Kon Nos Por Mustra Ku Nos Ta Stima Yehova?

1, 2. Den ki manera 1 Huan 4:19 ta yuda nos stima Yehova?

E MIHÓ manera ku un tata por siña su yunan ta ku su bon ehèmpel. Ora e mustra nan amor, nan ta siña kon pa mustra amor. No tin un persona ku ta stima su yunan mas ku Yehova, nos Tata amoroso. P’esei, apòstel Huan a skirbi: “Nos ta stima, pasobra Dios a stima nos promé.”—1 Huan 4:19.

² Den ki manera Dios a mustra ku el a “stima nos promé”? Nos por haña e kontesta den loke apòstel Pablo a bisa: “Dios a demostrá su amor pa nos di e manera akí: Kristu a muri pa nos miéntras ku nos tabata pekadó ainda.” (Rom. 5:8) Yehova a hasi un sakrifisio grandi ora el a duna su Yu komo un reskate pa hende fiel. Asina el a mustra un amor sin egoismo. Danki na e regalo presioso akí, nos por hala serka Dios i mustr’é ku nos tambe ta stim’é.—1 Huan 4:10.

3, 4. Kon nos ta mustra ku nos ta stima Dios?

³ Amor ta e kualidat prinsipal di Yehova. P’esei, nos por komprondé dikon Hesus a bisa ku e mandamentu di mas importante ta ku “bo tin ku stima Yehova bo Dios ku henter bo kurason, ku henter bo alma, ku henter bo mente i ku tur bo forsa.” (Mar. 12:30) E palabranan di Hesus ta mustra ku Yehova ke pa nos stim’é “ku henter [nos] kurason.” Ke men, si nos kurason no ta kompleto pa ku Yehova, esei lo no agrad’é. Nos amor pa Dios ta muchu mas ku djis un sintimentu. Nos mester stima Yehova tambe ku henter nos alma, mente i forsa, esta, ku nos pensamentu- i akshonnan.—Lesa Mikéas 6:8.

⁴ Pues, manera Hesus a bisa, nos mester stima Yehova kompletamente, es desir, ku tur loke nos tin. Den e artíkulo anterior nos a mira kuater manera ku Yehova ta mustra ku e ta stima nos. Awor, laga nos wak loke por yuda nos haña mas amor p’e, i kon nos por mustra ku nos ta stim’é.

 5. Ora bo pensa riba tur loke Yehova a hasi pa nos, kiko bo ta sinti?

⁵ Ora bo haña un regalo, kiko bo ta hasi kuné? Di mes bo ta mustra ku bo ta apresi’é den e manera ku bo ta us’é i kuid’é. Santiago a skirbi: “Tur don ku ta bon i tur regalo perfekto ta bini di ariba; pues, nan ta baha for di e Tata di e lusnan selestial, kende no ta varia ni kambia manera sombra ku ta move.” (Sant. 1:17) Semper Yehova ta perkurá tur loke nos mester pa biba i pa nos ta felis. Esei no ta motivá nos pa stim’é?

 6. Kiko e israelitanan mester a hasi pa sigui disfrutá di e bendishonnan di Yehova?

⁶ Pa siglonan e israelitanan a biba bou di e kuido amoroso di Yehova. Semper el a bendishoná nan tantu materialmente komo spiritualmente. (Deu. 4:7, 8) Ma pa nan por a sigui disfrutá di e bendishonnan ei, nan mester a obedesé e Lei di Dios. Esaki a enserá ku nan mester a ofresé Yehova “e mihó di e promé frutanan” di nan kosecha. (Éks. 23:19) Di e manera ei, e israelitanan por a demostrá ku di bèrdat nan a apresiá e amor i bendishon di Yehova.—Lesa Deuteronomio 8:7-11.

 7. Den ki manera nos por usa nos “kosnan balioso” pa mustra Yehova ku nos ta stim’é?

⁷ Aunke nos no ta hasi sakrifisio literal manera e israelitanan a hasi, nos por duna Dios nos “kosnan balioso” i asina mustr’é ku nos ta stim’é. (Prov. 3:9, NW) Kon nos por hasi esei? Por ehèmpel, nos por usa nos kosnan material pa apoyá e kongregashonnan lokal i e obra mundial. Sea ku nos tin poko òf hopi, nos tur por usa loke nos tin pa mustra ku nos ta stima Yehova. (2 Kor. 8:12) Pero tin mas manera ku nos por mustra Yehova ku nos ta stim’é.

8, 9. (a) Ki relashon tin entre nos konfiansa den e promesanan di Yehova i nos amor p’e? (b) Kon Mike i su famia a mustra amor i konfiansa den Yehova?

⁸ Hesus a siña su disipelnan pa pone e Reino na promé lugá i pa no bira anshá tokante kosnan manera kuminda i paña. El a bisa ku nos Tata sa loke nos tin mester. (Mat. 6:31-33) Mas nos konfia den Yehova su promesa ku e ta kuida nos, mas nos ta mustra ku nos ta stim’é, ya ku pa bo por stima un persona di bèrdat, bo mester konfi’é. (Sal. 143:8) Pues lo ta bon pa nos puntra nos mes: Mi metanan i mi manera di biba ta mustra ku di bèrdat mi ta stima Yehova? Den mi bida diario, ta bisto ku mi ta konfia ku Yehova por perkurá pa mi nesesidatnan?

