Presta Atencion Constante na Bo Siñamentu

“Presta atencion constante na bo mes i na bo siñamentu. Persistí den e cosnan aki, pasobra haciendo esaki lo bo salba tantu bo mes como esnan cu ta scucha bo.”—1 TIMOTEO 4:16.

 1, 2. Di con tin un necesidad urgente di maestronan celoso awe?

“BAI . . . i haci disipel di hende di tur nacion, . . . siñando nan pa warda tur loke mi a manda boso.” (Mateo 28:19, 20) A base di e mandamentu aki di Jesucristo, tur cristian mester haci esfuerso pa bira maestro. Tin mester di maestronan celoso pa yuda hende di curason sincero yega na conocé Dios promé cu ta lat. (Romanonan 13:11) Apostel Pablo a urgi: “Predicá e palabra, ocupá bo den dje urgentemente den tempu faborabel, den tempu difícil.” (2 Timoteo 4:2) Esaki ta exigí pa siña hende tantu paden como pafó dje congregacion. De echo, e comision di predicá mes ta encerá mas cu djis anunciá Dios su mensahe. Nos mester siña hende interesá cu eficacia pa nan bira disípel.

² Nos ta biba den “tempu crítico, duru pa trata cuné.” (2 Timoteo 3:1) Filosofianan mundano i siñansanan falsu a ‘brainwash’ hende. Hopi di nan ta “den scuridad mentalmente” i “mas ayá di tur sentido moral.” (Efesionan 4:18, 19) Algun tin heridanan emocional doloroso. Sí, en berdad hende ta “soyá i plamá manera carné sin wardadó.” (Mateo 9:36) Sin embargo, dor di usa e arte di siña, nos por yuda hende di curason sincero haci e cambionan necesario.

Maestronan den Congregacion

 3. (a) Kico Jesus su comision pa siña ta incluí? (b) Kendenan tin e responsabilidad primario pa siña den congregacion?

³ Tin miyones di hende ta ricibí instruccion personal pa medio dje areglo di studio di Bijbel na cas. Pero, despues di nan bautismo, e nobonan tin mester di yudansa adicional pa nan “saca rais i [bira] establecí riba e fundeshi.” (Efesionan 3:17) P’esei, ora cu nos cumpli cu Jesus su comision registrá na Mateo 28:19, 20 anto dirigí interesadonan nobo na Jehova su organisacion, nan ta beneficiá dje siñamentu den e congregacion mes tambe. Na armonia cu Efesionan 4:11-13, a nombra cierto hombernan pa sirbi “como wardadó i maestro, cu un bista riba e reahuste dje santunan, pa trabou ministerial, p’e edificacion dje curpa di e Cristo.” Na algun ocasion nan arte di siña ta enbolbé cu mester “reprendé, corigí, consehá, cu tur gran pacenshi.” (2 Timoteo 4:2) Trabou dje maestronan tabata asina importante cu, ora el a skirbi e corintionan, Pablo a mencioná maestronan net despues di apostel i profetanan.—1 Corintionan 12:28.

 4. Con e abilidad di siña ta yuda nos obedecé Pablo su animacion registrá na Hebreonan 10:24, 25?

⁴ Echo ta cu no ta tur cristian ta sirbi como anciano, of superintendente. Tog, ta nan tur ta ser animá pa incitá otro “na amor i na obranan excelente.” (Hebreonan 10:24, 25) Na reunionnan esaki ta encerá dunamentu di comentarionan sincero i bon prepará cu por edificá i curashá otronan. Publicadónan di Reino cu experencia tambe por ‘incitá na obranan excelente’ dor di compartí nan conocimentu i experencia cu e nobonan ora nan traha huntu den e ministerio di veld. Por impartí instruccion balioso tantu na momentonan asina como na ocasionnan informal. Por ehempel, Bijbel ta urgi hende muher maduro pa nan ta “maestranan di loke ta bon.”—Tito 2:3.

