Siñansa Util Pa Nos Tempu Critico [Translator: The Following Article Is Based On Talk No. 40 From The “Divine Teaching” District Convention.]
“Sabi esaki, cu den e último dianan lo presentá tempu crítico, duru pa trata cuné. . . . Hende malbado i gañadornan lo bai di malu pa pió, gañando i siendo gañá.”—2 TIMOTEO 3:1, 13.
BO TA ser yudá, of bo ta ser ofendé? Bo problemanan ta ser resolvé of nan ta bira pió? Dor di kico? Dor di siñansanan. Sí, siñansanan por afectá bo bida mashá pa mihó of pa pió.
2 Tres profesor asociá a investigá e materia aki recientemente i a presentá nan descubrimentunan den e Journal for the Scientific Study of Religion. Ta berdad cu kisas nan no a studia abo of bo famia. Sin embargo, loke nan a haña ta mustra cu tin un coneccion definitivo entre siñansa i un persona su éxito, of fracaso, den enfrentá nos tempu crítico. Den e siguiente artículo, nos lo tuma nota di loke nan a descubrí.
3 Pero, promé, considerá e pregunta aki: Bo ta di acuerdo cu nos ta bibando den tempu duru pa trata cuné? Si ta asina, anto lo bo siguramente mira cu e evidencia ta proba cu esakinan ta “tempu crítico, duru pa trata cuné.” (2 Timoteo 3:1-5) E manera cu hende ta ser afectá ta varia. Por ehempel, probablemente bo sa di paisnan cu awor aki mes ta ser dividí i desbaratá segun cu diferente faccion ta bringa pa dominacion político. Na otro caminda, e matamentu ta bini debí na diferencianan religioso of étnico. I no ta solamente soldadnan ta ser heridá. Pensa dje cantidad incontabel di hende muher i mucha muher cu a ser brutalisá of hende di edad avansá cu a ser privá di cuminda, calefaccion i dak riba nan cabes. Cantidad incontabel di hende ta sufriendo teriblemente, hibando na olanan aplastante di refugiado i hopi miseria relacioná cu esei.
4 Tambe nos tempu ta marcá pa problemanan económico, resultando den fábricanan cerá, desempleo, pérdida di beneficio social i penshun, devaluacion di balor monetario, mas tiki cuminda i ménos frecuente. Bo por agregá mas problema rib’e lista? Casi sigur. Otro miyones di hende rond mundu ta sufri di scarcedad di cuminda i malesa. Probablemente bo a mira fotonan horibel di Oost Africa mustrando homber, muher i muchanan flacu-flacu. Miyones di hende na Asia ta sufri di igual manera.
5 Nos tur a tende di malesanan spantoso cu ta aumentando awor. Dia 25 di januari, 1993, The New York Times a declará: “Floreciendo meimei di relacion sexual parotin, hipocresia i prevencion descuidá, epidemia di AIDS na Latinoamérica ta na caminda di surpasá esun di Merca . . . Hopi dje aumento ta bini dje creciente cantidad contagiá entre . . . hende muher.” Na october, 1992, U.S.News & World Report a bisa: “Tabata solamente dos década pasá cu e hefe di departamentu di salubridad di Merca, alabando un dje triunfonan di salubridad público mas grandi cu nunca, a anunciá cu tabata tempu pa ‘stop di preocupá tocante malesanan contagioso.’ ” Pero kico di awor? “Hospitalnan atrobe ta ser inundá cu víctimanan di plaganan cu supuestamente a ser derotá. . . . Microbionan ta desaroyando strategianan genético mas i mas sabí cu ta permitiendo nan desaroyá mas lihé cu e desaroyo di antibióticanan nobo. . . . ‘Nos ta drentando un era nobo di malesa contagioso.’ ”
6 Como un ehempel, Newsweek di 11 di januari, 1993, a informá: “Parasit di malaria awor ta infectá un cálculo di 270 miyon hende tur aña, matando te cu 2 miyon . . . i causando por lo ménos 100 miyon caso di enfermedad agudo. . . . Na mésun tempu, e malesa ta birando mas i mas resistente na remedinan cu un tempu tabata cur’é. . . . Algun tipo di dje pronto lo por ta incurabel.” Esei ta poné bo tembla.
