Tene Hopi Curashi!

“Tene hopi curashi i bisa: ‘Jehova ta mi yudante.’”—HEBREO 13:6.

TABATA promé siglo di nos Era Comun. E Mesías tan sperá a yega. El a siña su disipelnan bon i a lansa un trabou vital di predicacion. Tabata tempu pa hende tende e bon nobo dje Reino di Dios. P’esei, hende homber i muher cu a siña e berdad a declará tal mensahe maraviyoso cu curashi.—Mateo 28:19, 20.

² E Reino no a ser establecí den e dianan ei. Pero e Rey-Designá, Jesucristo, a profetisá tocante su futuro presencia invisibel den poder di Reino. E lo a ser marcá pa cosnan manera guera sin igual, scarcedad di cuminda, pest, temblor i predicacion mundial dje bon nobo. (Mateo 24:3-14; Lucas 21:10, 11) Como Testigonan di Jehova, nos mester di curashi pa enfrentá e condicionnan aki i e persecucion cu nos ta experimentá. P’esei lo ta beneficioso pa considerá relatonan bíblico tocante proclamadornan yen di curashi dje Reino dje promé siglo E.C.

Curashi pa Imitá Cristo

³ Jesucristo ta duna e mihó ehempel di curashi. Despues di cita e ‘nubia grandi’ di testigonan di Jehova pre-cristian cu tabatin curashi, apostel Pablo a enfocá riba Jesus bisando: “Dor cu nos tin un nubia asina grandi di testigonan rondó di nos, laga nos tambe kita tur carga i e picá cu fácilmente ta entrampá nos, i laga nos core cu awante e careda cu ta poní dilanti nos, mirando atentamente n’e Agente Principal i Perfeccionador di nos fe, Jesus. P’e goso cu tabata poní su dilanti el a wanta un staca di tormento, despreciando berguensa, i a sinta na man drechi dje trono di Dios. Sí, considerá cu atencion esun cu a wanta tal papiamentu contrali di pecadornan contra nan mes interes, pa boso no cansa i desmayá den boso alma.”—Hebreo 12:1-3.

⁴ Despues di su bautismo i 40 dia di meditacion, oracion i yunamentu den desierto, Jesus a resistí Satanas cu balentia. Tentá dor dje Diabel pa combertí piedra den pan, Jesus a rechasá pasobra tabata malu pa efectuá un milager pa satisfacé un deseo personal. Jesus di: “Ta pará skirbí: ‘Hende mester biba no di pan so, sino di tur expresion cu ta sali for dje boca di Jehova.’” Ora Satanas a desafi’é p’e bula for di muraya dje tempel, Jesus a rechasá pasobra lo tabata un picá pa tenta Dios p’e salb’é for di un potencial suicidio. Jesus a declará: “Atrobe ta pará skirbí: ‘Bo no mester pone Jehova bo Dios na prueba.’” Satanas a ofrec’é tur e reinonan dje mundu pa un solo “acto di adoracion,” pero Jesus lo no a nenga e berdad i sostené e desafio dje Diabel cu hende lo no permanecé fiel na Dios bou di prueba. Pues Jesus a declará: “Bai djaki, Satanas! Pasobra ta pará skirbí, ‘Ta Jehova bo Dios cu bo mester adorá, i na dje so bo mester rindi sirbishi sagrado.’” Cu esei, e Tentador a “retirá for di dje te na un otro tempu cumbiniente.”—Mateo 4:1-11; Lucas 4:13.

⁵ Jesus tabata sumiso na Jehova i a oponé Satanas. Si nos di igual manera ta ‘someté nos mes na Dios i ta oponé e Diabel, lo e hui for di nos.’ (Santiago 4:7) Mescos cu Jesus, cu curashi nos por resistí tentacion si nos aplicá e Scritura, talbes asta citando nan ora nos ser tentá pa haci algu pecaminoso. Ta probabel cu nos lo entregá na tentacion pa cometé ladronicia si n’e ora ei nos ripití pa nos mes e ley di Dios: “Bo no mag horta”? Dos hende cristian probablemente lo sucumbí na inmoralidad sexual si maske ta un di nan cu curashi ta cita e palabranan: “Bo no mester cometé adulterio”?—Romano 13:8-10; Éxodo 20:14, 15.

