Sigui Kana den e Bèrdat

 1. Segun 3 Huan 3 i 4, kiko ta hasi nos felis?

BO POR imaginá bo kon felis Apòstel Huan a sintié ora el a tende ku e kristiannan ku el a yuda haña e bèrdat a sigui sirbi Yehova fielmente? Pa Huan, nan tabata manera su yunan. Nan a enfrentá hopi difikultat, i Huan a hasi tur loke e tabata por pa fortalesé nan fe. Awe, nos ta sinti e mesun alegria ora nos mira nos yunan, tantu esnan di nos mes komo esnan spiritual, dediká nan mes na Yehova i sigui sirbié.—Lesa 3 Huan 3, 4.

 2. Kiko tabata meta di e kartanan di Huan?

² Na aña 98, Huan probablemente tabata biba na òf serka di Efeso. Kisas el a bai einan despues di su eksilio riba isla di Patmos. Rònt di e tempu ei, spiritu santu di Yehova a motiv’é pa skirbi tres karta. Meta di e kartanan ei tabata pa animá e kristiannan fiel pa no pèrdè fe den Hesus i pa sigui kana den e bèrdat.

 3. Ki pregunta nos lo haña kontesta p’e den e artíkulo akí?

³ Huan tabata e último apòstel ku tabata na bida, i e tabata preokupá ku e mal influensia ku e maestronan falsu tabatin den kongregashon.b (1 Huan 2:18, 19, 26) E apóstatanan ei a pretendé ku nan tabata konosé Dios, pero nan no tabata obedesé su mandamentunan. Den e artíkulo akí, nos lo analisá e konseho ku Huan a duna, i nos lo haña kontesta pa tres pregunta: Kiko ke men kana den e bèrdat? Kiko por stroba nos di kana den e bèrdat? I kon nos por yuda un i otro keda den e bèrdat?

 4. Di akuerdo ku 1 Huan 2:3-6 i 2 Huan 4 i 6, kiko nos mester hasi pa kana den e bèrdat?

⁴ Pa nos kana den e bèrdat, nos mester konosé e bèrdat ku tin den Palabra di Dios, Beibel. Ademas, nos mester “kumpli ku [Yehova] su mandamentunan,” esta, nos mester obedesé nan. (Lesa 1 Huan 2:3-6; 2 Huan 4, 6.) Hesus a pone un ehèmpel perfekto den esei. Pues, un manera importante pa obedesé Yehova ta di sigui Hesus su pasonan mas serka posibel.—Huan 8:29; 1 Ped. 2:21.

 5. Di kiko nos mester ta konvensí?

⁵ Pa nos sigui kana den e bèrdat, nos mester ta konvensí ku Yehova semper ta papia bèrdat i ku tur loke e ta bisa den su Palabra, Beibel, ta bèrdat. I nos mester ta konvensí tambe ku Hesus ta Mesías primintí. Awendia, hopi hende ta duda ku Hesus ta esun ku Yehova a ungi komo Rei di e Reino di Dios. Huan a atvertí ku tabatin “hopi gañadó,” kende por a engañá e kristiannan ku no tabata prepará pa defendé e bèrdat tokante Yehova i Hesus. (2 Huan 7-11) Huan a skirbi: “Ta ken ta e gañadó? No ta esun ku ta nenga ku Hesus ta Kristu?” (1 Huan 2:22) E úniko manera pa nos no ser engañá ta di studia Palabra di Dios. Asina so nos por siña konosé Yehova i Hesus. (Huan 17:3) Anto asina so nos lo ta konvensí ku nos tin e bèrdat.

 6. Kiko por stroba e hóbennan kristian di kana den e bèrdat?

⁶ Tur kristian mester tene kuidou pa filosofia humano no engañá nan. (1 Huan 2:26) Esnan ku mester tene mas kuidou ku e trampa ei ta e hóbennan kristian. Alexia,c un ruman franses di 25 aña, a bisa: “Tempu mi tabata bai skol, m’a haña lès di evolushon i otro filosofia humano. E ideanan ei a pone mi duda den e bèrdat. Tin biaha mi tabata asta gusta algun di e ideanan ei. Pero, m’a pensa ku no tabata hustu pa aseptá tur loke nan tabata siña mi na skol sin duna Yehova chèns pa papia.” Alexia a studia e buki La vida. . . ¿cómo se presentó aquí? ¿Por evolución, o por creación? Den un par di siman, tur su duda a kita. Alexia a bisa: “M’a konvensé mi mes ku Beibel tin e bèrdat. I m’a realisá ku biba di akuerdo ku loke e ta siña ta loke ta duna mi goso i pas.”

