Capítulo 25

E dos testigo rebibá

 1. Kico e angel fuerte a pidi Juan haci?

PROME cu e segundo calamidad a pasa finalmente, e angel fuerte a pidi Juan participa den un otro presentacion profético, esun teniendo cu ber cu e tempel. (Revelacion 9:12; 10:1) Esaki ta loke Juan a informa: “I un caña semehante di bara tabata duná na mi ora el a bisa: ‘Lanta i midi e santuario dje tempel di Dios i e altar i esnan cu ta adora den dje.’”—Revelacion 11:1.

E santuario dje tempel

 2. (a) Cua santuario di tempel a permanece te na nos dia djawe? (b) Ken ta Sumosacerdote den e santuario dje tempel, i kico ta su Lugar Santísimo?

² E tempel mencioná ei no por ta ningun tempel literal den Jerusalem, siendo cu e último di eseinan tabata destruí pa romano na aña 70 EC. Sin embargo, apóstol Pablo a mustra cu asta promé cu e destruccion, a presenta un otro santuario di tempel cu lo permanece te na nos dia. Esei ta e gran tempel spiritual cu ta cumpli cu tipo profético percurá pe tabernáculo i despues pa tempel trahá den Jerusalem. Esei ta e “berdadero tent, cu Jehova a lanta, i no hende,” i su Sumosacerdote ta Jesús, cu Pablo a bisa a sinta caba ne “man drechi dje trono dje Mahestad den cielo.” Su Lugar Santísimo ta e sitio dje presencia di Jehova den cielo mes.—Hebreo 8:1, 2; 9:11, 24.

 3. Den e tabernáculo, kico tabata simbolizá pe (a) cortina cu a separa e Lugar Santísimo for dje Lugar Santo? (b) sacrificio di animal? (c) altar di sacrificio?

³ Apóstol Pablo a splica cu e cortina dje tabernáculo, separando e Lugar Santísimo for dje compartamento santo, ta simboliza e carni di Jesús. Ora Jesús a sacrifica su bida, e cortina a sker na dos, mustrando cu e carni di Jesús no tabata un obstáculo mas pa strobé di drenta den e presencia di Jehova den cielo. Riba e base dje sacrificio di Jesús, subsacerdote ungí di dje cu a muri fiel també lo drenta den cielo ora e tempo yega. (Mateo 27:50, 51; Hebreo 9:3; 10:19, 20) Pablo a bisa també cu sacrificio continuo di bestia den e tabernáculo a siñala den futuro ne solo sacrificio di Jesús di su bida humano perfecto. E altar di sacrificio den e curá a representa e percuracion di Jehova, segun su boluntad, pa acepta e sacrificio di Jesús na fabor di “hopi”—di esnan ungí i, despues, dje otro carnénan—cu tabata “spera pé cu intenso anhelo pa nan salbacion.”—Hebreo 9:28; 10:9, 10; Juan 10:16.

 4. Kico tabata simbolizá pe (a) Lugar Santo? (b) curá interior?

⁴ Nos por conclui for dje informacion inspirá pa Dios cu e Lugar Santo den e tabernáculo a simboliza un condicion santo di locual Cristo a disfruta promé anto despues e miembronan ungí dje sacerdocio real dje 144.000 ora nan tabata riba tera ainda, promé cu nan a drenta patrás dje “cortina.” (Hebreo 6:19, 20; 1 Pedro 2:9) Esei ta wel representa cu nan a ser adoptá como yiu spiritual di Dios, mescos cu Dios a reconoce cu Jesús tabata su Yiu despues dje bautismo di Jesús den e rio Jordan na aña 29 EC. (Lucas 3:22; Romano 8:15) I kico dje curá interior, e único parti dje tabernáculo cu israelita no sacerdote por a mira i e lugar unda sacrificio tabata hací? Esei a simboliza e perfeccion di Jesús dilanti Dios cu a califiqué pa ofrece su bida pa humanidad. També e ta representa e posicion husto dje santonan, acreditá na nan riba e base dje sacrificio di Jesús, locual su sigidornan ungí ta disfruta durante cu nan ta riba tera.a—Romano 1:7; 5:1.

Midiendo e santuario dje tempel

 5. Den profecía dje Scritura Hebreo, kico tabata indicá pa (a) midimento di Jerusalem? (b) midimento dje tempel dje vision di Ezekiel?

