Capítulo 30

“Babilonia e Grandi a cai!”

 1. Kico e segundo angel a anuncia, i ken ta Babilonia e Grandi?

E ORA dje huicio di Dios a yega! Tende, anto, e mensahe divino: “I un otro, e segundo angel, a sigi, bisando: ‘El a cai! Babilonia e Grandi a cai, esun cu a haci tur nacion bebe e biña dje rabia di su fornicacion!’” (Revelacion 14:8) Pe promé bez, pero no pe último bez, Revelacion ta enfoca atencion riba Babilonia e Grandi. Mas tardi, capítulo 17 ta duna detaye di dje como un muher golós. Ken e tá? Manera nos lo mira, esei ta un imperio mundial, ta religioso, i ta sistema falso di Satanás cu e ta usa pa bringa contra e simía dje muher di Dios. (Revelacion 12:17) Babilonia e Grandi ta henter e imperio mundial di religion falso. E ta inclui tur religion cu ta conserba siñanza i práctico religioso di Babilonia di antigua i cu ta manifesta su spiritu.

 2. (a) Di ki manera religion babilónico tabata plamá na tur parti di mundo? (b) Cua ta e parti mas prominente di Babilonia e Grandi, i na ki tempo el a presenta como un organizacion fuerte?

² Tabata den Babilonia, mas cu 4.000 aña pasá, cu Jehova a bruha lenga di trahador dje Toren di Babel. Hende di diferente idioma tabata plamá te na extremo dje tera, hibando cu nan e kerimento i práctica cu ta básico den casi tur religion djawe. (Génesis 11:1-9) Babilonia e Grandi ta e parti religioso dje organizacion di Satanás. (Compara cu Juan 8:43-47.) E parti mas prominente di dje awe ta cristiandad apóstata, locual a presenta como un fuerte organizacion malbado den siglo cuater despues di Cristo, cu credo i ceremonia cu a bini, no di Bijbel, sino principalmente di religion babilónico.—2 Tesalonicense 2:3-12.

 3. Con nos por bisa cu Babilonia e Grandi a cai?

³ Kizás bo ta puntra, ‘Siendo cu religion ta eherce mashá poder den mundo, pakico e angel a anuncia cu Babilonia e Grandi a cai?’ Wel, ki resultado tabatin despues cu Babilonia di antigua a cai na aña 539 PEC? Sí, Israel a haya libertad pa bolbe na su patria i restora e adoracion berdadero ei! Pues, e restoracion di Israel spiritual na 1919 na radiante prosperidad spiritual, locual ta sigi i ta aumenta te ne dia djawe, ta duna prueba cu Babilonia e Grandi a cai na 1919. E no tin poder mas pa frena e pueblo di Dios. Además, e tin dificultad grandi den su mes pueblo. Desde 1919 su corrupcion, su falta di onradez, i su inmoralidad a ser denunciá na tur parti. Den mayor parti di Europa, poco hende ta bai misa mas, i den algun país socialista, religion ta ser considerá como “opio di pueblo.” Un co’i bergüenza den bista di tur amante dje Palabra di berdad di Dios, Babilonia e Grandi condená na morto, ta spera awor ehecucion dje huicio husto di Jehova riba dje.

E caimento bergonzoso di Babilonia

4-6. Di ki manera “Babilonia e Grandi . . . a haci tur nacion bebe dje biña dje rabia di su fornicacion”?

⁴ Láganos examina mas en detaye e circunstancia relacioná cu e caimento bergonzoso di Babilonia e Grandi. E angel ei ta bísanos cu “Babilonia e Grandi . . . a haci tur nacion bebe e biña dje rabia di su fornicacion.” Kico esei kier men? Esei tin cu ber cu conquista. Por ehempel, Jehova a bisa Jeremías: “Tuma for di mi man e copa aki di biña di furia, i bo mester haci tur nacion bebe di dje unda mi ta mandábo. I nan tin cu bebe i sagudi p’aki i p’ayá manera hende loco pa causa dje spada cu mi ta manda den nan.” (Jeremías 25:15, 16) Den siglo seis i siete PEC, Jehova a usa Babilonia di antigua pa basha e copa simbólico di tribulacion pa hopi nacion bebe, incluyendo Hudá apóstata, di manera cu asta su mes pueblo tabata hibá preso. Anto, en buelta, Babilonia a cai pasobra su rey a halza su mes contra Jehova, “Señor di cielo.”—Daniel 5:23.