⁶ Como hende cristian odiá p’e mundu aki, nos por evitá su spiritu i conducta pecaminoso. Jesus a bisa su siguidornan: “Den e mundu boso tin tribulacion, pero cobra ánimo! Mi a vence e mundu.” (Juan 16:33) El a triunfá rib’e mundu dor di no bira manera e. Su ehempel como vencedor i e resultado di su curso di warda integridad por yena nos cu curashi pa imit’é permaneciendo separá for dje mundu aki i sin contaminacion di dje.—Juan 17:16.

Curashi pa Sigui Predicá

⁷ Jesus i su disipelnan a confia den Dios pa curashi pa sigui predicá apesar di persecucion. Cu curashi Cristo a cumpli cu su ministerio apesar di persecucion, i despues di Pentecoste 33 E.C., su siguidornan persiguí a sigui proclamá e bon nobo aunke lidernan religioso hudiu a purba stroba nan. (Echo 4:18-20; 5:29) E disipelnan a resa: “Jehova, presta atencion na nan menasanan, i concedé na bo esclabonan pa nan sigui papia bo palabra cu tur frankesa.” I kico a sosodé? “Ora nan a haci súplica, e lugar den cua nan tabata reuní huntu a ser sagudí,” segun e relato, “i nan tur sin excepcion a ser yená cu spiritu santu i tabata papia e palabra di Dios cu frankesa.”—Echo 4:24-31.

⁸ Ya cu mayoria hende awe no ta receptivo n’e bon nobo, hopi biaha frankesa ta necesario pa sigui predicá na nan. Specialmente ora Jehova su sirbidornan ta ser persiguí, nan mester di curashi di Dios pa por duna testimonio cabal. (Echo 2:40; 20:24) Pues Pablo, e proclamador di Reino yen di curashi, a bisa un co-trahador hóben i ménos experenciá: “Dios a duna nos no un spiritu di cobardia, sino esun di poder i di amor i di sano huicio. P’esei no tene berguensa dje testimonio tocante nos Señor, tampoco di mi, un prisonero pa su causa, sino tuma bo parti den sufrimentu di malu p’e bon nobo segun e poder di Dios.” (2 Timoteo 1:7, 8) Si nos resa pa curashi, nos lo ta capas pa sigui predicá i ni persecucion lo no horta nos di nos goso como proclamadornan di Reino.—Mateo 5:10-12.

Curashi pa Tuma E Banda di Jehova

⁹ Hopi hudiu i gentil di promé siglo a bandoná cu curashi tradicionnan no-bíblico pa bira siguidornan bautisá di Cristo. Djis despues di Pentecoste 33 E.C., “e cantidad di disipel a sigui multiplicá den Jerusalem masha hopi; i un gran multitud di sacerdote a cuminsá bira obediente n’e fe.” (Echo 6:7) E hudiunan ei tabatin e curashi pa kibra laso religioso i aceptá Jesus como e Mesías.

¹⁰ Cuminsando na 36 E.C., hopi gentil a bira creyente. Ora Cornelio, miembronan di su famia i otro gentilnan a tende e bon nobo, nan a acept’é mesora, a ricibí spiritu santu i a ser “bautisá den e nomber di Jesucristo.” (Echo 10:1-48) Na Filipos un wardador di presu gentil i su famia a brasa cristianismo unbes i “e i esnan di dje a ser bautisá sin tarda.” (Echo 16:25-34) Curashi tabata necesario pa dal paso asina pasobra e cristiannan tabata un minoria persiguí i impopular. Te ainda nan ta. Pero si bo no a haci un dedicacion na Dios i ser bautisá como Testigo di Jehova, no ta tempu pa bo dal e pasonan yen di curashi aki?

