Cristiannan i e Mundu di Humanidad
“Sigui cana den sabiduria pa cu esnan di pafó.”—COLOSENSENAN 4:5.
1. Kico Jesus a bisa relacioná cu su siguidónan i mundu?
DEN un oracion na su Tata celestial, Jesus a bisa di su siguidónan: “Mundu a odia nan, pasobra nan no ta parti di mundu, mescos cu ami no ta parti di mundu.” Anto el a agregá: “Mi ta pidí bo, pa no saca nan for di mundu, sino pa vigilá riba nan pa causa di e malbado.” (Juan 17:14, 15) Cristiannan no mester tabata físicamente separá for di mundu—por ehempel, dor di biba isolá den monasterionan. Mas bien, Cristo “a manda nan den mundu” pa ta su testigonan “te na e parti mas lehano dje tera.” (Juan 17:18; Echonan 1:8) Sin embargo, el a pidi Dios pa vigilá riba nan pasobra Satanas, “e gobernante dje mundu aki,” lo instigá odio contra nan pa causa dje nomber di Cristo.—Juan 12:31; Mateo 24:9.
2. (a) Con Bijbel ta usa e palabra “mundu”? (b) Ki actitud balansá Jehova ta mustra pa cu mundu?
2 Den Bijbel hopi biaha e palabra “mundu” (griego, koʹsmos) ta referí n’e sociedad humano inhustu, cu ta “drumí den poder dje malbado.” (1 Juan 5:19) Debí cu cristiannan ta cumpli cu e normanan di Jehova i ta haci caso tambe dje mandamentu pa predicá e bon nobo dje Reino di Dios na mundu, tabatin biaha cu a existí un relacion difícil entre nan i mundu. (2 Timoteo 3:12; 1 Juan 3:1, 13) Sin embargo, koʹsmos ta ser usá tambe den e Scritura pa referí n’e famia humano en general. Papiando di mundu den e sentido aki, Jesus a bisa: “Dios a stima mundu asina tantu cu el a duna su Yu unigénito, pa tur cu ehercé fe den dje no sea destruí sino haña bida eterno. Pasobra Dios a manda su Yu na mundu, no p’e husga mundu, sino pa mundu ser salbá mediante dje.” (Juan 3:16, 17; 2 Corintionan 5:19; 1 Juan 4:14) Pues, aunke Jehova ta odia e cosnan cu ta caracterisá e mundu malbado di Satanas, el a demostrá su amor pa humanidad dor di a manda su Yu na tera pa salba tur cu lo “alcansá repentimentu.” (2 Pedro 3:9; Proverbionan 6:16-19) Jehova su actitud balansá pa cu mundu mester ta un guia pa su adoradónan.
Jesus Su Ehempel
3, 4. (a) Ki posicion Jesus a adoptá pa cu gobernacion? (b) Con Jesus a mira e mundu di humanidad?
3 Djis promé cu su morto, Jesus a bisa Poncio Pilato: “Mi reino no ta parti dje mundu aki.” (Juan 18:36) Na armonia cu e palabranan aki, anteriormente Jesus a rechasá Satanas su oferta pa dun’é autoridad riba e reinonan di mundu, i el a nenga di permití e hudiunan hacié un rey. (Lucas 4:5-8; Juan 6:14, 15) Sin embargo, Jesus a demostrá gran amor p’e mundu di humanidad. Apostel Mateo a informá di un ehempel di esaki: “Ora el a mira e multitudnan el a haña duele di nan, pasobra nan tabata soyá i plamá manera carné sin wardadó.” Motivá pa amor, el a predicá n’e hendenan den nan pueblo i pueblitonan. El a siña nan i a cura nan enfermedadnan. (Mateo 9:36) Tambe e tabata cla pa respondé n’e necesidadnan físico di esnan cu a bini pa siña for di dje. Nos ta lesa: “Jesus a yama su disipelnan cerca dje i a bisa: ‘Mi tin duele dje multitud, pasobra ya ta tres dia caba cu nan a keda cu mi i nan no tin nada di come; i mi no kier manda nan bai na yuna. Posiblemente nan por desmayá na caminda.’” (Mateo 15:32) Ki un interes amoroso!
