Capítulo 7
E Bijbel ta contradici su mes?
Un acusacion cu hende sa haci contra e Bijbel ta cu e ta contradici su mes. Generalmente, tal acusador nunca a leza e Bijbel personalmente; nan simplemente ta repiti loke nan ta tende. Pero, algun hende ta haya loke ta parce berdadero contradiccion i esei ta molestiánan.
1, 2. (Inclui introduccion.) (a) Cua acusacion ta ser hací contra e Bijbel hopi bez? (b) Ora nos ta compara diferente texto di Bijbel, kico nos mester corda? (c) Menciona pakico aveces tin un diferencia entre e manera cu dos skirbidor di Bijbel ta informa dje mesun suceso.
SI E Bijbel realmente ta e Palabra di Dios, e mester ta armonioso i no contradictorio. Pakico, anto, ta parce cu algun texto ta parce di contradici otro? Pa contestá esei, nos tin cu corda cu aunque e Bijbel ta e Palabra di Dios, varios homber a skirbié durante un periodo di varios siglo. Tal skirbidor tabatin diferente pasado, estilo di skirbimento, i don, i tur diferencia asina ta ser reflehá den nan skirbimento.
2 Además, si dos of mas skirbidor ta considera e mesun suceso, uno por duna detaye cu e otro ta omití. També, diferente skirbidor ta presenta e mesun asunto di otro manera. Uno por skirbié na moda cronológico, pero un otro por sigi un otro arreglo. Den e capítulo aki, nos lo presenta algun supuesto contradiccion den e Bijbel i considera con pa armonizánan, tumando na cuenta punto cu nos a menciona.
Testigo independiente
3, 4. Cua aparente contradiccion tin entre e relato di Mateo i di Lucas di un criá malu dje oficial militar, i con e dos relato por ta armonizá?
3 Algun “contradiccion” ta presenta ora cu tin dos of mas cuenta dje solo incidente. Por ehempel, den Mateo 8:5 nos ta leza cu ora Jesús a drenta den Capernaum, “un oficial di ehército a yega cerca dje, i a pidié” cura su criá. Pero den Lucas 7:3, nos ta leza cu e oficial di ehército “a manda anciano di hudío cerca dje pa pidi [Jesús] bini i saca su esclabo for di peliger.” E oficial di ehército a papia cu Jesús, of el a manda anciano hacié?
4 E contesta claramente tá cu e homber a manda anciano di hudío hacié. Pakico, anto, Mateo a bisa cu e homber mes a pidi Jesús? Pasobra, realmente e homber a usa anciano hudío pa pidi Jesús. Anciano a sirbi como portaboz.
5. Pakico e Bijbel ta bisa cu Salomón a traha e tempel, ora cu ta keda bisto cu otro hende a haci e trabao mes?
5 Pa ilustra esei, den 2 Crónica 3:1, nos ta leza: “Finalmente Salomón a cuminza traha e cas di Jehova den Jerusalem.” Despues, nos ta leza: “Asina Salomón a caba e cas di Jehova.” (2 Crónica 7:11) Salomón personalmente a traha e tempel di principio te na fin? Claro cu no. Un multitud di artesano i peón a haci e construccion mes. Pero Salomón tabata organizador dje trabao, esun responsabel. P’sei e Bijbel ta bisa cu el a traha e cas. Di igual manera, Evangelio di Mateo ta bísanos cu e comandante militar a haci contacto cu Jesús. Pero Lucas ta duna mas detaye bisando cu el a haci contacto mediante anciano hudío.
6, 7. Con nos por armoniza e dos diferente relato di Evangelio dje peticion dje yiunan di Zebedeo?