⁵ Juan a wordu bisá pa “midi e santuario dje tempel di Dios i e altar i esnan cu ta adora den dje.” Kico esei ta indica? Den profecía dje Scritura Hebreo, tal midimento a duna garantía cu e declaracion di husticia tabata riba e base dje ley perfecto di Jehova. Den e dia dje mal rey Manasés, e midimento profético di Jerusalem tabata un testimonio dje huicio incambiabel di destruccion dje stad. (2 Rey 21:13; Lamentacion 2:8) Sin embargo, despues, ora Jeremías a mira midimento di Jerusalem, esei a confirma e reconstruccion dje stad. (Jeremías 31:39; mira també Zacarías 2:2-8.) Di igual manera, midimento extenso i en detaye dje tempel den e vision cu Ezekiel a mira tabata un garantía pa preso hudío den Babilonia di cu e adoracion berdadero lo ser restorá den nan patria. Esei tabata un recordatorio també, den bista di nan error, cu Israel dje ora ei padilanti tabatin cu cumpli cu e ley santo di Dios.—Ezekiel 40:3, 4; 43:10.

 6. Tabata un siñal di kico ora Juan tabata bisá pa midi e santuario dje tempel i sacerdote adorando den dje? Splica.

⁶ P’sei, ora Juan tabata mandá pa midi e santuario dje tempel i sacerdote cu tabata adora den dje, esei tabata un siñal di cu nada por preveni cumplimento dje propósito di Jehova tocante e arreglo dje tempel i di esnan asociá cuné, i cu tal propósito ta yegando su culminacion. Awor cu tur cos ta poní bao di pia dje angel fuerte di Jehova, ta tempo pe “montaña dje cas di Jehova” bira “firmemente establecí mas halto cu punta di montaña.” (Isaías 2:2-4) E adoracion puro di Jehova mester ta halzá, despues di siglonan di apostasía di cristiandad. Ta tempo també pa hende cu tabata fiel ruman di Jesús cu a muri ser resusitá den e “Lugar Santo dje Santonan.” (Daniel 9:24; 1 Tesalonicense 4:14-16; Revelacion 6:11; 14:4) I e últimonan seyá riba tera di “esclabo di nos Dios” mester ta midí conforme cu e ley divino pa nan califica pa nan lugar permanente den e arreglo dje tempel como yiu di Dios engendrá pe spiritu. E grupo cu Juan ta simboliza awe ta conoce bon tal ley santo i ta keda determiná di cumpli cu nan.—Revelacion 7:1-3; Mateo 13:41, 42; Efesio 1:13, 14; compara cu Romano 11:20.

Trapamento dje curá

 7. (a) Pakico Juan no tabata bisá pa midi e curá? (b) Na ki tempo e stad santo tabata trapá pa 42 luna? (c) Di ki manera e clero di cristiandad a nenga di cumpli cu ley husto di Jehova pa 42 luna?

⁷ Pakico tabata prohibí pa Juan midi e curá? El a bísanos lo sigiente: “Pero en cuanto e curá cu ta pafó dje santuario dje tempel, tiré afó i no midié, pasobra esei a ser duná ne nacionan, i nan lo trapa e stad santo bao di nan pia pa cuarentidos luna.” (Revelacion 11:2) Nos a ripara caba cu e curá interior ta simboliza e posicion husto riba tera di hende cristian engendrá pe spiritu. Segun cu nos lo mira, e referencia ei ta na e 42 luna literal extendiendo for di December di 1914 te na Juni di 1918, ora tur hende yamá cristian tabata sometí na un prueba severo. Nan a cumpli cu ley husto di Jehova durante e añanan di gera? E mayoría no a hacié. En conhunto, e clero di cristiandad a pone nacionalismo promé cu obedencia ne ley divino. Ne dos banda dje gera, cu tabata bringá principalmente den cristiandad, e clero a instiga homber hoven pa bai bringa. Miyones a wordu matá. Ora e huicio a cuminza ne cas di Dios na 1918, América també a drenta den e dramamento di sanger, i e clero di tur cristiandad a bira responsabel pa dramamento di sanger locual ta sclama pa vinganza divino ainda. (1 Pedro 4:17) E rechazamento di nan a bira permanente, incambiabel.—Isaías 59:1-3, 7, 8; Jeremías 19:3, 4.

