Capitulo Dieseis

E Reynan Rival Ta Acercá Nan Fin

 1, 2. Con e identidad dje rey di nort a cambia despues dje di dos guera mundial?

REFLECCIONANDO riba e clima político di Merca i Rusia, Alexis de Tocqueville, filósofo i historiadó frances, a skirbi na 1835: “Pa unu, e medio principal di accion ta libertad; p’e otro, esei ta sclabitud. Nan . . . camindanan [ta] distinto; no obstante, cada un ta parce di ta yamá dor di un of otro plan secreto di Providencia pa tene destino di mitar mundu den su man.” Con exacto e pronóstico aki tabata despues di Guera Mundial II? Historiadó J. M. Roberts ta skirbi: “Na fin di un di dos Guera Mundial, por fin a parce probabel cu en berdad destino di mundu lo ser dominá dor di dos sistema di poder grandi i masha distinto for di otro: unu basá riba loke tabata Rusia, unu riba Merca.”

² Durante e dos gueranan mundial, Alemania tabata e enemigu principal dje rey di zuid—e Potencia Mundial Anglo-Americano—i a ocupá e posicion di rey di nort. Sin embargo, despues di Guera Mundial II, e nacion ei a keda partí. West Alemania a bira un aliado dje rey di zuid, i Oost Alemania a pone su mes na banda di un otro entidad poderoso: e bloke di nacionnan comunista, encabesá pa Union Soviético. E bloke of entidad político aki a lanta para como rey di nort, i a oponé e aliansa Anglo-Americano fuertemente. I e rivalidad entre e dos reynan aki a bira un Guera Friu cu a dura di 1948 te cu 1989. Anteriormente, e rey di nort aleman a actua “contra e pacto santu.” (Daniel 11:28, 30) Con e bloke comunista lo actua pa cu e pacto?

CRISTIANNAN BERDADERO TA TROMPECA PERO NAN TA PREVALECE

 3, 4. Ken ta esnan cu ta “actua cu maldad contra e pacto,” i ki relacion nan tabatin cu e rey di nort?

³ E angel di Dios a bisa: “Esnan cu ta actua cu maldad contra e pacto, [e rey di nort lo] hiba na apostasia cu palabranan labioso.” Anto e angel a agregá: “Pero pa loke ta trata e pueblo cu conocé nan Dios, nan lo prevalecé i actua eficasmente. I pa loke ta trata esnan cu tin perspicacia entre e pueblo, nan lo duna comprendimentu na hopi. I spada i vlam, cautiverio i plundermentu, lo pone nan trompecá sigur pa algun dia.”—Daniel 11:32, 33.

⁴ E úniconan cu por ta “esnan cu ta actua cu maldad contra e pacto,” ta e lidernan di cristiandad, kendenan ta pretendé di ta cristian, pero cu nan accionnan ta profaná asta e nomber di cristianismo. Den su buki Religion in the Soviet Union, Walter Kolarz ta bisa: “[Durante e di dos guera mundial] Gobiernu Soviético a soru p’e haña e yudansa material i moral di Iglesianan pa defendé e madre patria.” Despues dje guera, lidernan di iglesia a purba mantené e amistad ei, apesar dje política ateo dje potencia cu awor tabata rey di nort. Asina, cristiandad a mustra mas cu nunca cu e ta un parti dje mundu aki, un apostasia repugnante den bista di Jehova.—Juan 17:16; Santiago 4:4.

 5, 6. Ken tabata “e pueblo cu conocé nan Dios,” i con a bai cu nan bou di mando dje rey di nort?

⁵ Kico di cristiannan berdadero, “e pueblo cu conocé nan Dios” i “esnan cu tin perspicacia”? Maske nan tabata apropiadamente “sumiso na autoridadnan superior,” cristiannan cu a biba bou dje gobernacion dje rey di nort no tabata parti dje mundu aki. (Romanonan 13:1; Juan 18:36) Nan a soru pa paga bek “e cosnan di César na César,” pero tambe nan a duna “na Dios e cosnan di Dios.” (Mateo 22:21) Debí na esaki, nan integridad a ser poné na prueba.—2 Timoteo 3:12.

