Tene e Dia di Jehova Masha Presente
“Den e último dianan lo bini mofadónan.”—2 PEDRO 3:3.
1. Ki sentido di urgencia un cristian di nos tempu tabatin?
UN MINISTER di tempu completo pa mas cu 66 aña a skirbi: “Semper mi tabatin un sentido profundo di urgencia. Semper Armagedon tabata, den mi pensamentu, otromañan mes. (Revelacion 16:14, 16) Mescos cu mi tata, i mi tawela, mi a hiba mi bida manera apostel [Pedro] a insta, ‘teniendo masha presente e presencia dje dia di Jehova.’ Semper mi a mira e mundu nobo primintí como un ‘realidad aunke e no ta ser contemplá.’”—2 Pedro 3:11, 12; Hebreonan 11:1; Isaías 11:6-9; Revelacion 21:3, 4.
2. Kico ta nificá tene e dia di Jehova masha presente?
2 Pedro su expresion ‘tene masha presente,’ refiriendo n’e dia di Jehova, ta nificá cu nos no ta pospon’é den nos mente. Nos no mester lubidá cu e dia ora Jehova destruí e sistema di cosnan aki como preparacion pa establecé su mundu nobo primintí ta masha cerca. E mester ta asina real pa nos cu nos ta mir’é claramente, como algu net nos dilanti. Asina real e tabata pa Dios su profetanan di antigwedad, i hopi biaha nan a papia di dje como siendo masha cerca.—Isaías 13:6; Joël 1:15; 2:1; Abdías 15; Sofonías 1:7, 14.
3. Evidentemente kico a impulsá Pedro pa duna conseho tocante e dia di Jehova?
3 Pakico Pedro a urgi nos pa mira e dia di Jehova como si fuera e ta, na moda di papia, “otromañan mes”? Pasobra evidentemente algun a cuminsá haci mofa dje idea di Cristo su presencia primintí durante cua malechornan lo ser castigá. (2 Pedro 3:3, 4) P’esei, den capítulo 3 di su di dos carta, cua nos lo considerá awor, Pedro ta contestá e acusacionnan dje mofadónan aki.
Un Apelacion Caluroso pa Nos Corda
4. Kico Pedro kier pa nos corda?
4 E echo cu Pedro ta dirigí su mes na su rumannan den e capítulo aki bes tras bes como “stimánan” ta mustra e cariño cu e tabatin pa nan. Haciendo un apelacion caluroso na nan pa no lubidá loke el a siña nan, Pedro ta cuminsá: “Stimánan, . . . mi ta stimulá boso facultad di pensa cla mediante un recordatorio, pa boso corda e dichonan papiá previamente dor dje profetanan santu i e mandamentu di e Señor i Salbador mediante boso apostelnan.”—2 Pedro 3:1, 2, 8, 14, 17; Hudas 17.
5. Kico algun profeta a bisa tocante e dia di Jehova?
5 Ki “dichonan papiá previamente dor dje profetanan santu” Pedro ta urgi lectornan pa corda? Wel, esnan tocante e presencia di Cristo den poder di Reino i tocante e huicio di hende malbado. Mas promé Pedro a hala atencion n’e palabranan aki. (2 Pedro 1:16-19; 2:3-10) Hudas ta referí na Enoc, kende tabata e promé profeta registrá cu a spierta tocante e huicio adverso di Dios riba malechornan. (Hudas 14, 15) Despues di Enoc a bini otro profetanan, i Pedro no kier pa nos lubidá loke nan a skirbi.—Isaías 66:15, 16; Sofonías 1:15-18; Zacarías 14:6-9.
6. Ki dichonan di Cristo i di su apostelnan ta iluminá nos tocante e dia di Jehova?
6 Ademas, Pedro ta bisa su lectornan corda “e mandamentu di e Señor i Salbador.” Jesus su mandamentu ta incluí e spiertamentu: “Presta atencion na boso mes pa boso curason nunca bira cargá . . . i di ripiente e dia ei ta riba boso instantáneamente manera un las.” “Sigui mira, keda lantá, pasobra boso no sa ki ora e tempu señalá ta.” (Lucas 21:34-36; Marco 13:33) Tambe Pedro ta urgi nos pa haci caso dje dichonan dje apostelnan. Apostel Pablo, por ehempel, a skirbi: “E dia di Jehova ta bini exactamente manera un ladron den anochi. Pues, anto, laga nos no drumi manera e otronan, sino laga nos keda lantá i mantené nos huicio.”—1 Tesalonicensenan 5:2, 6.
