“En Bes di Oro, Mi A Haña Diamanta”

MANERA MICHALIS KAMINARIS A RELAT’E

Despues di a pasa cincu aña na Sur Africa caminda mi a bai en busca di oro, mi a regresá mi pais cu algu muchu mas balioso. Lagá mi contá bo tocante e rikesa cu awor mi a poseé i a deseá na compartí.

MI A nace na 1904 riba e isla griego di Cefalonia den Laman Ioniano. Tur mi dos mayornan a muri djis despues, pues mi a lanta como huérfano. Mi a anhelá pa haña yudansa, i hopi biaha mi tabata haci oracion na Dios. Aunke mi a asistí regularmente n’e Iglesia Griego Ortodox, mi no tabata sa absolutamente nada di Bijbel. Mi no a haña ningun consolacion.

Na 1929, mi a dicidí na emigrá i busca un mihó bida. Bandonando mi isla secu, mi a nabegá bai Sur Africa via Inglatera. Despues di 17 dia riba laman, mi a alcansá Kaapstad, Sur Africa, caminda mi a haña trabou mesora cerca un paisano. Sin embargo, mi no a haña consolacion den rikesa material.

Algu Mas Precioso

Mi tabata na Sur Africa pa mas o ménos dos aña ora un Testigo di Jehova a bishitá mi lugá di trabou i a ofrecé mi literatura bíblico na idioma griego. Den nan tabatin e foyetonan Where Are the Dead? (Unda e Mortonan Ta?) i Oppression, When Will It End? (Opresion, Na Ki Tempu Lo E Caba?) Mi ta corda cla cu cuantu entusiasmo mi a lesa nan, asta siñando tur e textonan citá for di cabes. Un dia mi a bisa un colega: “Mi a haña loke mi tabata buscando pa tur e añanan aki. Mi a bini Africa pa busca oro, pero en bes di oro, mi a haña diamanta.”

Tabata un goso grandi pa mi pa siña cu Dios tin un nomber personal, Jehova, cu su Reino ya a ser establecí den shelu, i cu nos ta bibando den e último dianan dje sistema di cosnan aki. (Salmo 83:18; Daniel 2:44; Mateo 6:9, 10; 24:3-12; 2 Timoteo 3:1-5; Revelacion 12:7-12) Ki emocionante tabata pa siña cu e Reino di Jehova lo trece bendicion sin fin na tur rasa di humanidad! Un otro echo cu a impresioná mi tabata cu e berdadnan precioso aki tabata ser predicá rond mundu.—Isaías 9:6, 7; 11:6-9; Mateo 24:14; Revelacion 21:3, 4.

Pronto mi a localisá e adres dje oficina di sucursal di Sociedad Watch Tower na Kaapstad i a obtené mas literatura bíblico. Mi tabata specialmente encantá pa obtené un ehemplar personal di Bijbel. Loke mi a lesa a motivá mi di kier compartí mi creencianan. Mi a cuminsá haci esei mandando publicacionnan bíblico pa mi parientenan, amigunan i conocínan na mi pueblo natal di Lixoúrion. For di mi studionan, gradualmente mi a bin comprendé cu pa agradá Jehova bo tin cu dedicá bo bida na dje. Di manera cu mi a haci esei inmediatamente den oracion.

Na un ocasion, mi a asistí na un reunion di Testigonan di Jehova, pero ya cu mi no tabata sa ingles, mi no a comprendé nada-nada. Ora mi a haña sa cu tabatin hopi griego ta biba na Puerto Elísabet, mi a muda bai aya, pero mi no a haña ningun Testigo di abla griego. P’esei, mi a dicidí di regresá Grecia pa mi por a bira un evangelisador di tempu completo. Mi ta corda con mi tabata bisa mi mes, ‘Lo mi regresá Grecia asta si mi yega ei plan barí.’

Ministerio di Tempu Completo na Grecia

Den e primavera di 1934 mi tabata na bordo dje barcu italiano Duilio. Mi a yega Marseilles, Francia, i, despues di un estadia di dies dia ei, mi a sigui pa Grecia bordo dje barcu di pasahero Patris. Ora nos tabata riba laman, e barcu a haña problema di motor i den anochi nan a manda pa baha e botonan salbabida na laman. E ora ei mi a corda mi pensamentunan tocante yega Grecia plan barí. Sin embargo, al final un touboot italiano a yega i a tou nos pa Nápoli, Italia. Despues, finalmente nos a yega Piraiévs (Piraeus), Grecia.

For di ei mi a sigui pa Aténas unda mi a bishitá e oficina di sucursal di Sociedad Watch Tower. Den un combersacion cu Athanassios Karanassios, e superintendente di sucursal, mi a pidi pa ricibí un asignacion di predicacion di tempu completo. E siguiente dia mi tabata riba caminda pa Peloponnisos, den e parti sur dje tera firme di Grecia. Henter e distrito aki a ser asigná na mi como mi teritorio personal!

