No Bira Tendedó Lubidadó

“Bira hacidónan dje palabra, i no tendedónan so, gañando boso mes cu razonamentu falsu.”—SANTIAGO 1:22.

 1. E pueblo di antiguo Israel tabatin e privilegio di presenciá ki milagernan?

“INOLVIDABEL” lo ta un bon palabra pa describí e milagernan cu Jehova a haci den antiguo Egipto. Cada un dje Dies Plaganan tabata indiscutiblemente impresionante. Despues dje golpinan ei a sigui e liberacion asombroso dje pueblo di Israel crusando dor dje laman Corá cu a parti na dos. (Deuteronomio 34:10-12) Si bo tabata testigo ocular dje sucesonan ei, ta di spera cu nunca lo bo a lubidá Esun responsabel pa nan. Sin embargo, e salmista a canta: “Nan [e israelitanan] a lubidá Dios nan Salbador, Esun cu a haci cosnan grandi den Egipto, obranan maraviyoso den e tera di Cam, cosnan inspirador di temor na laman Corá.”—Salmo 106:21, 22.

 2. Kico ta mustra cu Israel su aprecio pa Dios su obranan poderoso a dura masha corticu?

² Despues di a crusa laman Corá, e israelitanan “a cuminsá teme Jehova i pone fe den Jehova.” (Éxodo 14:31) E hombernan di Israel a djoin Moises den un cantica di victoria na Jehova, i Miriam i otro hende muher a reaccioná cu tocamentu di tamborin i baile. (Éxodo 15:1, 20) Sí, e pueblo di Dios tabata impresioná cu e obranan poderoso di Jehova. Pero nan aprecio pa Esun cu a haci e obranan ei a dura masha corticu. Djis despues hopi di nan a comportá nan mes como si fuera nan a sufri un tremendo pérdida di memoria. Nan a murmurá i keha contra Jehova. Algun a participá den idolatria i inmoralidad sexual.—Númeronan 14:27; 25:1-9.

Kico Lo Por Pone Nos Lubidá?

 3. Kico nos lo por lubidá debí na nos naturalesa imperfecto?

³ Israel su falta di aprecio ta realmente sorprendente. Pero tog, mescos por pasa cu nos. Ta cierto cu nos no a presenciá tal milagernan divino. Sin embargo, den nos relacion cu Dios mester tabatin ocasionnan cu tabata inolvidabel. Tin di nos kisas ta corda ora nos a aceptá e berdad di Bijbel. Podisé otro ocasionnan gososo tabata nos oracion di dedicacion na Jehova i nos bautismo bou di awa como cristian berdadero. Hopi di nos a experenciá con Jehova su man a yuda nos na otro etapanan den nos bida. (Salmo 118:15) Riba tur cos, mediante e morto di Dios su propio Yu Jesucristo como sacrificio, nos a ricibí e speransa di salbacion. (Juan 3:16) No obstante, debí na nos naturalesa imperfecto, ora nos ta confrontá mal deseo i ansiedad di bida, nos por lubidá masha lihé e bon cosnan cu Jehova a haci pa nos.

 4, 5. (a) Con Santiago ta spierta contra e peliger di ta tendedó lubidá? (b) Con nos por aplicá Santiago su ilustracion dje homber i e spiel?

⁴ Den su carta na compañeronan cristian, Santiago mitar ruman di Jesus a spierta contra e peliger di ta tendedó lubidadó. El a skirbi: “Bira hacidónan dje palabra, i no tendedónan so, gañando boso mes cu razonamentu falsu. Pasobra si un hende ta un tendedó dje palabra, i no un hacidó, esaki ta manera un hende cu ta mira su cara natural den un spiel. Pasobra e ta mira su mes, i e ta bai i inmediatamente e ta lubidá ki clase di hende e ta.” (Santiago 1:22-24) Kico Santiago tabata kier men cu e palabranan ei?

