“Noticia Alegre” for di Apocalipsis

“Mi a mira un otro angel bula meimei di shelu, i e tabatin bon nobo eterno pa declará como noticia alegre na esnan cu ta biba riba tera.”—REVELACION 14:6.

 1. Aunke Testigonan di Jehova ta kere cu e buki di Apocalípsis ta inspirá, pakico nan no ta un “secta apocalíptico”?

CONTRARIO n’e acusacionnan contra nan, Testigonan di Jehova no ta un “secta apocalíptico” ni un “culto di huicio final.” Sin embargo, sí nan ta aceptá Apocalípsis, esta e buki di Revelacion, como parti dje Palabra inspirá di Dios. Ta berdad cu Revelacion ta contené mensahe di huicio contra e malbadonan. Pero den nan obra público di duna testimonio, Dios su sirbidónan ta enfocá principalmente riba e speransa maraviyoso cu tin den Bijbel, incluso esun den Apocalípsis, of Revelacion. Pues, nan no ta pone ni kita nada for dje palabranan profético cu tin den dje.—Revelacion 22:18, 19.

Proclamadó di Noticia Alegre

 2. Cua ta algun texto bíblico cu Testigonan di Jehova ta usa cu frecuencia den nan trabou di predicá?

² Un base bíblico p’e ministerio público di Testigonan di Jehova, citá cu frecuencia, ta Jesus su declaracion: “E bon nobo aki dje reino lo ser anunciá den tur e tera habitá como testimonio pa tur nacion; i e ora ei e fin lo yega.” (Mateo 24:14, nota na pia di página) I kico ta “e bon nobo aki dje reino”? Hopi Testigo lo contestá dor di cita versículonan for di Revelacion capítulo 20 i 21 cu ta referí na Cristo su Reino di Mil Aña i su gobernacion di Reino i e sociedad humano, caminda lo no tin morto, ni lamento ni dolor “mas.”—Revelacion 20:6; 21:1, 4.

 3. E ministerio público di Testigonan di Jehova ta corespondé cu cua mision?

³ Como proclamadó dje noticia alegre aki, en realidad Testigonan di Jehova ta bocero di un mensahero celestial simbólico kende su mision tambe ta describí den Revelacion. “Mi a mira un otro angel bula meimei di shelu, i e tabatin bon nobo eterno pa declará como noticia alegre na esnan cu ta biba riba tera, i na tur nacion i tribu i lenga i pueblo.” (Revelacion 14:6) E “bon nobo eterno” ta incluí e anuncio cu “e reino [of, gobernacion] di mundu” a “bira e reino di nos Señor i di su Cristo” i cu Jehova su “tempu señalá” a bini “pa causa ruina di esnan cu ta ruinando e tera.” (Revelacion 11:15, 17, 18) Esei no ta ègt bon noticia?

Loke Revelacion Tin pa Nos

 4. (a) Ki berdadnan fundamental capítulo 1 di Revelacion ta describí? (b) Kico ta rekerí di esnan cu ta deseá di saca beneficio for di noticia alegre?

⁴ E promé capítulo dje buki di Revelacion ta presentá Jehova como “e Alfa i e Omega, . . . Esun cu ta i cu tabata i cu ta bini, e Todopoderoso.” I e ta presentá su Yu, Jesucristo, como “e Fiel Testigo,” “e primogénito dje mortonan” i “e Gobernante dje reynan di tera.” Tambe e ta papia di Jesus como “esun cu ta stima nos i cu a libra nos di nos picánan pa medio di su mes sanger.” (Revelacion 1:5, 8) Asina, for di su comienso, Revelacion ta splica berdadnan fundamental cu ta salba bida. A ménos cu “esnan cu ta biba riba tera” reconocé e soberania di Jehova, pone fe den e sanger dramá di Jesus, i kere cu Jehova a resucit’é i cu awor Cristo ta e Gobernante cu Dios a nombra p’e tera, nan lo no beneficiá dje noticia alegre cu nan ta haña tende.—Salmo 2:6-8.

 5. Den ki papel Revelacion capítulo 2 i 3 ta pinta Cristo?

⁵ E siguiente dos capítulonan ta describí Cristo Jesus como e Superintendente celestial amoroso dje congregacionnan di su disipelnan riba tera. E rol dirigí na un seleccion di shete congregacion cristian cu a existí den Asia Menor den promé siglo E.C. a contené animacion i conseho firme cu ta aplicá te awe. En general e mensahenan mandá p’e congregacionnan ta cuminsá cu palabranan manera “mi conocé bo echonan” of “mi conocé bo tribulacion.” (Revelacion 2:2, 9) Sí, Cristo tabata sa precis kico tabata pasando den congregacion di su disipelnan. El a encomendá algun pa nan amor, fe, labor den e ministerio, awante i fieldad na su nomber i palabra. El a reprendé otronan pasobra nan a laga nan amor pa Jehova i su Yu fria, of nan a cai den inmoralidad sexual, idolatria of secta apóstata.

