Cuidou cu un Falta di Fe

“Cuidou, rumannan, pa nunca desaroyá den un di boso un curason malbado cu ta falta fe, dor di hala for dje Dios bibu.”—HEBREONAN 3:12.

 1. Na ki realidad spantoso e palabranan di Pablo n’e cristiannan hebreo ta hala nos atencion?

KI UN pensamentu spantoso—cu hende cu un tempu tabatin un relacion personal cu Jehova por desaroyá un “curason malbado” i “hala for dje Dios bibu”! I ki un spiertamentu esaki ta! E palabranan aki di apostel Pablo tabata dirigí, no na incrédulonan, sino na hende cu a dedicá nan bida na Jehova riba base di fe den e sacrificio di rescate di Jesucristo.

 2. Ki preguntanan nos tin cu considerá?

² Con ta posibel pa un hende den un condicion spiritual asina bendicioná desaroyá “un curason malbado cu ta falta fe”? Sí, con un hende cu a purba Dios su amor i bondad inmerecí por alehá deliberadamente for di dje? Anto esaki por sosodé cu un di nos? Ta cosnan pa pensa seriamente ariba, i ta na su lugá pa nos examiná e motibu tras dje spiertamentu aki.—1 Corintionan 10:11.

Pakico Conseho Asina Fuerte?

 3. Describí e circunstancianan cu a afectá e cristiannan di promé siglo den Jerusalem i su alrededor.

³ Ta parce cu Pablo a dirigí su carta n’e cristiannan hebreo na Hudea na aña 61 E.C. Un historiadó a comentá cu esaki tabata un tempu ora “no tabatin pas ni siguridad pa ningun hende serio i onesto, ni den e stad di Jerusalem ni ningun otro caminda den henter e provincia.” Tabata un tempu di maldad i violencia, fomentá pa un mescla di presencia militar opresivo dje romanonan, e aire tòf di fanáticonan hudiu antiromano, i e actividadnan criminal di ladronnan cu a probechá dje tempu caótico. Tur esaki a haci cosnan masha difícil pa cristiannan, kendenan a haci hopi esfuerso pa no mete den e asuntunan ei. (1 Timoteo 2:1, 2) De facto, pa motibu di nan posicion neutral, algun a mira nan como hende cu no ta pas den e sociedad, asta rebelde. Hopi bes cristiannan a ser maltratá, i nan a sufri pérdida personal.—Hebreonan 10:32-34.

 4. Na ki presion di caracter religioso e cristiannan hebreo a ser someté?

⁴ Tambe cristiannan hebreo tabata bou di un presion hopi fuerte di caracter religioso. E celo di Jesus su disipelnan fiel i e expansion rápido dje congregacion cristian debí na esei, a provocá e yaluzí i rabia dje hudiunan—specialmente nan lidernan religioso. Nan a usa tur nan energia pa molestiá i persiguí e siguidónan di Jesucristo.a (Echonan 6:8-14; 21:27-30; 23:12, 13; 24:1-9) Asta si algun cristian a scapa di persecucion abierto, tog e hudiunan a haci bofon di nan i a despreciá nan. Cristianismo a ser menospreciá como un religion nobo cu a falta e splendor di hudaismo, e no tabatin tempel, ni sacerdocio, ni fiesta, ni sacrificionan formal, etcétera. Asta nan lider, Jesus, a ser matá como un criminal condená. Pa practicá nan religion, cristiannan mester tabatin fe, curashi i awante.

 5. Pakico tabata esencial pa cristiannan na Hudea keda spiritualmente alerto?

⁵ Riba tur cos, e cristiannan hebreo na Hudea tabata biba den un tempu crucial den e historia dje nacion ei. Hopi cos cu nan Señor, Jesucristo, a bisa cu lo marca e fin dje sistema hudiu, a sosodé caba. E fin no por tabata muchu leu. Pa sobrebibí, cristiannan tabatin cu keda spiritualmente alerto i ser prepará pa ‘hui bai n’e cerunan.’ (Mateo 24:6, 15, 16) Nan lo tabatin e fe i resistencia spiritual necesario pa tuma accion inmediato manera Jesus a manda? A parce cu tabatin algun duda.

