April

For iumi kasem gud samting from body and blood blo Jesus, iumi need for showimaot faith lo ransom. (Eph. 1:7) Evri year during lo Evening Kaikai blo Lord, olketa wea Jesus kolem lo “nara sheepsheep” no kaikaim datfala bred and wine and olketa shud no kaikaim. (John 10:16) Nomata olsem, olketa tu kasem gud samting from body and blood blo Jesus Christ. Olketa duim diswan taem olketa showimaot faith lo sakrifaes blo Jesus wea savve sevem man. (John 6:53) Bat, olketa wea shud kaikaim bred and drinkim wine showimaot dat olketa insaed lo datfala niu agreement and olketa garem hope for kamap olketa king lo Kingdom lo heven. So nomata iumi blo anointed or nara sheepsheep, hem barava important for showimaot faith and datwan mekem iumi for kasem laef olowe. w24.12 12-13 ¶14, 16

During lo Evening Kaikai blo Lord, Jesus givim bred wea no garem yeast lo olketa aposol blo hem and sei datwan representim body blo hem. Then hem givim lo olketa datfala wine and sei datwan representim “blood bilong datfala agreement.” (Mark 14:​22-25; Luke 22:20; 1 Cor. 11:24) Jesus mekem datfala niu agreement witim spiritual “Israel” wea hem minim olketa wea bae rul insaed “Kingdom bilong God.” (Heb. 8:​6, 10; 9:15) During lo Evening Kaikai blo Lord, Jesus focus nomoa lo datfala “smol sekson bilong olketa sheepsheep.” Olketa faithful aposol wea stap witim hem lo datfala rum nao olketa first wan lo datfala smol sekson. Olketa nao bae stap witim Jesus lo heven. w24.12 11 ¶9-10

Olketa betrayim Jesus, arrestim hem, tok spoelem hem, judgem hem, and mekem hem barava safa. Olketa soldia leadim hem go lo ples for olketa killim hem dae and nilam hem lo post. Taem Jesus faithful and gohed for safa, nara Person tu hem feelim bigfala pain and barava safa from wat hem gohed happen. Datfala person hem Jehovah God. Nomata Jehovah garem bigfala paoa, hem no stopem son blo hem for safa. Why? Hem bikos lo love. Ransom sakrifaes blo Jesus barava pruvim hao Jehovah barava lovem iu. Jehovah duim big samting and willing for barava safa for rescuem iu from sin and dae. (1 John 4:​9, 10) Yes, hem laek for helpem each wan lo iumi for faet againstim sin and for helpem iumi win! w24.08 6 ¶13-14

For understandim gud love blo Jehovah for iumi, hem gud for ting raonem wat Jehovah go thru lo hem taem hem givim datfala ransom. Satan sei no eni servant blo God bae gohed faithful lo Jehovah taem olketa feisim olketa hard taem. So for pruvim datfala toktok hem no tru, Jehovah letem Jesus for safa bifor hem dae. (Job 2:​1-5) Jehovah lukim taem olketa bigman blo religion tok spoelem Jesus, olketa soldia whipim hem nogud, and olketa nilam hem lo post. Then Jehovah watchim Son blo hem wea hem lovem tumas kasem bigfala pain and hem safa and dae. (Matt. 27:​28-31, 39) Jehovah garem paoa for stopem datwan. (Matt. 27:​42, 43) Bat if God duim datwan, bae no eniwan for peim ransom and iumi bae no garem eni hope. So Jehovah letem Son blo hem for gohed safa go kasem taem hem dae. w25.01 22 ¶7

