LECCIÓN 35
¿Imatá ruwasunman imatapis sumajta ajllanapaj?
Tukuypis imatachus ruwanata ajllananchej tiyan. Chay ajllasqanchejman jinataj kausayninchejpi allin riwasun chayri mana, Jehovamanpis astawan qayllaykusun chayri mana. Sapa ujninchej ajllananchej tiyan maypichus tiyakunata, imapichus trabajanata, casarakunatachus chayri manachus. Sichus allinta ajllasun chayqa, kusisqa kasun, Jehovatapis kusichisunchej.
1. ¿Imaynatá Biblia yanapawasunman sumajta ajllanapaj?
Niraj imatapis ajllashaspaqa Jehovaj yanapanta mañakuna. Chantá imatachus Jehová chaymanta yuyasqanta Bibliapi maskʼarina (Proverbios 2:3-6 leey). Wakin kutis Jehovaj kamachiykunasnenqa Bibliapi sutʼi kashan. Ajina kajtintaj chayta kasukoyqa aswan allin.
Bibliapi mana uj sutʼi kamachiy kajtinrí, ¿imatá ruwasunman? Mana uj kamachiy kajtinpis Jehová ‘rikuchiwasun may ñantachus purinata’ (Isaías 48:17). Payqa Bibliapi yuyaychaykunata qowanchej. Chay yuyaychaykunaqa cheqa yachachiykuna kanku, yanapawanchejtaj imatachus Jehová yuyasqanta, imaynachus pay kasqanta yachanapaj. Chay yuyaychaykunata tarinchej Bibliata leerispa. Imatachus Jehová yuyasqanta yachaytaj, imatapis payta kusichinapaj jina ajllanapaj yanapawanchej.
2. ¿Imatá ruwasunman niraj imatapis ajllashaspa?
Niraj imatapis ajllashaspaqa sumajtaraj piensarina. Chayrayku Biblia nin: “Allin yachayniyoj runataj allintaraj tanteakun imatachus ruwananta”, nispa (Proverbios 14:15). Niraj imatapis ajllashaspaqa kay tapuykunapi piensarina: “¿Kayta ajllanaypaj Bibliamanta ima yuyaychaykunataj yanapawanman? ¿Imata ruwajtiytaj sonqoy mana juchachawanqachu? ¿Imatachus ruwayta munasqay wajkunata yanapanqachu, Jehovatapis kusichenqachu?” (Deuteronomio 32:29).
Diosqa niyta atiwanchej imachus allin, imatajchus mana allinchu kasqanta. Jehovaj kamachiykunasninta, yuyaychaykunasnintapis sumajta rejsispaqa, payta kasukuyta munasunchej. Chantapis sonqonchej chayta ruwanapaj aysawasun. Sonqonchejqa reparachiwasun imachus allin, imatajchus mana allinchu kasqanta (Romanos 2:14, 15). Jehovaj kamachiykunasninta sumajta rejsispaqa, imatapis sumajta ajllasun.
ASTAWAN YACHAKUNA
Kaypi astawan yachakusun Bibliaj yuyaychaykunasninmanta, sonqonchej mana juchachanawanchejpaj jina imatapis ajllanamanta ima.
3. Bibliawan yanapachikuna
Bibliaj yuyaychaykunasnenqa imatapis sumajta ajllanapaj yanapawanchej. VIDEOTA qhawariychej, chantá yachakojta tapuriy.
¿Imata ruwananchejtataj Jehová saqewanchej?
¿Imajtintaj Jehová ajllajta saqewanchej?
¿Ima yanapastataj Jehová qowanchej imatapis sumajta ajllanapaj?
Bibliamanta uj yuyaychayta qhawarina. Efesios 5:15, 16 leeriychej, chantá yachakojwan parlariy:
Bibliata sapa día leenapaj tiempochakunamanta.
Aswan sumaj qosa, sumaj tata chayri sumaj wawa kanapaj tiempochakunamanta.
Tantakuykunaman rinapaj tiempochakunamanta.
4. Allinta ajllayta yachakuna
Bibliapi imata ruwanapajpis uj kamachiy kajtenqa, chay rato yachanchej imatachus ruwananchejta. Jinapis mana uj kamachiy kajtin imatachus ruwanata yachanapaj VIDEOTA qhawariychej, chantá yachakojta tapuriy.