6 Lo sigiente ta un ehempel similar. Den Mateo 20:20, 21, nos ta leza: “E mama dje yiunan di Zebedeo a acerqué [Jesús] cu su yiunan, rindiendo homenahe i pidiendo algo di dje.” Loke el a pidi tabata pa su yiunan haya e puesto mas favorecido ora Jesús drenta den su Reino. Den e relato di Marco dje mesun suceso, nos ta leza: “Santiago i Juan, e dos yiu di Zebedeo, a hala cerca [Jesús] i a pidi: ‘Maestro, nos kier pa bo haci pa nos cualkier cos cu nos ta pidíbo.’” (Marco 10:35-37) Ken a pidi Jesús, e dos yiu di Zebedeo of nan mama?
7 Claramente, e dos yiu di Zebedeo a haci e peticion, manera Marco a bisa. Pero nan a hacié mediante nan mama. E tabata nan portaboz. E relato di Mateo ta confirma esei pasobra ora e otro apóstolnan a tende loke e mama dje yiunan di Zebedeo a haci, nan a indigna, no cu e mama, sino “cu e dos ruman.”—Mateo 20:24.
8. Di ki manera e dos diferente relato dje mesun suceso por ta diferente cu otro i toch bisa e berdad?
8 Bo a yega di tende dos hende duna detaye di un suceso cu nan dos a presenciá? Si ta asina, bo a ripara cu cada persona a enfatiza detaye cu a impresionánan? Kizás uno a menciona algo cu e otro no a inclui. Sin embargo, nan dos a papia e berdad. Ta mescos den e cuater Evangelio dje ministerio di Jesús, i també den otro suceso histórico cu mas cu un skirbidor bíblico a menciona. Cada skirbidor a skirbi informacion exacto aunque uno a menciona detaye cu un otro a omití. Ora nos ta leza tur relato, nos ta haya un comprendimento mas completo di loke a pasa. Tal variacion ta duna prueba cu relato bíblico ta independiente. I nan armonía esencial ta duna prueba cu nan ta berdad.
Leza e contexto
9, 10. Di ki manera e contexto ta yúdanos mira unda Caín a haya su esposa?
9 Hopi bez loke ta parce supuesto falta di armonía ta desparce cu lezamento dje contexto so. Por ehempel, considera e pregunta cu sa surgi tocante esposa di Caín. Den Génesis 4:1, 2 nos ta leza: “Cu tempo [Eva] a duna luz na Caín i a bisa: ‘Mi a produci un homber cu ayudo di Jehova.’ Despues el a bolbe duna luz, na su ruman Abel.” Manera tur hende sa, Caín a mata Abel; pero despues di esei nos ta leza cu Caín tabatin un esposa i yiunan. (Génesis 4:17) Si Adam i Eva tabatin dos yiu so, unda Caín a haya su esposa?
10 E contesta tá cu Adam i Eva tabatin mas cu dos yiu. Segun e contexto, nan tabatin un famía grandi. Den Génesis 5:3 nos ta leza cu Adam a bira tata di un otro yiu yamá Set, anto den e sigiente texto, nos ta leza : “El a bira tata di yiu homber i yiu muher.” (Génesis 5:4) Pues, Caín por a casa cu un ruman muher di dje of asta cu un sobrina. Den e época ei na principio di existencia humano, ora humanidad tabata asina cerca perfeccion, ta parce cu no tabatin risico pe yiunan den un casamento asina locual por sosode awe.
11. Algun hende ta menciona cua supuesto desacuerdo entre Santiago i apóstol Pablo?
11 Nos consideracion di contexto també ta yúdanos comprende loke algun hende ta yama desacuerdo entre apóstol Pablo i Santiago. Den Efesio 2:8, 9, Pablo a bisa cu hende cristian ta ser salbá pa fe, no pa obra. El a bisa: “Boso a ser salbá mediante fe . . . no . . . debí na obra.” Sin embargo, Santiago a insisti riba importancia di obra. El a skirbi: “Mescos cu curpa sin spiritu ta morto, asina també fe sin obra ta morto.” (Santiago 2:26) Con nos por armoniza e dos declaracion?
12, 13. Di ki manera e palabra di Santiago ta complementá en bez di contradicí e palabra di apóstol Pablo?
