Capítulo 44
Revelacion i abo
1. (a) Cua siguranza e angel a duna Juan tocante tur promesa maraviyoso di Revelacion? (b) Ken a bisa, “Mi ta bini pronto,” i ki ora e ta “bini”?
DESPUES di a leza detaye gozoso di Jerusalem Nobo, kizás bo kier puntra: ‘Algo tanto maraviyoso realmente por yega di existi?’ Juan a contesta e pregunta informando dje sigiente palabra dje angel: “I el a bisámi: ‘E palabra aki ta fiel i berdadero; sí, Jehova e Dios di expresion inspirá dje profetanan a manda su angel pa mustra su esclabonan loke tin cu sosode aki un poco. I, mira! mi ta bini pronto. Feliz ta hende cu ta cumpli cu palabra di profecía dje rol aki.’” (Revelacion 22:6, 7) Tur promesa maraviyoso di Revelacion realmente lo ser cumplí! Papiando den e nomber di Jesús, e angel a declara cu Jesús lo bini sin tarda, “pronto.” Esei mester ta e binimento di Jesús manera “ladrón” pa destrui enemigo di Jehova i introduci e magnífico i feliz culminacion di Revelacion. (Revelacion 16:15, 16) P’sei, nos mester haci nos bida cuadra cu palabra dje “rol,” esta, cu Revelacion, pa nos ser declará feliz ne tempo ei.
2. (a) Con Juan a reacciona ne abundancia di revelacion, i kico e angel a bisé? (b) Kico nos ta siña for di palabra dje angel, “Tene cuidao!” i, “Adora Dios”?
2 Despues di tanto abundancia di revelacion, ta di comprende cu Juan a sintié gastá: “Wel, ami Juan tabata esun cu a tende i a mira tal cosnan. I despues di a tende i a mira, mi a cai pa adora dilanti pia dje angel cu tabata mustrámi e cosnan ei. Pero el a bisámi: ‘Tene cuidao! No haci esei! Mi ta simplemente un co-esclabo di bo i di bo rumanan cu ta profeta i di esnan cu ta cumpli cu palabra dje rol aki. Adora Dios.’” (Revelacion 22:8, 9; compara cu Revelacion 19:10.) E advertencia—duná dos bez—pa no adora angel tabata oportuno pe dia di Juan, ora ta parce cu algun hende a practica tal adoracion of a bisa cu nan a recibi revelacion special di angel. (1 Corintio 13:1; Galatio 1:8; Colosense 2:18) Awe, esei ta enfatiza e echo cu nos mester adora Dios so. (Mateo 4:10) Nos no mag corrumpi e adoracion puro cu e adoracion di otro persona of cos.—Isaías 42:5, 8.
3, 4. Kico e angel a sigi bisa Juan, i con e resto ungí a obedece su palabra?
3 Juan a sigi: “El a bisámi també: ‘No seya e palabra dje profecía dje rol aki, pasobra e tempo siñala ta cerca. Ken cu ta haci inhusticia, lagué haci inhusticia ainda; i hende sushi ser suciá ainda; pero laga hende husto haci husticia ainda, i hende santo ser hací santo ainda.’”—Revelacion 22:10, 11.
4 E resto ungí djawe a obedece e palabra dje angel. Nan no a seya e palabra dje profecía. Sí, e promé número mes di Toren di Vigilancia (na inglés) (di Juli, 1879) a publica comentario riba varios texto di Revelacion. Manera nos a bisa den e promé capítulo dje buki aki, Testigo di Jehova a publica através dje añanan otro buki iluminador riba Revelacion. Awor nos ta hala atencion di nobo di tur amante dje berdad na profecía fuerte di Revelacion i na nan cumplimento.
5. (a) Kico lo sosode hende cu ta ignora advertencia i conseho di Revelacion? (b) Con hende manso i husto mester reacciona?
5 Si hende kier ignora e spiertamento i conseho di Revelacion, wel, láganan hacié! “Ken cu ta haci inhusticia, lagué haci inhusticia ainda.” Si esei ta nan deseo, hende cu ta lora den e sushidad dje era di complacencia aki por muri den nan sushidad. Aki pronto, e huicio di Jehova lo ser ehecutá por completo, cuminzando cu e destruccion di Babilonia e Grandi. Laga hende manso obedece cu diligencia e palabra dje profeta: “Busca Jehova . . . Busca husticia, busca genio suave. Probablemente boso lo ser scondí den e dia di rabia di Jehova.” (Sofonías 2:3) En cuanto hende cu ta dedicá na Jehova Dios caba, “laga hende husto haci husticia ainda, i hende santo ser hací santo ainda.” Hende sabí sa cu no tin bentaha temporal resultando di picá cu por compara cu bendicion eterno cu ta bini pa hende cu ta sigi tras di husticia i santidad. E Bijbel ta bisa: “Sigi haci prueba pa mira si boso ta den e fe, sigi duna prueba di loke boso mes tá.” (2 Corintio 13:5) Lo bo recibi bo recompensa conforme cu e camina cu bo ta scoge i ta sigi.—Salmo 19:9-11; 58:10, 11.
