Superintendentenan Biahero—Donnan den Hende

“Ora el a subi na haltu el a hiba catibu; el a duna donnan den hende.”—EFESIONAN 4:8.

 1. Ki trabou nobo a ser anunciá den e revista aki na 1894?

MAS cu un siglo pasá, e Toren di Vigilancia a anunciá algu nobo. El a ser describí como “Un Otro Area dje Trabou.” Kico e actividad nobo aki a encerá? Esei tabata e inauguracion moderno dje trabou di superintendentenan biahero. E edicion [na ingles] di 1 di september, 1894, dje revista aki a splica cu di awor padilanti ruman hombernan cualificá lo bishitá gruponan di Studiantenan di Bijbel ‘cu e propósito di edificá nan den e berdad.’

 2. Kico ta e tareanan di superintendentenan di circuito i di districto?

² Den e promé siglo E.C., superintendentenan manera Pablo i Barnabas tabata bishitá e congregacionnan cristian. E hombernan fiel aki tabatin e meta di “edificá” e congregacionnan. (2 Corintionan 10:8) Awe, nos ta bendicioná cu miles di homber cu ta haciendo esaki den un forma sistemático. E Cuerpo Gobernante di Testigonan di Jehova a nombra nan como superintendente di circuito i di districto. Un superintendente di circuito ta sirbi mas o ménos 20 congregacion rond di dos biaha pa aña pa un siman cada biaha, examinando e registronan di congregacion, dunando discursonan i participando den e ministerio di veld cu e publicadornan di Reino local. E superintendente di districto ta sirbi como presidente pa cada un dje asambleanan di circuito anual pa un cantidad di circuito, ta participá den e ministerio di veld cu e congregacionnan anfitrion, i ta duna animacion den discursonan basá riba Bijbel.

Nan Spiritu di Sacrificio Propio

 3. Pakico superintendentenan biahero mester tin un spiritu di sacrificio propio?

³ Superintendentenan biahero ta biaha constantemente. Esaki riba su mes ta rekerí un spiritu di sacrificio propio. Pa biaha di un congregacion pa otro hopi bes por ta difícil, pero e hombernan aki i nan esposa ta haci esei cu un actitud gososo. Un superintendente di circuito a bisa: “Mi esposa ta un sosten grandi pa mi i e no ta kehoso . . . Mi tin cu dun’é hopi mérito pa su spiritu di sacrificio propio.” Algun superintendente di circuito ta biaha mas cu 1.000 kilometer entre congregacionnan. Hopi ta core auto, pero otronan ta bai di un lugá pa otro cu transporte público, cu baiskel, riba cabai of na pia. Un superintendente di circuito africano asta tin cu pasa dor di un riu cu su esposa riba su scouder pa por alcansá un congregacion. Riba su biahenan di misionero, apostel Pablo a haña su mes confrontá cu calor i friu, hamber i sed, anochinan sin drumi, vários peliger i persecucion violento. Tambe e tabatin “ansiedad pa tur e congregacionnan”—un experencia comun pa superintendentenan biahero awe.—2 Corintionan 11:23-29.

 4. Ki efecto problemanan di salú tin riba bida di superintendentenan biahero i nan esposa?

⁴ Mescos cu Pablo su compañero Timoteo, superintendentenan biahero i nan esposa sa tin problema di salú. (1 Timoteo 5:23) Esaki ta pone extra stres riba nan. E esposa di un superintendente di circuito ta splica: “E echo cu semper mi ta den compania dje rumannan ta duná mi un tension ora mi no ta sinti bon. Cu e cuminsamentu di menopausa, mi a haña esaki specialmente difícil. E solo echo cu nos tin cu paketá tur nos cosnan tur siman i move bai un otro caminda ta un berdadero desafio. Hopi biaha, mi tin cu stop i haci oracion na Jehova p’e duná mi e forsa pa sigui dal bai.”

