Cuidou cu Maestronan Falsu!

“Tambe lo tin maestronan falsu meimei di boso.”—2 PEDRO 2:1.

 1. Di kico Hudas tabatin intencion di skirbi, i pakico el a cambia su tópico?

KI UN cos escandaloso! Maestronan falsu den e congregacion cristian di promé siglo! (Mateo 7:15; Echonan 20:29, 30) Jesus su mitar ruman Hudas tabata conciente dje desaroyo aki. El a bisa cu e tabatin intencion di skirbi compañeronan creyente “tocante e salbacion cu nos tin en comun,” pero el a splica: “Mi a haña cu ta necesario pa skirbi boso pa consehá boso pa hiba un lucha duru pa e fe.” Pakico Hudas a cambia su tópico? Pasobra, el a bisa, “cierto hendenan a drenta [den e congregacionnan] na scondí . . . cu ta cambia e bondad inmerecí di nos Dios den un excuus pa libertinahe.”—Hudas 3, 4.

 2. Pakico 2 Pedro capítulo 2 i Hudas ta asina similar?

² Aparentemente, Hudas a skirbi djis despues cu Pedro a skirbi su di dos carta. Sin duda Hudas tabata familiarisá cu e carta aki. Un cos ta sigur, el a expresá hopi pensamentu similar den su mes poderoso carta di spiertamentu. P’esei, segun cu nos ta examiná 2 Pedro capítulo 2, nos lo ripará con similar e ta cu Hudas su carta.

Consecuencianan di Siñansa Falsu

 3. Kico a sosodé den pasado cu Pedro ta bisa lo sosodé atrobe?

³ Despues cu Pedro a insta su rumannan pa presta atencion na profecia, e ta bisa: “Sin embargo, a yega di tin tambe profetanan falsu [den antiguo Israel], mescos cu tambe lo tin maestronan falsu meimei di boso.” (2 Pedro 1:14–2:1) E pueblo di Dios den antigwedad a ricibí profecia berdadero, pero tambe nan tabatin cu lucha cu e siñansanan corumpí di profetanan falsu. (Jeremías 6:13, 14; 28:1-3, 15) “Den e profetanan di Jerusalem,” Jeremías a skirbi, “mi a mira cosnan horibel, nan ta cometé adulterio i ta cana den falsedad.”—Jeremías 23:14.

 4. Pakico maestronan falsu ta merecé destruccion?

⁴ Describiendo loke maestronan falsu lo a haci den e congregacion cristian, Pedro ta bisa: “Esakinan mes lo introducí sectanan destructivo secretamente i lo nenga asta e doño [Jesucristo] cu a cumpra nan, treciendo destruccion rápido riba nan mes.” (2 Pedro 2:1; Hudas 4) E resultado final dje formacion ei di sectanan den e promé siglo ta cristiandad manera nos conoc’é awe. Pedro ta mustra pakico maestronan falsu ta merecé destruccion completo: “Hopi lo sigui nan actonan di libertinahe, i pa causa di esakinan nan lo papia ofensivamente di e caminda dje berdad.”—2 Pedro 2:2.

 5. Maestronan falsu tabata responsabel di kico?

⁵ Pensa un ratu! Pa motibu dje influencia di maestronan falsu, hopi persona den e congregacionnan lo a haña nan enbolbí den libertinahe. E palabra griego traducí como “libertinahe” ta duna idea di permisividad, falta di dominio riba emocion of pensamentu, indecencia, obsenidad, conducta sin bergwensa. Pedro a bisa anteriormente cu cristiannan “a scapa for dje corupcion cu ta den e mundu debí na mal deseo.” (2 Pedro 1:4) Pero algun tabata bayendo bek n’e corupcion ei, i maestronan falsu den e congregacion tabata pa un gran parti responsabel! Asina e caminda dje berdad lo a ser desacreditá. Ki lamentabel! Siguramente, esaki ta un asuntu na cua tur Testigo di Jehova awe mester presta sumo atencion. Nos no mester lubidá nunca cu, dependiendo di nos conducta, nos por sea alabá Jehova Dios i su pueblo of trece reproche riba nan.—Proverbionan 27:11; Romanonan 2:24.