Lo Nisan 16, 33 C.E., olketa disaepol blo Jesus feel sorre tumas and barava fraet. Tufala disaepol lusim Jerusalem and wakabaot go for Emmaus. Wanfala man meetim tufala and olketa wakabaot tugeta, tufala no luksavve lo hem. Tufala storyim hao tufala feel sorre bikos lo nogud samting wea happen lo Jesus. Then datfala man start for storyim olketa samting wea tufala bae no forgetim lo full laef blo tufala. Datfala man iusim olketa scripture wea “Moses and evri profet raetem” for explainim why datfala Messiah mas safa and dae. Taem thrifala arrive lo Emmaus, datfala man just showimaot hu nao hem, hem nao Jesus wea resurrect! (Luke 24:​13-35) Jesus appear lo olketa disaepol blo hem staka taem during lo last 40 days blo hem lo earth. During lo datfala taem, olketa disaepol barava sorre and fraet, so Jesus encouragem olketa. From datwan, olketa hapi, confident, and no fraet for preach and teachim gud nius blo Kingdom. w24.10 12 ¶1-3

Taem pikinini growap for kamap adult hem wanfala natural process wea isisi happen. Bat taem iumi grow lo spiritual wei hem no happen automatic. For example, olketa brata and sista lo Corinth acceptim gud nius, baptaes, kasem holy spirit, and lanem staka gud samting from instruction blo aposol Paul. (Acts 18:​8-11) Bat, nomata olketa baptaes for longtaem finis, staka no kamap mature yet. (1 Cor. 3:2) For kamap mature, first samting hem nao for iumi mas willing for laek duim datwan. Olketa wea no laek for “garem savve,” laekem nomoa for stap olsem pikinini lo spiritual wei, and no progress. (Prov. 1:22) Iumi no laek for olsem pikinini wea full-grown bat still depend lo parents for mekem disison for olketa. Instead, iumi laek for responsible for wei wea iumi kamap mature lo spiritual wei. If iu still waka hard for kamap mature, prea lo Jehovah for mekem iu garem datfala feeling for laek kamap mature and for hem givim iu paoa for duim datwan.—Phil. 2:13. w24.04 4 ¶9-10

Taem Jehovah judgem pipol, hem talem klia lo iumi feeling blo hem. Aposol Peter talem sem samting wea profet Ezekiel talem abaotem Jehovah. (Ezek. 33:11) Jehovah no kwiktaem distroem man wantaem and for olowe. Hem garem bigfala mercy, and hem laek for showimaot mercy lo eni chance wea kamap. Wat nao iumi savve abaotem pipol wea Jehovah bae no resurrectim? Bible storyim tu-thri example nomoa lo diswan. Samting wea Jesus talem showimaot Judas Iscariot bae no resurrect. (Mark 14:21; lukim tu John 17:12 and English study note.) Taem Judas againstim Jehovah God and Son blo hem, hem barava min for duim datwan. (Lukim Mark 3:29 and English study note.) And tu, Jesus sei dat samfala lo olketa religious leader wea againstim hem bae dae and no garem hope for resurrect. (Matt. 23:33; lukim John 19:11 and English study note, “the man.”) And aposol Paul talem warning hao olketa apostate wea no repent bae no resurrect.—Heb. 6:​4-8; 10:29. w24.05 4 ¶10-11

Taem iumi fren klos witim Jehovah, no eni samting wea Satan duim bae spoelem iumi for olowe. (1 John 3:8) Lo niu world, Jehovah bae gohed for protectim olketa faithful fren blo hem lo spiritual wei and even from wei for dae tu. (Rev. 21:4) Hem spesol privilege for kamap guest lo tent blo Jehovah, wea minim for gohed enjoyim klos frenship witim hem. (Ezek. 37:27) Wat kaen attitude nao iumi shud garem if iumi laek gohed stap olsem guest blo hem? If samwan invaetem iu lo haos blo hem, iu bae laek for duim wat hem expectim. Lo sem wei, if iumi laek for gohed stap olsem guest blo Jehovah, iumi bae laek for savve wat nao hem expectim iumi for duim. Love for Jehovah bae mekem iumi for duim evri samting wea iumi fit for duim for “mekem hem hapi.” (Col. 1:10) Iumi shud evritaem fraet lo Hem and no forgetim hu nao hem. Wei for tinghae lo hem bae helpem iumi for no duim eni samting wea bae mekem hem feel nogud. Iumi evritaem laek for ‘hambol taem iumi wakabaot’ witim God blo iumi.—Mic. 6:8. w24.06 4 ¶8-9