⁵ Babilonia e Grandi també a efectua conquista, pero principalmente, eseinan ta mas scondí. El a “haci tur nacion bebe”, usando astucia di prostituta, cometiendo fornicacion religioso cu nan. El a tenta gobernante político pa drenta den pacto i amistad cuné. Usando tentacion religioso, el a traha complot di opresion político, comercial, i económico. El a instiga persecucion religioso i gera i crusada religioso, i també gera nacional, pa motibo puramente político of comercial. I el a santifica tal gera bisando cu nan ta e boluntad di Dios.

⁶ Tur e mundo sa di enbolbimento di religion den gera i política di siglo 20—dje religion sinto di Hapón, hinduísmo di India, budismo di Vietnam, “cristianismo” di Nortirlanda i América Latina, i també di otro religion—además di papel cu capelán militar a hunga na tur dos banda di dos gera mundial instigando soldad hoven pa mata otro. Un ehempel clásico di freimento di Babilonia e Grandi tabata e papel cu el a hunga den e gera civil di Spaña na 1936 te 1939, den locual por lo menos 600.000 hende a muri. Tal dramamento di sanger tabata provocá pa apoyador di clero católico i nan aliado, debí en parti ne echo cu e gobierno legal di Spaña tabata un peliger pe riqueza i posicion dje iglesia.

 7. Ken tabata e punto di atake principal di Babilonia e Grandi, i ki moda di atake el a usa contra dje?

⁷ Siendo cu Babilonia e Grandi ta e parti religioso dje simía di Satanás, e semper a haci e “esposa” di Jehova, “Jerusalem djariba,” su punto principal di atake. Den e promé siglo, e congregacion di cristian ungí tabata claramente identificá como e simía dje muher. (Génesis 3:15; Galatio 3:29; 4:26) Babilonia e Grandi a haci hopi esfuerzo pa conquista e congregacion puro, usando tentacion pe comete fornicacion religioso. Apóstol Pablo i Pedro a duna advertencia cu hopi hende lo sucumbi i cu un apostasía grandi lo ta e resultado. (Echo 20:29, 30; 2 Pedro 2:1-3) Mensahe di Jesús pe siete congregacion ta indica cu cerca e fin dje bida di Juan, Babilonia e Grandi tabata haci algun progreso den su esfuerzo pa corrumpi. (Revelacion 2:6, 14, 15, 20-23) Pero Jesús a mustra caba ki leu Babilonia lo ta permiti di bai.

Trigo i mal yerba

8, 9. (a) E comparacion di Jesús dje trigo i mal yerba a indica kico? (b) Kico a sosode “durante cu hende tabata drumi”?

⁸ Den su comparacion di trigo i mal yerba, Jesús a menciona un homber cu a sembra bon simía den un cunucu. Pero, “durante cu hende tabata drumí,” un enemigo a bini i a sembra mal yerba den e trigo. Pues, mal yerba a sconde e trigo. Jesús a splica su comparacion segun lo sigiente: “E sembrador di bon simía ta e Yiu di hende; e cunucu ta mundo; en cuanto e bon simía, esei ta yiunan di reino; pero e mal yerba ta yiu dje malbado, i e enemigo cu a sembré ta Diabel.” Anto el a mustra cu e trigo i mal yerba lo ta permití di crece hunto te cu “e conclusion dje sistema di cosnan,” ora angel lo “recoge” i saca afó e mal yerba simbólico.—Mateo 13:24-30, 36-43.

⁹ A sosode net manera Jesús i apóstol Pablo i Pedro a adverti. “Durante cu hende tabata drumi,” sea despues cu e apóstolnan a bai drumí den morto of ora superintendente cristian tabata cabeshá en bez di vigila e tao di Dios, apostasía babilónico a nace net den e congregacion mes. (Echo 20:31) Pronto tabatin hopi mas mal yerba cu trigo i esei a sconde e trigo. Pa varios siglo, por a parce cu e simía dje muher tabata completamente sofocá bao di saya enorme di Babilonia e Grandi.

