Capítulo 36

Destruccion dje stad grandi

Vision 12—Revelacion 18:1–19:10

Tema: Caimento i destruccion di Babilonia e Grandi; anuncio di casamento dje Lamchi

Tempo di cumplimento: Desde 1919 te cu despues dje tribulacion grandi

 1. Kico lo marca e principio dje tribulacion grandi?

DI RIPIENTE, alarmante, desolador—asina lo ta e destruccion di Babilonia e Grandi! Esei lo ser un suceso di mas catastrófico cu nunca, marcando e principio dje “tribulacion grandi tal como no a sosode desde principio di mundo te awor, no, ni lo no bolbe sosode.”—Mateo 24:21.

 2. Aunque imperio político a subi i a cai, ki clase di imperio a permanece?

² Religion falso a existi pa mashá tempo. El a existi sin interrupcion desde e dia di asesino Nimrod, cu a opone Jehova Dios i a manda hende traha e Toren di Babel. Ora Jehova a bruha lenga di tal hende rebelde i a plámanan na tur parti di mundo, religion falso di Babilonia a bai cu nan. (Génesis 10:8-10; 11:4-9) Desde e tempo ei, imperio político a subi i a cai, pero religion babilónico a permanece. El a tuma hopi forma i aspecto, birando un imperio mundial di religion falso, e Babilonia Grandi di profecía. Su parti mas prominente ta cristiandad, cu a desaroya di union di siñanza babilónico di antigua cu doctrina “cristian” apóstata. Debí ne existencia desde antigua di Babilonia e Grandi, hopi hende ta haya cu ta difícil pa kere cu lo e ser destruí pronto.

 3. Con Revelacion ta confirma e condenacion di religion falso?

³ P’sei ta apropiado pa Revelacion confirma e condenacion di religion falso, dunando dos cuenta detayá di su caimento i di suceso despues cu ta resulta den su desolacion total. Nos a mira caba cu e ta un “gran muher di mala bida” cu finalmente ta ser desolá pa ex-frei di dje dje campo político. (Revelacion 17:1, 15, 16) Awor, den un otro vision ainda, nos ta miré como un stad, e organizacion religioso cu Babilonia di antigua a simboliza.

Babilonia e Grandi ta cai

 4. (a) Cua vision Juan a mira despues? (b) Con nos por identifica e angel, i pakico ta apropiado pe anuncia e caimento di Babilonia e Grandi?

⁴ Juan a sigi cu e relato, bisando nos: “Despues dje cosnan ei mi a mira un otro angel bahando foi cielo, cu gran autoridad; i su gloria a luza e tera. I el a sclama cu boz fuerte, bisando: ‘El a cai! Babilonia e Grandi a cai.’” (Revelacion 18:1, 2a) Esei ta e segunda bez cu Juan a tende e anuncio angelical. (Mira Revelacion 14:8.) Sin embargo, e biaha aki, su importancia ta recibi énfasis via e magnificencia dje angel celestial, pasobra su gloria ta luza tur e tera! Ken e tá? Siglonan na antes profeta Ezekiel, informando di un vision celestial, a bisa cu “e tera mes a briya debí ne gloria [di Jehova].” (Ezekiel 43:2) E único angel pa briya cu gloria comparable cu esei di Jehova ta Señor Jesús, cu ta e “reflexion dje gloria [di Dios] i e representacion exacto di su ser mes.” (Hebreo 1:3) Na 1914, Jesús a bira Rey celestial, i desde e tempo ei e ta eherce autoridad riba tera como Rey i Huez asociá cu Jehova. Ta apropiado, anto, pe anuncia e caimento di Babilonia e Grandi.

 5. (a) Ken e angel ta usa pa anuncia e caimento di Babilonia e Grandi? (b) Ora e huicio a cuminza cu hende cu a bisa cu nan ta dje “cas di Dios,” con a bai cu cristiandad?