⁹ Un ruman ku yama Mike a mustra e tipo di amor i konfiansa ei. Tempu ku e tabata yòn, e tabatin e deseo di sirbi Dios den un pais kaminda tin nesesidat di mas publikadó. Asta despues ku el a kasa i haña dos yu, ainda e tabatin e mesun deseo ei. Mike i su famia a lesa vários artíkulo tokante rumannan ku a sirbi kaminda e nesesidat ta mas grandi, i esei a animá nan pa simplifiká nan bida. Nan a bende nan kas i a bai biba den un apartamento. Despues, Mike a redusí e tamaño di su negoshi tumando ménos kliente, i el a haña un manera pa maneh’é for di un otro pais usando Internet. Esei a permití Mike i su famia muda bai un otro pais, i despues ku nan a sirbi dos aña ku goso einan, Mike a bisa: “Nos a komprobá ku e palabranan na Mateo 6:33 ta kontené un gran bèrdat.”

10. Dikon ta bon pa nos meditá riba e leinan di Dios i su kreashon manera Rei David a hasi?

¹⁰ Un 3.000 aña pasá, ora Rei David a opservá shelu yen di strea, el a sintié motivá pa skirbi: “E shelunan ta konta di e gloria di Dios; i e firmamentu ta proklamá e obra di su mannan.” Despues ku el a meditá riba e leinan di Dios, el a bisa: “E lei di SEÑOR ta perfekto, e ta restorá alma; e testimonio di SEÑOR ta fiel, e ta hasi hende simpel bira sabí.” Ki efekto esei tabatin riba dje? Wèl, David a sigui bisa: “Laga e palabranan di mi boka i e meditashon di mi kurason ta aseptabel den bo bista, o SEÑOR, mi baranka i mi Redentor.” Manera nos por a mira, David tabatin un bon relashon ku su Dios.—Sal. 19:1, 7, 14.

11. Kiko amor pa Dios ta motivá nos pa hasi ku e konosementu ku e ta duna nos? (Wak e promé plachi.)

¹¹ Awe, nos sa hopi tokante Yehova su kreashon i su propósito. Mundu ta promové enseñansa superior, pero eksperensia ta mustra ku hopi hende ku a sigui esei ku tempu a pèrdè nan fe i nan amor pa Dios. Pero Beibel ta rekordá nos ku konosementu so no ta sufisiente; nos mester di sabiduria i komprondementu tambe. Yehova ke pa nos siña usa e konosementu ku el a duna nos pa benefisiá nos mes i pa yuda otro hende. (Pro. 4:5-7) Dios “su boluntat ta pa tur sorto di hende ser salbá i yega na un konosementu eksakto di e bèrdat.” (1 Tim. 2:4) Nos ta mustra ku nos ta stima Yehova ora nos ta hasi tur loke nos por pa prediká e bon notisia di e Reino i yuda hende komprondé Dios su propósito pa humanidat.—Lesa Salmo 66:16, 17.

12. Kiko Shannon a bisa tokante e bunita regalo ku el a haña di Yehova?

¹² Hóbennan tambe por mustra ku nan ta stima Yehova. Kon? Nan por hasi esei pa medio di e apresio ku nan ta demostrá pa loke Yehova ta duna nan i siña nan. Un ruman muhé ku yama Shannon ta konta ku tempu e tabatin 11 aña, é i su ruman muhé di 10 aña a bai e kongreso di distrito “Deboshon Piadoso” huntu ku nan mayornan. Durante un di e seshonnan, a pidi e hóbennan pa sinta den un sekshon spesial. Aunke Shannon tabata un poko nèrvioso, tòg el a bai sinta einan. E tabata hopi kontentu ora ku tur e hóbennan a haña e bunita buki Loke hovenan sa puntra—Contesta práctica. Kon e regalo ei a lag’é sinti tokante Yehova Dios? El a bisa: “Ta e ora ei mi a sinti ku Dios ta un persona real i ku e ta stima mi masha hopi mes. Esta felis nos ta ku nos gran Dios Yehova ta duna nos regalonan asina presioso!”

13, 14. Kon nos mester reakshoná ora Yehova duna nos disiplina, i dikon?

¹³ Beibel ta bisa: “Esun ku SEÑOR ta stima, e ta reprendé, meskos ku un tata ta reprendé e yu ku e tin delisia den dje.” (Pro. 3:12) Kon nos mester reakshoná ora nos haña disiplina? Apòstel Pablo a rekonosé ku “ningun disiplina ta algu dushi na momento ku e ta ser duná, sino algu doloroso.” Pero el a sigui splika ku esei no ke men ku e disiplina no ta nesesario, pasobra el a bisa: “Ma despues e ta duna e fruta di pas, esta, un bida hustu, na esnan ku a ser entrená p’e.” (Heb. 12:11) Si nos ta stima Yehova, nos lo no ignorá su konseho, sino asept’é sin keda disgustá. Kisas pa algun di nos, esei no ta fásil. Pero nos amor pa Dios lo yuda nos.