 7. Ki preshon nos mester resistí, i dikon?

⁷ Tur kristian, yòn i di edat, mester resistí e preshon di hiba un bida dòbel. Huan a referí na esei ora el a bisa ku nos no por kana den e bèrdat i na mes momento hiba un bida inmoral. (1 Huan 1:6) Si nos ke Yehova su aprobashon awor i den futuro, nos mester kòrda ku e ta wak tur loke nos ta hasi. Asta si hende no ta mira loke nos ta hasi den sekreto, Yehova sí ta mira.—Heb. 4:13.

 8. Kiko nos mester rechasá?

⁸ Nos mester rechasá mundu su punto di bista tokante piká. Apòstel Huan a skirbi: “Si nos ta deklará: ‘Nos no tin piká,’ nos ta gaña nos mes.” (1 Huan 1:8) Den Huan su tempu, e apóstatanan a bisa ku un hende por a kometé piká deliberadamente i tòg keda amigu di Dios. Awe, hopi hende ta pensa meskos. Nan ta bisa ku nan ta kere den Dios, pero nan no ta aseptá loke e ta bisa tokante piká, foral ora ta trata di sèks. Loke Yehova ta yama piká, nan ta haña ku ta un kuestion di preferensia personal òf un estilo di bida alternativo.

 9. Kon e hóbennan kristian ta benefisiá ora nan hasi loke Beibel ta bisa ta korekto?

⁹ Spesialmente e hóbennan kristian por sinti nan preshoná pa mira piká na e mesun manera ku nan kompañero di skol òf kolega di trabou ta mir’é. Esei ta loke a pasa ku un ruman hòmber ku yama Aleksandar. El a bisa: “Na skol, algun mucha muhé tabata purba di preshoná mi pa hasi sèks ku nan. Nan a bisa ku komo ku mi no tabatin un namorada, mi mester tabata homoseksual.” Abo ta pasando den meskos? Si ta asina, kòrda ku ora bo hasi loke Beibel ta bisa ta korekto, lo bo sinti bo bon, lo bo protehá bo salú, evitá doló di kurason i keda ku bo amistat ku Yehova. Anto mas tentashon bo resistí, mas fásil lo ta pa bo hasi loke ta korekto. Kòrda tambe ku ta Satanas ta tras di e punto di bista trosí di e mundu akí tokante sèks. P’esei, kada bes ku bo nenga di pensa manera hende den mundu, bo ta “vense e Malbado.”—1 Huan 2:14.

10. Kon 1 Huan 1:9 ta yuda nos sirbi Yehova ku un konsenshi limpi?

¹⁰ Nos sa ku Yehova tin derecho di determiná kiko ta piká. I nos ta hasi nos esfuerso pa no kometé piká. Pero ora nos peka, nos ta konfesá nos pikánan na dje den orashon. (Lesa 1 Huan 1:9.) I si ta trata di un piká grave, nos ta buska yudansa di e ansianonan, kendenan Yehova a asigná pa kuida nos. (Sant. 5:14-16) Pero, nos no mester keda pensa riba e pikánan ku nos a kometé den pasado. Dikon nò? Pasobra nos Tata ku ta stima nos a duna su Yu komo sakrifisio di reskate pa pordon di nos pikánan. Anto ora Yehova bisa ku e ta pordoná pekadó ku di bèrdat ta sinti duele di loke nan a hasi, e ke men loke e ta bisa. Pues, no tin nada ku por stòp nos di sirbié ku un konsenshi limpi.—1 Huan 2:1, 2, 12; 3:19, 20.

11. Kon nos por protehá nos mes kontra siñansa ku por debilitá nos fe?

¹¹ Nos mester rechasá siñansa apóstata. Desde ku a forma e kongregashon kristian, semper Diabel a purba di debilitá fe di e kristiannan. P’esei, nos mester sa e diferensia entre bèrdat i mentira.d Nos enemigunan por usa Internet òf medio sosial pa purba di debilitá nos fe den Yehova i nos amor pa nos rumannan. Rechasá e mentiranan ei pasobra nan ta bini di Satanas!—1 Huan 4:1, 6; Rev. 12:9.