⁶ Como resultado, cristiannan berdadero a “trompecá,” pero nan a “prevalecé” tambe. Nan a trompecá den e sentido cu nan a sufri di persecucion intenso, i algun asta a haña nan morto. Pero nan a prevalecé den e sentido cu e gran mayoria a keda fiel. Nan a vence mundu, mescos cu Jesus. (Juan 16:33) Ademas, nunca nan no a stop di predicá, ni ora nan a haña nan den prizon of den campo di concentracion. Dor di haci asina, nan a “duna comprendimentu na hopi.” Apesar dje persecucion den mayoria pais goberná dor dje rey di nort, e cantidad di Testigo di Jehova a aumentá. Debí n’e fieldad di “esnan cu tin perspicacia,” a aparecé den e paisnan ei un parti dje “multitud grandi” cu ta crece constant.—Revelacion 7:9-14.

TA REFINA E PUEBLO DI JEHOVA

 7. Cua “poco yudansa” e cristiannan ungí cu a biba bou di mando dje rey di nort a ricibí?

⁷ “Ora pone nan [e pueblo di Dios] trompecá, nan lo ser yudá cu un poco yudansa,” e angel a bisa. (Daniel 11:34a) E triunfo dje rey di zuid den e di dos guera mundial a resultá den un poco alivio pa cristiannan cu a biba bou dje rey rival. (Compará cu Revelacion 12:15, 16.) Esnan persiguí dor dje rey di nort nobo, tambe a haña un alivio de bes en cuando. Segun cu e Guera Friu tabata yega gradualmente na su fin, hopi lider a bin realisá cu cristiannan fiel no ta un menasa, i p’esei a duna nan reconocimentu legal. Tambe yudansa a bini for dje multitud grandi aumentante, cu a respondé n’e fiel predicacion di e ungínan i a yuda nan.—Mateo 25:34-40.

 8. Con algun hende a uni nan mes “cu labiamentu” na e pueblo di Dios?

⁸ Durante e añanan di Guera Friu, no ta tur hende cu a bisa cu nan ta interesá den sirbi Dios, tabatin bon motivacion. E angel a spierta: “Hopi siguramente lo uni cu nan cu labiamentu.” (Daniel 11:34b) Un cantidad basta grandi a mustra interes den e berdad, pero nan no tabata dispuesto pa haci un dedicacion na Dios. Sin embargo, otronan a haci manera nan ta aceptá e bon nobo, miéntras nan tabata spion cu a traha pa autoridadnan. Un informe di un pais ta bisa: “Algun dje personanan sin escrúpulo aki tabata comunista del alma cu a gatia drenta e organisacion di Señor. Nan a desplegá masha celo, i a asta nombra nan den puestonan di hopi responsabilidad.”

 9. Pakico Jehova a permití algun cristian fiel “trompecá” debí na infiltrantenan?

⁹ E angel a sigui: “I lo pone algun di esnan cu tin perspicacia trompecá, pa haci un trabou di refinamentu debí na nan i pa haci un limpiesa i haci un blanchamentu, te na e tempu di fin; pasobra esei ta ainda p’e tempu señalá.” (Daniel 11:35) E infiltrantenan a pone algun di esnan fiel cai den man di autoridad. Jehova a permití cosnan asina pasa, pa refiná i limpia su pueblo. Mescos cu Jesus “a siña obedencia for dje cosnan cu el a sufri,” asina e rumannan fiel aki a siña awante for dje pruebanan riba nan fe. (Hebreonan 5:8; Santiago 1:2, 3; compará cu Malakías 3:3.) Asina a ‘refiná, limpia i blancha’ nan.

10. Kico e profecia kier men cu e expresion “te na e tempu di fin”?

¹⁰ E pueblo di Jehova lo mester a experenciá trompecamentu i refinamentu “te na e tempu di fin.” Claro cu nan ta verwagt persecucion te cu fin dje sistema di cosnan malbado aki. Sin embargo, e acto di limpia i blancha e pueblo di Dios, como resultado dje atake for dje rey di nort, tabata “p’e tempu señalá.” Pues, na Daniel 11:35, “e tempu di fin” tin di haci cu fin dje periodo di tempu necesario pa refiná e pueblo di Dios, miéntras nan ta wanta e atake dje rey di nort. Evidentemente, e trompecamentu a terminá na e tempu señalá pa Jehova.