Cu un entusiasmo desbordante mi a cuminsá den e trabou di predicá, bayendo di pueblo pa pueblo, di pueblito pa pueblito, di cunucu pa cunucu i di cas isolá pa cas isolá. Pronto mi a haña compania di Michael Triantafilopoulos, kende a bautisá mi den e zomer di 1935—mas cu un aña despues cu mi a cuminsá den e ministerio di tempu completo! No tabatin transporte público, pues nos tabata bai tur caminda na pia. Nos problema di mas grandi tabata e oposicion di clero, cu lo a haci cualkier cos pa stop nos. Como resultado, nos a encontrá hopi prehuicio. Sin embargo, apesar di obstáculo, e trabou di duna testimonio a ser hací i Jehova su nomber a ser proclamá den tur skina.

Wantando Oposicion

Un mainta, miéntras mi tabata predicá den e distrito montañoso di Arcadia, mi a yega n’e pueblito di Magouliana. Despues di a duna testimonio pa un ora, mi a tende klok di misa i a realisá un bes cu nan tabata bati klok pa mi causa! Un multitud desordená a bini huntu bou di liderato di un arkimandrita (un dignatario di iglesia cu ta cai bou di un obispu). Mi a core cera mi tas i haci oracion den mi mes na Jehova. E arkimandrita, cu un multitud di mucha siguiend’e, tabata bini stret riba mi. El a cuminsá grita, “At’é ei! At’é ei!”

E muchanan a rondoná mi, i e pastor a dal un stap padilanti i a cuminsá pushá mi cu su barica grandi, bisando cu e no kier a pone man riba mi ‘por si acaso mi tabata contaminá.’ El a grita, “Dal’e! Dal’e!” Pero net n’e momento ei un agente di polis a presentá i a hiba nos tur dos warda di polis. E pastor a ser hibá dilanti corte pa a instigá un multitud desordená i a ricibí un multa di 300 dracma plus gastunan di corte. Ami a sali liber.

Ora nos a yega den un área nobo, nos a scoge un pueblo mas grandi como e centro di nos actividad, i for di ei nos a cubri henter e teritorio den un distancia di cuater ora na pia. Esei a nificá cu nos tabata sali mainta miéntras tabata scur ainda i regresá cas despues cu anochi a cera, generalmente bishitando un of dos pueblito cada dia. Despues di a cubri e pueblitonan den becindario, nos tabata predicá den e pueblo cu a sirbi como nos centro i despues a move pa un otro área. Hopi biaha nos a ser arestá debí cu e clero a instigá e pueblo contra nos. Den e region di Parnassus, den centro di Grecia, polis tabata buscá mi pa lunanan largu. Sin embargo, nan nunca a logra arestá mi.

Un dia ami cu Ruman Triantafilopoulos tabata predicando den e pueblito di Mouríki, den e distrito di Boeotia. Nos a parti e pueblito den dos seccion, i ami a cuminsá traha e casnan riba e subidanan steil, ya cu mi tabata mas yong. Di ripiente mi a tende gritunan ta bini for di mas abou. Segun cu mi tabata core baha, mi a pensa den mi mes, ‘Nan ta golpiando Ruman Triantafilopoulos.’ Habitantenan dje pueblito a reuní den e cafeteria local, i un pastor tabata sulfurando mescos cu un toro brabu. “E hendenan aki ta yama nos ‘e simia dje Colebra,’ ” e tabata grita.

Ya caba e pastor a kibra un garoti riba cabes di Ruman Triantafilopoulos, i sanger tabata core na su cara. Despues cu mi a limpia e sanger, nos a haña chens di bai djei. Nos a cana tres ora te ora nos a alcansá e stad di Thebes. Ei, den un clínica, nan a trata e herida. Nos a entregá un keho na polis, i a entamá un caso hudicial. Sin embargo, e pastor tabatin coneccionnan i finalmente a ser absolvé.

Miéntras nos tabata trahando den e pueblo di Leukas, e siguidornan di un dje lidernan político dje área a “arestá” nos i a trece nos n’e cafeteria dje pueblito, unda nos a ser acusá den un corte cu e pueblo mes a improvisá. E lider político i su hombernan beurt pa beurt tabata bini riba nos i heringá cu nos—zundrando nos sin stop—i menasando nos cu nan moketa cerá. Nan tur tabata burachi. Nan denunciacionnan contra nos a continuá for di merdia te ora solo a baha, pero nos a keda calmu i a sigui sonreí segun cu nos tabata declará nos inocencia i haci oracion den nos mes na Jehova Dios pa yudansa.

