Fe Ta Motiva Nos na Accion!

“Bo ta contemplá cu [Abraham] su fe a obra huntu cu su obranan i pa medio di su obranan su fe a ser perfeccioná.”—SANTIAGO 2:22.

 1, 2. Con nos lo actua si nos tin fe?

HOPI hende ta bisa cu nan tin fe den Dios. Sin embargo, bisa so cu bo tin fe, ta algu sin bida, mescos cu un cadaver. “Fe, si e no tin obra, ta morto riba su mes,” disipel Santiago a skirbi. Tambe el a bisa cu Abraham temeroso di Dios tabatin fe cu “a obra huntu cu su obranan.” (Santiago 2:17, 22) Ki nificacion e palabranan ei tin pa nos?

² Si nos tin berdadero fe, nos lo no djis kere loke nos ta tende na reunionnan cristian. Nos lo duna evidencia di fe pasobra nos ta Testigonan activo di Jehova. Sí, fe lo motivá nos pa aplicá e Palabra di Dios den nos bida i lo impulsá nos na accion.

Faboritismo i Fe No Ta Bai cu Otro

 3, 4. Con fe mester influenciá e manera cu nos ta trata otronan?

³ Si nos tin fe genuino den Dios i Cristo, nos lo no mustra faboritismo. (Santiago 2:1-4) Algun persona na ken Santiago a skirbi no a desplegá e imparcialidad cu cristiannan berdadero mester a mustra. (Romanonan 2:11) P’esei, Santiago ta puntra: “Boso no tin e fe di nos Señor Jesucristo, nos gloria, cu actonan di faboritismo, no ta berdad?” Si un incrédulo ricu cu renchi di oro i bistí espléndido bini un reunion i tambe un ‘homber pober incrédulo den paña sushi,’ tur dos lo mester a ricibí un bon biní, pero e cristiannan a mustra atencion special na e ricu. Nan a duna e ricunan asiento “den un lugá excelente,” miéntras cu nan a bisa incrédulonan pober pa para of sinta riba suela na pia di un persona.

⁴ Jehova a percurá e sacrificio di rescate di Jesucristo pa ricu i pober. (2 Corintionan 5:14) P’esei, si nos ta faborecé e ricunan, nos lo ta apartando for dje fe di Cristo, kende ‘a bira pober pa nos por a bira ricu mediante su pobresa.’ (2 Corintionan 8:9) Laga nos nunca husga hende den un manera asina—duna onor na hende cu un motivacion robes. Dios no ta parcial, pero si nos mustra parcialidad, nos lo ta “tumando decisionnan malbado.” (Job 34:19) Ya cu nos tin e deseo di agradá Dios, siguramente nos lo no kier sucumbí n’e tentacion di mustra faboritismo of ‘admirá personalidadnan pa beneficiá nos mes.’—Hudas 4, 16.

 5. Ken Dios a scoge pa ta “ricu den fe,” i con esnan cu ta ricu den sentido material ta actua hopi biaha?

⁵ Santiago ta identificá esnan cu ta berdaderamente ricu i ta urgi pa mustra amor na tur persona sin parcialidad. (Santiago 2:5-9) ‘Dios a scoge e pobernan pa ta ricu den fe i heredero dje reino.’ Esaki ta asina pasobra hopi biaha e pobernan ta mas receptivo p’e bon nobo. (1 Corintionan 1:26-29) Como clase, esnan ricu den sentido material ta oprimí otronan relacioná cu debe, salario i accionnan legal. Nan ta papia malu di Cristo i ta persiguí nos pa motibu cu nos ta carga su nomber. Pero laga nos sea determiná pa obedecé “e ley real,” cu ta rekerí pa nos desplegá amor pa próhimo—mustra amor sin parcialidad na ricu i pober. (Levítico 19:18; Mateo 22:37-40) Ya cu Dios ta rekerí esaki, si nos mustra faboritismo, nos ta “haci picá.”

