Olketa Young Wan, Laef blo Iu Bae Hao?

1. Wanem hard challenge nao Jehoash, Uzziah, and Josiah feisim?

IMAGINIM if iu kamap king for pipol blo God taem iu pikinini or teenager nomoa! Hao nao bae iu iusim paoa and authority blo iu? Bible storyim samfala young wan wea kamap king lo Judah. For example, Jehoash kamap king taem hem 7 years old nomoa, Uzziah taem hem 16 years, and Josiah taem hem 8 years. Tingim pressure wea olketa kasem! Nomata situation blo olketa no isi, Jehovah and olketa narawan helpem olketa for winim olketa challenge wea olketa feisim and olketa duim staka gud samting.

2. Why nao hem gud for iumi study abaotem example blo Jehoash, Uzziah, and Josiah?

² Iumi no king or queen, bat iumi savve lanem staka samting from Jehoash, Uzziah, and Josiah. Iumi savve lane from olketa gud disison and olketa bad disison wea olketa mekem tu. Example blo olketa savve helpem iumi for lanem why iumi need for chusim olketa gud frens, gohed hambol, and for gohed lukaotem Jehovah.

CHUSIM OLKETA GUD FRENS

3. Wat nao King Jehoash duim taem Hae Priest Jehoiada givim hem instruction?

³ Followim example blo Jehoash for mekem wise disison. Dadi blo Jehoash dae taem hem pikinini nomoa, and Hae Priest Jehoiada lukaftarem hem and teachim hem abaotem Jehovah. Jehoash wise bikos hem lisin lo advaes blo Jehoiada. From Jehoash followim example blo Jehoiada, hem disaed for worshipim Jehovah and leadim pipol for worshipim Jehovah. Jehoash arrange tu for olketa repairim temple blo Jehovah.—2 Chron. 24:1, 2, 4, 13, 14.

4. Wat nao iumi savve kasem taem iumi lovem and obeyim olketa komandment blo Jehovah? (Provebs 2:1, 10-12, SIPB)

⁴ If parents or narawan teachim iu for lovem Jehovah and for followim olketa standard blo hem, datwan hem barava best present wea olketa givim iu. (Readim Provebs 2:1, 10-12, SIPB.) Parents savve trainim iu lo staka samting. Tingim sista Katya, wea dadi blo hem helpem hem for mekem olketa gud disison. Taem dadi go for dropim hem lo skul, hem savve discussim text each day witim hem. Katya sei: “Datwan helpem mi for deal witim olketa problem wea kamap during lo day.” Hao if parents blo iu mekem olketa rul wea base lo Bible, bat iu maet feel dat olketa rul hia hem strict tumas? Wat nao savve helpem iu for obeyim olketa? Wanfala sista wea nem blo hem Anastasia tingim bak hao parents blo hem iusim staka taem for explainim why olketa putim samfala rul. Anastasia sei: “Datwan helpem mi for minim dat parents blo mi mekem olketa rul hia no for kontrolem laef blo mi, bat for protectim mi bikos tufala lovem mi.”

5. Hao samting iu duim savve affectim parents blo iu and Jehovah? (Provebs 22:6; 23:15, 24, 25, SIPB)

⁵ Taem iu followim advaes wea kam from Bible, parents blo iu bae hapi. Samting wea moa important, iu bae mekem God hapi and frenship blo iu witim hem bae kamap strong. (Readim Provebs 22:6; 23:15, 24, 25, SIPB.) Taem iu studyim olketa gud samting wea Jehoash duim taem hem young, hem mekem iu for laek followim example blo hem.