Ora a bira scur dos polis a rescatá nos. Nan a hiba nos warda di polis i a trata nos bon. Pa hustificá su accionnan, e lider político a bini e siguiente dia i a acusá nos di a plama rumor falsu contra e Rey di Grecia. Di manera cu polis a manda nos, escoltá pa dos agente, n’e pueblo di Lamia pa mas examinacion. Nan a tene nos den custodia pa shete dia i despues a hiba nos di boei n’e pueblo di Larissa pa huicio.

Nos rumannan cristian na Larissa, cu a ser notificá di antemano, a spera nos yegada. E gran cariño cu nan a mustra pa nos tabata un excelente testimonio p’e guardianan. Nos abogado, un Testigo di Jehova i un ex-teniente coronel, tabata bon conocí den pueblo. Ora el a presentá den corte i a pleita nos caso, e acusacionnan contra nos a ser exponé como falsu i nos a sali liber.

E éxito general dje predicacion di Testigonan di Jehova a hiba na un intensificacion dje oposicion. Leynan a ser pasá na 1938 i 1939 cu a prohibí combertimentu di hende, i ami cu Michael tabata enbolbí den hopi caso di corte riba e cuestion aki. Mas tardi, e oficina di sucursal a consehá nos pa traha separá for di otro pa asina atraé ménos atencion na nos actividad. Mi a haña cu tabata difícil pa traha sin un compañero. Tog, confiando den Jehova, mi a cubri na pia e distritonan di Attica, Boeotia, Phthiotis, Euboea, Aetolia, Acarnania, Eurytania i e distrito di Peloponnisos.

Loke a yudá mi durante e periodo aki tabata e salmista su bunita palabranan di confiansa den Jehova: “Dor di bo mi por core contra un banda di bandidu; i dor di mi Dios mi por subi un muraya. E Dios berdadero ta Esun cu ta fahá mi pertá cu energia vital, i lo e percurá pa mi caminda ta perfecto, haciendo mi pianan manera esnan di biná hembra, i riba lugánan haltu pa mi, e ta mantené mi riba pia.”—Salmo 18:29, 32, 33.

Na 1940, Italia a declará guera contra Grecia, i pronto despues di esei trupanan aleman a invadí e pais. Ley marcial a ser declará i e bukinan di Sociedad Watch Tower a ser prohibí. Eseinan tabata tempunan difícil pa Testigonan di Jehova na Grecia; no obstante, nan a crece na cantidad den un forma dramático—for di 178 Testigo na 1940 pa 1.770 na fin di Guera Mundial II na 1945!

Sirbiendo na Betel

Na 1945, mi a ser invitá pa sirbi n’e oficina di sucursal di Testigonan di Jehova na Aténas. Betel, cu ta nificá “Cas di Dios,” tabata situá e tempu ei den un cas di huur den Caya Lombardou. E oficinanan tabata riba e promé piso, i e drukkerij tabata den e bodega. E tabata consistí di un mashin di imprenta chikitu i un mashin di corta. E personal di imprenta den principio tabata consistí di solamente dos persona, pero pronto otro boluntarionan cu tabata biba na nan cas a cuminsá bin traha pa yuda cu e trabou.

Contacto cu e sede di Sociedad Watch Tower na Brooklyn, New York, a ser reestablecé na 1945, i e aña ei nos a cuminsá imprimí E Toren di Vigilancia atrobe riba un base regular na Grecia. Anto na 1947, nos sucursal a muda bai Caya Tenedou 16, pero e drukkerij a keda den Caya Lombardou. Despues nos a muda e drukkerij for di Caya Lombardou pa un fábrica cu tabata pertenecé na un Testigo rond di cincu kilometer leu. Pues pa un tempu nos tabata core bai bin entre tres sitio.

Mi por corda con nos tabata sali nos habitacionnan den Caya Tenedou promé cu solo sali i biaha bai n’e drukkerij. Despues di traha ei te 1:00 p.m., mi tabata bai Caya Lombardou caminda nos tabata hiba e velnan di papel cu nos a imprimí. Ei e velnan aki tabata ser doblá den forma di revista, cosé i cortá na man. Despues nos tabata hiba e revistanan cu tabata cla postkantoor, hiba nan n’e di tres piso, yuda e personal surti nan i pone stampia riba e envelopnan pa manda nan cu post.

Pa 1954 e cantidad di Testigonan na Grecia a crece na mas cu 4.000, i facilidadnan mas grandi tabata necesario. P’esei, nos a muda pa un Betel nobo di tres piso den centro di ciudad di Aténas den Caya Kartali. Na 1958, mi a ser pidí pa tuma encargo dje cushina, i esei tabata mi responsabilidad te 1983. Miéntras tantu, na 1959, mi a casa cu Eleftheria, kende a resultá di ta un yudante leal den e sirbishi di Jehova.