E REY TA ENGRANDECE SU MES

11. Kico e angel a bisa tocante e actitud dje rey di nort pa cu Jehova su soberania?

¹¹ Relacioná cu e rey di nort, e angel a agregá: “Realmente e rey lo haci manera e kier, i lo e halsa su mes i engrandecé su mes riba tur dios; i [nengando di reconocé e soberania di Jehova] contra e Dios di diosnan lo e papia cosnan maraviyoso. I sigur lo e resultá di tin éxito te ora cu e denunciacion lo a yega na un fin; pasobra tin cu haci e cos dicidí. I lo e no haci caso dje Dios di su tatanan; i lo e no haci caso dje deseo di hende muher ni di ningun otro dios, sino lo engrandecé su mes riba tur hende.”—Daniel 11:36, 37.

12, 13. (a) Den ki manera e rey di nort a rechasá e “Dios di su tatanan”? (b) Ken tabata e “hende muher” kende su “deseo” e rey di nort no a haci caso di dje? (c) Na cua “dios” e rey di nort a duna gloria?

¹² Cumpliendo cu e palabranan profético aki, e rey di nort a rechasá e “Dios di su tatanan,” manera e divinidad trinitario di cristiandad. E bloke comunista a promové ateismo total. Pues e rey di nort a haci su mes un dios, i a “engrandecé su mes riba tur hende.” E rey no a haci caso “dje deseo di hende muher”—esta, di paisnan subordiná, manera Nort Vietnam, cu a sirbi como criá di su régimen—i a actua “manera e kier.”

¹³ Siguiendo cu e profecia, e angel a bisa: “Den su posicion, lo e duna gloria n’e dios di lugánan fortificá; i pa medio di oro i pa medio di plata i pa medio di piedra precioso i pa medio di cosnan deseabel lo e duna gloria na un dios cu su tatanan no a conocé.” (Daniel 11:38) Bon mirá, e rey di nort a pone su confiansa den militarismo científico moderno, e “dios di lugánan fortificá.” El a busca salbacion mediante e “dios” aki, sacrificando un inmenso cantidad di rikesa riba su altar.

14. Con e rey di nort a “actua eficasmente”?

¹⁴ “Lo e actua eficasmente contra e fortalesanan di mas fortificá, huntu cu un dios stranhero. Ken cu a dun’é reconocimentu lo e haci abundá cu gloria, i realmente lo e pone nan goberná entre hopi hende; i lo e parti e suela pa un prijs.” (Daniel 11:39) Confiando den su “dios stranhero” militarista, e rey di nort a actua sumamente ‘eficas,’ i a resultá di ta un potencia militar poderoso den e “último dianan.” (2 Timoteo 3:1) Esnan cu a apoyá su ideologia a ser recompensá cu apoyo político, financiero i tin biaha militar.

“UN PUSHAMENTU” DEN E TEMPU DI FIN

15. Con e rey di zuid a bai den “un pushamentu” cu e rey di nort?

¹⁵ “Den e tempu di fin e rey di zuid lo ta den un pushamentu cuné,” e angel a conta Daniel. (Daniel 11:40a) E rey di zuid ‘a pusha’ e rey di nort durante “e tempu di fin”? (Daniel 12:4, 9) Sí, asina mes. Despues dje promé guera mundial, e tratado di pas di castigu imponé riba e rey di nort dje tempu ei—Alemania—sigur tabata “un pushamentu,” un instigamentu pa tuma represaya. Despues dje victoria dje rey di zuid den e di dos guera mundial, e tabatin armanan nuclear spantoso di mik riba su rival i a organisá un aliansa militar poderoso contra dje, esta, e Organisacion dje Tratado di Nort Atlántico (OTAN). Relacioná cu e funcion di OTAN, un historiadó británico ta bisa: “E tabata e instrumento principal pa ‘wanta expansion’ di Union Soviético, cu awor hende a percibí como e menasa mas grandi contra pas europeo. Su mision a dura 40 aña, i a ser efectuá cu éxito indiscutibel.” Segun cu e añanan dje Guera Friu tabata pasa, e “pushamentu” dje rey di zuid a incluí spionahe cu alta tecnologia i tambe ofensivanan diplomático i militar.