Persuadí pa Kere

 5, 6. (a) Cua contraste tin entre cristianismo berdadero i religion falsu? (b) Con ancianonan ta yuda e nobonan tuma decisionnan sabí?

⁵ Asina, cristianismo berdadero ta para na contraste skerpi cu religion falsu. Mayoria ta pidi nan miembronan pa nan obedecé sin pensa. Tempu Jesus tabata riba tera, e lidernan religioso tabata purba controlá prácticamente tur aspecto di hende su bida cu tradicionnan opresivo cu hende a traha. (Lucas 11:46) Hopi bes e clero di cristiandad a actua mescos.

⁶ Sin embargo, adoracion berdadero ta “sirbishi sagrado” cu nos ta ofrecé cu nos “facultad di razoná.” (Romanonan 12:1) Jehova su sirbidónan ta ser “persuadí pa kere.” (2 Timoteo 3:14) Tin bes kisas esnan cu ta hiba delantera mester introducí algun guia i procedura pa cos por cana bon den e congregacion. Pero, na lugá di purba tuma decision pa nan compañeronan cristian, ancianonan ta siña nan “distinguí tantu loke ta bon i loke ta malu.” (Hebreonan 5:14) E ancianonan ta haci esaki principalmente dor di alimentá e congregacion “cu e palabranan di fe i e siñamentu excelente.”—1 Timoteo 4:6.

Presta Atencion na Bo Siñamentu

 7, 8. (a) Con esnan cu abilidad limitá ta capas pa sirbi como maestro? (b) Kico ta mustra cu esfuerso personal ta necesario pa bira un maestro eficas?

⁷ Pero, laga nos bai bek n’e tema di nos comision general pa siña. E ta rekerí un of otro abilidad of educacion particular? No necesariamente. Ta individuonan comun i coriente cu abilidadnan limitá ta efectuá mayor parti dje trabou mundial aki di siña. (1 Corintionan 1:26-29) Pablo ta splica: “Nos tin e tesoro aki [e ministerio] den weanan di klei [curpanan imperfecto], p’e poder mas ayá di loke ta normal sea di Dios i no loke ta bini di nos mes.” (2 Corintionan 4:7) E tremendo éxito cu e predicacion mundial di Reino a gosa di dje ta evidencia dje poder di Jehova su spiritu!

⁸ Tog, personalmente nos tin cu haci tur nos esfuerso si nos kier bira “un trahadó sin nada di tene bergwensa di dje, manehando e palabra dje berdad corectamente.” (2 Timoteo 2:15) Pablo a urgi Timoteo: “Presta atencion constante na bo mes i na bo siñamentu. Persistí den e cosnan aki, pasobra haciendo esaki lo bo salba tantu bo mes como esnan cu ta scucha bo.” (1 Timoteo 4:16) Di ki manera precis nos tin cu presta atencion na nos siñamentu, sea paden of pafó dje congregacion? Semper esei ta exigí pa nos dominá cierto abilidadnan, of técnica di siña?

 9. Kico ta mas importante cu abilidad natural?

⁹ Den su famoso Sermon riba Ceru, Jesus a mustra sin lugá na duda cu e tabata dominá métodonan di siña na un grado extraordinario. Ora el a caba di papia, “e multitudnan a keda pasmá di su manera di siña.” (Mateo 7:28) Naturalmente, ningun di nos por instruí mes bon cu Jesus. Pero nos no tin nodi ta un orador elocuente pa nos ta un maestro eficas. Segun Job 12:7, “animalnan doméstico” i “criaturanan cu ala” mes por siña nos sin bisa un palabra! Banda di cualkier abilidad of capacidad natural cu nos por tin, loke mas ta conta ta e “clase di persona” cu nos ta—e cualidadnan cu nos ta poseé i e hábitonan spiritual cu nos a cultivá pa studiantenan por imitá.—2 Pedro 3:11; Lucas 6:40.