7 Kisas bo por a nota cu den e tempu crítico aki duru pa trata cuné, hopi hende ta buscando yudansa pa solucioná nan problemanan. Considerá, por ehempel esnan cu ta acudiendo na bukinan tocante con pa enfrentá tension of algun malesa nobo. Otronan ta desesperá pa conseho tocante un matrimonio fracasando, tocante cuido di mucha, tocante problemanan di alcohol of droga, of tocante con pa balansá e exigencianan di nan trabou i e presionnan cu nan ta sinti na cas. Sí, nan realmente mester di yudansa! Abo ta luchando cu un problema personal of experenciando algun sorto di problema causá dor di guera, hamber of desaster? Asta si un problema urgente ta parce fuera di solucion, bo tin motibu pa puntra, ‘Pakico nos a alcansá un etapa asina crítico?’
8 Promé cu nos por enfrentá e problemanan eficasmente i haña satisfaccion den bida awor i den futuro, nos mester sa di con nos ta enfrentá tempu asina crítico. Francamente, esei ta duna motibu pa cada un di nos tuma e Bijbel na consideracion. Pakico nos ta señalá n’e Bijbel? Pasobra e so ta contené profecia exacto, historia skirbí adelantá, cu ta mustra e motibunan di nos problema, unda nos ta pará i unda nos ta bayendo.
Un Les For di Historia
9 E Toren di Vigilancia di 15 di februari, 1994, a duna un repaso notabel di Jesus su profecia bibu den Mateo capítulo 24. Si bo habri bo Bijbel n’e capítulo ei, bo por mira na versículo 3 cu Jesus su apostelnan a pidi pa un señal di su futuro presencia i e conclusion dje sistema di cosnan. Anto, di versículo 5 te 14, Jesus a profetisá di Cristonan falsu, gueranan, scarcedad di cuminda, persecucion di cristiannan, maldad i un predicacion extenso tocante e Reino di Dios.
10 Historia ta proba cu net e cosnan ei a sosodé durante e conclusion dje sistema di cosnan hudiu. Si bo a biba n’e tempu ei, esei lo no tabata tempu difícil? Sin embargo, cosnan tabata marchando den direccion di un culminacion, un tribulacion sin precedente riba Jerusalem i e sistema hudiu. Den versículo 15 nos ta cuminsá lesa di loke a desaroyá despues cu e romanonan a atacá Jerusalem na aña 66 E.C. E sucesonan ei a culminá den e tribulacion cu Jesus a mencioná na versículo 21—e destruccion di Jerusalem na aña 70 E.C., e peor tribulacion cu a yega di sosodé cu e stad ei. Tog, bo sa cu historia no a para ei nan, Jesus no a bisa tampoco cu esei lo sosodé. Den versículo 23 te 28, el a mustra cu despues dje tribulacion di aña 70 E.C., otro cosnan lo a sosodé.
11 Awe algun hende kisas ta incliná pa hala e asuntunan aki di pasado un banda cu un ‘anto kico?’ Esei lo ta un eror. E cumplimentu di profecia aya den e promé siglo ta vitalmente importante. Pakico? Wel, e gueranan, hamber, temblornan, plaganan i persecucion durante e conclusion dje sistema hudiu mester a ser reflehá den un cumplimentu mas grandi despues cu “e tempu señalá dje nacionnan” a terminá na aña 1914. (Lucas 21:24) Hopi hende na bida awor tabata testigo ocular dje Promé Guera Mundial ora e cumplimentu moderno aki a cuminsá. Pero asta si bo a nace despues di aña 1914, bo ta testigo dje cumplimentu dje profecia di Jesus. E sucesonan dje siglo 20 aki ta proba fuera di tur duda cu nos ta bibando den e conclusion dje sistema malbado actual.
12 Esaki ta nificá cu “e tribulacion” di Mateo 24:29 ta nos dilanti. Lo e enbolbé fenómenonan celestial cu kisas ta inimaginabel. Versículo 30 ta mustra cu hende e ora ei lo mira un señal diferente—un señal probando cu destruccion ta cerca. Segun e relato paralelo na Lucas 21:25-28, n’e tempu ei den futuro ‘hende lo desmayá di miedu i expectativa di cosnan biniendo riba e tera.’ E relato di Lucas ta bisa tambe cu cristiannan e ora ei lo hisa nan cabes na laira debí cu nan liberacion lo ta masha cerca.