Curashi den Casnan Dividí

¹¹ Eunice i su yu Timoteo a pone ehempel excelente di fe cu curashi den un cas dividí religiosamente. Aunke Eunice tabatin un esposo pagano, el a siña su yu “e scrituranan santu” for di su infancia. (2 Timoteo 3:14-17) Ora Eunice a bira un cristian, el a manifestá ‘fe sin ningun hipocresia.’ (2 Timoteo 1:5) Tambe e tabatin e curashi pa impartí siñansa cristian na Timoteo miéntras el a mustra respet p’e hefatura di su esposo incrédulo. Siguramente, Eunice su fe i curashi a ser recompensá ora su yu bon-siñá a ser scogé pa compañá Pablo riba biahe di misionero. Cuantu esaki por animá mayornan cristian cu ta haña nan mes den circunstancianan similar!

¹² Aunke Timoteo a biba den un cas dividí religiosamente, cu curashi el a aceptá cristianismo i a bira un persona spiritual di kende Pablo por a bisa: “Mi ta spera den Señor Jesus pa manda Timoteo pronto cerca boso [filipensenan], pa mi por ta un alma alegre ora mi yega na sa dje cosnan cu tin di ber cu boso. Pasobra mi no tin ningun otro di un disposicion manera esun di dje, cu berdaderamente lo percurá p’e cosnan cu tin di ber cu boso. . . . Boso sa dje prueba cu el a duna di su mes, cu mescos cu un yu cu su tata el a sirbi como esclabo cu mi den adelanto dje bon nobo.” (Filipense 2:19-22) Awe, hopi mucha homber i muher den casnan dividí religiosamente cu balentia ta brasa berdadero cristianismo. Mescos cu Timoteo nan ta dunando prueba di nan mes, i cuantu nos ta alegrá cu nan ta parti dje organisacion di Jehova!

Curashi pa ‘Risca Nos Garganta’

¹³ Aquila i su esposa, Priscilla (Prisca), a pone un ehempel dor di ‘risca nan garganta’ cu curashi pa un compañé creyente. Nan a ricibí Pablo den nan cas, a traha cuné den trahamentu di tent i a yud’é edificá e congregacion nobo na Corinto. (Echo 18:1-4) Durante nan amistad di 15 aña, nan asta a pone nan bida na peliger pa su causa den un manera no-revelá. Nan tabata biba na Roma ora el a bisa e cristiannan aya: “Duna mi saludonan na Prisca i Aquila mi colaboradornan den Cristo Jesus, kendenan a risca nan propio garganta pa mi alma, na ken no solamente ami sino tambe tur e congregacionnan dje nacionnan ta duna gradicimentu.”—Romano 16:3, 4.

¹⁴ Riscando nan garganta pa Pablo, Aquila i Prisca a actua na armonia cu Jesus su palabranan: “Mi ta duna boso un mandamentu nobo, pa boso stima un e otro; mescos cu ami a stima boso, pa boso tambe stima un e otro.” (Juan 13:34) E mandamentu aki tabata “nobo” den sentido cu el a bai mas ayá cu e rekisito dje Ley di Moises pa un persona stima su próhimo mescos cu el a stima su mes. (Levítico 19:18) Esei a exigí amor di sacrificio propio, bayendo asina leu di ofrecé bo mes bida pa otronan, manera Jesus a haci. E escritor Tertuliano dje segundo i tercer siglo E.C. a cita e palabranan di hende mundano relacioná cu cristiannan ora el a skirbi: “‘Mira,’ nan ta bisa, ‘con nan ta stima un e otro . . . i con nan ta cla asta pa muri pa un e otro.’” (Apology, capítulo XXXIX, 7) Specialmente meimei di persecucion kisas nos ta obligá pa demostrá amor fraternal dor di risca nos bida cu curashi pa asina evitá di exponé nos compañénan creyente na brutalidad of morto na man di enemigu.—1 Juan 3:16.

