Lus di Dios Ta Iluminá Skuridat!

“SEÑOR ta iluminá mi skuridat.”—2 SAMUEL 22:29.

 1. Kiko lus tin di haber ku bida?

“DIOS a bisa: ‘Laga tin lus.’ I tabatin lus.” (Génesis 1:3) Ku e palabranan memorabel ei, e relato di kreashon den Génesis ta mustra ku ta Yehova ta e fuente di lus. I sin lus lo no por tabatin bida riba tera. Yehova ta e fuente di lus spiritual tambe. E lus aki ta vital. E ta sirbi komo nos guia riba e kaminda di bida. (Salmo 43:3) Rei David a mustra kon importante lus spiritual ta pa bida, ora el a skirbi: “Ta serka bo e fuente di bida ta; den bo lus nos ta mira lus.”—Salmo 36:9.

 2. Manera Pablo a mustra, ku kiko lus ta estrechamente ligá?

² Mas o ménos 1.000 aña despues ku David a biba, apòstel Pablo a hasi referensia na e relato di kreashon. Den su karta pa e kongregashon kristian na Korinto, el a skirbi: “Dios a bisa: ‘Lus lo resplandesé for di skuridat.’” Despues Pablo a mustra ku lus spiritual tin hopi di haber ku e konosementu ku Yehova ta duna. El a sigui bisa: “[Dios] a resplandesé den nos kurason pa duna e lus di e konosementu di e gloria di Dios den kara di Kristu.” (2 Korintionan 4:6) Kon e lus aki ta yega serka nos?

Beibel Ta Transmití Lus

 3. Ki lus Yehova ta perkurá pa nos via Beibel?

³ Yehova ta transmití lus spiritual prinsipalmente via Beibel, su Palabra inspirá. P’esei, segun ku nos studia Beibel i gana konosementu di Dios, nos ta laga su lus bria riba nos. Via Beibel Yehova ta tira lus riba su propósitonan, i e ta siña nos kon nos por hasi su boluntat. E informashon ei ta duna nos bida propósito, i ta yuda satisfasé nos nesesidat spiritual. (Eklesiástes 12:1; Mateo 5:3) Hesus a mustra ku ta importante pa nos duna atenshon na nos nesesidatnan spiritual. Sitando e Lei di Moises, el a bisa: “Ta pará skirbí: ‘Hende lo no biba di pan so, ma di tur palabra ku ta sali for di boka di Dios.’”—Mateo 4:4; Deuteronomio 8:3.

 4. Den ki sentido Hesus ta “e lus di mundu”?

⁴ Hesus ta ser asosiá hopi ku lus spiritual. De echo, e mes a bisa ku e ta “e lus di mundu,” i ku ‘esun ku siguié lo no kana den skuridat, ma lo tin e lus di bida.’ (Huan 8:12) E ekspreshon aki ta yuda nos komprendé e papel krusial ku Hesus ta hunga den transmití e bèrdat di Yehova na humanidat. Si nos ke evitá skuridat i kana den e lus di Dios, nos tin ku skucha tur loke Hesus ta bisa, i ku sumo kuidou nos mester sigui su ehèmpel i siñansanan skirbí den Beibel.

 5. Ki responsabilidat e siguidónan di Hesus tabatin despues di su morto?

⁵ Un par di dia promé ku Hesus a muri, el a bolbe referí na su mes komo e lus, i a bisa su disipelnan: “Pa un poko tempu mas e lus ta meimei di boso. Kana miéntras ku boso tin e lus, pa skuridat no sorprendé boso; esun ku ta kana den skuridat no sa unda e ta bai. Miéntras ku boso tin e lus, kere den e lus, pa boso por bira yunan di lus.” (Huan 12:35, 36) Esnan ku a bira yunan di lus a siña e patronchi di “palabranan sano” ku tin den Beibel. (2 Timoteo 1:13, 14) Despues nan a usa e palabranan sano aki pa atraé hende sinsero for di den skuridat, pa nan bini den e lus di Dios.