¿Imatataj uj hermana ruwarqa Diosta kusichinanpaj jina ajllananpaj?
Noqanchejpuni imatachus ruwanata ajllananchej tiyan. Hebreos 5:14 leeriychej, chantá yachakojta tapuriy:
Imatachus ruwanata ajllanapaj wajkunata tapukuy aswan fácil kajtinpis, ¿imaraykutaj noqanchejpuni ajllananchej tiyan?
¿Ima yanapastaj tiyapuwanchej mana sonqonchej juchachanawanchejpaj jina imatapis sumajta ajllanapaj?
Sonqonchej chayri conciencianchejqa uj mapa jina, yanapawanchej allin kajta ajllanapaj.
5. Wajkuna imatachus ruwayta ajllasqankuta respetana
Mana tukuychu kikin kanchej, nitaj tukuychu kikin imasta ruwayta ajllanchej. Chayrayku wajkuna ajllasqankuta respetana. Iskaymanta parlarina:
Uj kaj: Uj hermanamanqa maquillakuy mayta gustan, paytaj waj congregacionman ripun. Chay congregacionpi hermanasmanqa ajinata maquillakusqan mana gustanchu.
Romanos 15:1; 1 Corintios 10:23, 24 leeriychej, chantá yachakojta tapuriy:
Kaypi leerisqanchejman jina, ¿imatataj maquillakoj hermana ruwanman? Imatachus ajllasqanchej noqanchejpaj allin kajtin, wajkunapajtaj mana allinchu kajtin, ¿imatataj ruwasunman?
Iskay kaj: Uj hermanoqa yachan Biblia mana juchachasqanta machachej ujyanasta uj chhikata tomayta. Jinapis payqa ni uj chhikitata ujyananta nin. Uj diataj payta hermanos uj fiestitaman invitarinku, chaypitaj hermanosta rikun machachej ujyanasta tomashasqankuta.
Eclesiastés 7:16; Romanos 14:1, 10 leeriychej, chantá yachakojta tapuriy:
Kaypi leerisqanchejman jina, ¿imatataj hermano ruwanman? Wajkunaj ajllasqanku yuyasqanchejman jina mana allinchu kajtin, ¿imatá ruwasunman?
¿Imastá ruwasunman allin imastapuni ajllanapaj?
1. Jehovamanta yanapata mañakuna (Santiago 1:5).
2. Bibliapi, publicacionespi yuyaychaykunata maskʼana. Waj hermanostapis tapurikuna.
3. Sumajta piensarina chay ajllasqanchej wajkunata pantachinanpichus manachus, imaynachus noqanchej sientekunanchejpipis.
WAKIN RUNAS NINKU: “Munasqanchejta ruwayta atinchej, imatapis runasqa yuyachunku”, nispa.
¿Imaraykutaj piensarinanchej kanman imatachus ruwasqanchej Jehová Diospaj, waj runaspajpis allinchus manachus kasqanpi?
¿IMASTÁ YACHAKUNCHEJ?
Kaypi yachakunchej allin imasta ajllanapajqa imatachus Jehová yuyasqanta yachana kasqanta, imatachus ajllasqanchej wajkunata yanapananpichus, llakichinanpichus piensarina kasqanta.
Yuyarikunapaj
¿Imastaj yanapawasunman Jehovata kusichinapaj jina imatapis ajllanapaj?
¿Imatá ruwasunman allin imastapuni ajllanapaj?
¿Imaynatá wajkunaj ajllasqankuta respetasqanchejta rikuchisunman?
ASTAWAN YACHAKUNAYKIPAJ
¿Imaynatá imatapis ajllasunman Jehovata kusichinapaj jinapuni? Chayta yachanaykipaj kayta leeriy.
“Diosta jatunchanapaqjina imatapis akllana” (Torremanta Qhawaj, 15 de abril de 2011)
¿Imaynatá Jehová yuyaychawanchej? Chayta yachanaykipaj kay videota qhawariy.
¿Imataj uj runata yanaparqa allin kajta ajllananpaj? Chayta yachanaykipaj kay videota qhawariy.
Bibliapi mana uj kamachiy kajtinpis, ¿imaynatá sumajta ajllasunman? Chayta yachanaykipaj kayta leeriy.
“¿Tukuy imapajpunichu Bibliapi kamachiykunata maskʼana tiyan?” (La Atalaya, 1 de diciembre de 2003)