16. Con e rey di nort a reaccioná riba e pushamentu dje rey di zuid?

¹⁶ Con e rey di nort a reaccioná? “E rey di nort lo lansa su mes contra dje manera tempestad cu garoshi i cu ginete i cu hopi barcu; i sigur lo e drenta den e paisnan i inundá i pasa dor di nan.” (Daniel 11:40b) Historia dje último dianan ta mustra con e rey di nort a sigui un política di expansion teritorial. Durante e di dos guera mundial, e “rey” nazi a pasa over di su fronteranan drenta paisnan rond di dje. Na fin dje guera ei, e “rey” cu a siguié a forma un imperio poderoso. Durante e Guera Friu, e rey di nort a bringa contra su rival indirectamente den guera i revolucionnan na Africa, Asia i Latinoamérica, dor di apoyá e faccionnan cu a oponé esnan apoyá dor dje rey di zuid. El a persiguí cristiannan berdadero, dor di stroba—pero di ningun manera a para—nan actividad. I su ofensivanan militar i político a trece un cantidad di pais bou di su control. Esaki ta precis loke e angel a profetisá: “Realmente lo e drenta tambe den e pais di Decoracion [e herencia spiritual dje pueblo di Jehova], i lo tin hopi pais cu lo trompecá.”—Daniel 11:41a.

17. Con e racha di expansion dje rey di nort a keda limitá?

¹⁷ Tog, e rey di nort no a logra conkistá mundu. E angel a profetisá: “Esakinan ta esnan cu lo scapa for di su man: Edom i Moab i e parti principal dje yunan di Amon.” (Daniel 11:41b) Den antigwedad, Edom, Moab i Amon tabata situá entre e teritorio dje rey di zuid egipcio i e rey di nort sirio. Den nos tempu nan ta representá nacion i organisacionnan cu e rey di nort a mik ariba, pero cu e no a logra haña bou di su influencia.

EGIPTO NO TA SCAPA

18, 19. Den ki maneranan e rey di zuid a sinti e influencia di su rival?

¹⁸ E angel di Jehova a sigui bisa: “[E rey di nort lo] sigui saca su man contra e paisnan; i pa loke ta trata e tera di Egipto, lo e no resultá di ta unu cu ta scapa. I realmente lo e goberná riba e tesoronan scondí di oro i plata i riba tur cos deseabel di Egipto. I e libionan i e etiopionan lo sigui den su pasonan.” (Daniel 11:42, 43) Asta e rey di zuid, “Egipto,” no a scapa dje efectonan dje política expansionista dje rey di nort. Por ehempel, e rey di zuid a sufri un derota notabel na Vietnam. I kico dje “libionan i e etiopionan”? Por ta masha bon cu e bisiñanan aki di antiguo Egipto ta prefigurá nacionnan cu, den sentido geográfico, ta bisiña dje “Egipto” moderno (e rey di zuid). Tin biaha, nan tabata siguidó dje rey di nort, sí, nan a “sigui den su pasonan.”

¹⁹ E rey di nort a goberná riba ‘e tesoronan scondí di Egipto’? En berdad e tabatin un influencia poderoso riba e manera cu e rey di zuid a usa su recursonan financiero. Debí na miedu di su rival, e rey di zuid a gasta sumanan grandi pa mantené un tremendo ehército, marina i forsa aéreo. Te n’e grado ei, e rey di nort a “goberná” of controlá, na kico e rey di zuid a usa su rikesa.

E CAMPAÑA FINAL

20. Con e angel ta describí e campaña final dje rey di nort?

²⁰ E rivalidad entre e rey di nort i e rey di zuid—sea via medionan militar, económico of otro medio—ta acercando su fin. Revelando detayenan di un conflicto cu tin cu bini ainda, e angel di Jehova a bisa: “Lo tin informe cu lo molesti’é [e rey di nort], for di salimentu di solo i for di nort, i sigur lo e sali cu gran furia pa exterminá i dedicá hopi hende na destruccion. I lo e span su tentnan di palacio entre e laman grandi i e ceru santu di Decoracion; i lo e tin cu yega na su fin completo, i lo no tin yudante p’e.”—Daniel 11:44, 45.