⁵ Ken e angel cu gran autoridad ta usa pa anuncia tal noticia asombroso pa humanidad? Wel, esei ta net e pueblo cu tabata libertá como resultado dje caimento, e resto di esnan ungí riba tera, e grupo cu Juan a simboliza. Foi 1914 te 1918 eseinan a sufri mashá den man di Babilonia e Grandi, pero na 1918 Señor Jehova i su “mensahero di pacto [di Abraham],” Jesucristo mes, a cuminza huzgamento dje “cas di Dios,” esta, esnan cu a yama nan mes cristian. Pues, cristiandad apóstata tabata hibá dilanti raad. (Malaquías 3:1; 1 Pedro 4:17) Su culpa enorme pa dramamento di sanger durante e promé gera mundial, su culpa pe persecucion di testigo fiel di Jehova, i credo babilónico di dje, no tabata un yudanza pe durante su tempo di huicio; ni ningun otro parti di Babilonia e Grandi a merece e aprobacion di Dios.—Compara cu Isaías 13:1-9.

 6. Pakico nan por a bisa cu Babilonia e Grandi a cai na 1919?

⁶ Pues, na 1919 Babilonia e Grandi a cai, habriendo e camina pe liberacion i restoracion dje pueblo di Dios, como si fuera den un solo dia, na nan tera di prosperidad spiritual. (Isaías 66:8) Ne aña ei, Jehova Dios i Jesucristo, Darío Mayor i Ciro Mayor, a guia asuntonan di manera cu religion falso no por a tene gara dje pueblo di Jehova mas. Ni tampoco e no por a prevenínan di sirbi Jehova ni duna di conoce na tur hende cu kier tende cu Babilonia e Grandi, semehante di un muher di mala bida ta condená i cu e vindicacion dje soberanía di Jehova ta cerca!—Isaías 45:1-4; Daniel 5:30, 31.

 7. (a) Aunque Babilonia e Grandi no tabata destruí na 1919, con Jehova a miré? (b) Ora Babilonia e Grandi a cai na 1919, kico tabata e resultado pe pueblo di Jehova?

⁷ Ta cierto cu Babilonia e Grandi no tabata destruí na 1919—no mas cu e stad di Babilonia di antigua tabata destruí na 539 PEC ora el a cai bao di ehército di Ciro di Persia. Pero desde e punto di bista di Jehova, e organizacion a cai. E tabata condená hudicialmente, sperando ehecucion; pues, religion falso no por tene preso mas e pueblo di Jehova. (Compara cu Lucas 9:59, 60.) Nan a haya nan libertad pa nan sirbi como e sclabo fiel i prudente di nan Doño, percurando alimento spiritual ne tempo apropiado. Nan a recibi un huicio di “Bon hací” i tabata comisioná pa ocupánan di nobo den e trabao di Jehova.—Mateo 24:45-47; 25:21, 23; Echo 1:8.

 8. E vigilante di Isaías 21:8, 9 a proclama cua suceso, i e vigilante ta simboliza ken den e dia djawe?

⁸ Miles di aña pasá Jehova a usa otro profeta pa profetiza dje suceso importantísimo aki. Isaías a menciona un vigilante cu a “procede di sclama manera león: ‘Ariba e toren di vigilancia, O Jehova, mi ta para constantemente di dia, i na mi puesto di warda mi ta stacioná tur anochi.’” I ki suceso e vigilante a mira i a proclama cu curashi di león? Lo sigiente: “El a cai! Babilonia a cai, i tur imagen grabá di dios di dje [Jehova] a kibra te ne tera!” (Isaías 21:8, 9) E vigilante ta wel simboliza e grupo djawe bon lantá cu Juan a simboliza, mientras cu e ta usa e revista E Toren di Vigilancia i otro literatura teocrático pa duna di conoce na tur parti e noticia di cu Babilonia a cai.

Decadencia di Babilonia e Grandi

9, 10. (a) E influencia di religion babilónico tabatin cua decaimento desde Gera Mundial I? (b) Ki detaye e angel fuerte a duna di caimento di Babilonia e Grandi?

⁹ E caimento di Babilonia di antigua na aña 539 PEC tabata e principio di un decadencia largu cu a termina den su desolacion. Di igual manera, desde e promé gera Mundial, e influencia di religion babilónico a decaí notablemente na escala mundial. Den Hapón, adoracion dje emperador sinto tabata prohibi despues dje segundo gera mundial. Den China, e gobierno comunista ta controla tur nombramento i actividad religioso. Den e nort di Europa cu ta protestante, e mayor parti di pueblo ta indiferente en cuanto religion. I recientemente desunion i pleitu interno a debilita e religion católico romano den tur e mundo.—Compara cu Marco 3:24-26.