Jehovah askem Abraham for offerim son blo hem Isaac olsem wanfala sakrifaes. Masbi datwan hem barava no isi for Abraham duim. Nomata olsem, hem redi for duim datwan. Bat lo last minute, God stopem Abraham for sakrifaesim Isaac. Bat, evriwan wea garem strong faith savve lanem wanfala important samting from story blo Abraham. Samting wea Abraham duim hem piksarem hao Jehovah willing for offerim beloved Son blo hem olsem sakrifaes. Datwan showimaot hem barava lovem tumas pipol. (Gen. 22:​1-18) Staka handred year bihaen, Jehovah givim Law lo nation blo Israel wea includim wei for offering staka difren sakrifaes for kavarem sin blo olketa. (Lev. 4:​27-29; 17:11) Olketa sakrifaes hia piksarem nomoa wanfala sakrifaes wea Jehovah bae provaedem, and datfala sakrifaes nao bae barava sevem evriwan from sin. Olketa profet blo God explainim hao datfala promis pikinini, wea hem nao spesol Son blo God, hem bae safa and pipol killim hem dae for hem sevem evriwan from sin and dae, datwan includim iu tu!—Isa. 53:​1-12. w24.08 4 ¶7-8

Taem iu duim Bible reading blo iu, mek sure iu traem best for followim wat iu readim. Taem iu readim wanfala point lo Bible, askem iuseleva: ‘Hao nao mi savve followim disfala information distaem or lo olketa months wea bae kam?’ Olsem example, maet Bible reading blo iu hem lo 1 Thessalonians 5:​17, 18. Afta iu readim tufala verse hia, stop and ting abaotem haomas taem iu savve prea and if prea blo iu hem really kam from heart. And tu, iu savve ting abaotem olketa samting wea iu appreciatim. Maet iu disaed for sei thankiu lo Jehovah for thrifala specific samting. Nomata iu spendem tu-thri minute nomoa for mekem mind blo iu focus lo olketa samting olsem, hem bae helpem iu for kamap man wea herem toktok blo God and followim. Tingim gud samting wea iu savve kasem if iu duim datwan lo Bible reading blo iu evriday! Datwan bae barava helpem iu for kamap man wea followim toktok blo God. w24.09 4-5 ¶9-10

Jehovah creatim iumi witim spesol ability. Nomata iumi hapi for kasem samting, hapi wea iumi kasem from wei for give hem winim datwan. Taem iumi helpem olketa brata and sista, datwan mekem iumi feel gud. And taem olketa appreciatim wat iumi duim, iumi hapi. Bat even if samwan wea iumi helpem hem sei thankiu lo iumi or nomoa, iumi hapi nomoa bikos iumi savve iumi duim stret samting. No forgetim nomata wat nao iu givim, “Jehovah garem wei for givim staka samting moa lo iu winim datwan.” (2 Chron. 25:9) No eni samting wea iumi givim hem winim wat Jehovah givim! No eni hapi hem winim hapi wea iumi kasem taem Jehovah rewardim iumi. So iumi mas disaed strong for followim example blo Dadi blo iumi lo heven, wea willing tumas for givim samting. w24.09 31 ¶20-21