12 Tumando na cuenta e contexto dje palabra di Pablo, nos ta haya cu un declaracion ta completá e otro. Apóstol Pablo a referi na esfuerzo di hudío di warda e Ley di Moisés. Nan a kere cu si nan a warda e Ley den tur detaye di dje, nan lo ser husto. Pablo a mustra cu esei tabata imposibel. Nos nunca por bira husto—i asina merece salbacion—via nos mes obra, pasobra nos a nace pecador. Nos por ta salbá solamente mediante fe den e sacrificio di rescate di Jesús.—Romano 5:18.
13 Sin embargo, Santiago a agrega e punto vital di cu fe di su mes no tin balor si e no tin apoyo di accion. Hende cu ta bisa cu nan tin fe den Jesús mester duna prueba di dje via loke nan ta haci. Fe inactivo ta fe morto i no ta hiba na salbacion.
14. Den cua texto Pablo a mustra cu e tabata na plena armonía cu e principio di cu obra mester demonstra un fe bibo?
14 Apóstol Pablo tabata completamente di acuerdo cu esei, i hopi bez el a menciona e clase di obra cu hende cristian tin cu practica pa demonstra nan fe. Por ehempel, el a skirbi na romano: “Cu curazón hende ta eherce fe pa husticia, pero cu boca hende ta haci declaracion público pa salbacion.” Hacimento di “declaracion público”—compartiendo nos fe cu otronan—ta vital pa salbacion. (Romano 10:10; mira també 1 Corintio 15:58; Efesio 5:15, 21-33; 6:15; 1 Timoteo 4:16; 2 Timoteo 4:5; Hebreo 10:23-25.) Pero, ningun obra cu hende cristian por haci, i siguramente ningun esfuerzo pa cumpli cu e Ley di Moisés, por gana pa nan e derecho di bida eterna. Esei ta e “don cu Dios ta duna” na hende cu ta eherce fe.—Romano 6:23; Juan 3:16.
Punto di bista diferente
15, 16. Con tanto Moisés como Hosué por ta correcto ora uno a bisa cu pariba di Jordan tabata ne “banda aki” dje rio mientras cu e otro a bisa cu esei tabata ne “otro banda”?
15 Tabatin bez cu skirbidor di Bijbel a skirbi tocante un solo suceso desde punto di bista distinto, of nan a presenta nan relato di manera diferente. Ora nos ta tuma tal diferencia na cuenta, mas supuesto contradiccion ta fácil pa resolve. Un ehempel di esei ta den Número 35:14, unda Moisés a menciona e territorio pariba di Jordan como “ne banda aki di Jordan.” Pero, Hosué papiando dje tera pariba di Jordan, a yamé “ne otro banda di Jordan.” (Hosué 22:4) Cua tabatin razón?
16 Realmente, nan dos tabatin razón. Segun e relato di Número, israelita no a cruza e rio Jordan ainda pa drenta den e Tera Primintí, pues pa nan pariba di Jordan tabata e “banda aki.” Pero Hosué a cruza Jordan caba. Awor e tabata físicamente pabao dje rio, den e tera di Canán. Pues, pele, pariba di Jordan tabata “ne otro banda.”
17. (a) Algun hende ta indica cua supuesto contradiccion den e promé dos capítulo di Génesis? (b) Menciona e motibo fundamental di supuesto contradiccion.
17 Además, e construccion di un cuenta por resulta den loke ta parce un contradiccion. Den Génesis 1:24-26, e Bijbel ta indica cu animal tabata creá promé cu hende. Pero Génesis 2:7, 19, 20, ta parce di bisa cu homber tabata creá promé cu animal. Pakico tal falta di acuerdo? Pasobra e dos relato di creacion ta considera e asunto desde dos punto di bista. E promé relato ta duna detaye dje creacion di cielo i tera i di tur loke tin den nan. (Génesis 1:1–2:4) E segundo relato ta concentra riba e creacion dje raza humano i su caimento den picá.—Génesis 2:5–4:26.