¹⁰ Sin duda, tur tendencia asina ta un parti di ‘secamento di rio Eufrates’ den preparacion pe binidero atake militar riba Babilonia e Grandi. Tal ‘secamento’ ta ser reflehá, també, den e anuncio di papa den October di 1986 di cu e iglesia mester “bira limosnero di nobo”—debí na déficit enorme. (Revelacion 16:12) Specialmente desde 1919 Babilonia e Grandi a ser denunciá dilanti público como un desierto spiritual, net manera e angel poderoso a anuncia aki: “I el a bira lugar di habitacion di demoño i lugar di sconde di tur exhalacion impuro i lugar di sconde di tur páhara impuro i odiá!” (Revelacion 18:2b) Pronto lo e ser un desierto mes, tanto desolá como e ruina di Babilonia den Iraq di tempo actual.—Mira també Jeremías 50:25-28.

11. Den ki sentido Babilonia e Grandi a bira “un habitacion di demoño” i ‘un lugar di sconde di exhalacion impuro i di páhara impuro’?

¹¹ Probablemente e palabra “demoño” ta un traduccion dje palabra “demoño cu cara di cabrito” (se‘i·rim) hayá den detaye cu Isaías a duna di caimento di Babilonia: “I habitante di desierto siguramente lo drumi ei, i nan cas mester yená cu shoco. I avestruz mester biba ei, i demoño mes cu cara di cabrito lo tira salto ei.” (Isaías 13:21) Kizás esei no kier men demoño mes sino mas bien bestia di lana di desierto cu tabatin aparencia cu a haci hende corda demoño. Den e ruina di Babilonia e Grandi, existencia simbólico di tal bestia, hunto cu aire contaminá i venenoso (“exhalacion impuro”) i páhara impuro, ta nifica su estado spiritual morto. E no ta ofrece humanidad ningun speranza pa bida.—Compara cu Efesio 2:1, 2.

12. Con e situacion di Babilonia e Grandi ta cuadra cu e profecía di Jeremías capítulo 50?

¹² Su situacion ta cuadra també cu e profecía di Jeremías: “‘Tin un spada contra caldeo,’ ta e declaracion di Jehova, ‘i contra habitante di Babilonia i contra su prinz i contra su sabínan. . . . Tin un desolacion riba su awa, i nan tin cu seca. Pasobra esei ta un tera di imagen grabá, i pa causa di nan vision spantoso nan ta sigi haci co’i loco. P’sei habitante di desierto lo biba cu bestia gritador, i den dje avestruz mester biba; i nunca mas lo ser habitá, ni lo ser habitá pa generacion tras generacion.’” Idolatría i repeticion di oracion cantá no por salba Babilonia e Grandi for di vinganza parecido di kimamento cu Dios a haci di Sodoma i Gomorra.—Jeremías 50:35-40.

Biña instigador di pasion

13. (a) Con e angel fuerte ta hala atencion ne prostitucion na escala enorme di Babilonia e Grandi? (b) Cua inmoralidad cu tabata común den Babilonia di antigua ta ser hayá també den Babilonia e Grandi?

¹³ Anto e angel poderoso a hala atencion na cuanto prostitucion Babilonia e Grandi ta haci, proclamando: “Pasobra pa causa dje biña instigador di pasion di su fornicaciona tur nacion a cai víctima, i rey di tera a comete fornicacion cuné, i comerciante biahero dje tera a bira ricu debí na poder dje luho sin bergüenza di dje.” (Revelacion 18:3) El a indoctriná tur nacion di humanidad den su camina religioso impuro. Den Babilonia di antigua, segun historiador griego Heródoto, un requisito pa cada hovencita tabata di sacrifica su birginidad den prostitucion den adoracion den e tempel. Corrupcion sexual repugnante ta ser mirá te awe den esculturanan cu a recibi daño den e gera na Angkor Wat den Cambodia i den tempel di Khajuraho, India, cu ta mustra e dios hindú Vishnu rondoná pa pintura erótico repugnante. Na América, e revelacion di inmoralidad cu a sagudi mundo di evangelista di TV na 1987, i atrobé na 1988, i també e denuncio di pastor practicando homosexualidad na tur parti, ta ilustra cu asta cristiandad ta tolera escandaloso corrupcion di fornicacion literal. Sin embargo, tur nacion a cai víctima di un sorto asta mas serio di fornicacion.

