Capítulo 39
E Rey-Guerrero ta triunfá den Armagedón
Vision 13—Revelacion 19:11-21
Tema: Jesús ta guia ehército di cielo pa destrui e sistema di cosnan di Satanás
Tempo di cumplimento: Despues di destruccion di Babilonia e Grandi
1. Kico ta Armagedón, i kico ta sosode promé cuné?
ARMAGEDÓN—un palabra spantoso pa hopi hende! Pero, pa amante di husticia, esei ta anuncia e dia sperá pa mashá tempo ora Jehova Dios lo ehecuta su huicio final contra e nacionan. Esei no ta un gera di hende sino ta “e gera dje gran dia di Dios Todopoderoso”—su dia di vinganza contra gobernante di mundo. (Revelacion 16:14, 16; Ezekiel 25:17) E tribulacion grandi ta cuminza caba cu e desolacion di Babilonia e Grandi. Anto, Satanás ta instiga e bestia salbahe di color scarlata i su diez cachu pa nan concentra nan atake riba e pueblo di Jehova. E Diabel, mas rabiá cu nunca cu e organizacion di Dios, simbolizá como su señora, ta keda determiná di usa su marionetanan gañá pa haci gera te na fin contra e resto di su simía. (Revelacion 12:17) Esei ta e último oportunidad di Satanás!
2. Ken ta Gog di Magog, i con Jehova ta instigué pe atacá e pueblo di Dios?
2 E atake cruel di Diabel ta ser pintá bibo den Ezekiel capítulo 38. Ei, Satanás degradá ta ser yamá “Gog dje tera di Magog.” Jehova ta pone hak simbólico den cachete di Gog, i ta treké i su forza militar grandi pe atake. Con Dios ta haci esei? Haciendo Gog mira Su Testigonan como un pueblo sin defensa “recogí hunto for dje nacionan, un pueblo cu ta acumula riqueza i propiedad, esnan cu ta biba den centro dje tera.” Eseinan ta ocupa e lugar central dje tera como un solo pueblo cu ta nenga di adora e bestia salbahe i su imagen. Nan fortaleza i prosperidad spiritual ta haci Gog furioso. Pues, Gog i su forza militar grandi, incluyendo e bestia salbahe cu a sali for di lamá cu su diez cachu, ta basha riba nan pa mátanan. Sin embargo, distinto di Babilonia e Grandi, e pueblo limpi di Dios tin proteccion divino!—Ezekiel 38:1, 4, 11, 12, 15; Revelacion 13:1.
3. Con Jehova ta dispone di forza militar di Gog?
3 Con Jehova ta dispone di Gog i tur su multitud? Scucha! “‘Siguramente lo mi yama contra dje den tur mi region montañoso un spada,’ ta e declaracion di Señor Soberano Jehova. ‘Lo tin un spada di cada un contra su mes ruman.’” Pero, ni arma nuclear ni arma gewoon ta sirbi den e lucha, pasobra Jehova ta declara: “Lo mi pone mi mes den huicio cuné, cu pest i cu sanger; i un bashamento di diluvio i piedra di ijs, candela i swafel lo mi basha riba dje i riba su ehército i riba hopi pueblo cu lo ta cuné. I siguramente lo mi engrandece mi mes i santifica mi mes i dunámi di conoce dilanti wowo di hopi nacion; i nan lo tin cu sa cu mi ta Jehova.”—Ezekiel 38:21-23; 39:11; compara cu Hosué 10:8-14; Huez 7:19-22; 2 Crónica 20:15, 22-24; Job 38:22, 23.
Esun yamá “fiel i berdadero”
4. Ki detaye Juan a duna di Jesucristo prepará pa combati?
4 Jehova ta exigi un spada. Ken ta usa e spada? Bolbiendo na Revelacion, nos ta haya e contesta den un otro vision emocionante. Dilanti wowo di Juan, cielo ta habri pa revela algo berdaderamente inspirador di temor—Jesucristo mes den bistí di gera! Juan a bísanos: “I mi a weita cielo habri, i, mira! un cabai blancu. I esun sintá riba dje ta ser yamá Fiel i Berdadero, i e ta huzga i ta haci gera den husticia. Su wowo ta flam di candela, i riba su cabez tin hopi diadema.”—Revelacion 19:11, 12a.