 8. Durante Gera Mundial I, kico hopi Studiante di Bijbel a realiza, pero kico nan no a comprende completamente?

⁸ Sin embargo, kico dje grupo chikito di Studiante di Bijbel? Nan tabatin cu ser midí un bez na 1914 a base di nan obedencia ne ley divino? No. Mescos cu hende yamá cristian di cristiandad, nan també tabatin cu ser sometí na prueba. Nan tabata ‘tirá afó, duná ne nacionan’ pa haya prueba severo i ser persigí. Hopi di nan tabata sa cu nan no mag sali i mata nan próhimo, pero ainda nan no a comprende completamente neutralidad cristian. (Miqueas 4:3; Juan 17:14, 16; 1 Juan 3:15) Bao di presion dje nacionan, algun a haci compromiso.

 9. E nacionan ta trapa cua stad santo, i ken ta representa e stad riba tera?

⁹ Pero, di ki manera e stad santo tabata trapá pe nacionan? Claramente esei no ta referi na Jerusalem cu tabata destruí 25 aña promé cu e skirbimento di Revelacion. Mas bien, e stad santo ta Jerusalem Nobo, detayá despues den Revelacion, locual e resto di cristian ungí den e curá interior dje tempel ta representa awor riba tera. Cu tempo, eseinan també lo bira parti dje stad santo. Pues, trapamento di nan ta mescos cu trapamento dje stad mes.—Revelacion 21:2, 9-21.

E dos testigo

10. Kico fiel testigo di Jehova mester haci mientras cu nan ta ser trapá?

¹⁰ Asta durante nan trapamento, tal hende leal no a kita como fiel Testigo di Jehova. P’sei, e profecía ta sigi: “‘I lo mi haci mi dos testigo profetiza pa mil dos cient’i sesenta dia bistí den paña di sacu.’ E dos mata di oliba i dos candelaria ta simboliza eseinan i nan ta para dilanti di Señor dje tera.”—Revelacion 11:3, 4.

11. Kico tabata e nificacion dje fiel cristianan ungí profetizando den “paña di sacu”?

¹¹ Tal fiel cristian ungí tin mester dje calidad di awante, pasobra nan tabatin cu profetiza “den paña di sacu.” Kico esei kier men? Den tempo bíblico paña di sacu hopi bez a simboliza luto. Bistimento di dje a indica cu tal hende tabata abatí den duele of angustia. (Génesis 37:34; Job 16:15, 16; Ezekiel 27:31) Paña di sacu tabata asociá cu mensahe doloroso di condenacion of afliccion cu profeta di Dios tabatin cu proclama. (Isaías 3:8, 24-26; Jeremías 48:37; 49:3) Bistimento di paña di sacu por indica humildad of arrepentimento den bista di un advertencia divino. (Jonás 3:5) E paña di sacu cu e dos testigo a bisti ta parce di indica nan awante cu humildad anunciando e huicio di Jehova. Nan tabata testigo proclamando su dia di vinganza cu lo resulta den duele també pe nacionan.—Deuteronomio 32:41-43.

12. Pakico e periodo di tempo durante locual e stad santo tabata trapá ta parce di ser literal?

¹² E grupo cu Juan a simboliza tabatin cu predica tal mensahe pa un tempo claramente indicá: 1.260 dia, of 42 luna, e mesun periodo di tempo pe trapamento dje stad santo. Ta parce cu e periodo ta literal, siendo cu e tabata expresá di dos manera diferente, promé como luna, anto como dia. Además, na principio dje dia di Señor, tabatin un periodo marcá di tres aña i mei ora experencia penoso dje pueblo di Dios a corresponde cu suceso profetizá aki—cuminzando na December di 1914 i sigiendo te na Juni di 1918. (Revelacion 1:10) Nan a predica un mensahe doloroso, “di sacu,” tocante e huzgamento di Jehova di cristiandad i di mundo.

13. (a) E echo cu dos testigo a simboliza cristian ungí ta indica kico? (b) E echo cu Juan a yama e dos testigo “dos mata di oliba i dos candelaria” ta hácinos corda cua profecía di Zacarías?

