Jehová Diosta jatunchana

1-3. 1) ¿Maykʼajtaj Salmo 147 qhelqakunman karqa? 2) ¿Imatá yachakusunchej kay yachaqanapi?

CASI tukuyninchej kʼacha runastaqa, may sumajpaj qhawanchej. Jinapis Jehová Dioslla jatunchanapaj jina, may atiyniyoj kasqanrayku, mayta munakuwasqanchejraykutaj. Paypa atiynenqa tukuy ima ruwasqanpi sutʼi rikukun. Chantapis munakuwasqanchejrayku, munasqa Wawanta kachamorqa noqanchejrayku wañunanpaj.

² Kay 147 Salmota qhelqajqa, tukuy sonqowan Jehová Diosta jatunchayta munarqa. Chantá wajkunamanpis kallpacharqa paywan khuska Diosta jatunchanankuta (Salmo 147:1, 7, 12, 13 leey).

³ Bibliaqa mana ninchu 147 Salmota pichus qhelqasqanta. Chaywanpis ichá chay salmota qhelqajqa, israelitas Babiloniamanta Jerusalenman kutipushajtinku kausarqa (Sal. 147:2). Chay salmota qhelqajqa Jehovata jatuncharqa llajtanta kacharichisqanmanta, watejmanta Jerusalenpi payta yupaychanankupaj. Chantapis mana chayraykullachu Jehovata jatuncharqa. Kay yachaqanapi yachakusunchej imasraykuchus Diosta jatunchasqanta. Chantá yachakullasuntaj imasraykuchus noqanchejpis Diosta jatunchananchej kasqanta (Sal. 147:1).

 4. ¿Imaynataj israelitas kashankuman karqa rey Ciro Babiloniamanta kacharichejtin?

⁴ ¿Imaynataj israelitas Babiloniapi kashankuman karqa? Babiloniosqa israelitasta asipayaspa nej kanku: “[Jerusalenpi] takej kankichej, chay takiykunata takiripuwayku”, nispa. Paykunataj mana takiyta munarqankuchu. Imajtinchus Jerusalén thuñisqa kashasqanmanta llakisqa kasharqanku (Sal. 137:1-3, 6). Israelitasqa sonqo pʼakisqa kasharqanku, sonqochaytataj necesitarqanku. Jinapis Jehová nerqa jina, Persiamanta rey Ciroqa Babiloniata atipaspa japʼikaporqa israelitastataj kacharicherqa. Ciro nerqa: ‘Jehovaqa kamachiwan Jerusalenpi Diosta yupaychana wasita ruwapunayta’, nispa. Chantá nillarqataj: “Mayqennillaykichejpis, Tata Diospa ayllunmanta kajkunataqa Señorniykichej Tata Dios yanapachun, jaqaymantaj richun”, nispa (2 Cró. 36:23). Tukuy chayqa israelitasta maytapunichá sonqocharqa Babiloniapi kashajtinku.

 5. Salmo 147:3 nisqanman jina, ¿imatá Jehová ruwan?

⁵ Jehovaqa sapa israelitata sonqocharqa, kunan tiempopipis ajinallatataj sapa ujninchejta sonqochawanchej. Salmo 147:3 Diosmanta nin: “Payqa sonqo pʼakisqasta thañichin, nanasqasninkutataj jampiykun”, nispa. Onqosqa chayri llakisqa kashajtinchejqa, Jehová sonqochanawanchejmanta ama iskayrayanachu (Sal. 34:18; Isa. 57:15). Payqa ima llakiytapis atipanapaj kallpachawasunchej, yachaytataj qowasunchej (Sant. 1:5).

 6. ¿Imatá Salmo 147:4 nisqanmanta yachakunchej? (17 paginapi dibujota qhawariy).

⁶ Kay 147 Salmota qhelqajqa, cielota qhawarispa Jehovamanta nerqa: “Payqa chʼaskasta yupan, sapa ujtataj sutinmanta wajyan”, nispa (Sal. 147:4). Kay salmota qhelqajqa may chhika chʼaskasta chayri estrellasta rikuyta aterqa, nitaj yupayta aterqachu. Kay tiempopi cientificosqa may chhika estrellas kasqanta ninku, jinapis mana yupayta atinkuchu. Jehovalla estrellasta yupayta atin, sapa ujtataj sutinmanta wajyan. Jehovapajqa tukuy estrellas mana kikinkamallachu kanku (1 Cor. 15:41). Imaynatachus Diosninchej sapa estrella maypichus kashasqanta yachan, ajinallatataj yachan maypichus sapa ujninchej kashasqanchejta, imaynachus kashasqanchejta, imastachus necesitasqanchejtapis.