4 E hudiunan tabatin prehuicio profundo contra e samaritanonan, pero Jesus a papia basta ratu cu un muher samaritano i a pasa dos dia dunando un testimonio cabal den un stad samaritano. (Juan 4:5-42) Aunke Dios a mand’é na “e carnénan perdí dje cas di Israel,” Jesus a respondé na algun ocasion n’e expresionnan di fe di otro hende no-hudiu. (Mateo 8:5-13; 15:21-28) Sí, Jesus a demostrá cu ta posibel pa “no ta parti di mundu” i na mésun tempu mustra amor na e mundu di humanidad, na hende. Nos ta mustra un compasion similar pa hende caminda nos ta biba, traha of haci nos compra? Nos ta mustra interes den nan bienestar—no solamente nan necesidadnan spiritual, sino tambe den otro necesidadnan si ta razonablemente den nos alcanse pa yuda? Jesus a haci esei, i haciendo esei, el a habri caminda pa siña hende tocante e Reino. Ta cierto cu nos no por haci milager literal manera Jesus a haci. Pero hopi biaha un acto di bondad, na moda di papia, ta haci milager den kibra e barera di prehuicio.
Pablo Su Actitud pa cu Hende “di Pafó”
5, 6. Con apostel Pablo a trata cu e hudiunan cu tabata “di pafó”?
5 Den vários di su cartanan, apostel Pablo ta referí na hende “di pafó.” E tabata kier men hende no-cristian, sea hudiu of gentil. (1 Corintionan 5:12; 1 Tesalonicensenan 4:12; 1 Timoteo 3:7) Con el a trata cu e hendenan ei? El ‘a bira tur cos pa tur clase di hende, pa di tur manera e por salba algun.’ (1 Corintionan 9:20-22) Ora el a yega den un stad, su patronchi di predicá tabata pa bai promé n’e hudiunan cu a establecé ei. Kico tabata su método di abordá nan? Cu tacto i cu respet el a ofrecé prueba bíblico convincente cu e Mesías a bini, a muri un morto sacrificial i a ser resucitá.—Echonan 13:5, 14-16, 43; 17:1-3, 10.
6 Den e manera aki Pablo a edificá riba e hudiunan su conocimentu dje Ley i e profetanan pa asina siña nan tocante e Mesías i e Reino di Dios. I el a logra convencé algun. (Echonan 14:1; 17:4) Apesar di oposicion di parti di lidernan hudiu, Pablo a mustra tierno cariño pa su co-hudiunan ora el a skirbi: “Rumannan, e bon boluntad di mi curason i mi súplica na Dios pa nan [e hudiunan] ta, en berdad, pa nan salbacion. Pasobra mi ta duna testimonio di nan cu nan tin un celo pa Dios; pero no segun conocimentu exacto.”—Romanonan 10:1, 2.
Yudando Creyentenan No-Hudiu
7. Con hopi prosélito a respondé n’e bon nobo cu Pablo a predicá?
7 Prosélitonan tabata hende no-hudiu cu a bira practicantenan circuncidá di hudaismo. Evidentemente, tabatin prosélito hudiu na Roma, Antiokia Sirio, Etiopia i Antiokia na Pisidia—sí, rond e colonianan plamá di hudiunan. (Echonan 2:8-10; 6:5; 8:27; 13:14, 43; compará cu Mateo 23:15.) Distinto for di hopi lider hudiu, probablemente e prosélitonan no tabata soberbe, i nan no por a gaba orguyosamente cu nan tabata desendiente di Abraham. (Mateo 3:9; Juan 8:33) Mas bien, nan a bandoná diosnan pagano i humildemente a acudí na Jehova, ganando algun conocimentu di dje i di su leynan. Mescos cu e hudiunan, nan tambe tabatin e speransa di un binidero Mesías. Despues cu nan a mustra caba un disponibilidad pa cambia nan estilo di bida i nan creencianan den nan búskeda dje berdad, hopi di nan tabata cla pa haci mas cambio i respondé n’e predicacion di apostel Pablo. (Echonan 13:42, 43) Ora un prosélito cu un tempu tabata adorá diosnan pagano a combertí na cristianismo, e tabata den un posicion único pa duna testimonio na otro gentilnan cu ainda tabata adorá e diosnan ei.
