Keda Leu for di Adorashon Falsu!

“‘Sali for di meimei di nan i separá boso mes,’ SEÑOR ta bisa. ‘I no mishi ku loke ta impuru.’”—2 KORINTIONAN 6:17.

 1. Den ki kondishon spiritual hopi hende sinsero ta haña nan mes?

HOPI hende sinsero no sa e bèrdat tokante Dios i e futuro di humanidat. Komo ku nan no a haña kontesta pa nan preokupashonnan spiritual di mas profundo, nan ta biba den konfushon i insertidumbre. Miónes di nan ta katibu di superstishon-, rito- i selebrashonnan ku ta ofendé nos Kreadó. Probablemente bo tin bisiña i famia ku ta kere den un fièrnu di kandela, un Dios ku ta konsistí di tres persona, alma inmortal òf kualke otro siñansa falsu.

 2. Kiko lidernan religioso a hasi, i ku ki resultado?

² Kiko ta responsabel pa e ignoransia spiritual aki ku ta reina tur kaminda? Pa straño ku por parse, ta religion ta responsabel. Spesífikamente, e organisashonnan i lidernan religioso ku a siña hende ideanan kontrario na e pensamentunan di Dios. (Marko 7:7, 8) Komo resultado, hopi hende a ser engañá i ta kere ku nan ta adorá e Dios berdadero, miéntras ku en realidat ta ofendé nan ta ofendé Dios. Religion falsu ta direktamente responsabel pa e situashon tristu aki.

 3. Ken ta e promotor prinsipal di religion falsu, i kon Beibel ta deskribié?

³ Tin un persona invisibel ta respaldá religion falsu. Refiriendo na e persona ei apòstel Pablo a bisa: “E dios di e mundu aki a siega mente di esnan ku no ta kere, pa nan no mira e lus di e evangelio di e gloria di Kristu, kende ta e imágen di Dios.” (2 Korintionan 4:4) “E dios di e mundu aki” no ta ningun otro sino Satanas e Diabel. E ta e promotor prinsipal di adorashon falsu. Pablo a skirbi: “Satanas mes ta disfrasá su mes komo un angel di lus. P’esei no ta nada straño si su sirbidónan tambe ta disfrasá nan mes komo sirbidónan di hustisia.” (2 Korintionan 11:14, 15) Satanas ta laga kos malu parse bon i ta gaña hende pa kere mentira.

 4. Kiko Dios su Lei duná na Israel di antigwedat a bisa tokante profetanan falsu?

⁴ Ta p’esei Beibel ta kondená religion falsu ku tantu firmesa asina! Por ehèmpel, e Lei di Moisés spesífikamente a spièrta Dios su pueblo skohí pa tene kuidou ku profetanan falsu. Ken ku a promové siñansa falsu i adorashon di diosnan falsu mester a ‘wòrdu matá pasobra el a konsehá rebelion kontra Yehova.’ E israelitanan a haña e mandamentu pa ‘kita maldat for di meimei di nan.’ (Deuteronomio 13:1-5) Sí, Yehova ta konsiderá religion falsu komo maldat.—Ezekiel 13:3.

 5. Ki spièrtamentunan nos mester hasi kaso di dje awe?

⁵ Yehova ta masha kontra di religion falsu, i Hesukristu i su apòstelnan a reflehá e mesun aktitut ei. Hesus a spièrta su disipelnan: “Tene kuidou ku profeta falsu, ku ta bin serka boso bistí manera karné, ma di paden nan ta lobo hambrá.” (Mateo 7:15; Marko 13:22, 23) Pablo a skirbi ku “e furia di Dios ta keda revelá for di shelu kontra tur impiedat i inhustisia di hende ku ta oprimí e bèrdat.” (Romanonan 1:18) Ta masha importante anto pa kristiannan berdadero hasi kaso di e spièrtamentunan aki i keda leu for di ken ku ta skonde e Palabra di Dios òf ku ta plama siñansa falsu!—1 Juan 4:1.

Sali for di ‘Babilonia e Grandi’

 6. Kon Beibel ta deskribí ‘Babilonia e Grandi’?

⁶ Wak kon e buki bíbliko di Revelashon ta deskribí religion falsu. E ta pint’é komo un prostituta burachi ku tin poder riba hopi reino i nan pueblo. E muhé simbóliko aki ta kometé fornikashon ku hopi rei i ta burachi di e sanger di Dios su adoradónan berdadero. (Revelashon 17:1, 2, 6, 18) E tin un nòmber skirbí riba su frenta ku ta kuadra ku su komportashon sushi i repugnante. E nòmber ta “E Gran Babilonia, mama di prostitutanan i di e abominashonnan di tera.”—Revelashon 17:5.

