“Multitutnan Grandi A Bin Serka Dje”

1-3. Kiko a pasa ora ku mayornan a trese nan yunan serka Hesus, i kiko e insidente aki ta revelá tokante Hesus?

HESUS tabata sa ku e fin di su bida riba tera tabata aserká rápidamente. E tabatin apénas un par di siman mas, i ainda tabatin hopi kos di hasi! Hesus tabata predikando huntu ku su apòstelnan na Perea, un region ost di Riu Hordan. Nan a prediká bayendo den direkshon zùit rumbo pa Yerusalèm, kaminda Hesus lo a asistí na su último Pasku Hudiu ku un final dramátiko.

² Despues ku Hesus a kaba di tene un diskushon riba un tema di peso ku algun lider religioso, a surgi un disturbio chikí. Ta asina ku algun hende a trese nan yunan pa mira Hesus. Aparentemente, tabatin mucha di diferente edat, pasobra Marko a referí na nan ku e mesun palabra ku el a usa mas promé pa deskribí un mucha di 12 aña, miéntras ku Lukas a usa un palabra ku por ser tradusí komo ‘yu chikitu.’ (Lukas 18:15; Marko 5:41, 42; 10:13) Klaru ku kaminda tin mucha, hopi biaha ta reina un ambiente animá i boroto. E disipelnan di Hesus a skual e mayornan, kisas asumiendo ku nan Shon tabata muchu okupá pa duna atenshon na e muchanan. Kiko Hesus a hasi?

³ Ora Hesus a mira kiko ta pasando, el a rabia. Ku ken? Ku e muchanan? Ku e mayornan? Nò, ku su disipelnan! El a bisa nan: “Laga e muchanan bin serka mi; no stroba nan, pasobra e reino di Dios ta pertenesé na esnan manera esakinan. Di bèrdat mi ta bisa boso, esun ku no risibí e reino di Dios manera un mucha lo no drenta den dje.” Anto Hesus a tuma e muchanan “den su brasa” i a bendishoná nan. (Marko 10:13-16) E palabranan ku Marko a usa akinan ta indiká ku Hesus a brasa nan kariñosamente, i podisé asta a karga algun beibi den su brasa. Tabata bisto ku Hesus gusta mucha. Sin embargo, esaki ta siña nos algu mas tokante Hesus, esta, ku e ta un persona aserkabel.

4, 5. (a) Kon nos por tin sigur ku Hesus tabata aserkabel? (b) Ki preguntanan nos lo analisá den e kapítulo aki?

⁴ Si Hesus tabata un hòmber strèng, friu òf orguyoso, e muchanan ei probablemente lo no a sinti nan atraí na dje; i nan mayornan tampoko lo no a sinti nan liber pa aserk’é. Ora bo ta imaginá e esena, bo no ta mira e kara kontentu di e mayornan segun ku e hòmber bondadoso aki a demostrá su kariño pa nan yunan, a ekspresá kuantu balor nan tin den bista di Dios i a bendishoná nan? Sí, apesar ku Hesus tabatin un responsabilidat di hopi peso, el a keda e hòmber di mas aserkabel.

⁵ Ken mas a haña Hesus un hòmber aserkabel? Kiko a hasi Hesus asina fásil pa aserká? Anto kon nos por bira meskos ku Hesus den esaki? Laga nos wak.

6-8. Hopi biaha Hesus tabata den kompania di ken, i den ki manera su aktitut tabata diferente for di e aktitut di e lidernan religioso?

⁶ Ora bo ta lesa e relatonan di Evangelio, podisé lo bo keda asombrá pa e manera ku gran kantidat di hende no a vasilá pa bin serka Hesus. Por ehèmpel, hopi bes nos ta lesa tokante “multitutnan grandi” en konekshon ku Hesus. “Multitutnan grandi tabata siguié for di Galilea.” “Multitutnan grandi a bin para tur rònt di dje.” “Multitutnan grandi a bin serka dje.” “Multitutnan grandi tabata kana huntu kuné.” (Mateo 4:25; 13:2; 15:30; Lukas 14:25) Sí, hopi biaha Hesus tabata rondoná pa multitut di hende.