Curashi Ta Trece Goso

¹⁵ Pablo i Silas ta duna evidencia cu manifestando curashi meimei di prueba por trece goso. Riba ordu dje magistradonan civil den e stad di Filipos, nan a ser batí públicamente cu bara i cerá den cepa. Tog, nan no a cobardeá abatí den temor. Apesar di nan circunstancianan di prueba, ainda nan tabatin curashi duná-pa-Dios i e goso cu esei ta trece pa cristiannan fiel.

¹⁶ Rond di mei anochi, Pablo i Silas tabata resa i alabá Dios cu cantica. Di ripiente, un temblor a sagudí e prison, a los nan cadenanan i a habri e portanan. E wardador di presu spantá i su famia a ricibí un testimonio cu curashi cua a hiba na nan bautismo como sirbidornan di Jehova. E mes “a alegrá mashá cu henter su cas awor cu el a kere den Dios.” (Echo 16:16-34) Cuantu goso esaki mester a duna Pablo i Silas! Despues di a considerá esaki i otro ehempelnan bíblico di curashi, con nos por sigui tene curashi como sirbidornan di Jehova?

Sigui Tene Hopi Curashi

¹⁷ Sperando riba Jehova lo yuda nos tene curashi. David a canta: “Spera riba Jehova; tene curashi i laga bo curason sea fuerte. Sí, spera riba Jehova.” (Salmo 27:14) Salmo 27 ta mustra cu David a confia den Jehova como “e plasa fuerte” di su bida. (Versículo 1) Mirando con Dios a trata cu David su adversarionan den pasado a dun’é curashi. (Versículo 2, 3) Aprecio pa Jehova su centro di adoracion tabata un otro factor. (Versículo 4) Confiando den Jehova su yudansa, proteccion i liberacion tambe a edificá e curashi di David. (Versículo 5-10) Probechoso, tambe, tabata instruccion continuo den e principionan di Jehova su caminda hustu. (Versículo 11) Oracion cu confiansa pa liberacion for di su adversarionan, combiná cu fe i speransa, a yuda David tene curashi. (Versículo 12-14) Nos por edificá nos curashi den maneranan similar, mustrando asina cu nos realmente ta “spera riba Jehova.”

¹⁸ Asociacion regular cu co-adoradornan di Jehova por yuda nos sigui tene curashi. Ora Pablo a apelá na César i tabata biahando pa Roma, co-adoradornan a top’é n’e Plasa di Marshe di Apio i Tres Taberna. E relato ta bisa cu “ora el a alcansá na mira nan, Pablo a gradicí Dios i a cobra ánimo.” (Echo 28:15) Segun cu nos ta asistí regularmente na reunionnan cristian, nos ta prestando atencion n’e conseho di Pablo: “Laga nos considerá un e otro pa incitá otro na amor i obra excelente, no bandonando nos reunimentu huntu, manera algun tin pa custumber, sino animando un e otro, i tantu mas segun boso ta contemplá cu e dia ta yegando cerca.” (Hebreo 10:24, 25) Kico ta nificá animá un e otro? Animá kier men “inspirá cu curashi, spiritu of speransa.” (Webster’s Ninth New Collegiate Dictionary) Nos por haci hopi pa inspirá otro cristiannan cu curashi i nan animacion di igual manera por edificá e cualidad aki den nos.

¹⁹ Pa sigui tene curashi, nos mester studia e Palabra di Dios regularmente i aplicá su conseho den nos bida. (Deuteronomio 31:9-12; Hosué 1:8) Nos studio regular mester incluí publicacionnan cristian basá riba e Scritura, pasobra e conseho sano cu ta ser proveé asina lo yuda nos enfrentá prueba di fe cu curashi duná-pa-Dios. For di relatonan bíblico, nos a mira con Jehova su sirbidornan tabatin curashi den varios situacion. Awor aki, kisas nos no sa con tal informacion por yuda nos, pero e Palabra di Dios tin poder, i loke nos ta siña for di dje semper por beneficiá nos. (Hebreo 4:12) Por ehempel, si miedu di hende mester cuminsá afectá nos ministerio, laga nos corda con Enoc tabatin e curashi pa plama e mensahe di Dios na hende malbado.—Hudas 14, 15.