Jehovah hem showim mercy and kaen. (Ps. 103:13; Isa. 49:15) Hem understandim iumi, and taem iumi feel sorre hem tu feel sorre. (Zech. 2:8) Hem mekem hem isi for iumi savve lo hem and fren klos witim hem. (Ps. 25:14; Acts 17:27) Hem hambol and “hem bendaon for luk kam lo skae and earth, hem liftimap man wea pipol ting daonem from dust.” (Ps. 113:​6, 7) Olketa reason hia mekem iumi for laek givim glory lo nambawan God blo iumi. Iumi givim glory lo Jehovah bikos iumi laekem olketa narawan for savve lo hem. Staka pipol no savve lo truth abaotem Jehovah. Why? Bikos Satan blindim mind blo olketa taem hem spredim staka nogud laea abaotem Jehovah. (2 Cor. 4:4) Satan mekem pipol for bilivim dat Jehovah hem God wea raf, no kea, and hem nao kosim wei for safa lo disfala world. Bat iumi savve lo truth abaotem God blo iumi! Iumi garem chance for talem pipol tru samting abaotem hem and datwan givim glory lo God.—Isa. 43:10. w25.01 3 ¶6-7

Lo first century, olketa wea sapotim Satan talem staka laea abaotem perfect Son blo God wea duim olketa mirakol. For example, olketa religious leader talem pipol hao paoa wea Jesus kasem for raosem olketa demon, hem kam from “boss bilong olketa demon.” (Mark 3:22) Lo kot case blo Jesus, olketa religious leader sei Jesus tok spoelem God and olketa bihaenem pipol for ask for killim dae Jesus. (Matt. 27:20) Bihaen, taem olketa follower blo Christ preachim gud nius, olketa wea againstim olketa bihaenem pipol for persecutim olketa Christian hia. (Acts 14:​2, 19) Wastaoa blo December 1, 1998, explainim wat Acts 14:2 storyim, and sei hao ‘olketa Jew no satisfae for rejectim message nomoa, bat olketa laea for tok spoelem olketa Christian mekem olketa wea no Jew againstim olketa.’ Distaem, Satan still gohed “laea long evriwan long earth.” w24.04 11 ¶15-16

For samwan kasem laef olowe lo future hem no depend lo taem wea hem dae. Jehovah hem perfect Judge, and olketa disison blo hem raeteous and followim justice. (Ps. 33:​4, 5) Iumi savve trustim hao “Judge blo full earth” bae duim stret samting. Hem stret tu for sei dat for samwan kasem laef olowe, hem no depend lo wea nao hem stap. Hem hard for Jehovah judgem staka million pipol olsem “goat” just bikos olketa stap lo kantri wea olketa no garem chance for herem gud nius abaotem Kingdom. (Matt. 25:46) Datfala raeteous Judge blo full earth hem barava kea abaotem olketa pipol hia winim hao iumi kea for olketa. Iumi no savve hao nao Jehovah bae duim samting during lo datfala big trabol. Maet samfala lo olketa pipol hia bae garem chance for lane abaotem Jehovah, garem faith, and saed witim Jehovah taem hem duim samting for mekhae lo hemseleva front lo evri nation.—Ezek. 38:16. w24.05 12 ¶14-15

Pipol blo Jehovah laek for helpem each other. (2 Cor. 8:4) Nomata olsem, samfala taem man mas brave for duim datwan. For example, taem war hem happen, olketa elder luksavve olketa brata and sista needim encouragement, sapot, and maet olketa needim help for kasem olketa spiritual or physical need blo olketa. From olketa elder lovem olketa brata and sista, olketa putim laef blo olketa lo danger for provaedem wat olketa needim. Lo taem olsem, hem barava important for iumi evriwan mas wan mind. Obeyim instruction from branch office lo kantri blo iu. (Heb. 13:17) Olketa elder shud evritaem reviewim olketa arrangement blo kongregeson for taem blo disaster, and taem wanfala disaster hem klosap for happen, olketa need for reviewim instruction from organization lo wat for duim. (1 Cor. 14:​33, 40) Mas brave bat careful. (Prov. 22:3) Tingting gud bifor iu duim samting. No riskim laef nating. Depend lo Jehovah. Hem savve helpem iu for duim samting for mekem olketa brata and sista for sef. w24.07 4 ¶8; 5 ¶11