 6. Ki bèrdat básiko tokante lus i skuridat nos ta mira na 1 Huan 1:5?

⁶ Apòstel Huan a skirbi: “Dios ta lus i den dje no tin nada-nada di skuridat.” (1 Huan 1:5) Aki Huan ta hasi un kontraste entre lus i skuridat. Lus spiritual ta bini di Yehova, i skuridat spiritual no por tin nada di haber kuné. Ken ta e fuente di skuridat spiritual anto?

E Fuente di Skuridat Spiritual

 7. Ken ta tras di e skuridat spiritual ku mundu ta aden, i ki influensia e tin?

⁷ Apòstel Pablo a papia di “e dios di e mundu aki.” Ku esei e tabata kier men Satanas e Diabel. El a sigui bisa ku Satanas “a siega mente di esnan ku no ta kere, pa nan no mira e lus di e evangelio di e gloria di Kristu, kende ta e imágen di Dios.” (2 Korintionan 4:4) Hopi hende ta bisa ku nan ta kere den Dios. Sin embargo, kada bes ménos dje hendenan aki ta kere ku ta eksistí un Diabel. Dikon? Debí ku nan no ta dispuesto di aseptá ku por ta eksistí un poder sobrehumano malbado ku por influensiá nan manera di pensa. Sin embargo, manera Pablo ta mustra, Diabel ta eksistí, i e ta influensiá hende di manera ku nan no por mira e lus dje bèrdat. E poder ku Satanas tin pa influensiá mente di hende ta bini bon kla padilanti kaminda Beibel ta deskribié profétikamente komo esun ku “ta gaña henter mundu.” (Revelashon 12:9) Debí n’e aktividatnan di Satanas, awor henter humanidat, ku eksepshon di esnan ku ta sirbi Yehova, ta den e situashon ku Isaías a profetisá: “Mira, skuridat lo tapa tera, i skuridat profundo e pueblonan.”—Isaías 60:2.

 8. Kiko ta mustra ku hende den skuridat spiritual ta desorientá?

⁸ Den skuridat diki bo no por mira apsolutamente nada. Ta fásil pa bo pèrdè òf desorientá. Meskos, hende ku ta den skuridat spiritual no tin noshon di unda nan ta pará, i nan ta bira desorientá den sentido spiritual. Nan por pèrdè nan kapasidat di distinguí bèrdat for di mentira, i bon for di malu. Profeta Isaías a papia di hende den skuridat spiritual asina, ora el a skirbi: “Ai di esnan ku ta yama loke ta malu, bon, i loke ta bon, malu, loke ta skuridat, lus, i loke ta lus, skuridat, loke ta marga, dushi, i loke ta dushi, marga.” (Isaías 5:20) Hende ku ta biba den skuridat spiritual ta bou di influensia dje dios di skuridat, Satanas e Diabel, i komo resultado nan ta biba alehá for dje fuente di lus i di bida.—Efesionan 4:17-19.

E Reto di Pasa di Skuridat pa Lus

 9. Splika kon skuridat ta atraé hasidónan di maldat, tantu literalmente komo den sentido spiritual.

⁹ Job, un hòmber fiel, a hala atenshon n’e echo ku hasidónan di maldat ta gusta skuridat. El a bisa: “Wowo di e kibradó di matrimonio ta warda te ora kuminsá bira skur, i ta bisa: ‘Ningun wowo lo mira mi.’ I e ta disfrasá su kara.” (Job 24:15) Hasidónan di maldat tambe ta den skuridat spiritual, i e skuridat ei por ta un forsa ku ta dominá nan. Apòstel Pablo a bisa ku inmoralidat seksual, ladronisia, golosidat, buracheria, insulto i ekstorshon ta kos di tur dia pa hende ku ta den gara di skuridat. Pero ken ku bini na e lus dje Palabra di Dios por kambia. Den su karta p’e korintionan, Pablo ta mustra ku un kambio asina ta posibel. Hopi dje kristiannan di Korinto a yega di praktiká obranan di skuridat. Apesar di esei, Pablo a bisa nan: “Ma boso a wòrdu labá, ma boso a wòrdu santifiká, ma boso a wòrdu hustifiká den e nòmber di Señor Hesukristu i den e spiritu di nos Dios.”—1 Korintionan 6:9-11.