14-16. (a) Cua relacion religioso-político spiritualmente ilegal a desaroya den Italia fascista? (b) Ora Italia a invadi Abisinia, cua declaracion obispo dje religion católico romano a haci?

¹⁴ Nos a repasa caba e relacion religioso-político ilegal cu rápidamente a hiza Hitler na puesto halto den Alemania nazista. Otro nacion també a sufri door cu religion a metele den asunto seglar. Por ehempel: Den Italia fascista, dia 11 di Februari di 1929, Mussolini i cardenal Gasparri a firma e pacto lateranense, haciendo Ciudad Vaticano un gobierno independiente. Papa Pío XI a bisa cu el a “pone Italia di nobo den man di Dios, i a pone Dios di nobo den Italia.” Esei ta berdad? Considera loke a sosode seis aña despues. Dia 3 di October di 1935, Italia a invadi Abisinia, bisando cu esei tabata “un país bárbaro cu ta practica sclabitud ainda.” Ken, realmente, tabata bárbaro? E Iglesia católico a condena e barbaridad di Mussolini? Mientras cu e papa a saca declaracion di dobel sentido, obispo di dje a expresa nan mes basta hopi bendicionando e forza armá di nan “patria” italiano. Den e buki na inglés E Vaticano den e época di dictador, Anthony Rhodes a informa:

¹⁵ “Den su carta pastoral di 19 di October [di 1935], obispo di Udine [Italia] a skirbi, ‘No ta ni oportuno ni apropiado pa nos decidi loke ta correcto i incorrecto dje caso. Nos deber como italiano, i mas ainda como cristian, ta di contribui ne bon éxito di nos arma.’ Obispo di Padua a skirbi dia 21 di October, ‘Den e oranan dificultoso den cua nos ta biba, nos ta pidi boso tene fe den nos políticonan i den nos forza armá.’ Dia 24 di October, obispo di Cremona a consagra varios bandera dje regimento i a bisa: ‘Dios bendicioná e soldadnan aki cu lo conquista tera nobo i fertil pe genio italiano riba suelo africano, hibando na nan asina e cultura romano i cristian. Laga Italia bira di nobo e maestro cristian di mundo henter.’”

¹⁶ Abisinia tabata ultrahá, bao di bendicion dje clero católico romano. Cualkier di nan di cualkier manera, por a bisa manera apóstol Pablo, cu nan tabata ‘limpi di sanger di tur hende’?—Echo 20:26.

17. Spaña a experimenta cua sufrimento pasobra su clero no a “bati nan spada na ploeg”?

¹⁷ Agrega na Alemania, Italia, i Abisinia un otro nacion cu a bira víctima dje fornicacion di Babilonia e Grandi—Spaña. E gera civil di 1936 te 1939 na Spaña tabata iniciá, en parti, ora e gobierno democrático a dal paso pa reduci e poder enorme dje Iglesia católico romano. Ora e gera a cuminza, Franco, e lider fascista católico dje forza revolucionario, a pinta su mes como e “generalísimo cristian dje gera santo,” un título cu el bandona despues. Cientos di miles di hende spañol a muri den e gera. Fuera di esei, segun un calculacion conservativa, nacionalista di Franco a asesina 40.000 miembro dje Frente Popular, pero eseinan a asesina 8.000 clero—pastor, frere, soeur, i novicio. Esei ta e horror i tragedia di gera civil, ilustrando e sabiduría di obedencia ne palabra di Jesús: “Debolbe bo spada na su lugar, pasobra tur hende cu ta tuma spada lo perece pa spada.” (Mateo 26:52) Ta ki repugnante cu cristiandad ta enbolbele den dramamento di sanger na escala asina grandi! Claramente, clero di dje ta un fracaso completo en cuanto ‘batimento di nan spada na ploeg’!—Isaías 2:4.

