‘Hacidornan Gososo Dje Palabra’

“Aceptá cu suavedad e implantacion dje palabra cu por salba boso alma. Sin embargo, bira hacidornan dje palabra, i no tendedornan so.” —SANTIAGO 1:21, 22.

 1. Con nos texto di aña pa 1996 mester ser considerá?

“BIRA HACIDORNAN DJE PALABRA.” E declaracion simpel aki ta contené un mensahe poderoso. E ta sacá for di “E Carta di Santiago” den Bijbel, i lo e ser exhibí den Salonnan di Reino como e texto di aña di Testigonan di Jehova pa henter 1996.

 2, 3. Pakico tabata apropiado cu Santiago a skirbi e carta cu ta carga su nomber?

² Santiago, mitar ruman di Señor Jesus, tabata prominente den e congregacion cristian di promé. Na un ocasion despues di Jesus su resureccion, nos Señor a aparecé personalmente na Santiago i despues na tur e apostelnan. (1 Corintionan 15:7) Mas despues, ora apostel Pedro a ser librá milagrosamente for di prizon, el a bisa un grupo cristian congregá: “Informá Santiago i e rumannan dje cosnan aki.” (Echonan 12:17) Ta parce cu Santiago, aunke e mes no tabata un apostel, a presidí n’e reunion dje cuerpo gobernante den Jerusalem ora e apostelnan i ancianonan a dicidí cu gentilnan cu a combertí no tabatin nodi ser circuncidá. Santiago a resumí e evidencia presentá, i e decision confirmá mediante spiritu santu a ser mandá na tur e congregacionnan.—Echonan 15:1-29.

³ Obviamente, Santiago su razonamentu maduro tabatin hopi peso. Sin embargo, el a reconocé humildemente cu e mes tabata meramente “un esclabo di Dios i dje Señor Jesucristo.” (Santiago 1:1) Su carta inspirá ta contené un abundancia di conseho sano i animacion pa cristiannan awe. El a ser completá rond di cuater aña promé cu e atake romano inicial riba Jerusalem dor di General Cesto Galo, despues cu e bon nobo a ser predicá extensamente “den tur creacion cu ta bou di cielu.” (Colosensenan 1:23) Esei tabata un tempu crítico, i Jehova su sirbidornan tabata plenamente na haltura cu Su huicio tabata cerca di ser ehecutá riba e nacion hudiu.

 4. Kico ta indicá cu e cristiannan di promé tabatin confiansa grandi den e Palabra di Dios?

⁴ E cristiannan ei tabatin caba henter e Scritura Hebreo i gran parti dje Scritura Griego. Manera nan numeroso referencianan n’e scrituranan mas promé a indicá, e escritornan cristian di Bijbel claramente tabatin un confiansa grandi den e Palabra di Dios. Di igual manera, nos awe tin cu studia e Palabra di Dios diligentemente i aplik’é den nos bida. Pa por demostrá awante, nos mester dje fortalesa spiritual i curashi cu e Scritura Santu ta percurá.—Salmo 119:97; 1 Timoteo 4:13.

 5. Pakico nos mester di guia special awe, i unda nos lo haña esei?

⁵ Awe humanidad ta pará na drempel di un “tribulacion grandi tal como no a sosodé desde principio di mundu te awor, no, ni lo no sosodé atrobe.” (Mateo 24:21) Nos sobrebibencia ta dependé di si nos tin guia divino. Con nos por haña esaki? Dor di habri nos curason p’e siñansanan di Dios su Palabra inspirá pa spiritu santu. Esaki lo guia nos pa “bira hacidornan dje palabra,” mescos cu e sirbidornan leal di Jehova den pasado. Nos mester lesa i studia e Palabra di Dios diligentemente i us’é p’e alabansa di Jehova.—2 Timoteo 2:15; 3:16, 17.