10, 11. (a) Kon Hesus a mustra konsiderashon pa un hòmber ku el a duna bista? (b) Pakiko hopi hende no ta skohe pa e lus?

¹⁰ Ora un hende sali for di skuridat diki, bai den lus, su wowonan tin mester di un tiki tempu pa nan adaptá. Na Betsaida Hesus a kura un hòmber siegu. Pero bondadosamente el a hasié den fase. “El a kohe e siegu na su man i a hib’é pafó di e pueblito; i despues di a skupi riba su wowonan i di a pone su mannan riba dje, el a puntr’é: ‘Bo ta mira algu?’ I e hòmber a hisa kara wak i a bisa: ‘Mi ta mira hende, pasobra mi ta mira nan manera palu ta kana rònt.’ Djei el a bolbe pone su mannan riba wowo di e hòmber; i el a mira bon i a keda restorá, i tabata mira tur kos kla-kla.” (Marko 8:23-25) Parse ku Hesus a restorá e hòmber su bista pokopoko p’e por a kustumbrá ku lus skèrpi di solo. Nos por imaginá nos kuantu goso e hòmber lo a sinti ora ku e por a mira.

¹¹ Sin embargo, e goso di hende ku ta haña yudansa pa sali, paso pa paso, for di skuridat spiritual, i drenta den e lus dje bèrdat ta asta mas grandi ainda. Ora nos mira kuantu goso nan tin, nos por puntra nos mes ta kon bini mas tantu hende no ta sinti nan atraí n’e lus. Hesus ta bisa nos dikon: “Esaki ta e kondenashon, ku e lus a bin den mundu, i hende tabata stima e skuridat mas ku e lus; pasobra nan echonan tabata malu. Pasobra esun ku ta hasi maldat ta odia e lus, i no ta bin na e lus, pa su echonan no wòrdu eksponí.” (Huan 3:19, 20) Sí, hopi hende ta gusta “hasi maldat,” manera kometé inmoralidat, oprimí hende, gaña, kometé froude i hòrta. Satanas su skuridat spiritual ta nèt bon pa nan hasi manera nan ke.

Hasi Progreso den e Lus

12. Den ki maneranan nos a benefisiá dor di bini den e lus?

¹² Ki kambionan nos a mira sosodé den nos mes for di tempu ku nos a siña konosé e lus? Tin biaha ta bon pa nos wak atras i eksaminá e progreso spiritual ku nos a hasi. Ki mal hábitonan nos a libra di dje? Ki problemanan den nos bida nos a resolvé? Ki kambio nos a hasi den nos plannan pa futuro? Ku Yehova su forsa, i ku yudansa di su spiritu santu, nos por sigui hasi kambio den nos personalidat i nos manera di pensa, pa asina nos mustra ku e lus ta produsiendo un bon reakshon den nos. (Efesionan 4:23, 24) Pablo a ekspres’é asin’akí: ‘Ántes boso tabata skuridat, ma awor boso ta lus den Señor; kana komo yunan di lus, pasobra e fruta di e lus ta konsistí di tur bondat i hustisia i bèrdat.’ (Efesionan 5:8, 9) Dor di laga Yehova su lus guia nos, nos ta haña speransa i propósito. Ademas esaki ta kontribuí n’e goso di hende rònt di nos tambe. I esta un goso Yehova ta sinti ora e mira e kambionan ku nos ta hasi!—Proverbionan 27:11.