6. Kico Jehova ta bisa dirigiendo palabra na lector di Revelacion pe última bez den e profecía?
6 Jehova, e Rey di eternidad, ta dirigié awor na lector di Revelacion pe último bez den e profecía, bisando: “Mira! mi ta bini pronto, i e recompensa cu mi ta duna ta cu mi, pa duna na cada un segun nan obra. Mi ta Alfa i Omega, e promé i e último, e principio i e fin. Feliz ta esnan cu ta laba nan mantel, pa nan por tin e autoridad di bai cerca e palunan di bida i pa nan logra drenta den e stad via porta di dje. Pafó ta cachó i esnan cu ta practica spiritismo i fornicador i asesino i idólatra i tur hende cu ta gusta i ta cumpli cu mentira.”—Revelacion 22:12-15.
7. (a) Pakico Jehova ta “bini pronto”? (b) Pakico e clero di cristiandad no tin parti den Jerusalem Nobo?
7 Una bez mas Jehova Dios ta duna énfasis na su soberanía eterno i ne echo cu al fin i al cabo lo e cumpli cu su propósito original. E ta “bini pronto” pa ehecuta huicio i recompensa hende cu ta busqué sinceramente. (Hebreo 11:6) Su ley lo determina ken lo recibi recompensa i ken lo ser rechazá. E clero di cristiandad ta actua manera “cachó mudo,” sin condena malecho cu Jehova a menciona ei. (Isaías 56:10-12; mira també Deuteronomio 23:18, nota di Bijbel Traduccion di Mundo Nobo [Cu Referencia].) Siguramente nan ta ‘gusta i ta cumpli cu’ doctrina i dogma engañoso i ta ignora totalmente e conseho di Jesús duná ne siete congregacion. P’sei, nan no tin lugar den Jerusalem Nobo.
8. (a) Ken so por “bai cerca e palunan di bida,” i kico esei kier men? (b) Con e multitud grandi a “laba nan mantel,” i con nan ta mantene un posicion limpi?
8 Solamente cristian ungí cu berdaderamente ta “laba nan mantel” pa asina ser limpi den e bista di Jehova, tin e privilegio di “bai cerca e palunan di bida.” Es decir, nan ta recibi e derecho i título na bida inmortal den nan puesto celestial. (Compara cu Génesis 3:22-24; Revelacion 2:7; 3:4, 5.) Despues di nan morto como hende, nan ta logra drenta den Jerusalem Nobo mediante un resureccion. E 12 angel ta láganan drenta, pero ta preveni ken cu ta practica mentira of sushidad aunque nan ta bisa cu nan tin e speranza celestial. E multitud grandi riba tera també ta “laba nan mantel i ta hácinan blancu den e sanger dje Lamchi” i tin cu mantene nan condicion limpi dilanti Dios. Nan por haci esei door di evita malecho cu Jehova ta condena aki, i també door di tuma na pecho e conseho di Jesús duná den su siete mensahe pe congregacionan.—Revelacion 7:14; capítulo 2 i 3.
9. Cua palabra Jesús a papia, i su mensahe i tur e buki di Revelacion ta ser dirigí na ken principalmente?
9 Despues di Jehova, Jesús a papia. El a dirigi su palabra di animacion na hende di curazón recto cu ta leza Revelacion, bisando: “Ami, Jesús, a manda mi angel pa duna testimonio na boso di cosnan pe congregacionan. Mi ta e raíz i e yiu di David, i e briyante strea di madrugá.” (Revelacion 22:16) Sí, su palabra ta primeramente “pe congregacionan.” Esei ta un mensahe, primeramente, pe congregacion di cristian ungí riba tera. Tur loke tin den Revelacion ta dirigí principalmente na cristian ungí, cu lo habitá Jerusalem Nobo. Mediante e congregacion, e multitud grandi també tin e privilegio di logra comprendimento di tal precioso berdad profético.—Juan 17:18-21.