‘Misericordia Ta Hubilá Riba Huicio’

 6. Di ki manera nos lo ta violadónan di ley si nos no trata misericordiosamente cu otro?

⁶ Si nos mustra faboritismo, desplegando un falta di misericordia, nos ta kibradónan di ley. (Santiago 2:10-13) Dor di dal un paso falsu den e sentido aki, nos ta bira violadónan di tur e leynan di Dios. Israelitanan cu no a cometé adulterio pero cu tabata ladron a bira violadónan dje Ley di Moises. Como cristiannan, nos ta ser husgá pa “e ley di un pueblo liber”—Israel spiritual den e pacto nobo i cu tin e ley ei den nan curason.—Jeremías 31:31-33.

 7. Pakico esnan cu ta sigui mustra faboritismo no por spera misericordia di parti di Dios?

⁷ Si nos ta pretendé di tin fe pero ta persistí den mustra faboritismo, nos ta den peliger. Esnan cu ta falta amor i misericordia lo haña nan huicio sin misericordia. (Mateo 7:1, 2) Santiago ta bisa: “Misericordia ta hubilá triunfalmente riba huicio.” Si nos aceptá e guia dje spiritu santu di Jehova den tur nos tratonan, nos lo no ser condená ora nos ta ser husgá. Mas bien, nos lo experenciá misericordia i triunfá asina riba husticia estricto of huicio desfaborabel.

Fe Ta Producí Obranan Excelente

 8. Kico ta e situacion di un persona cu ta bisa cu e tin fe pero no tin obra?

⁸ Ademas di haci nos amoroso i misericordioso, fe ta producí otro obranan excelente. (Santiago 2:14-26) Naturalmente, si nos bisa cu nos tin fe pero no tin obra, e fe ei lo no salba nos. Ta cierto cu nos no por gana un posicion hustu dilanti Dios pa medio di obranan dje Ley. (Romanonan 4:2-5) Santiago ta papiando tocante obranan cu ta ser motivá, no pa un código di ley, sino pa fe i amor. Si nos ta ser motivá pa cualidadnan asina, nos lo no simplemente expresá bon deseonan na un co-adoradó den necesidad. Nos lo duna yudansa material na un ruman den necesidad di paña of cuminda. Santiago ta puntra: ‘Si bo bisa un ruman den necesidad: “Bai den pas, tene bo mes cayente i come bon,” pero no ta dun’é e cosnan necesario, di ki probecho esei ta?’ Ningun. (Job 31:16-22) Un “fe” asina ta morto!

 9. Kico ta mustra cu nos tin fe?

⁹ Nos por ta asociando cu e pueblo di Dios te na un cierto grado, pero solamente obranan hací di henter curason por respaldá nos afirmacion di cu nos tin fe. Ta masha bunita si nos a rechasá e doctrina di Trinidad i ta kere cu tin un solo Dios berdadero. Pero djis kere so no ta nificá fe. “E demoñonan ta kere,” i nan ta “tembla” yen di miedu pasobra destruccion ta warda nan. Si di berdad nos tin fe, lo e motivá nos pa producí obranan manera predicá e bon nobo i percurá cuminda i paña pa co-adoradónan cu ta den necesidad. Santiago ta puntra “Bo kier sa, O homber bano [cu no ta yená cu conocimentu exacto di Dios], cu fe apart di obra ta inactivo?” Sí, fe ta rekerí accion.

10. Pakico Abraham ta ser yamá “e tata di tur esnan cu tin fe”?

¹⁰ E fe dje patriarca piadoso Abraham a motiv’é na accion. Como “e tata di tur esnan cu tin fe,” el a ser “declará hustu pa medio di obranan despues cu el a ofrecé Isaac, su yu, riba altar.” (Romanonan 4:11, 12; Génesis 22:1-14) Kico si Abraham no tabatin fe cu Dios por a resucitá Isaac i cumpli cu Su promesa di un simia pa medio di dje? E ora ei Abraham nunca lo a purba ofrecé su yu homber. (Hebreonan 11:19) Tabata pa medio di Abraham su obranan obediente cu “su fe a ser perfeccioná,” of hací completo. Dje manera ei, “e scritura [Génesis 15:6] cu ta bisa, ‘Abraham a pone fe den Jehova, i esei a ser contá na dje como husticia,’ a ser cumplí.” Abraham su obranan pa purba ofrecé Isaac, a confirmá e pronunciacion anterior di Dios di cu Abraham tabata hustu. Pa medio di obranan di fe, el a mustra su amor pa Dios i a yega di ser yamá “amigu di Jehova.”

