Hospitalidad Cristian den un Mundu Dividí

“P’esei, nos ta bou di obligacion di ricibí personanan asina hospitalariamente, pa nos bira colaboradornan den e berdad.”—3 JUAN 8.

 1. Ki donnan altamente deseabel e Creador a duna humanidad?

“HUMANIDAD no tin nada mihó bou di solo cu come i bebe i alegrá, i cu esei mester compañá nan den nan trabou duru durante e dianan di nan bida, cu e Dios berdadero a duna nan bou di solo.” (Eclesiástes 8:15) Cu e palabranan ei e congregador hebreo di antigwedad ta bisa nos cu Jehova Dios no solamente kier pa su creacion humano ta gososo i felis sino tambe ta percurá e medionan pa nan ta asina. Atrabes di historia humano ta parce cu un deseo comun entre hende na tur parti ta pa gosa i pasa bon.

 2. (a) Con humanidad a abusá di loke tabata Jehova su propósito pa nan? (b) Kico ta e resultado?

² Awe nos ta biba den un sociedad hedonista den cua hende ta preocupá cu corementu tras di placer i pasa bon. Mayoria hende a bira “stimador di nan mes, . . . stimador di placer mas bien cu stimador di Dios,” manera Bijbel a predicí. (2 Timoteo 3:1-4) Esaki, naturalmente, ta un deformacion flagrante di Jehova Dios su propósito. Ora e corementu tras di ‘pasa bon’ ta bira e meta principal, of ora gratificacion propio ta bira e único obhetivo, no tin berdadero satisfaccion, i ‘tur cos ta bira banidad i un corementu tras di bientu.’ (Eclesiástes 1:14; 2:11) Como resultado di esaki e mundu ta yen di hende solitario i frustrá cu, na su turno, ta hiba na hopi dje problemanan den sociedad. (Proverbionan 18:1) Hende a bira desconfiá di otro i a bira dividí racialmente, étnicamente, socialmente i económicamente.

 3. Con nos por haña berdadero goso i satisfaccion?

³ Ki diferente cosnan lo tabata si hende a imitá Jehova su manera di trata cu otronan—siendo bondadoso, generoso, hospitalario! El a haci cla cu e secreto pa berdadero felicidad no ta sinta den purba satisfacé nos propio deseonan. Mas bien, esaki ta e clave: “Tin mas felicidad den duna cu tin den ricibí.” (Echonan 20:35) Pa haña berdadero goso i satisfaccion, nos tin cu vence bareranan i divisionnan cu lo por limitá nos. I nos tin cu cera cu esnan cu ta sirbiendo Jehova huntu cu nos. Ta esencial pa nos haci caso dje conseho: “P’esei, nos ta bou di obligacion di ricibí personanan asina hospitalariamente, pa nos bira colaboradornan den e berdad.” (3 Juan 8) Mustrando hospitalidad na esnan cu ta merec’é, n’e grado cu nos circunstancianan ta permití, ta bentahoso den dos manera—e ta beneficiá tantu esnan cu ta duna como esnan cu ta ricibí. Ken anto, ta entre esnan merecedor cu nos tin cu ‘ricibí hospitalariamente’?

“Cuida e Huérfanonan i Biudanan”

 4. Ki cambio den e structura di famia nos ta mira asta entre algun di Jehova su pueblo?

⁴ Famianan stabil i matrimonionan felis ta masha scars awendia. Aumento den e cifranan di divorcio i e cantidad aumentante di mamanan no-casá rond mundu, a cambia drásticamente e famia tradicional. Como resultado, hopi persona cu a bira Testigo di Jehova den añanan recien ta bini di famianan kibrá. Nan ta sea divorciá of separá for di nan partnernan matrimonial, of nan ta biba den famianan cu un solo mayor. Ademas, manera Jesus a predicí, e berdad cu el a siña hende a resultá den division den hopi famia.—Mateo 10:34-37; Lucas 12:51-53.