7, 8. Kon religion falsu a prostituí su mes, i ku ki resultado?

⁷ E deskripshon bíbliko di Babilonia e Grandi apropiadamente ta referí na tur religion falsu. Ounke e míles di religionnan no ta formalmente uní komo un solo organisashon mundial, nan ta inseparablemente uní den propósito i akshon. Meskos ku e muhé inmoral deskribí den Revelashon, religion falsu tin un influensia masha grandi riba gobièrnunan. Religion falsu ta meskos ku un muhé ku no ta fiel na su promesa matrimonial, pasobra el a prostituí su mes dor di sera aliansa ku masha hopi gobièrnu polítiko. Disipel Santiago a skirbi: “Boso, adúlteranan, boso no sa ku amistat ku mundu ta enemistat pa ku Dios? P’esei, ken ku kier ta amigu di mundu ta hasi su mes enemigu di Dios.”—Santiago 4:4.

⁸ E metementu di religion falsu den gobièrnu a resultá den hopi sufrimentu humano. Dr. Xolela Mangcu, un analista polítiko afrikano, a bisa ku “historia di mundu tin hopi ehèmpel di matansanan masal kousá dor di kombiná religion ku polítika.” Resientemente un korant a deklará: “E disputanan di mas sangriento i peligroso awe . . . ta estrechamente mará na religion.” Miónes di hende a muri den konfliktonan respaldá dor di religion. Babilonia e Grandi asta a persiguí i mata Dios su sirbidónan berdadero, i na moda di papia a bira burachi di nan sanger.—Revelashon 18:24.

 9. Kon Yehova su odio pa adorashon falsu ta ser ekspresá den e buki di Revelashon?

⁹ Loke ta bai sosodé ku Babilonia e Grandi ta laga nos mira bon kla ku Yehova ta odia adorashon falsu. Revelashon 17:16 ta deklará: “E dies kachunan ku bo a mira, i e bestia, esakinan lo odia e prostituta i lo hasié desolá i sunú, i lo kome su karni i lo kim’é kompletamente ku kandela.” Pues promé, un bestia inmenso lo habrak’é mat’é i kome su karni. Anto kaba, loke sea ku sobra di dje lo ser kimá kompletamente. Di akuerdo ku esei, pronto e gobièrnunan di mundu lo tuma tal akshon kontra religion falsu. Dios lo pone nan hasi esei. (Revelashon 17:17) Babilonia e Grandi, e imperio mundial di religion falsu, ta destiná pa destrukshon. “Lo [e] no wòrdu hañá nunka mas.”—Revelashon 18:21.

10. Kiko lo mester ta nos posishon pa ku religion falsu?

¹⁰ Ki posishon adoradónan berdadero lo mester tuma relashoná ku Babilonia e Grandi? Ku palabra kla Beibel ta manda: “Sali for di dje, mi pueblo, pa bo no partisipá den su pikánan i pa bo no risibí di su plaganan.” (Revelashon 18:4) Esnan ku ke salba mester sali for di religion falsu promé ku ta muchu lat. Tempu ku Hesukristu tabata riba tera, el a profetisá ku den e último dianan hopi hende lo a djis pretendé di ta su siguidó. (Mateo 24:3-5) Hesus ta bisa e tipo di personanan ei: “Nunka mi no a konosé boso; bai for di mi, boso ku ta hasi inikidat.” (Mateo 7:23) Hesukristu, ku awor ta Rei entronisá, no tin nada keber ku religion falsu.

Keda Leu—Kon?

11. Kiko nos mester hasi pa keda leu for di adorashon falsu?

¹¹ Kristiannan berdadero ta keda leu for di adorashon falsu i ta rechasá siñansanan religioso falsu. Esaki ta nifiká ku nos no ta skucha ni wak programanan religioso na radio ni televishon ni tampoko ta lesa literatura religioso ku ta siña mentira tokante Dios i su Palabra. (Salmo 119:37) Tambe lo ta sabí pa nos no asistí na aktividatnan sosial i di rekreo patrosiná dor di kualke organisashon konektá ku religion falsu. Ademas, nos no ta sostené adorashon falsu den ningun manera. (1 Korintionan 10:21) Dor di evitá e kosnan aki, nos ta protehá nos mes di ser kohé “prezu dor di filosofia i engaño bano, segun tradishon di hende, segun e prinsipionan elemental di mundu, i no segun Kristu.”—Kolosensenan 2:8.

