Fe Ta Siña Nos Mustra Pacenshi i Haci Oracion
“Ehercé pacenshi; haci boso curason firme, pasobra e presencia di Señor a yega cerca.”—SANTIAGO 5:8.
1. Pakico nos tin cu meditá riba Santiago 5:7, 8?
JESUCRISTO su “presencia” tan sperá ta un echo awor. (Mateo 24:3-14) Mas cu nunca promé, tur hende cu ta profesá di tin fe den Dios i Cristo tin motibu pa meditá riba e palabranan aki di disipel Santiago: “Ehercé pacenshi, . . . rumannan, te n’e presencia di Señor. Mira! E cunukero ta sigui spera e fruta precioso dje tera, eherciendo pacenshi riba dje te ora e haña e yobida trempan i e yobida lat. Boso tambe ehercé pacenshi; haci boso curason firme, pasobra e presencia di Señor a yega cerca.”—Santiago 5:7, 8.
2. Kico tabata algun dje problemanan cu esnan cu Santiago a skirbi, a enfrentá?
2 Esnan na ken Santiago a skirbi su carta inspirá tabatin cu ehercé pacenshi i resolvé vários problema. Hopi tabata actua contrario na loke tabata sperá di esnan cu a profesá di tin fe den Dios. Por ehempel, mester a haci algu tocante cierto deseonan cu a desaroyá den algun curason. Mester a restorá trankilidad entre e promé cristiannan ei. Tambe nan a rekerí conseho riba mustra pacenshi i haci oracion. Segun cu nos ta considerá loke Santiago a bisa nan, laga nos mira con nos por aplicá su palabranan den nos bida.
Deseonan Incorecto Ta Destructivo
3. Kico tabata e causanan di conflicto den congregacion, i kico nos por siña for di esaki?
3 Entre algun cu a profesá di ta cristian no tabatin pas, i deseonan incorecto tabata e causa básico dje situacion aki. (Santiago 4:1-3) Friccionnan tabata causa trastorno, i cu falta di amor algun tabata husga nan rumannan. Esaki tabata sosodé pa motibu cu deseonan pa placer sensual tabata hiba un conflicto den nan miembronan di curpa. Kisas nos mes tin cu pidi yudansa den oracion pa resistí deseonan carnal pa prestigio, poder i posesionnan pa nos no haci nada cu por trastorná e pas dje congregacion. (Romanonan 7:21-25; 1 Pedro 2:11) Algun cristian di promé siglo a bira cudicioso, asina tantu cu el a bira un spiritu asesino yen di odio. Siendo cu Dios no a cumpli cu nan deseonan robes, nan a sigui lucha den un esfuerso pa alcansá nan metanan. Si nos tin e tipo di deseonan robes ei, nos por pidi pero lo no ricibí, ya cu nos Dios santu no ta contestá oracionnan asina.—Lamentacionnan 3:44; 3 Juan 9, 10.
4. Pakico Santiago ta yama algun cristian “adúlteronan,” i ki efecto e declaracion ei mester tin riba nos?
4 Amor pa cosnan di mundu, envidia i orguyo a existí entre cierto cristiannan di promé. (Santiago 4:4-6) Santiago ta yama algun “adúlteronan” pasobra nan tabata amigu di mundu i culpabel e ora ei di adulterio spiritual. (Ezekiel 16:15-19, 25-45) Sigur, nos no kier bira mundano den actitud, abla i accion, pasobra esei lo haci nos enemigu di Dios. Su Palabra ta mustra nos cu “un tendencia pa cu envidia” ta parti dje mal inclinacion, of “spiritu,” den hende pecaminoso. (Génesis 8:21; Númeronan 16:1-3; Salmo 106:16, 17; Eclesiástes 4:4) Pues si nos realisá cu nos tin cu lucha contra envidia, orguyo of algun otro mal inclinacion, laga nos busca e yudansa di Dios mediante spiritu santu. E forsa ei, cu Dios ta suministrá mediante su bondad inmerecí, ta mas grandi cu “un tendencia pa cu envidia.” I miéntras Jehova ta oponé esnan orguyoso, lo e duna nos bondad inmerecí si nos lucha contra tendencianan pecaminoso.