Comerciante biahero

18. Ken ta “comerciante biahero dje tera”?

¹⁸ Ken ta “comerciante biahero di tera”? Sin duda nos djawe ta yámanan negociante, gigante di comercio, traficante di negoshi grandi. Esei no kier men cu ta malu pa participa den negoshi legítimo. E Bijbel ta duna conseho sabí pa hende di negoshi, dunando advertencia contra falta di onradez, golosidad, etc. (Proverbio 11:1; Zacarías 7:9, 10; Santiago 5:1-5) E ganashi mayor ta “debocion piadosa hunto cu suficiente di necesidadnan.” (1 Timoteo 6:6, 17-19) Sin embargo, e mundo di Satanás no ta sigi principio husto. Corrupcion ta abunda. Bo por haya esei den religion, den político—i den negoshi grandi. De bez en cuando noticia ta duna di conoce escándalo, tal como hortamento di parti di funcionario halto di gobierno of tráfico ilegal di arma.

19. Cua echo tocante economía di mundo ta yuda splica pakico comerciante dje tera ta ser mencioná desfavorablemente den Revelacion?

¹⁹ Tráfico internacional di arma ta un negoshi aumentando rápidamente te na mas cu miyón miyón di dólar pa aña, mientras cu cientos di miyones di hende no tin pan. Esei ta basta malu. Pero armamento ta parce di ser un pilar fundamental di economía di mundo. Dia 11 di April di 1987, un artículo den e Spectator di Londres a informa: “Contando solamente industria relacioná directamente, tin mas cu 400.000 empleo cu ta ser enbolbí den EU i 750.000 den Europa. Pero ta basta curioso cu, mientras cu e rol social i económico di trahamento di arma a aumenta, e cuestion mes di si tal fabricante tin bon defensa no ta tumá na cuenta.” Den tur e mundo bendedor ta recibi ganashi tremendo bendiendo bomba i otro arma, asta cu posible enemigo. Un dia e mesun bomba por bolbe den un holocausto di candela pa destrui hende cu ta béndenan. Ki contradiccion! Agrega na esei soborno i corrupcion relacioná cu e idustria di arma. Na América so, segun e Spectator, “tur aña e Pentagón ta perde inexplicablemente $900 miyón den arma i equipo.” No ta straño cu comerciante di mundo ta ser mencioná desfavorablemente den revelacion!

20. Cua ehempel ta mustra cu religion ta metele den práctico corrupto di negoshi?

²⁰ Segun e profecía dje glorioso angel, religion ta profundamente enbolbí den tal práctico corrupto di negoshi. Por ehempel, e Vaticano tabata enbolbí den e colapso di Banco Ambrosiano di Italia na 1982. E caso a sigi poco poco te awor, i e pregunta sin contesta tá: Unda e placa a bai? Den Februari di 1987, huez di Milano a saca ordu pa arresta tres clero di Vaticano, incluyendo un arzobispo americano, bao di acusacion cu nan tabata cómplice den bancarrota fraudulento, pero e Vaticano a rechaza e peticion pa extradicion. Den Juli di 1987, durante un cantidad di protesta, ordu di arresto tabata anulá pe corte di mas halto di apelacion di Italia riba base di un pacto bieu cerá entre Vaticano i e gobierno italiano.

21. Con nos sa cu Jesús no tabatin ningun relacion cu práctico dudoso di negoshi di su dia, pero kico nos ta mira awe den religion babilónico?

²¹ Jesús tabata enbolbí den negoshi dudoso di su dia? No. E ni sikiera tabata doño di propiedad, pasobra e “no tabatin lugar pa pone su cabez.” Jesús a conseha un gobernante hoven ricu: “Bende tur loke bo tin i partié cu hende pober, i lo bo tin tesoro den cielo; i bin sea mi sigidor.” Esei tabata bon conseho, pasobra esei por a resulta den liberacion for di tur ansia di asunto di negoshi. (Lucas 9:58; 18:22) Na contraste, religion babilónico hopi bez tin relacion sospechoso cu negoshi grandi. Por ehempel, na 1987, e curant Albany Times Union a informa cu e administrador financiero dje arzobispo católico di Miami, Florida, EUA, a admiti cu e iglesia ta doño di accion den compañía cu ta traha arma nuclear, película sushi, i cigaría.

“Sali foi dje, mi pueblo”

22. (a) Kico e boz biniendo di cielo ta bisa? (b) Kico a resulta den e alegría dje pueblo di Dios na aña 537 PEC i na 1919 EC?

