“Wak!, Mi Ta ku Boso Tur e Dianan”

 1. (a) Resumí brevemente e ilustrashon di e trigu i mal yerba. (b) Kon Hesus a splika e ilustrashon?

UN DI Hesus su ilustrashonnan tokante e Reino di shelu ta papia di un hòmber ku a sembra bon simia den su kunuku i di un enemigu ku a sembra mal yerba den e mesun kunuku ei despues. E mal yerba ta krese i bira asina tantu ku kasi bo no por mira e trigu, pero e kunukero ta bisa su esklabonan pa “laga tur dos krese huntu te na e kosecha.” Durante e tempu di kosecha, e ta laga destruí e mal yerba i rekohé e trigu. Anto Hesus mes a splika e ilustrashon. (Lesa Mateo 13:24-30, 37-43.) Kiko e ilustrashon akí ta siña nos? (Wak e tabèl “Trigu i Mal Yerba.”)

 2. (a) Ki susesonan relashoná ku e Reino di Dios e ilustrashon di e trigu i mal yerba ta yuda nos komprondé? (b) Kua parti di e ilustrashon e artíkulo akí lo analisá?

² Loke ta sosodé den e kunuku ei ta ilustrá kon i na ki tempu Hesus lo rekohé e trigu—tur e kristiannan ungí ku lo goberná huntu kuné den su Reino—for di humanidat. Hesus a kuminsá sembra e bon simia akí na Pentekòste di aña 33 di nos era. I e kosecha, òf rekohementu di e trigu, lo yega su final ora ku tur ruman ungí ku ta riba tera na fin di e era akí risibí nan seyo final i ser tumá den shelu. (Mat. 24:31; Rev. 7:1-4) E ilustrashon akí ta meskos ku un seru haltu. Kon asina? Wèl, ora un hende ta pará riba un seru haltu, e ta haña un bon bista di tur loke tin rondó di dje. Di mes manera, e ilustrashon akí ta yuda nos haña un mihó komprondementu di susesonan ku mester tuma lugá durante un periodo di mas o ménos 2.000 aña. Awor, ki susesonan relashoná ku e Reino di Dios e ta yuda nos diserní i komprondé? Wèl, e ilustrashon ta papia di un tempu di sembramentu, un tempu di kresementu i di un tempu di kosecha. E artíkulo akí lo enfoká prinsipalmente riba e tempu di kosecha.a

 3. (a) Kiko a pasa despues di promé siglo? (b) Ki pregunta nos ta haña na Mateo 13:28, i ken a hasi e pregunta ei? (Wak nota 2 tambe.)

³ Na komienso di siglo 2 di nos era, “mal yerba,” esta kristiannan falsu, a kuminsá aparesé. (Mat. 13:26) Pa siglo 4, ya kaba tabatin muchu mas tantu “mal yerba” ku tabatin kristian ungí. Den e ilustrashon, e esklabonan a pidi nan doño pèrmit pa nan ranka e mal yerba.b (Mat. 13:28) Kon e doño a reakshoná?

 4. (a) Kiko e mandato di Hesus, e Doño, ta laga nos komprondé? (b) For di ki tempu a bira posibel atrobe pa identifiká e kristiannan ku ta forma parti di e trigu?

⁴ Relashoná ku e trigu i mal yerba, Hesus a bisa: “Laga tur dos krese huntu te na e kosecha.” E mandato akí ta mustra ku for di promé siglo te ku awor semper tabatin trigu, òf kristian ungí, riba tera. I Hesus a konfirmá esaki ora el a bisa su disipelnan: “Mi ta ku boso tur e dianan, te na konklushon di e era akí.” (Mat. 28:20) Pues, Hesus lo a sigui protehá e kristiannan ungí te na final. Pero komo ku mal yerba, esta kristiannan falsu, a abundá asina tantu, nos no sa sigur ken tabata forma parti di e grupo di kristian ungí atraves di tur e añanan ei. Ma un 40 aña promé ku e tempu di kosecha a kuminsá, a bira posibel atrobe pa identifiká e kristiannan ku ta forma parti di e trigu. Kon bini?