⁵ Mainta ora nos lanta, generalmente nos ta wak den spiel pa mira kico nos mester drecha na nos aparencia. Segun cu nos ta haci vários actividad i e mente ta enfocá riba otro cosnan, nos ta stop di pensa riba loke nos a mira den spiel. Esaki por sosodé den un sentido spiritual tambe. Segun cu nos ta wak den e Palabra di Dios, nos por compará loke nos ta cu loke Jehova ta verwagt pa nos ta. Pues, nos ta haña nos cara-cara cu nos debilidadnan. E conocimentu aki mester motivá nos pa haci ahuste den nos personalidad. Pero segun cu nos ta cumpli cu nos actividadnan diario i ta lucha cu nos problemanan, fácilmente nos por stop di pensa riba cosnan spiritual. (Mateo 5:3; Lucas 21:34) Ta como si fuera nos ta lubidá Dios su obranan di amor na nos fabor. Si esaki mester sosodé, nos por cai fácil pa inclinacionnan pecaminoso.

 6. Cua consideracion bíblico por yuda nos pa no lubidá e palabra di Jehova?

⁶ Den su promé carta inspirá na e corintionan, apostel Pablo ta referí na e israelitanan lubidadó den desierto. Mescos cu e cristiannan di promé siglo a beneficiá di Pablo su palabranan, nos tambe por ser yudá pa no lubidá e palabra di Jehova dor di repasá loke el a skirbi. P’esei laga nos considerá 1 Corintionan 10:1-12.

Rechasá Deseonan Mundano

 7. E israelitanan a ricibí ki evidencia indiscutibel cu Jehova stima nan?

⁷ Loke Pablo ta bisa tocante e israelitanan ta sirbi como un advertencia pa cristiannan. En parte, Pablo ta skirbi: “Mi no kier pa boso ta ignorante, rumannan, di cu tur nos antepasadonan tabata bou di nubia i tur a pasa dor di laman i tur tabata bautisá den Moises pa medio dje nubia i dje laman.” (1 Corintionan 10:1-4) Den tempu di Moises e pueblo di Israel a mira gran despliegue di Dios su poder, incluso Dios su pilar di nubia milagroso cu a guia nan den dia i cu a yuda nan scapa crusando dor di laman Corá. (Éxodo 13:21; 14:21, 22) Sí, e israelitanan ei a ricibí evidencia indiscutibel cu Jehova stima nan.

 8. Kico tabata e consecuencia di Israel su lubidamentu spiritual?

⁸ Pablo ta sigui bisa: “No obstante, Dios no a expresá su aprobacion riba mayoria di nan, pasobra nan a keda bentá abou den e desierto.” (1 Corintionan 10:5) Esta tristu! Mayoria dje israelitanan cu a sali for di Egipto a descualificá nan mes pa drenta e Tera Primintí. Siendo desaprobá dor di Dios pa motibu di nan falta di fe, nan a muri den desierto. (Hebreonan 3:16-19) Kico nos por siña for di esaki? Pablo ta bisa: “E cosnan aki a bira nos ehempel, pa nos no ta personanan cu ta deseá cosnan perhudicial, mescos cu nan a deseá nan.”—1 Corintionan 10:6.

 9. Con Jehova a percurá pa su pueblo, i con Israel a reaccioná?

⁹ E israelitanan tabatin hopi cos cu por a yuda nan keda spiritualmente enfocá den desierto. Nan a drenta den un pacto cu Jehova i a bira un nacion dedicá na dje. Ademas, nan a ricibí un sacerdocio, un tabernáculo como un centro di adoracion, i un areglo pa ofrecé sacrificio na Jehova. Pero en bes di alegrá cu e regalonan spiritual aki, nan a laga nan mes bira malcontentu cu Dios su percuracionnan material.—Númeronan 11:4-6.

