Cana Manera Dios Ta Instrui [Translator: The Following Article Is Based On Talk No. 40 From The “Divine Teaching” District Convention.]
“Laga nos subi n’e ceru di Jehova . . . , i lo e instruí nos tocante su camindanan, i nos lo cana den su bereanan.”—MIQUEAS 4:2.
DIOS su profeta Miqueas a pronosticá cu den “e parti final dje dianan,” nos tempu, hopi hende lo busca Dios activamente, pa ador’é. Esakinan lo animá un e otro, bisando: “Laga nos subi n’e ceru di Jehova . . . , i lo e instruí nos tocante su camindanan, i nos lo cana den su bereanan.”—Miqueas 4:1, 2.
2 Nos studiamentu di 2 Timoteo 3:1-5 por yuda nos mira e resultadonan di ser instruí pa Dios den “e último dianan.” Den e artículo anterior, nos a cuminsá notando e beneficionan cu ta bini na esnan cu ta tuma na pechu e spiertamentu di Pablo pa no ser “stimador di nan mes.” Pablo a agregá cu den nos tempu hende lo ta tambe “stimador di placa.”
3 Ningun persona mester di un diploma di universidad den historia moderno pa comprendé con bon e palabranan ei ta describí nos tempu. Bo no a lesa di expertonan financiero i directornan di negoshi cu no ta satisfecho cu salarionan di varios miyon tur aña? E stimadornan di placa aki ta sigui deseá mas placa, asta via medionan ilegal. Pablo su palabranan tambe ta pas cu hopi hende kendenan, aunke no ta ricu, tog ta mésun cudicioso, nunca satisfecho. Kisas bo conocé hopi hende asina den bo becindario.
4 Loke Pablo a mencioná ta djis un aspecto inevitabel di naturalesa humano? No segun e Autor di Bijbel, kende hopi tempu pasá a declará e berdad aki: “Amor pa placa ta rais di tur sorto di cos perhudicial i tratando di realisá e amor aki algun a ser desviá for dje fe i a hinca nan mes tur caminda cu hopi dolor.” Tuma nota cu Dios no a bisa, ‘Placa ta rais di tur cos perhudicial.’ El a bisa cu ta “amor pa placa.”—1 Timoteo 6:10.
5 Interesantemente, e contexto di Pablo su palabranan ta reconocé cu algun cristian excelente den e promé siglo tabata ricu den e sistema actual di cosnan, sea cu nan a heredá rikesa of a gan’é mediante trabou onrado. (1 Timoteo 6:17) Mester ta evidente anto, cu cualkier sea nos posicion financiero, Bijbel ta spierta nos dje peliger di bira un stimador di placa. Bijbel ta ofrecé mas instruccion tocante evitá e defecto penoso i comun aki? Realmente cu sí, manera den Jesus su Sermon di Ceru. Su sabiduria ta mundialmente famoso. Nota, por ehempel, loke Jesus a bisa na Mateo 6:26-33.
6 Manera ta registrá na Lucas 12:15-21, Jesus a papia di un homber ricu cu a sigui purba acumulá mas rikesa pero cu di ripiente a perde su bida. Kico tabata Jesus su punto? El a bisa: “Vigilá contra tur sorto di cudishi, pasobra asta ora un persona tin un abundancia su bida no ta resultá dje cosnan cu e ta poseé.” Huntu cu tal conseho, Bijbel ta condená flohera i ta enfatisá e balor di trabou onrado. (1 Tesalonicense 4:11, 12) Bon, algun hende kisas por protestá cu e siñansanan aki no ta pas pa nos tempu—pero nan ta pas i nan ta dunando resultado.