10. Pakico Jesús a yama su mes (a) “e raíz” i “yiu di David”? (b) “e briyante strea di madrugá”?
10 Jesucristo tabata confiá cu comunicacion di Revelacion na Juan i mediante dje ne congregacion. Jesús ta tanto e “raíz” como e “yiu di David.” E ta desendiente di David segun carni i asina ta califica pa ser Rey dje Reino di Jehova. També e ta bira “Tata Eterno” di David i asina ta “raíz” di David. (Isaías 9:6; 11:1, 10) E ta Rey permanente i inmortal di desendencia di David, cumpliendo cu e pacto cu Jehova a cera cu David, i ta e “briyante strea di madrugá” profetizá den e dia di Moisés. (Número 24:17; Salmo 89:34-37) E ta “lucero” cu ta sali, haciendo e dia manece. (2 Pedro 1:19) Tur astucia dje gran enemigo Babilonia e Grandi no por preveni su glorioso amanecimento.
Bisa: “Bin!”
11. Cua invitacion abierto Juan a duna awor, i ken por acepté?
11 Awor ta tempo pa Juan tuma palabra. Cu su curazón pasando over cu aprecio pa tur loke el a mira i a tende, el a sclama: “I e spiritu i e bruid ta sigi bisa: ‘Bin!’ I laga ken cu ta tende bisa: ‘Bin!’ I laga ken cu tin sed bini; laga ken cu kier tuma e awa di bida gratis.” (Revelacion 22:17) Beneficio dje sacrificio di rescate di Jesús no ta limitá ne 144.000, pasobra esei ta un invitacion pa tur hende. E spiritu conmovedor di Jehova ta obra via e grupo di bruid, di manera cu e mensahe ta sigi klink claramente: “Tuma e awa di bida gratis.” (Mira també Isaías 55:1; 59:21.) Ken cu tin sed di husticia ta ser invitá pa “bini” i probecha dje generosidad di Jehova. (Mateo 5:3, 6) Ki privilegio tur hende tin sperando di ser dje grupo terrenal cu ta acepta e invitacion dje grupo ungí cu Juan a simboliza!
12. Con e multitud grandi ta reacciona ne invitacion di Revelacion 22:17?
12 Desde rond di 1930, e cantidad aumentante dje multitud grandi a “tende”—esta, a presta atencion ne invitacion. Mescos cu co-esclabo ungí, nan a alcanza un posicion limpi dilanti Jehova. Nan ta anhela e tempo ora Jerusalem Nobo lo baha foi cielo pa basha bendicion riba humanidad. Ya cu nan a tende e mensahe excitante di Revelacion, e multitud grandi no solamente ta bisa “Bin!” sino ta recoge activamente otro hende den e organizacion di Jehova i ta entrenánan també pa proclama: “Laga ken cu tin sed bini.” P’sei, e cantidad dje multitud grandi ta sigi aumenta, mientras cu mas cu 6.000.000 di nan den 235 tera rond di mundo ta participa, hunto cu menos cu 9.000 dje grupo ungí dje bruid, dunando e invitacion di “tuma e awa di bida gratis.”
13. Cua spiertamento Jesús a duna?
13 Sigientemente, ta Jesús cu ta papia atrobé, bisando: “Mi ta duna testimonio na tur hende cu ta tende e palabra dje profecía dje rol aki: Si hende ta agrega algo ne cosnan aki, Dios lo agrega na dje plaga cu ta pará skirbí den e rol aki; i si hende ta kita algo for di palabra dje rol dje profecía aki, Dios lo kita su parti for dje palunan di bida i for dje stad santo, cosnan cu ta ser mencioná den e rol aki.”—Revelacion 22:18, 19.
14. Con e grupo cu Juan a simboliza ta considera e “profecía” di Revelacion?
14 Hende dje grupo cu Juan a simboliza tin cu hala atencion ne “profecía” di Revelacion. Nan no mag scondé ni pone cerca. Su mensahe mester ta predicá abiertamente, “for di dak di cas.” (Mateo 10:27) Revelacion ta inspirá di Dios. Ken por tribi cambia un palabra di loke Dios mes a papia i a comunica mediante Esun cu awor ta Rey reinante, Jesucristo? Siguramente, hende asina ta merece di sali perdí den e buscamento di bida i sufri di plaga cu tin cu bini riba Babilonia e Grandi i riba tur e mundo.