¹³ E echo cu e dos testigo a simbolizánan ta confirma pa nos cu nan mensahe tabata exacto i bon fundá. (Compara cu Deuteronomio 17:6; Juan 8:17, 18.) Juan a yámanan e “dos mata di oliba i dos candelaria,” bisando cu nan ta “para dilanti di Señor dje tera.” Esei ta un referencia claro ne profecía di Zacarías, cu a mira un candelaria cu siete rama i dos mata di oliba. El a bisa cu e dos mata di oliba a simboliza “dos ungí,” esta, gobernador Zoróbabel i sumosacerdote Hosué, “pará banda di Señor di tur e tera.”—Zacarías 4:1-3, 14.

14. (a) E vision di Zacarías di dos mata di oliba ta indica kico? i e candelaria? (b) Kico cristian ungí a experimenta durante e promé gera mundial?

¹⁴ Zacarías a biba den un tempo di reconstruccion, i su vision dje dos mata di oliba a nifica cu Zoróbabel i Hosué tabata bendicioná cu e spiritu di Jehova pa fortalece e pueblo pa su trabao. E vision dje candelaria a haci Zacarías corda pa no ‘desprecia e dia di cosnan chikito’ pasobra e propósito di Jehova lo ser cumplí—“‘no cu forza militar, ni cu poder, sino cu mi spiritu,’ Jehova di ehército a bisa.” (Zacarías 4:6, 10; 8:9) E grupo chikito di hende cristian cu persistentemente a hiba e luz dje berdad na humanidad durante e promé gera mundial tabata usá di igual manera pe trabao di reconstruccion. Nan també tabata un fuente di animacion i, aunque nan tabata poco, nan a siña confia den e fortaleza di Jehova, sin desprecia e dia di comienzo chikito.

15. (a) E echo cu cristian ungí tabata pintá como dos testigo ta hácinos corda kico també? Splica. (b) E dos testigo tabata autoriza pa haci cua clase di siñal?

¹⁵ E echo cu nan tabata yamá dos testigo ta hácinos corda e transfiguracion. Den e vision, tres apóstol di Jesús a miré den gloria dje Reino, den compañía di Moisés i Elías. Esei a simboliza Jesús sintá riba su glorioso trono na 1914 pa haci e trabao cu e dos profeta a simboliza. (Mateo 17:1-3) Apropiadamente, Juan a mira e dos testigo haci siñal parecido di esnan di Moisés i Elías. Por ehempel, Juan a bisa di nan: “I si hende kier hácinan daño, candela ta sali for di nan boca i ta devora nan enemigo; i si hende kier hácinan daño, nan tin cu ser matá dje manera ei. Nan tin autoridad di cera cielo pa awa no cai durante e dianan di nan profetizamento.”—Revelacion 11:5, 6a.

16. (a) Con e siñal enbolbiendo candela ta hácinos corda e tempo ora hende a desafiá e autoridad di Moisés den Israel? (b) Con e clero di cristiandad a desafiá Studiante di Bijbel i a instiga problema pa nan durante e promé gera mundial, i con e Studiantenan a responde?

¹⁶ Esei ta hácinos corda e tempo ora hende a desafiá e autoridad di Moisés den Israel. Moisés a declara palabra ardiente di huicio, i Jehova a destrui e rebeldenan, kimando 250 di nan usando candela mes di cielo. (Número 16:1-7, 28-35) Di igual manera, lider di cristiandad a desafiá Studiante di Bijbel, bisando cu nan nunca a gradua di colegio teológico. Pero testigo di Dios tabatin identificacion mas halto como predicador: esta, hende manso cu a presta atencion na nan mensahe bíblico. (2 Corintio 3:2, 3) Na 1917 Studiante di Bijbel a publica e buki na inglés E misterio terminá, un comentario fuerte riba Revelacion i Ezekiel. Sigiendo esei, tabatin un partimento di 10.000.000 ehemplar dje tratado di cuater bladji na inglés Mensuario di Studiante di Bijbel cu e artículo principal titulá “E caimento di Babilonia—pakico cristiandad tin cu sufri awor—e resultado final.” Na América, clero rabiá a usa histeria di gera como excuus pa haci autoridad prohibi e buki. Den otro país e buki tabata censurá. No obstante, sirbidor di Dios a sigi combati usando número ardiente di tratado cu cuater bladji titulá na inglés Noticia di Reino. Cu pasamento dje dia di Señor, otro literatura a duna di conoce e estado spiritual morto di cristiandad.—Compara cu Jeremías 5:14.