Studiantenan di e Palabra di Dios

10. Con Jesus a pone un ehempel excelente como studiante di e Palabra di Dios?

¹⁰ Un maestro eficas di berdadnan bíblico mester ta un studiante di e Palabra di Dios. (Romanonan 2:21) Jesucristo a pone un ehempel excelente den esaki. Durante su ministerio, Jesus a referí, sea directamente of indirectamente na pasashinan di mas o ménos mitar dje bukinan di Scritura Hebreo.a E echo cu e tabata familiarisá cu e Palabra di Dios tabata bisto for di su 12 aña, tempu nan a hañ’é “sintá meimei dje maestronan i scuchando nan i haciendo nan pregunta.” (Lucas 2:46) Como adulto, tabata su custumber di bai snoa, caminda e Palabra di Dios tabata ser lesá.—Lucas 4:16.

11. Cua bon custumbernan di studia un maestro mester cultivá?

¹¹ Abo ta un lesadó diligente di e Palabra di Dios? Ta dor di coba den dje “lo bo comprendé e temor di Jehova, i lo bo haña e conocimentu mes di Dios.” (Proverbionan 2:4, 5) P’esei, desaroyá bon custumber di studia. Purba lesa un pida di e Palabra di Dios tur dia. (Salmo 1:2) Crea un custumber di lesa cada edicion di E Toren di Vigilancia i Spierta! asina bo ricibí nan. Paga bon tinu na reunionnan di congregacion. Siña haci investigacion cuidadoso. Si bo siña ‘investigá tur cos cu exactitud,’ lo bo por evitá exageracion of inexactitud ora bo ta siña otronan.—Lucas 1:3.

Amor i Respet pa Esnan Cu Ta Ser Siñá

12. Ki actitud Jesus tabatin tocante su disipelnan?

¹² Otro cualidad importante ta un actitud apropiado pa esnan cu bo ta instruí. E fariseonan a sinti desprecio pa esnan cu tabata scucha Jesus. Nan di: “E multitud aki cu no conocé e Ley ta hende maldicioná.” (Juan 7:49) Pero Jesus a sinti amor i respet profundo pa su disipelnan. El a bisa: “Mi no ta yama boso esclabo mas, pasobra un esclabo no sa loke su doño ta haci. Pero mi a yama boso amigu, pasobra tur e cosnan cu mi a tende for di mi Tata mi a duna di conocé na boso.” (Juan 15:15) Esaki a mustra con Jesus su disipelnan lo mester a efectuá nan trabou di siña.

13. Con Pablo a sinti tocante esnan cu el a siña?

¹³ Pablo, por ehempel, no tabatin un relacion friu of formal cu su studiantenan. El a bisa e corintionan: “Aunke boso por tin dies mil instructor den Cristo, boso siguramente no tin hopi tata; pasobra den Cristo Jesus mi a bira boso tata mediante e bon nobo.” (1 Corintionan 4:15) Tabatin bes cu Pablo a asta basha lágrima miéntras cu e tabata consehá esnan cu el a siña! (Echonan 20:31) El a mustra pacenshi i bondad extraordinario tambe. P’esei, e por a bisa e tesalonicensenan: “Nos a bira amabel meimei di boso, manera ora un mama cu ta duna pechu ta cariciá su mes yunan.” —1 Tesalonicensenan 2:7.

14. Pakico interes personal den nos studiantenan di Bijbel ta asina importante? Ilustrá.

¹⁴ Abo ta imitá Jesus i Pablo? Amor sincero pa nos studiantenan por cubri ampliamente cualkier deficiencia cu nos tin na abilidad natural. Nos studiantenan por sinti cu nos tin interes sincero den nan personalmente? Nos ta tuma tempu pa siña conocé nan? Ora un ruman muher cristian tabatin dificultad pa yuda un studiante progresá spiritualmente, el a puntr’é bondadosamente: “Tin algu ta preocupá bo?” E señora a cuminsá deshogá su mes, i cont’é un cantidad di preocupacion i ansiedad cu e tabatin. E combersacion amoroso ei a resultá di ta un punto decisivo pa e señora. Den casonan asina lo ta apropiado pa compartí pensamentunan bíblico, i palabranan di animacion i consuelo cu e persona. (Romanonan 15:4) Pero, corda sí: maske un studiante di Bijbel ta progresá lihé, e por tin algun custumber no-cristian pa deshací di dje ainda. P’esei, por ta no ta sabí pa bira indebidamente íntimo cuné riba un base social. Mester mantené límite cristian apropiado.—1 Corintionan 15:33.

