LESON 55
Sapotim Kongregeson blo Iu
Evriwea lo world, staka million pipol hapi for worshipim Jehovah lo staka thousand kongregeson. Olketa tinghae lo instruction and direction wea olketa kasem and olketa willing for sapotim kongregeson lo staka difren wei. Hao, iu tu ting olsem abaotem kongregeson blo iu?
1. Wat nao samfala samting iu savve duim for iusim taem and strong blo iu for sapotim kongregeson?
Iumi evriwan savve duim samting for help insaed kongregeson. For example, iu savve helpem eni olo lo kongregeson blo iu for go lo olketa meeting, or duim samting olsem for shopping, or klinim haos blo hem. (Readim James 1:27.) Iumi savve volunteer tu for klinim and repairim Kingdom Hall. No eniwan forcem iumi for duim olketa samting hia. From iumi lovem God and olketa brata and sista, datwan mekem iumi “willing for givim [iumiseleva]” for duim eni waka lo kongregeson.—Psalm 110:3.
Olketa wea baptaes finis savve sapotim kongregeson lo olketa nara wei tu. Olketa brata wea kasem olketa mark wea Bible storyim savve ministerial servant, and gogo olketa savve kamap olketa elder. Olketa brata and sista savve duim moa for sapotim preaching waka taem olketa savve pioneer. Samfala Witness savve help for buildim olketa ples for worship, or muv go lo ples wea kongregeson needim help lo olketa nara samting.
2. Hao nao iumi savve iusim olketa samting wea iumi garem for sapotim kongregeson?
Iumi savve “honorim Jehovah witim olketa best samting wea [iumi] garem.” (Proverbs 3:9) Hem privilege for contributem selen and olketa nara samting wea iumi garem for sapotim kongregeson and preaching waka evriwea lo world. (Readim 2 Corinthians 9:7.) Olketa donation wea iumi givim tu sapotim disaster relief waka. Staka disaed for “keepim lelebet selen” evritaem for donation. (Readim 1 Corinthians 16:2.) Iumi savve givim donation lo olketa contribution box wea stap lo olketa ples for worship or givim online lo donate.jw.org. Jehovah givim iumi chance for showim iumi lovem hem lo hao iumi disaed for iusim olketa material samting wea iumi garem.
DIG GO MOA
Bae iumi storyim samfala samting wea iu savve duim for sapotim kongregeson.
3. Iumi savve iusim olketa material samting wea iumi garem
Jehovah and Jesus lovem olketa wea hapi for givim samting. For example, Jesus tinghae lo wanfala widow woman wea no garem staka selen, bat hem mekem effort for givim contribution. Readim Luke 21:1-4, then discussim tugeta olketa kwestin hia:
Hao, iumi mas givim staka selen for mekem Jehovah hapi?
Hao nao Jehovah and Jesus feel taem iumi willing for givim donation?
Lane abaotem hao organization iusim olketa donation, pleim VIDEO. Then discussim tugeta disfala kwestin.
Hao nao organization iusim olketa donation for helpem olketa kongregeson evriwea lo world?
4. Iumi savve volunteer for help
Lo bifor, olketa Israelite waka hard for maintainim olketa ples blo olketa for worship. Bat diswan hem no just for contributem selen nomoa. Readim 2 Chronicles 34:9-11, then discussim tugeta disfala kwestin:
Wat nao evri Israelite duim for lukaftarem haos blo Jehovah or ples for worship?
For lukim hao Olketa Jehovah’s Witness followim example blo olketa Israelite, pleim VIDEO. Then discussim tugeta olketa kwestin hia.
Why nao hem important for keepim Kingdom Hall blo iumi hem klin and for duim maintenance lo hem?
Wat nao samfala samting iu savve duim for help?
5. Olketa brata savve reach aot for samfala responsibility moa
Bible encouragem olketa brata for reach aot for duim wat olketa savve duim for sapotim kongregeson. For lukim example, pleim VIDEO. Then ansarem disfala kwestin.
Olsem iumi lukim lo video, hao nao Ryan reach aot for duim moa samting for sapotim kongregeson?
Bible storyim olketa qualification for olketa brata wea laek for kamap ministerial servant and elder. Readim 1 Timothy 3:1-13, then discussim tugeta olketa kwestin hia:
SAMWAN MAET ASK: “Wea nao Olketa Jehovah’s Witness kasem selen for waka blo olketa?”
Wat nao bae iu talem?
MAIN POINT
Jehovah barava tinghae lo effort iumi mekem for sapotim kongregeson lo hao iumi iusim taem, strong, and olketa material samting wea iumi garem.
Review
Hao nao iumi savve iusim taem and strong blo iumi for sapotim kongregeson?
Hao nao iumi savve iusim olketa material samting wea iumi garem for sapotim kongregeson?
Wat nao samfala samting iu laek duim for sapotim kongregeson?
FAENDAOT MOA
Read abaotem why God no askem olketa wea worshipim hem distaem for givim tithe.
Bible assignim samfala waka for olketa man wea baptaes finis. Bat hao if wanfala woman wea baptaes finis nao need for duim olketa waka olsem?
“Hao Kongregeson Waka Anda lo Christ” (Wastaoa, February 2021)
Lukim wat samfala brata duim for transportim olketa pablikeson for olketa nara brata and sista.
Read abaotem hao iumi kasem selen for sapotim waka blo iumi, wea hem barava difren from olketa nara religion.
“Hao Nao Olketa Jehovah’s Witness Kasem Selen for Sapotim Waka blo Olketa?” (Article lo jw.org)