiente moral degradá. Nos ta tuma mashá na serio e konseho ku tin na Santiago 1:21: “Pone tur sushedat un banda i tambe e maldat ku ta reina tur kaminda, i aseptá ku suavedat e palabra ku Dios ta planta den boso i ku por salba boso alma.” Pa medio di nos estudio di Beibel i asistensia na reunion, nos ta “planta” e palabra di e bèrdat den nos mente i kurason di manera ku nos no ta ni kuminsá deseá loke mundu ta ofresé. Santiago a skirbi: “Boso no sa ku amistat ku mundu ta enemistat ku Dios? P’esei, ken ku ke ta amigu di mundu ta hasi su mes enemigu di Dios.” (Sant. 4:4) P’e motibu akí, Beibel ta spièrta nos pa pega firmemente na e normanan hustu di Yehova i keda separá for di mundu.

⁷ E Palabra di Dios ta prohibí komportashon bergonsoso i kondukta inmoral, sí, Beibel ta bisa: “No menshoná fornikashon ni ningun sorto di impuresa ni golosidat mes meimei di boso, pasobra esaki no ta apropiá pa hende santu.” (Efe. 5:3) Pues, nos no mester pensa riba kos opseno, bergonsoso òf indesente i pió ainda, ni papia di kos asina. Asina nos ta mustra ku nos ta pega na e normanan moral di Yehova ku ta limpi i rekto.

⁸ Ademas di keda limpi moralmente i spiritualmente, un kristian ta rekonosé e importansia di keda limpi den sentido físiko tambe. Yehova, kende ta un Dios santu, a rekerí pa e kampamentu di e nashon di Israel tabata limpi. Nos tambe mester ta limpi pa Yehova “no mira nada indesente” den nos.—Deu. 23:14.

⁹ Den Beibel, santidat i limpiesa físiko ta estrechamente ligá ku otro. Por ehèmpel, Pablo a skirbi: “Rumannan stimá, laga nos limpia nos mes di tur impuresa di karni i di spiritu i, den temor di Dios, perfekshoná nos santidat mas ainda.” (2 Kor. 7:1) P’esei, un kristian mester baña i laba su pañanan regularmente. Aunke e kondishonnan di kada pais ta diferente, por lo general, nos por haña sufisiente awa i habon pa tene nos kurpa limpi i sòru pa nos yunan tambe ta limpi.

¹⁰ Pa motibu di nos trabou di prediká, por lo general hende di nos komunidat konosé nos bon. Si nos kas ta limpi i na òrdu, paden i pafó, nos bisiñanan ta haña un bon testimonio. Esaki ta algu ku henter famia mester yuda kuné. Prinsipalmente, ruman hòmber mester mustra interes den tene nan kas i kurá na òrdu, ya ku un kurá limpi i un kas bon mantené ta duna hende un bon impreshon di nos. Ora e kabes di famia ta hasi e kosnan akí i tambe ta dirigí e famia den asuntu spiritual, e ta demostrá ku e ta guia su kas bon. (1 Tim. 3:4, 12) Ruman muhé tambe tin e responsabilidat di sòru pa sierto kos di kas, spesialmente parti paden di kas. (Tito 2:4, 5) Mayornan por entrená nan yunan pa tene tantu nan kurpa komo nan kamber limpi i nèchi. Di e manera ei, henter e famia ta siña e normanan di limpiesa ku ta pas ku e normanan di Dios su mundu nobo.

¹¹ Awe, hopi sirbidó di Yehova ta usa nan outo pa bai nan reunionnan. Den algun área, pa por bai sirbishi di vèlt, un outo ta kasi indispensabel. Esei ta nifiká ku nos mester tene nos outo limpi i den bon kondishon. Nos kas i nos outo mester demostrá ku nos ta pertenesé na Yehova su pueblo limpi i santu. Meskos ta konta pa nos tas i nos Beibel.