Awante cu Goso

 6. Pakico nos mester haña goso ora nos topa cu prueba?

⁶ Den e introduccion di su carta, Santiago ta mencioná goso, e di dos fruta dje spiritu di Dios. E ta skirbi: “Consider’é tur goso, mi rumannan, ora boso ta topa cu vários prueba, ya cu boso sa cu e cualidad probá aki di boso fe ta obra awante. Pero laga awante tene su obra completo, pa boso por ta completo i sano den tur respecto, sin tin deficiencia den nada.” (Santiago 1:2-4; Galationan 5:22, 23) Di ki manera por ser bisá cu ta “tur goso” pa topa cu hopi prueba? Wel, asta Jesus a bisa den su Sermon riba Ceru: “Felis boso ta ora hende ta reprochá boso i ta persiguí boso i cu mentira ta papia tur sorto di cos malu contra boso pa mi causa. Alegrá i salta di goso, ya cu boso recompensa ta grandi den cielu.” (Mateo 5:11, 12) Tin satisfaccion gososo den mira Jehova su bendicion riba nos esfuersonan segun cu nos ta forsa padilanti den direccion dje meta di bida eterno.—Juan 17:3; 2 Timoteo 4:7, 8; Hebreonan 11:8-10, 26, 35.

 7. (a) Con nos por ser yudá pa demostrá awante? (b) Mescos cu Job, con nos por ser recompensá?

⁷ Jesus mes a wanta “p’e goso cu a ser poní su dilanti.” (Hebreonan 12:1, 2) Mirando atentamente na Jesus su ehempel yen di curashi, nos tambe por wanta! Manera Santiago ta mencioná yegando na final di su carta, Jehova ta recompensá wardadornan di integridad ricamente. “Mira! Nos ta pronunciá felis esnan cu a wanta,” Santiago ta bisa. “Boso a tende dje awante di Job i a mira e resultado cu Jehova a duna, cu Jehova ta masha tierno di cariño i misericordioso.” (Santiago 5:11) Corda con Job su integridad a ser recompensá ora el a ser restorá na bon salú i n’e disfrute di un bida pleno i felis cu personanan stimá. Awante den integridad por trece alegria similar pa bo den e Paradijs primintí di Dios su mundu nobo, como un culminacion dje goso di sirbi Jehova awor aki mes.

Buscando Sabiduria

 8. Con nos por haña sabiduria berdadero i práctico, i ki papel oracion ta hunga den esaki?

⁸ Nos estudio diligente dje Palabra di Dios, huntu cu su aplicacion práctico, lo resultá den sabiduria piadoso, permitiendo nos pa wanta pruebanan meimei dje corupcion di Satanas su sistema muribundo. Con nos por ta sigur di haña tal sabiduria? Santiago ta bisa nos: “Si cualkier un di boso tin deficiencia en cuanto sabiduria, lagu’e sigui pidi Dios, pasobra e ta duna generosamente na tur i sin tira na cara; i lo e ser duná na dje. Pero lagu’e sigui pidi den fe, sin duda nada, pasobra esun cu ta duda ta manera un ola di laman cu ta ser hibá pa bientu i bentá di un lugá pa otro.” (Santiago 1:5, 6) Nos mester haci oracion sincero, cu confiansa inkebrantabel cu Jehova lo tende nos peticionnan i cu lo e contestá nan na su mes debido tempu i manera.

 9. Con Santiago ta describí sabiduria piadoso i su aplicacion?

⁹ Sabiduria piadoso ta un don di Jehova. Describiendo e donnan ei, Santiago ta bisa: “Tur bon don i tur regalo perfecto ta bini di ariba, pasobra e ta baha for dje Tata dje lusnan celestial, i cuné no tin un variacion dje biramentu dje sombra.” Mas despues den su carta, Santiago ta splica e resultado di gana berdadero sabiduria ora e ta bisa: “Ken ta sabí i yen di comprendimentu entre boso? Lagu’e mustra mediante su conducta excelente su obranan cu un suavedad cu ta pertenecé na sabiduria. . . . E sabiduria di ariba ta na promé lugá decente, despues pacífico, razonabel, cla pa obedecé, yen di misericordia i bon fruta, sin haci distincion parcial, sin ser hipócrita.”—Santiago 1:17; 3:13-17.