5. Pa disfrutá dje bondad inmerecí di Dios, ki rekisitonan nos tin cu cumpli cuné?
5 Con nos por ricibí bondad inmerecí di Dios? (Santiago 4:7-10) Pa disfrutá di bondad inmerecí for di Jehova, nos mester obedec’é, aceptá su percuracionnan i someté nos na loke sea e kier. (Romanonan 8:28) Tambe nos tin cu “oponé,” of ‘para contra,’ e Diabel. Lo e ‘hui for di nos’ si nos permanecé firme como apoyadónan di Jehova su soberania universal. Nos tin e yudansa di Jesus, kende ta restringí e agencianan malbado dje mundu di manera cu nan no por haci nos daño permanente. I no lubidá esaki nunca: Mediante oracion, obedencia i fe, nos ta hala cerca Dios, i e ta resultá di ta cerca nos.—2 Crónicanan 15:2.
6. Pakico Santiago ta yama algun cristian “pecadónan”?
6 Pakico Santiago ta aplicá e término “pecadónan” na algun persona cu a profesá di tin fe den Dios? Pasobra nan tabata culpabel di “gueranan” i odio asesino—actitudnan inaceptabel pa cristiannan. (Tito 3:3) Nan “mannan,” yená cu mal echonan, a rekerí un purificacion. Tambe nan tabatin cu purificá nan “curason,” e asiento di motivacion. (Mateo 15:18, 19) Esnan “indeciso” a vacilá entre amistad cu Dios i amistad cu mundu. Spiertá dor di nan mal ehempel, laga nos vigilá incesantemente pa e cosnan ei no naufragá nos fe.—Romanonan 7:18-20.
7. Pakico Santiago ta bisa algun hende pa “lamentá i yora”?
7 Santiago ta bisa su lectornan pa “entregá na angustia i lamentá i yora.” Si nan a manifestá tristesa piadoso, esei lo tabata evidencia di repentimentu. (2 Corintionan 7:10, 11) Awe, algun persona cu ta bisa cu nan tin fe ta buscando amistad cu e mundu. Si cualkier di nos ta siguiendo un curso asina, nos no mester lamentá nos estado spiritual débil i tuma pasonan inmediato pa corigí asuntunan? Dor di haci ahustenan necesario i ricibí e pordon di Dios nos lo haña un sintimentu di húbilo pa motibu di un concenshi limpi i e prospecto gososo di bida eterno.—Salmo 51:10-17; 1 Juan 2:15-17.
No Husga Otro
8, 9. Pakico nos no mester papia contra otro ni husga otro?
8 Papia contra un compañero creyente ta un picá. (Santiago 4:11, 12) Sin embargo, algun ta gusta criticá compañeronan cristian, tal bes dor cu nan ta hustu den nan mes bista of debí cu nan kier halsa nan mes dor di rebahá otronan. (Salmo 50:20; Proverbionan 3:29) E término griego traducí como ‘papia contra’ ta denotá hostilidad i ta implicá haci un acusacion exagerá of falsu. Esaki ta nificá husga un ruman desfaborablemente. Con e accion aki ta ekivalente na ‘papia contra i husga e ley di Dios’? Wel, e escriba i fariseonan ‘ábilmente a hala un banda e mandamentu di Dios’ i a husga otronan segun nan mes normanan. (Marco 7:1-13) Di igual manera, si nos condená un ruman cu Jehova lo no condená, nos lo no ta ‘husgando e ley di Dios’ i peca dor di insinuá cu e ley di Dios no ta bon? I dor di criticá nos ruman inhustamente, nos lo no ta cumpliendo cu e ley di amor.—Romanonan 13:8-10.
9 Laga nos corda esaki: “Un tin cu ta legislador i hues”—Jehova. Su ‘ley ta perfecto,’ no deficiente. (Salmo 19:7; Isaías 33:22) Dios so tin e derecho pa establecé norma i reglanan pa salbacion. (Lucas 12:5) P’esei Santiago ta puntra: “Ken bo ta pa husga bo próhimo?” No ta nos prerogativa pa husga i condená otronan. (Mateo 7:1-5; Romanonan 14:4, 10) Ora nos ta meditá riba Dios su soberania i imparcialidad i nos mes condicion pecaminoso, esei mester yuda nos abstené di husga otro i ser hustu den nos mes bista.