10. Di con semper nos mester mantené Dios den nos mente?

¹⁰ Distinto dje israelitanan den desierto, e pueblo di Jehova djawe ta gosa di Dios su aprobacion. Sin embargo, como hende individual ta importante pa nos mantené Dios den nos pensamentu. Esei lo yuda nos rechasá anhelonan egoista cu lo por nubla nos vision spiritual. Nos mester ta decididu pa “rechasá maldad i deseonan mundano i biba cu sano huicio i husticia i debocion na Dios den e sistema actual di cosnan aki.” (Tito 2:12) Esnan entre nos cu for di infancia ta asociá cu e congregacion cristian no mester pensa nunca cu nos ta perdiendo algu bon. Si un dia tal pensamentu mester pasa dor di nos mente, ta bon pa e ora ei nos corda riba Jehova i e bendicionnan maraviyoso cu e tin wardá pa nos.—Hebreonan 12:2, 3.

Obedencia Total na Jehova

11, 12. Con un persona por bira culpabel di idolatria sin participá den adoracion di imágen?

¹¹ Pablo ta duna un otro palabra di cautela ora e ta skirbi: “Ni laga nos no bira idólatra, manera algun di nan; net manera ta pará skirbí: ‘E pueblo a sinta pa come i bebe, i nan a lanta pa dibertí nan mes.’” (1 Corintionan 10:7) Pablo ta refiriendo aki na e ocasion ora cu e israelitanan a persuadí Aron pa traha un bisé di oro. (Éxodo 32:1-4) Aunke ta improbabel cu nos lo acudí na adoracion directo di ídolo, nos lo por bira idólatra dor di laga nos propio deseonan egoista distraí nos di adorá Jehova di henter alma.—Colosensenan 3:5.

¹² Na un otro ocasion, Pablo a skirbi tocante algun cu tabata interesá principalmente den cosnan material mas bien cu den asuntunan spiritual. Relacioná cu esnan “cu ta anda mescos cu e enemigunan dje staca di tormento di e Cristo,” el a skirbi: “Nan fin ta destruccion, i nan dios ta nan barica.” (Filipensenan 3:18, 19) E obheto di nan idolatria no ta un imágen labrá. Tabata nan deseo pa cosnan material. Claro cu no ta tur deseo ta malu. Jehova a crea nos cu necesidadnan humano i cu e abilidad di disfrutá di vários placer. Pero esnan cu ta pone corementu tras di placer promé cu nan relacion cu Dios, en realidad ta bira idólatra.—2 Timoteo 3:1-5.

13. Kico nos por siña for dje relato dje bisé di oro?

¹³ Despues di a bandoná Egipto, e israelitanan a traha un bisé di oro pa adorá. E relato aki, fuera di spierta contra idolatria, ta contené un otro les importante. E israelitanan a desobedecé un instruccion bon cla di Jehova. (Éxodo 20:4-6) Sin embargo, nan no tabatin intencion di rechasá Jehova como nan Dios. Nan a haci sacrificio na e bisé i a yama e ocasion “un fiesta pa Jehova.” Di un manera of otro nan a gaña nan mes cu Dios lo a ignorá nan desobedencia. Esaki tabata un insulto contra Jehova, i a pon’é rabia mashá.—Éxodo 32:5, 7-10; Salmo 106:19, 20.

14, 15. (a) Di con e israelitanan no tabatin ningun excuus pa bira tendedó lubidadó? (b) Kico nos lo haci relacioná cu e mandamentunan di Jehova si nos ta decididu pa no bira tendedó lubidadó?

¹⁴ Ta algu masha excepcional cu un Testigo di Jehova lo djoin un religion falsu. Sin embargo algun ruman, maske nan ta keda den e congregacion, kisas ta rechasá Jehova su guia den otro maneranan. E pueblo di Israel no tabatin excuus pa bira tendedó lubidadó. Nan a tende e Dies Mandamentu i tabata presente ora Moises a duna nan e mandamentu di Dios: “Boso no mag traha diosnan di plata huntu cu mi, i boso no mag traha diosnan di oro pa boso mes.” (Éxodo 20:18, 19, 22, 23) Pero tog e israelitanan a adorá e bisé di oro.