E Deseonan di Mofadónan
7, 8. (a) Ki clase di hende esnan cu ta haci mofa di Dios su mensahenan spiertador ta? (b) Kico e mofadónan ta pretendé?
7 Manera a ser mencioná anteriormente, e motibu di Pedro su spiertamentu ta cu algun a cuminsá haci cherche dje spiertamentunan ei, mescos cu israelitanan di pasado a haci bofon dje profetanan di Jehova. (2 Crónicanan 36:16) Pedro ta splica: “Pasobra boso sa esaki promé, cu den e último dianan lo bini mofadónan cu nan mofa, i lo procedé segun nan mes deseonan.” (2 Pedro 3:3) Hudas ta bisa cu e deseonan dje mofadónan aki ta “pa cosnan malbado.” E ta yama nan “hendenan bestial, cu no tin spiritualidad.”—Hudas 17-19.
8 E maestronan falsu cu Pedro a bisa “ta sigui tras di carni cu e deseo di contamin’é” probablemente ta entre e mofadónan aki cu no tin spiritualidad. (2 Pedro 2:1, 10, 14) Haciendo bofon nan ta puntra cristiannan fiel: “Unda e presencia primintí di dje aki ta? Sí, desde e dia cu nos antepasadonan a bai drumi den morto, tur cos ta siguiendo exactamente manera desde e principio di creacion.”—2 Pedro 3:4.
9. (a) Pakico mofadónan ta purba debilitá e sentido di urgencia cu henter e Palabra di Dios ta contené? (b) Di ki manera ta un proteccion pa nos tene e dia di Jehova masha presente?
9 Pakico e mofa aki? Pakico duna idea cu e presencia di Cristo lo no tuma lugá nunca, cu Dios nunca a intervení den asuntunan humano i cu lo e no haci esei nunca? Wel, dor di debilitá e sentido di urgencia cu henter e Palabra di Dios ta contené, e mofadónan bestial aki ta purba yaya otronan pa hiba nan den un estado di apatia spiritual i asina haci nan víctima fácil di seduccion egoista. Ki un animacion poderoso pa nos awe permanecé spiritualmente lantá! Laga nos tene e dia di Jehova masha presente i corda semper cu su wowonan ta riba nos! Asina nos lo ser impulsá pa sirbi Jehova cu celo i mantené nos puresa moral.—Salmo 11:4; Isaías 29:15; Ezekiel 8:12; 12:27; Sofonías 1:12.
Premeditá i Despreciabel
10. Con Pedro ta proba cu e mofadónan ta ekibocá?
10 E mofadónan ei ta ignorá un echo vital. Nan ta ignor’é deliberadamente i ta purba pone otronan lubid’é. Pakico? Pa por seducí hende mas fácilmente. “Pasobra, conforme cu nan deseo,” Pedro ta skirbi, “e echo aki ta scapa for di nan.” Cua echo? “Cu tabatin shelu desde antigwedad i un tera firmemente mantené for di awa i meimei di awa pa medio dje palabra di Dios; i dor di e medionan ei e mundu dje tempu ei a sufri destruccion ora el a ser inundá cu awa.” (2 Pedro 3:5, 6) Sí, Jehova efectivamente a eliminá e tera di maldad durante e Diluvio den tempu di Noe, un echo cu Jesus tambe a enfatisá. (Mateo 24:37-39; Lucas 17:26, 27; 2 Pedro 2:5) Pues, contrario na loke mofadónan ta bisa, tur cos no a sigui “exactamente manera desde e principio di creacion.”