⁷ Por lo general esakinan tabata hende komun i koriente, hende ku e lidernan religioso tabata referí na dje ku menospresio komo “hende di tera.” E fariseonan i saserdotenan a bisa abiertamente: “E multitut aki, ku no konosé e Lei, ta maldishoná.” (Juan 7:49) Obranan rabíniko skirbí mas despues ta konfirmá e aktitut ei. Hopi lider religioso a konsiderá e hendenan ei komo di klase inferior i a nenga di kome ku nan, kumpra kos for di nan òf asosiá ku nan. De echo, algun lider religioso a insistí ku no tin speransa di resurekshon pa e hendenan ei ku no tabata konosé e lei oral! Di mes, hopi hende humilde lo a keda leu for di e lidernan ei en bes di pidi nan yudansa òf guia. Pero Hesus tabata diferente.

⁸ Hesus a asosiá libremente ku e pueblo komun. El a kome ku nan, kura nan, siña nan i duna nan speransa. Klaru ku Hesus tabata realístiko; el a rekonosé ku mayoria di hende lo a rechasá e oportunidat pa sirbi Yehova. (Mateo 7;13, 14) Sin embargo, el a karga e speransa ku kada persona lo a reakshoná faborablemente i a mira den hopi di nan e potensial pa hasi loke ta korekto. Ki un kontraste ku e saserdote- i fariseonan sin heful! Pero sorprendentemente, asta saserdote i fariseo a bin serka Hesus, i vários di nan a hasi kambio i a sigui Hesus. (Echonan 6:7; 15:5) Algun di e hendenan riku i poderoso tambe a haña Hesus aserkabel.—Marko 10:17, 22.

 9. Dikon hende muhé a haña Hesus aserkabel?

⁹ Hende muhé no a vasilá pa bin serka Hesus. Hopi biaha nan lo mester a sinti e menospresio humiante di e lidernan religioso. E rabinan por lo general no tabata ke pa siña hende muhé. De echo, hende muhé no tabatin mag di testifiká den kasonan legal, ya ku a konsiderá nan komo testigu inkonfiabel. E rabinan asta a hasi un orashon den kua nan a gradisí Dios ku nan no tabata hende muhé! Sin embargo, hende muhé no a nota e tipo di menospresio ei serka Hesus. Hopi a aserk’é, ansioso pa siña. Por ehèmpel, Beibel ta konta nos ku Maria, ruman muhé di Lázaro, tabata sintá na pia di Señor ta skucha e palabranan di Hesus ku sumo atenshon miéntras ku su ruman muhé, Marta, tabata hopi okupá i preokupá ku preparashon di kuminda. Hesus a elogiá Maria pasobra el a fiha e prioridat korekto.—Lukas 10:39-42.

10. Kon Hesus su manera di trata ku hende enfermo tabata distinto for di e lidernan religioso?

¹⁰ Hende enfermo tambe a basha bin serka Hesus, ounke hopi biaha e lidernan religioso a trata nan komo persona indeseabel. E Lei di Moisés a preskribí ku hende ku lepra mester a keda isolá pa motibunan di salú, pero esei no tabata un hustifikashon pa no mustra bondat na nan. (Levítiko, kapítulo 13) Sin embargo, reglanan rabíniko ku a bin despues a deklará ku hende ku lepra ta mesun desagradabel ku sushi humano. Algun lider religioso a bai asta asina leu di tira leprosonan ku piedra pa tene nan leu! Ta difísil pa imaginá kon hende ku a ser tratá asina por a haña e kurashi pa aserká kualke maestro, pero serka Hesus sí leprosonan a bin. Un di nan a ekspresá e famoso palabranan di fe aki: “Señor, si bo kier, bo por hasi mi bira limpi.” (Lukas 5:12) Den e siguiente kapítulo nos lo analisá Hesus su reakshon. Pero pa awor ta sufisiente pa bisa ku no por tin un prueba mas konvinsente pa mustra ku Hesus tabata aserkabel.