 6. Kico e vision registrá den capítulo 4 ta yuda hende comprendé?

⁶ Capítulo 4 ta duna un vision impresionante dje trono celestial di Jehova Dios. E ta ofrecé un bistaso dje gloria di Jehova su presencia i dje structura di gobernacion celestial cu lo e usa. E gobernantenan coroná, kende nan trono ta rondoná e trono central di universo, ta duna homenahe na Jehova i ta proclamá: “Bo ta digno, Jehova, asta nos Dios, pa ricibí e gloria i e onor i e poder, pasobra abo a crea tur cos, i pa causa di bo boluntad nan a existí i a ser creá.”—Revelacion 4:11.

 7. (a) Kico e angel ta manda habitante di tera haci? (b) Kico ta un parti importante di nos obra educativo?

⁷ Esaki ta nificá algu p’e pueblo di Dios awe? Sigur cu sí. Si nan kier biba bou dje Reino di Mil Aña, nan tin cu haci caso di loke e ‘angel cu ta bula meimei di shelu’ ta proclamá: “Teme Dios i dun’é gloria, pasobra e ora di huicio di dje a yega.” (Revelacion 14:6, 7) Un dje propósitonan principal dje obra di educacion bíblico cu Testigonan di Jehova ta efectuá ta pa yuda “esnan cu ta biba riba tera” conocé i adorá Jehova, reconocé cu e ta e Creador i someté nan mes boluntariamente na su soberania hustu.

E Lamchi Digno di Onor

 8. (a) Con capítulo 5 i 6 ta describí Cristo? (b) Kico tur hende cu scucha e noticia alegre por siña for dje vision aki?

⁸ E siguiente dos capítulonan, 5 i 6, ta presentá Jesucristo como e Lamchi hañá digno pa habri un rol cu shete seyo, revelando asina den idioma simbólico e sucesonan cu ta tuma lugá den nos tempu. (Compará cu Juan 1:29.) Bosnan celestial ta bisa e Lamchi simbólico aki: “Bo ta digno pa tuma e rol i habri su seyonan, pasobra bo a ser matá i cu bo sanger bo a cumpra hende pa Dios for di tur tribu i lenga i pueblo i nacion, i bo a haci nan ser un reino i sacerdotenan pa nos Dios, i nan tin cu goberná como rey riba tera.” (Revelacion 5:9, 10) E vision aki ta siña nos cu a base di Cristo su sanger dramá, cierto hendenan di tur orígen ta ser yamá pa ta huntu cuné den shelu i “goberná como rey riba tera.” (Compará cu Revelacion 1:5, 6.) Mas despues Revelacion ta revelá nan cantidad limitá.

 9. Con capítulo 6 ta presentá Cristo?

⁹ Den un otro vision, Cristo ta ser presentá como e ginete coroná riba un cabai blancu, saliendo pa ‘vence i pa completá su victoria.’ Afortunadamente, lo e vence e efectonan malbado cu e tres otro ginetenan di Apocalípsis ta simbolisá i kende nan careda intenso a trece guera, hamber i morto pa humanidad desde e aña crucial di 1914. (Revelacion 6:1-8) E papel único di Cristo, e Lamchi di Dios, den salbacion di humanidad i den realisacion di Jehova su propósitonan maraviyoso ta un tema principal dje obra di educacion bíblico di Testigonan di Jehova.

10. (a) Ki informacion importante capítulo 7 ta suministrá? (b) Con Cristo a papia di esnan cu ta ricibí e Reino?

¹⁰ Capítulo 7 en berdad ta contené noticia alegre. Ta den e buki di Revelacion so nos ta haña e cantidad di esnan cu Jesus a yama e “trupa chikitu” na ken e Tata dje Lamchi ta duna e Reino. (Lucas 12:32; 22:28-30) Jehova Dios ta seya esakinan pa medio di su spiritu. (2 Corintionan 1:21, 22) Apostel Juan, cu a ricibí e Revelacion, ta duna testimonio di esaki: “Mi a tende e cantidad di esnan cu a ser seyá, shenticuarenticuater mil.” (Revelacion 7:4) Un capítulo mas despues ta confirmá e cantidad exacto aki como e total di esnan “cumprá for di entre humanidad” pa goberná cu e Lamchi riba e ceru di Síon celestial. (Revelacion 14:1-4) Miéntras iglesianan di cristiandad ta duna splicacion vago i no-convincente dje cantidad aki, ta interesante cu e erudito di Bijbel E. W. Bullinger ta bisa di dje: “Ta e simpel declaracion di un echo: un cantidad definí na contraste cu e cantidad indefiní den e mésun capítulo aki.”