8, 9. (a) Ademas dje prosélitonan, cua otro clase di gentil a ser atraé na e religion hudiu? (b) Con hopi temedor di Dios incircuncidá a respondé n’e bon nobo?
8 Ademas dje prosélitonan circuncidá, otro hende no-hudiu a ser atraé n’e religion hudiu. E promé un cu a bira cristian tabata Cornelio kende, aunke e no tabata un prosélito, tabata “un homber deboto i temeroso di Dios.” (Echonan 10:2) Den su comentario riba Echonan, profesor F. F. Bruce a skirbi: “Generalmente e gentilnan ei ta ser yamá ‘temedornan di Dios’; aunke esaki no ta un término técnico, e ta unu corecto pa usa. Aunke hopi gentil di e tempu ei no tabata prepará pa bira personanan completamente combertí na hudaismo (dor cu e rekisito di circuncision tabata un piedra di trompecá foral pa hende homber), nan a ser atraí p’e monoteismo simpel dje adoracion hudiu na snoa i e normanan ético dje moda di biba hudiu. Algun di nan tabata asistí na snoa i a haña bastante experencia cu e oracionnan i lesnan di scritura cu nan a tende ser lesá den e version griego.”
9 Apostel Pablo a topa cu hopi temedor di Dios ora el a predicá den snoanan na Asia Menor i Grecia. Na Antiokia di Pisidia el a dirigí su mes na esnan reuní den e snoa como “hombernan, israelitanan i boso e otronan cu ta teme Dios.” (Echonan 13:16, 26) Lucas ta skirbi cu despues cu Pablo a predicá pa tres sabat den e snoa na Tesalónica, “algun di nan [e hudiunan] a bira creyente [cristian] i a uni cu Pablo i Sílas, i un multitud grandi di griego cu tabata adorá Dios i no un poco dje muhernan principal a haci mescos.” (Echonan 17:4) Probablemente, algun dje griegonan tabata temedornan di Dios incircuncidá. Tin evidencia cu hopi dje gentilnan ei a asociá cu comunidadnan hudiu.
Predicacion Entre “Incrédulonan”
10. Con Pablo a predicá n’e gentilnan cu no tabatin conocimentu dje Scritura, i cu ki resultado?
10 Den e Scritura Griego Cristian, e palabra “incrédulo” por referí na hende en general pafó dje congregacion cristian. Hopi biaha e ta referí na paganonan. (Romanonan 15:31; 1 Corintionan 14:22, 23; 2 Corintionan 4:4; 6:14) Na Aténas, hopi incrédulo a ser educá den filosofia griego sin ningun conocimentu dje Scritura. Esaki a desanimá Pablo di duna testimonio na nan? No. Sin embargo, el a adaptá su método di abordá nan sí. Abilmente el a presentá ideanan bíblico sin cita directamente for dje Scritura Hebreo, cu tabata desconocí p’e atenonan. Cu facilidad el a mustra un similaridad entre e berdad di Bijbel i cierto pensamentunan cu poëtanan stoico di pasado a expresá. I el a presentá e concepto di un solo Dios berdadero pa henter humanidad, un Dios cu lo husga den husticia pa medio di un homber cu a muri i a ser resucitá. Pues, cu tacto Pablo a predicá tocante Cristo n’e atenonan. E resultado? Aunke e mayoria abiertamente a haci mofa di dje of tabata sképtico, “algun homber a uni cuné i a bira creyente, entre ken tabatin tambe Dionisio, un hues dje tribunal di Areópago, i un muher yamá Dámaris, i otronan ademas di nan.”—Echonan 17:18, 21-34.