 5. Kon e profesia di Malakías a kumpli den promé siglo?

⁵ Hopi siglo promé ku Hesus a konta e ilustrashon di e trigu i mal yerba, Yehova a inspirá Malakías pa profetisá un seri di suseso ku e profesia di Hesus tambe ta referí na dje. (Lesa Malakías 3:1-4.) Huan Boutista tabata e ‘mensahero ku a prepará e kaminda.’ (Mat. 11:10, 11) I ora Huan Boutista a yega na aña 29 di nos era, e tempu pa e nashon di Israel ser husgá tabata serka. E di dos mensahero ku e profesia di Malakías a papia di dje tabata Hesus. Hesus a hasi e tèmpel na Herúsalèm limpi na dos okashon: Promé, na komienso di su sirbishi, i despues, na final di su sirbishi aki riba tera. (Mat. 21:12, 13; Huan 2:14-17) Pues, Hesus a tuma un lapso di tempu, di aña 29 di nos era pa aña 33, pa inspekshoná i hasi e tèmpel na Herúsalèm limpi.

 6. (a) Kon e profesia di Malakías a haña su mayor kumplimentu? (b) Durante kua periodo Hesus a inspekshoná e tèmpel spiritual? (Wak nota 3 tambe.)

⁶ Awor, kon e profesia di Malakías a haña su mayor kumplimentu? Pa hopi aña promé ku 1914, C. T. Russell i su koleganan, kendenan tabata konosí komo Studiantenan di Beibel, a hasi un trabou paresido na esun di Huan Boutista. Nan tabata studia Beibel pa nan por a haña sa e bèrdat i siña esaki na otronan. Por ehèmpel, nan tabata siña hende e berdadero nifikashon di Kristu su sakrifisio di reskate, ku fièrnu di kandela no ta eksistí i ku e tempu stipulá di e nashonnan tabata yegando su final. Pero tabatin hopi grupo religioso mas ku tabata bisa ku nan ta siguidó di Kristu. P’esei a surgi un pregunta masha importante ku mester a haña kontesta: Kua di e gruponan akí tabata e trigu ku Beibel ta papia di dje? Pa kontestá e pregunta ei, Hesus a kuminsá inspekshoná e tèmpel spiritual na 1914. I el a terminá su inspekshon i e trabou di limpiesa, òf purifikashon spiritual, ei na komienso di aña 1919. Pues, su trabou a dura di 1914 pa 1919.c

 7. Kiko Hesus a tuma nota di dje ora el a kuminsá su inspekshon na 1914?

⁷ Awor kiko Hesus a tuma nota di dje ora el a kuminsá hasi su inspekshon? Wèl, ku tabatin un grupo chikitu di Studiante di Beibel ku tabatin mas ku 30 aña ta usa nan energia i plaka pa promové e trabou di prediká i ku tabata proklamá e bon notisia zelosamente.d Sin duda, Hesus i su angelnan lo a keda masha kontentu ora nan a mira kon e grupo masha chikitu akí—ku tabata manera stèngelnan stabil di trigu—a keda firme i no a permití mal yerba di Satanas stek nan! No opstante, ainda mester a “purifiká e yu hòmbernan di Levi,” esta, e kristiannan ungí. (Mal. 3:2, 3; 1 Ped. 4:17) Dikon?

 8. Kiko a sosodé despues di 1914?

⁸ Na final di 1914, algun Studiante di Beibel tabata masha desanimá pasobra nan no a bai shelu. Ademas, oposishon di hende pafó di e kongregashon a pone ku e trabou di prediká a mengua durante 1915 pa 1916. Komo si fuera no tabata basta, despues di e morto di Ruman Russell na òktober 1916, rumannan den e organisashon mes a kuminsá oponé otro. Kuater di e shete personanan ku tabata den e direktiva di e Watch Tower Bible and Tract Society a rebeldiá ora a skohe Ruman Rutherford pa dirigí e organisashon. Nan a purba di kousa desunion entre e rumannan, pero na ougùstùs 1917, nan a bandoná Bètel. Esaki sigur tabata un manera ku e organisashon a ser purifiká, òf hasí limpi. I algun otro Studiante di Beibel a stòp di sirbi Yehova pa motibu di miedu di hende. No opstante, hopi Studiante di Beibel a reakshoná bon na Hesus su trabou di limpiesa i a hasi e kambionan nesesario pa nan por tabata limpi den bista di Yehova. P’esei, Hesus, na su turno, a determiná ku nan ta e trigu, esta e kristiannan berdadero, i a rechasá tur kristian falsu, tantu esnan ku tabata den e kongregashon kristian komo esnan ku tabata forma parti di kristiandat. (Mal. 3:5; 2 Tim. 2:19) Kiko a sosodé despues? Pa nos por haña sa esei, laga nos ban bèk na e ilustrashon di e trigu i mal yerba.

9, 10. (a) Kua rasgo di e tempu di kosecha nos lo analisá awor? (b) Kiko ta e promé kos ku a tuma lugá durante e tempu di kosecha?