Instruí i Beneficiá
7 Den un nacion tras di otro, bo por haña ehempelnan di bida-real di homber i muher for di tur nivel social i económico kendenan a aplicá principionan divino tocante placa. Nan a beneficiá nan mes i nan famianan, manera asta hende djafó por mira. Por ehempel, den e buki Religious Movements in Contemporary America, dje publicador pa Universidad di Princeton, un antropólogo a skirbi: “Den publicacionnan [di Testigo] i den discursonan di congregacion nan ta ser recordá cu nan no ta dependé di auto nobo, paña caru of biba na moda extravagante pa nan posicion. Na mésun tempu un Testigo mester duna un dia hustu di trabou na su doño di trabou [i mester] ta estrictamente onrado . . . Tal característicanan ta haci asta un homber sin hopi abilidad un empleado útil, i algun Testigo di Nort Filadelfia [Merca] a avansá na posicionnan di considerabel responsabilidad di trabou.” Claramente, hende cu a aceptá instruccion for di Dios mediante su Palabra a ser spiertá contra actitudnan cu ta haci mas difícil pa trata cu condicionnan actual. Nan experencia ta proba cu instruccion di Bijbel ta hiba na un bida mas mihó i mas felis.
8 Nos por conectá cu otro e siguiente tres cosnan cu Pablo ta mencioná. Den e último dianan, hende lo ta “presumido, arogante, blasfemadó.” E tres característicanan aki no ta idéntico, pero tur ta relacioná cu orguyo. E promé ta “presumido.” Un diccionario ta bisa cu e palabra griego básico aki ta nificá: “ ‘Un persona cu ta haci mas di su mes cu realidad ta hustificá’ of ‘ta primintí mas cu loke e por haci.’ ” Bo por comprondé pakico algun Bijbel ta usa e palabra “bromadó.” Despues ta bini “arogante,” of literalmente “parciendo-superior.” Ultimo, “blasfemadó.” Algun hende kisas por pensa di blasfemadó como esnan cu ta papia irespetuosamente di Dios, pero e palabra básico ta incluí papiamentu perhudicial, difamatorio of papiamentu ofensivo contra hende. Pues Pablo ta referí na blasfemia dirigí contra tantu Dios como hende.
9 Con bo ta sintí bo ora bo ta rond di hende cu ta cuadra cu Pablo su descripcion, sea cu ta coleganan di trabou, compañénan di scol of famia? Esei ta haci bo bida mas fácil? Of tal hende ta complicá bo bida, haciend’e mas difícil pa bo trata cu nos tempu? Sin embargo, e Palabra di Dios ta siña nos pa evitá e actitudnan aki, ofreciendo instruccion manera nos por haña na 1 Corintio 4:7; Colosense 3:12, 13; i Efesio 4:29.
10 Aunke cristiannan ta imperfecto, aplicando e instruccion excelente aki ta yuda nan mashá den e tempu crítico aki. E revista italiano La Civiltà Cattolica a bisa cu un motibu pakico Testigonan di Jehova ta sigui crece “ta cu e movimentu ta duna su miembronan un identidad concreto i fuerte.” Ma cu ‘identidad fuerte’ e escritor tabata kier men “presumido, arogante, blasfemadó”? Al contrario, e revista jesuita ta skirbi cu e movimentu “ta duna su miembronan un identidad concreto i fuerte i ta un lugá caminda nan ta ser yamá bon biní cu cordialidad i un sentido di hermandad i solidaridad.” No ta bisto cu e cosnan cu e Testigonan a ser siñá ta yudando nan?
Instruccion Ta Beneficiá Miembronan di Famia
11 Nos por agrupá e siguiente cuater cosnan, cuanan ta un tiki relacioná cu otro. Pablo a profetisá cu durante e último dianan, hopi hende lo ta “desobediente na mayornan, malagradicí, desleal, sin cariño natural.” Bo sa cu dos dje defectonan aki—siendo malagradicí i siendo desleal—ta tur rond di nos. Tog nos por mira fácilmente pakico Pablo a pone nan entre ser “desobediente na mayornan” i “sin cariño natural.” E cuater cosnan ei ta masha ligá cu otro.