¹⁴ Den tempu di Malakías, hopi hudiu no a sigui e leinan di Dios tokante sakrifisio. Pa e motibu ei, Dios mester a duna nan konseho fuerte. (Lesa Malakías 1:12, 13.) Kon grave e situashon tabata? Wak kiko Yehova a bisa nan: “Lo mi manda desaster riba boso. Na lugá di privilegio mi ta duna boso desaster. Mi ta hasiendo esei kaba, pasobra boso no ta tuma e mandamentu na serio.” (Mal. 2:1, 2, BPK) Si nos tin e kustumber di ignorá e konsehonan amoroso di Yehova, esei lo por tin konsekuensia.

15. Ki manera di pensa nos mester evitá?

¹⁵ Den nos tempu hopi hende ta pensa solamente riba nan mes. P’esei, mayoria di hende no ta gusta haña konseho i disiplina, kòrda pa nan asept’é. I e poko hendenan ku sí ta asept’é ta hasi esaki di mala gana. Pero komo kristiannan, nos no mester ta asina. Beibel ta animá nos pa “stòp di laga e mundu akí forma [nos].” Nos mester purba di komprondé kiko ta e “boluntat di Dios” i hasi loke ta agrad’é. (Rom. 12:2) Yehova ta usa su organisashon pa duna nos konseho relashoná ku vários aspekto di nos bida: nos komportashon ku e sekso opuesto, amistat i rekreo. Ora nos ta dispuesto pa aseptá i apliká e konsehonan akí, nos ta mustra Yehova ku nos ta apresiá su guia i ku nos ta stim’é di kurason.—Huan 14:31; Rom. 6:17.

16, 17. (a) Dikon nos mester tene kuenta ku Dios su manera di pensa ora nos ta tuma desishon? (b) Kon e israelitanan a mustra un falta di amor i konfiansa den Yehova?

¹⁶ Ora mucha haña miedu, mesora nan ta kore bai serka nan mayornan. Segun ku nan ta krese bira adulto, nan ta siña dependé mas riba nan mes i tuma nan mes desishonnan. Esei ta parti di bida. Apesar di esei, esnan ku tin un bon relashon ku nan mayornan ta sigui buska konseho serka nan ora ku nan mes tin ku tuma sierto desishonnan. Den sentido spiritual ta meskos. Yehova a duna nos su spiritu ku ta yuda nos haña “tantu e deseo komo e poder pa hasi tur loke ta agrad’é.” Pero, lo ta un falta di amor i konfiansa si nos tuma desishon sin tene kuenta ku loke Dios ta pensa di e asuntu.—Flp. 2:13.

¹⁷ Den tempu di profeta Samuel, e israelitanan a sufri un derota grandi kontra e filisteonan. Na e momento ei, nan tabatin mester di Dios su guia i protekshon. Pero kiko nan a disidí di hasi? Nan a bisa: “Laga nos trese pa nos mes for di Silo e arka di e aliansa di SEÑOR, pa e bini meimei di nos i libra nos di e poder di nos enemigunan.” Kiko tabata e resultado di esaki? “E matansa tabata masha grandi mes; pasobra di Israel a kai 30.000 sòldá na pia. I nan a kohe e arka di Dios.” (1 Sam. 4:2-4, 10, 11) Por a parse ku ta e yudansa di Dios nan tabata buska ora nan a hiba e Arka huntu ku nan, pero en realidat no tabata asina. Mas bien, nan a sigui tras di nan propio ideanan, i e resultado tabata desastroso.—Lesa Proverbionan 14:12.

18. Ki aktitut nos mester tin ora nos ta buska Yehova su yudansa?

¹⁸ Di otro banda e salmista a demostrá e aktitut korekto ora el a skirbi: “Spera riba Dios, pasobra lo mi bolbe alab’é pa e yudansa di su presensia. O mi Dios, mi alma ta abatí den mi; p’esei mi ta kòrda riba bo.” (Sal. 42:5, 6) Esta un amor profundo pa Yehova! Abo tambe a desaroyá un amor i konfiansa asina pa bo Tata selestial? Asta si bo kontesta ta sí, e siguiente konseho di Beibel lo por yuda bo haña mas konfiansa den Dios: “Konfia den SEÑOR ku henter bo kurason, i no dependé riba bo mes komprondementu. Den tur bo kamindanan rekonos’é, i e lo dirigí bo bereanan.”—Pro. 3:5, 6.

19. Den ki manera bo por mustra ku bo ta stima Yehova?

¹⁹ Yehova a pone e mihó ehèmpel den mustra amor, i esei ta yuda nos stim’é. Laga nos semper kòrda riba tur loke Yehova ta hasi pa mustra ku e ta stima nos. P’esei, laga nos sigui hasi esfuerso pa mustra Yehova kada dia ku nos ta stim’é ku henter nos kurason, alma, mente i ku tur nos forsa.—Mar. 12:30.