 5. Apesar di vários prueba, ki spiritu superintendentenan biahero i nan esposa a demostrá?

⁵ Apesar di problema di salú i otro pruebanan, superintendentenan biahero i nan esposa ta haña goso den nan sirbishi i ta desplegá amor di sacrificio propio. Algun a risca nan bida pa rindi yudansa spiritual den tempu di persecucion of guera. Ora di bishitá e congregacionnan, nan a manifestá un spiritu similar cu esun di Pablo, kende a bisa e cristiannan tesalonicense: “Nos a bira amabel meimei di boso, manera ora un mama dunando pechu ta cariciá su mes yunan. Pues, teniendo tierno cariño pa boso, cu muchu gustu nos a compartí cu boso, no solamente e bon nobo di Dios, sino tambe nos propio alma, pasobra boso a bira stimá pa nos.”—1 Tesalonicensenan 2:7, 8.

 6, 7. Ki influencia positivo superintendentenan biahero diligente por percurá?

⁶ Mescos cu otro ancianonan den e congregacion cristian, superintendentenan biahero “ta traha duru den papiamentu i siñamentu.” Tur e ancianonan ei mester “ser considerá digno di dobel onor.” (1 Timoteo 5:17) Nan ehempel por resultá di ta beneficioso si, despues di ‘contemplá e resultado di nan conducta, nos imitá nan fe.’—Hebreonan 13:7.

⁷ Ki efecto cierto ancianonan biahero tabatin riba otronan? “Ki un influencia maraviyoso Ruman P—— tabata den mi bida!” un Testigo di Jehova a skirbi. “E tabata un superintendente biahero na México for di aña 1960 padilanti. Como mucha, mi tabata spera su bishitanan cu expectativa i goso. Ora mi tabatin dies aña di edad, el a bisá mi, ‘Bo tambe ta bai bira un superintendente di circuito.’ Durante e añanan difícil como tiener, frecuentemente mi tabata acudí na dje pasobra e semper tabatin palabranan di sabiduria pa ofrecé. El a biba pa pastoreá e tou! Awor cu ami ta un superintendente di circuito, mi semper ta purba dedicá tempu n’e hóbennan i pone metanan teocrático dilanti nan mescos cu e a haci pa mi. Asta den e añanan final di su bida, apesar di problemanan di curason, Ruman P—— semper a trata na ofrecé un palabra di animacion. Solamente un dia promé cu su morto na februari 1995, el a compañá mi na un dia special di asamblea i a pone metanan excelente dilanti un ruman homber cu ta un arkitecto. Mesora e ruman a entregá un aplicacion pa sirbi na Betel.”

Nan Ta Ser Apreciá

 8. Ken ta e “donnan den hende” describí na Efesionan capítulo 4, i con nan ta beneficiá e congregacion?

⁸ Superintendentenan biahero i otro ancianonan cu tin privilegio di asignacionnan di sirbishi pa medio di Dios su bondad inmerecí ta ser yamá “donnan den hende.” Como representante di Jehova i Cabes dje congregacion, Jesus a percurá pa tin e hombernan spiritual aki afin cu nos por ser edificá individualmente i alcansá madures. (Efesionan 4:8-15) Cualkier don ta merecé un expresion di aprecio. Esaki ta specialmente e caso di un don cu ta fortificá nos pa sigui sirbi Jehova. Pues, anto, con nos por manifestá nos aprecio p’e trabou di superintendentenan biahero? Den ki maneranan nos por mustra cu nos ta ‘sigui apreciá e clase di hombernan aki’?—Filipensenan 2:29.

