Felis Ta Esnan Cu Ta Keda Lantá!
“Mira! Mi ta bini manera un ladron. Felis ta esun cu ta keda lantá i ta warda su bistí exterior.”—REVELACION 16:15.
1. Siendo cu e dia di Jehova ta cerca, kico nos por spera?
E GRAN dia di Jehova ta cerca, i esei ta nificá guera! Den vision, apostel Juan a mira “expresionnan inspirá pa demoño” cu a parce sapu sali pa bai na tur “rey,” of gobernante dje tera. Pa haci kico? Wel, “pa reuní nan huntu p’e guera dje gran dia di Dios e Todopoderoso”! Juan a agregá: “Nan a reuní nan huntu n’e lugá cu ta ser yamá na hebreo Har-Magedon.”—Revelacion 16:13-16.
2. Ken ta Gog di Magog, i kico lo sosodé ora e atacá Jehova su pueblo?
2 Pronto, Jehova lo move e elemento político dje sistema aki pa destruí Babilonia e Grandi, e imperio mundial di religion falsu. (Revelacion 17:1-5, 15-17) Anto Gog di Magog, Satanas e Diabel degradá den becindario dje tera, lo posicioná su trupanan i haci un atake total riba Jehova su pueblo pacífico, aparentemente indefenso. (Ezekiel 38:1-12) Pero Dios lo actua pa rescatá su pueblo. Esei lo marca e cuminsamentu di “e dia di Jehova, grandi i inspirador di temor.”—Joël 2:31; Ezekiel 38:18-20.
3. Con lo bo describí e desaroyonan cu Ezekiel 38:21-23 ta predicí?
3 Sí, Jehova lo rescatá su pueblo i lo destruí delaster un rastro final di Satanas su sistema ora nos alcansá e situacion mundial yamá Har-Magedon, of Armagedon. Lesa e palabranan profético di Ezekiel 38:21-23, i visualisá e esena. Jehova ta usa su poder pa ocasioná awaceru inundante, hagel devastador, candela cu ta plama rápidamente, pest mortífero. Pánico ta reina rond mundu segun cu e trupanan di Gog ta ser tirá den confusion, bringando un contra otro. Cualkier enemigu di Dios Todopoderoso cu sobrebibí ta ser ehecutá segun cu Jehova ta usa medionan sobrenatural pa salba su sirbidornan. Ora e “tribulacion grandi” profetisá terminá, lo no keda nada dje sistema malbado di Satanas. (Mateo 24:21) Sin embargo, asta den nan ansha di morto, e malbadonan lo haña sa ken ta responsabel pa nan calamidad. Nos Dios victorioso mes ta bisa: “Nan lo tin cu sa cu ami ta Jehova.” E sucesonan extraordinario aki lo sosodé den nos tempu, durante Jesus su presencia.
E Ta Bini Manera un Ladron
4. Den ki manera Jesus lo bini pa destruí e sistema di cosnan malbado aki?
4 E Señor Jesucristo glorificá a bisa: “Mira! Mi ta bini manera un ladron.” Binimentu manera un ladron lo ta di ripiente, na un tempu inesperá, ora mayoria hende ta drumí. Ora Jesus bini manera un ladron pa destruí e sistema malbado aki, lo e preservá esnan cu ta berdaderamente lantá. El a bisa Juan: “Felis ta esun cu ta keda lantá i ta warda su bistí exterior, p’e no cana sunú i hende mira su bergwensa.” (Revelacion 16:15) Kico e palabranan ei ta nificá? I con nos por keda spiritualmente lantá?