21. Kico nos tin cu haña sa ainda tocante e rey di nort?

²¹ Ora Union Soviético a disolvé na december 1991, e rey di nort a sufri un caida serio. Ken lo ta e rey aki ora Daniel 11:44 i 45 cumpli? Lo e ta un dje paisnan di ex-Union Soviético? Of lo e cambia completamente di identidad, manera el a haci vários biaha caba? E desaroyo di armanan nuclear dor di mas nacion lo resultá den un careda nobo di armamentu i esei lo tin efecto riba e identidad dje rey ei? Tempu so lo percurá contesta n’e preguntanan aki. No ta sabí pa nos speculá. Ora e rey di nort sali bai riba su campaña final, tur esnan cu perspicacia basá riba Bijbel lo dicerní cla-cla con profecia ta cumpli.—Mira cuadro “Reynan den Daniel Capítulo 11,” na página 284.

22. Ki preguntanan ta lanta tocante e atake final dje rey di nort?

²² Sin embargo, loke sí nos sa ta ki accion e rey di nort lo tuma djis aki. Impulsá dor di informenan “for di salimentu di solo i for di nort,” lo e dirigí un campaña ‘pa dedicá hopi hende na destruccion.’ Contra ken e campaña aki ta dirigí? I ki “informe” ta provocá un atake asina?

ALARMÁ DOR DI INFORMENAN PERTURBADOR

23. (a) Ki suceso sobresaliente tin cu tuma lugá promé cu Armagedon? (b) Ken e “reynan cu ta bini di salimentu di solo” ta?

²³ Considerá loke e buki di Revelacion tin di bisa tocante e fin di Babilonia e Grandi, e imperio mundial di religion falsu. Promé cu Armagedon, e “guera dje gran dia di Dios e Todopoderoso,” e gran enemigu aki di adoracion berdadero lo “ser kimá completamente cu candela.” (Revelacion 16:14, 16; 18:2-8) E bashamentu dje di seis conchi di rabia di Dios riba e riu simbólico Eufrátes, ta prefigurá su destruccion. E riu ta seca “pa prepará e caminda p’e reynan cu ta bini di salimentu di solo.” (Revelacion 16:12) Ken e reynan aki ta? Ningun otro sino, Jehova Dios i Jesucristo!—Compará cu Isaías 41:2; 46:10, 11.

24. Ki acto di Jehova lo por perturbá e rey di nort?

²⁴ E buki di Revelacion ta describí e destruccion di Babilonia e Grandi na un manera bibu, declarando: “E dies cachunan cu bo a mira [e reynan na mando den e tempu di fin], i e bestia salbahe [Nacionnan Uní], esakinan lo odia e muher di mala bida i lo hacié desolá i sunú, i lo come su carni i lo kim’é completamente cu candela.” (Revelacion 17:16) Di con e gobernantenan lo destruí Babilonia e Grandi? Pasobra ‘Dios ta pone den nan curason pa cumpli cu su pensamentu.’ (Revelacion 17:17) Entre e gobernantenan aki tin e rey di nort. Por ta masha bon cu loke e ta tende “for di salimentu di solo” ta referí na e acto aki di Jehova, ora e pone den curason di lidernan humano pa destruí e gran muher di mala bida religioso.

25. (a) Kico ta e blanco special dje rey di nort? (b) Unda e rey di nort ta “span su tentnan di palacio”?

²⁵ Pero e rabia dje rey di nort tin un blanco special. E angel ta bisa cu lo e “span su tentnan di palacio entre e laman grandi i e ceru santu di Decoracion.” Den tempu di Daniel e laman grandi tabata e Mediteráneo i e ceru santu tabata Síon, cu un tempu tabata e sitio dje tempel di Dios. Pues, cumpliendo cu e profecia, e rey di nort furioso ta dirigí un campaña contra e pueblo di Dios. Den un sentido spiritual, e sitio “entre e laman grandi i e ceru santu” ta representá e herencia spiritual di Jehova su sirbidónan ungí. Nan a sali for dje “laman” di humanidad alehá for di Dios, i tin e speransa di goberná riba ceru di Síon celestial huntu cu Jesucristo.—Isaías 57:20; Hebreonan 12:22; Revelacion 14:1.