11. Ki evidencia di fe nos ta mira den e caso di Rahab?

¹¹ Abraham a proba “cu un hende mester ser declará hustu mediante obra, i no mediante fe so.” Esei tabata e caso tambe cu Rahab, un muher di mala bida di Jérico. El a ser “declará hustu mediante obranan, despues cu el a ricibí e mensaheronan [israelita] hospitalariamente i a manda nan pa un otro caminda” di manera cu nan a scapa di nan enemigunan cananeo. Promé cu el a topa e spionnan israelita, el a reconocé Jehova como e Dios berdadero, i loke el a bisa despues, combiná cu e echo cu el a bandoná prostitucion, a duna evidencia di su fe. (Hosué 2:9-11; Hebreonan 11:31) Despues di e di dos ehempel aki di fe demostrá pa medio di obra, Santiago ta bisa: “En berdad, mescos cu e curpa sin spiritu ta morto, asina tambe fe sin obra ta morto.” Ora un persona ta morto, no tin ningun forsa di bida, of “spiritu,” den dje, i e no ta logra nada. Djis bisa cu bo tin fe ta mescos cu un curpa morto sin bida i inútil. Pero si nos tin berdadero fe, lo e impulsá nos na accion piadoso.

Controlá e Lenga Ei!

12. Kico ancianonan di congregacion mester tuma na consideracion?

¹² Papia i siña tambe por duna evidencia di fe, pero ta necesario pa tene cuidou loke nos ta bisa. (Santiago 3:1-4) Como maestronan den e congregacion, ancianonan tin un responsabilidad pisá i mester duna cuenta i rason na Dios. P’esei, nan mester examiná humildemente nan motivacion i cualificacionnan. Ademas di conocimentu i abilidad, e hombernan aki mester tin un amor profundo pa Dios i pa compañeronan creyente. (Romanonan 12:3, 16; 1 Corintionan 13:3, 4) Ancianonan tin cu basa nan conseho riba e Scritura. Si un anciano hera den su siñansa i esaki resultá den problema pa otronan, Dios lo husgu’é desfaborablemente mediante Cristo. P’esei ancianonan mester ta humilde i studiantenan diligente, pegando fielmente n’e Palabra di Dios.

13. Pakico nos ta trompecá den palabra?

¹³ Asta maestronan excelente—realmente nos tur—”ta trompecá hopi biaha” pa motibu di imperfeccion. Trompecá den palabra ta un dje faltanan mas frecuente i potencialmente perhudicial. Santiago ta bisa: “Si un hende no ta trompecá den palabra, esaki ta un hende perfecto, capas pa frena tambe henter su curpa.” Distinto di Jesucristo, nos no tin control perfecto riba nos lenga. Si nos tabatin esei, nos lo por a controlá e otro miembronan di nos curpa. Al fin i al cabo, freno ta pone cabai bai caminda nos dirigí nan, i pa medio di un timon chikitu, e stuurman por hiba asta un boto grandi cu ta ser hibá pa bientunan fuerte na unda e ta deseá.