11. Ki ehèmpel ta mustra ku hende kargá ku sintimentu di kulpa a sinti nan liber pa bin serka Hesus, i dikon esaki ta importante?

¹¹ Personanan ku tabata kargá ku sintimentu di kulpa a bin serka Hesus libremente. Por ehèmpel, pensa riba e biaha ku Hesus tabata komiendo na kas di un fariseo. Un muhé ku tabata konosí komo un pekadó a drenta paden i hinka rudia na pia di Hesus, yorando pa motibu di su sintimentu di kulpa. Su lágrimanan a laba Hesus su pia, i el a usa su kabei pa seka nan. Miéntras ku Hesus su anfitrion a wak tur disgustá i den su mes a kritiká Hesus severamente pasobra el a laga e muhé aki yega serka dje, Hesus bondadosamente a elogiá e muhé pa su repentimentu sinsero i a sigur’é ku Yehova a pordon’é. (Lukas 7:36-50) Awe mas ku nunka, hende ku ta kargá ku sintimentu di kulpa mester por sinti nan liber pa bin serka esnan ku por yuda nan drecha nan relashon ku Dios! Kiko ta loke a hasi Hesus asina aserkabel?

12. Dikon no ta un sorpresa ku Hesus tabata aserkabel?

¹² No lubidá ku Hesus a imitá su Tata selestial stimá perfektamente. (Juan 14:9) Beibel ta rekordá nos ku Yehova “no ta leu di kada un di nos.” (Echonan 17:27) Yehova, siendo Esun “ku ta skucha orashon,” ta semper aksesibel pa su sirbidónan fiel i pa ken ku sinseramente ke hañ’é i sirbié. (Salmo 65:2) Figurá bo, e Persona di mas poderoso i importante den universo ta a la bes esun mas aserkabel! Hesus, meskos ku su Tata, stima hende. Den e siguiente kapítulonan nos lo konsiderá e amor intenso ku tabatin den su kurason. Pero Hesus tabata aserkabel prinsipalmente pasobra su amor pa hende tabata masha bisto. Laga nos analisá algun di e karakterístikanan di Hesus ku a demostrá e amor ei.

13. Kon mayornan lo por imitá Hesus?

¹³ Hende a sinti mesora ku Hesus tabata interesá den nan personalmente. E interes personal ei no a disparsé ora ku Hesus tabata bou di preshon. Manera nos a mira kaba, ora e mayornan a trese nan yunan serka dje, Hesus a keda aserkabel apesar ku e tabata okupá i kargá ku responsabilidatnan di peso. Ki un bon ehèmpel el a pone pa mayornan! Den e mundu djawe ta un reto pa lanta yu. Sin embargo, ta masha importante pa muchanan mira nan mayornan komo hende aserkabel. Si bo ta un mayor, bo sa ku tin biaha bo ta muchu okupá pa duna bo yu e atenshon ku e mester. Pero pakiko no sigur’é ku lo bo traha tempu p’e mas pronto posibel? Segun ku bo ta kumpli ku bo palabra, bo yu lo siña ku ta bale la pena tene pasenshi. E ta siña tambe ku semper e por bin serka bo ku kualke problema òf preokupashon.

14-16. (a) Ki sirkunstansianan a pone Hesus hasi su promé milager, i dikon esaki tabata un akto maravioso? (b) Kiko Hesus su milager na Kana ta revelá tokante dje, i ki lès e ta siña mayornan?