 6. Kico e cristiannan na Hudea tabatin mester cu urgencia?

⁶ Durante e último década promé cu henter e sistema di cosnan hudiu a desintegrá, cristiannan hebreo tabata claramente bou di presion severo, tantu di paden como pafó dje congregacion. Nan tabatin mester di animacion. Pero tambe nan tabatin mester di conseho i guia pa yuda nan mira cu e curso cu nan a scoge tabata esun corecto i cu nan no a sufri i wanta en bano. Afortunadamente, Pablo a pone su mes na altura dje situacion i a bini na nan yudansa.

 7. Pakico nos lo mester ta interesá den loke Pablo a skirbi e cristiannan hebreo?

⁷ Nos mester ta mashá interesá den loke Pablo a skirbi e cristiannan hebreo. Pakico? Pasobra nos ta bibando den un tempu paralelo cu di nan. Tur dia nos ta sinti presion for dje mundu bou di dominio di Satanas. (1 Juan 5:19) E profecianan di Jesus i dje apostelnan relacioná cu e último dianan i e “conclusion dje sistema di cosnan” ta cumpliendo dilanti nos wowo. (Mateo 24:3-14; 2 Timoteo 3:1-5; 2 Pedro 3:3, 4; Revelacion 6:1-8) Riba tur cos, nos tin cu keda spiritualmente alerto pa nos “por logra scapa di tur e cosnan aki cu ta destiná pa sosodé.”—Lucas 21:36.

Unu Mayor cu Moises

 8. Kico Pablo tabata urgiendo su compañeronan cristian pa haci ora el a bisa loke ta skirbí na Hebreonan 3:1?

⁸ Mencionando un punto vital, Pablo a skirbi: “Considerá e apostel i sumo sacerdote cu nos ta confesá—Jesus.” (Hebreonan 3:1) “Considerá” ta nificá “percibí claramente . . . , comprendé completamente, considerá cu sumo cuidou i atencion.” (Vine’s Expository Dictionary of Old and New Testament Words) Pues anto, Pablo tabata urgiendo su compañeronan creyente pa haci un esfuerso diligente pa yega na comprendé cabalmente e papel cu Jesus a hunga den nan fe i salbacion. Haciendo esaki lo a fortalecé nan determinacion pa para firme den fe. Kico anto, tabata e papel di Jesus, i pakico nos mester ‘consider’é’?

 9. Pakico Pablo a referí na Jesus como “apostel” i “sumo sacerdote”?

⁹ Pablo a aplicá e términonan “apostel” i “sumo sacerdote” na Jesus. Un “apostel” ta un persona mandá, i aki e ta relacioná cu Dios su medio di comunicá cu humanidad. Un “sumo sacerdote” ta un persona mediante ken hende por acercá Dios. E dos percuracionnan aki ta esencial pa adoracion berdadero, i Jesus ta e personificacion di tur dos. E ta esun mandá for di shelu pa siña humanidad e berdad tocante Dios. (Juan 1:18; 3:16; 14:6) Jesus ta tambe esun nombrá como e Sumo Sacerdote antitípico den Jehova su areglo di tempel spiritual pa pordon di picá. (Hebreonan 4:14, 15; 1 Juan 2:1, 2) Si di berdad nos ta apreciá e bendicionnan cu nos por gana mediante Jesus, nos lo tin e curashi i determinacion pa para firme den fe.

10. (a) Con Pablo a yuda cristiannan hebreo comprendé e superioridad di cristianismo riba hudaismo? (b) Ki berdad universal Pablo a cita pa reforsá su punto?