Evitá di Broma i Confia den Bo Mes
10. Pakico nos mester tuma Jehova na consideracion den nos bida diario?
10 Semper nos mester tuma Jehova i su ley na consideracion. (Santiago 4:13-17) Pasando por haltu di Dios, e persona cu ta confia den su mes ta bisa: ‘Awe of mañan nos lo bai na un stad, pasa un aña ei, haci negoshi i haci ganashi.’ Si nos ‘montoná tesoro pa nos mes pero no ta ricu pa cu Dios,’ nos bida por terminá mañan i kisas sin cu nos a haña oportunidad pa sirbi Jehova. (Lucas 12:16-21) Manera Santiago ta bisa, nos ta manera un neblina di mainta cu ta “aparecé pa un poco tempu i despues ta disparcé.” (1 Crónicanan 29:15) Solamente dor di ehercé fe den Jehova nos por spera goso duradero i bida eterno.
11. Kico kier men bisa: “Si Jehova kier”?
11 En bes di ignorá Dios gabando nos mes, nos mester tuma e posicion aki: “Si Jehova kier, nos lo biba i tambe haci esaki of esaya.” Bisando “Si Jehova kier” ta indicá cu nos ta purba actua na armonia cu su boluntad. Kisas ta necesario pa haci negoshi pa sostené nos famia, pa biaha den e obra di Reino i cosnan por estilo. Pero laga nos no broma. “E gloriamentu ei ta malu” pasobra e ta pone dependencia riba Dios un banda.—Salmo 37:5; Proverbionan 21:4; Jeremías 9:23, 24.
12. Kico e palabranan di Santiago 4:17 ta nificá?
12 Aparentemente pa concluí su declaracionnan tocante confiansa propio i bromamentu, Santiago ta bisa: “Si un hende sa con pa haci loke ta corecto i tog no ta hacié, esei ta un picá p’e.” Tur cristian mester reconocé humildemente cu e ta dependé riba Dios. Si e no haci esei, “esei ta un picá p’e.” Naturalmente, e mésun principio ta aplicá ora nos keda sin haci loke fe den Dios ta rekerí di nos.—Lucas 12:47, 48.
Spiertamentu Tocante e Ricunan
13. Kico Santiago ta bisa tocante esnan cu ta malusá nan rikesanan?
13 Dor cu algun cristian di promé a bira materialista of tabata admirá e ricunan, Santiago ta haci declaracionnan fuerte relacioná cu cierto hendenan ricu. (Santiago 5:1-6) Hendenan mundano cu ta usa nan rikesa incorectamente lo ‘yora, lamentando riba e angustianan cu ta bini riba nan’ ora Dios duna nan loke nan merecé di acuerdo cu nan obranan. Den e tempu ei, e rikesa di hopi hende tabata consistí principalmente di cosnan manera paña, grano i biña. (Joël 2:19; Mateo 11:8) Algun dje posesionnan aki por putri of ‘frusa,’ pero Santiago ta enfatisando e echo cu rikesa no tin balor, no cu e ta caba un dia. Aunke oro i plata no ta frusa, si nos montoná nan, nan lo perde tur balor mescos cu cosnan cu a frusa. “Frus” ta indicá cu rikesanan material no a ser usá den un bon manera. P’esei, nos tur mester corda cu “algu manera candela” ta loke esnan cu ta confia den nan posesionnan material “a montoná den e último dianan” ora e rabia di Dios bini riba nan. Siendo cu nos ta bibando den “e tempu di fin,” e palabranan ei tin nificacion special pa nos.—Daniel 12:4; Romanonan 2:5.