 5. Kico Jesus a bisa cu por ta un fuente di animacion pa esnan den famianan dividí?

⁵ Ta conmovedor pa mira esnan nobo tuma un posicion firme p’e berdad, i hopi biaha nos ta consolá nan cu e promesa animador di Jesus: “Di berdad mi ta bisa boso, Ningun hende a laga cas of ruman homber of ruman muher of mama of tata of yu of cunucu pa mi causa i pa causa dje bon nobo cu lo no haña shen biaha mas tantu awor den e periodo di tempu aki, cas i ruman homber i ruman muher i mama i yu i cunucu, huntu cu persecucion, i den e binidero sistema di cosnan bida eterno.”—Marco 10:29, 30.

 6. Con nos por bira ‘rumannan homber, rumannan muher, mamanan i yunan’ pa e “huérfanonan i biudanan” entre nos?

⁶ Ma ken ta e ‘rumannan homber i rumannan muher i mamanan i yunan’ aki? Djis mira un cantidad grandi di hende na un Salon di Reino, hopi biaha shen of mas, cu ta yama nan mes ruman no ta pone un persona sinti automáticamente cu esakinan ta su rumannan homber, rumannan muher, mamanan i yunan. Considerá e punto aki: Disipel Santiago ta recordá nos cu pa nos adoracion ta aceptabel pa Jehova, nos tin cu ‘cuida huérfanonan i biudanan den nan tribulacion i mantené nos sin mancha dje mundu.’ (Santiago 1:27) Esei ta nificá cu nos no mester permití actitudnan mundano di orguyo pasobra nos ta bon pará i superioridad di rango social cera nos porta di compasion pa cu “huérfanonan i biudanan” asina. Mas bien, nos tin cu tuma e iniciativa pa extendé na nan nos compañerismo i hospitalidad.

 7. (a) Kico ta e berdadero propósito pa ser hospitalario cu “huérfanonan i biudanan”? (b) Ken tambe por ta den e posicion pa mustra hospitalidad cristian?

⁷ Mustra hospitalidad na “huérfanonan i biudanan” no semper ta encerá cu nos tin cu compensá pa loke nan por ta falta den sentido material. Famianan cu un solo mayor of dividí pa motibu di religion no necesariamente ta financieramente mal pará. Sin embargo, e asociacion saludabel, e ambiente di famia, e compañerismo cu personanan di diferente edad, i e compartimentu di bon cosnan spiritual—esakinan ta aspectonan di bida cu ta di gran balor. Pues, cordando cu loke ta conta no ta cuantu cos di come i bebe tin na un ocasion, sino e spiritu di amor i unidad, ta ki excelente cu, tin biaha, asta “huérfanonan i biudanan” por mustra hospitalidad na compañeronan cristian!—Compará cu 1 Reynan 17:8-16.

Tin Stranhero Meimei di Nos?

 8. Ki cambio nos ta mira den hopi congregacion di Testigonan di Jehova?

⁸ Nos ta biba den un tempu di migracion masal. “Mas cu 100 miyon hende rond mundu ta biba den paisnan di cua nan no ta ciudadano, i 23 miyon a haña nan forsá pa muda for di nan cas den nan mes pais,” segun World Press Review. Un resultado directo di esaki tabata cu den hopi área, specialmente den stadnan mas grandi, congregacionnan di Jehova su pueblo cu un tempu tabata consistí pa mayor parti di un solo rasa of nacionalidad awor ta contené hende for di diferente parti dje mundu. Tal bes esaki ta e caso caminda bo ta biba. Sin embargo, con nos mester mira e “stranheronan” aki, manera e mundu kisas ta yama nan, kende nan idioma, custumbernan i estilo di bida por ta diferente for di esun di nos?

 9. Den ki trampa serio nos por cai relacioná cu nos punto di bista di “stranheronan” cu ta drentando den e congregacion cristian?