5. Ki areglo pa sirbishi di tempel a existí tempu Jesus tabata riba tera?
5 Generalmente, un vigilante lo no ser kitá sunú si e pega soño na trabou. Pero esei ta loke a sosodé n’e tempel den Jerusalem tempu Jesus tabata riba tera i divisionnan di sacerdote i levitanan a sirbi n’e tempel den Jerusalem. Tabata den siglo 11 P.E.C. cu Rey David a organisá e cientos di sacerdotenan i nan miles di asistentenan levita den un organisacion consistiendo di 24 division. (1 Crónicanan 24:1-18) Cada division di mas cu mil trahador entrená a tuma turno pa atendé e rasgonan di sirbishi di tempel por lo ménos dos biaha pa aña pa un siman completo cada biaha. Sin embargo, n’e Festival di Cabaña, tur e 24 divisionnan tabata na warda. Yudansa adicional tabata necesario tambe na festivalnan di Pascu.
6. Na kico Jesus probablemente a referí ora el a bisa, “Felis ta esun cu ta keda lantá i ta warda su bistí exterior”?
6 Ora Jesus a bisa, “Felis ta esun cu ta keda lantá i ta warda su bistí exterior,” probablemente el a referí na un procedura cu nan tabata sigui e tempu ei cu a enbolbé trabou di vigilante n’e tempel. E Mishna hudiu ta bisa: “E sacerdotenan a tene vigilancia na tres lugá den e Tempel: n’e Cuarto di Abtinas, n’e Cuarto dje Vlam i n’e Cuarto dje Fogon; i e levitanan na bintiun lugá: cincu na e cincu portanan dje Ceru di Tempel, cuater na su cuater skinanan parti paden, cincu na cincu dje portanan dje Patio dje Tempel, cuater na su cuater skinanan parti pafó, i un n’e Cuarto di Ofrenda, i un n’e Cuarto dje Cortina, i un patras dje lugá dje Asiento di Misericordia [parti pafó dje muraya patras dje Santísimo]. E funcionario dje Ceru di Tempel tabata pasa rond na tur vigilante cu antorcha cendé su dilanti, i si cualkier vigilante no a lanta para i bis’é, ‘O funcionario dje Ceru di Tempel, pas sea cu bo!’ i tabata bisto cu e tabata na soño, e funcionario lo a golpi’é cu su bara, i e tabatin e derecho di kima su pañanan.”—E Mishna, Middot (“Medidanan”), 1, paragraf 1-2, traducí dor di Herbert Danby.
7. Pakico e sacerdote i levitanan na warda n’e tempel tabatin cu keda lantá?
7 E hopi levitanan i sacerdotenan dje division cu tabata sirbiendo a keda lantá henter anochi pa vigilá i pa prevení cualkier persona impuru di drenta e pationan dje tempel. Siendo cu e “funcionario dje Ceru di Tempel,” of “e capitan dje tempel,” tabata pasa rond na tur e 24 postnan durante e wardanan di anochi, cada vigilante tabatin cu keda lantá na su post si e no kier a ser sorprendé ta neglishá su deber.—Echonan 4:1.
8. Kico ta e cristian su pañanan exterior figurativo?
8 Cristiannan ungí i nan co-sirbidornan tin cu permanecé spiritualmente lantá i keda bistí cu nan pañanan exterior figurativo. Esakinan ta e evidencianan externo di nos nombramentu p’e ministerio n’e tempel spiritual di Jehova. Como reconocimentu di esaki, nos tin Dios su spiritu santu, of forsa activo, pa yuda nos cumpli cu nos debernan i efectuá nos privilegionan di sirbishi como proclamadornan di Reino. Si nos pega soño na nos post como ministernan di Dios, nos lo ta den peliger di ser gará dor di Jesucristo, e Capitan dje gran tempel spiritual. Si nos ta spiritualmente na soño n’e tempu ei, figurativamente nos lo ser kitá sunú i nos bistí simbólico lo ser kimá. Pues con nos por keda spiritualmente lantá?