10. Kico a sosode rond di década di 1870, i con Babilonia e Grandi a reacciona na esei?

¹⁰ Ya pa década di 1870 cristian ungí a cuminza haci un esfuerzo determiná di desasociánan for di camina di prostitucion di Babilonia e Grandi. Nan a bandona doctrina falso di paganismo cu cristiandad a introduci i cu curashi a usa e Bijbel pa predica cu tempo gentil lo termina na 1914. E instrumento principal di Babilonia e Grandi, esta, e clero di cristiandad, a opone tal esfuerzo pa restora e adoracion berdadero. Durante e promé gera mundial, nan a probecha di histeria di gera pa purba di caba cu e grupito di fiel cristianan. Na 1918, ora nan actividad tabata casi destruí completamente, a parce cu Babilonia e Grandi a logra. A parce cu el a triunfa riba nan.

11. Kico tabata e resultado dje caimento di Babilonia di antigua?

¹¹ Manera nos a anota caba, e stad orguyoso di Babilonia a experimenta un caimento desastroso for di poder na aña 539 PEC. Anto hende a tende e grito: “El a cai! Babilonia a cai!” E centro grandi dje imperio mundial a cai bao di ehército di Media i Persia bao di Ciro e Grandi. Aunque e stad mes a sobrebiba e conquista, el a experimenta un berdadero caimento for di poder, i esei a resulta den e liberacion di preso hudío. Nan a bolbe na Jerusalem pa reestablece e adoracion puro ei.—Isaías 21:9; 2 Crónica 36:22, 23; Jeremías 51:7, 8.

12. (a) Den nos tempo, con nos por bisa cu Babilonia e Grandi a cai? (b) Kico ta duna prueba cu Jehova a rechaza cristiandad totalmente?

¹² Den nos tempo, hende també a tende e grito di cu Babilonia e Grandi a cai! E triunfo temporario di cristiandad babilónico na 1918 a termina claramente na 1919 ora e resto dje ungínan, e grupo cu Juan a simbolizá, tabata restorá den un resureccion spiritual. Babilonia e Grandi a cai pasobra e no tabatin poder mas pa tene e pueblo di Dios catibo. Mescos cu un nubia di sprinkhan, e rumanan ungí di Cristo a sali for di abismo, cla pa accion. (Revelacion 9:1-3; 11:11, 12) Nan tabata e moderno “esclabo fiel i prudente,” i nan Doño a nómbranan riba tur su pertenencia riba tera. (Mateo 24:45-47) E uso di nan asina a duna prueba cu Jehova a rechaza totalmente cristiandad apesar cu el a pretende di ser su representante riba tera. Adoracion puro tabata reestablecí, i e camina tabata habrí pa completa e obra di seya e resto dje 144.000—e resto dje simía dje muher, enemigo desde tempo di antigua di Babilonia e Grandi. Tur esei a indica un derota aplastante pa tal organizacion religioso satánico.

Perseverancia pe santonan

13. (a) Kico e tercer angel a anuncia? (b) Con Jehova ta huzga hende cu ta recibi e marca dje bestia salbahe?

¹³ Awor e tercer angel a papia. Scucha! “I un otro angel, esun di tres, a sigi nan, bisando cu boz fuerte: ‘Si cualkier hende ta adora e bestia salbahe i su imagen, i ta recibi un marca riba su frenta of riba su man, e també lo bebe dje biña dje rabia di Dios cu ta ser bashá sin awa den e copa di su furia.’” (Revelacion 14:9, 10a) Den Revelacion 13:16, 17, tabata revelá cu durante e dia di Señor, hende cu no a adora e imagen dje bestia salbahe lo sufri—asta ser matá. Awor nos ta siña cu Jehova a determiná di hiba na huicio hende “cu tin e marca, e nomber dje bestia salbahe of e número di su nomber.” Nan ta keda obligá di bebe un amarga ‘copa di furia’ dje rabia di Jehova. Kico esei lo nifica pa nan? Na aña 607 PEC, ora Jehova a obliga Jerusalem di bebe “su copa di furia,” e stad a experimenta “plunder i kibramento, i hamber i spada” den man di babilónico. (Isaías 51:17, 19) Di igual manera, ora adorador di poder político dje mundo aki i nan imagen, e Naciones Unidas, ta yega di bebe dje copa di furia di Jehova, e resultado lo ta calamidad pa nan. (Jeremías 25:17, 32, 33) Nan lo ser destruí totalmente.