⁹ Bisá cu poco palabra, nos no mester permití ningun tendencia di miedu di hende straño pone nos sinti cu nos di un of otro manera ta mas merecedor dje privilegio di conocé e berdad cu esnan cu a bini for di un pais stranhero of asina yamá pagano; tampoco nos mester sinti como si fuera esnan nobo aki ta trapa nos derecho di usa e Salon di Reino of otro propiedadnan. Apostel Pablo tabatin cu recordá algun cristian hudiu di promé siglo, cu tabatin tal punto di bista, cu realmente ningun hende tabata merecedor; tabata e bondad inmerecí di Dios cu a haci posibel pa cualkier hende mes gana salbacion. (Romanonan 3:9-12, 23, 24) Nos mester alegrá cu e bondad inmerecí di Dios ta alcansando awor asina tantu hende cu, den un manera of otro, no a haña e oportunidad di tende e bon nobo. (1 Timoteo 2:4) Con nos por mustra cu nos cariño pa nan ta sincero?

10. Con nos por mustra cu nos ta sinceramente hospitalario pa cu e “stranheronan” meimei di nos?

¹⁰ Nos por sigui e amonestacion di Pablo: “Ricibí un e otro cu gustu, mescos cu Cristo tambe a ricibí nos cu gustu, cu gloria pa Dios na bista.” (Romanonan 15:7) Siendo cu nos ta conciente cu hende for di otro pais of antecedentenan hopi biaha ta den circunstancianan desbentahoso, nos mester mustra nan bondad i interes ora ta den nos alcanse pa haci esei. Nos mester ricibí nan cu gustu den nos seno, trata cada un di nan “manera un nativo di boso,” i “stim’é mescos cu bo mes.” (Levítico 19:34) Kisas no ta fácil pa haci esaki, pero nos lo logra si nos ta corda e conseho: “Stop di ser formá segun e sistema di cosnan aki, mas bien sea transformá dor di rehací boso mente, pa boso por proba pa boso mes loke ta e bon i aceptabel i perfecto boluntad di Dios.”—Romanonan 12:2.

Compartí cu e Santunan

11, 12. Ki consideracion special a ser duná na cierto sirbidornan di Jehova den (a) Israel di antigwedad (b) e promé siglo?

¹¹ Entre esnan cu ta berdaderamente merecedor di nos consideracion i hospitalidad tin cristiannan maduro cu ta traha duru pa nos bienestar spiritual. Jehova a haci percuracion special p’e sacerdotenan i e levitanan den Israel di antigwedad. (Númeronan 18:25-29) Den e promé siglo, cristiannan tambe a ser instá pa percurá pa esnan cu a sirbi nan den capacidadnan special. E relato na 3 Juan 5-8 ta duna nos un bistaso dje laso estrecho di amor cu a existí entre e cristiannan di promé.

¹² E apostel di edad avansá, Juan, a duna balor haltu n’e bondad i hospitalidad cu Gayo a mustra pa cu cierto rumannan biahero mandá pa bishitá e congregacion. E rumannan aki—incluyendo Demetrio, aparentemente esun cu a entregá e carta di Juan—tur tabata stranhero of desconocí pa Gayo. Pero nan a ser ricibí hospitalariamente pasobra tabata “na fabor di [Dios] su nomber cu nan a sali.” Juan a expres’é dje manera aki: “P’esei, nos ta bou di obligacion di ricibí personanan asina hospitalariamente, pa nos bira colaboradornan den e berdad.”—3 Juan 1, 7, 8.

13. Ken entre nos awe specialmente ta merecé di ser ‘ricibí hospitalariamente’?

¹³ Awe, den e organisacion di Jehova, tin hopi ruman cu ta haciendo esfuerso vigoroso na fabor di henter e asociacion di rumannan. Esakinan ta incluí e superintendentenan biahero, cu ta dedicá nan tempu i energia un siman tras di otro pa edificá congregacionnan; e misioneronan, cu ta laga famia i amigu atras pa bai predicá den paisnan stranhero; esnan cu ta sirbi den casnan di Betel of oficinanan di sucursal, cu ta ofrecé nan servicio boluntariamente pa apoyá e obra mundial di predicacion; i esnan den e sirbishi di pionero, cu ta dedicá e mayor parti di nan tempu i energia den e ministerio di veld. Básicamente, tur esakinan ta traha duru, no pa ningun gloria of ganashi personal, sino motivá pa amor p’e hermandad cristian i pa Jehova. Nan ta digno di nos imitacion debí na nan debocion di henter alma i nan ta merecé di ser ‘ricibí hospitalariamente.’