¹⁴ Hesus a laga hende sa ku loke a preokupá nan tabata importante p’e. Por ehèmpel, konsiderá e promé milager ku Hesus a hasi. E tabata na un fiesta di kasamentu na Kana, un pueblito den Galilea. A surgi un problema bergonsoso, biña a kaba! Maria, mama di Hesus, a bisa su yu kiko a pasa. Wèl, kiko Hesus a hasi? El a laga e sirbidónan yena seis tinashi grandi di piedra ku awa. Ora nan a hiba un tiki di e awa ei pa e direktor di e fiesta, ata e awa tabata biña di alta kalidat! Akaso esei tabata un triki? Nò, e awa “a bira biña.” (Juan 2:1-11) For di hopi tempu pasá hende ta soña di por kombertí un kos den otro. Pa siglonan, hòmbernan yamá alkimista a purba kombertí chumbu den oro. Nunka nan no a logra, ounke de echo, chumbu ku oro ta elementonan bastante similar.a Kiko di awa ku biña? For di un punto di bista kímiko, awa ta algu simpel, un kombinashon di dos elemento básiko. Di otro banda, biña ta kontené kasi mil supstansia ku ta konsistí di hopi elemento básiko! Dikon Hesus lo a hasi un akto asina maravioso pa resolvé un problema asina chikí manera skarsedat di biña na un fiesta di kasamentu?

¹⁵ E problema no tabata un kos chikí pa e brùit i e brùidehòm. Den Medio Oriente di antigwedat, hospitalidat na huéspetnan invitá tabata un asuntu di sumo importansia. Si biña mester a kaba na e fiesta di kasamentu esei lo a kousa bastante bèrgwensa pa e pareha, lokual lo a tira un sombra skur riba nan dia di kasamentu i riba nan rekuerdonan di e dia ei den e añanan ku lo a sigui. E problema tabata importante pa nan, i e tabata importante pa Hesus. Pues el a hasi algu pa resolv’é. Bo por mira dikon hende tabata bin serka dje ku loke a preokupá nan?

¹⁶ Un biaha mas mayornan por saka un bon lès for di esaki. Kiko si bo yu bin serka bo, tur preokupá ku un problema? Kisas bo ta sinti gana di no wòri ku su preokupashon pasobra ta ko’i kèns. Podisé bo ta asta haña gana di harié. Kompará ku bo karganan, e problema di e mucha en bèrdat por parse ko’i kèns. Pero kòrda ku pa e mucha sí e no ta ko’i kèns! Si e ta importante pa un persona ku bo ta stima hopi, lo e no mester ta importante pa bo tambe? Si bo laga bo yu sinti ku bo ta interesá den loke ta preokup’é, esei lo hasi bo un mayor aserkabel.

17. Hesus a pone ki ehèmpel di suavedat, i dikon e kualidat aki ta prueba di un hende su forsa?

¹⁷ Manera nos a konsiderá den Kapítulo 3, Hesus tabata suave i humilde. (Mateo 11:29) Mansedumbre òf suavedat ta un bunita kualidat, un prueba fuerte di e humildat ku un persona tin den su kurason. E ta parti di e fruta di Dios su spiritu santu i ta ser konektá ku sabiduria divino. (Galationan 5:22, 23; Santiago 3:13) Asta ora Hesus a konfrontá e pió provokashon, el a dominá su mes. Su suavedat definitivamente no tabata debilidat. Un komentarista a bisa di suavedat: “Tras di e suavedat aki tin e forsa di stal.” Sí, hopi bes nos tin mester di e forsa di stal pa frena nos temperamento i trata otro hende ku suavedat. Pero ku e bendishon di Yehova riba nos esfuerso, nos por imitá Hesus den mustra suavedat, i esei lo hasi nos mas aserkabel.