26. Manera e profecia di Ezekiel a indicá, kico por ta e orígen dje noticia “for di nort”?

²⁶ Ezekiel, un contemporáneo di Daniel, tambe a profetisá di un atake contra e pueblo di Dios “den e parti final dje dianan.” El a bisa cu Gog di Magog, esta, Satanas e Diabel, lo iniciá e hostilidadnan. (Ezekiel 38:14, 16) Simbólicamente, Gog ta bini for di cua direccion? “For dje parti mas leu di nort,” Jehova ta bisa, via Ezekiel. (Ezekiel 38:15) Pa feros cu e atake aki ta, lo e no destruí e pueblo di Jehova. E encuentro dramático aki lo ta e resultado di un maniobra stratégico di parti di Jehova pa destruí e forsanan di Gog. Pues, Jehova ta bisa Satanas: “Sigur lo mi . . . pone hak den bo kakumbein i saca bo.” “Lo mi . . . pone bo subi dje partinan mas leu di nort i lo mi trece bo riba e cerunan di Israel.” (Ezekiel 38:4; 39:2) P’esei, e noticia “for di nort” cu ta haci e rey di nort furioso, mester ta originá di Jehova. Pero kico precis e informenan “for di salimentu di solo i for di nort” lo contené finalmente, ta Dios so lo dicidí, i tempu lo mustra.

27. (a) Di con Gog lo incitá e nacionnan, incluso e rey di nort, pa atacá e pueblo di Jehova? (b) Kico lo ta e resultado dje atake di Gog?

²⁷ Pa loke ta Gog, e ta organisá su atake total debí n’e prosperidad di “e Israel di Dios,” kende huntu cu e “multitud grandi” di “otro carnénan,” no ta parti di su mundu mas. (Galationan 6:16; Revelacion 7:9; Juan 10:16; 17:15, 16; 1 Juan 5:19) Gog ta wak cu menosprecio riba “un pueblo cu a ser recogé for dje nacionnan, unu cu ta acumulando rikesa i propiedad [spiritual].” (Ezekiel 38:12) Ora Gog mira e herencia spiritual como un “region habrí di cunucu” fácil pa conkistá, e ta haci un intento masha grandi pa eliminá e obstáculo aki cu ta strob’é di logra control total riba humanidad. Pero e ta fracasá. (Ezekiel 38:11, 18; 39:4) Ora e reynan dje tera, incluso e rey di nort, atacá e pueblo di Jehova, nan lo ‘tin cu yega na nan fin completo.’

‘E REY LO YEGA NA SU FIN’

28. Kico nos sa tocante e futuro dje rey di nort i dje rey di zuid?

²⁸ E campaña final dje rey di nort no ta dirigí contra e rey di zuid. P’esei e rey di nort lo no yega na su fin na man di su gran rival. I no ta e rey di zuid lo destruí e rey di nort. E rey di zuid ta ser destruí, “sin man [humano],” dor dje Reino di Dios.a (Daniel 8:25) Eigenlijk, na e bataya di Armagedon, e Reino di Dios lo eliminá tur e reynan terenal, i evidentemente esaki ta loke ta sosodé cu e rey di nort tambe. (Daniel 2:44) Daniel 11:44 i 45 ta describí sucesonan cu ta hiba n’e bataya final ei. Nada straño cu “lo no tin yudante” p’e rey di nort ora e topa su fin!

[Nota]

KICO BO A SACA AFO?

• Con e identidad dje rey di nort a cambia despues dje di dos guera mundial?

• Kico lo sosodé finalmente cu e rey di nort i e rey di zuid?

• Con bo a beneficiá dor di presta atencion na e profecia di Daniel tocante e rivalidad entre e dos reynan?

[Tabèl/Plachi na página 284]

REYNAN DEN DANIEL CAPITULO 11

Daniel 11:5 Seleuco I Nicátor Tolomeo I

Daniel 11:7-9 Seleuco II Tolomeo III

Daniel 11:10-12 Antioco III Tolomeo IV

Daniel 11:20 Augusto

Daniel 11:21-24 Tiberio

[Nota]

[Plachi di henter página 271]

[Plachi na página 279]

“Pushamentu” dor dje rey di zuid a incluí spionahe cu alta tecnologia i e menasa di accion militar