12 Realmente cualkier persona observador, hóben of bieu, lo tin cu admití cu desobedencia na mayornan ta plamá i cu e ta birando pió. Hopi mayor ta keha cu hóbennan ta parce malagradicí pa tur loke ta ser hací pa nan. Hopi hóben ta protestá cu nan mayornan no ta realmente leal na nan (of n’e famia en general) sino ta absorbá den nan trabou, placernan of cu nan mes. En bes di trata na determiná ken ta robes, mira e resultadonan. Alehamentu entre adulto i hóbennan hopi bes ta pone cu tienernan ta forma nan mes norma di moralidad, of inmoralidad. Kico ta e consecuencia? Un cantidad creciente di salimentu na estado, aborto i malesanan transmití sexualmente entre tienernan. Masha hopi bes, falta di cariño natural na cas ta hiba na violencia. Probablemente bo por relatá ehempelnan for di bo becindario como prueba cu cariño natural ta desparciendo.
13 Esaki kisas por splica pakico mas i mas hende ta bayendo contra esnan cu na un tempu a parce di ta parti di nan famia extenso, dje mésun grupo social, tribu of grupo. Sin embargo, corda cu nos no ta treciendo e cosnan aki pa enfatisá e aspectonan negativo di bida awe. Nos dos interesnan clave ta: Siñansanan di Bijbel por yuda nos evitá sufrimentu resultando dje faltanan cu Pablo a mencioná, i nos lo saca beneficio dor di aplicá siñansanan di Bijbel den nos bida? E contestanan por ta sí, manera ta evidente for dje cuater puntonan ei den Pablo su lista.
14 Un declaracion general ta bon hustificá: Ningun siñansa ta surpasá esun di Bijbel produciendo bida di famia cu ta laga bo curason sinti bon i cu tin bon éxito. Esei por ser confirmá dor di un simpel muestra di su conseho cu por yuda miembronan di famia pa no solamente evitá trampanan sino pa tin éxito. Colosense 3:18-21 ta ilustrá esei bon, aunke tin hopi otro pasashinan bunita i práctico dirigí na esposonan, esposanan i yunan. E instruccion aki ta duna resultado den nos tempu. Ta cierto cu asta den famia di cristiannan berdadero, tin complicacionnan i desafionan. Sin embargo, e resultadonan general ta proba cu Bijbel ta percurando siñansa masha útil pa famianan.
15 Pa un aña i mei, un investigador dje Universidad di Lethbridge, Cánada, a studia bida social na Zambia. El a concluí: “Testigonan di Jehova ta experenciá mas tantu éxito cu miembronan di otro denominacionnan den mantené unionnan matrimonial stabil. . . . Nan éxito ta representá un relacion di intercambio modificá entre esposo i esposa, kendenan, den nan esfuersonan di cooperacion, recientemente descubrí, no-menasante, a bira responsabel den nan tratamentu cu otro na un cabesante nobo, [esta] Dios. . . . E esposo Testigo di Jehova ta ser siñá pa madurá den carga responsabilidad p’e bienestar di su esposa i yunan. . . . Esposo i esposa ta ser animá pa ta individuonan cu integridad . . . E exigencia predominante aki pa integridad ta consolidá matrimonio.”
16 E studio ei tabata basá riba numeroso experencianan real. Por ehempel, e investigador aki a bisa cu contrali n’e norma, “bo ta haña hombernan Testigo di Jehova mas frecuentemente den hardin yudando nan esposanan, no solamente durante e fase di preparacion, sino tambe cu plantamentu i cobamentu.” Pues ta bisto cu un cantidad incontabel di experencia rond mundu ta mustra cu instruccion di Bijbel ta afectá bida di hende.
17 E artículo anterior a mencioná descubrimentunan den e Journal for the Scientific Study of Religion. Na 1991 e tabatin un artículo titulá “Herencia Religioso i Sex Promé cu Matrimonio: Evidencia For di un Muestra Nacional di Adultonan Hóben.” Probablemente bo ta conciente di con prevalente sex promé cu matrimonio ta. Na un edad yong hopi mucha ta entregá na pasion, i hopi tiener tin varios partner di sex. Siñansanan di Bijbel por cambia e patronchi comun aki?