13 Kisas bo ta bisa, ‘Mi ta aceptá esei i ta bai di acuerdo cuné, pero mi a kere cu e cuestion tabata con mi por comprondé i enfrentá nos tempu difícil?’ Bo tin rason. Nos promé punto ta pa identificá problemanan clave i mira con nos por evitá nan. Conectá cu esei ta punto number dos, di ki manera siñansa bíblico por yuda nos disfrutá di un mihó bida awor. En coneccion cu esaki, por fabor habri bo Bijbel na 2 Timoteo capítulo 3 i mira con e palabranan di apostel Pablo por yudá bo trata cu tempu difícil.
Un Profecia Tocante Nos Tempu
14 Dios a inspirá Pablo pa skirbi n’e cristian leal Timoteo hopi conseho excelente cu a yud’é hiba un bida mas exitoso i felis. Parti di loke Pablo a skirbi lo tabatin su aplicacion principal den nos dia. Asta si bo ta sinti cu bo conocé nan bon, sigui atentamente awor e palabranan profético na 2 Timoteo 3:1-5. Pablo a skirbi: “Sabi esaki, cu den e último dianan lo presentá tempu crítico, duru pa trata cuné. Pasobra hende lo ta stimador di nan mes, stimador di placa, presumido, arogante, blasfemadó, desobediente na mayornan, malagradicí, desleal, sin cariño natural, no dispuesto na ningun acuerdo, calumniador, sin dominio propio, feros, sin amor pa bondad, traicionero, cabesura, hinchá cu orguyo, stimador di placer mas bien cu stimador di Dios, teniendo un forma di debocion piadoso pero resultando falsu na su poder.”
15 Tuma nota, por fabor, cu tin mencion di 19 cos. Promé cu nos examiná esakinan i yega asina leu di saca beneficio, pausa un ratu pa capta e profecia den su totalidad. Wak versículo 1. Pablo a profetisá: “Den e último dianan lo presentá tempu crítico, duru pa trata cuné.” Cua “último dianan”? Tabatin hopi último dianan, manera e último dianan di Pompeii di antigua of e último dianan di un rey of un famia na mando. Asta Bijbel ta mencioná un cantidad di último dianan, tal como e último dianan dje sistema hudiu. (Echo 2:16, 17) Sin embargo, Jesus, a pone e base pa nos comprondé cu “e último dianan” cu Pablo a mencioná, ta referí na nos tempu.
16 Jesus a haci esei cu un comparacion tocante trigu i mal yerba. El a bisa cu e trigu i e mal yerba ta representá hende—cristiannan berdadero i esnan falsu. Nos ta mencioná e comparacion aki pasobra e ta establecé cu un periodo largu lo a pasa promé cu e conclusion di henter e sistema malbado. Ora e conclusion ei a yega, algu lo ta den pleno flor. Kico? Apostasia, of e alehamentu for di cristianismo berdadero, resultando den un cosecha grandi di maldad. Otro profecianan di Bijbel ta confirmá cu esaki lo a sosodé durante e último dianan dje sistema malbado. Ei ta caminda nos ta awe, den e conclusion dje sistema di cosnan.—Mateo 13:24-30, 36-43.
17 Bo ta mira e nificacion di esaki? Segundo Timoteo 3:1-5 ta duna nos un indicacion paralelo cu durante e conclusion dje sistema, of último dianan, e condicionnan rondonando cristiannan lo ta malu. Pablo no tabata bisando cu e 19 cosnan mencioná lo tabata e manera principal pa proba cu e último dianan a yega. Mas bien, e tabata spierta tocante loke nos lo mester lucha contra dje durante e último dianan. Versículo 1 ta papia di “tempu crítico, duru pa trata cuné.” E expresion ei ta bini di griego i ta nificá literalmente “tempu señalá feros.” (Kingdom Interlinear) Bo no ta di acuerdo cu e palabra “feros” aptamente ta describí loke nos ta enfrentando awe? E mensahe inspirá aki ta pasa na duna perspicacia divino den nos tempu.