14. (a) Den ki manera nos ta bira mihó cristian ora nos ta mustra hospitalidad na esnan fiel? (b) Pakico Jesus a bisa cu Maria a scoge “e bon porcion”?

¹⁴ Apostel Juan a señalá cu ora nos ta “ricibí personanan asina hospitalariamente,” nos ta “bira colaboradornan den e berdad.” Den un sentido nos ta bira mihó cristian dor di esei. Esaki ta pasobra obranan cristian ta incluí haci bon na compañeronan creyente. (Proverbionan 3:27, 28; 1 Juan 3:18) Tin recompensa den un otro manera tambe. Ora Maria i Marta a ricibí Jesus den nan cas, Marta kier tabata un bon anfitrion dor di prepará “hopi cos” pa Jesus. Maria a mustra hospitalidad den un manera diferente. El a “cai sinta na pia di Señor i a sigui scucha na su palabra,” i Jesus a encomend’é pa a scoge “e bon porcion.” (Lucas 10:38-42) Combersacionnan i consideracionnan cu esnan cu tin añanan largu di experencia hopi biaha ta e puntonan sobresaliente ora nos ta pasa un anochi den nan compania.—Romanonan 1:11, 12.

Na Ocasionnan Special

15. Ki ocasionnan special por resultá di ta oranan di goso pa Jehova su pueblo?

¹⁵ Aunke cristiannan berdadero no ta sigui custumbernan popular ni ta celebrá dianan di fiesta i festividadnan mundano, tin ocasionnan cu nan ta bini huntu pa disfrutá di otro su compania. Por ehempel, Jesus a asistí na un fiesta di casamentu na Cana i a contribuí n’e goso dje ocasion dor di efectuá su promé milager ei. (Juan 2:1-11) Di igual manera awe, e pueblo di Jehova ta pasa oranan di goso huntu na ocasionnan special mescos asina, i celebracion i hacimentu di fiesta apropiado ta agregá hopi goso na eventonan asina. Sin embargo, kico ta apropiado?

16. Ki instruccionnan nos tin pa loke ta conducta apropiado asta pa ocasionnan special?

¹⁶ For di nos studio di Bijbel, nos ta siña kico ta conducta apropiado pa cristiannan, i esaki nos ta sigui tur ora. (Romanonan 13:12-14; Galationan 5:19-21; Efesionan 5:3-5) Reunionnan social, sea ta en coneccion cu casamentu of pa cualkier otro motibu, no ta duna nos libertad pa bandoná nos normanan cristian ni pa haci algu cu bou di circunstancia normal nos lo no haci; tampoco nos ta obligá pa sigui tur e custumbernan dje pais den cua nos ta biba. Hopi di eseinan ta basá riba custumbernan religioso falsu of supersticionnan, i otronan ta enbolbé conducta claramente inaceptabel pa cristiannan.—1 Pedro 4:3, 4.

17. (a) Ki factornan ta mustra cu e fiesta di casamentu na Cana tabata bon organisá i supervisá den un manera apropiado? (b) Kico ta indicá cu Jesus a aprobá e ocasion ei?