18 Tres profesor asociá cu a studia e materia a spera di haña ‘cu adolesentenan i adultonan hóben criá den e tradicion cristian mas conservativo lo ta ménos probabel di tin sex promé cu matrimonio.’ Pero kico e echonan a mustra? Generalmente, entre 70 pa 82 porciento di nan a participá den sex promé cu matrimonio. Pa algun di nan “un herencia fundamentalista [a reducí] e probabilidad di sex promé cu matrimonio, pero no den e caso di ‘sex promé cu matrimonio entre tienernan.’ ” E investigadornan a comentá riba algun hóben for di famianan aparentemente religioso kendenan “a exhibí un probabilidad significativamente mas haltu di sex promé cu matrimonio na comparacion cu protestantnan establecí.”—Letternan cursivo ta di nos.
19 E profesornan a haña net lo contrario entre hóbennan di Testigonan di Jehova, kendenan tabata entre “e grupo mas distinto for di otronan.” Pakico? “E nivel di compromiso i integracion social causá pa experencianan, expectativanan i participacion den actividadnan religioso . . . generalmente por crea nivelnan mas haltu di pegamentu na principionan di fe.” Nan a agregá: “Ta ser sperá di Testigonan pa nan cumpli cu responsabilidadnan di evangelisá como adolesente i hóbennan adulto.”
20 Pues instruccion di Bijbel a afectá Testigonan di Jehova pa bon dor di yuda nan evitá inmoralidad. Esei ta nificá proteccion for di malesanan transmití sexualmente, di cua algun ta incurabel i otronan fatal. E ta nificá ningun presion pa cu aborto, locual Bijbel ta siña ta ekivalente na kita bida. E ta nificá tambe hóbennan adulto cu por drenta matrimonio cu un concenshi limpi. Esei ta nificá matrimonionan edificá riba un fundeshi mas sólido. Ta siñansanan asina por yuda nos enfrentá bida, pa ta mas salú i mas felis.
Instruccion Positivo
21 Awor bai bek na 2 Timoteo 3:3, 4, i nota kico mas Pablo a bisa lo haci nos tempu duru pa trata cuné pa hopi hende—pero no pa tur: “[Hende lo ta] no dispuesto na ningun acuerdo, calumniador, sin dominio propio, feros, sin amor pa bondad, traicionero, cabesura, hinchá cu orguyo, [i] stimador di placer mas bien cu stimador di Dios.” Ki un descripcion exacto! Sin embargo, instruccion for di Bijbel por protegá nos i ekipá nos pa enfrentá, pa tin éxito.
22 Apostel Pablo ta terminá su lista cu un nota positivo. E ta combertí e último punto den un mandamentu piadoso cu tambe por trece beneficio sin límite pa nos. Pablo ta mencioná esnan “teniendo un forma di debocion piadoso pero resultando falsu na su poder; i di esakinan apartá bo.” Corda cu hóbennan den algun iglesia realmente tin un averahe mas haltu di sex promé cu matrimonio cu e promedio di otronan. Wel, asta si e inmoralidad di e baidónan-di-misa ei tabata solamente na nivel dje promedio, esei lo no ta prueba di cu nan forma di adoracion ta sin poder? Ademas, siñansanan religioso ta cambia e manera cu hende ta actua den negoshi, con nan ta trata cu hende bou di nan, of con nan ta trata famia?
23 Pablo su palabranan ta mustra cu nos mester pone na práctica loke nos ta siña for di Dios su Palabra, teniendo un moda di adoracion cu ta manifestá e berdadero poder di cristianismo. En cuanto esnan kende nan forma di adoracion ta sin poder, Pablo ta bisa nos: “Di esakinan apartá bo.” Esei ta un mandamentu cla, un cu lo trece beneficionan definitivo pa nos.
24 Den ki manera? Wel, e último buki di Bijbel ta describí un muher simbólico, un muher di mal bida, yamá Babilonia e Grandi. Evidencia ta mustra cu Babilonia e Grandi ta representá e imperio mundial di religion falsu, cu Jehova a examiná i a rechasá. Ma nos no tin nodi di ta incluí. Revelacion 18:4 ta spierta nos: “Sali fo’i dje, mi pueblo, si boso no kier participá cuné den su picánan, i si boso no kier ricibí parti di su plaganan.” Esei no ta e mésun mensahe cu Pablo a transmití, “di esakinan apartá bo”? Cumpliendo cu esei ta un otro manera den cua nos por beneficiá for di instruccion di Dios.