14. Asta promé cu e destruccion di hende cu ta adora e bestia salbahe i su imagen, kico hende asina tin cu experimenta, i ki detaye Juan a duna di esei?

¹⁴ Sin embargo, asta promé cu esei ta sosode, hende cu tin e marca dje bestia tin cu experimenta efecto tormentador dje desaprobacion di Jehova. Papiando tocante adorador dje bestia salbahe i di su imagen, e angel a bisa Juan: “I lo e ser tormentá cu candela i swafel den bista di angel santo i den bista dje Lamchi. I huma di nan tormento lo subi pa semper hamás, i dia i anochi nan no tin sosiego, esnan cu ta adora e bestia salbahe i su imagen, i ken cu ta recibi e marca di su nomber.”—Revelacion 14:10b, 11.

15, 16. Kico kier men e palabra “candela i swafel” den Revelacion 14:10?

¹⁵ Algun hende ta considera cu e mencion ei di candela i swafel ta duna prueba di existencia di un fiernu di candela. Pero un bista breve di un profecía similar ta mustra e berdadero nificacion dje palabra den nan contexto. Ayá den e dianan di Isaías, Jehova a adverti e nacion di Edom cu nan lo ser castigá debí na nan enemistad cu Israel. El a bisa: “Rio di dje mester ta cambiá na breu, i stof di dje na swafel, i su tera mester bira manera breu kimando. Ni di anochi ni di dia e no ta paga; te na tempo indefinitivo su huma lo sigi subi. Di generacion pa generacion lo e keda kimá i secu; pa semper hamás ningun hende lo pasa ei.”—Isaías 34:9, 10.

¹⁶ Edom tabata tirá den un candela di fiernu di fantasía pa kima pa semper? Claro cu no. Mas bien, e nacion a desparce completamente for di mundo como si candela i swafel a kimé totalmente. E resultado final dje castigo no tabata tormento eterno sino el a keda “bashí . . . desierto . . . nada.” (Isaías 34:11, 12) E huma ‘subiendo te na tempo indefinitivo’ ta ilustra esei na moda bibo. Ora cas ta kima, huma ta sigi subi for di shinishi pa basta tempo despues cu flam a caba, dunando mirones evidencia di cu tabatin un candela destructivo. Asta den e dia djawe e pueblo di Dios ta corda e les pa ser siñá for di destruccion di Edom. Dje manera ei e ‘huma di su kimamento’ ta subi ainda na moda simbólico.

17, 18. (a) Kico ta e resultado pa hende cu ta recibi e marca dje bestia salbahe? (b) Di ki manera adorador dje bestia salbahe ta ser tormentá? (c) Di ki manera e “huma di nan tormento ta subi pa semper hamás”?

¹⁷ Hende cu tin e marca dje bestia salbahe lo ser destruí completamente també, como si fuera cu candela. Manera e profecía ta mustra despues, nan cadáver ta keda sin entierro pa bestia i páhara come. (Revelacion 19:17, 18) Pues, claramente, nan no ta ser tormentá literalmente pa semper! Con nan ta ser “tormentá cu candela i swafel”? Wel, e proclamacion dje berdad ta denunciánan i ta advertínan dje binidero huicio di Dios. P’sei, nan ta zundra e pueblo di Dios i, ora ta posibel, cu astucia ta convence e bestia salbahe político pa persigi i asta mata Testigo di Jehova. Pa colmo, tal opositor lo ser destruí como si fuera cu candela i swafel. Anto e “huma di nan tormento ta subi pa semper hamás” pasobra e huicio di Dios di nan lo sirbi como un recordatorio si na cualkier tempo hende ta desafiá e soberanía husto di Jehova. E cuestion lo keda resuelto pa tur eternidad.