¹⁰ Pa enfatisá e balor di fe cristian, Pablo a compará Jesus cu Moises, kende e hudiunan a considerá como e profeta di mas grandi entre nan antepasadonan. Si cristiannan hebreo por a comprendé cu henter nan curason e echo cu Jesus ta mayor cu Moises, nan lo no tabatin motibu pa duda dje superioridad di cristianismo riba hudaismo. Pablo a mustra cu maske Moises a ser considerá digno pa ser confiá cu e “cas” di Dios—e nacion, of congregacion, di Israel—e tabata solamente un criá, of sirbidó, fiel. (Númeronan 12:7) Di otro banda, Jesus tabata e Yu, doño riba e cas. (1 Corintionan 11:3; Hebreonan 3:2, 3, 5) Pa reforsá su punto, Pablo a cita e berdad universal aki: “Naturalmente, tur cas a ser trahá dor di un hende, pero esun cu a traha tur cos ta Dios.” (Hebreonan 3:4) Ningun hende lo cuestioná cu Dios ta mayor cu tur persona, pasobra e ta e Constructor, of Creador, di tur cos. Lógicamente anto, ya cu Jesus tabata colaborador di Dios, e mester ta mayor cu tur otro creacion, incluyendo Moises.—Proverbionan 8:30; Colosensenan 1:15-17.

11, 12. Kico Pablo a urgi e cristiannan hebreo pa keda gara “firme te na fin,” i con nos por aplicá su conseho?

¹¹ E cristiannan hebreo di berdad tabata den un posicion sumamente faborecí. Pablo a recordá nan cu nan tabata “participante dje yamada celestial,” un privilegio cu nan mester a balorá mas cu cualkier cos cu e sistema hudiu por a ofrecé. (Hebreonan 3:1) Pablo su palabranan mester a haci e cristiannan ungí ei sinti nan gradicidu cu nan tabata den fila pa ricibí un herencia nobo en bes di sinti duele cu nan a bandoná cosnan conectá cu nan patrimonio hudiu. (Filipensenan 3:8) Urgiendo nan pa keda gara nan privilegio i pa no balot’é, Pablo a bisa: “Cristo tabata fiel como Yu riba e cas di [Dios]. Nos ta e cas di Esun ei, si nos haci firme nos gara riba nos frankesa di expresion i nos gabamentu tocante e speransa firme te na fin.”—Hebreonan 3:6.

¹² En berdad, si cristiannan hebreo kier a sobrebibí e inminente conclusion dje sistema di cosnan hudiu, nan tabatin cu keda gara “firme te na fin” n’e speransa cu Dios a duna nan. Awe nos tin cu haci mescos si nos kier sobrebibí e fin dje sistema aki. (Mateo 24:13) Nos no tin cu laga e ansiedadnan di bida, e apatia di hende, ni nos mes tendencianan imperfecto pone nos vacilá den nos fe den e promesanan di Dios. (Lucas 21:16-19) Pa mira con nos por fortificá nos mes, laga nos presta atencion n’e siguiente palabranan di Pablo.

“No Haci Boso Curason Duru”

13. Ki spiertamentu Pablo a duna, i con el a aplicá Salmo 95?

¹³ Despues di a considerá e posicion faborecí dje cristiannan hebreo, Pablo a duna e spiertamentu aki: “Manera e spiritu santu ta bisa: ‘Awe, si boso scucha na su bos mes, no haci boso curason duru manera ora a causa rabia amargo, manera riba e dia cu a haci e prueba den desierto.’” (Hebreonan 3:7, 8) Pablo tabata citando for di Salmo 95, i p’esei e por a bisa cu “e spiritu santu ta bisa.”b (Salmo 95:7, 8; Exodo 17:1-7) Dios a inspirá e Scritura pa medio di su spiritu santu.—2 Timoteo 3:16.