²² E sigiente palabra di Juan ta siñala na mas cumplimento dje modelo profético: “I mi a tende un otro boz biniendo di cielo bisa: ‘Sali foi dje, mi pueblo, si boso no kier participa cuné den su picánan, i si boso no kier recibi parti di su plaganan.’” (Revelacion 18:4) Profecía den e Scritura Hebreo tocante e caimento di Babilonia di antigua ta inclui també e mandamento di Jehova duná na su pueblo: “Cuminza boso huimento for di den Babilonia.” (Jeremías 50:8, 13) Di igual manera, den bista dje binidero desolacion di Babilonia e Grandi, e pueblo di Dios ta ser consehá awor pa scapa. Na aña 537 PEC e oportunidad pa scapa for di Babilonia a causa hopi alegría di parti di israelita fiel. Di igual manera, e liberacion dje pueblo di Dios for di sclabitud babilónico na 1919 a resulta den alegría di nan parti. (Revelacion 11:11, 12) I desde e tempo ei miyones di otro hende a obedece e mandamento di hui.

23. Con e boz biniendo di cielo ta enfatiza e urgencia di hui for di Babilonia e Grandi?

²³ Ta realmente tanto urgente pa hende hui for di Babilonia e Grandi, kitando nan nomber como miembro di religion di mundo i haciendo un separacion completo? Sí, pasobra nos tin cu adopta e punto di bista di Dios dje monster religioso anticuado, Babilonia e Grandi. Dios no a usa palabra fini ora el a yamé un gran muher di mala bida. Pues, awor e boz di cielo a duna Juan mas informacion tocante e muher: “Pasobra su picánan a montona hunto te na cielo, i Dios a corda su actonan di inhusticia. Pagué mescos cu el a paga, i haci cuné dobel, sí, dobel e cantidad di cosnan cu el a haci; den e copa den locual el a basha un mezcla, basha pe dobel e mezcla. Te ne grado cu el a glorifica su mes i a biba den luho sin bergüenza, te ne mesun grado duné tormento i lamentacion. Pasobra e ta sigi bisa den su curazón, ‘Mi ta sintá como reina, i mi no ta biuda, i nunca lo mi mira lamentacion.’ P’sei, den un solo dia su plaganan lo bini, morto i lamentacion i hamber, i lo e ser kimá completamente cu candela, pasobra Jehova Dios, cu ta huzgué, ta fuerte.”—Revelacion 18:5-8.

24. (a) E pueblo di Dios tin cu hui di Babilonia e Grandi pa evita kico? (b) Hende cu no ta hui for di Babilonia e Grandi ta participa cuné den cua picá?

²⁴ E palabra ei ta pica! Pues, accion ta necesario. Jeremías a conseha israelita di su dia pa dal paso, bisando: “Hui for di den Babilonia, . . . pasobra ta tempo di vinganza cu ta pertenece na Jehova. Tin tratamento pa locual e ta pagué. Sali for di den dje, O mi pueblo, i percura escape pe alma di cada un for dje rabia ardiente di Jehova.” (Jeremías 51:6, 45) Di igual manera, e boz di cielo ta adverti e pueblo di Dios djawe pa hui di Babilonia e Grandi pa nan no recibi parti di su plaga. E huicio di Jehova manera plaga riba mundo, incluyendo Babilonia e Grandi, ta ser proclama awor. (Revelacion 8:1–9:21; 16:1-21) E pueblo di Dios tin cu separánan for di religion falso si nan mes no kier sufri di tal plaga i finalmente muri cu e muher. Además, si nan ta keda den e organizacion, esei ta hácinan participante di su picánan. Nan ta keda mes tanto culpable cuné di adulterio spiritual i di dramamento di sanger “di tur esnan cu a ser matá riba tera.”—Revelacion 18:24; compara cu Efesio 5:11; 1 Timoteo 5:22.