17. (a) Cua suceso den e dia di Elías a enbolbe un secura i candela? (b) Con candela a sali for di boca dje dos testigo, i esei a enbolbe cua secura?

¹⁷ Kico di Elías? Den dia dje reynan di Israel, profeta Elías a proclama un secura como un expresion dje indignacion di Jehova contra israelita cu a adora Baal. E secura a dura pa tres aña i mei. (1 Rey 17:1; 18:41-45; Lucas 4:25; Santiago 5:17) Despues, ora infiel rey Ocozías a manda soldad pa forza Elías pa presenta dilanti dje rey, e profeta a pidi candela baha foi cielo i destrui e soldadnan. Solamente ora un comandante militar a mustra e debido respet pa su puesto como profeta, anto Elías a consenti pa bai cuné cerca e rey. (2 Rey 1:5-16) Di igual manera, entre 1914 i 1918 e resto ungí cu curashi a hala atencion ne secura spiritual den cristiandad i a duna advertencia dje huicio ardiente ne “binimento dje dia di Jehova, grandi i inspirador di temor.”—Malaquías 4:1, 5; Amós 8:11.

18. (a) Cua autoridad tabata duná ne dos testigo, i con esei tabata similar cu e autoridad duná na Moisés? (b) Con e dos testigo a denuncia cristiandad?

¹⁸ Juan a sigi bisa lo sigiente tocante e dos testigo: “I nan tin autoridad riba awa pa hacié bira sanger i pa dal e tera cu tur sorto di plaga cuanto biaha cu nan kier.” (Revelacion 11:6b) Pa convence faraó pa duna Israel libertad, Jehova a usa Moisés pa dal Egipto opresivo cu plaga, incluyendo biramento di awa na sanger. Siglonan despues, filisteo, enemigo di Israel, a corda bon acto di Jehova contra Egipto, haciendo nan sclama: “Ken por sálbanos for di man dje mahestuoso Dios aki? Esei ta e Dios cu a dal Egipto cu tur sorto di matanza [“plaga,” Version Moderna] den desierto.” (1 Samuel 4:8; Salmo 105:29) Moisés a simboliza Jesús, cu tabatin autoridad di pronuncia e huicio di Dios riba guía religioso di su dia. (Mateo 23:13; 28:18; Echo 3:22) I durante e promé gera mundial e rumanan di Cristo, esta, e dos testigo, a denuncia e calidad fatal di “awa” cu cristiandad a basha pa su tao.

E morto dje dos testigo

19. Segun e relato di Revelacion, kico a sosode ora e dos testigo a termina nan testimonio?

¹⁹ E plaga riba cristiandad tabata asina severo cu, despues cu e dos testigo a profetiza pa 42 luna den paña di sacu, cristiandad a usa su influencia mundano pa laga ‘mátanan.’ Juan a skirbi: “I ora nan a caba di duna nan testimonio, e bestia salbahe cu a subi for di abismo lo haci gera contra nan i lo véncenan i mátanan. I nan cadáver lo ta den e camina hanchu dje stad grandi cu den un sentido spiritual ta yamá Sodoma i Egipto, unda nan Señor tabata clabá ne staca. I hende dje pueblo i tribu i lenga i nacion lo wak nan cadáver pa tres dia i mei, i no permiti pa nan cadáver ser poní den graf. I hende cu ta biba riba tera lo alegra riba nan i goza, i nan lo manda regalo un na otro, pasobra e dos profeta tabata tormenta hende cu ta biba riba tera.”—Revelacion 11:7-10.

20. Kico ta e “bestia salbahe cu ta subi for di abismo”?

²⁰ Esei ta e promé di 37 mencion den Revelacion di un bestia salbahe. Mas padilanti nos lo examina e bestia ei i otro bestia en detaye. Pa awor, ta basta pa bisa cu e “bestia salbahe cu a subi for di abismo” ta algo cu Satanás a produci, un sistema di cosnan político bibo.b—Compara cu Revelacion 13:1; Daniel 7:2, 3, 17.

