Ken Ta Nos Rumannan?

UN DIA e Gran Maestro a puntra un kos hopi straño. El a puntra: “Ta ken ta mi mama i ta ken ta mi ruman hòmbernan?” (Mateo 12:48) Abo por kontestá loke el a puntra?— Kasi sigur bo sa ku mama di Hesus yama Maria. Pero bo sa kon yama su ruman hòmbernan?— I e tabatin ruman muhé tambe?—

Beibel ta bisa ku e ruman hòmbernan di Hesus yama “Santiago i Hosé i Simon i Hudas.” I Hesus tabatin ruman muhé tambe na bida tempu ku e tabata prediká. Hesus tabata e yu mayó. Esei kier men ku tur su rumannan tabata mas chikitu kuné.—Mateo 13:55, 56; Lukas 1:34, 35.

E rumannan di Hesus tambe tabata disipel di dje?— Beibel ta bisa ku na kuminsamentu nan “no tabata kere den dje.” (Juan 7:5) Pero despues sí Santiago ku Hudas a bira su disipelnan, i nan a asta skirbi buki di Beibel. Bo sa kua bukinan di Beibel nan a skirbi?— Sí, Santiago i Hudas.

Maske Beibel no ta bisa nos kon e ruman muhénan di Hesus tabata yama, nos sa ku e tabatin por lo ménos dos. Pero por ta e tabatin mas. Su ruman muhénan a bira siguidó di dje?— Nos no sa, pasobra Beibel no ta bisa. Pero, bo sa ta dikon Hesus a puntra “Ta ken ta mi mama, i ta ken ta mi rumannan?”— Laga nos ban wak.

Ora Hesus tabata siñando su disipelnan, un hende a bira bis’é: “Ata bo mama i bo ruman hòmbernan pará pafó i nan kier papia ku bo.” Hesus a probechá siña nan un lès importante dor di hasi e pregunta straño ei: “Ta ken ta mi mama i ta ken ta mi ruman hòmbernan?” El a mustra riba su disipelnan, anto el a kontestá ku un stèm duru: “Ata mi mama i mi ruman hòmbernan!”

E ora ei Hesus a splika nan ta kiko e kier men. El a bisa: “Ken ku hasi e boluntat di mi Tata ku ta den shelu, esei ta mi ruman hòmber i ruman muhé i mama.” (Mateo 12:47-50) Esei ta mustra kuantu Hesus tabata stima su disipelnan. Asina el a siña nos ku p’e, su disipelnan tabata ègt manera ruman hòmber, ruman muhé i mama.

E tempu ei Santiago, Hosé, Simon i Hudas, e rumannan mes di Hesus, no tabata kere ku Hesus ta Yu di Dios. Parse ku nan no a kere loke angel Gabriel a bisa nan mama. (Lukas 1:30-33) P’esei, por ta ku nan a trata Hesus malu. Un hende ku ta hasi asina no ta mustra ku e ta un ruman di bèrdat. Bo sa di un hende ku a trata su ruman malu?—

Beibel ta konta nos di Jakòb ku Esau, anto e ta splika kon Esau a rabia asina tantu ku el a bisa: ‘Mi ta bai mata mi ruman Jakòb.’ Rebeka nan mama a haña asina tantu miedu ku el a manda Jakòb hui bai pa Esau no mat’é. (Génesis 27:41-46) Pero despues di hopi aña Esau a kambia, anto el a brasa Jakòb i sunch’e.—Génesis 33:4.

Ku tempu Jakòb a haña 12 yu hòmber. Pero Jakòb su yunan mas grandi no a stima nan ruman chikitu Hosé. Nan tabata yalurs riba dje, pasobra e tabata e yu preferí di nan tata. P’esei, nan a bend’é ku un par di hende ku ta hasi negoshi ku katibu ku tabata riba kaminda pa Egipto. Despues nan a bisa nan tata ku ta un bestia di mondi a mata Hosé. (Génesis 37:23-36) Bo no ta haña ku e kos ei ta teribel?—

Despues Hosé su rumannan a sinti duele di loke nan a hasi. P’esei, Hosé a pordoná nan. Bo a mira kon asina Hosé tabata meskos ku Hesus?— Hesus su apòstelnan a kore bai lag’é ora e tabata den problema, i Pedro a asta nenga ku e konos’é. Tòg Hesus a pordoná nan tur, meskos ku Hosé a hasi.

Tambe Beibel ta konta nos di dos otro ruman, Kain ku Abel. For di nan tambe nos por siña un lès. Dios a mira den Kain su kurason ku e no tabata stima su ruman di bèrdat. P’esei Dios a bisa Kain ku e mester a kambia su manera. Si Kain a stima Dios di bèrdat, e lo a tende di dje. Pero e no a stima Dios. Un dia Kain a bisa Abel: ‘Ban den kunuku.’ Abel a bai ku Kain. Anto ora nan tabata nan so den kunuku, Kain a dal su ruman asina duru ku el a mat’é.—Génesis 4:2-8, BPK.

Beibel ta bisa nos ku nos mester siña un lès spesial for di e kos ei ku a pasa. Bo sa ki lès esei ta?— ‘Esaki ta e mensahe ku boso a tende for di kuminsamentu: Nos mester stima otro; no manera Kain, ku a bini di e malbado.’ Kier men, rumannan mester stima otro. Nan no mester ta manera Kain.—1 Juan 3:11, 12.

Dikon ta malu si nos ta manera Kain?— Pasobra Beibel ta bisa ku Kain a ‘bini di e malbado,’ Satanas e Diabel. Kain a komportá su mes meskos ku Diabel. P’esei, ta komo si fuera Diabel ta su tata.

B’a mira dikon ta importante pa bo stima bo rumannan?— Si bo no stima nan, ta manera yu di ken bo ta komportá bo?— Manera yu di Diabel. Abo no ke ta yu di Diabel, tòg?— Awèl, kon bo por mustra ku bo ke ta un yu di Dios?— Bo por hasié dor di tin amor pa bo rumannan.

Pero kiko ta amor?— Amor ta un sintimentu fuerte den nos, ku ta pone nos haña gana di hasi kos bon pa hende. Nos ta mustra ku nos tin amor pa hende dor di tin kariño pa nan i hasi kos bon pa nan. I ta ken ta nos rumannan ku nos mester stima?— Kòrda ku Hesus a bisa ku nos mester stima nos rumannan kristian. Huntu nos ta forma un famia hopi grandi.

Kon importante ta pa nos stima nos rumannan kristian?— Beibel ta bisa: “Esun ku no ta stima su ruman ku el a mira, no por stima Dios, kende e no a mira.” (1 Juan 4:20) Esei kier men ku nos no por stima djis un par di ruman di e famia kristian so. Nos tin ku stima nan tur. Hesus a bisa: “Na esaki tur hende lo sa ku boso ta mi disipel, si boso tin amor un pa otro.” (Juan 13:35) Abo ta stima tur e rumannan?— Kòrda ku si bo no ta stima nan tur, bo no por ta stima Dios.

Kon nos por mustra ku di bèrdat nos ta stima nos rumannan?— Wèl, si nos ta stima nan nos no ta keda leu for di nan pasobra nos no ke papia ku nan. Nos lo trata nan tur bon. Semper nos lo hasi kos bon pa nan, i semper nos lo ke parti kos ku nan. Anto ora nan tin problema, nos ta yuda nan, pasobra nos ta manera un famia, un famia grandi.

Si di bèrdat nos ta stima tur nos rumannan, kiko esei ta mustra?— E ta mustra ku nos ta disipel di Hesus e Gran Maestro. No ta esei mes nos ke?—