11. Ki expectativanan prematuro dje cristiannan di promé a pone algun hende haci mofa di nan?
11 Kisas mofadónan a haci bofon di cristiannan fiel pasobra esakinan tabatin expectativanan cu no a ser realisá ainda. Djis promé cu Jesus a muri, su disipelnan “tabata kere cu e reino di Dios lo manifestá su mes instantáneamente.” Anto, despues di su resureccion nan a puntra si e Reino lo a ser establecé mesora. Tambe, rond di dies aña promé cu Pedro a skirbi su di dos carta, “un mensahe verbal” of “un carta,” supuestamente di parti di apostel Pablo of di su compañeronan, a “excitá” algun “den e sentido di cu e dia di Jehova ta aki.” (Lucas 19:11; 2 Tesalonicensenan 2:2; Echonan 1:6) Sin embargo, e expectativanan ei di Jesus su disipelnan no tabata falsu, solamente prematuro. E dia di Jehova lo a bini sigur!
E Palabra di Dios Ta Confiabel
12. Con e Palabra di Dios a duna prueba di ta confiabel den su profecianan tocante “e dia di Jehova”?
12 Manera a ser mencioná anteriormente, hopi biaha e profetanan pre-cristian a spierta cu e dia di vengansa di Jehova tabata cerca. Un “dia di Jehova” na escala menor a bini na 607 P.E.C. ora Jehova a ehecutá vengansa riba su pueblo desobediente. (Sofonías 1:14-18) Mas despues, otro nacionnan, incluyendo Babilonia i Egipto, a sufri un “dia di Jehova” similar. (Isaías 13:6-9; Jeremías 46:1-10; Abdías 15) E fin dje sistema di cosnan hudiu di promé siglo tambe a ser profetisá, i el a tuma lugá ora ehércitonan romano a destruí Hudea na 70 E.C. (Lucas 19:41-44; 1 Pedro 4:7) Pero Pedro ta señalá na un futuro “dia di Jehova,” unu cu lo superá asta e Diluvio mundial na magnitud!
13. Ki ehempel histórico ta demostrá cu e fin dje sistema di cosnan aki lo cumpli sigur?
13 Pedro ta introducí su descripcion dje binidero destruccion ei, bisando: “Pero pa e mésun palabra.” El a caba di bisa cu “pa medio dje palabra di Dios,” e tera promé cu Diluvio tabata pará “for di awa i meimei di awa.” E situacion aki, describí den Bijbel su relato di creacion, a haci posibel p’e Diluvio tuma lugá ora e awanan a basha abou riba indicacion, of palabra, di Dios. Pedro ta continuá: “Pa e mésun palabra [di Dios] shelu i tera cu ta di awor ta ser wardá pa candela i ta ser reservá p’e dia di huicio i di destruccion di hende malbado.” (2 Pedro 3:5-7; Génesis 1:6-8) Nos tin Jehova su palabra confiabel pa esei! Lo e trece un fin n’e “shelu i tera”—e sistema di cosnan aki—den e rabia ardiente di su gran dia! (Sofonías 3:8) Pero na ki tempu?
Ansioso p’e Fin Yega
14. Pakico nos por ta sigur cu nos ta bibando awor den “e último dianan”?
14 Jesus su disipelnan tabata kier sa na ki tempu e fin lo a yega, p’esei nan a puntr’é: “Kico lo ta e señal di bo presencia i dje conclusion dje sistema di cosnan?” Evidentemente nan tabata puntrando na ki tempu e sistema hudiu lo a terminá, pero Jesus su contesta a enfocá principalmente riba e tempu cu e “shelu i tera” actual lo sufri destruccion. Jesus a profetisá cosnan manera gueranan grandi, scarcedad di cuminda, temblornan, enfermedad i crímen. (Mateo 24:3-14; Lucas 21:5-36) Desde e aña 1914, nos a mira e señal cu Jesus a duna pa e “conclusion dje sistema di cosnan” cumpli i tambe e cosnan cu apostel Pablo a mencioná cu lo a identificá “e último dianan.” (2 Timoteo 3:1-5) Berdaderamente, e evidencia cu nos ta bibando den e tempu di fin dje sistema di cosnan aki ta abrumador!
