Mi Yu Stimá i Fiel den Señor”

TIMOTEO tabata kana duru ku pasonan grandi riba e kaminda bayendo for di su kas, di focus riba loke tabata sper’é. E tabata sigui su kompañeronan miéntras nan tabata krusa un teritorio ku tabata bon konosí p’e. Leu ayá tras di nan lomba, e stat di Listra, ku tabata keda riba un seritu meimei di un vaye, tabata disparsiendo pokopoko for di nan bista. Timoteo a smail ora el a pensa riba su orguyoso mama i wela, kendenan tabata wanta duru pa no yora segun ku nan tabata mir’é kana bai. E mester a yama ayó un biaha mas?

De bes en kuando, apòstel Pablo tabata bira wak Timoteo i smail kuné pa enkurash’é. E tabata sa ku Timoteo tabata un poko tímido ainda, pero e tabata kontentu di mira e entusiasmo di e yònkuman akí. Timoteo tabata basta yòn, kisas un 20 aña asina. E tabata stima Pablo i tabatin hopi rèspèt p’e. Awor e tabata sigui e hòmber fiel i yen di energia akí riba un biahe ku lo a hib’é sientos di kilometer leu for di kas. Nan lo a biaha na pia i riba barku i lo a haña nan ku hopi peliger na kaminda. Timoteo no tabata sa si un dia lo el a bolbe kas.

Kiko a pone e hóben akí tuma e desishon ei? Ta bale la pena hasi tantu sakrifisio asina? I kon nos por imitá e fe di Timoteo?

Laga nos bai bèk dos pa tres aña mas atras, promé ku el a bai ku Pablo. Probablemente Timoteo a lanta na Listra. Tabata trata akí di un stat chikí i simpel situá den un vaye aislá, fértil i yen di awa. Su habitantenan lo mester tabata komprondé griego pero nan tabata papia likaonia, nan idioma materno. Un dia, e pueblito trankil a bira aribabou, pasobra dos misionero kristian, esta, apòstel Pablo i su kompañero di biahe, Bárnabas, a bini di Ikonio, un stat mas grandi den serkania. Ora nan tabata prediká na lugánan públiko, Pablo a mira un hòmber lam ku tabatin un fe fuerte. Pues el a hasi un milager i a kura e hòmber.​—Echonan 14:​5-10.

Hopi di e habitantenan di Listra tabata kere den leyendanan di diosnan ku den pasado a tuma kurpa di hende pa bini den nan region. Pues nan a kere ku Pablo tabata Hermes i Bárnabas Zeus. E dos kristiannan humilde akí a pasa masha trabou pa stroba e habitantenan di hasi sakrifisio na nan.​—Echonan 14:​11-18.

Pero pa algun hende na Listra, e bishita akí no tabata un bishita di diosnan mitológiko pagano, sino di dos hòmber real ku a bini ku un mensahe maravioso. Por ehèmpel, Eunise, un señora hudiu kasá ku un hòmber griego,a i su mama, Loida, lo a skucha Pablo i Bárnabas ku hopi smak. Por fin e notisia ku tur hudiu fiel tabata ansioso pa tende a yega: E Mesías a bini i a kumpli ku hopi profesia skirbí tokante dje den e Skritura.

E bishita di Pablo lo mester a hasi un impakto riba Timoteo. E mama i wela di Timoteo a siñ’é “for di chikitu” pa stima e Skritura Hebreo. (2 Timoteo 3:15) Meskos ku su mama i wela, e por a mira ku Pablo i Bárnabas tabata papia e bèrdat ­tokante e Mesías. Kòrda riba e hòmber lam ku Pablo a kura. Kasi sigur for di chikí Timoteo lo a mira e hòmber hopi biaha riba e kayanan di Listra i awor Timoteo por a mir’é ta kana pa promé biaha. No ta nada straño anto ku Eunise, Loida i Timoteo a bira kristian. Awe wela- i mayornan por siña hopi for di Loida i Eunise. Abo tambe por ta un bon ehèmpel pa e hóbennan!

E hendenan na Listra ku a bira disipel kristian lo mester a keda hopi kontentu di sa awor ki speransa nan tabatin komo siguidó di Kristu. Pero nan a siña tambe ku ser un kristian lo no tabata fásil. Opositornan hudiu di Ikonio i Antiokia a bini den e stat di Listra i a instigá e hendenan pa lanta kontra Pablo i Bárnabas. No a tarda muchu ku e multitut violento a kuminsá tira Pablo ku piedra. Mal batí, el a kai na suela. Pensando ku el a muri, e multitut a lastr’é i sak’é pafó di e stat.​—Echonan 14:19.