Introduciendo Siñansa Falsu

 6. Kico ta motivá maestronan falsu, i con nan ta busca pa haña loke nan ta deseá?

⁶ Nos ta haci bon di tuma nota con maestronan falsu ta introducí nan pensamentu corumpí. Pedro ta bisa promé cu nan ta haci esei secretamente, of den un manera sutil i iriparabel. E ta agregá: “Cu cudishi nan lo probechá di boso cu palabranan falsu.” Deseo egoista ta motivá maestronan falsu, manera e traduccion den The Jerusalem Bible ta enfatisá: “Ansiosamente nan lo purba cumpra boso pa nan mes cu discursonan traicionero.” Di igual manera, James Moffatt su traduccion ta bisa aki: “Den nan mal deseo nan lo probechá di boso cu argumentonan mañoso.” (2 Pedro 2:1, 3) E expresionnan di maestronan falsu por parce razonabel pa un hende cu no ta spiritualmente alerto, pero nan palabranan ta diseñá cuidadosamente pa “cumpra” hende, seduciendo nan pa sirbi e propósitonan egoista dje gañadónan.

 7. Ki filosofia a bira popular den e promé siglo?

⁷ Sin duda, pensamentu mundano dje tempu ei a influenciá e maestronan falsu di promé siglo. Rond dje tempu cu Pedro a skirbi su carta, un filosofia yamá gnosticismo tabata birando popular. Gnósticonan a kere cu tur materia ta malbado i cu solamente loke ta pertenecé n’e spiritu ta bon. Pues, algun di nan a bisa cu no ta importá kico un hende ta haci cu su curpa físico. Nan a razoná cu hende, cu tempu, lo no tin e curpa aki. P’esei, segun nan conclusion, picánan corporal, incluyendo esnan sexual, no ta importante. Aparentemente, tal punto di bista a cuminsá influenciá algun cu a yama nan mes cristian.

 8, 9. (a) Ki razonamentu trocí a afectá algun cristian di promé? (b) Segun Hudas, kico algun hende den e congregacionnan tabata haci?

⁸ Un erudito di Bijbel a comentá cu “tabatin esnan den e Iglesia cu a troce e doctrina di gracia,” of “bondad inmerecí.” (Efesionan 1:5-7) Segun e, e razonamentu di algun tabata bai asina aki: “Bo ta bisa cu Dios su [bondad inmerecí] ta suficiente abundante pa cubri tur picá? . . . Wel laga nos sigui peca, pasobra Dios su [bondad inmerecí] por eliminá tur picá. Realmente, mas nos peca mas chens Dios su [bondad inmerecí] lo tin pa obra.” Bo a yega di tende un razonamentu mas trocí cu esei?

⁹ Apostel Pablo a contrarestá pensamentu incorecto tocante Dios su misericordia ora el a puntra: “Nos lo sigui den picá, pa bondad inmerecí abundá?” Tambe el a puntra: “Nos lo cometé picá pasobra nos no ta bou di ley sino bou di bondad inmerecí?” Riba cada pregunta Pablo a contestá enfáticamente: “Cu esei no sosodé nunca!” (Romanonan 6:1, 2, 15) Claramente, manera Hudas ta remarcá, cierto personanan tabata “cambia e bondad inmerecí di nos Dios den un excuus pa libertinahe.” Sin embargo, Pedro ta skirbi cu pa e hendenan ei ‘destruccion no ta cabishá.’—Hudas 4; 2 Pedro 2:3.

Ehempelnan Spiertador

10, 11. Ki tres ehempelnan spiertador Pedro ta duna?

¹⁰ Pa enfatisá cu Dios lo tuma accion contra esnan cu ta cometé malecho deliberadamente, Pedro ta duna tres ehempel spiertador for dje Scritura. Promé, e ta skirbi: “Dios no a tarda pa castigá e angelnan cu a peca.” Esakinan, Hudas ta bisa, “no a warda nan posicion original, sino a bandoná nan propio i debido lugá di biba” den shelu. Nan a bini na tera promé cu e Diluvio i a bisti curpanan carnal pa nan por a tene relacion sexual cu e yunan muher di hende. Como castigu pa nan conducta innatural i inapropiado, nan a ser tirá den “Tártaro,” of manera e relato di Hudas ta bisa, nan a ser “reservá cu cadenanan eterno bou di scuridad diki p’e huicio dje gran dia.”—2 Pedro 2:4; Hudas 6; Génesis 6:1-3.