King David savve gud lo Jehovah and depend lo Hem. Taem King Saul and olketa enemy aftarem David, hem prea lo Jehovah for help. Afta God ansarem prea blo David and rescuem hem, David sei: “Jehovah hem God wea laef!” (Ps. 18:46) Taem David talem toktok hia, hem no just minim dat hem biliv God hem stap. Wanfala reference buk sei David expressim hao hem barava trustim dat Jehovah “hem god wea laef and wea evritaem duim samting for helpem pipol blo hem.” Tru nao, wat David experiencem lo laef, pruvim dat God blo hem laef. Datfala tingting strongim David for gohed servem and praisem Jehovah. (Ps. 18:​28, 29, 49) Taem iumi barava bilivim dat Jehovah hem God wea laef, datwan savve helpem iumi for gohed strong for servem hem. Datwan bae strongim iumi for no givap lo olketa hard taem and encouragem iumi for gohed waka hard lo service blo iumi for hem. And tu, bae iumi barava laek for gohed fren klos witim Jehovah. w24.06 20-21 ¶3-4

Wat nao iumi savve lanem from toktok blo aposol Paul for olketa lo Thessalonica? Taem iumi herem samting wea difren from wat iumi lanem lo Bible or herem eni story wea mekem iumi seke or sapraes, iumi need for iusim gudfala tingting. Lo Soviet Union bifor, olketa enemy blo iumi iusim wanfala leta for laea lo olketa brata, olketa sei hem from world hedquarter. Datfala leta encouragem olketa brata for formim wanfala separate, independent organization. Datfala leta hem luk exactly olsem hem kam from world hedquarter. Bat olketa faithful brata luksavve datfala leta hem laea wan. Olketa luksavve message insaed hem difren from wat olketa lanem finis. Distaem olketa enemy blo truth iusim technology for mekem iumi konfius or divaedem iumi. Instead for letem datfala information for mekem iumi “lusim stretfala tingting,” iumi savve protectim iumiseleva taem iumi ting raonem wat iumi herem or readim, and mek sure hem followim wat iumi lanem finis.—2 Thess. 2:2; 1 John 4:1. w24.07 12 ¶14-15

Main important disison wea eniwan savve mekem, hem nao for dedicatem laef blo hem lo Jehovah and for kamap part lo famili blo hem for worshipim hem. Jehovah laekem evriwan for duim datwan. Why? Hem laekem olketa for fren witim hem and laef olowe. (Deut. 30:​19, 20; Gal. 6:​7, 8) Nomata olsem, Jehovah no forcem eniwan for servem hem. Hem letem each wan for disaed seleva wat bae hem duim. Wat if wanfala baptaes Christian no obeyim law blo God, and duim serious sin? If hem no repent, olketa mas aotem hem from kongregeson. (1 Cor. 5:13) Nomata olsem, Jehovah still laekem datfala person wea duim serious sin for kam bak lo hem. Datwan hem wanfala important reason why Jehovah provaedem ransom for mekem olketa sinner wea repent for kasem forgiveness. Loving Dadi blo iumi barava laekem olketa wea duim serious sin for repent, and hem encouragem olketa for duim datwan.—Zech. 1:3; Rome 2:4; Jas. 4:8. w24.08 14 ¶1-2

Taem John raetem mek-thri leta blo hem, samfala gohed spredim false teaching and mekem kongregeson for no wan mind. Bat, staka lo kongregeson gohed “followim olketa tru teaching.” Olketa obeyim Jehovah and “gohed for obeyim olketa law bilong hem.” (2 John 4, 6) Olketa faithful Christian hia mekem John for hapi and Jehovah tu. (Prov. 27:11) Wat nao leson wea iumi lanem? Wei for faithful mekem man hapi. (1 John 5:3) For example, taem iumi savve iumi mekem Jehovah hapi, datwan mekem iumi hapi. Taem Jehovah lukim iumi rejectim olketa temptation blo world and iumi acceptim truth, datwan mekem hem hapi. Olketa angel lo heven tu hapi. (Luke 15:10) Taem iumi lukim olketa narawan gohed faithful, iumi tu savve hapi. (2 Thess. 1:4) Then bihaen disfala system finis, iumi bae hapi bikos iumi pruvim dat iumi loyal lo Jehovah nomata iumi stap lo world wea Satan hem rulim. w24.11 12 ¶17-18