²⁰ Pa sigui tene curashi como Jehova su sirbidornan, nos mester perseverá den oracion. (Romano 12:12) Jesus a wanta su pruebanan cu curashi pasobra el “a ofrecé súplica i tambe peticion na Esun cu por a salb’é for di morto, cu sclamacion fuerte i lágrima, i el a ser tendé favorablemente pa su temor piadoso.” (Hebreo 5:7) Kedando íntimo cu Dios den oracion, nos lo no ta manera cobardenan mundano destiná pa experimentá “e segundo morto” for di cua no tin resureccion. (Revelacion 21:8) Proteccion divino i bida den Dios su mundu nobo ta pa su sirbidornan balente.

²¹ Como Testigonan leal di Jehova, nos no mester teme demoño i enemigu humano, pasobra nos tin e sosten di Dios i e ehempel balente di Jesus como vencedor di mundu. Asociacion spiritualmente edificante cu e pueblo di Jehova di igual manera ta yuda nos tene curashi. Nos curashi ta ser edificá tambe mediante e guia i conseho dje Scritura i publicacionnan cristian. I relatonan di Bijbel di sirbidornan di Dios di pasado ta yuda nos cana den su camindanan cu curashi. P’esei, den e último dianan crítico aki, laga nos forsa padilanti cu curashi den sirbishi sagrado. Sí, laga tur e pueblo di Jehova tene hopi curashi!

Con Lo Bo Contestá

◻ Con Jesus su ehempel por yena nos cu curashi?

◻ Kico a duna Jesus i su disipelnan curashi pa sigui predicá?

◻ Pakico hudiu i gentil tabatin mester di curashi pa tuma e banda di Jehova?

◻ Ki ehempel di curashi Eunice i Timoteo a duna?

◻ Ki evidencia tin di cu curashi ta trece goso asta meimei di persecucion?

[Study Questions]

 1. Ki curashi esnan cu a siña e berdad di Dios den e promé siglo E.C. a manifestá?

 2. Pakico Testigonan di Jehova mester di curashi awe?

 3. Ken ta duna e mihó ehempel di curashi, i kico a ser bisá di dje na Hebreo 12:1-3?

 4. Con Jesus a manifestá curashi ora el a ser tentá pa Satanas?

 5. Kico por yuda nos resistí tentacion?

 6. Con Jesus tabata un vencedor balente di mundu?

7, 8. Kico lo yuda nos sigui predicá apesar di persecucion?

9, 10. (a) Kico hudiu i gentil di promé siglo a haci afin di bira siguidor bautisá di Cristo? (b) Pakico curashi tabata necesario pa bira cristian?

11. Eunice i Timoteo a duna ki ehempel excelente di curashi?

12. Ki clase di persona Timoteo a bira, i ken ta resultando di ta manera e?

13. Den ki manera Aquila i Priscilla a manifestá curashi?

14. Riscando nan garganta pa Pablo, Aquila i Prisca tabata actuando na armonia cu cua mandamentu?

15, 16. Manera capítulo 16 di Echo ta mustra, con curashi i goso por ta relacioná cu otro?

17. Manera Salmo 27 ta mustra, con speransa den Jehova ta relacioná cu curashi?

18. (a) Kico ta mustra cu asociacion regular cu co-adoradornan di Jehova por yuda nos sigui tene curashi? (b) Ki papel reunionnan cristian ta hunga den edificá curashi?

19. Con e Scritura i publicacionnan cristian ta relacioná cu nos tenementu di curashi?

20. Pakico nos por bisa cu oracion ta vital si nos kier keda cu curashi como Jehova su sirbidornan?

21. Pakico Testigonan leal di Jehova por tin curashi?

[Picture on page 18]

Mescos cu Jesus, nos por resistí tentacion si nos aplicá i cita e Scritura