15. Kico cristiannan tabatin tendencia di haci apesar di Jesus su advertencia?
15 Testigonan di Jehova tabata ansioso pa sa na ki tempu e dia di Jehova lo tuma lugá. Den nan entusiasmo tin biaha nan a haci intento pa calculá na ki tempu lo e por yega. Pero dor di haci esei, igual cu Jesus su disipelnan di promé, nan a lubidá e advertencia di nan Doño cu nos “no sa ki ora e tempu señalá ta.” (Marco 13:32, 33) Mofadónan a haci bofon di cristiannan fiel pa nan expectativanan prematuro. (2 Pedro 3:3, 4) No obstante, Pedro ta afirmá cu e dia di Jehova lo bini segun Su orario.
Nos Mester Tin Jehova Su Punto di Bista
16. Ki spiertamentu ta sabí pa nos haci caso di dje?
16 Nos mester tin Jehova su punto di bista di tempu, manera Pedro ta recordá nos awor: “Sin embargo, no laga esun echo aki scapa boso, stimánan, cu un dia di Jehova ta manera mil aña i mil aña ta manera un dia.” Ki corticu nos bida di 70 of 80 aña ta na comparacion cu esei! (2 Pedro 3:8; Salmo 90:4, 10) P’esei si e cumplimentu dje promesanan di Dios ta parce di tarda, nos tin cu aceptá e spiertamentu dje profeta di Dios: “Asta si e [tempu señalá] tarda, keda den expectativa di dje; pasobra lo e ser realisá sin falta. Lo e no ta lat.”—Habacuc 2:3.
17. Aunke e último dianan a continuá pa mas tantu tempu cu hopi hende a spera, di kico nos por ta sigur?
17 Pakico e último dianan dje sistema aki a continuá mas tantu tempu cu hopi hende a spera? Pa un bon motibu, manera Pedro ta splica siguientemente: “Jehova no ta lento en cuanto su promesa, manera algun hende ta considerá lentitud, sino e tin pacenshi cu boso pasobra e no ta deseá pa ningun ser destruí, sino ta deseá pa tur alcansá repentimentu.” (2 Pedro 3:9) Jehova ta tuma na consideracion loke ta den e mihó interes di henter humanidad. Su preocupacion ta bida di hende, manera e ta bisa: “Mi tin deleite, no den e morto dje malbado, sino den e echo cu un persona malbado ta bolbe di su caminda i realmente sigui biba.” (Ezekiel 33:11) Pues nos por ta sigur cu e fin lo yega net na tempu pa cumpli cu e propósito di nos amoroso Creador cu tin tur sabiduria!
Kico Lo Pasa Bai?
18, 19. (a) Pakico Jehova ta dicididu pa destruí e sistema di cosnan aki? (b) Con Pedro ta describí e fin dje sistema aki, i kico eigenlijk lo ser destruí?
18 Debí cu Jehova berdaderamente ta stima esnan cu ta sirbié, lo e eliminá tur esnan cu ta causa nan angustia. (Salmo 37:9-11, 29) Mencionando, mescos cu Pablo a haci anteriormente, cu e destruccion aki lo bini na un tempu inesperá, Pedro ta skirbi: “E dia di Jehova lo bini manera ladron, den cua shelu lo pasa bai cu un ruido di bientu, pero e elementonan siendo intensamente cayente lo ser disolvé, i e tera i e obranan den dje lo ser descubrí.” (2 Pedro 3:10; 1 Tesalonicensenan 5:2) Shelu i tera literal no a perecé den e Diluvio. Esei lo no sosodé tampoco durante e dia di Jehova. Kico, anto, lo “pasa bai,” of ser destruí?
19 Gobiernunan humano cu a dominá humanidad manera “shelu” lo terminá i tambe e “tera,” of e sociedad humano malbado. Kisas e “ruido di bientu” ta indicá e pasamentu rápido di shelu. “E elementonan” cu ta forma e sociedad humano decadente awe lo ser “disolvé,” of destruí. I e “tera,” incluyendo “e obranan den dje,” lo ser “descubrí.” Jehova lo exponé cabalmente e obranan malbado di hende ora e ta trece henter un sistema mundial na su fin bon merecí.