¹¹ Siguientemente, Pedro ta referí n’e hendenan dje tempu di Noe. (Génesis 7:17-24) E ta bisa cu den tempu di Noe Dios “no a keda sin castigá un mundu di antigwedad . . . ora el a trece un diluvio riba un mundu di hende malbado.” Finalmente, Pedro ta skirbi cu Dios a establecé “un modelo pa personanan malbado di cosnan pa bini” dor di ‘reducí e stadnan Sódoma i Gomora na shinishi.’ Hudas ta duna e informacion adicional cu e personanan ei “a cometé fornicacion en exceso i a bai tras di carni pa uso innatural.” (2 Pedro 2:5, 6; Hudas 7) Hende homber tabatin no solamente relacion sexual ilegal cu hende muher, sino tambe deseo sexual pa curpa di otro homber, posiblemente asta pa curpa di bestia sin sintí.—Génesis 19:4, 5; Levítico 18:22-25.

12. Segun Pedro, con conducta hustu ta ser recompensá?

¹² Sin embargo, na mésun tempu, Pedro ta skirbi cu Jehova ta un recompensador di esnan cu ta sirbié fielmente. Por ehempel, e ta conta con Dios a “warda Noe, un predicadó di husticia, a salbo cu shete otronan” ora El a trece e Diluvio. Tambe e ta conta di Jehova su liberacion di “hustu Lot” den e tempu di Sódoma, concluyendo: “Jehova sa con pa libra hende di debocion piadoso for di prueba, pero pa reservá hende inhustu p’e dia di huicio pa ser cortá.”—2 Pedro 2:5, 7-9.

Actonan cu Ta Merecé Castigu

13. Ken specialmente ta reservá pa huicio, i aparentemente na ki soñonan nan ta entregá nan mes?

¹³ Pedro ta señalá esnan cu ta specialmente reservá p’e huicio di Dios, esta, “esnan cu ta sigui tras di carni cu e deseo di contamin’é i cu ta menospreciá autoridad.” Casi nos por sinti Pedro su indignacion ora e ta bisa: “Tribí, cabesura, nan no ta tembla dilanti di esnan glorioso, sino ta papia ofensivamente.” Hudas ta skirbi cu “e hombernan aki . . . , entregando nan mes na soñonan, ta contaminá e carni . . . i ta papia ofensivamente di esnan glorioso.” (2 Pedro 2:10; Hudas 8) Kisas nan soñonan ta enbolbé fantasianan sexual impuru cu ta impulsá nan pa busca gratificacion sexual inmoral. Pero, den ki sentido nan ta “menospreciá autoridad” i ta papia “ofensivamente di esnan glorioso”?

14. Den ki sentido maestronan falsu ta “menospreciá autoridad” i ta papia “ofensivamente di esnan glorioso”?

¹⁴ Nan ta haci esei dor di despreciá autoridad cu Dios a designá. Ancianonan cristian ta representá e glorioso Jehova Dios i su Yu i, como resultado, tin cierto gloria cu a ser otorgá na nan. Ta cierto cu nan ta faya, mescos cu Pedro mes, pero e Scritura ta urgi miembronan dje congregacion pa ta sumiso na e personanan glorioso ei. (Hebreonan 13:17) Nan faltanan no ta motibu pa papia ofensivamente di nan. Pedro ta bisa cu angelnan no “ta trece contra [maestronan falsu] un acusacion cu palabranan ofensivo,” aunke esei lo ta loke nan ta merecé. “Pero e hendenan aki,” Pedro ta continuá, “manera bestia sin tinu cu a nace naturalmente pa ser atrapá i destruí, den e cosnan di cua nan ta ignorante i ta papia ofensivamente, lo asta sufri destruccion.”—2 Pedro 2:10-13.