Hao long nao bae hem tek for iu lukluk gud lo wei blo samwan bifor iu talem dat iu laek for frenim hem? If iu kwiktaem tumas for ask, maet datfala brata or sista bae tingse iu no tingting gud bifor iu mekem disison. (Prov. 29:20) Bat if iu tek long taem tumas, maet datfala brata or sista tingse iu no savve hao for disaed, especially if hem luksavve iu interest lo hem. (Eccl. 11:4) Tingim, bifor iu ask for frenim samwan, iu no need for convince dat hem nao person wea iu bae maritim. Bat iu shud barava sure dat iu redi for marit and datfala person maet hem raet wan for iu. Bat, hao if iu luksavve samwan interest lo iu? If iu no laek for fren, duim samting for showimaot klia dat iu no interest. Hem no kaen if iu duim samting wea mekem datfala person for hope nating.—Eph. 4:25. w24.05 22-23 ¶9-10

Only olketa anointed Christian wea faithful nomoa bae Jesus tekem go insaed lo Kingdom blo hem lo heven. Taem eni anointed Christian no gohed for lukaot lo spiritual wei, bae olketa no insaed lo grup blo olketa chosen wan wea olketa angel bae hipimap. (Matt. 24:31) Evri pipol blo God nomata olketa garem hope for laef lo heven or lo earth, olketa shud tingim disfala warning wea Jesus talem for gohed for lukaot and gohed faithful. From iumi savve gud lo Jehovah, iumi savve trustim olketa judgment blo hem. So iumi no need for wari if Jehovah chusim samfala niu faithful anointed wan distaem. Tingim tokpiksa wea Jesus talem abaotem olketa wakaman wea kam in for waka lo planteison lo mek-eleven hour. (Matt. 20:​1-16) Olketa wea kam waka lo planteison taem hem klosap lo end blo day, kasem sem pei olsem olketa wea start waka lo morning. Lo sem wei tu, nomata wat taem nao wanfala Christian hem kasem anointing, evri anointed Christian bae kasem sem reward lo heven if olketa gohed faithful. w24.09 24 ¶15-17

Jesus showimaot perfect example lo hao for deal witim injustice. Tingim hao famili blo hem and olketa narawan treatim hem nogud. Olketa relative blo hem wea no biliv, accusim hem and sei hem karangge, olketa bigman blo religion sei hem waka witim olketa demon, and olketa soldia blo Rome tok spoelem hem, hitim hem, and gogo killim hem dae tu. (Mark 3:​21, 22; 14:55; 15:​16-20, 35-37) Nomata Jesus barava safa from datfala injustice wea hem kasem, hem no duim eni samting for pei bak. Wat nao iumi savve lanem from example blo Jesus? (1 Pet. 2:​21-23) Jesus showim perfect example for iumi followim taem olketa narawan treatim iumi nogud. Hem savve lo taem for kwaet and taem for story. (Matt. 26:​62-64) Hem no ansarem evri false story wea olketa talem abaotem hem. (Matt. 11:19) And taem hem story, hem no tok spoelem or threatenim olketa wea persecutim hem. w24.11 4-5 ¶9-10