¹⁵ Nos tampoco lo no tin ningun excuus válido si nos mester bira tendedó lubidadó. Den e Scritura, nos tin instruccion for di Dios relacioná cu hopi área di bida. Por ehempel, e Palabra di Jehova ta condená specíficamente e custumber di fia sin paga bek. (Salmo 37:21) Bijbel ta manda yunan obedecé nan mayornan, i ta verwagt di tatanan cu nan ta cria nan yunan den e “reglamentu mental di Jehova.” (Efesionan 6:1-4) Cristiannan soltero ta haña e instruccion pa casa “solamente den Señor,” i Bijbel ta bisa sirbidónan di Dios cu ta casá caba: “Laga matrimonio sea onorabel entre tur, i e cama di matrimonio sea sin contaminacion, pasobra Dios lo husga fornicadónan i adúlteronan.” (1 Corintionan 7:39; Hebreonan 13:4) Si nos ta decididu pa no bira tendedó lubidadó, nos lo tuma esakinan i otro instruccionnan mas for di Dios masha na serio, i lo cumpli cu nan.

16. Kico tabata e consecuencianan di adorá e bisé di oro?

¹⁶ Jehova no a aceptá e israelitanan su intento pa ador’é na nan manera. Mas bien, 3.000 a ser destruí, probablemente debí na e papel prominente cu nan a hunga den e accion rebelde di adorá e bisé di oro. Otro malechornan a sufri un plaga for di Jehova. (Éxodo 32:28, 35) Esta un les pa ken cu ta lesa e Palabra di Dios pero cu ta dicidí pa nan mes kico nan kier obedecé!

“Hui di Fornicacion”

17. Na ki suceso 1 Corintionan 10:8 tabata referí?

¹⁷ Pablo ta presentá un área den cua deseonan carnal por hiba un hende na lubidá cosnan spiritual ora e ta bisa: “Ni laga nos no practicá fornicacion, manera algun di nan a cometé fornicacion, solamente pa cai, bintitres mil di nan den un dia.” (1 Corintionan 10:8) Aki Pablo ta referí na un incidente cu a tuma lugá riba e yanura di Moab na fin di Israel su recorido di 40 aña dor dje desierto. E israelitanan a caba di ricibí Jehova su yudansa pa conkistá teranan oost di Jordan, pero hopi di nan a bira lubidadó i a demostrá falta di aprecio. Na frontera dje Tera Primintí, nan a ser tentá pa participá den inmoralidad sexual i den e adoracion impuru di Baal di Peor. Un 24.000 israelita a ser destruí, di cua 1.000 tabata cabesante.—Númeronan 25:9.

18. Ki clase di conducta por hiba na inmoralidad sexual?

¹⁸ E pueblo di Jehova djawe ta bon conocí pa nan normanan moral haltu. Pero ora algun cristian a ser tentá pa cometé inmoralidad sexual, nan a stop di pensa riba Dios i su principionan. Nan a bira tendedó lubidadó. Na promé instante e tentacion kisas no ta encerá un acto di fornicacion. Kisas e ta un inclinacion pa cuminsá wak pornografia, pa tene parti den chistenan indecente of coketeá, of mantené un amistad cerá cu personanan moralmente débil. Tur e cosnan aki a yega di hiba cristiannan na conducta pecaminoso.—1 Corintionan 15:33; Santiago 4:4.

19. Ki conseho bíblico ta yuda nos “hui di fornicacion”?

¹⁹ Si nos ta ser tentá pa participá den conducta inmoral, nos no tin cu stop di pensa riba Jehova. Mas bien, nos tin cu sigui e recordatorionan cu tin den su Palabra. (Salmo 119:1, 2) Como cristian, mayoria di nos ta haci nos sumo posibel pa keda moralmente limpi, pero haci loke ta corecto den bista di Dios ta rekerí esfuerso continuo. (1 Corintionan 9:27) Pablo a skirbi cristiannan na Roma: “Boso obedencia a hala atencion di tur. P’esei mi ta alegrá pa boso via. Pero mi kier pa boso ta sabí en cuanto loke ta bon, pero inocente en cuanto loke ta malu.” (Romanonan 16:19) Mescos cu 24.000 israelita a ser ehecutá pa nan picá, fornicadónan i otro malechornan pronto lo sinti Jehova su huicio desfaborabel. (Efesionan 5:3-6) Pues, en bes di bira tendedó lubidadó, nos tin cu sigui “hui di fornicacion.”—1 Corintionan 6:18.