¹⁸ Ken ta entrega e mensahe tormentador djawe? No lubida, sprinkhan simbólico tin e autoridad di tormenta hende cu no tin e seyo di Dios riba nan frenta. (Revelacion 9:5) Evidentemente, hende bao di direccion di angel ta tormentador. Tanto tormentador ta e persistencia di sprinkhan simbólico cu ni ‘dia ni anochi nan no tin sosiego, hende cu ta adora e bestia salbahe i su imagen, i ken cu ta recibi e marca di su nomber.’ I finalmente, despues di nan destruccion, evidencia grandi dje vindicacion dje soberanía di Jehova, esta, “e huma di nan tormento,” lo subi pa semper hamás. Laga e grupo cu Juan a simboliza persevera te cu e vindicacion ta completo! Manera e angel a conclui: “Aki ta loke ta significa awante pe santonan, esnan cu ta observa mandamento di Dios i e fe di Jesús.”—Revelacion 14:12.

19. Pakico awante ta necesario di parti dje santonan, i kico Juan a informa cu a fortalecénan?

¹⁹ Sí, “awante pe santonan” kier men nan adoracion di Jehova Dios den debocion exclusivo mediante Jesucristo. Nan mensahe no ta popular. E ta resulta den oposicion, persecucion, i asta martirio. Pero loke Juan a sigi bisa ta fortalecénan: “I mi a tende un boz biniendo di cielo bisa: ‘Skirbi: Feliz ta e mortonan cu ta muri den union cu Señor desde e tempo aki padilanti. Sí, e spiritu ta bisa, láganan sosega di nan trabao, pasobra loke nan a haci ta bai hunto cu nan.’”—Revelacion 14:13.

20. (a) Con e promesa cu Juan a menciona ta armoniza cu e profecía di Pablo tocante e presencia di Jesús? (b) E ungínan cu a muri despues dje sacamento di Satanás foi cielo ta ser primintí cua privilegio special?

²⁰ E promesa ta wel armoniza cu e profecía di Pablo tocante e presencia di Jesús: “Esnan cu ta morto den union cu Cristo lo lanta promé. Despues, nos, esnan bibiente, cu ta sobrebiba [e ungínan cu ta keda na bida te ne dia di Señor], hunto cu nan, lo ser hibá den nubia pa contra cu Señor na laira.” (1 Tesalonicense 4:15-17) Despues di sacamento di Satanás for di cielo, hende cu tabata morto den union cu Cristo a resusitá promé. (Compara cu Revelacion 6:9-11.) Despues, e ungínan cu ta muri durante e dia di Señor ta ser primintí un privilegio special. Nan resureccion na bida spiritual den cielo ta instantáneo, “den un cerá di wowo.” (1 Corintio 15:52) Ki maraviyoso esei tá! I nan obra di husticia ta sigi numa den region celestial.

E cosecha dje tera

21. Kico Juan ta bísanos tocante e “cosecha dje tera”?

²¹ Otro hende també lo beneficiá dje dia di huicio, manera Juan a sigi bísanos: “I mi a wak, i, mira! un nubia blancu, i riba e nubia tabata sintá un persona semehante dje yiu di hende, cu un corona di oro riba su cabez i un machete skerpi den su man. I un otro angel [di cuater] a sali for di santuario dje tempel, sclamando cu boz fuerte na esun sintá riba e nubia: ‘Hinca bo machete i cosechá, pasobra e ora a yega pa cosechá, pasobra e cosécha dje tera ta completamente hecho.’ I esun sintá riba e nubia a hinca su machete den e tera, i e tera tabata cosechá.”—Revelacion 14:14-16.

22. (a) Ken ta esun cu ta bisti e corona di oro i ta sintá ariba e nubia blancu? (b) Na ki tempo tin e culminacion dje cosecha, i di ki manera?

²² No cabe duda tocante identidad di esun sintá riba e nubia blancu. Ta claramente Jesús cu ta sintá riba e nubia blancu semehante dje yiu di hende i cu un corona di oro, e Rey Mesiánico cu Daniel també a mira den un vision. (Daniel 7:13, 14; Marco 14:61, 62) Pero, kico ta e cosecha profetizá ei? Ora Jesús tabata riba tera, el a compara e trabao di haci disípel cu cosechamento dje cunucu mundial di humanidad. (Mateo 9:37, 38; Juan 4:35, 36) E culminacion dje cosecha ta yega den e dia di Señor, ora Jesús ta coroná como Rey i ta ehecuta huicio pa su Tata. Asina, e tempo di su gobernacion, desde 1914, també ta un tempo gozoso pa recoge e cosecha.—Compara cu Deuteronomio 16:13-15.