Imaginim dat iu givim wanfala spesol present wea luk naes and wea barava iusful lo samwan wea iu lovem. If hem putim datfala present lo box and no iusim, maet bae iu no feel hapi lo wat hem duim! Bat if hem iusim gud and talem thankiu for datfala present, iu bae hapi tumas. So wat nao iumi lanem from disfala example? Jehovah givim Son blo hem for dae for iumi. For sure, Jehovah hapi tumas taem hem lukim dat iumi tinghae lo datfala spesol present and love wea muvim hem for provaedem ransom! (John 3:16; Rome 5:​7, 8) Taem iumi stap lo truth for longtaem, maet iumi start for no tinghae lo datfala present blo ransom. Hem olsem iumi putim datfala present wea God givim insaed box and forgetim. Iumi hapi for kasem, bat iumi no iusim. For datwan no happen, iumi mas ting raonem evritaem wat God and Christ duim for iumi. w25.01 26 ¶1-2

For wanfala brata qualify for kamap elder “hem mas no wanfala niu disaepol.” Nomata iu no need for stap lo truth for staka year bifor iu kamap elder, bat iu needim taem for kamap wanfala mature Christian. Bifor iu kasem appointment olsem elder, iu mas showim dat iu hambol and willing for weit lo Jehovah for kasem eni assignment, olsem Jesus. (Matt. 20:23; Phil. 2:​5-8) Iu savve pruvim iu faithful taem iu hol strong lo Jehovah and olketa raeteous standard blo hem, and taem iu followim olketa direction from organization blo hem. Olketa scripture storyim klia hao olketa overseer mas “savve hao for teach.” Hao, datwan minim iu mas savve tumas for givim tok? Nomoa. Staka elder wea qualify, maet olketa no best pablik speaker, bat olketa savve teach gud lo ministry and duim shepherding. w24.11 23-24 ¶14-15

Taem iu kam akrosim wanfala point wea stap lo Bible wea iu no understandim, duim moa research. Then afta, gohed ting raonem wat iu faendem lo research blo iu and wat iu lanem abaotem Jehovah and Son blo hem, and love blo tufala for iu. (Ps. 119:​97, ftn.) Taem iu readim Bible or duim research and iu no faendem eni niu point or eni interesting samting, no discourage. Ting lo iuseleva olsem samwan wea iusim wanfala pan for faendem gold. Olketa wea lukaotem gold savve spendem staka hour or day for wasim graon lo wata bifor olketa faendem even wanfala smol pis gold. Olketa no givap bikos evri smol pis gold hem garem hae value. Samting wea garem hae value winim gold hem olketa Bible truth! (Prov. 8:10) So iu mas patient and followim gud Bible reading schedule blo iu.—Ps. 1:2. w25.01 25 ¶14-15

Jehovah expectim iumi for redi for forgivim samwan wea mekem iumi feel nogud. (Ps. 86:5; Luke 17:4; Eph. 4:32) Samfala taem, wat samwan talem or duim lo iumi maet mekem iumi barava feel nogud, especially if datfala person hem klos fren or famili member. (Ps. 55:​12-14) Maet pain wea iumi feelim hem olsem samwan katem iumi. (Prov. 12:18) Maet iumi trae for no ting abaotem or ignorem hao iumi feel. Bat taem iumi duim datwan, hem olsem samwan busarem iumi and then iumi no laek for aotem datfala naef. Lo sem wei tu, hard for iumi expectim feeling blo iumi for kamap gud if iumi gohed for ignorem. Taem samwan mekem iumi feel nogud, maet first reaction blo iumi hem for kros. Bible tu storyim hao iumi savve kros. Bat, hem warnim iumi for no letem feeling for kros bossim iumi. (Ps. 4:4; Eph. 4:26) Why? Bikos no eni gud samting savve kamaot from kros. (Jas. 1:20) Remember, for kros hem wanfala normal reaction, bat disison for keepim kros hem choice blo man seleva. w25.02 15 ¶4-6