5, 6. Kico kier men (a) e “cabai blancu”? (b) e nomber “Fiel i Berdadero”? (c) wowo manera “flam di candela”? (d) “hopi diadema”?
5 Mescos cu den e vision di promé di cuater ginete, e “cabai blancu” ta un símbolo apropiado di gera husto. (Revelacion 6:2) I cua yiu di Dios por ta mas husto cu e Guerrero poderoso aki? Siendo yamá “Fiel i Berdadero,” e mester ta e “testigo fiel i berdadero,” Jesucristo. (Revelacion 3:14) E ta haci gera pe ehecuta e huicio husto di Jehova. Pues, e ta hunga su papel como Huez nombrá di Jehova, e “Dios Poderoso.” (Isaías 9:6) Su wowo ta inspira temor, manera “flam di candela,” cu su bista fihá riba e binidero destruccion ardiente di su enemigo.
6 Diadema ta coroná e cabez dje Rey-Guerrero. E bestia salbahe cu Juan a mira subiendo for di lamá tabatin diez diadema, simbolizando su gobernacion temporario di mundo. (Revelacion 13:1) Pero, Jesús tin “hopi diadema.” Su gobernacion glorioso ta sin igual, siendo cu e ta “Rey di esnan cu ta reina como rey i Señor di esnan cu ta goberna como señor.”—1 Timoteo 6:15.
7. Cua nomber skirbí Jesús tini?
7 Juan a sigi duna detaye: “E tin un nomber skirbí cu ningun hende conoce sino e mes.” (Revelacion 19:12b) Ya caba e Bijbel ta yama e Yiu di Dios pa nomber tal como Jesús, Emanuel i Miguel. Pero e “nomber” desconocí ta parce di representa e puesto i privilegio cu Jesús ta disfruta durante e dia di Señor. (Compara cu Revelacion 2:17.) Isaías, pintando Jesús desde 1914, a bisa: “Su nomber lo ser yamá Maraviyoso Consehero, Dios Poderoso, Tata Eterno, Prinz di Paz.” (Isaías 9:6) Apóstol Pablo a asocia e nomber di Jesús cu Su privilegio di sirbishi mashá halto ora el a skirbi: “Dios a halza [Jesús] na un puesto superior i bondadosamente a duné e nomber cu ta mas halto cu tur otro nomber, di manera cu den e nomber di Jesús tur rudía lo dobla.”—Filipense 2:9, 10.
8. Pakico Jesús so por conoce e nomber skirbí, i cu ken e ta comparti algun privilegio halto cu e tin?
8 Privilegio di Jesús ta singular. Fuera di Jehova mes, Jesús so por comprende loke ta nifica ocupacion di puesto asina halto. (Compara cu Mateo 11:27.) P’sei, di tur creacion di Dios, Jesús so por aprecia completamente e nomber. No obstante, Jesús sí ta inclui su bruid den algun privilegio asina. Pues, el a duna e promesa: “Esun cu vence . . . lo mi skirbi riba dje . . . e nomber nobo di mi.”—Revelacion 3:12.
9. Kico ta ser indicá pa (a) Jesús kedando “bistí cu un bistí exterior gesprenkel cu sanger”? (b) e nomber “Palabra di Dios” duná na Jesús?