15. Kico e palabra di Jesús ta nifica di cu e ta “duna testimonio dje cosnan aki” i “Mi ta bini pronto”?
15 Awor Jesús a agrega un palabra di animacion final: “Esun cu ta duna testimonio dje cosnan aki ta bisa, ‘Sí; mi ta bini pronto.’” (Revelacion 22:20a) Jesús ta e “testigo fiel i berdadero.” (Revelacion 3:14) Siendo cu el a duna testimonio di vision di Revelacion, nan tin cu ser berdadero. Tanto ele como Jehova Dios mes bez tras bez ta duna énfasis ne echo di cu nan ta bini “pronto,” of aki un poco, i Jesús a bisa esei cinco bez. (Revelacion 2:16; 3:11; 22:7, 12, 20) Nan “binimento” ta pa ehecuta huicio riba e gran muher di mala bida, “rey” político i riba tur otro hende cu ta contra “e reino di nos Señor [Jehova] i di su Cristo.”—Revelacion 11:15; 16:14, 16; 17:1, 12-14.
16. Ya cu bo sa cu Jehova Dios i Jesús ta bini pronto, bo tin cu determina di dal cua paso?
16 Ya cu bo sa cu Jehova Dios i Jesús ta bini pronto, esei mester animábo pa tene “mashá presente e presencia dje dia di Jehova.” (2 Pedro 3:12) Cualkier aparente firmeza dje mundo dje sistema di cosnan di Satanás ta un ilusion. Cualkier aparente bon éxito cu e cielo di gobernante dje mundo aki bao di Satanás por alcanza ta pasahero. Tal cosnan lo pasa forbij. (Revelacion 21:1) E único cos permanente ta ser hayá den Jehova, den su Reino bao di Jesucristo, i den su mundo nobo primintí. Nunca perde bista di esei!—1 Juan 2:15-17.
17. Con bo aprecio dje santidad di Jehova mester afectábo?
17 Pues, anto, permiti loke bo a siña for di bo estudio di Revelacion influenciá bo bida profundamente. Bo bista dje presencia celestial di Jehova Dios no ta impresiona bo mente cu e gloria sublime i santidad di nos Creador? (Revelacion 4:1–5:14) Ta ki un privilegio pa sirbi un Dios asina! Laga bo aprecio di su santidad conmovébo pa tuma mashá na serio e conseho di Jesús duná ne siete congregacion i evita cosnan tal como materialismo, idolatría, inmoralidad, indiferencia, secta di apóstata, of cualkier otro cos cu por haci bo sirbishi inaceptabel pa Jehova. (Revelacion 2:1–3:22) E palabra di apóstol Pedro dirigí ne grupo cu Juan a simboliza ta aplica també en principio ne multitud grandi: “Di acuerdo cu e Santo cu a yama boso, boso també bira santo den tur boso conducta.”—1 Pedro 1:15, 16.
18. Bo mester participa tanto completamente posibel den kico, i pakico e trabao ta urgente awe?
18 Además, bo por sintíbo conmoví pa demonstra mas celo mientras cu bo ta proclama e “aña di bon boluntad di parti di Jehova i e dia di vinganza di parti di nos Dios.” (Isaías 35:4; 61:2) Sea cu bo ta dje trupa chikito of dje multitud grandi, bo por tene e parti mas grandi posibel publicando e bashamento dje siete conchi di rabia di Jehova, declarando e huicio di Dios contra e mundo di Satanás. Ne mesun tempo, uni bo boz cu e proclamacion gozoso dje bon nobo eterno tocante e Reino establecí di Jehova i di su Cristo. (Revelacion 11:15; 14:6, 7) Ocupábo urgentemente den e trabao. I laga hopi hende mas tuma na cuenta e echo cu nos ta den e dia di Señor i hopi mas keda conmoví pa sirbi Jehova cuanan no ta sirbié ainda i unínan den e trabao di proclama e bon nobo. Laga eseinan també progresa te na dedicacion di nan bida na Dios i te na bautismo. No lubida, “e tempo siñalá ta cerca”!—Revelacion 1:3.
19. E apóstol anciano Juan a conclui cu cua palabra, i con bo ta responde na nan?
19 Asina, hunto cu Juan, nos ta pidi fervorosamente: “Amén! Bin, Señor Jesús.” I Juan, un apóstol anciano, a agrega: “Laga e bondad inmerecida di Señor Jesucristo sea cu e santonan.” (Revelacion 22:20b, 21) Lagué ser asina cu boso tur cu ta leza e buki aki. Tene fe cu e gran culminacion di Revelacion ta cerca, di manera cu boso també por uni cu nos den un vigoroso “Amén!”
[Plachi na página 314]
“Pafó ta cachó . . . ”
[Plachi na página 315]
“Feliz ta esnan cu . . . logra drenta e stad via porta di dje”