11. Ki sorto di stad Corinto tabata, i kico tabata e resultado di Pablo su actividad di predicá ei?
11 Na Corinto tabatin un comunidad hudiu basta grandi, di manera cu Pablo a cuminsá su ministerio ei predicando den e snoa. Pero ora a resultá cu e hudiunan tabata bai contra dje, Pablo a bai n’e poblacion gentil. (Echonan 18:1-6) I ki un poblacion! Corinto tabata un stad comercial cosmopolitano hopi druk, notorio rond parti e mundu greco-romano pa su inmoralidad. Figurá bo cu “corintianisá” a nificá actua inmoralmente. Sin embargo, tabata despues cu e hudiunan a rechasá e predicacion di Pablo cu Cristo a aparecé na dje i a bis’é: “No tene miedu, sino sigui papia . . . , pasobra mi tin hopi hende den e stad aki.” (Echonan 18:9, 10) I dicho echo, Pablo a establecé un congregacion na Corinto, maske algun di su miembronan un tempu a hiba un estilo di bida “corintio.”—1 Corintionan 6:9-11.
Tratando pa Salba “Tur Clase di Hende” Awe
12, 13. (a) Con nos teritorio awe ta similar na esun di tempu di Pablo? (b) Ki actitud nos ta mustra den teritorionan caminda religionnan di cristiandad ta establecí pa hopi tempu of caminda hopi hende ta decepcioná cu religion organisá?
12 Awe, mescos cu den e promé siglo, “e bondad inmerecí di Dios . . . ta trece salbacion na tur clase di hende.” (Tito 2:11) E teritorio pa predicá e bon nobo a expandé i ta cubri tur e continentenan i mayoria dje islanan di laman. I, mescos cu den tempu di Pablo, nos ta encontrá “tur clase di hende.” Por ehempel, algun di nos ta predicá den paisnan caminda e iglesianan di cristiandad ta establecí pa hopi siglo. Mescos cu e hudiunan di promé siglo, nan miembronan kisas ta fuertemente mará na tradicion religioso. Tog, nos ta contentu pa busca esnan cu un bon condicion di curason i edificá riba loke sea e conocimentu di Bijbel cu nan tin. Nos no ta rebahá nan ni menospreciá nan ni ora nan lidernan religioso ta oponé i persiguí nos tin biaha. Mas bien, nos ta reconocé cu algun di nan kisas tin “un celo pa Dios” maske nan falta conocimentu exacto. Mescos cu Jesus i Pablo, nos ta mustra amor genuino pa hende, i nos tin un deseo ardiente pa nan ser salbá.—Romanonan 10:2.
13 Ora nos ta predicá, hopi di nos ta topa personanan cu ta decepcioná cu religion organisá. Sin embargo, kisas tog nan ta temedornan di Dios, cu ta kere den Dios te na cierto grado i ta trata pa hiba un bida recto. Den e generacion trocí i sin dios aki, nos no mester alegrá ora nos topa hende cu tin un midí di creencia den Dios? I nos no ta ansioso pa dirigí nan na un forma di adoracion cu no ta caracterisá pa hipocresia i falsedad?—Filipensenan 2:15.
14, 15. Con un campo grandi a bira disponibel pa predicá e bon nobo?
14 Den su ilustracion dje reda, Jesus a predicí cu lo tin un teritorio grandi p’e trabou di predicá. (Mateo 13:47-49) Splicando e ilustracion aki, La Atalaya di 15 di juni, 1992, a declará na página 20: “Den transcurso di siglonan miembronan di cristiandad a hunga un papel vital den traducí, copia i distribuí e Palabra di Dios. Mas despues iglesianan a forma of apoyá sociedadnan bíblico, cu a traducí Bijbel den e idiomanan di paisnan remoto. Tambe nan a manda misioneronan médico i maestronan den estranheria cu a haci hende ‘cristian’ a cambio di beneficionan material. E método aki a recogé cantidadnan grandi di piscá cu no tabata sirbi, cu no tabatin e aprobacion di Dios. Pero, por lo ménos esei a pone miyones di hende no-cristian den contacto cu Bijbel i na un forma di cristianismo, aunke e tabata deformá.”