12. Kon un persona por libra su mes di tur konekshon ku organisashonnan religioso falsu?

¹² Kiko si un persona ku ta deseá di bira un Testigu di Yehova ta aktualmente registrá komo miembro di un religion falsu? Den mayoria kaso, un karta di renunsia lo sirbi komo prueba ku un persona no ke ser konsiderá mas komo miembro di un religion falsu. Ta spesialmente importante pa e persona tuma akshon desisivo pa evitá di ser kontaminá dor di adorashon falsu. E akshonnan di un persona ku ke bira Testigu mester mustra bon kla na e organisashon religioso i na opservadónan en general ku el a terminá ku e afiliashon religioso ei.

13. Ki konseho Beibel ta duna relashoná ku e nesesidat di keda leu for di adorashon falsu?

¹³ Apòstel Pablo a skirbi: “No uni boso mes den yugo desigual ku inkrédulonan, pasobra ki kompañerismo hustisia tin ku inhustisia, i ki komunion lus tin ku skuridat? Òf ki armonia Kristu tin ku Belial, òf kiko un kreyente tin komun ku un inkrédulo? Òf ki kombenio e tèmpel di Dios tin ku ídolo? . . . ‘P’esei, sali for di meimei di nan i separá boso mes,’ SEÑOR ta bisa. ‘I no mishi ku loke ta impuru.’” (2 Korintionan 6:14-17) Nos ta hasi kaso di e palabranan aki dor di keda leu for di adorashon falsu. Pero Pablo su konseho ta rekerí pa nos keda leu tambe di adoradónan falsu?

“Komportá Boso ku Sabiduria”

14. Nos mester evitá tur kontakto ku hende ku ta partisipá den adorashon falsu? Splika.

¹⁴ Akaso adoradónan berdadero mester evitá tur kontakto ku hende ku ta partisipá den adorashon falsu? Nos mester tene nos mes kompletamente separá for di esnan ku no ta kompartí nos fe? E kontesta ta nò. Di e dos mandamentunan di mas grandi, esun di dos ta deklará: “Stima bo próhimo manera bo mes.” (Mateo 22:39) Nos sigur ta demostrá amor na nos próhimo ora ku nos ta kompartí ku nan e bon nobo di e Reino. Tambe nos ta demostrá amor na nan ora ku nos ta studia Beibel ku nan i ta hasi nan konsiente di e nesesidat di keda leu for di adorashon falsu.

15. Kiko ‘no ser parti di mundu’ ta nifiká?

¹⁵ Apesar ku nos ta prediká e bon nobo na nos próhimo, komo siguidónan di Hesus nos ‘no ta parti di mundu.’ (Juan 15:19) E ekspreshon “mundu” ta referí aki na sosiedat humano alehá for di Dios. (Efesionan 4:17-19; 1 Juan 5:19) Nos ta keda separá di mundu den e sentido ku nos ta evitá aktitutnan, abla i kondukta ku ta ofendé Yehova. (1 Juan 2:15-17) Ademas, na armonia ku e prinsipio ku “mal kompania ta daña bon kustumber,” nos ta evitá di tin amistat ku hende ku no ta biba segun normanan kristian. (1 Korintionan 15:33) No ser parti di mundu ta nifiká “konserbá bo mes liber di mancha di mundu.” (Santiago 1:27) Pues anto, ser separá di mundu no ta nifiká ku físikamente nos ta evitá tur kontakto ku otro hende.—Juan 17:15, 16; 1 Korintionan 5:9, 10.

16, 17. Kon kristiannan mester trata hende ku no konosé bèrdat bíbliko?