13. Kon nos por mustra gratitut pa Yehova su lus, i kiko nos tin mester pa por hasié?

¹³ Dor di reflehá Yehova su lus, esta, dor di kompartí loke nos a siña for di Beibel ku nos miembronan di famia, nos amigunan i nos bisiñanan, nos ta mustra gratitut pa e bida mas felis ku nos ta disfrutá di dje. (Mateo 5:12-16; 24:14) Nos predikashon i nos bida kristian ehemplar ta sirbi pa reprendé esnan ku no kier tende. Pablo ta splika: “Siña loke ta agradabel na Señor. I no partisipá den e obranan infruktífero di skuridat, sino mas bien eksponé nan.” (Efesionan 5:10, 11) Nos tin mester di kurashi pa yuda hende bandoná skuridat i skohe p’e lus. Asta mas importante ta ku nos tin mester di kompashon i interes den hende, i un deseo sinsero di kompartí e lus dje bèrdat ku nan, pa nan benefisio eterno.—Mateo 28:19, 20.

Tene Kuidou ku Lus Falsu!

14. Papiando tokante lus, na ki spièrtamentu nos mester presta atenshon ?

¹⁴ Ora hende ta den skuridat riba laman, nan ta keda kontentu ku kualkier lus ku nan mira. Ántes hende tabata sende kandela riba e barankanan di kosta di Inglatera pa mustra barkunan unda nan por a haña refugio ora di mal tempu. Tripulantenan di barku tabata gradisidu ku e lusnan aki por a guia nan na haf pa siguridat. Pero algun dje kandelanan ei tabata pa gaña nan. Hopi barku a kai den trampa, i na lugá di haña un haf, nan tabata bai dal den baranka, i hende tabata hòrta nan kargamentu. Den e mundu yen di mentira aki, nos mester paga tinu pa no laga lus falsu atraé nos i hiba nos na noufragio spiritual. Beibel ta bisa nos ku “Satanas mes ta disfrasá su mes komo un angel di lus.” I su sirbidónan tambe, inkluso hende apóstata, ta “trahadónan engañoso” ku “tambe ta disfrasá nan mes komo sirbidónan di hustisia.” Si nos keda pensa riba nan rasonamentu falsu, nos konfiansa den Beibel—Yehova su Palabra di bèrdat—por bira suak, i nos fe por muri.—2 Korintionan 11:13-15; 1 Timoteo 1:19.

15. Kiko lo yuda nos keda riba e “kaminda ku ta hiba na bida”?

¹⁵ E salmista a skirbi: “Bo palabra ta un lampi pa mi pia i un lus pa mi kaminda.” (Salmo 119:105) Sí, e ‘kaminda smal ku ta hiba na bida’ ta bon iluminá dor di Yehova, nos Dios amoroso, “kende ta deseá pa tur hende wòrdu salbá i yega na konosementu di e bèrdat.” (Mateo 7:14; 1 Timoteo 2:4) Dor di kumpli ku mandamentunan di Beibel nos lo evitá di dual for di riba e kaminda smal ei, i kohe e rumbo di maldat. Pablo a skirbi: “Tur skritura ta inspirá pa Dios i ta útil pa siñansa, pa reprendementu, pa korekshon, pa eduká den hustisia.” (2 Timoteo 3:16) Segun ku nos ta krese spiritualmente, e Palabra di Dios ta instruí nos. Ku e lus dje Palabra di Dios nos por reprendé nos mes òf, si ta nesesario, nos lo por risibí reprendementu serka wardadónan amoroso den e kongregashon. Meskos nos por aseptá ‘disiplina den hustisia’ (NW) humildemente, pa evitá di dual for di riba e kaminda ku ta hiba na bida.