23. (a) Di ken ta bini e ordu pa cuminza e cosecha? (b) Cua cosecha a tuma lugar desde 1919 te awor?

²³ Aunque e ta Rey i Huez, Jesús ta spera pa Jehova su Dios duna ordu pa cuminza e cosecha. E ordu ta bini di “santuario dje tempel” via un angel. Jesús ta obedece un bez. Promé, desde 1919 padilanti, el a manda su angelnan completa e cosecha dje 144.000. (Mateo 13:39, 43; Juan 15:1, 5, 16) Despues, cosechamento dje multitud grandi di otro carné ta ser hací. (Juan 10:16; Revelacion 7:9) E pasado ta mustra cu entre 1931 i 1935 un bon cantidad dje otro carnénan a cuminza presenta. Na 1935 Jehova a habri comprendimento dje grupo cu Juan a simboliza ne berdadero identidad dje multitud grandi di Revelacion 7:9-17. Dje ora ei padilanti, hopi énfasis tabata duná na recogimento dje multitud. Na 2005, su cantidad a surpasá seis miyón, i e ta sigi aumenta. Siguramente, esun semehante dje yiu di hende a cosecha un cosecha abundante i gozoso durante e tempo di fin.—Compara cu Exodo 23:16; 34:22.

Pisamento di wijndruif dje tera

24. Kico ta den e man di angel di cinco, i kico angel di seis ta sclama?

²⁴ Cu cabamento dje cosecha di salbacion, ta tempo pa un otro cosecha. Juan a informa: “I un otro angel ainda [di cinco] a sali for di santuario dje tempel cu ta den cielo, i e també tabatin un machete skerpi. I un otro angel ainda [di seis] a sali for dje altar i e tabatin autoridad riba candela. I el a sclama cu boz fuerte na esun cu tabatin e machete skerpi, bisando: ‘Hinca bo machete skerpi i recoge troshi di wijndruif dje tera, pasobra su druif a hecha.’” (Revelacion 14:17, 18) Ehército di angel ta ser confiá cu hopi cosechamento durante e dia di Señor, separando bon foi malu!

25. (a) E echo cu angel di cinco a bini di santuario dje tempel ta indica kico? (b) Pakico ta apropiado pe mandamento pa cuminza e cosecha bini dje angel cu a “sali for dje altar”?

²⁵ Angel di cinco ta bini dje presencia di Jehova den e santuario dje tempel; p’sei, e cosecha final també ta ser hací segun e boluntad di Jehova. E angel ta ser mandá pa haci su trabao recibiendo un mensahe via un otro angel cu “a sali for di altar.” Tal echo ta sumamente significante, siendo cu fiel alma bao di altar a puntra: “Te na ki tempo, Señor Soberano santo i berdadero, bo ta tarda pa huzga i vinga nos sanger riba hende cu ta biba riba tera?” (Revelacion 6:9, 10) Cu cosechamento di wijndruif dje tera, e sclamacion pa vinganza lo keda satisfecho.

26. Kico ta “wijndruif dje tera”?

²⁶ Pero, kico ta “wijndruif dje tera”? Den e Scritura Hebreo, e nacion hudío ta ser mencioná como e wijndruif di Jehova. (Isaías 5:7; Jeremías 2:21) Di igual manera, Jesucristo i esnan cu ta sirbi hunto cuné den e Reino di Dios ta ser mencioná como un mata di wijndruif. (Juan 15:1-8) Den tal contexto, e rasgo significativo di mata di druif ta cu e ta produci fruta, i e berdadero mata di druif cristian a produci fruta na abundancia pe alabanza di Jehova. (Mateo 21:43) Pues, “wijndruif dje tera” mester ta, no e berdadero mata di wijndruif, sino esun falso di Satanás, su corrupto sistema visibel di gobernacion riba humanidad, cu su varios “troshi” di fruta demoniaco producí através dje siglonan. Babilonia e Grandi, den locual cristianismo apóstata ta tanto prominente, a eherce mashá poder riba e mata venenoso aki.—Compara cu Deuteronomio 32:32-35.