Con Nos Por Keda Lantá
9. Pakico studio di Bijbel cu yudansa di publicacionnan cristian ta asina importante?
9 Studio diligente dje Scritura cu yudansa di publicacionnan cristian ta un estímulo pa keda spiritualmente lantá. Un studio asina lo ekipá nos p’e ministerio, lo yuda nos enfrentá crísisnan i lo mustra nos e caminda pa felicidad eterno. (Proverbionan 8:34, 35; Santiago 1:5-8) Nos studio mester ta a fondo i progresivo. (Hebreonan 5:14–6:3) Ora nos ta come bon cuminda regularmente, esei por yuda nos keda lantá i alerto. E por prevení nos di bira letárgico, locual por ta un señal di malnutricion. Nos no tin motibu pa ta spiritualmente malnutrí i yen di soño, pasobra Dios ta percurando alimento spiritual na abundancia pa medio di e “esclabo fiel i discreto” ungí. (Mateo 24:45-47) Alimentacion regular di cuminda spiritual mediante studio personal i di famia ta un manera pa keda lantá i pa ta “saludabel den e fe.”—Tito 1:13.
10. Con reunion, asamblea i congresonan cristian ta yuda nos keda spiritualmente lantá?
10 Reunion, asamblea i congresonan cristian ta yuda nos keda spiritualmente lantá. Nan ta duna animacion i oportunidad pa “incitá otro na amor i na obranan excelente.” Specialmente nos mester reuní huntu regularmente segun cu nos ta “contemplá e dia yegando cerca.” E dia ei awor en berdad ta cerca. Esei ta e “dia di Jehova,” ora lo e vindicá su soberania. Si e dia ei realmente ta importante pa nos—i e mester ta—nos lo ‘no bandoná nos reunimentu huntu.’—Hebreonan 10:24, 25; 2 Pedro 3:10.
11. Pakico nos por bisa cu e ministerio cristian ta esencial pa keda spiritualmente lantá?
11 Participacion di buena gana den e ministerio cristian ta esencial pa keda spiritualmente lantá. Un participacion regular i celoso den predicá e bon nobo ta tene nos alerto. Nos ministerio ta duna nos hopi oportunidad pa papia cu hende tocante e Palabra di Dios, su Reino i su propósitonan. Ta un satisfaccion pa duna testimonio di cas pa cas, haci rebishita i conducí studio di Bijbel na cas for di publicacionnan manera Conocimentu cu Ta Hiba na Bida Eterno. Ancianonan den Efeso di antigwedad por a duna testimonio cu Pablo a siña nan “públicamente i di cas pa cas.” (Echonan 20:20, 21) Naturalmente, algun fiel Testigo di Jehova tin problema serio cu salú cu ta stroba nan ministerio un poco, pero nan ta haña maneranan pa conta otronan tocante Jehova i su reino i ta haña gran goso haciendo esei.—Salmo 145:10-14.
12, 13. Pa ki motibunan nos mester evitá di come i bebe di mas?
12 Evitando excesonan lo yuda nos keda spiritualmente lantá. Ora Jesus a papia tocante su presencia, el a urgi su apostelnan: “Presta atencion na boso mes pa boso curason nunca bira cargá debí na comementu di mas i bebementu di mas i ansiedadnan di bida, i di ripiente e dia ei ta riba boso instantáneamente manera un las. Pasobra lo e bini riba tur esnan cu ta biba riba e cara di tur e tera.” (Lucas 21:7, 34, 35) Golosidad i buracheria no ta na armonia cu principionan bíblico. (Deuteronomio 21:18-21) Proverbionan 23:20, 21 ta bisa: “No yega di ta entre bebedornan di demasiado biña, entre esnan cu ta comedornan golos di carni. Pasobra un buraché i un hende golos lo bin para den pobresa, i cabishamentu lo bisti hende cu simplemente paña kibrá.”—Proverbionan 28:7.
13 Sin embargo, asta si comementu di mas i bebementu pisá no a yega asina leu ainda, nan por haci un persona cabishá, asta floho i negligente pa cu hacimentu dje boluntad di Dios. Naturalmente, lo tin ansiedadnan cu ta enbolbé bida di famia, salú, etcétera. Tog, nos lo ta felis si nos pone interesnan di Reino na promé lugá den bida i tene confiansa cu nos Tata celestial lo percurá pa nos. (Mateo 6:25-34) Di otro manera, “e dia ei” lo bini riba nos manera “un las,” tal bes un trampa camuflá cu lo sorprendé nos of manera un trampa cu as, tal como esnan cu ta lok i despues gara animalnan cu no ta sospechá nada. Esaki lo no sosodé si nos ta keda lantá, plenamente conciente cu nos ta bibando den “e tempu di fin.”—Daniel 12:4.