¹² Nos manera di bisti i nos areglo personal tambe mester kuadra ku e prinsipionan di Dios. Por ehèmpel, nos no ta pensa mes di presentá dilanti di un persona prominente ku paña tur slòns òf informal. Pues, nos lo no ke hasi esei tampoko ora nos ta representá Yehova den sirbishi di vèlt òf riba plataforma! Nos aparensia i manera di bisti por influensiá e manera ku otro hende ta mira nos adorashon na Yehova. Sigur no ta apropiá pa nos bisti na un manera indesente òf sin tene kuenta ku sintimentu di otro hende. (Mik. 6:8; 1 Kor. 10:31-33; 1 Tim. 2:9, 10) P’esei, ora nos ta prepará pa sali den sirbishi di vèlt òf pa bai reunion di kongregashon, asamblea di sirkuito òf kongreso, nos mester tene kuenta ku loke e Skritura ta bisa tokante limpiesa físiko i aparensia modesto òf desente. Nos ke onra i duna gloria na Yehova na tur momento.

¹³ Meskos ta konta ora nos ta bishitá nos sede mundial òf kualke sukursal di Testigunan di Yehova. Kòrda ku e nòmber Bètel ta nifiká “Kas di Dios.” P’esei, nos mester bisti i komportá nos mes meskos ku ora nos ta na un reunion na Salòn di Reino.

¹⁴ Asta den nos tempu liber, nos ke paga tinu riba nos manera di bisti i nos aparensia. Nos por puntra nos mes: ‘Lo mi tin bèrgwensa di duna testimonio informal pa motibu di e manera ku mi ta bistí?’

¹⁵ Sosiegu i rekreo ta nesesario pa nos keda balansá i salú. Na un okashon, Hesus a invitá su disipelnan pa bai kuné na un lugá solitario pa “sosegá un poko.” (Mar. 6:31) Tantu sosiegu komo rekreo òf entretenimentu sano por ta un bon manera pa pasa un ratu agradabel. Esei por yuda nos rekobrá e forsa ku nos mester pa sigui ku nos rutina di trabou.

¹⁶ Awe tin asina tantu forma di rekreo disponibel ku, komo kristian, nos mester ta selektivo i usa sabiduria di Dios ora nos ta skohe rekreo. Ademas, aunke rekreo tin su lugá den nos bida, e no ta e kos di mas importante. Beibel ta spièrta nos ku den “e último dianan,” hende lo “stima plaser en bes di stima Dios.” (2 Tim. 3:1, 4) Awe, hopi forma di rekreo i entretenimentu no ta aseptabel pa hende ku ke pega na e normanan hustu di Yehova.

¹⁷ E promé kristiannan mester a resistí e mal influensia di e mundu rònt di nan ku tabata loko pa plaser. Den e sirkonan romano, hende tabata dibertí ku sufrimentu di otro hende. Entretenimentu den e pueblo romano tabata saturá ku violensia, dramamentu di sanger i inmoralidat seksual. Sinembargo, e promé kristiannan a keda leu for di e kosnan ei. Awe, hopi di loke e mundu ta ofresé komo entretenimentu ta kontené e mesun elementonan ei i ta diseñá pa komplasé e inklinashonnan degradá di hende. Nos mester “paga bon tinu” kon nos ta kana i keda leu for di entretenimentu ku ta promové inmoralidat. (Efe. 5:15, 16; Sal. 11:5) Asta si e entretenimentu riba su mes no ta kuestionabel, hopi bes e ambiente general ku ta reina no ta sano.—1 Ped. 4:1-4.

¹⁸ Sinembargo, tin forma di rekreo i entretenimentu sano ku un kristian por disfrutá di dje. Nos ta benefisiá ora nos ta apliká e konsehonan bíbliko i e sugerensianan balansá ku nos ta haña den nos publikashonnan.

