Pakico Milagernan So No Ta Edificá Fe

MI MESTER mira pa mi kere. Esei ta e punto di bista di hopi hende. Tin ta bisa cu nan lo kere den Dios si e revelá su mes den un of otro manera milagroso. Tal bes esei ta e caso, pero un creencia asina ta hiba na berdadero fe?

Tuma por ehempel e israelitanan Core, Datan i Abiram. Bijbel ta mustra cu nan tabata testigonan ocular dje milagernan impresionante aki di parti di Dios: e dies plaganan riba Egipto, e escape dje nacion di Israel dor di Laman Corá i e destruccion total dje fárao egipcio i su forsa militar. (Exodo 7:19–11:10; 12:29-32; Salmo 136:15) Tambe Core, Datan i Abiram a tende Jehova papia for di shelu na Ceru di Sínai. (Deuteronomio 4:11, 12) Sin embargo, no hopi tempu despues cu e milagernan aki a tuma lugá, e tres hombernan a instigá un rebelion contra Jehova i su sirbidornan nombrá.—Númeronan 16:1-35; Salmo 106:16-18.

Rond di 40 aña despues, un profeta yamá Balam tambe tabata testigo di un milager. Ni intervencion angelical no a impidié di tuma parti p’e enemigunan di Dios, e moabitanan. Apesar dje milager ei, Balam a dal bai i a tuma un posicion contra Jehova Dios i Su pueblo. (Númeronan 22:1-35; 2 Pedro 2:15, 16) Sin embargo, Balam su falta di fe ta nada na comparacion cu esun di Hudas Iscariote. Apesar cu e tabata un compañero íntimo di Jesus i testigo ocular di un seri extraordinario di milager, Hudas a traicioná Cristo pa trinta pida plata.—Mateo 26:14-16, 47-50; 27:3-5.

E lidernan religioso hudiu tambe tabata sa di Jesus su hopi milagernan. Despues cu el a resucitá Lázaro, nan asta a admití: “E homber aki ta ehecutá hopi señal.” Pero e echo cu nan a mira Lázaro na bida awor a suavisá nan curason i duna nan fe? Di ningun manera. En bes di esei, nan a trama pa mata tantu Jesus como Lázaro!—Juan 11:47-53; 12:10.

Ni intervencion directo di parti di Dios no a producí fe den e hombernan malbado ei. Na un ocasion ora Jesus tabata den e edificio dje tempel, el a haci oracion na bos haltu: “Tata, glorificá bo nomber.” Jehova a contestá cu un bos for di shelu: “Mi a glorifik’é i lo glorifik’é atrobe.” Sin embargo, e suceso milagroso aki no a producí fe den curason di esnan presente. Bijbel ta bisa: “Aunke el a haci asina hopi señal dilanti nan, nan no tabata pone fe den dje.”—Juan 12:28-30, 37; compará cu Efesionan 3:17.

Pakico Milagernan No A Edificá Fe

Con por tin un falta di fe asina apesar di tantu milager? E echo cu e lidernan religioso hudiu a rechasá Jesus ta parce specialmente straño ora bo considerá cu net e tempu cu el a cuminsá su ministerio, e hudiunan den nan totalidad tabata “den expectativa” di “e Cristo,” of e Mesías. (Lucas 3:15) Sin embargo, e problema ta sinta den loke e expectativanan ei tabata. Lexicógrafo W. E. Vine ta cita un erudito di Bijbel bon conocí cu ta bisa cu e hudiunan tabata obsesioná cu e idea di un Mesías cu lo a duna nan “triunfo militar terenal” i “grandesa material.” P’esei, nan no tabata prepará p’e Jesus humilde i no-político di Názaret, cu a aparecé meimei di nan como e berdadero Mesías na 29 E.C. E lidernan religioso a teme tambe cu Jesus su siñansanan lo a alterá e estado existente di cosnan i pone nan posicion prominente na peliger. (Juan 11:48) Nan ideanan formá di antemano i egoismo a ciega nan pa cu e nificacion di Jesus su milagernan.