9 Juan a agrega: “I e ta bistí cu un bistí exterior gesprenkel cu sanger, i e nomber cu e ta ser yamá ta E Palabra di Dios.” (Revelacion 19:13) Esei ta e “sanger” di ken? Esei por ta e sanger vital di Jesús, dramá pa humanidad. (Revelacion 1:5) Pero, den tal contexto, mas probablemente esei ta referi ne sanger di enemigo di dje cu ta ser dramá ora e huicio di Jehova ta ser ehecutá riba nan. Esei ta hácinos corda e vision di antes den locual e mata di wijndruif dje tera ta ser cosechá i pisá den e baki grandi di pers biña dje rabia di Dios te cu e sanger ta alcanza “tanto halto como freno di cabai,”—significando un gran victoria riba enemigo di Dios. (Revelacion 14:18-20) Di igual manera, e sanger gesprenkel riba e bistí exterior di Jesús ta confirma cu su victoria ta decisivo i completo. (Compara cu Isaías 63:1-6.) Awor Juan a menciona di nobo cu Jesús ta ser yamá pa un nomber. Awor esei ta un nomber conocí na tur parti, esta, “E Palabra di Dios”—identificando e Rey-Guerrero como e Portaboz Principal di Jehova i como e Defensor dje berdad.—Juan 1:1; Revelacion 1:1.
Guerrero compañé di Jesús
10, 11. (a) Con Juan a mustra cu Jesús no ta so den e bataya? (b) Kico ta ser indicá pe echo cu cabai ta blancu i cu ginete ta bistí cu “linen fini limpi i blancu”? (c) Ken ta compone “ehército” di cielo?
10 Jesús no ta so bringando e bataya. Juan ta bísanos: “També, ehército cu tabata den cielo tabata sigié riba cabai blancu, i nan tabata bistí den linen fini, blancu i limpi.” (Revelacion 19:14) E echo cu tal cabai ta “blancu” ta indica gera husto. “Linen fini” ta apropiado pa ginete dje Rey, i su blancura briyante i limpi ta indica un posicion puro i husto dilanti Jehova. Ken, anto, ta compone tal “ehército”? Sin duda, nan ta inclui angel santo. Tabata na principio dje dia di Señor cu Miguel i su angelnan a tira Satanás i su demoñonan foi cielo. (Revelacion 12:7-9) Además, “tur angel” lo sirbi Jesús ora e ta sinta riba su glorioso trono i ta procede di huzga e nacionan i pueblo di mundo. (Mateo 25:31, 32) Siguramente, den e gera decisivo, ora e huicio di Dios ta ser ehecutá te na final, angel di nobo lo compaña Jesús.
11 Esei lo enbolbe otronan també. Ora Jesús a manda su mensahe pe congregacion den Tiatira, el a priminti: “Na esun cu ta vence i cu ta observa mi echonan te ne fin, lo mi duna autoridad riba e nacionan, i lo e pastorea e pueblo cu un bara di heru di manera cu nan lo ser kibrá na pida pida manera baso di clei, mescos cu mi a recibi di mi Tata.” (Revelacion 2:26, 27) Sin duda, ora e tempo ta yega, e rumanan di Cristo cu ta den cielo caba lo tene parti den e pastoreamento di pueblo i nacion cu tal bara di heru.
12. (a) Sirbidor di Dios riba tera lo bringa den Armagedón? (b) Con e pueblo di Jehova Dios riba tera ta ser enbolbí den Armagedón?
12 Sin embargo, kico di sirbidor di Dios aki riba e tera? E grupo cu Juan a simboliza lo no tene un parti activo den e gera di Armagedón; ni tampoco nan compañénan leal, hende cu ta sali for di tur nacion i cu ta basha den e cas spiritual dje adoracion di Jehova. Tal hende di paz a bati nan spada na ploeg caba. (Isaías 2:2-4) Pero, nan ta mashá enbolbí! Manera nos a mira caba, ta e pueblo di Jehova cu ta parce sin defensa cu Gog i su multitud ta ataca cruelmente. Esei ta e siñal pe Rey-Guerrero di Jehova, cu e apoyo di ehército di cielo, cuminza bringa un gera di exterminacion contra tal nacion. (Ezekiel 39:6, 7, 11; compara cu Daniel 11:44–12:1.) Como mirones, e pueblo di Dios riba tera ta keda sumamente interesá. Armagedón lo nifica nan salbacion, i nan lo biba pa eternidad como testigo ocular dje gran gera di vindicacion di Jehova.