¹⁹ Tin biaha, un ruman ta invitá vários famia na su kas pa pasa un ratu ameno ku otro. Òf nos por haña un invitashon pa asistí na un resèpsi di kasamentu òf un otro evenemento sosial. (Huan 2:2) E anfitrion mester kòrda ku e ta esun responsabel pa loke ta tuma lugá. Ademas, mester tene kuidou ora di invitá un grupo grandi di hende. A yega di sosodé ku e ambiente relahá a pone algun ruman pasa límite i enbolbé nan mes den komementu i bebementu di mas i asta a kometé piká grave. Ku esaki na mente, kristian sabí a haña ta mihó pa limitá e tamaño i durashon di nan reunionnan sosial. Si ta sirbi bibida alkohóliko, mester tene kuidou pa esaki no pasa límite. (Flp. 4:5) Ora nos hasi esfuerso pa nos aktividat sosial ta spiritualmente refreskante i sano, kuminda i bibida lo no ta e kosnan di mas importante.

²⁰ Komo kristian, ta bon pa nos mustra hospitalidat. (1 Ped. 4:9) Ora nos ta invitá otro ruman na nos kas pa un komementu, rekreo òf pa pasa un ratu agradabel, laga nos kòrda riba e rumannan di ménos rekurso. (Luk. 14:12-14) Si ta nos ta e invitadonan na un okashon asina, laga nos sòru pa nos kondukta ta na armonia ku e konseho na Marko 12:31. Semper nos mester ta agradesidu pa e bondat ku otro ruman ta mustra na nos.

²¹ Un kristian ta disfrutá di e regalonan generoso di Dios. Tambe nan ta kontentu pa “kome i bebe i mira e bon ku tin den tur [nan] trabou.” (Ekl. 3:12, 13) Ora nos ta “hasi tur kos pa e gloria di Dios,” tantu e anfitrionnan komo e invitadonan ta ser fortalesé spiritualmente i ta keda ku dushi rekuerdo.

²² Yu di Testigunan di Yehova ta benefisiá di e enseñansa ku nan ta haña na skol. Ora nan bai skol, nan ta hasi nan bèst pa siña lesa i skirbi bon. Otro materia ku nan ta haña na skol por yuda nan alkansá nan metanan spiritual. Durante nan añanan eskolar, nan lo ke hasi esfuerso diligente pa ‘kòrda riba nan Kreador,’ poniendo kos spiritual na promé lugá.—Ekl. 12:1.

²³ Si bo ta un hóben kristian ku ta bayendo skol, evitá di anda innesesariamente ku bo kompañeronan di skol ku no ta Testigu. (2 Tim. 3:1, 2) Tin hopi kos ku bo por hasi pa evitá influensia di mundu. Yehova lo duna bo e yudansa ku bo tin mester. (Sal. 23:4; 91:1, 2) Pues, pa protehá bo mes, probechá di e provishonnan di Yehova.—Sal. 23:5.

²⁴ Pa keda separá for di mundu, mayoria di hóben Testigu ku ta bayendo skol ta opta pa no partisipá den aktividat despues di ora di skol. Kisas bo kompañeronan di klas i bo maestronan di skol no ta komprondé esaki. Sinembargo, loke ta konta ta pa bo agradá Dios. P’esei, bo tin ku laga bo konsenshi i prinsipio di Beibel guia bo, i bo mester para firme pa evitá e spiritu di kompetensia di mundu i nashonalismo. (Gal. 5:19, 26) Si bo ta un hóben, sigui e konsehonan bíbliko ku bo ta haña di bo mayornan i benefisiá di e bon kompania ku bo por haña den kongregashon. Asina, lo bo por pega na e normanan hustu di Yehova.

²⁵ Beibel ta indiká ku un kabes di famia tin ku perkurá pa e nesesidatnan di su famia. (1 Tim. 5:8) Sinembargo, komo sirbidó di Dios, nan ta komprondé ku e interesnan di Reino ta mas importante ku kualke trabou. (Mat. 6:33; Rom. 11:13) Komo ku nan ta deboto na Dios i ta keda kontentu ku loke nan tin pa kome i pa bisti, nan ta evitá e ansiedat- i trampanan di un bida materialista.—1 Tim. 6:6-10.