15 E obra di combertí hende cu cristiandad a hiba a cabo tabata foral eficas na Sur América, Africa i algun isla di laman. Den nos tempu, a localisá hopi hende mansu den e áreanan aki, i nos por sigui haña bon resultado, basta nos tin un actitud positivo i amoroso pa cu hende humilde asina, mescos cu Pablo tabatin pa cu prosélitonan hudiu. Entre esnan cu mester di nos yudansa tin tambe e miyones di hendenan cu por ser yamá “simpatisantenan” di Testigonan di Jehova. Semper nan ta contentu pa mira nos ora nos bishitá nan. Algun a studia Bijbel cu nos i a asistí na nos reunionnan, particularmente e Memorial anual dje morto di Cristo. Hende asina no ta representá un campo grandi pa predicá e bon nobo dje Reino?
16, 17. (a) Ki tipo di hende nos ta acercá cu e bon nobo? (b) Con nos ta imitá Pablo den predicá na vários tipo di hende?
16 Ademas, kico di esnan cu ta bini di culturanan pafó di cristiandad—sea cu nos ta topa nan den nan pais natal of nan ta hendenan cu a imigrá pa paisnan occidental? I kico di e hopi miyones di persona cu a bira lomba totalmente pa religion, birando ateo of agnóstico? Ademas, kico di esnan cu ta sigui cu casi un fervor religioso e filosofia moderno cu ta ser publicá den e numeroso bukinan pa-yuda-bo-mes hañá den librerianan awe? Mester ignorá cualkier un dje hendenan ei i considerá cu nan no por ser salbá mas? No si nos imitá apostel Pablo.
17 Ora Pablo tabata predicá na Aténas, e no a cai den e trampa di debatí tocante filosofia cu su oyentenan. Pero sí el a adaptá su razonamentu n’e hendenan cu e tabata papia cuné, presentando e berdadnan di Bijbel den un manera cla i lógico. Di igual manera, nos no tin nodi bira experto den e religion of filosofianan dje hendenan cu nos ta predicá na dje. Sin embargo, sí nos ta adaptá nos método di abordá hende pa haci nos dunamentu di testimonio eficas, birando asina “tur cos pa tur clase di hende.” (1 Corintionan 9:22) Ora el a skirbi e cristiannan na Colósas, Pablo a declará: “Sigui cana den sabiduria pa cu esnan di pafó, cumprando e tempu oportuno pa boso mes. Laga boso expresion semper sea cu gracia, sasoná cu salu, pa boso por sa con boso mester duna un contesta na cada un.”—Colosensenan 4:5, 6.
18. Ki responsabilidad nos tin, i kico nos no mester lubidá nunca?
18 Mescos cu Jesus i apostel Pablo, laga nos mustra amor na tur clase di hende. Specialmente, laga nos haci esfuerso pa compartí cu otronan e bon nobo dje Reino. Di otro banda, nunca lubidá cu Jesus a bisa di su disipelnan: “Nan no ta parti di mundu.” (Juan 17:16) Loke esei ta nificá pa nos lo ser considerá mas aleu den e siguiente artículo.
Como Repaso
◻ Describí Jesus su actitud balansá pa cu mundu.
◻ Con apostel Pablo a predicá na hudiu i prosélito?
◻ Con Pablo a acercá temedornan di Dios i incrédulonan?
◻ Con nos por ta “tur cos pa tur clase di hende” den nos actividad di predicá?
[Plachinan na página 10]
Dor di haci actonan di bondad na nan próhimo, hopi biaha cristiannan por kibra e barera di prehuicio