21. (a) Con enemigo religioso dje dos testigo a probecha dje situacion di gera? (b) E echo cu nan no a dera cadáver dje dos testigo ta indica kico? (c) Con nos tin cu considera e periodo di tempo di tres dia i mei? (Mira nota.)

²¹ For di 1914 te 1918 e nacionan tabata ocupá den e promé gera mundial. Nacionalismo tabata herbe, i den primavera di 1918, enemigo religioso dje dos testigo a probecha dje situacion. Nan a influenciá e sistema legal di gobierno di tal manera cu funcionario responsabel di Studiante di Bijbel tabata encarcelá bao di acusacion falso di instigacion di rebelion. Fiel colaborador a keda turdí. Actividad di Reino casi a para. Tabata como si e trabao di predica tabata morto. Den tempo bíblico tabata un indignidad terribel pa no haya entierro den graf memorial. (Salmo 79:1-3; 1 Rey 13:21, 22) P’sei, tabata un reproche enorme pe dos testigo ora nan no a déranan. Den e clima cayente di Palestina, un cadáver lagá na público riba caya realmente lo cuminza hole despues di tres dia i mei literal.c (Compara cu Juan 11:39.) Asina, tal detaye den e profecía ta indica e bergüenza cu e dos testigo tabatin cu soporta. Esnan mencioná anteriormente cu tabata encarcelá asta tabata nengá derecho di paga fianza mientras cu nan caso tabata apelá. Nan tabata denunciá públicamente suficiente tempo pa bira un holor desagradable pa habitante dje “stad grandi.” Pero, kico tabata e “stad grandi”?

22. (a) Kico ta e stad grandi? (b) Con curant a unínan cu e clero alegrando pasobra e dos testigo tabata silenciá? (Mira e cuadro.)

²² Juan a dúnanos idea. El a bisa cu Jesús tabata clabá ne staca ei. Pues, nos ta pensa di Jerusalem un bez. Pero el a bisa també cu e stad grandi tabata yamá Sodoma i Egipto. Wel, Jerusalem mes un biaha tabata yamá Sodoma debí na costumber impuro di dje. (Isaías 1:8-10; compara cu Ezekiel 16:49, 53-58.) I tin bez cu Egipto, e promé poder mundial, ta ser usá como símbolo dje sistema di cosnan di mundo actual. (Isaías 19:1, 19; Joël 3:19) P’sei, e stad grandi ta simboliza “Jerusalem” contaminá cu ta bisa cu e ta adora Dios pero a bira impuro i pecaminoso, manera Sodoma, i un parti dje sistema di cosnan di mundo satánico, mescos cu Egipto. E ta simboliza cristiandad, locual ta igual cu Jerusalem infiel den e dia djawe, e organizacion kende su miembronan tabatin tanto motibo pa alegra ora nan a silenciá e predicacion dje dos testigo cu a molestiánan.

Lantá for di morto!

23. (a) Kico a pasa e dos testigo despues di tres dia i mei, i cu cua efecto riba nan enemigo? (b) Na ki tempo Revelacion 11:11, 12 i e profecía di Ezekiel di e suplamento di Jehova riba un valle di wesu secu tabatin un cumplimento den tempo moderno?

²³ Curant a uni cu e clero pa difama e pueblo di Dios, i uno a bisa: “E misterio terminá a termina.” Pero, nada por a ser mas leu for dje berdad! E dos testigo no a keda morto. Nos ta leza: “I despues di tres dia i mei e spiritu di bida di Dios a drenta den nan, i nan a lanta riba nan pia, i un gran miedu a cai riba hende cu a míranan. I nan a tende un boz fuerte biniendo di cielo bísanan: ‘Subi aki ariba.’ I nan a subi na cielo den un nubia, i nan enemigo a míranan.” (Revelacion 11:11, 12) Asina, nan tabatin un experencia similar cu esun di wesu secu den e valle cu Ezekiel a bishita den un vision. Jehova a supla riba tal wesu secu, i nan a bolbe biba, percurando un cuadro di renacimento dje nacion di Israel despues di 70 aña di esclabitud den Babilonia. (Ezekiel 37:1-14) E dos profecía, den Ezekiel i Revelacion, tabatin un notable cumplimento den tempo moderno na 1919, ora Jehova a restora su “difunto” testigonan na bida vibrante.