18. Con nos por armoniza aparente contradiccion entre e dos relato di creacion den e promé dos capítulo di Génesis?
18 E promé relato ta ser construí cronológicamente, partí den seis “dia” sigí. E segundo relato tabata skirbí segun importancia di asuntonan. Despues di un introduccion breve, e ta sigi lógicamente un bez cu e creacion di Adam, siendo cu e i su famía ta e tópico di loke ta sigi. (Génesis 2:7) Anto e ta introduci otro informacion ora ta necesario. Nos ta siña cu despues di su creacion, Adam tabatin cu biba den un hofi den Eden. Pues, awor e ta menciona e plantamento dje hofi di Eden. (Génesis 2:8, 9, 15) Jehova Dios a bisa Adam duna nomber na “tur bestia salbahe di campo i na tur criatura bulador di cielo.” Awor, anto, tabata e tempo pa menciona cu “Jehova Dios tabata forma di tera” tur criatura asina, aunque nan creacion a cuminza hopi tempo promé cu Adam a presenta riba tera.—Génesis 2:19; 1:20, 24, 26.
Leza e relato cuidadosamente
19. Cua aparente confusion ta existi den e relato bíblico dje dominacion di Jerusalem?
19 Tin bez cu tur loke ta necesario pa resolve loke ta parce contradiccion ta di leza e relato cuidadosamente i razona riba loke e ta bisa. Un ehempel di esei ta den e lezamento dje relato di ora israelita a domina Jerusalem. Jerusalem tabata inclui den e herencia di Benjamín, pero nos ta leza cu e tribu di Benjamín no por a dominé. (Hosué 18:28; Huez 1:21) Nos ta leza també cu Hudá no por a domina Jerusalem—como si fuera Jerusalem tabata un parti dje herencia di Hudá. Despues, Hudá a derota Jerusalem i a kimé cu candela. (Hosué 15:63; Huez 1:8) Sin embargo, cientos di aña despues, segun e registro, David també a domina Jerusalem.—2 Samuel 5:5-9.
20, 21. Ora nos ta examina cuidadosamente tur detaye pertenente, kico ta sali na cla como e historia dje caimento dje stad di Jerusalem na hende hebreo?
20 Na promé bista, tur esei por parce confuso, pero realmente no tin contradiccion. En berdad, e frontera entre e herencia di Benjamín i esun di Hudá tabata e Rooi di Hinom, pasando net door dje stad antigua di Jerusalem. Loke a yega di ser yamá e Stad di David despues realmente tabata situá den e territorio di Benjamín, manera Hosué 18:28 ta bisa. Pero, probablemente e stad Jebuseo di Jerusalem a extende te na otro banda dje Rooi di Hinom i asina a penetra den e territorio di Hudá, di manera cu Hudá, també, tabatin cu combati contra habitante cananeo.
21 Benjamín no por a domina e stad. Na un ocasion, Hudá sí a domina Jerusalem i a kimé. (Huez 1:8, 9) Pero ta parce cu ehército di Hudá a sigi numa, i algun habitante original a bolbe domina e stad. Despues, nan a forma un concentracion di resistencia cu ni Hudá ni Benjamín por a elimina. P’sei, jebuseo a sigi biba den Jerusalem te cu David a domina e stad cientos di aña despues.
22, 23. Ken a carga e staca di tormento di Jesús ne lugar di ehecucion?
22 Nos ta contra cu un otro ehempel den Evangelio. Nos ta leza den Evangelio di Juan cu ora nan a hiba Jesús pa mata: “E mes hibando e staca di tormento, el a sali.” (Juan 19:17) Sin embargo, den Lucas nos ta leza: “Awor ora nan a hibé, nan a coge Simón, un cierto homber di Cirene, biniendo di campo, i nan a pone e staca di tormento riba dje pe cargué tras di Jesús.” (Lucas 23:26) Ken a carga e staca di tormento, Jesús of Simón?
23 Ta parce cu na principio Jesús a carga su mes staca di tormento, manera Juan a bisa. Pero despues, segun e testimonio di Mateo, Marco, i Lucas, nan a obliga Simón di Cirene di hibé pe resto dje camina te ne lugar di ehecucion.