25 Pronto Dios lo intervení directamente den asuntunan humano. Lo e eliminá tur religion falsu i e sobrá dje mal sistema actual. Esei lo ta un causa di alegria, manera Revelacion 19:1, 2 ta indicá. Riba tera esnan cu ta aceptá i ta sigui Dios su instruccion lo ser permití pa sigui su siñansanan ora e obstáculonan dje tempu crítico aki a pasa.—Revelacion 21:3, 4.
26 Bibando den e Paradijs terenal restorá ei siguramente lo ta un goso fuera di nos imaginacion. Dios ta primintí cu e ta posibel pa nos i nos por confi’é absolutamente. Pues e ta duna nos motibu abundante pa aceptá i sigui su siñansa útil. Na ki tempu? Laga nos sigui su instruccionnan awor den nos tempu crítico i te den e Paradijs cu e ta primintí.—Miqueas 4:3, 4.
[Study Questions]
1. Segun Miqueas, kico Dios lo haci pa su pueblo den e último dianan?
2, 3. Con e pronóstico di Pablo cu hende lo ta stimador di placa ta cumpliendo awe?
4-6. Con Bijbel ta yuda hende cristian evitá di bira stimador di placa?
7. Ki motibu nos tin pa confia cu nos por aplicá exitosamente e conseho di Bijbel tocante rikesa?
8. Pakico “presumido,” “arogante” i “blasfemadó” por ser conectá cu otro, i kico ta e nificacion dje tres palabranan aki?
9. Na contraste cu actitudnan perhudicial prevalente, cua actitudnan Bijbel ta animá hende pa desaroyá?
10. Kico ta indicá cu Jehova su pueblo ta saca beneficio dor di aceptá instruccion bíblico?
11, 12. Con Pablo a indicá cu exactitud con e situacion den hopi famia lo ta?
13, 14. (a) Mirando e deterioro di hopi famia, pakico nos mester duna atencion na Bijbel? (b) Ki sorto di conseho sabí Dios ta ofrecé tocante bida di famia?
15, 16. Cua situacion un investigador a haña ora el a studia Testigonan di Jehova na Zambia?
17, 18. Ki resultadonan sorprendente a bini padilanti den un investigacion tocante herencia religioso i sex promé cu matrimonio?
19, 20. Con instruccion di Dios a yuda i protegá hopi hóben entre Testigonan di Jehova?
21. Cua cosnan Pablo a profetisá cu exactitud pa nos tempu?
22, 23. Pablo a concluí su lista cu cua spiertamentu positivo, i ki importancia e tin?
24. Con e spiertamentu den Revelacion capítulo 18 ta core paralelo cu Pablo su conseho?
25, 26. Ki futuro tin pa esnan cu awor ta aceptá i ta aplicá instruccion for di Jehova Dios?
[Box on page 15]
KI UN PRIJS CARU!
“Tienernan ta enfrentá un rísico enorme di haña AIDS pasobra nan ta gusta experimentá cu sex i droga, tuma rísico i biba pa e momentu, i pasobra nan ta sinti nan inmortal i ta desafiá autoridad,” un informe presentá na un conferencia riba AIDS i tiener ta bisa.—Daily News di New York, djadumingu, 7 di mart, 1993.[18]
“Mucha muhernan tiener sexualmente activo ta surgiendo como e siguiente ‘promé fila’ dje epidemia di AIDS, segun un investigacion di Nacionnan Uní na Europa, Africa i Zuidoost Asia a saca na cla.”—The New York Times, djabierne, 30 di juli, 1993.
[Caption on page 17]
Instruccion di Bijbel ta beneficiá Testigonan di Jehova den e congregacion i na cas
[Caption on page 18]
Puntonan pa Refleccioná Ariba
◻ Con e pueblo di Jehova ta beneficiá for di su conseho tocante rikesa?
◻ Un revista jesuita a duna testimonio di ki bon resultadonan pa sirbidornan di Dios dor di nan aplicacion di su Palabra?
◻ Segun un investigacion na Zambia a revelá, ki beneficionan famianan cu ta aplicá instruccion divino a saca?
◻ Ki proteccion instruccion divino ta percurá na hende hóben?