11. (a) Ki noticia alegre por haña den capítulo 7? (b) Kico a bira posibel pa miembronan dje “multitud grandi” alcansá?

¹¹ Na ki cantidad indefiní Bullinger a referí? Den versículo 9, apostel Juan a skirbi: “Despues dje cosnan aki mi a wak, i, mira! un multitud grandi, cu ningun hende por a conta, for di tur nacion i tribu i pueblo i lenga.” (Revelacion 7:9) Ken ta componé e multitud grandi aki, kico ta nan posicion actual dilanti Dios i kico tin den futuro pa nan? E contesta apocalíptico ta bon nobo pa habitante dje tera. Nos ta lesa: “Esakinan ta esnan cu a sali for dje tribulacion grandi, i nan a laba nan pañanan largu i a haci nan blancu den e sanger dje Lamchi.” Mediante fe den Cristo su sanger dramá, nan lo ser protehá durante “e tribulacion grandi.” Cristo “lo guia nan na fonteinnan di awa di bida. I Dios lo seca tur lágrima di nan wowo.” (Revelacion 7:14-17) Sí, miyones di hende cu ta biba awe por bira parti dje multitud incontabel cu lo sobrebibí e fin dje mal sistema di cosnan actual. Como súbdito dje Rey Jesucristo durante su Reino di Mil Aña, lo e guia nan na bida eterno riba tera. Esei no ta bon noticia?

“Su Huicionan Ta Berdadero i Hustu”

12, 13. (a) Kico capítulo 8 pa 19 ta contené? (b) Pakico e profecianan ei no mester preocupá hende di curason onrado?

¹² Capítulo 8 pa 19 pa gran parti ta responsabel p’e reputacion cu e buki Apocalípsis, of Revelacion, tin di ta un buki cu ta predicí catástrofenan spantoso. Nan ta contené mensahe di huicio enérgico (simbolisá pa tocá di trompet, plaga i conchinan di rabia divino) dirigí contra vários elemento di Satanas su sistema di cosnan. E huicionan aki lo ser ehecutá promé contra religion falsu (“Babilonia e Grandi”), despues contra e sistema político malbado, simbolisá pa bestia salbahe.—Revelacion 13:1, 2; 17:5-7, 15, 16.a

¹³ E capítulonan aki ta describí e limpiamentu di shelu, cu Satanas i su demoñonan tirá abou den becindario di tera. Esaki ta percurá e único splicacion lógico p’e afliccion mundial sin precedente desde 1914. (Revelacion 12:7-12) Tambe nan ta describí, den idioma simbólico, e destruccion di Satanas su sistema malbado di cosnan riba tera. (Revelacion 19:19-21) E sucesonan dramático aki mester shok hende di curason onrado? No, pasobra durante e ehecucion di Dios su huicionan, un multitud celestial ta sclama: “Alabá Jah! Salbacion i gloria i poder ta pertenecé na nos Dios, pasobra su huicionan ta berdadero i hustu.”—Revelacion 19:1, 2.

14, 15. (a) Den ki manera lo bini un fin hustu n’e mal sistema actual? (b) Pakico e parti aki di Apocalípsis mester ta un motibu di alegrá pa hende di curason onrado?

¹⁴ Jehova lo no producí un sistema di cosnan hustu sin eliminá for di tera esnan cu ta ruin’é. (Revelacion 11:17, 18; 19:11-16; 20:1, 2) Sin embargo, ningun estado político ni humano no tin e autoridad ni poder pa logra esaki. Ta Jehova i su Rey i Hues nombrá, Cristo Jesus, so por haci esaki den husticia.—2 Tesalonicensenan 1:6-9.

¹⁵ Manera Apocalípsis ta mustra bon cla, e propósito di Jehova ta pa trece un fin n’e sistema malbado aki. E echo aki mester ta un causa di alegria pa homber i muhernan cu ta “suspirá i keha debí na tur e cosnan detestabel cu ta ser hací.” (Ezekiel 9:4) Esaki mester graba den nan e necesidad urgente pa obedecé e yamada dje angel cu e noticia alegre, kende a declará: “Teme Dios . . . pasobra e ora di huicio di dje a yega, i p’esei, adorá Esun cu a traha e shelu i tera i laman i fontein di awa.” (Revelacion 14:7) Laga hende asina adorá i sirbi Jehova huntu cu su Testigonan, “cu ta warda e mandamentunan di Dios i cu tin e trabou di duna testimonio di Jesus.”—Revelacion 12:17.

E Glorioso Reino di Mil Aña

16. (a) Pakico e iglesianan di cristiandad a rechasá e speransa di Milenio? (b) Pakico Testigonan di Jehova ta kere cu e oracion modelo lo ser contestá?