14. Con Santiago ta enfatisá e necesidad pa haci esfuerso pa por controlá nos lenga?

¹⁴ Nos tur mester admití onestamente cu berdadero esfuerso ta necesario pa controlá e lenga. (Santiago 3:5-12) Compará cu un cabai, un freno ta chikitu; mescos tambe un timon compará cu un barcu. I ora nos tuma e curpa humano, e lenga ta chikitu “i tog ta broma hopi.” Ya cu e Scritura ta splica claramente cu bromamentu ta desagradá Dios, laga nos busca su yudansa pa no hacié. (Salmo 12:3, 4; 1 Corintionan 4:7) Laga nos frena nos lenga tambe ora nos sinti nos provocá, cordando cu un chispa so ta suficiente pa pega un mondi na candela. Manera Santiago ta indicá, “lenga ta un candela” cu poder di causa gran daño. (Proverbionan 18:21) Sí, un lenga ingobernabel “ta constituí un mundu di inhusticia”! Tur mal característica dje mundu malbado aki ta asociá cu e lenga descontrolá. E ta responsabel pa cosnan perhudicial manera calumnia i siñansa falsu. (Levítico 19:16; 2 Pedro 2:1) Kico bo ta pensa? Nos fe no mester motivá nos pa traha duru pa controlá nos lenga?

15. Ki daño e lenga desenfrená por causa?

¹⁵ Un lenga desenfrená ‘ta desonrá nos’ completamente. Por ehempel, si hende ripará cu nos ta gaña hopi biaha, nos por bira conocí como gañadó. Pero, con un lenga ingobernabel ‘ta pega e wiel natural di bida na candela’? Dor di haci bida un círculo vicioso. Un lenga descontrolá por agitá henter un congregacion. Santiago ta mencioná “Gehena,” e Vaye di Hínom. Un tempu nan tabata us’é pa sacrificio di mucha, i despues el a bira un basurero den cua habitantenan di Jerusalem tabata kima nan sushi. (Jeremías 7:31) Pues Gehena ta un símbolo di destruccion completo. Den un sentido, Gehena a fia su poder destructivo n’e lenga ingobernabel. Si nos no frena nos lenga, nos mes por bira víctima dje vlam cu nos a pega. (Mateo 5:22) Nos por asta ser expulsá for dje congregacion pa calumnia.—1 Corintionan 5:11-13.

16. En bista dje daño cu un lenga ingobernabel por causa, kico nos mester haci?

¹⁶ Manera lo bo por sa for di lesamentu dje Palabra di Dios, Jehova a decretá cu hende mester dominá e creacion animal. (Génesis 1:28) I hende a mansa tur clase di criatura. Por ehempel, nan a usa falkinan entrená pa yag. E ‘cosnan cu ta lastra’ cu Santiago ta mencioná por incluí colebra cu encantadónan di colebra ta dominá. (Salmo 58:4, 5) Hende por dominá asta bayena, pero como ser humano pecaminoso nos no por dominá e lenga completamente. No obstante, nos mester evitá di haci comentarionan ofensivo, skerpi of calumniador. Un lenga ingobernabel por ta un instrumento peligroso yená cu veneno mortífero. (Romanonan 3:13) Lamentablemente, e lenga di maestronan falsu a alehá algun cristian di promé for di Dios. Pues laga nos nunca permití expresionnan apóstata venenoso, sea papiá of skirbí haña dominio riba nos.—1 Timoteo 1:18-20; 2 Pedro 2:1-3.

17, 18. Ki inconsistencia Santiago 3:9-12 ta señalá, i kico nos mester haci relacioná cu esaki?

¹⁷ Fe den Dios i un deseo pa agrad’é por protehá nos di apostasia i por prevení nos di usa e lenga inconsistentemente. Refiriendo n’e inconsistencia di algun persona, Santiago ta bisa: ‘Cu lenga nos ta bendicioná nos Tata, Jehova, i ta maldicioná hende cu a yega di existí den e semehansa di Dios.’ (Génesis 1:26) Jehova ta nos Tata pa e echo cu e ta “duna tur persona bida i rosea i tur cos.” (Echonan 17:24, 25) Tambe e ta e Tata di cristiannan ungí den un sentido spiritual. Nos tur ta “den semehansa di Dios” pa loke ta cualidadnan mental i moral, incluyendo e amor, husticia i sabiduria cu ta distinguí nos for di bestia. Pues, anto, con nos mester actua si nos tin fe den Jehova?