14. Con e ricunan ta actua hopi biaha, i kico nos mester haci tocante esei?
14 Hopi biaha e ricunan ta horta esnan cu ta traha den cosecha pa nan, kende nan salarionan retené ta ‘sclama’ pa castigu. (Compará cu Génesis 4:9, 10.) Hendenan ricu di mundu “a biba den luho.” Entregando nan mes na placer sensual, nan ta desaroyá un curason halsá i ireceptivo i lo ta haciendo esaki ainda riba e “dia” fihá pa nan matansa. Nan ta ‘condená i mata e hustu.’ Santiago ta puntra: “E [ricu] no ta oponé bo?” Pero un otro traduccion ta, “e hustu; e no ta oponé bo.” Sea cual sea e caso, nos no mester ta parcial pa cu e ricunan. Nos mester mantené interesnan spiritual na promé lugá den nos bida.—Mateo 6:25-33.
Fe Ta Yuda Nos Ehercé Pacenshi
15, 16. Pakico ta asina importante pa ehercé pacenshi?
15 Despues di comentá riba e ricunan opresivo dje mundu, Santiago ta animá cristiannan oprimí pa ehercé pacenshi. (Santiago 5:7, 8) Si creyentenan lucha cu nan dificultadnan cu pacenshi, nan lo ser recompensá pa nan fieldad durante e presencia di Cristo, ora huicio bini riba nan opresornan. (Mateo 24:37-41) E cristiannan ei di promé mester tabata manera e cunukero cu ta spera cu pacenshi riba e yobida trempan di otoño, ora e por planta, i e yobida lat di primavera cu ta pone e cultivo producí. (Joël 2:23) Nos tambe tin cu ehercé pacenshi i haci nos curason firme, specialmente ya cu “e presencia di Señor” Jesucristo ta aki!
16 Pakico nos mester tin pacenshi? (Santiago 5:9-12) Pacenshi ta yuda nos pa no keha of suspirá ora compañeronan creyente ta iritá nos. Si nos “suspirá contra otro” cu un mal spiritu, e Hues Jesucristo lo condená nos. (Juan 5:22) Awor cu su “presencia” a cuminsá i e ta “pará dilanti porta,” laga nos promové pas dor di mustra pacenshi cu nos rumannan, cu ta enfrentá hopi prueba di fe. Nos propio fe ta ser fortalecé ora nos corda cu Dios a recompensá Job pasobra el a wanta su pruebanan cu pacenshi. (Job 42:10-17) Si nos ehercé fe i pacenshi, nos lo mira cu “Jehova ta masha tierno den cariño i misericordioso.”—Mikéas 7:18, 19.
17. Pakico Santiago ta bisa, “stop di hura”?
17 Si nos no tin pacenshi, nos lo por malusá e lenga ora nos ta bou di stres. Por ehempel, nos lo por haci huramentunan muchu lihé. “Stop di hura,” Santiago ta bisa, spiertando contra huramentu imprudente. Loke ta parce hipocresia tambe ta pa constantemente confirmá cada declaracion cu un huramentu. P’esei, nos mester simplemente papia e berdad, i laga nos sí ta sí, i nos no, no. (Mateo 5:33-37) Naturalmente, Santiago no ta bisando cu ta malu pa hura den corte.
Fe i Nos Oracionnan
18. Bou di ki circunstancianan nos mester “ocupá nos cu oracion” i “canta salmo”?
18 Si nos kier controlá nos abla, ehercé pacenshi i mantené un fe saludabel den Dios, oracion mester hunga un papel principal den nos bida. (Santiago 5:13-20) Specialmente ora nos ta bou di prueba nos mester “ocupá nos cu oracion.” Si nos ta alegre, laga nos “canta salmo,” manera Jesus i su apostelnan a haci ora el a instituí e Memorial di su morto. (Marco 14:26, nota) Tin biaha, nos por ser yená cu asina tantu gratitud na Dios cu nos ta canta alabansa asta den nos curason. (1 Corintionan 14:15; Efesionan 5:19) I ta ki un goso pa alabá Jehova den cantica na reunionnan cristian!