E lidernan religioso hudiu i otronan mas despues a rechasá e prueba milagroso cu Jesus su siguidornan tabatin fabor divino. Por ehempel, ora su apostelnan a cura un homber cu a nace coho, miembronan furioso dje corte supremo hudiu a puntra: “Kico nos lo haci cu e hombernan aki? Pasobra, di berdad, un señal notabel a sosodé pa medio di nan, un señal manifestá na tur habitante di Jerusalem; i nos no por nengu’é. No obstante, p’e no plama mas leu entre e pueblo, laga nos bisa nan cu menasa pa no papia mas riba e base dje nomber aki na absolutamente ningun hende.” (Echonan 3:1-8; 4:13-17) Claramente, e milager maraviyoso aki no a edificá ni producí fe den curason di e hendenan ei.

Ambicion, orguyo i golosidad ta factornan cu a impulsá hopi hende pa haci nan curason duru. Esaki aparentemente tabata e caso cu Core, Datan i Abiram, mencioná den e introduccion. Yaluzí, miedu i un cantidad di otro actitudnan perhudicial a stroba otronan. Nos ta ser recordá tambe dje angelnan desobediente, e demoñonan, cu un tempu tabatin e privilegio di contemplá e cara mes di Dios. (Mateo 18:10) Nan no ta duda e existencia di Dios. En berdad, “e demoñonan ta kere i ta tembla.” (Santiago 2:19) Tog, nan no tin fe den Dios.

E Nificacion di Berdadero Fe

Fe ta mas cu simpel creencia. Tambe e ta mas cu un reaccion emocional momentáneo riba un of otro milager. Hebreonan 11:1 ta bisa: “Fe ta e expectativa sigur di cosnan sperá, e demostracion evidente di realidadnan aunke nan no ta ser contemplá.” Un individuo cu tin fe ta convencí den su curason cu tur loke Jehova Dios primintí ta como si fuera cumplí caba. Ademas, e prueba innegabel di realidadnan no-mirá ta asina poderoso cu fe mes, manera algun ta opiná, ta ekivalente n’e evidencia ei. Sí, fe ta basá riba evidencia. I den tempunan bíblico, milagernan a hunga un rol den e desaroyo of edificacion di fe. E señalnan cu Jesus a ehecutá a sirbi pa convencé otronan cu e tabata e Mesías primintí. (Mateo 8:16, 17; Hebreonan 2:2-4) Di un manera similar, donnan asina di Dios su spiritu santu, of forsa activo, manera curacion milagroso i papiamentu den lenga a proba cu e hudiunan no tabatin e fabor di Jehova mas sino cu su aprobacion tabata awor riba e congregacion cristian, establecí dor di su Yu, Jesucristo.—1 Corintionan 12:7-11.

Entre e donnan milagroso dje spiritu tabatin e abilidad di profetisá. Ora hende no-creyente a observá e milager aki, algun a ser conmoví pa adorá Jehova, declarando: “Dios realmente ta meimei di boso.” (1 Corintionan 14:22-25) Sin embargo, no tabata e intencion di Jehova Dios pa milager ta un rasgo permanente di adoracion cristian. P’esei, apostel Pablo a skirbi: “Pero si tin don di profetisá, nan lo ser eliminá; si tin lenga, nan lo caba.” (1 Corintionan 13:8) E donnan aki evidentemente a caba ora e apostelnan i esnan cu a ricibí donnan asina pa medio di nan a muri.

Hende lo ser lagá e ora ei sin un base pa fe? No, pasobra Pablo a bisa: “[Dios] no a laga su mes sin testimonio pasobra el a haci bon, dunando boso yobida di shelu i temporadanan fructífero, yenando boso curason completamente cu cuminda i alegria.” (Echonan 14:17) En berdad, pa hende di curason onrado cu ta dispuesto pa habri nan mente i curason p’e evidencia cu ta rondoná nos, Jehova Dios su “cualidadnan invisibel ta ser mirá claramente desde creacion di mundu padilanti, pasobra nan ta ser percibí den e cosnan trahá, asta su poder eterno i Divinidad, di manera cu nan [esnan cu ta rechasá Dios] ta inexcusabel.”—Romanonan 1:20.