7, 8. 1) ¿Imatataj Jehová noqanchejmanta yachan? 2) Kyokoj kausayninta qhawarispa, ¿imatataj Jehovamanta yachakunchej?

⁷ Jehovaqa yachan sapa ujninchej ima llakiypichus kashasqanchejta, may atiyniyoj kasqanraykutaj yanapayta atiwanchej (Salmo 147:5 leey). Wakin kuteqa ichapis yuyasunman llakiyninchej may jatun kasqanta, mana aguantayta atinapaj jinataj. Jinapis Diosqa maykamallachus aguantayta atisqanchejta yachan, yuyarikuntaj “jallpʼalla kasqanchejta” (Sal. 103:14). Juchasapas kasqanchejrayku kutin kutita kikin juchallapitaj pantanchej. Ichá imallatapis nisqanchejmanta pesachikunchej chayri sajra imasta munapayasqanchejmanta manachayri pillamantapis envidiakusqanchejmanta. Jehovaqa mana chay imaspi pantanchu, jinapis allinta entiendewanchej (Isa. 40:28).

⁸ Ichapis yuyarikunchej imaynatachus Jehová atiyninwan llakiyninchejta atipanapaj yanapawasqanchejmanta (Isa. 41:10, 13). Kyoko sutiyoj precursoramanta parlarina. Payqa waj lugarman Diosmanta willaj riporqa, chaypitaj llakiywan atipachikorqa. Jinapis Kyokoqa repararqa Jehová payta allinta entiendesqanta. Imaraykuchus mosoj congregacionninmanta hermanosqa payta sonqocharqanku. Chaywantaj Kyokoqa repararqa Jehová kaytapis nishanman jina: “Wawitáy, munakuyki mana precursora kasqaykiraykullachu, manaqa noqapaj kausasqaykirayku. Kusisqa kanaykita munani testigoy kasqaykimanta”, nispa. ¿Qanpis kausayniykipi reparallarqankitajchu Jehová entiendesusqanta?

9, 10. Mutsuo hermanoj kausayninpi reparasqanchejman jina, ¿imaynatá Jehová yanapawanchej?

⁹ Ichapis wakin kuti mikhunarayku llakikusunman. Jinapis kaypi tʼukurina, Jehovaqa Jallpʼata ruwarqa poqonanpaj jina, ajinamanta tukuy kausajkuna mikhunankupaj. Bibliaqa Jehovamanta nin: “Qharqaña irpas waqajtinkupis, mikhuchin”, nispa (Salmo 147:8, 9 leey). Jehová pʼisqetusta mikhuchin chay, ¿manachu necesitasqanchej imasta astawanraj qowasunman? (Sal. 37:25).

¹⁰ Chantapis Jehovaqa creeyninchejta kallpachanapaj necesitasqanchejta qowanchej. Sonqonchejta, yuyayninchejtawan waqaychanapajtaj “sonqo tiyaykuyta” qowanchej (Fili. 4:6, 7). Mutsuo hermanomanta, warminmantawan parlarina. Paykunaqa 2011 watapi Japonpi mama qochamanta yaku wasarimojtin, Jehová yanapasqanta repararqanku. Chay kutipi yakoqa casi tukuy kapuyninkuta apakaporqa, paykunataj techo pataman wicharispa salvakorqanku. Chay tutataj altos cuartopi puñorqanku, manchay chiritaj karqa. Sutʼiyaytataj imallatapis sonqocharikunankupaj maskʼarqanku. Ajinapi tarerqanku Anuario de los testigos de Jehová 2006 nisqa librota. Chaypitaj “Los tsunamis más mortíferos de la historia” nisqata leerqanku. Chaypi parlasharqa isla de Sumatra lugarpi 2004 watapi, uj terremoto kasqanmanta. Jallpʼa mayta kharkatisqanrayku mama qochamanta yaku wasarerqa, chaytaj ni jaykʼaj jina rikukorqa. Mutsuo hermanoqa warminwan chay Anuariota caldo ñawilla leerqanku. Repararqankutaj necesitashajtinkupuni Jehová paykunata sonqochashasqanta. Chantapis hermanos paykunapaj mikhunata, ropatapis apasqankuta rikuspa, Jehová paykunata munakusqanta reparallarqankutaj. Chantapis paykunata astawan kallpacharqa sucursalmanta hermanos waturikusqanku. Mutsuo nin: “Repararqani Jehová mayta cuidashawasqaykuta. Chaytaj mayta sonqochawarqayku”, nispa. Reparanchej jina Diosqa qayllallanpipuni kanapaj yanapawanchej, chaymantaraj mikhunawan waj imaswan ima yanapawanchej.