¹⁶ Capítulo 20 pa 22 dje buki di Revelacion ta contené e base bíblico pa speransa den e Milenio. Esaki ta e único parti di Bijbel cu ta mencioná realmente un periodo di mil aña cu lo ta e preludio di un eternidad di felicidad den shelu i riba tera. Iglesianan di cristiandad a rechasá e speransa di Milenio. Ya cu doctrina di iglesia ta siña cu e hustunan ta bai shelu i e malbadonan ta bai fiernu, e no tin lugá pa un paradijs terenal. E oracion modelo, cu ta pidi pa Dios su “boluntat sea hasí na tera meskos ku na shelu,” a perde tur nificacion pa mayoria miembro di iglesianan di cristiandad. (Mateo 6:10, Beibel na papiamentu koriente) Pero esei no ta e caso cu Testigonan di Jehova. Nan ta kere firmemente cu Jehova Dios no a traha e tera “pornada,” sino “pa ser habitá.” (Isaías 45:12, 18) Di manera cu tantu profecia di antigwedad como e oracion modelo i e speransa apocalíptico dje Milenio, ta na armonia cu otro. Durante su Reino di Mil Aña, Cristo lo soru pa Jehova su boluntad tuma lugá riba tera, mescos cu e ta tuma lugá den shelu.

17. Kico ta indicá cu nos mester comprendé “e mil aña” den sentido literal?

¹⁷ E término “mil aña” ta aparecé seis bes den e promé shete versículonan di Revelacion capítulo 20. Ta notabel cu e ta ser usá cuater bes cu e artículo definí “e,” mustrando cu e ta referí na mil aña literal, no djis un periodo largu di tempu no-specificá, manera mayoria comentarista di cristiandad kier haci nos kere. Kico lo tuma lugá durante e Milenio? Di promé, lo neutralisá Satanas pa henter e periodo. (Revelacion 20:1-3; compará cu Hebreonan 2:14.) Esta bon noticia esei ta!

18. (a) Pakico por yama e Mil Aña un “dia” di huicio? (b) Kico lo sosodé na fin dje mil aña?

¹⁸ Siendo cu esnan cu ta ‘reina como rey cu Cristo pa mil aña’ ta ricibí “poder di husga,” de facto, e periodo aki ta un “dia” di huicio di mil aña. (Revelacion 20:4, 6; compará cu Echonan 17:31; 2 Pedro 3:8.) Lo resucitá e mortonan i, huntu cu e sobrebibientenan dje “tribulacion grandi,” nan lo haña un huicio hustu di acuerdo cu nan echonan, of accionnan, durante e tempu ei. (Revelacion 20:12, 13) Na fin dje mil aña, lo los Satanas pa un tempu corticu pa asina someté humanidad na un prueba final despues di cua lo destruí Satanas, su demoñonan i cualkier rebelde riba tera cu ta siguié, pa semper. (Revelacion 20:7-10) Hende cu ta pasa e prueba lo haña nan nomber skirbí permanentemente den “e buki di bida” i lo ser introducí den un bida eterno felis caminda nan lo sirbi i adorá Jehova riba un tera paradísico.—Revelacion 20:14, 15; Salmo 37:9, 29; Isaías 66:22, 23.

19. (a) Pakico nos por ta sigur cu e promesanan maraviyoso describí den e buki di Revelacion lo cumpli sin falta? (b) Kico nos lo considerá den e siguiente artículo?

¹⁹ Esei ta e noticia alegre cu Apocalípsis ta contené. Nan no ta promesa bashí di hende. Apostel Juan a skirbi: “Esun sintá riba e trono a bisa: ‘Mira! Mi ta haci tur cos nobo.’ Tambe, e ta bisa: ‘Skirbi, pasobra e palabranan aki ta fiel i berdadero.’” (Revelacion 21:5) Kico nos tin cu haci pa participá den e cumplimentu dje noticia alegre aki? E buki di Revelacion ta contené hopi conseho pa esnan cu kier agradá Dios. Sigui e consehonan ei lo duna nos un felicidad sin límite, awor i pa semper, manera e siguiente artículo lo mustra.

[Nota]

Puntonan di Repaso

◻ Ki berdadnan fundamental hañá den Revelacion capítulo 4 pa 6 ta forma un parti importante dje noticia alegre?

◻ Ki noticia alegre nos por haña den Revelacion capítulo 7?

◻ Pakico e mensahenan di huicio hañá den Revelacion no mester preocupá hende di curason onrado?

◻ Den ki maneranan e Milenio lo ta un “dia” di huicio?

[Plachi na página 10]

E Rey Jesucristo lo eliminá guera, hamber i morto completamente for di tera