13. Con nos sa cu Testigo di Jehova no ta contra tur gobierno?
13 Esei kier men cu Testigo di Jehova ta contra tur gobierno? Leu di dje! Nan ta obedece e conseho di apóstol Pablo: “Laga tur alma keda sumiso ne autoridad superior.” Nan sa cu tan tempo cu e sistema di cosnan aki ta existi, tal “autoridad superior” ta existi cu e permiso di Dios pa nan mantene algun ordu den e mundo aki. P’sei, Testigo di Jehova ta paga belasting, ta obedece ley, ta respeta regla di tráfico, ta cumpli cu registracion, etc. (Romano 13:1, 6, 7) Además, nan ta sigi principio bíblico papiando e berdad i kedando onrado; ta mustra amor pa próhimo; ta edifica famía firme i moral; i ta entrená nan yiunan pa ser ciudadano ehemplar. Asina nan ta paga no solamente e “cosnan di César na César, sino també e cosnan di Dios na Dios.” (Lucas 20:25; 1 Pedro 2:13-17) Siendo cu e Palabra di Dios ta mustra cu poder gobernamental di mundo ta temporario, Testigo di Jehova ta preparánan awor pe bida mas completo, e berdadero bida, cu nan lo disfruta bao di gobernacion dje Reino di Cristo. (1 Timoteo 6:17-19) Aunque nan no ta tene parti den e derota di poder dje mundo aki, Testigo di Jehova ta considera cu respet reverente loke e Palabra inspirá di Dios, e Bijbel Santo, ta bisa tocante e huicio di Jehova cu aki pronto lo ser ehecutá na Armagedón.—Isaías 26:20, 21; Hebreo 12:28, 29.
Sali pe bataya final!
14. Kico e “spada largu i skerpi” saliendo for di boca di Jesús ta simboliza?
14 Mediante cua autoridad Jesús ta completa su victoria? Juan ta bísanos: “I foi su boca ta sali un spada largu i skerpi, pe dal e nacionan cuné, i lo e pastoreánan cu un bara di heru.” (Revelacion 19:15a) E “spada largu i skerpi” ta representa e autoridad di Dios duná na Jesús pe duna ordu pe ehecucion di tur hende cu ta nenga di apoya e Reino di Dios. (Revelacion 1:16; 2:16) Tal símbolo bibo ta corresponde cu e palabra di Isaías: “[Jehova] a procede di haci mi boca manera un spada skerpi. El a scondémi den sombra di su man. I gradualmente el a hacími un flecha gepólish.” (Isaías 49:2) Asina Isaías a simboliza Jesús, cu ta proclama e huicio di Dios i ta ehecutánan, como si fuera cu un flecha cu no ta hera.
15. Ne momento aki, ken a ser denunciá caba i huzgá, pa siñala e comienzo di kico?
15 Ne momento ei, Jesús a actua caba na cumplimento dje palabra di Pablo: “Ne tempo ei, e homber malbado lo ser revelá, cu Señor Jesús lo elimina cu e spiritu di su boca i reduci na nada cu e manifestacion di su presencia.” Sí, e presencia di Jesús (griego, pa·rou·sí·a) a ser demonstrá desde 1914 padilanti mediante e denuncio i huzgamento dje homber malbado, esta, e clero di cristiandad. Su presencia lo ser manifestá notablemente ora e diez cachu dje bestia salbahe di color scarlata ta ehecuta huicio i ta desola cristiandad, hunto cu e resto di Babilonia e Grandi. (2 Tesalonicense 2:1-3, 8) Esei lo ta e comienzo dje tribulacion grandi! Despues di esei, Jesús ta dirigi su atencion na loke ta resta dje organizacion di Satanás, na armonía cu e profecía: “E tin cu golpea e tera cu e bara di su boca; i cu e spiritu di su lip lo e mata hende malbado.”—Isaías 11:4.