 9. Den ki maneranan nos por mustra aprecio pa superintendentenan biahero?

⁹ Ora e bishita dje superintendente di circuito ta ser anunciá, nos por cuminsá traha plan pa tene un participacion completo den e actividadnan dje congregacion p’e siman ei. Tal bes nos por apartá tempu extra pa apoyá e areglonan di sirbishi di veld durante e bishita. Kisas nos por sirbi como pionero auxiliar durante e luna ei. Siguramente nos lo kier pone e sugerencianan dje superintendente di circuito na práctica afin di mehorá nos ministerio. Un spiritu receptivo asina lo beneficiá nos i lo dun’é e siguransa cu su bishita ta unu probechoso. Sí, superintendentenan biahero ta bishitá e congregacion pa edificá nos, pero nan tambe tin cu ser edificá spiritualmente. Tabatin ocasionnan cu Pablo tabatin mester di animacion, i hopi biaha el a pidi compañeronan cristian pa haci oracion p’e. (Echonan 28:15; Romanonan 15:30-32; 2 Corintionan 1:11; Colosensenan 4:2, 3; 1 Tesalonicensenan 5:25) Superintendentenan biahero dje tempu actual di igual manera mester di nos oracionnan i animacion.

10. Con nos por yuda haci e trabou di un superintendente biahero un goso?

¹⁰ Nos sa bisa e superintendente di circuito i su esposa cuantu nos ta apreciá nan bishita? Nos ta gradicié p’e conseho útil cu e ta duna nos? Nos ta lagu’e sa ora su sugerencianan pa sirbishi di veld ta aumentá nos goso den e ministerio? Si nos ta haci asina, esaki lo yuda haci su trabou un goso. (Hebreonan 13:17) Un superintendente di circuito na Spaña a comentá particularmente riba cuantu e i su esposa ta atesorá e cartanan di gratitud cu nan ta ricibí despues di bishitá congregacionnan. “Nos ta warda e tarhetanan aki i ta lesa nan ora nos ta sinti nos desanimá,” e ta bisa. “Nan ta un fuente di berdadero animacion.”

11. Pakico nos mester laga esposa di superintendentenan di circuito i di districto sa cu nos ta stima nan i ta apreciá nan?

¹¹ E esposa dje superintendente biahero siguramente ta saca beneficio for di palabranan di encomendacion. El a haci hopi sacrificio pa asistí su esposo den e área di sirbishi aki. E ruman muhernan fiel aki ta bandoná e deseo natural di tin nan mes cas i, den hopi caso, tambe di haña yu. E yu muher di Jefte tabata un dje sirbidornan di Jehova cu boluntariamente a renunciá su oportunidad di tin un esposo i un famia pa motibu di un voto cu su tata a haci. (Huesnan 11:30-39) Con su sacrificio a ser considerá? Huesnan 11:40 ta declará: “Di aña pa aña e yu muhernan di Israel tabata bai pa duna encomendacion n’e yu muher di Jefte e galadita, cuater dia den e aña.” Ta ki excelente ora nos ta haci e esfuerso pa bisa esposa di superintendentenan di circuito i di districto cu nos ta stima nan i ta apreciá nan!

“No Lubidá Hospitalidad”

12, 13. (a) Ki base bíblico tin pa ser hospitalario pa cu superintendentenan biahero i nan esposa? (b) Ilustrá con un hospitalidad asina por ta mutuamente beneficioso.

¹² Mustrando hospitalidad ta un otro manera pa manifestá amor i aprecio pa esnan cu ta den e trabou cristian di biaha di un lugá pa otro. (Hebreonan 13:2) Apostel Juan a encomendá Gayo pa a extendé hospitalidad na esnan cu tabata bishitá e congregacion como misioneronan biahero. Juan a skirbi: “Stimá, bo ta haciendo un trabou fiel den cualkier cos cu bo haci p’e rumannan, i nan ta asta hende straño, cu a duna testimonio di bo amor dilanti e congregacion. Por fabor, despachá esakinan riba nan caminda di un manera digno di Dios. Pasobra tabata na fabor di su nomber cu nan a sali, sin tuma nada for di hende dje nacionnan. P’esei, nos ta bou di obligacion di ricibí personanan asina hospitalariamente, pa nos por bira colaboradornan den e berdad.” (3 Juan 5-8) Awe, nos por promové e actividad di predicá e Reino dor di extendé un hospitalidad similar na superintendentenan biahero i na nan esposa. Naturalmente, ancianonan local mester haci sigur cu e caminda di acomodá nan ta satisfactorio, pero un superintendente di districto a bisa: “Nos enbolbimentu cu e rumannan no por ta basá riba ken por haci algu pa nos. Nos lo no kier ni duna e impresion ei. Nos mester ta dispuesto pa aceptá e hospitalidad di cualkier di nos rumannan, ricu of pober.”

