Nunka Rabia ku Yehova

1, 2. Dikon nos no mester kulpa Yehova pa e problemanan di humanidat? Splika esei ku un ehèmpel.

SUPONÉ ku bo ta felismente kasá pa hopi aña. Un dia bo ta yega kas for di trabou i ta parse manera kos ku ta un orkan a pasa den bo kas: muebelnan tur destrosá, sèrvis kibrá, kortina di sker. Lo bo dal un gritu i bisa: “Dikon mi kasá a hasi e kos akí?” Nò, mas bien, e promé kos ku ta pasa den bo mente ta: “Ken a hasi e kos akí?” Pasobra bo sa ku bo kasá stimá hamas lo kousa un destrukshon asina na boso kas.

² Awe, nos hogar, planeta Tera, ta tur ruiná. E suela, awa i aire ta kontaminá. Hende ta violento i inmoral. Nos a siña for di Beibel ku Yehova no por ta esun ku a kousa ningun di e problemanan akí pasobra el a krea nos planeta pa e ta un paradeis. (Gén. 2:8, 15) E ta un Dios di amor. (1 Huan 4:8) Danki na nos estudio di Beibel, nos sa ku esun ku realmente ta kulpabel pa e tantísimo difikultatnan di mundu ta Satanas e Diabel, “e gobernante di mundu.”—Huan 14:30; 2 Kor. 4:4.

 3. Kon nos por haña un punto di bista robes di nos problemanan?

³ Pero nos no por kulpa Satanas pa tur nos problemanan. Dikon nò? Pasobra tin biaha ta nos mes fayonan ta kousa nan. (Lesa Deuteronomio 32:4-6.) Pero aunke kisas nos ta atmití esaki, nos imperfekshon por pone nos haña un punto di bista robes di nos problemanan i ku tempu esaki por hiba na desaster. (Pro. 14:12) Kon asina? Wèl, en bes di kulpa nos mes òf Satanas pa un problema ku nos tin, nos por kuminsá kulpa Yehova. Asta nos por bai asina leu di rabia ku Yehova.—Pro. 19:3.

4, 5. Kon nos lo por rabia ku Yehova?

⁴ Di bèrdat nos por rabia ku Yehova? Esei sigur lo no yuda nos ku nada. (Isa. 41:11) Ta kiko nos ta kere nos lo logra ku esei? Un poeta a yega di bisa: “Bo brasa ta muchu kòrtiku pa bòks ku Dios.” Podisé nos lo no bai dje leu ei di keha na bos haltu kontra Yehova, pero nos lo por rabia kuné den nos kurason. Proverbionan 19:3 ta bisa ku e “lokura di un hende ta ruiná su kaminda, i den su kurason e ta bira razu kontra SEÑOR.” Un persona asina, na moda di papia, ta karga renkor kontra Yehova. E aktitut akí por manifestá su mes na maneranan ku no ta dje bisto ei. Por ehèmpel, e persona lo por kuminsá kita pia for di e kongregashon òf baha man na loke e ta hasi den su sirbishi pa Yehova.

⁵ Kiko lo por pone nos rabia ku Yehova? Kon nos por evitá e trampa ei? Ta masha importante pa nos kontestá e preguntanan akí, pasobra nos relashon ku Yehova Dios ta den wega!

6, 7. Dikon e israelitanan den tempu di Moises a kuminsá keha kontra Yehova?

⁶ Kiko lo por pone un fiel sirbidó di Dios kuminsá keha kontra Yehova den su kurason? Laga nos wak sinku faktor ku por hiba na esei i analisá algun ehèmpel den Beibel di hende ku a rabia ku Yehova.—1 Kor. 10:11, 12.