Keda Enfocá Riba Bo Speransa
20. Con nos bida mester ser afectá dor cu nos sa ki sucesonan tin den futuro?
20 Siendo cu e sucesonan dramático aki ta cerca, Pedro ta bisa cu nos mester ta enbolbí den “actonan santu di conducta i echonan di debocion piadoso, sperando i teniendo masha presente e presencia dje dia di Jehova.” No por tin duda tocante esei! “Shelu siendo na candela lo ser disolvé i e elementonan siendo intensamente cayente lo dirti!” (2 Pedro 3:11, 12) E echo cu e sucesonan dramático aki lo por cuminsá mañan mester afectá tur loke nos ta haci of planea pa haci.
21. Kico lo reemplasá e shelu i tera actual?
21 Awor Pedro ta bisa nos kico lo reemplasá e sistema bieu, bisando: “Pero tin shelu nobo i un tera nobo cu nos ta spera segun su promesa, i den esakinan husticia lo tin cu biba.” (2 Pedro 3:13; Isaías 65:17) Ai, ki un gran alivio! Cristo i su 144.000 co-gobernantenan lo componé un “shelu nobo” gubernamental, i hende cu ta sobrebibí e fin dje mundu aki lo forma e “tera nobo.”—1 Juan 2:17; Revelacion 5:9, 10; 14:1, 3.
Mantené un Sentido di Urgencia i Puresa Moral
22. (a) Kico lo yuda nos evitá cualkier mancha of defecto spiritual? (b) Ki peliger Pedro ta spierta nos tocante dje?
22 “P’esei, stimánan,” Pedro ta continuá, “siendo cu boso ta spera e cosnan aki, haci boso sumo posibel p’e haña boso finalmente sin mancha i sin defecto i na pas. Ademas, considerá e pacenshi di nos Señor como salbacion.” Sperando cu anticipacion ansioso i mirando cualkier aparente tardansa dje dia di Jehova como un expresion di pacenshi divino lo yuda nos evitá cualkier mancha of defecto spiritual. Tog tin peliger! Pedro ta spierta cu den e cartanan di “nos ruman stimá Pablo . . . tin algun cos cu ta difícil pa comprendé, cu hende sin siñansa i inconstante ta troce, mescos cu nan ta haci tambe cu e resto dje Scritura, pa nan mes destruccion.”—2 Pedro 3:14-16.
23. Cua ta Pedro su spiertamentu final?
23 Evidentemente maestronan falsu a troce loke Pablo a skirbi tocante Dios su bondad inmerecí, usando nan como excuus pa libertinahe. Tal bes Pedro tin esaki na mente ora e ta skirbi su spiertamentu di despedida: “P’esei, boso, stimánan, teniendo e conocimentu aki di antemano, keda vigilante pa boso no ser hibá cu nan via eror di hende desafiadó di ley i cai for di boso mes firmesa.” Anto e ta concluí su carta, instando: “Sigui crece den e bondad inmerecí i conocimentu di nos Señor i Salbador Jesucristo.”—2 Pedro 3:17, 18.
24. Ki actitud tur sirbidó di Jehova mester adoptá?
24 Claramente, Pedro kier fortalecé su rumannan. E ta deseá pa tur tin e mes actitud cu e Testigo fiel di 82 aña di edad, mencioná na cuminsamentu, a expresá: “Mi a hiba mi bida manera apostel [Pedro] a insta, ‘teniendo masha presente e presencia dje dia di Jehova.’ Semper mi a mira e mundu nobo primintí como un ‘realidad aunke e no ta ser contemplá.’” Laga nos tur hiba nos bida den e mésun manera.
Con Lo Bo Contestá?
◻ Kico ta nificá ‘tene e dia di Jehova masha presente’?
◻ Kico mofadónan ta ignorá deliberadamente, i pakico?
◻ Pa ki motibu mofadónan a haci bofon di cristiannan fiel?
◻ Ki punto di bista nos tin cu mantené?
[Plachi na página 23]
Tene masha presente e dia di Jehova . . .
[Plachi na página 24]
. . . i e mundu nobo cu lo bini despues