18 Nos interes den e profecia aki mester permití nos identificá ehempelnan trágico di con crítico, of feros, nos periodo ta. Corda riba nos dos puntonan clave: (1) identificá problemanan cu ta haci nos tempu difícil i mira con pa evitá nan; (2) sigui siñansanan cu ta berdaderamente práctico i cu por yuda nos disfrutá di un mihó bida. Pues, en bes di enfatisá cosnan negativo, nos lo enfocá riba siñansanan cu por yuda nos i nos famia den e tempu duru pa trata cuné aki.
Cosechá Beneficionan Ricu
19 Pablo ta cuminsá su lista pronosticando cu den e último dianan, “hende lo ta stimador di nan mes.” (2 Timoteo 3:2) Kico e tabata kier men? Lo bo tin rason si bo bisa cu atrabes di historia tabatin hende homber i muher arogante, sirbiendo nan mes. Sin embargo, no cabe duda cu e defecto aki ta extraordinariamente comun awe. E ta extremo cerca hopi hende. E ta casi e norma den e mundu político i comercial. Homber i muhernan ta sigui tras di poder i fama cueste loke cueste. Generalmente esei ta cueste loke cueste pa otronan, pasobra e stimadornan aki di nan mes no tin cunes con nan ta perhudicá otro hende. Nan ta lihé pa demandá of estafá otronan. Bo por comprendé pakico hopi hende ta yama esaki e “generacion di ami promé.” Personanan yen di beis i arogante i hende egocéntrico ta abundá.
20 Nos no tin nodi ser recordá di experencianan amargo cu nos tabatin den tratamentu cu hende cu ta “stimador di nan mes.” No obstante, ta berdad cu dor di identificá e problema aki francamente, Bijbel ta yudando nos, pasobra e ta siña nos con pa evitá e trampa aki. Esaki ta loke e ta bisa: “No haci nada debí na ambicion egoista of debí na un deseo barata di broma, sino sea humilde un pa cu otro, semper considerando otronan mas mihó cu bo mes. I vigilá pa interes di un pa cu otro, no djis pa esnan di bo mes.” “No pensa mas haltu di bo mes di loke ta necesario pa pensa. En bes di esei, sea modesto den bo pensamentu.” E conseho excelente ei ta ser hañá na Filipense 2:3, 4 i Romano 12:3, manera Today’s English Version a traduci’é.
21 Kisas un persona por protestá, ‘Esei ta zona bon, pero e no ta práctico.’ O sí, e ta práctico. E por i tá duna bon resultado cu hende normal awe. Na 1990 e publicador pa Universidad di Oxford a imprimí The Social Dimensions of Sectarianism. Capítulo 8 tabata titulá “Testigonan di Jehova den un Pais Católico,” i a describí un proyecto di investigacion na Bélgica. Nos ta lesa: “Papiando dje atraccion positivo di bira un Testigo, aparte dje atraccion di ‘e Berdad’ riba su mes, personanan cu a contestá tin biaha atrobe a mencioná mas cu un característica. . . . Cordialidad, amabilidad, amor i unidad tabata e cualidadnan mas tantu mencioná, pero onrades i comportacion personal den ‘demostrá cu accion principionan bíblico’ tambe tabata cualidadnan cu Testigonan a balorá.”
22 Kisas nos por compará e descripcion ariba cu un potret sacá cu un lens di ángulo hanchu; si en bes di esei bo a usa lens di ‘zoom’ of telefoto, lo bo por a mira ‘close-ups’, hopi experencia di bida-real. Esakinan lo a incluí hombernan cu tabata arogante, dominante of obviamente egoista pero cu awor ta mas suave, birando esposo i tatanan cu ta mustra mas tierno cariño i bondad na nan casá, yunan i otro hende. Tambe esei lo a incluí muhernan cu tabata dominante of antipático i cu awor ta yuda otronan pa siña e caminda di cristianismo berdadero. Tin cientos di miles di tal ehempelnan. Awor, por fabor ser franco. Lo bo no haña ta mas mihó pa ta rond di hende cu ta asina en bes di semper ser confrontá cu homber i muhernan cu ta stima nan mes promé i principalmente? Esei lo no haci’é mas fácil pa enfrentá nos tempu crítico? Pues siguiendo tal siñansa di Bijbel lo no hací bo mas felis?