⁷ Komentario negativo di otro hende por influensiá nos. (Lesa Deuteronomio 1:26-28.) Yehova a libra e israelitanan for di sklabitut den Egipto. El a manda 10 plaga riba e nashon opresivo ei i despues a destruí Fárao ku su ehérsito den Laman Kòrá. (Éks. 12:29-32, 51; 14:29-31; Sal. 136:15) Awor ku e pueblo di Dios tabata kla pa drenta e Tera Primintí, nèt na e momento krusial ei, nan a kuminsá keha kontra Yehova. Kiko a kousa e falta di fe akí? Nan a haña miedu pa motibu di e informe negativo ku algun di e hòmbernan ku a bai spioná e tera a duna. (Num. 14:1-4) Ku ki resultado? Henter e generashon ei no tabatin mag di drenta “e bon tera.” (Deu. 1:34, 35) Nos tambe sa laga komentario negativo di otro hende suak nos fe i pone nos kuminsá keha tokante e manera ku Yehova ta guia su pueblo?

 8. Kiko a pone e pueblo di Dios den tempu di Isaías kulpa Yehova pa nan situashon?

⁸ Tragedia i problema por desanimá nos. (Lesa Isaías 8:21, 22.) E nashon di Huda tabata den un situashon masha difísil den tempu di Isaías. Nan tabata rondoná pa enemigu. Kuminda tabata skars, i hopi di nan tabata pasa hamber. Pero e kos di mas pió tabata ku a reina un hamber spiritual, es desir, e pueblo a stòp di skucha Yehova i a laga nan relashon kuné bira suak. (Ámos 8:11) En bes di akudí na Yehova i pidié yudansa, e pueblo a kuminsá “maldishoná nan rei i nan Dios.” Figurá bo, nan a kulpa Dios pa nan problemanan! Kiko di nos? Ora nos ta konfrontá tragedia òf problema personal, akaso nos tambe ta bisa den nos kurason: ‘Unda Yehova tabata ora mi tabatin mester di dje?’

 9. Dikon e israelitanan den tempu di Ezekiel a haña un punto di bista robes?

⁹ Nos no sa tur detaye. Komo ku e israelitanan den tempu di Ezekiel no tabata sa tur detaye tokante un sierto situashon, nan a pensa ku Dios su manera di hasi kos no tabata bon. (Eze. 18:29) Nan a hasi komo si fuera nan tabatin derecho di husga Dios i di disidí si e tabata hasiendo kosnan di e mihó manera, apesar ku nan no a komprondé tur su motibunan. Kon nos por kometé e mesun fayo ei? Den Beibel por tin relatonan ku ta difísil pa nos komprondé, òf tal bes nos no ta komprondé dikon sierto kos ta pasa ku nos. Nos por kuminsá pensa den nos kurason ku Yehova no ta hustu, ku ‘su kaminda no ta rekto.’—Yòb 35:2.

10. Kon un hende por sigui e mal ehèmpel di Adam?

¹⁰ Nos lo por tira falta riba Dios pa nos piká- i fayonan. Ora e promé hende, Adam, a peka, el a kulpa Dios pa esei. (Gén. 3:12) Adam a kibra e lei di Dios deliberadamente i tabata sa bon bon kiko lo tabata e konsekuensianan, pero tòg el a tira falta riba Yehova. Ku otro palabra, el a bisa ku Yehova a dun’é un mal kasá. Djei padilanti, hopi hende a sigui e mal ehèmpel di Adam i a kulpa Dios pa nan fayonan. Ta bon pa nos puntra nos mes: ‘Akaso mi ta asina desapuntá i frustrá pa motibu di mi propio fayonan ku mi ta kuminsá pensa ku ta e normanan di Yehova ta muchu estrikto?’

11. Kiko nos por siña for di Yonas?

¹¹ Nos lo por kere ku nos ta masha importante. Profeta Yonas a rabia ora Yehova a tene miserikòrdia ku e pueblo di Nínive. (Yon. 4:1-3) Dikon? Parse ku e tabata masha preokupá ku su kara lo a keda na bèrgwensa, ya ku el a proklamá un destrukshon ku no a tuma lugá. Yonas tabata asina preokupá ku su reputashon ku e no a sinti niun tiki kompashon pa e ninivitanan arepentí. Akaso nos tambe lo por konsentrá asina tantu riba nos mes ku nos ta rabia ku Yehova pasobra e no a trese e fin pa kaba? Kisas nos tin años ta prediká ku e dia di Yehova ta serka. Pero kon nos ta reakshoná ora hende ta kritiká nos pasobra e dia ei no a yega ainda? Akaso nos ta pèrdè pasenshi ku Yehova?​—2 Ped. 3:3, 4, 9.