6. Bihaen Jehoiada dae, hu nao Jehoash lisin lo advaes blo olketa, and wat nao kasem hem? (2 Chronicles 24:​17, 18)

⁶ Lane from bad disison wea Jehoash mekem. Bihaen Jehoiada dae, Jehoash chusim olketa bad frens. (Readim 2 Chronicles 24:17, 18.) Hem disaed for lisin lo advaes blo olketa leader blo Judah wea no lovem Jehovah. Maet bae iu agree hao Jehoash shud avoidim olketa nogud fren hia. (Prov. 1:10) Bat, hem lisin nao lo nogud advaes blo olketa. And tu, taem kasin blo Jehoash, Zechariah, laek for stretem hem, Jehoash givim order for olketa killim hem dae. (2 Chron. 24:20, 21; Matt. 23:35) Datwan hem karangge samting for duim! Firstaem, Jehoash hem wanfala faithful king, bat hem kamap apostate and killim man dae. Gogo, olketa servant blo hemseleva killim hem dae. (2 Chron. 24:22-25) Laef blo Jehoash bae no olsem, if hem gohed for lisin lo Jehovah and olketa wea lovem Jehovah! Wat nao iu lanem from example hia?

7. Wat kaen frens nao bae iu chusim? (Lukim tu piksa.)

⁷ Wanfala samting iumi savve lanem from bad disison wea Jehoash mekem nao, iumi mas chusim olketa frens wea lovem Jehovah and wea laek mekem hem hapi. Olketa frens olsem bae helpem iumi for duim gud samting. Iumi savve frens witim olketa wea olo or young winim iumi. Remember, Jehoash hem barava young winim fren blo hem Jehoiada. Taem iu chusim olketa frens, askem iuseleva: ‘Hao, olketa frens hia bae helpem mi for garem strong faith lo Jehovah? Waswe, olketa encouragem mi for followim olketa standard blo God? Hao, olketa story abaotem Jehovah and olketa Bible truth? Waswe, olketa respectim standard blo Jehovah? Hao, olketa talem nomoa wat mi laek for herem, or olketa no fraet for stretem mi taem mi start for go difren?’ (Prov. 27:5, 6, 17) For tok stret, if olketa frens blo iu no lovem Jehovah, iu shud no fren witim olketa. Bat if olketa frens blo iu lovem Jehovah, no let go lo olketa bikos bae olketa evritaem helpem iu!​—Prov. 13:20.

8. If iumi iusim social media, wat nao iumi shud tingim?

⁸ Iumi savve iusim social media for story lo famili and olketa frens. Bat, staka pipol wea iusim diswan savve postim piksa and video lo wanem olketa peim or duim for mekem pipol tinghae lo olketa. If iu iusim social media, askem iuseleva: ‘Waswe, motive bihaen olketa post blo mi hem for mekem pipol tinghae lo mi? Hao, goal blo mi hem for encouragem narawan, or for olketa praisem mi nomoa? Waswe, mi letem idea blo pipol lo social media for influencim tingting, toktok, and akson blo mi lo negative wei?’ Brata Nathan Knorr, wea hem member blo Governing Body, talem disfala advaes: “No trae for mekem olketa man hapi. Bae no eniwan nomoa iu mekem hapi. Mekem Jehovah hapi, and iu bae mekem evriwan wea lovem Jehovah hapi.”

REASON FOR GOHED HAMBOL

9. Wat nao Jehovah helpem Uzziah for duim? (2 Chronicles 26:1-5)

⁹ Followim example blo Uzziah for mekem gud disison. Taem King Uzziah teenager, hem hambol. Hem lane “for fraet lo tru God.” And Jehovah blessim hem for klosap 68 years wea hem laef. (Readim 2 Chronicles 26:1-5.) Uzziah winim staka nation wea enemy lo olketa Israelite and duim samting for protectim Jerusalem. (2 Chron. 26:​6-15) Masbi Uzziah hapi lo evri samting wea God helpem hem for duim.​—Eccl. 3:12, 13.

10. Wat nao happen lo Uzziah?

¹⁰ Lane from bad disison wea Uzziah mekem. King Uzziah getius for talem samting for olketa narawan duim. Maet datwan mekem hem for tingse hem savve duim eni samting wea hem laekem. So wanday, Uzziah disaed for go insaed temple blo Jehovah and from hem praod tumas hem laek for bonem incense lo altar, wea hem samting wea olketa king shud no duim. (2 Chron. 26:​16-18) Hae Priest Azariah trae for stretem hem bat Uzziah barava kros. From datwan, Uzziah kasem leprosy and hem spoelem faithful record blo hem lo service blo hem for Jehovah. (2 Chron. 26:​19-21) Laef blo Uzziah bae no olsem, if hem gohed for hambol!