18. Ki ehèmpel ta revelá Hesus su aktitut rasonabel, i dikon bo ta kere ku e kualidat aki ta hasi un persona aserkabel?

¹⁸ Hesus tabata rasonabel. Ora Hesus tabata na Tiro, un señora a bin serka dje pasobra su yu muhé tabata “kruelmente poseí pa demoño.” Den tres diferente manera Hesus a indiká ku e no tabata dispuesto pa hasi loke e señora tabata ke. Di promé, Hesus no a kontest’é; di dos, el a duna e señora un motibu pakiko e no por a hasi loke el a pidi; di tres, Hesus a duna un ilustrashon pa mustra mas kla ainda dikon lo e no a hasié. Akaso Hesus tabata antipátiko, infleksibel? El a laga e señora komprondé ku e tabata bayendo den un direkshon peligroso dor di tribi kuestioná e palabranan di un hòmber asina grandi manera e? Nò. Tabata bisto ku e señora a sinti su mes safe. E no a pidi yudansa so, sino tambe el a persistí apesar ku Hesus aparentemente no tabata kier a yud’é. Hesus a mira e fe remarkabel ku a motivá e señora pa persistí, i el a kura su yu. (Mateo 15:22-28) Hesus su aktitut rasonabel, su disponibilidat pa skucha i pa ta fleksibel ora ta apropiá, siguramente a hasi hende ansioso pa aserk’é!

19. Kon nos por sa si di bèrdat nos ta aserkabel?

¹⁹ Hende ta gusta pensa ku nan ta aserkabel. Por ehèmpel, tin hende den puesto di outoridat ku gusta bisa ku semper nan porta ta habrí, i ku e hendenan bou di nan por bin libremente serka nan. Sin embargo, Beibel tin e spièrtamentu fuerte aki: “Hopi hende ta proklamá nan mes lealtat, ma ken por haña un hende konfiabel?” (Proverbionan 20:6) Ta fásil pa bisa ku nos ta aserkabel, pero di bèrdat nos ta imitá e aspekto aki di Hesus su amor fielmente? E kontesta kisas ta sinta, no den e manera ku nos ta mira nos mes, sino den e manera ku otro hende ta mira nos. Pablo a bisa: “Laga tur hende sa ku boso ta rasonabel.” (Filipensenan 4:5, NW) Ta bon pa kada un di nos puntra nos mes: ‘Kon otro hende ta mirá mi? Ki reputashon mi tin?’

20. (a) Pakiko ta importante pa ansianonan kristian ta aserkabel? (b) Pakiko nos mester ta rasonabel den loke nos ta spera di e ansianonan di kongregashon?

²⁰ Foral ansianonan kristian ta hasi esfuerso pa ta aserkabel. Nan ta deseá sinseramente di kumpli ku e deskripshon ku tin pará skirbí na Isaias 32:1 i 2: “Kada un lo ta manera un refugio kontra bientu, i un protekshon kontra tempestat, manera koridanan di awa den un tera seku, manera sombra di un baranka masha grandi mes den un tera ku tin set di awa.” Un ansiano por perkurá tal protekshon, refreskamentu i alivio solamente si e keda aserkabel. Ta bèrdat ku no ta semper fásil pa nan hasi esei, pasobra ansianonan tin un karga pisá di responsabilidat den e tempu difísil aki. Sin embargo, ansianonan ta hasi esfuerso pa nan no duna e impreshon ku nan ta muchu okupá pa atendé ku e nesesidatnan di e karnénan di Yehova. (1 Pedro 5:2) Anto otro miembronan di e kongregashon ta purba di nan parti pa ta rasonabel den loke nan ta spera di e hòmbernan fiel ei, mustrando un aktitut humilde i kla pa koperá.—Hebreonan 13:17.

21. Kon mayornan por keda aserkabel pa nan yunan, i kiko nos lo konsiderá den e siguiente kapítulo?

²¹ Mayornan ta hasi esfuerso pa nan ta semper disponibel pa nan yunan. Esaki ta un asuntu hopi serio! Nan ke pa nan yunan sa ku nan por konfia den nan tata òf nan mama. Pues, mayornan kristian ta sòru pa nan ta suave i rasonabel, i ta tene kuidou pa nan no bira muchu emoshonal ora un yu konfesá di a kometé un eror òf ta demostrá un manera di pensa robes. Segun ku mayornan ta entrená nan yunan ku pasenshi, nan ta hasi nan bèst pa mantené bon komunikashon. Bon mirá, nos tur ke keda personanan aserkabel, manera Hesus tabata. Den e siguiente kapítulo nos lo konsiderá Hesus su kompashon sinsero, un di e kualidatnan prinsipal ku a hasié aserkabel.