Semper Apreciá e Percuracionnan di Jehova

20. Con e israelitanan a pone Jehova na prueba, i cu ki resultado?

²⁰ E gran mayoria di cristiannan nunca ta sucumbí na inmoralidad sexual. Sin embargo, nos tin cu tene cuidou pa nos no sigui un rumbo cu ta hiba na un custumber di murmurá cu lo por resultá den desaprobacion divino. Pablo ta spierta nos: “Ni laga nos no pone Jehova na prueba, manera algun di [e israelitanan] a pon’é na prueba, solamente pa perecé dor dje colebranan. No sea murmuradó tampoco, net manera algun di nan a murmurá, solamente pa perecé dor dje destructor.” (1 Corintionan 10:9, 10) E israelitanan a murmurá contra Moises i Aron—sí, asta contra Dios mes—kehando tocante e mana cu a ser percurá milagrosamente. (Númeronan 16:41; 21:5) Nan murmuramentu a ofendé Jehova ménos cu nan fornicacion? E relato bíblico ta mustra cu colebra a mata hopi dje murmuradónan. (Númeronan 21:6) Na un ocasion anterior, mas cu 14.700 murmuradó rebelde a ser destruí. (Númeronan 16:49) Pues laga nos no pone Jehova su pacenshi na prueba dor di trata su percuracionnan cu falta di respet.

21. (a) Ki apelacion urgente Pablo a ser inspirá pa skirbi? (b) Segun Santiago 1:25, con nos por ta berdaderamente felis?

²¹ Pablo, skirbiendo na compañeronan cristian, ta concluí su lista di spiertamentu cu e apelacion urgente: “Awor e cosnan aki a sigui sosodé cu nan como ehempel, i nan a ser skirbí como spiertamentu pa nos riba ken e fin dje sistema di cosnan a yega. P’esei, laga esun cu ta kere cu e ta pará tene cuidou p’e no cai.” (1 Corintionan 10:11, 12) Mescos cu e israelitanan, nos a ricibí hopi bendicion for di Jehova. Sin embargo, distinto for di nan laga nos nunca lubidá e bon cosnan cu Dios ta haci pa nos i keda sin mustra aprecio pa nan. Ora ansiedad di bida bira un carga pisá pa nos, laga nos refleccioná riba e promesanan maraviyoso cu tin den su Palabra. Laga nos corda riba nos relacion precioso cu Jehova i sigui cumpli cu e trabou di predicá e Reino cu a ser confiá na nos. (Mateo 24:14; 28:19, 20) Siguiendo e caminda ei sigur lo trece berdadero felicidad pa nos, pasobra e Scritura ta primintí: “Esun cu ta mira cuidadosamente den e ley perfecto cu ta pertenecé na libertad i cu ta persistí den dje, e hende aki, dor cu el a bira, no un tendedó lubidadó, sino un hacidó dje obra, lo ta felis haciendo esei.”—Santiago 1:25.

Con Lo Bo Contestá?

• Kico lo por pone nos bira tendedó lubidadó?

• Di con obedencia total na Dios ta esencial?

• Con nos por “hui di fornicacion”?

• Ki actitud nos mester tin pa cu e percuracionnan di Jehova?

[Plachi na página 15]

E israelitanan a lubidá e obranan poderoso cu Jehova a haci na nan fabor

[Plachi na página 16]

E pueblo di Jehova ta decididu pa mantené normanan moral haltu