11. Wat nao iumi savve duim for showimaot iumi hambol? (Lukim tu piksa.)

¹¹ Taem Uzziah garem bigfala paoa, hem forgetim nao evri gud samting wea Jehovah duim for hem. Wat nao iumi lanem? Iumi shud tingim dat evri blessing and privilege wea iumi kasem, hem from Jehovah. Winim for tok praod abaotem olketa samting wea iumi duim, iumi shud praisem Jehovah bikos hem nao helpem iumi for duim olketa samting hia.b (1 Cor. 4:7) Iumi mas hambol for luksavve hao iumi no perfect and iumi needim discipline. Wanfala brata wea samting olsem 60 years old sei: “Mi lane for no feel nogud taem olketa narawan luksavve lo mistek blo mi. Samfala taem mi kasem discipline bikos lo olketa karangge mistek wea mi duim, nomata olsem mi trae for impruv lo datwan and gohed duim best blo mi for Jehovah.” Taem iumi obeyim Jehovah and gohed hambol, bae iumi garem hapi laef.​—Prov. 22:4.

GOHED LUKAOTEM JEHOVAH

12. Taem Josiah barava young, wat nao hem duim wea showim hem lukaotem Jehovah? (2 Chronicles 34:1-3)

¹² Followim example blo Josiah for mekem gud disison. Taem Josiah teenager, hem start for lukaotem Jehovah. Hem laek for lane abaotem Jehovah and for duim wat Jehovah laekem. Nomata olsem, laef hem no isi for disfala young king. Lo datfala taem, staka pipol worshipim olketa false god. So for Josiah sapotim tru worship, hem need for no fraet. And hem nao wat hem duim! Bifor Josiah 20 years old, hem start for aotem false worship from Israel.​—Readim 2 Chronicles 34:1-3.

13. Hao nao dedication blo iu for Jehovah savve affectim laef blo iu?

¹³ Nomata if iu barava young, iu savve disaed for followim example blo Josiah for lukaotem Jehovah and for lane abaotem olketa naesfala wei blo Jehovah. Taem iu duim diswan, bae iu laek for dedicate lo Jehovah. Hao nao dedication blo iu savve affectim laef blo iu evriday? Luke, wea baptaes taem hem 14 years sei: “Start from distaem, for servem Jehovah bae hem main samting lo laef blo mi and bae mi trae best for mekem hem hapi.” (Mark 12:30) Iu bae kasem blessing if iu laek for duim sem samting!

14. Wat nao samfala young wan duim wea showim olketa followim example blo King Josiah?

¹⁴ Wat nao samfala challenge wea olketa young wan wea worshipim Jehovah maet feisim? Johan, wea baptaes taem hem 12 years sei, olketa classmate blo hem forcem hem for smokem electronic cigarette or vaping. For againstim datfala pressure, Johan remindim hemseleva dat vaping savve spoelem health and frenship blo hem witim Jehovah. Rachel wea baptaes taem hem 14 years storyim olketa samting wea helpem hem for deal witim olketa challenge wea hem feisim lo skul. Hem sei: “Mi trae for luk for olketa samting wea remindim mi abaotem Bible and Jehovah. For example, taem wanfala history leson kamap lo class, mi savve connectim datwan witim wanfala story lo Bible or wanfala profesi. Or taem mi story witim samwan lo skul, mi savve tingim wanfala scripture wea mi savve sharem witim hem.” Olketa challenge wea iu feisim maet difren from wat Josiah feisim, bat iu savve wise and loyal olsem hem. Olketa hard taem wea iu deal witim taem iu young, bae redyim iu for deal witim olketa challenge wea iu bae feisim lo future.