27. (a) Kico ta sosode ora e angel cu e machete ta recoge wijndruif dje tera? (b) Cua profecía den e Scritura Hebreo ta indica extento dje cosecha?

²⁷ Huicio tin cu ser ehecutá! “I e angel a hinca su machete den e tera i a recoge wijndruif dje tera, i el a tiré den e baki grandi di pers biña dje rabia di Dios. I e baki di pers biña tabata pisá pafó dje stad, i sanger a sali for dje baki te na freno di cabai, pa un distancia di mil seis cien estadio.” (Revelacion 14:19, 20) E indignacion di Jehova contra e mata di wijndruif a ser anuncia pa mashá tempo. (Sofonías 3:8) Un profecía den e buki di Isaías no ta laga duda di cu nacion henter lo ser destruí den pisamento dje baki. (Isaías 63:3-6) Joël també a profetiza cu “multitud” grandi, nacion henter, lo ser pisá pa nan destruccion den e “baki di pers biña,” den e “sabana abao di decision.” (Joël 3:12-14) Berdaderamente, un cosecha grandísimo cu lo no tin atrobé hamás i nunca! Segun e vision di Juan, no ta wijndruif so cu ta wordu cosechá sino també e mata di wijndruif simbólico completo ta ser cortá i tirá den e baki di pers biña pa ser pisá. Asina wijndruif di tera lo ser exterminá i no por crece nunca mas.

28. Ken ta pisa wijndruif dje tera, i kico kier men cu e baki di pers biña ta “pisá pafó dje stad”?

²⁸ Den e vision, cabai ta haci e pisamento, pasobra e sanger cu ta ser sacá for dje wijndruif ta subi te na “freno di cabai.” Siendo cu e palabra “cabai” generalmente ta referi na hacimento di gera, esei mester ta un tempo di gera. E ta bisa cu ehército di cielo cu ta sigi Jesús den e gera final contra e sistema di cosnan di Satanás ta pisa e “baki di pers wijndruif dje rabia di furia di Dios Todopoderoso.” (Revelacion 19:11-16) Ta keda claro cu eseinan ta pisa e wijndruif dje tera. E baki di pers biña ta ser “pisá pafó dje stad,” es decir, pafó di Sion celestial. Realmente ta apropiado pa wijndruif dje tera ser pisá riba tera. Pero també, e ta ser “pisá pafó dje stad” pa no causa ningun daño ne resto dje simía dje muher, cu ta representa Sion celestial riba tera. Eseinan hunto cu e multitud grandi lo ser scondí den siguridad den e arreglo dje organizacion terrenal di Jehova.—Isaías 26:20, 21.

29. Sanger dje baki di pers biña ta yega ki halto, ki leu e ta extende, i kico tur esei ta indica?

²⁹ E vision bibiente tin un paralelo den e aplastamento di reino di mundo bao di piedra dje Reino detayá den Daniel 2:34, 44. Lo tin un exterminacion. E rio di sanger saliendo for dje baki di pers biña ta mashá hundo, te na freno di cabai, i ta extende pa un distancia di 1.600 estadio.a E cifra grandi, producí cu e cuadrado di cuater mal e cuadrado di diez (4 x 4 x 10 x 10), ta comunica enfáticamente e mensahe di cu evidencia di destruccion lo cubri tur e tera. (Isaías 66:15, 16) E destruccion lo ser completo i eterno. Hamás, nunca hamás, e wijndruif di tera di Satanás lo saca raíz!—Salmo 83:17, 18.