14. Con e israelitanan a reaccioná riba loke Jehova a haci pa nan, i pakico?

¹⁴ Despues cu e israelitanan a ser librá for di sclabitud na Egipto, nan a haña e onor grandi di drenta den un relacion di pacto cu Jehova. (Exodo 19:4, 5; 24:7, 8) Sin embargo, en bes di mustra aprecio pa loke Dios a haci pa nan, no a tarda muchu cu nan a bira rebelde. (Númeronan 13:25–14:10) Con esei por a sosodé? Pablo a señalá n’e motibu: nan curason a bira duru. Pero con curason cu ta receptivo i cla pa sigui e Palabra di Dios ta bira duru? I kico nos tin cu haci pa prevení esaki?

15. (a) Con hende a tende e ‘bos di Dios mes’ den pasado i presente? (b) Ki preguntanan nos tin cu haci nos mes relacioná cu e ‘bos di Dios’?

¹⁵ Pablo a cuminsá su spiertamentu cu e condicion “si boso scucha na su bos mes.” Dios a papia cu su pueblo pa medio di Moises i otro profetanan. Despues, Jehova a papia cu nan pa medio di su Yu, Jesucristo. (Hebreonan 1:1, 2) Awe, nos tin Dios su Palabra inspirá completo, Bijbel Santu. Tambe nos tin “e esclabo fiel i discreto,” nombrá dor di Jesus pa percurá ‘alimento spiritual n’e debido tempu.’ (Mateo 24:45-47) Pues, Dios ta papiando ainda. Pero nos ta scucha? Por ehempel, con nos ta reaccioná riba conseho tocante paña i areglo personal of e entretenimentu i música cu nos ta scoge? Nos ta “scucha,” esta, obedecé i presta atencion na loke nos ta tende? Si nos tin e custumber di hustificá nos accionnan of no aceptá conseho, nos ta exponiendo nos mes n’e peliger sutil di haci nos curason duru.

16. Cua ta un manera cu nos curason por bira duru?

¹⁶ Tambe nos curason por bira duru si nos ta bula pipa pa loke nos por i mester haci. (Santiago 4:17) Apesar di tur loke Jehova a haci p’e israelitanan, nan a keda sin ehercé fe, nan a rebelá contra Moises, a preferá di kere un informe desfaborabel tocante Canan, i a nenga di drenta e Tera Primintí. (Númeronan 14:1-4) P’esei Jehova a decretá pa nan pasa 40 aña den desierto—suficiente tempu p’e miembronan sin fe dje generacion ei muri bai. Disgustá cu nan, Dios a bisa: “‘Semper nan ta dual den nan curason, i nan mes no a yega di conocé mi camindanan.’ Pues, mi a hura den mi rabia: ‘Nan lo no drenta den mi descanso.’” (Hebreonan 3:9-11) Nos ta mira un les den esaki pa nos?

Un Les pa Nos

17. Maske e israelitanan a mira Jehova su obranan poderoso i a tende su declaracionnan, pakico nan a falta fe?

¹⁷ E generacion di israelitanan cu a sali for di Egipto a mira cu nan propio wowo i a tende cu nan propio orea e obranan poderoso i declaracionnan di Jehova. Tog, nan no tabatin fe cu Dios lo por a guia nan sano i salbo pa drenta e Tera Primintí. Pakico? “Nan mes no a yega di conocé mi camindanan,” Jehova a bisa. Nan tabata sa loke Jehova a bisa i a haci, pero nan no a desaroyá confiansa den su abilidad pa soru pa nan. Nan tabata asina obsesioná cu nan necesidadnan cu nan no a haci caso di Dios su camindanan i propósito. Sí, nan a falta fe den su promesa.

18. Segun Pablo, ki manera di anda lo resultá den “un curason malbado cu ta falta fe”?

¹⁸ E siguiente palabranan aki n’e hebreonan ta mes aplicabel na nos: “Cuidou, rumannan, pa nunca desaroyá den un di boso un curason malbado cu ta falta fe, dor di hala for dje Dios bibu.” (Hebreonan 3:12) Pablo a yega n’e rais dje asuntu dor di mustra cu “un curason malbado cu ta falta fe” ta e resultado di “hala for dje Dios bibu.” Mas promé den e carta aki, el a papia di ‘drif bai’ debí na distraicion. (Hebreonan 2:1) Sin embargo, e término griego traducí como “hala” ta nificá “para leu” i ta relacioná cu e palabra “apostasia.” E ta encerá resistí, hala atras i bandoná deliberadamente i concientemente, expresá cu un tono di desprecio.