Prueba di independencia
24. Pakico no ta un sorpresa pa nos haya algun aparente contradiccion den e Bijbel, pero nos no mag yega na cua conclusion for di esei?
24 Ta cierto cu ta parce cu tin contradiccion den e Bijbel cu ta dificultoso pa armoniza. Pero nos no mag sopone cu nan ta berdadero contradiccion. Hopi bez esei ta simplemente un caso di falta di informacion completo. E Bijbel ta percura suficiente conocimento pa satisface nos necesidad spiritual. Pero pe dúnanos tur detaye di tur suceso mencioná, e mester ta un biblioteca grandi imposibel pa carga, en bez di ser e solo buki conbeniente i fácil pa hiba, cu nos tin awe.
25. Kico Juan a bisa tocante e registro dje ministerio di Jesús, i con esei ta yúdanos comprende pakico e Bijbel no ta dúnanos tur detaye di tur suceso?
25 En cuanto e ministerio di Jesús, apóstol Juan a skirbi cu exageracion hustificabel: “En berdad, tin hopi otro cos també cu Jesús a haci, locual, si na cualkier tempo nan ta wordu skirbí cu tur detaye, mi ta sopone cu mundo mes no por contene e rolnan skirbí.” (Juan 21:25) Lo ta mas imposibel ainda pa skirbi en detaye tur e historia largu dje pueblo di Dios desde tempo di patriarca te ne congregacion cristian dje promé siglo!
26. E Bijbel ta contene suficiente informacion pa nos keda sigur di cua echo vital?
26 Realmente, e Bijbel ta un milagro di condensacion. E ta contene suficiente informacion pa nos por reconocele como mas cu simplemente un obra humano. Cualkier variacion cu e ta contene ta duna prueba cu skirbidor tabata berdaderamente testigo independiente. En cambio, e unidad sobresaliente dje Bijbel—locual nos lo considera mas en detaye den un capítulo despues—ta demonstra sin duda su origen divino. E ta e palabra di Dios, i no di hende.
[Komentario na página 89]
Aparente contradiccion den e Bijbel ta duna prueba cu skirbidor en berdad tabata testigo independiente
[Komentarrio na página 91]
Hopi bez consideracion di contexto ta yuda resolve supuesto contradiccion
[Kuadro na página 93]
“Desacuerdo” no ta necesariamente contradiccion
E teólogo Kenneth S. Kantzer, a ilustra na un cierto ocasion con dos informe di un solo suceso por parce contradictorio i toch ser e berdad. El a skirbi: “Ta haci poco dia cu e mama di un bon amigo di nos a muri. Nos a tende di su morto pe promé bez door di un amigo di confianza mutua cu a bisa cu e mama di nos amigo tabata spera bus na skina di caya, ora un otro bus pasando a dalé, i cu den poco minut el a muri di herida fatal.”
Pronto despues, Sr. Kantzer a tende un informe mashá diferente. Segun ele: “Nos a tende for di nieto dje difunta cu e tabata enbolbí den un choque, tabata sacá for di auto cu tabata hibé, i a muri instantáneamente. E nieto tabata mashá sigur di loke el a bisa.
“Hopi mas despues . . . nos a purba di armoniza e informacion. Nos a tende cu ora e abuela tabata spera bus, un otro bus a dalé, i cu el a recibi herida grave. Un auto cu tabata pasa a lanté i a hibé hospital lihé, pero den su purá, e auto cu a hibé hospital a choca cu un otro auto. E abuela tabata tirá for dje auto i a muri instantáneamente.”
Sí, e dos relato di un solo suceso por ta berdad aunque nan ta parce di no ser di acuerdo. Tin bez cu esei ta e caso den e Bijbel. Testigo independiente por duna detaye distinto di un solo suceso. Sin embargo, en bez di ser contradictorio, loke nan ta skirbi ta complementá otro, i si nos ta tuma na cuenta tur relato, nos ta haya un mihor comprendimento di loke a pasa.