23 Sin embargo, nos a considerá solamente e promé cos den Pablo su lista registrá na 2 Timoteo 3:2-5. Kico dje otronan? Bo examinacion cuidadoso di nan tambe lo yuda bo identificá problemanan clave di nos tempu afin di evitá nan i permití bo comprendé cua curso lo trece pa bo i pa bo sernan kerí mayor felicidad? E siguiente artículo lo yudá bo contestá e preguntanan ei i gana un bendicion ricu.
[Study Questions]
1, 2. Pakico nos mester ta interesá den cua siñansa nos ta sigui?
3, 4. Cua ta algun evidencia cu nos ta biba den tempu crítico?
5, 6. Pakico por ser bisá cu malesa tambe ta un aspecto abrumador di nos tempu crítico?
7. Con hopi hende awe ta reaccionando n’e tempu difícil?
8. Pakico nos mester acudí n’e Bijbel pa perspicacia i guia?
9, 10. Con Jesus su profecia na Mateo capítulo 24 a ser cumplí den e promé siglo?
11. Den ki manera e cumplimentu den promé siglo di Mateo capítulo 24 ta relacioná cu nos dia?
12. Segun Jesus, kico nos por spera pa mira ainda?
13. Cua dos puntonan clave ta merecé nos atencion?
14. Pakico tin motibu pa kere cu un consideracion di 2 Timoteo 3:1-5 por beneficiá nos?
15. Pakico 2 Timoteo 3:1 mester ta di interes special pa nos awor?
16. Cua situacion e comparacion dje trigu i e mal yerba a pronosticá pa nos tempu?
17. Cua informacion paralelo 2 Timoteo 3:1-5 ta proveé tocante e conclusion dje sistema di cosnan?
18. Kico nos mester enfocá ariba segun cu nos ta studia Pablo su palabranan profético?
19. Ki evidencia bo a mira cu hende ta stimador di nan mes?
20. Con conseho bíblico ta na contraste cu e actitud prevalente di stima bo mes?
21, 22. (a) Ki evidencia amplio tin cu tal conseho por resultá di ta útil awe? (b) Ki efecto Dios su conseho tabatin riba personanan comun?
23. Pakico lo ta bale la pena pa duna mas consideracion na 2 Timoteo 3:2-5?
[Caption on page 8]
Potret links ariba: Andy Hernandez/Sipa Press; potret reks abou: Jose Nicolas/Sipa Press
[Caption on page 12]
Puntonan pa Corda
◻ Cua ta algun evidencia cu nos ta biba den tempu crítico?
◻ Pakico nos por ta sigur cu nos ta biba den e último dianan?
◻ Cua dos puntonan clave nos por saca for di un studio di 2 Timoteo 3:1-5?
◻ Durante e tempu aki ora asina tantu hende ta stimadornan di nan mes, con siñansa bíblico a yuda e pueblo di Jehova?
[DO NOT SET] References
1. Journal for the Scientific Study of Religion, edited by Armand L. Mauss, June 1991, (The Society for the Scientific Study of Religion, West Lafayette, IN), Vol. 30, No. 2, pp. 173-80.
2. The New York Times, (newspaper; NY), January 25, 1993, p. A1.
3. U.S.News & World Report, (magazine; Washington, D.C), October 26, 1992, p. 70.
4. Newsweek, (magazine; NY), January 11, 1993, p. 56.
4a.The Kingdom Interlinear Translation of the Greek Scriptures, Watch Tower Bible and Tract Society of Pennsylvania, 1969, (Watchtower Bible and Tract Society of New York, Inc., Brooklyn, NY), 2 Timothy 3:1, p. 932.
5. Good News Bible—The Bible in Today’s English Version, 1976, (American Bible Society, NY), pp. 266, 215.
6. The Social Dimensions of Sectarianism—Sects and New Religious Movements in Contemporary Society, by Bryan R. Wilson, 1990, (Oxford University Press, NY), Chap. 8, p. 166.