19. Con keda sin scucha na conseho por hiba na consecuencianan serio? Ilustrá.

¹⁹ P’esei, e les ta cu si nos cai den e custumber di keda sin “scucha na su bos mes,” ignorando conseho for di Jehova mediante su Palabra i e clase di esclabo fiel, lo no tarda mashá pa nos curason bira ireceptivo i duru. Por ehempel, un pareha no casá por bira un poco muchu íntimo. Kico si nan simplemente ignorá e asuntu? Esei lo protehá nan di ripití loke nan a haci, of esei lo solamente hacié mas fácil pa nan ripití nan acto? Di manera similar, ora e clase di esclabo ofrecé conseho riba e necesidad pa ta selectivo den e tipo di música i entretenimentu cu nos ta scoge, i cosnan por estilo, nos ta acept’é cu gratitud i ta haci ahustenan caminda ta necesario? Pablo a urgi nos pa no “bandoná nos reunimentu huntu.” (Hebreonan 10:24, 25) Apesar dje conseho aki, algun ruman tin un punto di bista indiferente di reunionnan cristian. Nan por sinti cu no ta dje grave ei pa falta algun di nan of asta pa keda sin bai cierto reunionnan mes.

20. Pakico ta esencial pa nos scucha na conseho bíblico?

²⁰ Si nos no scucha n’e “bos” di Jehova claramente expresá den e Scritura i publicacionnan basá riba Bijbel, pronto nos lo haña nos ta “hala for dje Dios bibu.” Ignorá conseho di un manera pasivo por hiba fácilmente na minimis’é, critik’é i resistié den un manera activo. Si nos no corigí esei, e resultado lo ta “un curason malbado cu ta falta fe,” i generalmente ta masha difícil pa recuperá di un curso asina. (Compará cu Efesionan 4:19.) Jeremías a skirbi aptamente: “E curason ta mas traicionero cu cualkier otro cos i ta desesperá. Ken por conoc’é?” (Jeremías 17:9) P’e motibu aki, Pablo a urgi su compañeronan hebreo creyente: “Sigui consehá otro tur dia, miéntras cu e por ser yamá ‘Awe,’ pa temor cu un di boso bira duru mediante e poder engañoso di picá.”—Hebreonan 3:13.

21. Kico nos tur ta ser consehá pa haci, i ki prospectonan nos tin?

²¹ Ki contentu nos ta cu awe ainda Jehova ta papiando cu nos, pa medio di su Palabra i su organisacion! Nos ta gradicidu cu “e esclabo fiel i discreto” ta sigui yuda nos “mantené e confiansa cu nos tabatin na principio firmemente gará te na fin.” (Hebreonan 3:14) Awor ta tempu pa nos respondé n’e amor i guia di Dios. Si nos ta haci esei, nos por disfrutá di un di Jehova su otro promesanan maraviyoso—esun di “drenta den” su descanso. (Hebreonan 4:3, 10) Esei ta e tema cu Pablo ta trata siguientemente cu cristiannan hebreo, i e ta tambe esun cu nos lo considerá den e siguiente artículo.

[Nota]

Bo Por Splica?

◻ Pakico Pablo a skirbi conseho asina fuerte na cristiannan hebreo?

◻ Con Pablo a yuda e cristiannan hebreo comprendé cu nan tabatin algu mihó cu e bida bou di hudaismo?

◻ Con un hende su curason ta bira duru?

◻ Kico nos tin cu haci pa evitá di desaroyá “un curason malbado cu ta falta fe”?

[Plachi na página 10]

Bo ta eherciendo fe den Jesus, e Moises Mayor?