“Miéntras cu Nan Ta Banketeá . . . cu Boso”

15. Ki métodonan maestronan falsu ta usa, i unda nan ta busca nan seduccionnan?

¹⁵ Aunke e hombernan corumpí aki “ta considerá cu ta un placer pa hiba un bida di luho den dia” i “ta mancha i defecto,” nan ta mañoso tambe. Nan ta actua “secretamente,” usando “palabranan falsu,” manera Pedro a skirbi anteriormente. (2 Pedro 2:1, 3, 13) Pues tal bes nan no ta desafiá abiertamente e esfuerso dje ancianonan pa sostené e normanan moral di Dios of sigui abiertamente nan mes gratificacion sexual. Mas bien, Pedro ta bisa cu nan ta entregá nan mes “cu goso desenfrená na nan siñansanan engañoso miéntras cu nan ta banketeá huntu cu boso.” I Hudas ta skirbi: “Esakinan ta barancanan scondí bou di awa den boso banketenan di amor.” (Hudas 12) Sí, mescos cu barancanan skerpi bou di awa por sker e bom di un boto kibra, poniendo nabegantenan cu no ta alerto hoga, maestronan falsu tabata corumpiendo esnan cu no tabata alerto i a fingi hipócritamente di ta stima nan durante “banketenan di amor.”

16. (a) Kico tabata “banketenan di amor,” i den ki situacionnan comparabel hende inmoral tal bes ta operá awe? (b) Riba ken maestronan falsu ta enfocá nan atencion, pues kico hende asina tin cu haci?

¹⁶ Aparentemente e “banketenan di amor” aki tabata ocasionnan social ora cu e cristiannan di promé siglo tabata bini huntu pa disfrutá di cuminda i asociacion. Awe Testigonan di Jehova tambe tin biaha ta bini huntu pa ocasionnan social, tal bes na recepsinan di casamentu, na picnic of pa un anochi di asociacion. Con individuonan corumpí por usa eventonan asina pa seducí víctimanan? Pedro ta skirbi: “Nan tin wowo yen di adulterio . . . , i nan ta seducí almanan inconstante.” Nan ta enfocá nan “curason entrená den cudishi” riba esnan spiritualmente inconstante cu no a haci e berdad completamente di nan mes. P’esei laga loke a sosodé den tempu di Pedro sirbi como un spiertamentu, i vigilá! Resistí cualkier proposicion impuru, i no sea engañá p’e encanto of atraccion físico di un hende cu ta haci proposicionnan inmoral!—2 Pedro 2:14.

“E Caminda di Balam”

17. Kico tabata “e caminda di Balam,” i con esei a afectá 24.000 israelita?

¹⁷ E personanan “maldicioná” aki a conocé e berdad pa algun tempu. Nan por parce ainda di ta activo den e congregacion. Pero Pedro ta bisa: “Bandonando e caminda recto, nan a ser desviá. Nan a sigui e caminda di Balam, yu di Beor, cu a stima e pago pa maldad.” (2 Pedro 2:14, 15) E caminda di profeta Balam tabata di consehá un curso di seduccion inmoral pa su mes beneficio personal. El a bisa e rey moabita Balac cu Dios lo a maldicioná Israel si e pueblo por a ser tentá pa cometé fornicacion. Como resultado, muhernan moabita a seducí hopi dje pueblo di Dios, i 24.000 a ser matá pa nan conducta inmoral.—Númeronan 25:1-9; 31:15, 16; Revelacion 2:14.

18. Con persistente Balam tabata, i kico e resultado ta pronosticá pa maestronan falsu?

¹⁸ Pedro ta skirbi cu Balam a ser strobá ora su buricu a papia cuné, sin embargo Balam “a stima e pago pa maldad” asina tantu cu asta ora esei a sosodé, e no a stop cu su “proceder loco.” (2 Pedro 2:15, 16) Esta malbado! Ai di cualkier persona manera Balam cu ta purba corumpí e pueblo di Dios dor di tenta nan pa cometé inmoralidad! Balam a muri pa su maldad, un ehempel di loke lo sosodé cu tur persona cu ta sigui su caminda.—Númeronan 31:8.