15. Wat nao helpem Josiah for gohed faithful for servem Jehovah? (2 Chronicles 34:14, 18-21)

¹⁵ Taem King Josiah adult, hem start for renovatim temple. During lo datfala waka, olketa faendem “buk blo Law blo Jehovah wea hem givim lo Moses bifor.” Taem King Josiah herem toktok insaed datfala Law, hem kwiktaem duim samting followim datwan. (Readim 2 Chronicles 34:14, 18-21.) Hao, iu laek for readim Bible evriday? If iu startim finis Bible reading blo iu, hao iu enjoyim? Waswe, iu raetem olketa verse wea savve helpem iuseleva? Luke, wea iumi storyim finis raetem lo diary blo hem olketa interesting verse wea hem faendem. Taem iu duim samting olsem, hem savve helpem iu for rememberim olketa Bible verse or leson wea iu lanem. Taem iu lanem staka samting and laek for readim Bible, iu bae barava laek for servem Jehovah. And olsem toktok blo God helpem Josiah for duim stret samting, Bible savve helpem iu tu.

16. Why nao Josiah mekem wanfala serious mistek, and wat nao iumi lanem?

¹⁶ Lane from bad disison wea Josiah mekem. Taem Josiah hem samting olsem 39 years old, hem mekem wanfala mistek wea lead go for dae blo hem. Instead for hem askem Jehovah for direction, hem trustim hemseleva. (2 Chron. 35:​20-25) Wat nao iumi lanem? Nomata iumi stap lo truth for long taem finis or hao long nao iumi bin studyim Bible, iumi mas gohed for lukaotem Jehovah. Diswan minim, iumi mas prea lo hem for direction, studyim Bible, and kasem gud samting from advaes blo olketa mature Christian. Datwan bae helpem iumi for no mekem olketa serious mistek and bae iumi hapi.​—Jas. 1:25.

OLKETA YOUNG WAN, IU SAVVE GAREM HAPI LAEF

17. Wat nao olketa important samting wea iumi savve lanem from thrifala king blo Judah?

¹⁷ Iu savve duim staka interesting samting taem iu young. Story blo Jehoash, Uzziah, and Josiah showimaot dat olketa young wan savve mekem olketa wise disison and iusim laef blo olketa for duim wat Jehovah hapi lo hem. Hem tru, olketa young wan hia duim samfala mistek tu wea mekem olketa kasem nogud samting. Bat if iu followim gud example blo olketa and avoidim mistek wea olketa duim, iu savve garem hapi laef.

18. Olketa wanem Bible example nao showim iu savve garem hapi laef? (Lukim tu piksa.)

¹⁸ Bible storyim tu olketa nara young wan wea fren klos witim Jehovah, duim wat hem hapi lo hem, and garem hapi laef. David hem wanfala lo olketa. Taem David young, hem chus for fren witim God and bihaen hem kamap wanfala loyal king. Hem tru, samfala taem David mekem olketa mistek, bat still God appruvim hem. (1 Ki. 3:6; 9:​4, 5; 14:8) Taem iu studyim abaotem laef blo David, example blo hem bae encouragem iu for gohed faithful for servem Jehovah. Or iu savve duim wanfala study project abaotem example blo Mark and Timothy. Olketa start for worshipim Jehovah taem olketa barava young and gohed faithful for servem hem. Disison blo olketa for worshipim Jehovah, hem mekem Jehovah hapi and olketa tu hapi.

19. Wat kaen laef nao bae iu chusim?

¹⁹ Wat iu chus for duim distaem bae hem affectim laef blo iu lo future. If iu trustim Jehovah and no depend nomoa lo own understanding blo iu, Jehovah bae helpem iu for mekem olketa wise disison. (Prov. 20:24) Iu bae satisfae and enjoyim laef. Remember, Jehovah tinghae lo wat iu duim for hem. For iusim laef blo iu for worshipim Dadi blo iu lo heven wea lovem iu, hem gud winim eni nara samting.