10. Con religion falsu ta na contraste cu esun berdadero?

¹⁰ Den e imperio mundial di religion falsu, sea den cristiandad of den otro paisnan, hopi biaha adoradornan tin e custumber di canta algun cantica religioso, scucha oracionnan ripititivo, i tal bes tende un discurso. Ningun animacion ta ser duná pa proclamá un mensahe di speransa, pasobra mayoria religion no ta mira un prospecto briyante pa futuro. Sea e glorioso speransa dje Reino Mesiánico di Dios no ta ser mencioná nunca of e ta ser comprendé completamente robes. Jehova ta bisa proféticamente di esnan cu ta partidario di cristiandad: “Tin dos cos malu cu mi pueblo a haci: Nan a bandoná asta ami, e fuente di awa bibu, pa por coba renbak pa nan mes, renbak kibrá, cu no por contené e awa.” (Jeremías 2:13) Nan no tin awa dje berdad. Nan falta sabiduria celestial.

11, 12. (a) Con sabiduria divino mester motivá nos? (b) Tocante kico sabiduria divino ta spierta nos?

¹¹ Ki diferente esei ta entre Testigonan di Jehova awe! Cu e energia dinámico cu Dios a duna nan, nan ta inundando e tera cu e bon nobo di Su binidero Reino. E sabiduria cu nan ta papia ta basá firmemente riba e Palabra di Dios. (Compará cu Proverbionan 1:20; Isaías 40:29-31.) En berdad, nan ta haci uso práctico di berdadero conocimentu i comprendimentu den proclamá e magnífico propósitonan di nos Dios i Creador. Mester ta nos deseo pa tur persona den e congregacion “ser yená cu e conocimentu exacto di [Dios] su boluntad den tur sabiduria i comprendimentu spiritual.” (Colosensenan 1:9) Teniendo e fundeshi aki, tantu hóben como bieu lo ser motivá pa semper “bira hacidornan dje palabra.”

¹² “E sabiduria di ariba,” ta spierta nos tocante picánan cu por resultá den desaprobacion divino. “Sabi esaki, mi rumannan stimá,” Santiago ta bisa. “Tur hende mester ta lihé en cuanto tendementu, slow en cuanto papiamentu, slow en cuanto rabia; pasobra rabia di hende no ta obra husticia di Dios.” Sí, nos mester ta lihé, ansioso, pa scucha na conseho divino i aplik’é. Sin embargo, nos mester vigilá contra e maluso di e “miembro chikitu” ei, e lenga. Dor di broma, haci redu imprudente of papia cu arogancia, e lenga por cende di un manera figurativo un ‘mondi grandi’ na candela. P’esei nos tin cu cultivá agradabilidad i dominio propio den tur nos asociacionnan.—Santiago 1:19, 20; 3:5.

13. Pakico ta importante pa nos aceptá “e implantacion dje palabra”?

¹³ “P’esei,” Santiago ta skirbi, “kita tur sushedad i e cos cu ta di mas ei, maldad, i aceptá cu suavedad e implantacion dje palabra cu por salba boso alma.” (Santiago 1:21) E mundu golos aki, cu su estilo di bida yamativo, materialista, di ami-promé i cu normanan moral degradá, ta cerca di pasa forbij. “Pero esun cu ta haci e boluntad di Dios ta permanecé pa semper.” (1 Juan 2:15-17) Ta ki importante anto, pa nos aceptá “e implantacion dje palabra”! E sabiduria cu e Palabra di Dios ta percurá ta para na contraste skerpi cu e maldad dje mundu muribundo aki. Nos no kier nada dje maldad ei. (1 Pedro 2:1, 2) Nos mester implantá amor p’e berdad i fe firme den nos curason, di manera cu nos lo ta determiná pa nunca desviá for di Jehova su camindanan hustu. Pero ta suficiente pa tende e Palabra di Dios?

Birando “Hacidornan dje Palabra”