16. Ki detaye Salmo i Jeremías ta duna dje papel dje Rey-Guerrero cu Jehova a nombra?
16 E Rey-Guerrero, como esun cu Jehova a nombra, lo haci distincion entre hende cu lo sobrebiba i hende cu lo muri. Papiando proféticamente cu e Yiu di Dios, Jehova ta bisa: “Lo bo kibra [gobernante di mundo] cu un bara di heru, i lo kíbranan na pida pida como si nan ta wea di clei di trahador di wea.” I Jeremías a bisa tal lider corrupto di gobierno i nan sigidor: “Grita, wardador, i sclama! I lora rond, e grandinan dje tao, pasobra e dia pa matamento i pa boso plamamento a ser cumplí, i boso tin cu cai manera un baso deseabel!” No ta importa ki deseabel tal gobernante por a parce pe mundo malbado, un solo golpi dje bara di heru dje Rey lo kíbranan, mescos cu kibramento di un baso bonita. Lo ta net manera David a profetiza tocante Señor Jesús: “E bara di bo forza Jehova lo manda for di Sion, bisando: ‘Bai dominando meimei di bo enemigonan.’ Jehova mes na bo man drechi siguramente lo kibra reynan na pida pida ne dia di su rabia. Lo e ehecuta huicio den e nacionan; lo e causa un plenitud di cadáver.”—Salmo 2:9, 12; 83:17, 18; 110:1, 2, 5, 6; Jeremías 25:34.
17. (a) Ki detaye Juan a duna dje acto di ehecucion dje Rey-Guerrero? (b) Menciona algun profecía cu ta mustra ki calamitoso e dia dje rabia di Dios lo ser pe nacionan.
17 E poderoso Rey-Guerrero ta presenta di nobo den e sigiente bista dje vision: “E ta pisa també e baki di pers biña dje rabia dje furia di Dios Todopoderoso.” (Revelacion 19:15b) Den un vision di antes, Juan a mira caba e pisamento dje “baki di pers biña dje rabia di Dios.” (Revelacion 14:18-20) Isaías també a duna detaye di un baki di pers biña di ehecucion, i otro profeta ta menciona ki calamitoso e dia dje rabia di Dios lo ta pa tur nacion.—Isaías 24:1-6; 63:1-4; Jeremías 25:30-33; Daniel 2:44; Sofonías 3:8; Zacarías 14:3, 12, 13; Revelacion 6:15-17.
18. Kico profeta Joël ta revela tocante e huzgamento di Jehova dje nacionan?
18 Profeta Joël ta asocia un baki di pers biña cu e binimento di Jehova pa “huzga tur nacion tur rond.” I ta Jehova cu ta duna e mandamento, sin duda na su Huez asociado, Jesús, i na su ehército celestial: “Hinca e machete, pasobra e cosecha a hecha. Bin, baha, pasobra e baki di pers biña a yena. Baki di pers biña realmente ta pasa over; pasobra nan maldad a bira abundante. Multitud, multitud ta den e sabana abao di decision, pasobra e dia di Jehova ta cerca den e sabana abao di decision. E solo i luna mes siguramente lo bira scur, i strea mes realmente lo retira nan splendor. I desde Sion Jehova mes lo brama, i desde Jerusalem lo e saca su boz. I cielo i tera siguramente lo sagudi; pero Jehova lo ser un refugio pa su pueblo, i un fortaleza pe yiunan di Israel. I boso tin cu sa cu mi ta Jehova boso Dios.”—Joël 3:12-17.
19. (a) Con e pregunta hací den 1 Pedro 4:17 lo ser contestá? (b) Ki nomber tin skirbí riba e bistí exterior di Jesús, i pakico lo e resulta di ser apropiado?