⁹ Hesus a bisa: “E kosecha ta konklushon di un era.” (Mat. 13:39) I e tempu di kosecha ei a kuminsá na 1914. Pa nos por sa kiko tin ku tuma lugá durante e tempu di kosecha, laga nos analisá sinku rasgo di e tempu di kosecha ku Hesus a profetisá di dje.

¹⁰ Promé, e trabou di ranka e mal yerba. Hesus a bisa: “Den tempu di kosecha, lo mi bisa e kosechadónan: Ranka e mal yerba promé i mara nan na bulto.” Despues di 1914, Hesus su angelnan a kuminsá “ranka” e mal yerba, esta, kristiannan falsu, separando nan asina for di “e yunan di Reino,” ku ta e kristiannan ungí.—Mat. 13:30, 38, 41.

11. Kiko ta distinguí kristiannan berdadero for di esnan falsu te na e dia djawe?

¹¹ Segun ku e trabou di ranka mal yerba a sigui, a bira mas fásil pa distinguí e trigu for di mal yerba. (Rev. 18:1, 4) Pa 1919, tabata bisto ku Babilonia e Grandi a kai, den e sentido ku kristiannan berdadero a sali for di su gara. Awor, kiko spesialmente a distinguí kristiannan berdadero for di tur otro hende ku tabata yama nan mes kristian? E trabou di prediká. E Studiantenan di Beibel ku tabata dirigí e organisashon e tempu ei a kuminsá mustra ku ta masha importante pa tur miembro di kongregashon partisipá den e trabou di prediká e Reino. Por ehèmpel na 1919, nan a publiká un pamfleta (na ingles), titulá Pa Esnan Ku A Ser Enkargá ku e Trabou di Prediká, ku a urgi tur kristian ungí pa prediká di kas pa kas. E pamfleta a bisa: ‘Aunke e trabou nos dilanti por parse algu imposibel pa kumpli kuné, ku yudansa di Señor nos lo hasié pasobra ta Señor su trabou. Boso tambe tin e privilegio di partisipá den e trabou akí.’ Kon e Studiantenan di Beibel a reakshoná? Un Toren di Vigilansia di 1922 a bisa ku desde e tempu ei padilanti e studiantenan di Beibel a kuminsá hasi mas den e trabou di prediká. I no a dura muchu ku e kristiannan fiel ei a bira konosí pa e trabou di prediká di kas pa kas, i te awe kristiannan berdadero ta konosí pa e trabou ei.

12. For di ki tempu e trigu ta ser rekohé?

¹² Di dos, e trabou di rekohé i warda e trigu. Hesus a bisa su angelnan: “Bai i rekohé e trigu i ward’é den mi mangasina.” (Mat. 13:30) For di 1919, Hesus su angelnan ta rekohé e trigu, e ungínan, i trese, òf warda, nan den e kongregashon kristian ku a ser hasí limpi. E kristiannan ungí ku lo ta na bida ora e mundu malbado akí yega na su fin lo ser rekohé definitivamente na momento ku nan ser tumá den shelu.—Dan. 7:18, 22, 27.

13. Segun Revelashon 18:7, ki aktitut e prostituta, òf Babilonia e Grandi, inkluso kristiandat, tin aktualmente?

¹³ Di tres, yoramentu i mordementu riba djente. Kiko lo sosodé despues ku e angelnan kaba di mara e mal yerba na bulto? Ora Hesus tabata papiando di e mal yerba, el a bisa: “Ei ta kaminda nan lo yora i morde riba djente.” (Mat. 13:42) Esei ta tumando lugá aktualmente? Nò, pasobra e prostituta ku e buki di Revelashon ta papia di dje ta simbolisá kristiandat tambe. I te awe, kristiandat ta bisa di su mes: “Mi ta sintá manera un reina riba un trono, i mi no ta biuda i hamas lo mi mira tristesa.” (Rev. 18:7) Sí, ketu bai kristiandat ta sinti ku e tin poder i ta asta pretendé ku e ta “sintá manera un reina” ku tin poder riba lidernan polítiko. Pues, aktualmente, esnan ku e mal yerba ta representá ta bromando ketu bai; nan no ta yorando. Pero nan situashon lo kambia pronto.

14. (a) Na ki tempu i dikon supuesto kristiannan lo ‘morde riba nan djente’? (b) Dikon nos por bisa ku e splikashon nobo akí di Mateo 13:42 ta na armonia ku Salmo 112:10? (Wak nota 5.)