14. Con nos por bira “tendedornan” i “hacidornan” dje Palabra?

¹⁴ Na Santiago 1:22, nos ta lesa: “Bira hacidornan dje palabra, i no tendedornan so, gañando boso mes cu razonamentu falsu.” “Bira hacidornan dje palabra”! E tema aki siguramente ta ser resaltá den Santiago su carta. Nos mester scucha, anto haci “precisamente asina”! (Génesis 6:22) Awe hopi hende ta pretendé cu ta suficiente pa tende un sermon of participá den algun forma di adoracion ceremonial de bes en cuando, pero nan ta keda te ei. Nan por pensa cu tanten nan ta hiba un ‘bon bida’ segun nan normanan, esei lo ta basta. Sin embargo Jesucristo a declará: “Si un hende kier bini tras di mi, lagu’e nenga su mes i tuma su staca di tormento i siguí mi continuamente.” (Mateo 16:24) Accion di sacrificio propio i awante den sigui Jesus su patronchi di haci e boluntad di Dios ta ser rekerí claramente di cristiannan berdadero. Pa nan, Dios su boluntad awe ta mescos cu e tabata den e promé siglo ora Jesus resucitá a manda: “Bai, pues, i haci disipel di hende di tur nacion.” (Mateo 28:19) Con ta bayendo cu bo den esaki?

15. (a) Ki ilustracion Santiago ta duna, mustrando con nos por bira felis como “hacidornan dje palabra”? (b) Pakico un mero adoracion di formalidad no ta suficiente?

¹⁵ Si nos sigui loer den e Palabra di Dios, e por ta manera un spiel cu ta reflehá pa nos exactamente ki clase di persona nos ta. Santiago ta bisa: “Esun cu ta loer den e ley perfecto cu ta pertenecé na libertad i cu ta persistí den dje, e hende aki, dor cu el a bira, no un tendedor lubidador, sino un hacidor dje obra, lo ta felis den su hacimentu di esei.” (Santiago 1:23-25) Sí, lo e ta un ‘hacidor felis dje palabra.’ Ademas, ta importante pa ta un “hacidor” den tur detaye di nos bida cristian. Nos nunca mester gaña nos mes pensando cu un mero adoracion di formalidad ta suficiente. Santiago ta consehá nos pa observá algun aspecto di adoracion berdadero cu asta cristiannan celoso por a neglishá. E ta skirbi: “E forma di adoracion cu ta limpi i incontaminá for dje punto di bista di nos Dios i Tata ta esaki: cuida huérfanonan i biudanan den nan tribulacion, i mantené bo mes sin mancha dje mundu.”—Santiago 1:27.

16. Den ki maneranan Abraham a bira “amigu di Jehova,” i con nos por gana Su amistad?

¹⁶ No ta suficiente pa djis bisa, ‘Mi ta kere den Dios,’ i laga cosnan te ei. Manera Santiago 2:19 ta señalá: “Bo ta kere cu tin un solo Dios, no ta berdad? Bo ta haci bastante bon. I tog e demoñonan ta kere i ta tembla.” Santiago ta enfatisá cu “fe, si e no tin obra, ta morto riba su mes,” i ta referí na Abraham, bisando: “Su fe a obra huntu cu su obranan i mediante su obranan su fe a ser perfeccioná.” (Santiago 2:17, 20-22) Abraham su obranan a incluí duna yudansa na su parientenan, mustra hospitalidad, haci preparacion pa sacrificá Isaac, i ‘declará públicamente’ un fe insagudibel den Dios su promesa di “e stad cu tin berdadero fundeshi,” e futuro Reino Mesiánico. (Génesis 14:16; 18:1-5; 22:1-18; Hebreonan 11:8-10, 13, 14; 13:2) Apropiadamente, Abraham “a yega di ser yamá ‘amigu di Jehova.’ ” (Santiago 2:23) Nos tambe por ser contá como “amigu di Jehova” segun cu nos ta proclamá activamente nos fe i speransa den su binidero Reino di husticia.

17. (a) Pakico Rahab a ser “declará hustu,” i con el a ser recompensá? (b) Ki lista largu Bijbel ta duna di esnan cu a “bira hacidornan dje palabra”? (c) Con Job a ser recompensá, i pakico?