Jesus storyim wanfala tokpiksa wea showim hem karangge samting for man hipimap selen and no duim samting wea showim hem “tingim God.” (Luke 12:​16-21) No eniwan lo iumi savve wat nao bae happen tumoro. (Prov. 23:​4, 5; Jas. 4:​13-15) Bikos iumi followim Christ iumi feisim samfala specific challenge. Jesus sei if iumi kamap olketa disaepol blo hem, iumi mas redi for “lusim evri samting.” (Luke 14:33) Olketa Christian lo Judea lo first century hapi nomoa for lusim evri samting wea olketa garem. (Heb. 10:34) Distaem tu, staka brata and sista blo iumi mas lusim olketa material tings blo olketa bikos olketa no sapotim eni politikol party. (Rev. 13:​16, 17) Wat nao helpem olketa for duim datwan? Olketa barava trustim promis blo Jehovah wea sei: “Bae mi nating lusim iu.” (Heb. 13:5) Iumi duim best for plan for olketa future need blo iumi, bat if eni samting wea iumi no expectim hem happen, iumi trustim dat Jehovah bae sapotim iumi. w25.03 29 ¶13-14

Jehovah no expectim for iumi kamap mature seleva. Olketa shepherd and teacher insaed Christian kongregeson redi for helpem iumi for “kamap mature” lo spiritual wei, “wea diswan minim iumi [bae kamap] barava mature olsem Christ.” (Eph. 4:​11-13) Jehovah givim holy spirit tu for helpem iumi “garem tingting bilong Christ.” (1 Cor. 2:​14-16) And tu, God givim kam fofala Gospel for showim iumi tingting, toktok, and wat Jesus duim taem hem stap lo earth. Taem iu garem sem tingting olsem Jesus and duim sem samting wea hem duim, iu savve kasem goal blo iu for kamap mature Christian. Bat for iumi gohed for kamap mature, iumi mas lanem moa samting winim “olketa main teaching abaotem Christ.” w24.04 4-5 ¶11-12

Evriday iumi savve mekem olketa disison. Samfala disison hem isi for mekem, olsem wat for kaikaim lo breakfast or wat taem for sleep. Olketa nara samting maet hem moa hard for disaedem. Olsem olketa disison wea affectim health blo iumi, hapi wea iumi garem, loved wans blo iumi, or worship blo iumi. Iumi laekem olketa disison wea iumi mekem for helpem iumi and famili blo iumi. Important samting, iumi laek for mekem olketa disison wea Jehovah hapi lo hem. (Rome 12:​1, 2) Wanfala important samting wea savve helpem iumi for mekem gud disison, hem for savve gud lo information firstaem. Why nao datwan important? Tingim wanfala sik patient wea go for lukim doctor taem hem garem serious health problem. Hao, datfala doctor bae kwiktaem mekem disison for givim medicine and no chekim gud datfala patient or askem hem olketa kwestin firstaem? Hard for doctor duim olsem. Iu tu bae mekem wanfala gud disison if lo firstaem, iu ting raonem gud information abaotem situation blo iu bifor iu disaed. w25.01 14 ¶1-3

Wat nao iumi savve abaotem mercy blo Jehovah? Hao nao hem showimaot dat “hem no laekem eniwan for dae”? (2 Pet. 3:9) Tingim mercy wea hem showim lo samfala wea duim serious sin. King David duim samfala barava serious sin, olsem adultery and murder. Nomata olsem, David hem repent, so Jehovah showimaot mercy and forgivim hem. (2 Sam. 12:​1-12) King Manasseh hem barava wicked for klosap full laef blo hem. Nomata wat hem duim hem barava nogud tumas, Jehovah acceptim wei wea hem repent and Hem showimaot mercy and forgivim hem. (2 Chron. 33:​9-16) Olketa example hia remindim iumi hao Jehovah evritaem showimaot mercy taem hem lukim reason for duim datwan. Hem bae resurrectim pipol olsem bikos olketa luksavve lo sin wea olketa duim and olketa repent. w24.05 4 ¶12