²⁶ Tur kristian dediká ku tin un trabou mester tene kuenta ku prinsipio bíbliko. Nan ta gana nan pan di kada dia na un manera onesto i no ta partisipá den aktividat ku ta bai kontra e lei di Dios òf lei di e pais. (Rom. 13:1, 2; 1 Kor. 6:9, 10) Nos mester tene na mente tambe e peligernan di mal kompania. Komo sòldá di Kristu, nos ta evitá di enbolbé nos mes den kualke negoshi ku ta bai kontra norma kristian òf ku ta pone nos posishon neutral òf nos spiritualidat na peliger. (Isa. 2:4; 2 Tim. 2:4) Tampoko nos no ke tin nada di haber ku e enemigu di Dios, “Babilonia e Grandi,” esta, religion falsu.—Rev. 18:2,  4; 2 Kor. 6:14-17.

²⁷ Komo hende ku ta respetá e normanan hustu di Dios, nos lo no ke usa nos reunionnan, asambleanan i kongresonan pa promové interes personal òf pa hasi negoshi. Nos ta asistí na e reunionnan akí ku e úniko propósito di adorá Yehova. Nos ta kome na Dios su mesa spiritual i ta disfrutá di “un interkambio di estímulo.” (Rom. 1:11, 12; Heb. 10:24, 25) Nos reunimentu mester keda riba un nivel spiritual.

²⁸ E normanan hustu ku Yehova a establesé pa su pueblo ta rekerí tambe pa nos “mantené e union di spiritu den e vínkulo di pas.” (Efe. 4:1-3) Kada sirbidó di Dios mester purba di hasi loke ta bon pa otro ruman, en bes di hasi solamente loke ta kumbinié. (1 Tes. 5:15) Sin duda bo a mira ku esaki ta e aktitut di e rumannan den bo kongregashon. Tambe bo ta ripará ku sea kual sea bo rasa, nashonalidat, nivel sosial, enseñansa eskolar òf situashon finansiero, nos tur tin ku biba segun e mesun normanan hustu. Asta hende ku no ta Testigu di Yehova ta ripará e karakterístika sobresaliente akí di e pueblo di Yehova.—1 Ped. 2:12.

²⁹ Pa enfatisá mas ainda kiko ta mantené nos uní, apòstel Pablo a skirbi: “Ta ún kurpa tin i ún spiritu, meskos ku ta ún speransa tin na kua a yama boso; ún Señor, ún fe, ún boutismo; ún Dios i Tata di tur persona, ku ta riba tur, ku ta obra pa medio di tur i den tur.” (Efe. 4:4-6) Si nos ta rekonosé Yehova su soberania, nos lo ta uní den komprondementu di doktrina básiko di Beibel i tambe siñansa mas profundo di Beibel. De echo, Yehova a duna su pueblo e idioma puru di e bèrdat pa nan por sirbié na un manera uní.—Sof. 3:9.

³⁰ E union i pas ku tin den e kongregashon kristian ta animá i fortalesé nos tur ku ta adorá Yehova. Nos a mira kon Yehova su promesa a kumpli: “Lo mi trese nan huntu manera karné den kurá.” (Mik. 2:12) Nos ta mantené e union i pas ei ora nos ta pega na e normanan hustu di Yehova.

³¹ Hende ku ta ser aseptá den e kongregashon limpi di Yehova ta felis! E echo ku nos por karga e nòmber di Yehova ta bal kualke sakrifisio ku nos lo tin ku hasi. Nos relashon ku Yehova ta masha balioso, i p’esei, nos lo hasi tur nos esfuerso pa pega na su normanan hustu i animá otro hende pa hasi meskos.—2 Kor. 3:18.