¹⁴ Durante e tribulashon grandi, despues ku tur religion falsu ser destruí, nan miembronan lo kore buska kaminda pa skonde, pero nan lo no ta safe niun kaminda. (Luk. 23:30; Rev. 6:15-17) Anto ta e ora ei, ora nan realisá ku nan lo no por skapa e destrukshon, nan lo yora di desesperashon i ‘morde riba nan djente’ di rabia. Ta manera Hesus a bisa den su profesia tokante e tribulashon grandi: Na e momento skur ei, nan “lo bati nan pechu di tristesa.”e—Mat. 24:30; Rev. 1:7.

15. Kiko lo pasa ku e mal yerba, i na ki tempu esei lo sosodé?

¹⁵ Di kuater, tiramentu di mal yerba den fòrnu di kandela. Kiko lo pasa ku e bultonan di mal yerba? E angelnan “lo tira nan den e fòrnu di kandela.” (Mat. 13:42) Esei ta nifiká ku nan lo ser kompletamente destruí. Pues, tur esnan ku tabata forma parti di religion falsu lo ser destruí durante e parti final di e tribulashon grandi, esta, na Armagedon.—Mal. 4:1.

16, 17. (a) Kua ta e último suseso ku Hesus a menshoná den su ilustrashon? (b) Kon bini nos a yega na e konklushon ku esei lo kumpli den futuro?

¹⁶ Di sinku, e hustunan lo bria. Hesus a terminá su profesia bisando: “Na e tempu ei, e hustunan lo bria manera solo den e Reino di nan Tata.” (Mat. 13:43) Unda i na ki tempu esaki lo sosodé? E parti akí di e profesia di Hesus lo kumpli den futuro i den shelu, i no riba tera!f Tin dos motibu pakiko nos a yega na e konklushon akí.

¹⁷ Promé, laga nos wak “na ki tempu” e palabranan ei di Hesus lo kumpli. Hesus a bisa: “Na e tempu ei, e hustunan lo bria.” E ekspreshon “na e tempu ei” indudablemente ta referí na e suseso ku Hesus a kaba di menshoná, esta, e ‘tiramentu di e mal yerba den fòrnu di kandela.’ I esaki lo sosodé durante e parti final di e tribulashon grandi. Pues, ta na e mesun tempu ei den futuro e rumannan ungí “lo bria.” Awor, na unda nan lo bria? Hesus a bisa ku e hustunan lo ‘bria den e Reino.’ Kiko esei ta nifiká? Tur e fiel ungínan ku ainda lo ta riba tera despues di e promé parti di e tribulashon grandi, kendenan ya kaba a risibí nan seyo final, lo ser tumá den shelu, manera Hesus a indiká den su profesia tokante e tribulashon grandi. (Mat. 24:31) Einan, esta den shelu, nan lo bria “den e Reino di nan Tata.” Anto, ta einan tambe ta kaminda ku djis despues di e guera di Armagedon, nan lo forma parti di e brùit gososo di Hesus na “e kasamentu di e Lamchi.”—Rev. 19:6-9.

18, 19. Den ki manera e splikashon tokante Hesus su ilustrashon di e trigu i mal yerba ta benefisiá nos?

¹⁸ Awor, kon e ilustrashon akí por benefisiá nos kada un? Tin por lo ménos tres manera. Pa di promé, e ta yuda nos komprondé pakiko Yehova no a destruí e malbadonan ainda. Yehova ta soportá e “pòchinan di rabia” akí pa e por rekohé e “pòchinan di miserikòrdia”—e kristiannan ungí ku e trigu ta simbolisá.g (Rom. 9:22-24) Di dos, e ilustrashon ta hasi nos fe mas fuerte. Segun ku e fin ta yega serka, nos enemigunan lo intensifiká nan atakenan kontra nos, pero “nan lo no vense” nos. (Lesa Yeremías 1:19.) Dikon nò? Pasobra nos tin e konfiansa ku meskos ku nos Tata selestial, Yehova, a protehá e kristiannan ungí—e trigu—atraves di añanan, lo e protehá nos tambe pa medio di Hesus i e angelnan “tur e dianan” te na e fin.—Mat. 28:20.

¹⁹ Di tres, e ilustrashon akí ta yuda nos identifiká e trigu. Dikon ta masha importante pa sa ta ken e trigu ta representá? Pasobra ora nos sa esei, nos por kontestá un otro pregunta ku Hesus a hasi den su profesia tokante e último dianan. Hesus a puntra: “Ken realmente ta e esklabo fiel i prudente?” (Mat. 24:45) E siguiente dos artíkulonan lo kontestá e pregunta ei.