14. Pakico nos mester ocupá nos mes den oracion sincero?
14 Oracion sincero ta un otro yudansa pa keda spiritualmente lantá. Den su gran profecia, Jesus a urgi tambe: “Keda lantá, anto, na tur tempu haciendo súplica pa boso por logra scapa di tur e cosnan aki cu ta destiná pa sosodé, i pa para dilanti e Yu di hende.” (Lucas 21:36) Sí, laga nos pidi den oracion pa nos por ta semper n’e banda di Jehova i disfrutá di un posicion aprobá ora Jesus, e Yu di hende, bini pa destruí e sistema di cosnan malbado aki. Pa nos mes bon i p’e beneficio di compañeronan creyente pa ken nos ta haci oracion, nos tin cu ‘keda lantá den oracion.’—Colosensenan 4:2; Efesionan 6:18-20.
Tempu Ta Cabando
15. Kico nos sirbishi como predicadornan di husticia ta logra?
15 Segun cu nos ta spera riba e gran dia di Jehova, sin duda nos ta deseá di haci tur loke nos por den su sirbishi. Si nos haci oracion sinceramente na dje tocante esaki, “un porta grandi cu ta hiba na actividad” por habri pa nos. (1 Corintionan 16:8, 9) N’e tempu señalá di Dios, Jesus lo dicta sentencia i separá “carné” hustu, digno di bida eterno, for di “cabritu” malbado cu ta merecé destruccion eterno. (Juan 5:22) No ta nos ta separá carné for di cabritu. Pero nos sirbishi como predicadornan di husticia awor ta dunando hende e oportunidad di scoge un bida di sirbishi na Dios i asina haña e speransa di ser separá pa bida ora Jesus “yega den su gloria.” E echo cu e tempu cu a resta p’e sistema di cosnan aki ta corticu, ta aumentá e necesidad pa actividad di buena gana segun cu nos ta busca esnan “corectamente dispuesto pa bida eterno.”—Mateo 25:31-46; Echonan 13:48.
16. Pakico nos mester ta proclamadornan celoso di Reino?
16 Tempu a caba p’e mundu di dia di Noe, i lo e caba pronto p’e sistema di cosnan aki. P’esei, laga nos ta proclamadornan celoso di Reino. Nos trabou di predicá ta prosperando, pasobra tur aña cientos di miles di persona ta ser bautisá como símbolo di nan dedicacion na Dios. Nan ta bira parti di Jehova su organisacion bendicioná—“su pueblo i e carnénan di su sabana.” (Salmo 100:3) Ta ki un goso pa participá den e trabou di predicacion di Reino cu ta trece speransa pa asina tantu persona promé cu “e dia di Jehova, grandi i inspirador di temor”!
17, 18. (a) Segun cu nos ta predicá, ki reaccion nos mester spera for di algun? (b) Kico lo bin sigur riba mofadornan?
17 Mescos cu Noe, nos tin Dios su apoyo i proteccion. Sí, e hendenan, e angelnan materialisá i e Nefilim lo mester a haci bofon dje mensahe di Noe, pero esei no a stop e. Awe, algun hende ta haci bofon ora nos mustra nan e evidencia convincente cu nos ta bibando den “e último dianan.” (2 Timoteo 3:1-5) Mofa asina ta un cumplimentu di profecia di Bijbel relacioná cu e presencia di Cristo, pasobra Pedro a skirbi: “Den e último dianan lo bini mofadornan cu nan mofa, andando segun nan mes deseonan i bisando: ‘Unda e presencia primintí di dje aki ta? Sí, desde e dia cu nos antepasadonan a bai drumi den morto, tur cos ta siguiendo exactamente manera desde e principio di creacion.’”—2 Pedro 1:16; 3:3, 4.