¹⁷ Lesando Juan 2:1-11, no ta difícil pa nos mira cu e ocasion tabata unu cu hopi detaye i cu un cantidad basta grandi di invitado tabata presente. Sin embargo, Jesus i su disipelnan tabata huéspednan “invitá;” nan no a djis cana drenta, maske por lo ménos algun di nan probablemente tabata pariente dje anfitrion. Nos ta ripará tambe cu tabatin esnan cu tabata “sirbiendo” i tambe un “director,” cu tabata duna instruccion en cuanto kico a ser sirbí of hací. Tur esaki ta indicá cu e asuntu tabata bon organisá i supervisá den un manera apropiado. E relato ta terminá declarando cu pa medio di loke Jesus a haci n’e fiesta, el a “manifestá su gloria.” Lo el a scoge e ocasion ei pa haci esei si e tabata un fiesta descontrolá i yen di bochincha? Sin duda cu no.

18. Ki consideracion serio mester ser duná na cualkier evento social?

¹⁸ Kico anto di cualkier ocasion special den cua nos kisas ta sirbi como anfitrion? Nos mester corda cu e propósito di ricibí otronan cu hospitalidad ta pa nos tur por “bira colaboradornan den e berdad.” Pues, no ta suficiente pa catalogá un evento como un reunimentu di “Testigo.” Nos por puntra, E ta en realidad un testimonio di ken nos ta i kico nos ta kere? Nunca nos mester mira ocasionnan asina como oportunidadnan pa mira con leu nos por bai den imitá e maneranan dje mundu i den entregá na ‘e deseo di carni i e deseo di wowo i e exhibicion grandioso di nos medio di biba.’ (1 Juan 2:15, 16) Mas bien, e ocasionnan aki mester reflehá apropiadamente nos papel como Testigonan di Jehova, i nos mester ta sigur cu loke nos ta haci ta trece gloria i onor na Jehova.—Mateo 5:16; 1 Corintionan 10:31-33.

‘Sea Hospitalario Sin Keha’

19. Pakico nos mester ta “hospitalario un cu otro sin keha”?

¹⁹ Segun cu condicionnan di mundu ta sigui deteriorá i hende ta bira cada bes mas dividí, nos tin cu haci tur loke ta na nos alcanse pa fortalecé e laso estrecho cu ta existí entre cristiannan berdadero. (Colosensenan 3:14) P’e propósito aki nos mester tin “amor intenso un pa otro,” manera Pedro a insta nos. Anto, den términonan práctico, el a agregá: “Sea hospitalario un cu otro sin keha.” (1 Pedro 4:7-9) Nos ta dispuesto pa tuma e iniciativa pa ta hospitalario cu nos rumannan, pa haci esfuerso pa ta bondadoso i cla pa yuda? Of nos ta keha ora un oportunidad asina presentá? Si esei ta e caso, nos ta nulificá e goso cu nos lo por tabatin i tambe perde e recompensa di felicidad cu ta bini di haci loke ta bon.—Proverbionan 3:27; Echonan 20:35.

20. Ki bendicionnan ta spera nos si nos ta practicá hospitalidad den e mundu dividí djawe?

²⁰ Trahando estrechamente cu nos compañeronan cristian, siendo bondadoso i hospitalario cu otro, lo trece bendicionnan sin límite. (Mateo 10:40-42) Na hende asina Jehova a primintí cu lo e “span su tent riba nan. Nan lo no tin hamber mas ni sed mas.” Ser den Jehova su tent ta nificá disfrutá di su proteccion i hospitalidad. (Revelacion 7:15, 16; Isaías 25:6) Sí, djis tras di porta tin e perspectiva di disfrutá di Jehova su hospitalidad pa semper.—Salmo 27:4; 61:3, 4.

Bo Por Splica?

◻ Kico nos no mester pasa por haltu si nos kier haña berdadero goso i satisfaccion?

◻ Ken ta e “huérfanonan i biudanan,” i con nos mester “cuida” nan?

◻ Con nos mester mira e “stranheronan” meimei di nos?

◻ Ken ta merecé consideracion particular awe?

◻ Con ocasionnan special mester reflehá e berdadero spiritu di hospitalidad?

[Plachi na página 16, 17]

Na ocasionnan festivo nos por ta hospitalario pa cu stranheronan, cu yunan sin tata, cu esnan den sirbishi di tempu completo i cu otro invitadonan