12, 13. Kiko nos tin ku hasi pa evitá ku nos ta kuminsá kuestioná loke Yehova ta hasi òf ta permití sosodé?

¹² Kiko nos por hasi si nos kurason pekaminoso kuminsá kuestioná loke Yehova ta hasi òf ta permití sosodé? Tene na mente ku ta bobo pa pensa asina. Un otro tradukshon di Proverbionan 19:3 ta bisa: “Bobedat di hende mes ta pon’é dualu, pero hende ke kulpa Dios.” (BPK) P’esei laga nos konsiderá sinku punto ku lo yuda nos pa no kulpa Yehova ora nos ta sinti nos frustrá.

¹³ No deskuidá bo relashon ku Yehova. Si nos tin un amistat será ku Yehova, nos lo no entregá na e inklinashon imperfekto di rabia kuné. (Lesa Proverbionan 3:5, 6.) Nos tin ku konfia den Yehova, i nunka pensa ku nos sa mas kuné, ni kere ku nos nesesidatnan ta esnan di mas importante. (Pro. 3:7; Ekl. 7:16) E ora ei lo tin ménos chèns ku nos ta kulpa Dios ora kos malu sosodé.

14, 15. Kiko nos por hasi pa no laga komentario negativo di otro hende influensiá nos?

¹⁴ No laga komentario negativo influensiá bo. E israelitanan den tempu di Moises tabatin motibu di sobra pa kere ku Yehova lo a yuda nan drenta e Tera Primintí. (Sal. 78:43-53) Pero ora nan a tende e informe negativo di e 10 spionnan infiel, nan no a ‘kòrda riba Yehova su poder.’ (Sal. 78:42) Si nos meditá riba tur e kosnan maravioso ku Yehova a hasi pa nos, e relashon ku nos tin kuné lo bira mas fuerte. E ora ei nos lo no laga e ideanan negativo di otro hende separá nos for di Yehova.—Sal. 77:11, 12.

¹⁵ Un otro kos ku tambe por perhudiká nos relashon ku Yehova ta si nos tin un punto di bista negativo di algun di nos rumannan. (1 Huan 4:20) Por ehèmpel, ora Aron a keda apuntá komo sumo saserdote, e israelitanan a kuestioná esei. Pa Yehova, tabata komo si fuera ta kontra dje nan a murmurá. (Num. 17:10) Di igual manera, si nos kuminsá reklamá i keha kontra e personanan ku Yehova ta usa pa dirigí e parti terenal di su organisashon, nos, de echo, ta kehando kontra Yehova.—Heb. 13:7, 17.

16, 17. Kiko nos tin ku kòrda ora nos ta konfrontá problema?

¹⁶ Kòrda ku no ta Yehova ta e kousa di nos problemanan. Den tempu di Isaías, e israelitanan a bira lomba pa Yehova, pero tòg E kier a yuda nan. (Isa. 1:16-19) Maske ki problema nos por ta konfrontá awe, ta un konsuelo pa sa ku Yehova ta interesá den nos i ke yuda nos. (1 Ped. 5:7) De echo, el a primintí di duna nos e fortalesa nesesario pa sigui wanta.​—1 Kor. 10:13.

¹⁷ Si nos ta sufri un òf otro inhustisia—meskos ku e hòmber fiel, Yòb, a sufri—nos tin ku kòrda ku no ta Yehova su falta. Yehova ta odia inhustisia i ta stima hustisia. (Sal. 33:5) Nos mester tin e mesun aktitut ku Eliú, amigu di Yòb, kende a bisa: “Leu sea di Dios di hasi maldat, i di e Todopoderoso di kometé inikidat.” (Yòb 34:10) En bes di ta e kousa di nos problemanan, Yehova ta e fuente di “tur don ku ta bon i tur regalo perfekto.”​—Sant. 1:13, 17.

18, 19. Dikon nos nunka mester duda den Yehova? Duna un ehèmpel.