15. Con nos por mustra respet pa nos studiantenan di Bijbel?

¹⁵ Respet pa nos studiantenan ta incluí cu nos lo no purba controlá nan bida personal. (1 Tesalonicensenan 4:11) Por ehempel, nos por ta studia cu un señora cu ta bibando cu un homber sin casa. Nan por tin yu cu otro. Awor cu el a gana un conocimentu exacto di Dios, e señora kier drecha asuntu cu Jehova. (Hebreonan 13:4) Ta casa e tin cu casa cu e homber, of e tin cu bai lagu’é? Nos por ta basta convencí cu casa cu un homber cu poco interes spiritual, of cu no tin interes mes, lo stroba e señora su progreso den futuro. Di otro banda, nos por ta preocupá pa bienestar dje yunan, i pensa cu lo ta mihó si e casa cuné. Sea cual sea e caso, no ta ni respetuoso ni amoroso di nos parti si nos mete den bida di un studiante i purba imponé nos propio puntonan di bista riba dje den tipo di asuntunan asina. Finalmente, ta e lo tin cu biba cu e consecuencianan di su decision. Lo no ta mihó, anto, si nos entrená un studiante pa usa su propio “facultadnan perceptivo” i dicidí pa su mes kico e mester haci?—Hebreonan 5:14.

16. Con ancianonan por mustra amor i respet pa Dios su tou?

¹⁶ Ta particularmente importante pa ancianonan di congregacion trata e tou cu amor i respet. Den su carta pa Filemon, Pablo a bisa: “Aunke mi tin gran frankesa di expresion en relacion cu Cristo pa manda bo haci loke ta debido, mas bien mi ta consehá bo riba base di amor.” (Filemon 8, 9) Por tin bes cu situacionnan frustrante ta lanta cabes den congregacion. Lo por ta asta necesario pa usa firmesa. Pablo a urgi Tito pa “sigui reprendé [esnan cu actua robes] cu severidad, pa nan ta saludabel den e fe.” (Tito 1:13) Asta ora ta asina, superintendentenan mester tene cuidou pa no papia brutu cu e congregacion nunca. “Un esclabo di Señor no tin nodi bringa,” segun Pablo, “sino mester ta amabel pa cu tur, capacitá pa siña, manteniendo su mes frená bou di maldad.”—2 Timoteo 2:24; Salmo 141:3.

17. Ki eror Moises a cometé, i kico ancianonan por siña for di esei?

¹⁷ E superintendentenan mester keda tene na mente cu ta cu “e tou di Dios” nan ta trata. (1 Pedro 5:2) Moises, maske con humilde e tabata, a perde esaki for di bista djis pa un ratu. E israelitanan “a amargá su spiritu anto el a cuminsá papia cu su lip sin pensa.” (Salmo 106:33) Dios no a gusta e maltrato aki di Su tou niun tiki, apesar cu nan tabata leu di ta sin falta den e asuntu. (Númeronan 20:2-12) Ora nan enfrentá circunstancianan difícil asina awe, ancianonan mester haci un esfuerso pa siña i instruí cu perspicacia i bondad. Nos rumannan ta reaccioná mihó ora cu trata nan cu consideracion, i como individuo cu mester di yudansa, no manera hende sin speransa di drecha. Ancianonan mester mantené e punto di bista positivo cu Pablo tabatin ora el a bisa: “Nos tin confiansa den Señor en cuanto boso, cu boso ta haci i lo sigui haci loke nos ta manda.”—2 Tesalonicensenan 3:4.