¹⁶ Kon anto nos tin ku trata e hendenan ku no konosé bèrdatnan bíbliko? Pablo a skirbi na e kongregashon di Kolosas: “Komportá boso ku sabiduria pa ku esnan di pafó, hasiendo bon uso di e oportunidat. Laga boso palabranan ta semper ku grasia, sasoná ku salu, pa boso por sa kon boso mester kontestá kada persona.” (Kolosensenan 4:5, 6) Apòstel Pedro a skirbi: “Santifiká Kristu komo Señor den boso kurason, i sea semper dispuesto pa duna kontesta na kada un ku pidi boso pa duna kuenta di e speransa ku tin den boso, sin embargo ku suavedat i reverensia [òf, “rèspèt profundo,” NW].” (1 Pedro 3:15) Pablo a konsehá kristiannan “pa no kalumniá ningun hende, pa no ta pleitadó, ma suave, mustrando tur konsiderashon pa tur hende.”—Tito 3:2.

¹⁷ Komo Testigu di Yehova, nos ta evitá di ta brutu òf arogante ku otro hende. Definitivamente nos no ta usa palabranan ofensivo pa deskribí hende di otro religion. Mas bien, nos ta usa takto, asta ora e doño di kas, bisiña òf kolega no ta bondadoso òf ta usa palabranan ofensivo.—Kolosensenan 4:6; 2 Timoteo 2:24.

“Retené e Ehèmpel di Palabranan Sano”

18. Personanan ku bai bèk na adorashon falsu ta eksperensiá ki kondishon spiritual deplorabel?

¹⁸ Despues ku un hende a siña e bèrdatnan bíbliko, lo ta hopi lamentabel si e mester bai bèk na adorashon falsu! Beibel ta deskribí e konsekuensianan lamentabel di esei ora e ta bisa: “Pasobra si despues ku nan a skapa di e kontaminashonnan di mundu pa medio di e konosementu di e Señor i Salbadó Hesukristu, nan bolbe wòrdu enbolbí den nan i wòrdu vensí, e último estado a bira pió pa nan ku esun di promé. . . . A sosodé ku nan konforme e proverbio berdadero: ‘Un kachó ta bolbe na su mes saká,’ i ‘Un porko, despues di a wòrdu bañá, ta bolbe bai lora den lodo.’”—2 Pedro 2:20-22.

19. Dikon ta masha importante pa keda alerta pa kualke kos ku por peligrá nos spiritualidat?

¹⁹ Nos mester keda alerta pa kualke kos ku por peligrá nos spiritualidat. E peligernan t’ei konstantemente! Apòstel Pablo a spièrta: “E spiritu ta bisa klaramente ku den e último tempunan algun lo kai for di fe, dor di paga atenshon na spiritunan engañoso i doktrinanan di demoñonan.” (1 Timoteo 4:1) Nos ta bibando den “e último tempunan.” Kristiannan ku no keda leu for di adorashon falsu por ser “tirá p’aki p’aya dor di olanan, i hibá dor di tur bientu di doktrina, dor di triki di hende, dor di astusia den trahamentu di plan engañoso.”—Efesionan 4:13, 14.

20. Kon nos por protehá nos mes kontra e influensia perhudisial di religion falsu?

²⁰ Kon nos por protehá nos mes kontra e influensia perhudisial di religion falsu? Pensa riba tur loke Yehova a perkurá. Nos tin e Palabra di Dios, e Beibel. (2 Timoteo 3:16, 17) Tambe Yehova a perkurá kuminda spiritual na abundansia mediante “e esklabo fiel i prudente.” (Mateo 24:45) Segun ku nos ta progresá den e bèrdat, nos tin ku kultivá un smak pa ‘kuminda sólido ku ta pa hende madurá’ i un deseo di asistí na e reunionnan kristian kaminda nos ta siña bèrdatnan bíbliko. (Hebreonan 5:13, 14; Salmo 26:8) Laga nos ta determiná pa probechá plenamente di tur loke Yehova ta perkurá pa nos di manera ku nos por “retené e ehèmpel di palabranan sano” ku nos a tende. (2 Timoteo 1:13) Di e manera ei nos por keda leu for di adorashon falsu.

Kiko Bo A Siña?

• Kiko ‘Babilonia e Grandi’ ta?

• Kiko nos tin ku hasi pa keda leu for di religion falsu?

• Kiko nos mester evitá ku ta un peliger pa nos spiritualidat?

[Plachi na página 28]

Bo sa dikon Beibel ta deskribí ‘Babilonia e Grandi’ komo un muhé inmoral?

[Plachi na página 29]

‘Babilonia e Grandi’ ta destiná pa destrukshon

[Plachi na página 31]

Nos ta demostrá ‘suavedat i rèspèt profundo’ na hende ku no ta kompartí nos kreensianan