18 Mofadornan dje tempu aki por pensa: ‘Nada no a cambia desde creacion. Bida ta sigui, cu hende comiendo, bebiendo, casando i lantando famia. Asta si Jesus ta presente, lo e no ehecutá huicio den mi tempu.’ Ki ekibocá nan ta! Si den turesten nan no muri di otro causanan, Jehova su dia inspirador di temor definitivamente lo causa nan destruccion, mescos cu destruccion cataclísmico den e Diluvio a trece un fin na un generacion malbado den tempu di Noe.—Mateo 24:34.
Sin Falta, Keda Lantá!
19. Con nos mester mira nos actividad di haci disipel?
19 Si nos ta dedicá na Jehova, laga nos nunca permití hende yaya nos na soño cu razonamentu incorecto. Esaki ta un tempu pa keda lantá, pa ehercé fe den profecia divino, i pa cumpli cu nos comision di “haci disipel di hende di tur nacion.” (Mateo 28:19, 20) Segun cu e sistema aki ta enfrentá su conclusion final, nos no por tin un privilegio mas grandi cu di sirbi Jehova Dios bou dje liderato di Jesucristo i participá den e trabou mundial di predicá “e bon nobo aki dje reino” promé cu e fin yega.—Mateo 24:14; Marco 13:10.
20. Ki ehempel Caleb i Hosué a pone, i kico nan curso ta indicá pa nos?
20 Algun adorador di Jehova ta sirbiend’e pa décadanan, tal bes henter nan bida. I asta si nos a aceptá adoracion berdadero mas recientemente, laga nos ta manera e israelita Caleb, kende a “sigui Jehova plenamente.” (Deuteronomio 1:34-36) E huntu cu Hosué tabata hopi bon prepará pa drenta e Tera Primintí djis despues di e liberacion di Israel for di sclabitud na Egipto. Sin embargo, e israelitanan adulto en general, a falta fe i tabatin cu pasa 40 aña den e desierto, caminda nan a muri. Caleb i Hosué a pasa un tempu trabahoso huntu cu nan tur e tempu ei, pero cu tempu e dos hombernan ei a drenta e tera primintí. (Númeronan 14:30-34; Hosué 14:6-15) Si nos “sigui Jehova plenamente” i keda spiritualmente lantá, nos lo tin e goso di drenta Dios su mundu nobo primintí.
21. Kico nos lo experenciá si nos keda spiritualmente lantá?
21 Evidencia ta proba claramente cu nos ta bibando den e tempu di fin i cu e gran dia di Jehova ta cerca. Esaki no ta e tempu pa cabishá i bira negligente den haci e boluntad divino. Nos lo ser bendicioná solamente si nos keda spiritualmente lantá i keda bistí cu nos pañanan di identificacion como ministernan cristian i sirbidornan di Jehova. Laga nos determinacion ta pa “keda lantá, para firme den e fe, comportá [nos] manera homber, bira poderoso.” (1 Corintionan 16:13) Como Jehova su sirbidornan, laga nos cada un sea firme i yen di curashi. Anto nos lo ta entre esnan cu ta cla prepará ora e gran dia di Jehova dal aden, sirbiendo fielmente den e fila di esnan felis cu ta keda lantá.
Con Lo Bo Contestá?
◻ Con lo bo definí nos bistí exterior figurativo, i con nos por keda bistí cuné?
◻ Cua ta algun manera pa keda spiritualmente lantá?
◻ Pakico nos mester conta cu lo tin mofadornan, i con nos mester mira nan?
◻ Con nos mester mira nos trabou di haci disipel den e último dianan aki?
[Komentario na página 16]
Cristiannan tin Dios su spiritu santu pa yuda nan keda lantá i cumpli cu nan debernan
[Plachi na página 15]
Bo ta dicididu pa keda spiritualmente lantá i keda bistí cu bo pañanan exterior figurativo?