25. Di ki manera e pueblo di Dios a sali for di Babilonia di antigua?

²⁵ Sin embargo, con e pueblo di Dios ta sali for di Babilonia e Grandi? Den e caso di Babilonia di antigua, hudío tabatin cu camna na pia for dje stad di Babilonia te ne Tera Primintí. Pero salimento a enbolbe mas cu esei. Isaías a bisa israelita proféticamente: “Aparta boso, aparta boso, sali djei, no mishi cu nada impuro; sali for di den dje, mantene boso limpi, boso cu ta hiba implemento di Jehova.” (Isaías 52:11) Sí, nan tabatin cu bandona tur costumber impuro di religion babilónico cu por a contamina nan adoracion di Jehova.

26. Con hende cristian di Corinto a obedece e palabra, ‘Sali for di den dje i no mishi cu cos impuro’?

²⁶ Apóstol Pablo a cita e palabra di Isaías den su carta pa corintio, bisando: “No bira uní bao di yugo desigual cu hende no creyente. Pasobra cua compañerismo husticia tin cu inhusticia? Of cua participacion luz tin cu scuridad? . . . ‘P’sei, sali for di den nan, i separa boso,’ Jehova ta bisa, ‘i no mishi cu cos impuro.’” Hende cristian di Corinto no tabatin cu bandona e stad pa nan obedece e mandamento. Pero, nan sí tabatin cu evita físicamente tempel impuro di religion falso, i també separánan spiritualmente for di echo impuro di tal adorador di dios falso. Na 1919 e pueblo di Dios a cuminza hui di Babilonia e Grandi di igual manera, haciendo nan limpi di tur loke a sobra di tal siñanza i costumber impuro. Asina, nan por a sirbié como su pueblo purificá.—2 Corintio 6:14-17; 1 Juan 3:3.

27. Ki paralelo tin entre e huicio di Babilonia di antigua i e huicio di Babilonia e Grandi?

²⁷ E caimento i desolacion despues di Babilonia di antigua tabata un castigo pa su picánan. “Pasobra su huicio a yega te na cielo.” (Jeremías 51:9) Di igual manera, e picánan di Babilonia e Grandi a “montona hunto te na cielo,” di manera cu nan a hala atencion di Jehova mes. E ta culpable di inhusticia, idolatría, inmoralidad, opresion, ladronícia, i asesinato. E caimento di Babilonia di antigua tabata, en parti, vinganza pa loke el a haci ne tempel di Jehova i na su adoracion berdadero. (Jeremías 50:8, 14; 51:11, 35, 36) E caimento di Babilonia e Grandi i su destruccion despues di igual manera ta expresion di vinganza pa loke el a haci na adorador berdadero através dje siglonan. En berdad, su destruccion final ta e principio dje “dia di vinganza di parti di nos Dios.”—Isaías 34:8-10; 61:2; Jeremías 50:28.

28. Cua norma di husticia Jehova ta aplica na Babilonia e Grandi, i pakico?

²⁸ Bao di Ley di Moisés, si un israelita a horta for di su paisano, e tabatin cu paga por lo menos dobel como recompensa. (Exodo 22:1, 4, 7, 9) Den e binidero destruccion di Babilonia e Grandi, Jehova lo aplica un norma di husticia similar. Babilonia tin cu recibi dobel loke el a paga. Lo no mustré misericordia pasobra Babilonia e Grandi no a mustra misericordia na su víctimanan. El a chupa sanger di pueblo di mundo pa mantene su mes den “luho sin bergüenza.” Awor e ta bai experimenta sufrimento i lamentacion. Babilonia di antigua a kere cu su posicion tabata absolutamente sigur, bromando: “Lo mi no sinta como biuda, i lo mi no conoce pérdida di yiu.” (Isaías 47:8, 9, 11) Babilonia e Grandi també ta sintié sigur. Pero su destruccion cu Jehova Dios cu ‘ta fuerte’ a decreta, lo sosode lihé, como si fuera den “un solo dia”!

[Nota]

[Kuadro na página 263]

“Rey . . . a comete fornicacion cuné”

Na principio di siglo 19 comerciante europeo tabata hiba contrabanda di un gran cantidad di opio na China. Den Mart di 1839, funcionario chinés a purba di pone fin ne negoshi ilegal, kitando 20.000 caha dje droga for di comerciante inglés. Esei a resulta den tension entre Gran Bretaña i China. Segun cu relacion entre e dos país a empeora, algun misionero protestante a conseha Gran Bretaña pa declara gera, cu declaracion como lo sigiente:

“Cuanto tal dificultad ta alegra mi curazón pasobra mi ta kere cu e gobierno inglés ta furioso, i Dios, cu su poder por kibra obstáculo cu ta stroba evangelio di Cristo di drenta China.”—Henrietta Shuck, misionera di Bautista di Zuid.