Sinembargo, e disipelnan na Listra a bai pafó serka Pablo i a para rònt di dje. Ki un alivio nan lo a sinti ora nan a mir’é move, lanta i yen di kurashi a bolbe drenta e stat di Listra. E siguiente dia, e ku Bárnabas a sali bai e stat di Derbe pa sigui prediká. Despues ku nan a yuda basta hende bira disipel ei tambe, nan a tuma un kurashi i a bolbe bai Listra, maske tabata hopi peligroso. Ku ki meta? E relato ta konta nos: “Nan a fortalesé e disipelnan einan i a animá nan pa keda firme den fe.” Imaginá bo kon impreshoná e hóben Timoteo a keda ora el a skucha Pablo ku Bárnabas siña e kristiannan ei ku nan glorioso speransa pa futuro a bal tur nan sufrimentu. Nan a bisa e disipelnan akí: “Nos tin ku pasa hopi tribulashon pa drenta e Reino di Dios.”​—Echonan 14:​20-22.

Timoteo a mira kon Pablo mes a kumpli ku e palabranan ei ora e tabata pasa den pruebanan difísil pa e por a prediká e bon notisia na hende. Pues, Timoteo tabata sa ku si el a sigui e ehèmpel di Pablo, e habitantenan di Listra lo a lanta kontra e tambe i kisas asta su propio tata lo por a opon’é. Pero Timoteo tabata determiná pa no laga nada strob’é di sirbi Dios. Awe, tin hopi hóben manera Timoteo. Nan tambe ta sabí ya ku nan ta buska amigu ku tin un fe fuerte ku lo enkurashá i fortalesé nan. Ademas, nan no ta laga oposishon stroba nan di sirbi e Dios berdadero.

Manera nos a menshoná kaba, despues di dos pa tres aña Pablo a bolbe bai Listra. Imaginá kon emoshoná e famia di Timoteo lo tabata ora Pablo a yega, e biaha akí huntu ku Sílas. I sigur lo tabata un momento gososo pa Pablo tambe, pasobra e por a mira pa su mes kon e simia di e bèrdat ku el a sembra na Listra a sprùit. Entre nan tabatin Loida i su yu muhé, Eunise, dos kristian fiel, ku Pablo a atmirá mashá pa nan “fe sin hipokresia.” (2 Timoteo 1:5) I kiko di e hóben Timoteo?

Pablo a haña sa ku for di su último bishita Timoteo a madurá mashá. ‘E rumannan tabata papia bon di Timoteo,’ no solamente na Listra sino ­tambe na Ikonio, ku tabata keda 32 kilometer den direkshon nortost. (Echonan 16:2) Kon el a hasi haña e bon reputashon ei?

“E skrituranan santu” ku e wela i mama di Timoteo a siñ’é “for di chikitu” tin konsehonan útil pa hóbennan. (2 Timoteo 3:15) At’akí un ehèmpel: “Kòrda tambe riba bo Kreador den e dianan di bo hubentut.” (Eklesiástes 12:1) E palabranan ei a haña un nifikashon mas profundo pa Timoteo despues ku el a bira kristian. El a komprondé ku e mihó manera pa kòrda riba su Kreador tabata di prediká e bon notisia tokante e Yu di Dios, Hesukristu. Gradualmente Timoteo a vense kualke timides ku tabata strob’é i ku kurashi e tabata konta otronan di e bon notisia tokante Hesukristu.

E hòmbernan ku tabata dirigí e kongregashonnan a tuma nota di Timoteo su progreso. Sin duda, nan lo a keda enkantá pa mira kon e hóben akí a fortalesé i enkurashá tur hende rònt di dje. Pero mas importante ainda ta ku Yehova a tuma nota di Timoteo su progreso spiritual. I Dios a laga skirbi algun profesia tokante Timoteo, kisas relashoná ku e tipo di trabou ku un dia e lo a bai hasi den hopi kongregashon. Ora Pablo tabata di bishita, el a ripará ku Timoteo por tabata un bon kompañero di biahe durante su giranan komo misionero. I e rumannan na Listra tambe a pensa meskos. Pues, nan a pone man riba e hóben i asina a duna di konosé ku nan a nombr’é pa un asignashon spesial den e sirbishi di Yehova Dios.​—1 Timoteo 1:18; 4:14.

Nos por imaginá kon impreshoná Timoteo lo a keda ku e gran muestra di konfiansa i responsabilidat akí. E tabata kla pa bai.b Pero, kon e tata di Timoteo, ku no tabata un kristian, lo a reakshoná ora el a haña sa ku su yu lo mester a biaha bai otro kaminda pa kumpli ku su asignashon nobo? Probablemente e tabatin otro plan na mente pa futuro di su yu. I kiko di e mama i wela di Timoteo? Sin duda, nan lo tabata orguyoso di dje, pero kisas nan a purba pa no mustra ku nan tabata preokupá pa su siguridat. Esei ta normal.

Loke nos sa ta ku Timoteo a bai. Riba e mainta ku nos a deskribí na kuminsamentu dje artíkulo akí, el a bira kompañero di biahe di apòstel Pablo. Miéntras ku e tabata alehá mas i mas for di Listra, kada zonido di e piedranan i yerba bou di su sandalia a nifiká un stap mas den un mundu deskonosí i un stap mas leu for di su kas. Despues ku e tres hòmbernan a kana henter dia, nan a yega Ikonio. Einan, Timoteo a opservá kon Pablo i Sílas a duna e último instrukshonnan di e kuerpo gobernante ku tabata na Herúsalèm i a fortalesé fe di e kreyentenan na Ikonio. (Echonan 16:​4, 5) Pero esei tabata djis e komienso.