30. E mata di wijndruif di Satanás ta produci cua fruta, i nos mester tin cua determinacion?

³⁰ Siendo cu nos ta biba leu den e tempo di fin, e vision dje dos cosecha ta mashá significativo. Tur loke nos tin cu haci ta di wak rond di nos pa mira fruta di wijndruif di Satanás. Aborto i otro forma di asesinato; homosexualidad, adulterio, i otro forma di inmoralidad; falta di onradez i falta di cariño natural—tur cos asina ta haci e mundo baho den bista di Jehova. E mata di wijndruif di Satanás ta produci “fruta di un mata venenoso i absintio.” Su moda di biba ruinoso i idólatra ta desonra e Magnífico Creador di humanidad. (Deuteronomio 29:18; 32:5; Isaías 42:5, 8) Ta ki un privilegio pa ser asociá activamente cu e grupo cu Juan a simboliza den e cosecha dje fruta saludable cu Jesús ta produci pe alabanza di Jehova! (Lucas 10:2) Láganos tur keda determiná di nunca haya mancha dje wijndruif di mundo, i asina evita di ser pisá hunto cu wijndruif dje tera ora e huicio desfavorable di Jehova ta ser ehecutá.

[Nota]

[Kuadro na página 208]

‘E biña di su fornicacion’

Un parti prominente di Babilonia e Grandi ta e religion católico romano. E papa di Roma ta goberna e Iglesia i ta bisa cu cada papa ta un sucesor di apóstol Pedro. Lo sigiente ta algun dato cu a ser publicá tocante tal supuesto sucesor:

Formoso (891-896): “Nuebe luna despues di su morto, e curpa di Formoso tabata sacá for di kelder di papa i hibá pa un huicio dilanti di raad ‘cadavérico,’ cu [e papa nobo] Esteban presidiendo. E difunto papa tabata acusá di ser demasiado ambicioso pe puesto di papa, i tur decreto di dje tabata declará inválido. . . . Mantel di papa tabata kitá for dje cadáver; dede di su man drechi tabata amputá.”—New Catholic Encyclopedia.

Esteban VI (896-897): “Dentro di poco luna [dje huzgamento di cadáver di Formoso] un reaccion violento a termina e puesto di papa Esteban; nan a kita e seña di papa foi dje, a encarcelé, i a choké.”—New Catholic Encyclopedia.

Sergio III (904-911): “E dos papa promé cuné . . . tabata chocá den prisón. . . . Den Roma e tabatin e apoyo di famía Teofilacto, i supuestamente un yiu muher dje famía, yamá Marozia, tabata mama di su yiu (cu despues tabata papa Juan XI).”—New Catholic Encyclopedia.

Esteban VII (928-931): “Durante su último aña como papa, papa Juan X . . . tabata obheto di rabia di Marozia, Donna Senatrix di Roma, i tabata encarcelá i asesiná. Anto Marozia a duna puesto di papa na papa Leo VI, cu a muri despues di 6 1/2 luna den su puesto. Esteban VII a sigié, probablemente bao di influencia di Marozia. . . . Durante su 2 aña como papa, e tabata impotente bao di dominacion di Marozia.”—New Catholic Encyclopedia.

Juan XI (931-935): “Ora Esteban VII a muri. . . . Marozia, di Cas di Teofilacto, a obtene e puesto di papa pa su yiu Juan, un hoven cu poco mas cu 20 aña . . . . Como papa, su mama a dominé.”—New Catholic Encyclopedia.

Juan XII (955-964): “Apenas e tabatin 18 aña, i informe contemporario ta di acuerdo tocante su falta di interés den cosnan spiritual, su adiccion na placer grosero, i un bida corrupto desenfrená.”—The Oxford Dictionary of Popes.

Benedicto IX (1032-1044; 1045; 1047-1048): “E tabata famoso pasobra el a bende e puesto di papa cu su padrino anto despues a reclama e puesto dos biaha.”—The New Encyclopedia Britannica.

Pues, en bez di sigi ehempel di fiel Pedro, eseinan i otro papa tabata un mal influencia. Nan a permiti dramamento di sanger i fornicacion spiritual i fisical, i també e influencia di Jezabel, corrumpi e iglesia cu nan a goberna. (Santiago 4:4) Na 1917 e buki di Studiante di Bijbel titulá E misterio terminá a declara hopi echo asina francamente i cu hopi detaye. Esei tabata un manera cu Studiante di Bijbel den e tempo ei ‘a dal e tera cu tur sorto di plaga.’—Revelacion 11:6; 14:8; 17:1, 2, 5.

[Plachi na página 206]

Cristo entronizá ta ehecuta huicio cu apoyo di angel

[Plachi na página 207]

Despues cu Babilonia a cai na 539 PEC, prisionero di dje a haya libertad