¹⁸ Nunka duda den Yehova. Dios ta perfekto, i su pensamentunan ta mas haltu ku di nos. (Isa. 55:8, 9) Si di bèrdat nos ta humilde i modesto, nos mester atmití ku nos no sa tur kos. (Rom. 9:20) Mayoria di biaha, nos no tin tur detaye di un situashon. Sin duda bo a yega di konfirmá pa bo mes ku e proverbio akí ta bèrdat: “Esun ku presentá su kaso promé ta parse di tin rason, te ora un otro hende bini dilanti i hasi pregunta.”​—Pro. 18:17, BPK.

¹⁹ Si un bon amigu di bo hasi un kos ku na promé instante bo no ta komprondé òf ku bo ta haña masha straño, bo ta bula akus’é mesora di a hasi algu malu? Nò. Mas bien, lo bo pensa ku probablemente bo no sa tur detaye di loke a pasa, foral si bo konosé e persona ei pa hopi tempu. Si nos ta dispuesto pa trata asta nos amigunan imperfekto asina, kuantu mas nos mester konfia nos Tata selestial, kende su kaminda- i pensamentunan ta muchu mas haltu ku di nos!

20, 21. Dikon nos nunka mester kulpa Yehova pa nos problemanan?

²⁰ Kulpa esun ku realmente ta responsabel. Dikon nos mester hasi esei? Wèl, kisas ta nos mes ta responsabel pa algun di nos problemanan. Den tal kaso, nos tin ku rekonosé esei. (Gal. 6:7) Dikon lo ta irasonabel pa kulpa Yehova? Konsiderá e ehèmpel akí: Un outo kisas por alkansá un velosidat masha haltu mes. Suponé awor ku e shofùr a pèrdè kontrol den un bògt pasobra e tabata kore muchu duru i a dal e outo. Ta e fabrikante di e outo ta kulpabel pa e aksidente? Klaru ku nò! Asina tambe, Yehova a krea nos ku boluntat liber. Pero tambe el a duna nos konseho enkuanto kon pa tuma desishonnan sabí. Pues, dikon nos lo ke kulpa e Kreador anto pa e fayonan ku nos ta kometé?

²¹ Naturalmente, no ta tur nos problemanan ta pa motibu di nos propio fayo òf piká. Tin kos ta sosodé pa motibu di “tempu i suseso imprevisto.” (Ekl. 9:11, NW) I nunka lubidá ku Satanas e Diabel ta e kousa prinsipal di maldat. (1 Huan 5:19; Rev. 12:9) É ta e enemigu, no Yehova!​—1 Ped. 5:8.

22, 23. Kiko nos mester kòrda si nos ta sinti nos desanimá pa motibu di problema?

²² Ora bo ta enfrentá prueba i difikultat, kòrda riba e ehèmpel di Hosue ku Kalèb. Kontrali na e otro 10 spionnan, e dos hòmbernan fiel akí sí a bini ku un informe masha positivo di e Tera Primintí. (Num. 14:6-9) Nan a demostrá fe den Yehova. Pero tòg nan mester a dual 40 aña den desierto huntu ku e otro israelitanan. Akaso Hosue ku Kalèb a keha òf bira amargá pasobra nan a haña esaki inhustu? Nò. Nan a konfia den Yehova, i el a bendishoná nan pa esaki. Miéntras ku mayoria di e israelitanan infiel a muri den desierto, Yehova a laga Hosue ku Kalèb sí drenta e Tera Primintí. (Num. 14:30) Asina tambe Yehova lo bendishoná nos si nos “no kansa” di hasi su boluntat.—Gal. 6:9; Heb. 6:10.

²³ Kiko bo mester hasi si bo ta sinti bo desanimá pa motibu di problema, imperfekshon di otro hende òf bo mes imperfekshon? Konsentrá riba e kualidatnan maravioso di Yehova. Pensa riba e kosnan bunita ku el a primintí di duna bo. I puntra bo mes: ‘Unda lo mi tabata si mi no tabatin Yehova?’ Keda semper serka di Yehova, i sòru pa hamas bo rabia kuné den bo kurason!