Finalmente, gera a cuminza—e gera cu awe ta ser yamá Gera di Opio. Misionero cu tur nan curazón a anima Gran Bretaña cu comentario manera lo sigiente:

“Mi no por menos cu mira e situacion actual, no tanto como un asunto di opio ni di inglés, sino como e gran plan di Dios pa haci e maldad di hende resulta di ser útil pa su propósito misericordioso en cuanto China, pa habri un entrada door di muraya di su exclusion.”—Peter Parker, misionero congregacional.

Un otro misionero congregacional, Samuel W. Williams, a agrega: “E man di Dios ta bisto den tur loke a sosode di manera notable, i no cabe duda cu esun cu a bisa cu el a bini pa trece spada riba tera, a haci esei pa destruccion rápido di su enemigo i establecimento di su mes reino. Lo e trastorna i trastorna te cu e establece e Prinz di Paz.”

En cuanto matamento terrible di hende chinés, misionero J. Lewis Shuck a skirbi: “Mi ta considera tal matamento . . . como instrumento directo di Señor pa elimina basura cu ta stroba adelanto di Berdad Divino.”

Misionero congregacional Elijah C. Bridgman a agrega: “Hopi bez Dios a usa e braza fuerte di poder civil pa prepara e camina pa su reino . . . E agencia di tal momento grandi ta humano; e poder directiva ta divino. E gobernador superior di tur nacion ta usa Inglaterra pa castiga i humiya China.”—Cita sacá for dje artículo “Ends and Means,” 1974, un ensayo di Stuart Creighton Miller publicá den The Missionary Enterprise in China and America (Un Estudio di Harvard redactá pa John K. Fairbank).

[Kuadro na página 264]

“Comerciante biahero . . . a bira ricu”

“Entre 1929 i e principio di Gera Mundial II, [Bernadino] Nogara [administrador financiero di Vaticano] a asigna capital i agente di Vaticano pa traha den campo distinto dje economía italiano—specialmente den energía eléctrica, comunicacion telefónico, crédito i banco, compañía chikito di trein, i produccion di implemento di agricultura, cement, i tela artificial. Hopi di tal empresa a resulta den ganashi.

“Nogara a devora varios compañía incluyendo La Societá Italiana della Viscosa, La Supertessile, La Societá Meridionale Industrie Tessili, i La Cisaraion. Uniendo eseinan den un solo compañía, cu el a yama CISA-Viscosa i poniendo esei bao di mando di barón Francesco María Oddasso, un católico di mas leal di Vaticano, anto Nogara a dal paso pa e fábrica di tela di mas grandi di Italia, SNIA-Viscosa devora e compañía nobo. Despues interés di Vaticano den SNIA-Viscosa a sigi aumenta, i cu tempo Vaticano a dominé—dunando testimonio di tal echo, barón Oddasso despues a bira vice-presidente.

“Asina Nogara a penetra den e industria di tela. El a penetra den otro industria di otro manera, pasobra Nogara tabata mashá bibo. Tal homber inegoísta . . . probablemente a haci mas pa rebiba economía italiano cu cualkier otro comerciante so den historia di Italia . . . Benito Mussolini nunca a yega di alcanza e imperio di su soño, pero el a haci posibel pe Vaticano i Bernadino Nogara crea un dominio di un otro sorto.”—The Vatican Empire, di Nino Lo Bello, bladji 71-73.

Esei ta un ehempel so dje cooperacion estrecha entre comerciante di mundo i Babilonia e Grandi. No ta straño cu comerciante ta lamenta ora nan socio den negoshi no ta existi mas!

[Plachi na página 259]

Ora hende a cuminza plama den tur e tera, nan a hiba e religion di Babilonia hunto cu nan

[Plachi na página 261]

E grupo cu Juan a simboliza, manera vigilante, ta proclama cu Babilonia a cai

[Plachi na página 266]

Ruina di Babilonia di antigua ta pronostica e ruina binidero di Babilonia e Grandi