19 Esei ta e dia di destruccion, en berdad, pa nacion i hende desobediente pero un dia di alivio pa tur hende cu ta haci Jehova i su Rey-Guerrero nan refugio! (2 Tesalonicense 1:6-9) E huicio cu a cuminza cu e cas di Dios na 1918 lo sigi te na su culminacion, contestando e pregunta di 1 Pedro 4:17: “Cua fin lo tin di esnan cu no ta obediente ne bon nobo di Dios?” E glorioso Vencedor lo pisa e baki di pers biña te ne fin, demonstrando cu e ta Esun halto cu Juan a menciona: “I riba su bistí exterior, asta riba bel di su pia, tin un nomber skirbí, Rey di reynan i Señor di señornan.” (Revelacion 19:16) E ta resulta di ser hopi mas poderoso cu cualkier gobernante di mundo, cualkier rey of señor humano. Su dignidad i splendor ta sublime. Riba su cabai, e ta corre “den e causa dje berdad i humildad i husticia” i ta triunfa pa semper! (Salmo 45:4) Riba su bistí gespringu cu sanger tin skirbí e nomber cu Señor Soberano Jehova a duné, i e ta Vindicador di dje!
E gran cena di Dios
20. Ki detaye Juan a duna dje “gran cena di Dios,” haciendo nos corda cua profecía di antes cu ta similar?
20 Den e vision di Ezekiel, despues di destruccion dje multitud di Gog, páhara i bestia salbahe ta ser invitá pe banquete! Nan ta haci e tera limpi di cadáver, comiendo curpa morto di enemigo di Jehova. (Ezekiel 39:11, 17-20) E sigiente palabra di Juan ta hácinos corda bibientemente tal profecía di antes: “Mi a mira també un angel pará den solo, i el a grita cu un boz fuerte i a bisa tur páhara cu ta bula den centro di cielo: ‘Bin aki, reuni hunto pe gran cena di Dios, pa boso come carni di rey i carni di comandante militar i carni di homber fuerte i carni di cabai i di esnan sintá riba nan, i carni di tur, tanto di hende liber como di esclabo i di chikito i di grandi.’”—Revelacion 19:17, 18.
21. Kico ta ser indicá pe (a) angel “pará den solo”? (b) e echo cu hende morto ta keda drumí riba superficie dje tera? (c) e lista di hende kende nan cadáver ta keda drumí riba tera? (d) e expresion “e gran cena di Dios”?
21 E angel ta “pará den solo,” den un posicion destacá pa hala atencion di páhara. E ta invitánan pa para cla pa yénanan cu carni di hende cu e Rey-Guerrero i su ehército ta puesto pa mata. E echo cu hende morto lo ser lagá riba e superficie dje tera ta indica cu nan lo muri den bergüenza público. Mescos cu Jezabel di antigua, nan lo no recibi entierro onorabel. (2 Rey 9:36, 37) E lista di hende kende nan cadáver lo keda drumi asina ta mustra alcance dje destruccion di rey, comandante militar, homber fuerte, liber, i esclabo. No tin excepcion. E último evidencia dje mundo rebelde na oposicion cu Jehova lo ser eliminá. Despues di esei, lo no existi mas un lamá inketu di humanidad den confusion. (Revelacion 21:1) Esei ta e “gran cena di Dios,” siendo cu ta Jehova mes cu ta invita páhara pa participa di dje.
22. Ki sumario Juan a duna di desaroyo dje gera final?
22 Juan a duna sumario di desaroyo dje gera final: “I mi a mira e bestia salbahe i rey di tera i nan ehército reuni hunto pa haci gera cu esun sintá riba e cabai i cu su ehército. I e bestia salbahe tabata capturá, i hunto cuné e profeta falso cu a haci dilanti dje siñal cu locual el a gaña esnan cu a recibi e marca dje bestia salbahe i esnan cu ta rindi adoracion na su imagen. Mientras cu nan ta bibo ainda, nan dos tabata tirá den e tanki di candela cu ta kima cu swafel. Pero e resto tabata matá cu e spada largu di esun sintá riba e cabai, cua spada a sali for di su boca. I tur páhara tabata yená cu e carni di nan.”—Revelacion 19:19-21.