24. Ora e dos testigo a bolbe na bida, esei a tene cua efecto riba nan persigidor religioso?

²⁴ Ki un golpi pa nan persigidor! E cadáver dje dos testigo di ripiente tabata bibo i activo di nobo. Esei tabata un pildo amarga pe clero guli i manda abao, i mas tanto ya cu tal predicador cristian cu nan a conspira pa encarcela tabata liber atrobé, i tabata declará completamente inocente despues. E shok tabatin cu ser asta mas grandi ora, den September di 1919, Studiante di Bijbel a celebra un asamblea na Cedar Point, Ohío, EUA. Ei, J. F. Rutherford, recién librá for di prisón, a conmove delegado ne asamblea cu su discurso “Anunciando e Reino,” basá riba Revelacion 15:2 i Isaías 52:7. E grupo cu Juan a simboliza a cuminza “profetiza” di nobo, of predica públicamente. Nan a sigi bira cada bez mas fuerte, denunciando sin miedu e hipocresía di cristiandad.

25. (a) Na ki tempo e dos testigo tabata bisá, “Subi aki ariba,” i con esei a sosode? (b) Cua golpi restoracion dje dos testigo tabatin riba e stad grandi?

²⁵ Cristiandad a purba bez tras bez di repiti su triunfo di 1918. El a usa e recurso di accion di multitud desordená, maniobra legal, encarcelacion, i asta e castigo di morto—pero, en bano! Despues di 1919 e dominio spiritual dje dos testigo tabata fuera di su alcance. Na 1919 Jehova Dios a bísanan: “Subi aki ariba,” i nan a subi na un estado spiritual mas halto unda nan enemigo por a míranan pero no por a mishi cu nan. Juan a duna detaye dje golpi cu nan restoracion tabatin riba e stad grandi: “I den e ora ei a sosode un temblor grandi, i un décimo parti dje stad a cai; i e temblor a mata siete mil hende, i e resto a spanta i a duna gloria né Dios di cielo.” (Revelacion 11:13) Tabatin berdadero sagudimento grandi den campo religioso. A parce cu e tera mes a sagudi bao di lider di religion establecí ora e grupo di cristian rebibá a cuminza traha. Un décimo parti di nan stad, simbólicamente 7.000 hende, tabata afectá asina profundamente cu e ta bisa cu nan a wordu matá.

26. E “décimo parti dje stad” i e “siete mil” di Revelacion 11:13 a representa ken? Splica.

²⁶ E frase “un décimo parti dje stad” ta hácinos corda cu Isaías a profetiza tocante Jerusalem di antigua bisando cu un décimo parti lo sobrebiba destruccion dje stad como un simía santo. (Isaías 6:13) Di igual manera, e cifra 7.000 ta hácinos corda cu ora Elías a kere cu e so a keda fiel den Israel, Jehova a bisé cu realmente tabatin 7.000 cu no a buig pa Baal. (1 Rey 19:14, 18) Den e promé siglo, apóstol Pablo a bisa cu e 7.000 a simboliza e resto di hudío cu a responde ne bon nobo tocante Cristo. (Romano 11:1-5) Tal texto ta yúdanos comprende cu “siete mil” i “un décimo parti dje stad” den Revelacion 11:13 ta hende cu ta responde ne dos testigo restorá i ta bandona e stad grandi pecaminoso. Nan ta muri, den un sentido, en relacion cu cristiandad. Nan ta kita nan nomber for di lista di miembro di tal religion. En cuanto cristiandad, nan no ta existi mas.d

27, 28. (a) Con ‘e resto a duna gloria ne Dios di cielo?’ (b) Clero di cristiandad a keda obligá di reconoce kico?

²⁷ Pero, di ki manera e ‘resto [di cristiandad] ta duna gloria ne Dios di cielo’? Siguramente nan no a haci esei door di bandona nan religion apóstata pa bira sirbidor di Dios. Mas bien, esei ta manera e splicacion den e comentario Word Studies in the New Testament di Vincent, tratando cu e expresion “duna gloria né Dios di cielo.” E ta bisa: “E frase no ta nifica conbertimento, ni arrepentimento, ni agradicimento, sino reconocimento, locual ta su sentido usual den e scritura. Compara cu Hosué 7:19 (Setenta). Juan 9:24; Echo 12:23; Romano 4:20.” Pa su bergüenza, cristiandad tabatin cu reconoce cu e Dios di Studiante di Bijbel a ehecuta un acto grandi, restorando nan na actividad cristian.