Despues di a bishitá e kongregashonnan na Galasia, e misioneronan a bai laga e kamindanan hanchu di piedra di Roma i a kana sientos di kilometer dor di e vayenan grandi di Frigia, bayendo den direkshon nort i despues wèst. Nan a sigui guia di Dios su spiritu santu i a bai Troas, subi un barku i bai Masedonia. (Echonan 16:​6-12) Pa e tempu ei, ya Pablo por a mira kon útil Timoteo su yudansa tabata. P’esei e por a laga Timoteo na Berea huntu ku Sílas. (Echonan 17:14) Pablo a asta manda e yònkuman akí su so na Tesalónika. Ei Timoteo a imitá e ehèmpelnan ku el a opservá i a fortalesé fe di e kristiannan einan.​—1 Tesalonisensenan 3:​1-3.

Mas despues, Pablo a skirbi lo siguiente tokante Timoteo: “Mi no tin ningun otro hende ku un disposishon manera esun di dje, ku di bèrdat lo sòru pa e kosnan ku tin di haber ku boso.” (Filipensenan 2:⁠20) No ta pa kasualidat el a haña e reputashon ei. Timoteo a haña e reputashon ei pasobra el a traha duru, el a hasi trabou humilde i a keda fiel bou di sirkunstansianan difísil. Ki un ekselente ehèmpel pa hóbennan awe! Nunka lubidá ku ta bo mes ta krea bo reputashon. Si bo ta yòn, bo tin un oportunidat úniko pa traha un bon nòmber pa bo mes ora bo pone Yehova na promé lugá den bo bida i ora bo trata otro hende ku bondat i rèspèt.

Durante un periodo di mas o ménos 14 aña, Timoteo a pasa gran parti di su tempu ta traha huntu ku su amigu, apòstel Pablo. Meskos kuné, Timoteo a eksperensiá hopi di e alegria i e difikultatnan ku e trabou a trese kuné. (2 Korintionan 11:​24-27) Na dado momento, Timoteo a asta ser enkarselá pa motibu di su fe. (Hebreonan 13:23) Meskos ku Pablo, e tambe tabatin un amor sinsero pa su rumannan kristian i un interes profundo den nan. P’esei Pablo a skirbié: “Mi [ta] kòrda riba bo lágrimanan.” (2 Timoteo 1:4) Meskos ku Pablo, ta parse ku Timoteo tambe a siña “yora ku esnan ku ta yora” poniendo su mes den nan lugá pa e por a animá i konsolá nan mihó. (Romanonan 12:15) Nos tur mester siña hasi meskos!

No ta nada straño ku, despues di tempu, Timoteo a bira un ekselente superintendente kristian. Pablo a konfi’é ku e responsabilidat pa bishitá e kongregashonnan pa fortalesé i animá nan i pa nombra hòmbernan ku tabata kualifiká pa sirbi komo ansiano di kongregashon i sirbidó ministerial.​—⁠1 Timoteo 5:22.

Pablo tabatin un kariño profundo pa Timoteo i a dun’é konseho i guia manera un tata. El a urgi e yònkuman akí pa sigui desaroyá su donnan spiritual i p’e sigui krese i progresá spiritualmente. (1 Timoteo 4:​15, 16) Ademas, el a animá Timoteo pa nunka laga su edat yòn òf kualke limitashon ku e por tabatin strob’é di hasi loke ta korekto. (1 Timoteo 1:3; 4:​6, 7, 11, 12) Pablo a asta dun’é konseho kon pa trata ku un problema di salú, kisas doló di stoma, ku tabata molesti’é kada biaha.​—1 Timoteo 5:23.

Ku tempu, Pablo a bin realisá ku su bida tabata yegando na un fin i ku tur kos tabata mustra ku pronto nan lo a ehekut’é. P’esei el a manda un último karta inspirá pa Timoteo. El a skirbi Timoteo e palabranan konmovedor akí: “Hasi tur bo esfuerso pa bini pronto serka mi.” (2 Timoteo 4:9) Pablo tabata stima Timoteo mashá i a yam’é “mi yu stimá i fiel den Señor.” (1 Korintionan 4:17) No ta nada straño anto ku Pablo tabata ke pa su amigu ta huntu kuné durante e último dianan di su bida. Pues, nos kada un ta hasi bon di puntra nos mes: ‘Hende sa bini serka mi pa haña konsuelo ora nan ta pasa den situashonnan difísil?’

Timoteo a yega serka Pablo na tempu? Nos no sa. Loke sí nos sa ta ku semper Timoteo a hasi su esfuerso pa duna Pablo i hopi otro hende konsuelo i animashon. El a kumpli ku e nifikashon di su nòmber, esta, “Un Ku Ta Onra Dios.” I el a laga un ekselente ehèmpel di fe pa nos tur, grandi i chikí, imitá.