23. (a) Den ki sentido e “bataya dje gran dia di Dios Todopoderoso” ta ser bringá na “Armagedón”? (b) “Rey di tera” no ta presta atencion na cua advertencia, i cu cua consecuencia?
23 Despues di bashamento di conchi di seis dje rabia di Jehova, Juan a bisa cu propaganda di demoño a reuni “rey di tera i di tur e mundo” pe “bataya dje gran dia di Dios Todopoderoso.” Esei ta ser bringá na Armagedón—no na un sitio mes, sino ne situacion mundial cu ta exigi ehecucion dje huicio di Jehova. (Revelacion 16:12, 14, 16, Testament Nobo) Awor Juan a mira frente dje bataya. Ei, confrontando Dios, tin tur “rey di tera i nan ehército.” Obstinadamente, nan ta nenga di someténan ne Rey di Jehova. El a dúnanan un husto advertencia den e mensahe inspirá: “Zunchi e yiu, pa [Jehova] no noha i boso perece for di camina.” Siendo cu nan no ta someténan ne gobernacion di Cristo, nan tin cu muri.—Salmo 2:12.
24. (a) Cua huicio ta ser ehecutá riba e bestia salbahe i e profeta falso, i den ki sentido nan ta “bibo” ainda? (b) Pakico e “tanki di candela” tin cu ser simbólico?
24 E bestia salbahe cu siete cabez i diez cachu cu a subi foi lamá i ta representa e organizacion político di Satanás, ta cai den olvido, i hunto cu ne ta cai e profeta falso, esta, poder mundial di siete. (Revelacion 13:1, 11-13; 16:13) Mientras cu nan ta “bibo” ainda, of funcionando den nan oposicion uní contra e pueblo di Dios riba tera, nan ta ser tirá den e “tanki di candela.” Esei ta un tanki di candela mes? No, mescos cu e bestia salbahe i profeta falso no ta bestia mes. Mas bien, e tanki ta un símbolo di destruccion completo i final, un lugar di unda no tin regreso. Ei mes, mas tardi, morto i Hades i també e Diabel mes lo ser tirá. (Revelacion 20:10, 14) Esei siguramente no ta un fiernu di tormento eterno pa hende malbado, siendo cu e idea mes di tal lugar ta repugnante pa Jehova Dios.—Jeremías 19:5; 32:35; 1 Juan 4:8, 16.
25. (a) E “spada largu di esun sintá riba e cabai” ta mata ken? (b) Nos tin cu spera cu hende cu ta ser “matá” lo haya resureccion?
25 Tur e resto cu no tabata directamente un parti di gobierno pero, no obstante, tabata un parti irreformable dje mundo corrupto di humanidad també ‘ta ser matá cu e spada largu di esun sintá riba e cabai.’ Jesús lo declara cu nan ta merece morto. Siendo cu e tanki di candela no ta ser mencioná den nan caso, nos tin cu spera pa nan haya resureccion? Nos no ta ser bisá na ningun parti cu hende cu e Huez di Jehova ta ehecuta ne tempo ei lo ser resusitá. Manera Jesús mes a bisa, tur hende cu no ta “carné” ta bai “den candela eterno prepará pe Diabel i su angelnan,” esta, “den cortamento eterno.” (Mateo 25:33, 41, 46) Esei ta culmina e “dia di huicio i di destruccion di hende malbado.”—2 Pedro 3:7; Nahum 1:2, 7-9; Malaquías 4:1.
26. Menciona brevemente e resultado di Armagedón.
26 Asina, tur e organizacion terrenal di Satanás ta yega nan fin. “E cielo di antes” di gobernacion político ta caba. E “tera,” e sistema cu ta parce permanente cu Satanás a edifica através dje siglonan, ta ser destruí awor por completo. “Lamá,” e multitud di humanidad malbado cu ta opone Jehova, no ta existi mas. (Revelacion 21:1; 2 Pedro 3:10) Pero, kico Jehova tin wardá pa Satanás mes? Juan a sigi bísanos.