²⁸ Podisé e clero a duna tal reconocimento mentalmente so, of den nan mes. Siguramente, ningun di nan a declara públicamente cu nan a reconoce e Dios dje dos testigo. Pero e profecía di Jehova mediante Juan ta yúdanos distingi loke tabata den nan curazón i sa ki golpi humiyante a dalnan na 1919. Dje aña ei padilanti, ora e “siete mil” a bandona cristiandad apesar di su esfuerzo duro pa no perde su carnénan, e clero a keda obligá di reconoce cu e Dios dje grupo cu Juan a simboliza tabata mas fuerte cu nan dios. Den añanan despues, nan tabatin cu reconoce mas claramente, ora hopi mas hende di nan tao a despidi, repitiendo e palabra dje pueblo ora Elías a triunfá riba adorador di Baal na Ceru di Carmelo: “Jehova ta e Dios berdadero! Jehova ta e Dios berdadero!”—1 Rey 18:39.

29. Segun Juan, kico ta bini pronto, i cua otro sagudimento ta spera cristiandad?

²⁹ Pero, scucha! Juan ta bísanos: “E segundo calamidad a pasa. Mira! E tercera calamidad ta bini pronto.” (Revelacion 11:14) Si loke a sosode asina leu a sagudi cristiandad, kico e lo haci ora e tercera calamidad ta ser anunciá, angel di siete ta toca su trompet, i finalmente ta termina e secreto sagrado di Dios?—Revelacion 10:7.

[Nota]

[Kuadro na página 168]

E alegría di Revelacion 11:10

Den su buki na inglés Pastor ta presenta arma, publicá na 1933, Ray H. Abrams a menciona e oposicion severo di clero contra e buki E misterio terminá di Studiante di Bijbel. El a repasa esfuerzo di clero di líbranan di Studiante di Bijbel i nan “creencia pestilencial.” Esei a hiba ne caso dilanti raad cu a resulta den e sentencia di J. F. Rutherford i siete compañé na hopi aña den prisón. Dr. Abrams a agrega: “Un análisis di henter e caso ta hiba ne conclusion di cu religion i e clero tabata originalmente trás dje movimento pa caba cu ruselista. Den Canadá, na Februari, 1918, pastor a cuminza un campaña sistemático contra nan i nan literatura, specialmente e buki E misterio terminá. Segun e curant Tribune di Winnipeg, . . . e opinion tá cu ‘peticion dje clero’ a efectuá directamente censura dje buki.”

Dr. Abrams a sigi: “Ora noticia dje sentencia di binti aña a yega redactor di periódico religioso, casi tur curant, grandi i chikito, a alegra riba e suceso. Mi no por haya ningun palabra di simpatía di ningun periódico religioso ortodoxo. Upton Sinclair a conclui: ‘No cabe duda cu e persecucion . . . a nace en parti dje echo di cu nan a bira obheto di odio di cuerpo religioso “ortodoxo.”’ Loke esfuerzo combiná di religion no por a haci, e gobierno aparentemente a logra haci pa nan.” Despues di a cita expresion di desprecio di varios periódico religioso, e autor a menciona cu e Corte di Apelacion a declara e Sociedad inocente i a bisa: “Hende religioso a recibi e declaracion den silencio.”

[Plachi na página 163]

Juan a midi e tempel spiritual—e sacerdocio ungí tin cu cumpli cu cierto ley

[Plachi na página 165]

E trabao di reconstruccion di Zoróbabel i Hosué ta indica cu den e dia di Señor loke a cuminza como cos chikito lo ser sigí pa un aumento grandi den Testigo di Jehova. Facilidadnan tal como esnan den e protret, cu ta na Brooklyn, New York, tabatin mester di hopi mas engrandecimento pa yuda traha literatura necesario

[Plachi na página 166]

Mensahe ardiente di huicio cu e dos testigo a proclama tabata simbolizá pe trabao profético di Moisés i Elías

[Plachi na página 169]

Mescos cu wesu secu di Ezekiel capítulo 37, e dos testigo tabata reactivá pa nan haci e trabao di predica den e dia djawe