¹³ Hospitalidad por ta mutuamente beneficioso. “Den mi famia, nos tabatin e custumber di invitá superintendentenan biahero pa keda cu nos,” Jorge, un ex-superintendente di circuito sirbiendo awor na Betel, ta corda. “Mi ta sinti cu e bishitanan aki a yudá mi mas cu mi a realisá e tempu ei. Durante mi adolesencia, mi tabatin problemanan spiritual. Mi mama tabata preocupá tocante esaki pero no tabata sa exactamente con pa yuda i p’esei a pidi e superintendente di circuito pa papia cu mi. Na promé instante mi a evit’é, ya cu mi tabatin miedu di ricibí crítica. Pero su manera amigabel finalmente a habri e canal di comunicacion. El a invitá mi pa bai come cuné riba un dialuna, i mi a habri mi curason pasobra mi tabatin e confiansa cu el a comprendé mi. El a scucha cu sumo atencion. Su sugerencianan práctico realmente a duna resultado, i mi a cuminsá progresá spiritualmente.”

14. Pakico nos mester apreciá ancianonan biahero en bes di criticá nan?

¹⁴ Un superintendente biahero ta trata na yuda tantu hóben como bieu den sentido spiritual. Siguramente, anto, nos mester mustra nos aprecio pa su esfuersonan. Sin embargo, kico lo pasa si nos critik’é pa su puntonan débil of compar’é desfaborablemente cu otronan cu a bishitá e congregacion? Probablemente, esaki lo ta masha descurashante. No tabata un animacion pa Pablo tende crítica riba su trabou. Aparentemente, algun cristian corintio tabata haci comentarionan di menosprecio tocante su aparencia i abilidad di papia. E mes a cita cu e críticonan ei tabata bisa: “Su cartanan tin peso i ta enérgico, pero su presencia en persona ta débil, i su papiamentu ta despreciabel.” (2 Corintionan 10:10) Sin embargo, felismente, superintendentenan biahero generalmente ta tende palabranan di aprecio amoroso.

15, 16. Con superintendentenan biahero i nan esposa ta ser afectá p’e amor i celo cu nan compañeronan creyente ta manifestá?

¹⁵ Un superintendente di circuito na Latinoamérica ta cana henter un dia largu den camindanan yen di lodo pa por bishitá su rumannan spiritual cu ta biba den un zona controlá pa gueriya. “Ta conmovedor pa mira e manera cu e rumannan ta mustra nan aprecio p’e bishita,” e ta skirbi. “Maske mi tin cu haci un esfuerso grandi pa yega ei, enfrentando hopi peliger i dificultad, tur esaki ta ser recompensá p’e amor i celo cu e rumannan ta mustra.”

¹⁶ Un superintendente di circuito na Africa ta skirbi: “Pa motibu dje amor cu e rumannan a mustra na nos, nos a stima e teritorio di Tanzania masha tantu! Rumannan tabata cla pa siña for di nos, i nan tabata contentu pa tin nos den nan cas.” Tabatin un vínculo amoroso i felis entre apostel Pablo i e pareha cristian casá Akila i Prisca di promé siglo. De facto, Pablo a bisa di nan: “Duna mi cumindamentu na Prisca i Akila mi colaboradornan den Cristo Jesus, kendenan a risca nan mes garganta pa mi alma, na ken no ami so sino tambe tur e congregacionnan dje nacionnan ta duna gradicimentu.” (Romanonan 16:3, 4) Superintendentenan biahero i nan esposa ta gradicidu di tin como nan amigunan Akilanan i Priscanan dje tempu actual cu ta haci un esfuerso special pa mustra hospitalidad i percurá compañerismo.

