LECCIÓN 34
¿Imatá ruwasunman Jehovata munakusqanchejrayku?
¿Ñaupajmanta nisqa astawanchu Jehovata munakunki? ¿Payman astawan qayllaykuyta munawajchu? Jina kajtenqa paypis astawan munakusonqa, cuidasonqataj. Chayrayku kaypi yachakusun Jehová Diosta munakusqanchejrayku imatachus ruwanata.
1. ¿Imaynatá Jehová Diosta munakusqanchejta rikuchisunman?
Jehová Diosta munakusqanchejrayku payta kasukunchej (1 Juan 5:3 leey). Payta kasukunapajqa mana obligawanchejchu, manaqa saqewanchej kasukunatachus manachus ajllananchejta. Jinapis Jehová Diosqa ‘tukuy sonqo kasukunanchejta’ munan (Romanos 6:17). Chaywan nishan payta munakusqanchejrayku kasukunanchejta. Kay libromanta kinsa kaj partepi, tawa kaj partepiwan yachakusun Jehovata munakusqanchejrayku gustasqan imasta ruwanata, chejnisqan imastataj chejninata.
2. ¿Imaraykutaj wakin kutis Jehovata mana kasukuyta atillanchejchu?
Llakiykunapi kaspaqa mana Jehovata kasukuyta atillanchejchu. Chayrayku Biblia nin: “Cheqan runataqa imaymana llakiykuna qhatirin”, nispa (Salmo 34:19). Tukuyninchej juchasapas kasqanchejrayku pantanchej. Wakin kutistaj qolqe pisiwasqanchejrayku, wajkuna llakichiwasqanchejrayku chayri waj imasrayku llakikunchej. Ajinapi rikukuspataj mana Diosta kasukuyta atillanchejchu. Jinapis Diospa munayninta ruwanapaj kallpachakusunchej chayqa, ima kajtinpis payta munakusqanchejta rikuchisunchej, nitaj wasanchasunchejchu. Paytaj ni jaykʼaj saqerpariwasunchu, noqallanchejwanpunitaj kanqa (Salmo 4:3 leey).
ASTAWAN YACHAKUNA
Kaypi yachakusun imaraykuchus Jehovata kasukunapuni kasqanta. Yachakullasuntaj imatachus ruwanata payta kasukunallapajpuni.
3. Satanasqa contranchejta parlan
Job libropeqa willawanchej imatachus Satanás Jobpa contranpi parlasqanta. Chay parlasqanqa mana Jobpa contrallanpichu karqa, manaqa Jehovata sirviyta munajkunaj contrankupipis. Job 1:1; 1:6–2:10 leeriychej, chantá yachakojta tapuriy:
Job Jehovata kasukusqanmanta, ¿imatataj Satanás nerqa? (Job 1:9-11 versiculosta qhawariy).
¿Imatataj Satanás tukuy runasmanta nerqa? ¿Imatá qanmantapis nishanman? (Job 2:4 versiculota qhawariy).
Job 23:11, 12 leeriychej, chantá yachakojta tapuriy:
¿Imatataj Job ruwasqa Jehovata munakusqanrayku?
Jobqa Diosta munakusqanrayku mana wasancharqachu.
Noqanchejpis Diosta munakusqanchejrayku mana wasanchasunchu.
4. Jehová Diosta kusichina
Proverbios 27:11 leeriychej, chantá yachakojta tapuriy:
¿Jehová Dios kusikunchu payta munakojtinchej, yachayniyoj kajtinchej ima? ¿Imaraykú chayta ninki?
5. Ama Jehovata wasanchanachu
Jehovata munakusqanchejrayku paymanta wajkunaman willarinchej. Jehovata mana wasanchayta munasqanchejraykutaj, ima kajtinpis willallanchejpuni. VIDEOTA qhawariychej, chantá yachakojta tapuriy:
¿Imaraykutaj wakin kutis Jehovamanta mana willariyta atillanchejchu?
Videopi rikorqanchej chay hermano, ¿imatataj ruwarqa mana manchachikuspa predicanallanpajpuni?
Sichus Jehovaj munakusqan imasta munakusun, chejnisqan imastataj chejnisun chayqa, Jehovata mana wasanchasunchu. Salmo 97:10 leeriychej, chantá yachakojta tapuriy:
Bibliamanta yachakusqaykiman jina, ¿imastataj Jehová munakun? Chanta, ¿imastataj chejnikun?
Allin imasta munakunapaj, sajra imastataj chejninapaj, ¿imastaj yanapawasunman?
6. Jehovata kasukoyqa allinninchejpaj
Jehovata kasukoyqa allinninchejpajpuni. Isaías 48:17, 18 leeriychej, chantá yachakojta tapuriy:
¿Jehová yachanmanchu imachus allinninchejpaj kasqanta? ¿Imaraykú chayta ninki?
Bibliata estudiasqayki, cheqa Diosmanta yachakusqayki ima, ¿kausayniykipi yanapashasunkichu?
WAKIN RUNAS NINKU: “Noqaqa ni jaykʼaj Diosta kusichiymanchu”, nispa.
Ajinata nisojkunaman, ¿ima versiculotataj rikuchiwaj ruwasqanchejwan Jehovata kusichiyta atisqanchejta reparachinaykipaj?
¿IMASTÁ YACHAKUNCHEJ?
Kaypi yachakunchej Jehovata munakusqanchejrayku kasukusqanchejta, ima kajtinpis mana wasanchasqanchejta.
Yuyarikunapaj
¿Imatá Jobmanta yachakusunman?
¿Imatá ruwana kasqa Jehová Diosta munakusqanchejrayku?
¿Imatá ruwana tiyan Jehovata mana wasanchanapaj?
ASTAWAN YACHAKUNAYKIPAJ
Jehovata mana wasanchanapaj, ¿imatá ruwasunman? Chayta yachanaykipaj kay videota qhawariy.
¿Imastataj Satanás Jobpa contranpi parlarqa? Chayta yachanaykipaj kayta leeriy.
“Jobqa wañuy patapi kaspapis Diosta kasukorqa” (La Biblia y su mensaje, sección 6)
Wawitaspis Diosta munakusqankurayku kasukuyta atinku. Chaypaj kay videota qhawariy.
¿Imatataj jóvenes ruwankuman sajra imasman tanqasqa kashaspa? Chayta yachanaykipaj kay videota qhawariy.