¹⁷ Esnan cu ta “bira hacidornan dje palabra” en berdad ta ser “declará hustu mediante obra, i no mediante fe so.” (Santiago 2:24) Rahab tabata unu cu a agregá obranan na su fe den e “palabra” cu el a tende relacioná cu Jehova su obranan poderoso. El a sconde e spionnan israelita i a yuda nan scapa, i despues el a reuní e famia di su tata pa ser preservá na bida. Den e resureccion, cuantu lo e alegrá ora e haña sa cu su fe, compañá cu obra, a pone cu el a bira un antepasado di Mesías! (Hosué 2:11; 6:25; Mateo 1:5) Hebreonan capítulo 11 ta duna un lista largu di otronan cu ‘a bira hacidornan’ demostrando nan fe, i nan lo ser recompensá ricamente. Tampoco nos mester lubidá Job, kende bou di prueba severo a bisa: “Laga e nomber di Jehova sigui ser bendicioná.” Manera nos a mencioná caba, su fe i su obranan a resultá den un gran recompensa. (Job 1:21; 31:6; 42:10; Santiago 5:11) Di igual manera, nos awante awe como “hacidornan dje palabra” lo trece Jehova su sonrisa di aprobacion.

18, 19. Con rumannan oprimí pa hopi tempu a “bira hacidornan dje palabra,” i ki bendicion nan actividad a trece?

¹⁸ Entre esnan cu a wanta hopi durante añanan ta nos rumannan na Oost Europa. Awor cu hopi restriccion a ser kitá, esakinan berdaderamente a “bira hacidornan dje palabra” den nan ambiente nobo. Misioneronan i pioneronan for di paisnan bisiña a muda bai aya pa yuda den siñamentu i organisacion. E sucursal di Finlandia i otro sucursalnan dje Sociedad Watch Tower den cercania a manda expertonan den construccion, i e generoso hermandad mundial a financiá e construccion di oficinanan di sucursal i Salonnan di Reino nobo.—Compará cu 2 Corintionan 8:14, 15.

¹⁹ Ki celosamente e rumannan aki oprimí pa hopi tempu a respondé den veld! Nan ‘ta trahando duru i ta haciendo esfuerso’ pa compensá, na moda di papia, p’e oportunidadnan cu no tabata disponibel durante e “tempu difícil.” (1 Timoteo 4:10; 2 Timoteo 4:2) Por ehempel, april dje aña aki na Albania, unda e represion tabata masha cruel, henter e suministro dje Noticia di Reino titulá “Pakico Bida Tin Asina Tantu Problema” a ser distribuí den apénas tres dia. Esaki tabata un actividad espléndido cu a sigui despues dje Memorial di Jesus su morto, na cua 3.491 persona a asistí—hopi mas cu nan 538 publicadornan activo.

20. Kico e asistencia recien na Memorial ta indicá, i con hopi hende por ser yudá?

²⁰ Otro paisnan tambe a duna un contribucion significativo n’e asistencia di Memorial, cua a aumentá den añanan recien na hopi mas cu 10.000.000. Den hopi lugá esnan nobo, despues cu nan fe a ser fortalecí dor di asistí n’e Memorial i celebr’é, ta ‘birando hacidornan dje palabra.’ Nos por animá mas compañeronan nobo pa cualificá p’e privilegio ei?

21. Na armonia cu nos texto di aña, ki curso nos mester sigui, i cu ki meta?

²¹ Mescos cu e cristiannan celoso aya den e promé siglo, i e hopinan desde e tempu ei padilanti, laga nos ser determiná pa haci esfuerso pa “sigui den direccion dje meta” di bida eterno, sea cu esei lo ta den e Reino celestial of den su region terenal. (Filipensenan 3:12-14) Tur nos esfuerso pa alcansá e meta ei ta bale la pena. Esaki no ta tempu pa cai bek den e condicion di ser tendedor so, sino e tempu di tur tempu pa ‘ser fuerte i traha.’ (Ageo 2:4; Hebreonan 6:11, 12) Despues di a ‘aceptá e implantacion dje palabra,’ laga nos ‘bira hacidornan gososo dje palabra’ awor i den e binidero eternidad.

Con Lo Bo Contestá?

◻ Con nos por demostrá awante cu goso?

◻ Kico ta “e sabiduria di ariba,” i con nos por sigui tras di dje?

◻ Pakico nos mester “bira hacidornan dje palabra, i no tendedornan so”?

◻ Ki informenan mester stimulá nos pa ta “hacidornan dje palabra”?

[Plachi na página 17]

Laga nos tambe habri nos curason pa siñansa divino

[Plachi na página 18]

Job su integridad a ser recompensá dor cu el a ser restorá na un bida completo i felis huntu cu personanan stimá