Nan Seduccionnan Diabólico

19, 20. (a) Cu kico esnan cu ta manera Balam ta ser compará, i pakico? (b) Ken nan ta tenta, i pakico? (c) Pakico nos por bisa cu nan seduccionnan ta diabólico, i con nos por protehá nos mes i otronan contra nan?

¹⁹ Describiendo personanan manera Balam, Pedro ta skirbi: “Esakinan ta fonteinnan [of, posnan] sin awa, i neblina [of, nubianan] cu un tempestad violento ta hiba.” Pa un biahero cu sed di awa den un desierto, un pos secu por nificá morto. Nada straño cu “e pretu di scuridad a ser reservá” pa esnan cu ta parce cosnan asina! “Pasobra nan ta saca expresionnan halsá di ningun probecho,” Pedro ta continuá, “i mediante deseonan di carni i mediante custumbernan inmoral nan ta tenta esnan cu net ta scapando for di hende cu ta comportá nan mes den eror.” Nan ta seducí esnan inexperenciá dor di “primintí nan libertad,” Pedro ta bisa, miéntras cu “nan mes ta existí como esclabo di corupcion.”—2 Pedro 2:17-19; Galationan 5:13.

²⁰ E seduccionnan di maestronan corumpí asina ta diabólico. Nan por bisa, por ehempel: ‘Dios sa cu nos ta débil i suheto na pasion. P’esei si nos entregá nos mes i satisfacé nos deseonan sexual, Dios lo ta misericordioso. Si nos confesá nos picá, lo e pordoná nos mescos cu el a pordoná nos ora nos a caba di bini den e berdad.’ Corda cu e Diabel a usa casi e mésun método cu Eva, primintiend’e cu e por a peca sin ricibí castigu. Den e caso di Eva, el a pretendé cu picá contra Dios lo a habri su wowo i dun’é libertad. (Génesis 3:4, 5) Si nos mester topa un persona corumpí asina asociando cu e congregacion, nos tin un obligacion di protehá nos mes i tambe otronan dor di informá esnan responsabel den e congregacion cristian dje individuo ei.—Levítico 5:1.

Protehá dor di Conocimentu Exacto

21-23. (a) Kico ta e consecuencianan di keda sin aplicá conocimentu exacto? (b) Ki problema mas cu Pedro ta trata cuné lo ser considerá siguientemente?

²¹ Pedro ta concluí e seccion aki di su carta describiendo e consecuencianan di keda sin aplicá e conocimentu cu el a bisa anteriormente ta vital pa “bida i debocion piadoso.” (2 Pedro 1:2, 3, 8) E ta skirbi: “Siguramente si, despues di a scapa for di e contaminacion dje mundu mediante un conocimentu exacto dje Señor i Salbador Jesucristo, nan enbolbé nan mes atrobe den e mésun cosnan aki i ser vencí [pa nan], e condicionnan final a bira pió pa nan cu promé.” (2 Pedro 2:20) Ki lamentabel! Hende asina den tempu di Pedro a tira afó e speransa precioso di bida inmortal den shelu pa un momento pasahero di gratificacion sexual.

²² P’esei Pedro ta bisa: “Lo tabata mihó pa nan no a conocé cu exactitud e caminda di husticia, cu despues di a conoc’é cu exactitud apartá nan for dje mandamentu santu entregá na nan. A sosodé cu nan e palabra dje proverbio berdadero: ‘E cachó a bolbe na su mes sacá, i e porco cu tabata labá na loramentu den lodo.’”—2 Pedro 2:21, 22; Proverbionan 26:11.

²³ Un otro problema cu evidentemente a cuminsá afectá cristiannan di promé tabata similar na esun cu ta afectá algun awe. Evidentemente, algun den e tempu ei tabata kehando tocante e echo cu e presencia primintí di Cristo aparentemente no a yega. Laga nos examiná con Pedro ta trata e asuntu aki.

Bo Ta Corda?

◻ Ki tres ehempelnan spiertador Pedro ta cita?

◻ Con maestronan falsu “ta menospreciá autoridad”?

◻ Kico ta e caminda di Balam, i con esnan cu ta siguié por purba seducí otronan?

◻ Kico ta e consecuencianan di keda sin aplicá conocimentu exacto?

[Plachi na página 16, 17]

Balam ta sirbi como un ehempel spiertador