Wantando Oposicion Atrobe

Na 1967 un hunta militar a coge poder, i un biaha mas restriccionnan a ser imponé riba nos trabou di predicá. Sin embargo, pa motibu di nos experencia anterior den enfrentá prohibicionnan riba nos actividadnan, nos a ahustá rápidamente i a sigui exitosamente den forma clandestino.

Nos a tene nos reunionnan den casnan privá i a ehercé cautela den nos ministerio di cas-pa-cas. No obstante, nos rumannan tabata ser arestá regularmente, i e casonan di corte a multiplicá. Nos abogadonan tabata semper na careda pa trata e huicionan cu a ser tené den vários parti dje pais. Apesar dje oposicion, mayoria dje Testigonan a keda regular den nan actividad di predicá, specialmente den fin di siman.

Riba un diasabra of diadomingo típico despues cu nos a caba cu nos trabou di predicá p’e dia, tabata haci un inspeccion pa mira ken tabata falta for di nos gruponan. Generalmente, esnan cu tabata falta tabata detené n’e warda di polis mas cerca. Pues nos tabata hiba laken i cuminda pa nan i tabata duna nan animacion. Tambe, nos tabata notificá nos abogadonan, kendenan tabata presentá riba dialuna dilanti e fiscal pa defendé esnan cu tabata den custodia. Nos a enfrentá e situacion aki felismente pasobra nos tabata sufri pa causa dje berdad!

Durante e prohibicion nos facilidadnan di imprenta na Betel a ser cerá. P’esei e cas den cua ami cu Eleftheria tabata biba den e suburbionan di Aténas a bira manera un drukkerij. Eleftheria tabata tik copianan dje artículonan di Toren di Vigilancia usando un mashin di tik pisá. E tabata pone dies blachi cu papel di carbon meimei den un solo biaha den e mashin di tik i tabatin cu dal e teclado masha duru p’e letternan sali riba tur e dies blachinan. Despues ami tabata coge e blachinan i cose nan huntu. Tur anochi esaki a sigui te meianochi. Tabatin un polis ta biba den e apartamento bou di nos, i te ainda nos ta puntra nos mes pakico nunca e no a sospechá nada.

Alegrando cu Expansion Continuo

Democracia a ser restorá na Grecia na 1974, i nos trabou di predicá un biaha mas a ser efectuá mas abiertamente. No obstante, durante e shete añanan di restriccion riba nos trabou, nos a disfrutá di un aumento maraviyoso di mas cu 6.000 Testigo nobo, alcansando un total di mas cu 17.000 proclamador di Reino.

Tambe nos a reanudá nos actividad regular di imprenta n’e edificio di sucursal. Como resultado, e facilidadnan di Betel na Caya Kartali pronto a bira muchu chikitu. Pues Sociedad a cumpra un pida tereno di 1 hectar na Marousi, un suburbio di Aténas. Un edificio nobo di Betel a ser construí cu tabatin 27 kamber, un fábrica, oficinanan i otro facilidadnan. Esakinan a ser dedicá na october di 1979.

Cu tempu nos tabatin mester di mas espacio ainda. Pues Sociedad a cumpra 22 hectar di tereno rond di 60 kilometer nort di Aténas. E sitio ta na Eleona, riba un ceritu cu bista riba cerunan i vayenan cu tin hopi coriente di awa. Ei, na april 1991, nos a dedicá un facilidad muchu mas grandi cu ta incluí 22 cas, di cua cada un por acomodá ocho persona.

Despues di a pasa mas cu 60 aña den e ministerio di tempu completo, ainda mi ta bendicioná cu bon salú. Afortunadamente, mi ta “bona durante añanan di cabei blancu.” (Salmo 92:14) Mi ta specialmente gradicidu na Jehova cu mi a biba pa mira cu mi mes wowonan e aumento maraviyoso den e cantidad di su adoradornan berdadero. Profeta Isaías a predicí un aumento asina: “Bo portanan realmente lo keda habrí constantemente; lo no cera nan ni di dia ni di anochi, afin di trece na bo e recursonan dje nacionnan.”—Isaías 60:11.

Ta ki maraviyoso pa mira miyones di hende di tur nacion basha bini na Jehova su organisacion i ser siñá con pa sobrebibí atrabes dje tribulacion grandi pa drenta Dios su mundu nobo! (2 Pedro 3:13) Di berdad mi por bisa cu e ministerio di tempu completo a resultá mas balioso pa mi cu cualkier cos cu e mundu aki tin di ofrecé. Sí, mi a haña, no tesoro di oro, sino diamanta spiritual cu a enrikesé mi bida sin límite.

[Plachinan na página 23]

Michalis i Eleftheria Kaminaris

(Banda drechi) E drukkerij den Caya Lombardou