¹⁸ Si nos maldicioná hende, esei lo nificá cu nos lo ta inbocando malu riba nan. Siendo cu nos no ta profetanan inspirá pa Dios, autorisá pa inbocá malu riba ningun hende, tal papiamentu lo ta evidencia di odio cu lo haci cu nos adoracion ta en bano. No ta corecto pa tantu “bendicion i maldicion” sali for dje mésun boca. (Lucas 6:27, 28; Romanonan 12:14, 17-21; Hudas 9) Lo ta ki un picá pa nos canta alabansa na Dios na reunionnan i despues papia malu di compañeronan creyente! Awa dushi i marga no por brota for dje mésun fuente. Mescos cu “un mata di figu no por producí olijfi ni un mata di wijndruif figu,” awa salu no por producí awa dushi. Algu ta spiritualmente malu si nos, cu mester papia loke ta bon, ta persistí den expresá palabranan amargo. Si nos a cai den e práctica ei, laga nos pidi Jehova su yudansa pa nos stop di papia dje forma ei.—Salmo 39:1.

Actua cu Sabiduria di Ariba

19. Si nos ser guiá pa sabiduria di ariba, ki influencia nos por tin riba otronan?

¹⁹ Nos tur mester di sabiduria pa bisa i haci cosnan cu ta pas pa hende cu tin fe. (Santiago 3:13-18) Si nos tin temor reverencial di Dios, e ta concedé na nos sabiduria di ariba, e abilidad pa usa conocimentu corectamente. (Proverbionan 9:10; Hebreonan 5:14) Su Palabra ta siña nos con pa desplegá “un suavedad cu ta pertenecé na sabiduria.” I pa motibu cu nos ta suave, nos ta promové pas den e congregacion. (1 Corintionan 8:1, 2) Cualkier hende cu ta broma cu e ta un gran maestro di compañeronan creyente ta ‘gañando contra e berdad cristian,’ loke ta condená su egotismo. (Galationan 5:26) Nan “sabiduria” ta “terenal”—característico pa hende pecaminoso alehá for di Dios. E ta “bestial,” siendo e producto di inclinacionnan carnal. Sí, e ta asta “demoniaco,” pasobra mal spiritunan ta orguyoso! (1 Timoteo 3:6) P’esei, laga nos actua cu sabiduria i humildad pa nos no haci nada pa crea un ambiente den cua ‘cosnan baho’ manera calumnia i faboritismo por florecé.

20. Con lo bo describí sabiduria di ariba?

²⁰ “Sabiduria di ariba ta na promé lugá decente,” haciendo nos moralmente i spiritualmente limpi. (2 Corintionan 7:11) E ta “pacífico,” motivando nos pa sigui tras di pas. (Hebreonan 12:14) Sabiduria di ariba ta haci nos “razonabel,” no dogmático i difícil pa trata cuné. (Filipensenan 4:5) Sabiduria di ariba ta “cla pa obedecé,” i ta inducí nos pa obedecé siñansa divino i cooperá cu e organisacion di Jehova. (Romanonan 6:17) Tambe, sabiduria di ariba ta haci nos misericordioso i compasivo. (Hudas 22, 23) Siendo yen di “bon fruta,” e ta impulsá nos pa mustra interes den otro i actua na armonia cu bondad, husticia i berdad. (Efesionan 5:9) I como pacificadónan, nos ta disfrutá di “e fruta di husticia” cu ta abundá bou di condicionnan pacífico.

21. Segun Santiago 2:1–3:18, na ki accionnan nos fe den Dios mester motivá nos?

²¹ Ta bisto, anto, cu fe ta motivá nos na accion. E ta haci nos imparcial, misericordioso i activo den obranan excelente. Fe ta yuda nos controlá e lenga i actua cu sabiduria di ariba. Pero esei no ta tur cos cu nos por siña for dje carta aki. Santiago tin mas conseho cu por yuda nos comportá nos mes den un manera cu ta pas pa esnan cu tin fe den Jehova.

Con Lo Bo Contestá?

◻ Kico tin robes den mustra faboritismo?

◻ Con fe i obranan ta relacioná cu otro?

◻ Pakico ta asina importante pa controlá e lenga?

◻ Describí kico sabiduria di ariba ta.