12. Dikon nos mester fortalesé nos fe den e bèrdatnan ku nos a siña?

¹² Si nos ke resistí e atakenan di Satanas, nos mester fortalesé nos fe den Hesus i konfia e manera ku Yehova ta us’é pa kumpli ku Su boluntat. Nos mester konfia tambe e esklabo fiel i prudente; konfia ku Yehova ta usando solamente e kanal ei pa guia su organisashon. (Mat. 24:45-47) Ora nos ta studia Palabra di Dios regularmente, nos ta fortalesé nos fe i lo e ta manera un palu ku su rais ta bon ankrá den tera. Pablo a bisa algu similar ora el a skirbi e kolosensenan: “Meskos ku boso a aseptá Kristu Hesus, nos Señor, sigui kana den union kuné, siendo ankrá i edifiká den dje i stabil den fe.” (Kol. 2:6, 7) Si nos fe ta dje fuerte ei, no tin nada ku Satanas òf esnan ku ta apoy’é por hasi pa stroba nos di kana den e bèrdat.—2 Huan 8, 9.

13. Kiko nos mester ferwagt, i dikon?

¹³ Nos mester ferwagt ku mundu ta odia nos. (1 Huan 3:13) Huan ta kòrda nos ku “henter mundu ta den poder di e Malbado.” (1 Huan 5:19) Segun ku e fin ta yega mas serka, Satanas su rabia ta sigui oumentá. (Rev. 12:12) E no ta usa atake sutil so, manera inmoralidat òf mentira di apóstata. E ta usa atake direkto tambe, manera persekushon kruel. E sa ku e tin solamente un poko tempu mas, pues e ta purba di tur manera pa stòp nos trabou di prediká i debilitá nos fe. P’esei, no mester sorprendé nos ku nos obra ta restringí òf prohibí den algun pais. Pero tòg nos rumannan den e paisnan ei ta sigui perseverá. Nan ta demostrá ku sin importá loke “e Malbado” hasi nos, nos por keda fiel!

14. Menshoná un manera ku nos por yuda nos rumannan keda den e bèrdat.

¹⁴ Pa yuda nos rumannan keda den e bèrdat, nos mester demostrá kompashon. (1 Huan 3:10, 11, 16-18) Nos mester stima nan den bon i den malu. Por ehèmpel, bo konosé un ruman ku a pèrdè un ser kerí den morto i ku mester di konsuelo òf yudansa práktiko? Òf bo sa di ruman ku a ser afektá pa desaster natural i ku mester di yudansa pa rekonstruí nan Salòn di Reino òf nan kas? Nos ta demostrá berdadero amor i kompashon pa nos rumannan no solamente ku loke nos ta bisa, sino mas importante ainda, ku loke nos ta hasi.

15. Di akuerdo ku 1 Huan 4:7 i 8, kiko nos mester hasi?

¹⁵ Ora nos demostrá amor un pa otro, nos ta imitá nos Tata selestial, Yehova. (Lesa 1 Huan 4:7, 8.) Un manera importante ku nos por demostrá amor ta di pordoná otro. Por ehèmpel, si un hende hasi algu ku ta ofendé nos, nos ta demostrá nos amor ora nos pordon’é i lubidá loke el a hasi. (Kol. 3:13) Laga nos wak loke a pasa ku un ruman ku yama Aldo. Un ruman ku e tabatin masha rèspèt p’e a bisa algu negativo tokante hende di su kultura. Aldo a konta: “Bes tras bes m’a pidi Yehova pa yuda mi pa no pensa malu di e ruman.” Pero Aldo a hasi algu mas: el a pidi e ruman pa nan sali den sirbishi. Den sirbishi, Aldo a splik’é kon e tabata sinti. Aldo a bisa: “Ora e ruman a komprondé kuantu doló su komentario negativo a hasi mi, el a pidi mi masha despensa. Na su tono di bos mi por a komprondé ku di bèrdat a duel e. Despues di esei, nos tabata bon amigu atrobe.”

16-17. Kiko mester ta nos determinashon?

¹⁶ Apòstel Huan tabata stima su rumannan den fe i a preokupá mashá pa nan bienestar spiritual. Nos por mira esei bon kla den e konsehonan ku el a duna den su tres kartanan inspirá. Ta bon pa sa ku e hòmber- i muhénan ku lo goberná ku Hesus den shelu tambe ta sinti meskos pa nos ku Huan.—1 Huan 2:27.

¹⁷ Laga nos tuma e konsehonan ku nos a analisá den artíkulo akí na serio. Sea determiná pa kana den e bèrdat, ku ta nifiká obedesé Yehova den tur loke nos ta hasi. Studia su Palabra i konfia loke e ta bisa. Fortalesé bo fe den Hesus. Rechasá filosofia humano i siñansa apóstata. Resistí e preshon di hiba un bida dòbel i di kometé piká. Biba di akuerdo ku e normanan moral di Yehova. Yuda bo rumannan keda firme den e bèrdat pordonando nan i yudando esnan den nesesidat. E ora ei, sin importá loke nos enfrentá, nos lo sigui kana den e bèrdat.