19. Kico nos mester haci si nos bira spiritualmente enfermo, i pakico dal un paso asina?
19 Nos lo no tin gana di canta ora nos ta spiritualmente enfermo, tal bes debí na mal conducta of pa motibu cu nos a neglishá di alimentá nos mes cu regularidad for dje mesa di Jehova. Si nos ta den e estado ei, humildemente laga nos yama e ancianonan pa nan por ‘haci oracion pa nos.’ (Proverbionan 15:29) Tambe nan lo ‘hunta nos cu zeta den e nomber di Jehova.’ Manera zeta calmante riba un herida, nan palabranan di consuelo i conseho bíblico lo yuda aliviá depresion, duda i temor. ‘E oracion di fe lo sana nos’ si nos propio fe respaldá esei. Si e ancianonan haña cu nos enfermedad spiritual a ser causá pa un picá serio, nan lo bisa nos bondadosamente kico nos picá ta i trata na yuda nos. (Salmo 141:5) I si nos ta repentí, nos por tin fe cu Dios lo tende nan oracion i pordoná nos.
20. Pakico nos mester confesá nos picánan i haci oracion un pa otro?
20 ‘Confesando nos picánan abiertamente un na otro’ mester sirbi pa impedí nos di sigui peca. E mester animá compasion mutuo, un cualidad cu lo move nos pa “haci oracion un pa otro.” Nos por tin fe cu esaki lo ta beneficioso pasobra oracion di ‘un hende hustu’—un cu ta ehercé fe i cu Dios ta considerá recto—ta logra hopi cerca Jehova. (1 Pedro 3:12) Profeta Elías tabatin mésun debilidadnan cu nos, pero Dios a scucha su oracionnan. Elías a haci oracion i awa a keda sin yobe pa tres aña i mei. Ora el a haci oracion atrobe, awa a yobe.—1 Reynan 17:1; 18:1, 42-45; Lucas 4:25.
21. Kico nos lo ta capas pa haci si un compañero cristian ser “desviá for dje berdad”?
21 Kico si un miembro dje congregacion ser “desviá for dje berdad,” hibá for dje siñansa i conducta corecto? Nos lo por ta capas pa bir’é bek for di su eror mediante conseho di Bijbel, oracion i otro yudansa. Si nos logra, esaki ta ten’é bou dje rescate di Cristo i ta salb’é for di morto spiritual i condenacion na destruccion. Dor di yuda esun cu a faya, nos ta cubri un multitud di su picánan. Ora e pecadó reprendé bira bek for di su curso robes, repentí i busca pordon, nos lo alegrá cu nos a traha pa logra cubri su picánan.—Salmo 32:1, 2; Hudas 22, 23.
Algu pa Cada un di Nos
22, 23. Ki efecto e palabranan di Santiago mester tin riba nos?
22 Ta claro cu e carta di Santiago ta contené algu beneficioso pa nos tur. E ta mustra nos con pa enfrentá prueba, ta consehá nos pa no mustra faboritismo i ta urgi nos pa participá den obranan recto. Santiago ta urgi nos pa controlá e lenga, pa resistí influencia mundano i pa promové pas. Tambe su palabranan mester siña nos pa mustra pacenshi i haci oracion.
23 Ta cierto cu e carta di Santiago originalmente a ser mandá p’e cristiannan ungí di promé. Sin embargo, nos tur mester laga su conseho yuda nos pega na nos fe. Santiago su palabranan por incitá un fe cu ta motivá nos pa tuma accion dicididu den sirbishi di Dios. I e carta aki inspirá dor di Dios ta edificá un fe duradero cu ta siña nos mustra pacenshi i haci oracion como Testigonan di Jehova awe, durante “e presencia di Señor” Jesucristo.
Con Lo Bo Contestá?
◻ Pakico algun cristian di promé tabatin cu cambia nan actitud i conducta?
◻ Ki spiertamentu Santiago ta duna e ricunan?
◻ Pakico nos mester ehercé pacenshi?
◻ Pakico nos mester haci oracion regularmente?
[Rekonosementu pa Potrèt na página 19]
Pictorial Archive (Near Eastern History) Est.
[Plachi na página 23]
Algun cristian di promé mester tabatin mas pacenshi cu compañeronan creyente
[Plachi na página 24]
Cristiannan mester tin pacenshi, ser amoroso i haci oracion