Kana ku Apresio den e Lus

16. Kon nos por mustra nos gratitut p’e lus ku Yehova a duna nos komo un perkurashon maravioso?

¹⁶ Kon nos por mustra nos gratitut p’e perkurashon maravioso aki di Yehova, esta, lus? Huan kapítulo 9 ta bisa nos ku ora Hesus a kura un hòmber ku a nase siegu, e hòmber a sintié motivá pa ekspresá su apresio. Kon? El a pone fe den Hesus komo e Yu di Dios, i a identifik’é públikamente komo “un profeta.” Ademas, el a papia ku kurashi kontra esnan ku a purba minimisá e importansia dje milager di Hesus. (Huan 9:17, 30-34) Apòstel Pedro ta yama e miembronan ungí dje kongregashon kristian “un pueblo pekuliar [pa poseshon spesial, NW].” Dikon? Debí ku nan ta gradisidu meskos ku e hòmber ku a nase siegu i a ser kurá. Nan ta mustra apresio pa Yehova komo nan Benefaktor, dor di ‘proklamá e alabansanan di esun ku a yama nan for di skuridat na su lus maravioso.’ (1 Pedro 2:9; Kolosensenan 1:13) Kristiannan ku un speransa terenal tambe ta mustra gratitut, i nan ta apoyá nan rumannan ungí den deklará Yehova su “alabansanan” públikamente. Esta un privilegio sin igual Dios a duna hende imperfekto!

17, 18. (a) Ki responsabilidat kada un di nos tin individualmente? (b) Meskos ku Timoteo, kiko tur kristian ta ser animá pa evitá?

¹⁷ Ta esensial pa nos tin apresio sinsero p’e lus dje bèrdat. Kòrda ku nos niun no ta nase konosiendo e bèrdat. Algun di nos ta siña konos’é ora nos ta adulto kaba, i mesora nos ta mira e superioridat di lus riba skuridat. Otronan tin e gran privilegio di ser kriá dor di mayornan ku ta teme Dios. Por ta fásil pa nan pèrdè e balor di lus for di bista. Un Testigu kende su mayornan tabata sirbi Yehova for di promé ku el a nase, ta atmití ku a tum’é basta tempu i esfuerso pa kapta e nifikashon i importansia kompleto dje bèrdat ku el a siña for di infansia. Sea ku nos ta hóben òf bieu, nos tur mester kultivá apresio profundo p’e bèrdat ku Yehova a revelá na nos.

¹⁸ E hóben Timoteo a siña “e skrituranan santu” for di su infansia. (2 Timoteo 3:15) Pero e mester a hasi esfuerso den e ministerio kristian pa e por a bira un kristian maduro. E ora ei e tabata den posishon di por yuda apòstel Pablo, kende a anim’é: “Hasi tur bo esfuerso pa presentá bo mes aprobá dilanti di Dios manera un trahadó ku no tin motibu pa tin bèrgwensa, ku ta parti e palabra di bèrdat na un manera korekto.” Meskos ku Timoteo, laga nos tur evitá di hasi kualkier kos ku por duna nos bèrgwensa, òf duna Yehova bèrgwensa di nos!—2 Timoteo 2:15.

19. (a) Meskos ku David, kiko nos tur tin motibu pa bisa? (b) Kiko nos lo trata den e siguiente artíkulo?

¹⁹ Nos tin tur motibu pa alabá Yehova, ku a duna nos e lus di su bèrdat. Nos ta bisa meskos ku Rei David: “Bo ta mi lampi, o SEÑOR; i SEÑOR ta iluminá mi skuridat.” (2 Samuel 22:29) I sin embargo, nos lo no riska di bira satisfecho ku nos mes i baha nos vigilansia, pasobra nos lo por drif bai bèk den e skuridat ku nos a skapa for di dje. P’esei, e siguiente artíkulo lo yuda nos eksaminá kuantu importansia nos ta duna e bèrdat di Dios den nos bida.

Kiko Bo A Siña?

• Kon Yehova ta perkurá iluminashon spiritual?

• Den ki sentido e skuridat spiritual ku ta rondoná nos ta un reto?

• Ki peligernan nos mester evitá?

• Kon nos por mustra nos gratitut p’e lus dje bèrdat?

[Plachi na página 8]

Yehova ta e fuente di lus literal i spiritual

[Plachi na página 10]

Meskos ku Hesus a kura un hòmber siegu pokopoko, asina e ta yuda nos tambe sali for di skuridat spiritual

[Plachi na página 11]

Si Satanas su lusnan falsu hasi nos dual, nan lo hiba nos na noufragio spiritual