No ta suficiente pa djis kere den e existencia di Dios. Pablo a urgi: “Stop di ser formá segun e sistema di cosnan aki, mas bien sea transformá dor di rehací boso mente, pa boso por proba pa boso mes loke ta e bon i aceptabel i perfecto boluntad di Dios.” (Romanonan 12:2) Por haci esaki dor di studia e Scritura diligentemente cu yudansa di publicacionnan cristian, manera e revista aki. Fe basá riba conocimentu exacto dje Palabra di Dios, Bijbel, no ta débil ni superficial. Esnan cu a dicerní e boluntad di Dios i ta haciend’e den fe ta rindiendo sirbishi sagrado na Dios.—Romanonan 12:1.

No Mira i Tog Kere

Tabata difícil pa apostel Tomas ehercé fe den Jesus su resureccion for di morto. “Aménos cu mi mira den su mannan e marca di clabu i hinca mi dede den e marca di clabu i hinca mi man den su custia, ami siguramente lo no kere,” Tomas a declará. Ora Jesus mas despues a materialisá cu un curpa cu a mustra e heridanan ocasioná p’e clabamentu na staca, Tomas a reaccioná faborablemente n’e milager aki. Sin embargo, Jesus a bisa: “Felis ta esnan cu no ta mira i tog ta kere.”—Juan 20:25-29.

Awe, miyones di Testigo di Jehova “ta cana pa fe, no pa bista.” (2 Corintionan 5:7) Aunke nan no a mira e milagernan registrá den Bijbel, nan ta kere firmemente cu esakinan a tuma lugá. E Testigonan ta ehercé fe den Dios i den su Palabra. Cu yudansa di su spiritu, nan ta capas pa comprendé e siñansanan di Bijbel i su tema predominante—e vindicacion dje soberania di Jehova Dios pa medio di su Reino celestial. (Mateo 6:9, 10; 2 Timoteo 3:16, 17) Cu gran beneficio pa nan mes, e cristiannan berdadero aki ta aplicá Bijbel su conseho sabí den bida. (Salmo 119:105; Isaías 48:17, 18) Nan ta aceptá e prueba irefutabel cu profecianan di Bijbel ta identificá nos tempu como “e último dianan,” i nan tin fe cu Dios su mundu nobo primintí ta tras di porta. (2 Timoteo 3:1-5; Mateo 24:3-14; 2 Pedro 3:13) Pa nan ta un goso pa compartí e conocimentu di Dios cu otronan. (Proverbionan 2:1-5) Nan sa cu ta solamente mediante un studio dje Scritura cu esnan cu ta busca Dios por berdaderamente hañ’é.—Echonan 17:26, 27.

Bo ta corda Albert, cu a ser mencioná den e artículo anterior? Despues cu a pasa un par di dia sin cu su oracion pa un milager a ser contestá, un señora Testigo di Jehova di edad avansá a bishit’é i a lagu’é cu algun literatura bíblico. Despues di esei Albert a aceptá un studio di Bijbel grátis na cas. Segun cu el siña conocé e mensahe di Bijbel mas mihó, su decepcion a bira entusiasmo. El a cuminsá realisá cu apesar di tur cos el a haña Dios tog.

E Scritura ta urgi: “Boso busca Jehova, miéntras cu e por ser hañá. Yama na dje miéntras cu e ta resultá di ta cerca.” (Isaías 55:6) Bo por haci esaki, no dor di spera riba un milager den e tempu aki for di Dios, sino dor di gana conocimentu exacto di su Palabra. Esaki ta un mester, pasobra milagernan so no ta edificá fe.

[Plachi na página 5]

Ni e resureccion milagroso di Lázaro no a impulsá e enemigunan di Jesus pa ehercé fe

[Plachinan na página 7]

Fe mester ta basá riba conocimentu exacto di Bijbel