Fortaleciendo e Congregacionnan

17. Pakico nos por bisa cu tin sabiduria tras dje areglo di superintendentenan biahero, i unda nan ta haña nan instruccion?

¹⁷ Jesus a bisa: “Sabiduria ta ser probá hustu dor di su obranan.” (Mateo 11:19) E sabiduria tras dje areglo di superintendente biahero ta evidente den e echo cu e ta yuda fortalecé e congregacionnan dje pueblo di Dios. Durante Pablo su segundo biahe como misionero, e huntu cu Sílas ‘a pasa exitosamente dor di Siria i Cilicia, fortaleciendo e congregacionnan.’ E buki di Echonan ta bisa nos: “Segun cu nan tabata biahando dor dje stadnan, nan tabata entregá na esnan ei pa nan warda, e decretonan cu e apostelnan i e ancianonan cu tabata den Jerusalem a dicidí ariba. P’esei, en berdad, e congregacionnan a sigui ser hací firme den fe i a aumentá na cantidad dia tras dia.” (Echonan 15:40, 41; 16:4, 5) Superintendentenan biahero dje tempu actual ta ricibí instruccion spiritual pa medio dje Scritura i e publicacionnan di “e esclabo fiel i discreto,” mescos cu tur otro cristian.—Mateo 24:45.

18. Con superintendentenan biahero ta fortalecé e congregacionnan?

¹⁸ Sí, ancianonan biahero mester sigui alimentá nan mes na Jehova su mesa spiritual. Nan mester ta bon na haltura dje métodonan i guia cu e organisacion di Dios ta sigui. E ora ei hombernan asina por ta un berdadero bendicion pa otronan. Pa medio di nan ehempel excelente di celo den e sirbishi di veld, nan por yuda compañeronan creyente mehorá den e ministerio cristian. E discursonan basá riba Bijbel cu e ancianonan bishitante aki ta duna ta edificá esnan cu ta scucha den sentido spiritual. Dor di yuda otronan aplicá e conseho dje Palabra di Dios, sirbi na armonia cu Jehova su pueblo rond mundu, i usa e percuracionnan spiritual cu Dios ta haci disponibel atrabes dje “esclabo fiel,” superintendentenan biahero ta fortalecé e congregacionnan cu nan tin e privilegio di bishitá.

19. Ki preguntanan ta keda pa nos considerá?

¹⁹ Ora e organisacion di Jehova a instituí e trabou di ancianonan biahero entre e Studiantenan di Bijbel rond di shen aña pasá, e revista aki a declará: “Nos lo spera riba e resultadonan i riba mas guia di Señor.” Jehova su guia a keda claramente manifestá. Pa motibu di su bendicion i bou dje supervision dje Cuerpo Gobernante, e trabou aki a ser expandé i refiná den transcurso di añanan. Como resultado, congregacionnan di Testigonan di Jehova rond parti dje tera ta ser hací firme den fe i ta aumentando na cantidad dia tras dia. Evidentemente, Jehova ta bendicionando e spiritu di sacrificio propio di e donnan aki den hende. Pero con superintendentenan biahero por cumpli cu nan trabou exitosamente? Kico ta nan metanan? Con nan por ta di mayor beneficio p’e congregacionnan?

Con Lo Bo Respondé?

◻ Cua ta algun tarea di superintendentenan di circuito i di districto?

◻ Pakico superintendentenan biahero mester tin un spiritu di sacrificio propio?

◻ Con nos por mustra aprecio p’e trabou di ancianonan biahero i nan esposa?

◻ Kico superintendentenan biahero por haci pa haci e congregacionnan firme den fe?

[Plachi na página 10]

Biaha constantemente ta rekerí un spiritu di sacrificio propio

[Plachi na página 13]

Bo a mustra hospitalidad na superintendentenan biahero i nan esposa?