Actua Segun Nan Necesidadnan

18, 19. (a) Con nos mester actua di acuerdo cu necesidadnan di studiantenan di Bijbel cu tin abilidad limitá? (b) Con nos por yuda studiantenan cu tin duda riba temanan specífico?

¹⁸ Un maestro eficas ta dispuesto pa adaptá na e abilidad i limitacionnan di su studiantenan. (Compará cu Juan 16:12.) Den Jesus su ilustracion dje talentonan, e doño a duna privilegio “na cada un conforme cu su mes capacidad.” (Mateo 25:15) Ora nos ta conducí studio di Bijbel, nos por sigui un método similar. Di mes, ta bon pa cubri un publicacion bíblico den un periodo razonablemente corticu. Mester corda sí, cu no ta tur hende ta ábil den lesa of den asimilá idea nobo lihé. P’esei, nos mester dicerní bon ki ora pa pasa di un tema pa otro den e studio si e persona dispuesto tin dificultad cu e velocidad dje studio. Yuda e studiante capta sentido di loke e ta siña, ta mas importante cu cubri e material sin baha velocidad.—Mateo 13:51.

¹⁹ Por bisa mescos di studiantenan di Bijbel cu tin duda riba temanan specífico, manera Trinidad of fiestanan religioso. Aunke generalmente no ta necesario pa incluí material di investigacion bíblico den nos studionan, por haci esaki de bes en cuando si ta bisto cu esei lo ta beneficioso. Mester wak bon pa nos no stroba e velocidad dje studiante su progreso innecesariamente.

Sea Entusiasmá!

20. Con Pablo a pone ehempel den mustra entusiasmo i conviccion den su siñamentu?

²⁰ “Briya cu e spiritu,” Pablo ta bisa. (Romanonan 12:11) Sí, sea cu nos ta conducí un studio bíblico na cas of nos tin un parti na un reunion di congregacion, nos mester hacié cu celo i entusiasmo. Pablo a bisa e tesalonicensenan: “E bon nobo cu nos ta predicá no a resultá di ta entre boso cu papiamentu so, sino cu poder i cu spiritu santu i conviccion fuerte.” (1 Tesalonicensenan 1:5) Asina, Pablo i su compañeronan a impartí “no solamente e bon nobo di Dios, sino tambe [nan] propio alma.”—1 Tesalonicensenan 2:8.

21. Con nos por keda cu un actitud entusiasmá tocante nos asignacionnan di siña?

²¹ Berdadero entusiasmo ta e resultado di ta firmemente convencí cu nos studiantenan di Bijbel tin necesidad di tende loke nos tin di bisa. Nunca laga nos no considerá un asignacion pa siña como algu rutinario. Esdras e escriba ta unu cu definitivamente a presta atencion na su siñamentu den e sentido aki. El a “prepará su curason pa consultá e ley di Jehova i pa cumpli cuné i pa siña . . . den Israel.” (Esdras 7:10) Nos tambe mester haci asina, dor di prepará i refleccioná riba e importancia dje material. Laga nos pidi Jehova den oracion pa e yena nos cu fe i conviccion. (Lucas 17:5) Nos entusiasmo por yuda studiantenan di Bijbel desaroyá un berdadero amor pa e berdad. Claro, presta atencion na nos siñamentu por enbolbé uso di técnicanan specífico di siña. Nos siguiente artículo lo trata algun di nan.

[Nota]

Bo Ta Corda?

◻ Di con tin mester di maestronan cristian ábil awendia?

◻ Cua bon custumbernan di studia nos mester cultivá?

◻ Di con ta vital pa nos stima i respetá esnan cu nos ta studia cuné?

◻ Con nos por actua di acuerdo cu e necesidadnan di nos studiantenan di Bijbel?

◻ Di con entusiasmo i conviccion ta asina importante ora nos ta studia cu hende?

[Plachi na página 10]

Bon maestronan mes tambe ta studiante dje Palabra di Dios

[Plachi na página 13]

Mustra interes personal den studiantenan di Bijbel