11. ¿Imayna runataj kananchej tiyan Jehová yanapanawanchejpaj?

¹¹ Jehovaqa wakichisqa kashan “llampʼu sonqosta” yanapananpaj (Sal. 147:6). Chayrayku Jehová yanapanawanchejpajqa llampʼu sonqo kananchej tiyan, paywantaj sumaj amigos kana (Sof. 2:3). Llampʼu sonqo runasqa Jehová sajra ruwayta, nanaykunatawan chinkachinanta suyakunku. Jehovaqa llampʼu sonqo runasta allinpaj qhawan.

12, 13. 1) ¿Imastataj qhesachananchej tiyan Jehová yanapanawanchejpaj? 2) ¿Imaspí mana atienekunanchejchu tiyan?

¹² Chantapis Jehovaqa ‘sajra runasta kʼumuykachachin’ (Sal. 147:6). Chayrayku sajra runaswan khuskata Jehová mana chinkachinawanchejpaj, sajra kajta chejninanchej tiyan (Sal. 97:10). Chantapis khuchichakuy juchata chejninallanchejtaj tiyan, jinallataj qʼala runasta qhawaytapis. Imaraykuchus chayqa khuchichakuypi urmachiwasunman (Sal. 119:37; Mat. 5:28). Ichapis chay sajra imasta qhesachanapaj mayta kallpachakuna kanqa, jinapis kallpachakusqanchejqa mana qhasichu kanqa. Imajtinchus Jehová bendeciwasunchej.

¹³ Chay sajra imasta qhesachanapajqa Jehovaj yanapayninta mañakunanchej tiyan. Jehovaqa mana munanchu runaj kallpanpi atienekunanchejta, nitaj noqallanchejpi atienekunanchejtapis (Sal. 147:10). Jehovamanta rogakuspa yanapanta mañakunanchej tiyan. Payqa mana runachu saykʼupunanpaj, chayrayku paymanta ashkha kutista mañakojtinchejpis uyariwasunchejpuni. Salmo 147:11 nin: “Diosqa payta manchachikojpi kusiyta tarin, pikunachus khuyakuynimpi suyakojkunapipis”, nispa. Jehovaqa, munakuwasqanchejrayku sajra imasta qhesachanapaj yanapallawasunchejpuni.

14. ¿Imamantataj salmista kusikorqa?

¹⁴ Jehovaqa llakiypi kashajtinchej yanapanawanchejta nin. Kay 147 Salmota qhelqajqa, israelitas Jerusalenman kutipushasqankupi tʼukurispa, jinata nerqa: “Jerusalén [...], Diosniykita yupaychay, imaraykuchus punkusniykej llavenasninta sinchʼiyacherqa, llajta ukhuykipi runastapis bendecillarqataj. Payqa jallpʼaykiman allin kawsayta apamun”, nispa (Sal. 147:13, 14). Chay salmota qhelqajqa mayta kusikorqa, Jehová kamachisninta jarkʼananpaj Jerusalenpa punkusninta sinchʼiyachisqanmanta.

15. ¿Imaynataj kashasunman wakin kuti chʼampaykunapi rikukuspa?

¹⁵ Ichapis wakin kuteqa chʼampaypi kaspa mayta llakikusunman. Jinapis Jehovaqa chay chʼampayta atipanapaj yachayta qowasunchej. Kay 147 Salmota qhelqajqa Jehovamanta nerqa: “Payqa kamachisqanta kay jallpʼaman apachimun; palabranqa usqhayta corren. Payqa ritʼita tʼakamun millmata jina, escarchastapis ushphata jina qhallimun. Chhullunkata granizota jina apachimun. Chirichimusqampi pitaj kakuyta atillanmanri? Pay kamachejtin, chhullunkas unuyanku”, nispa (Sal. 147:15-18). Diosqa may atiyniyoj kasqanrayku ritʼichimuyta, granizachimuytapis atin. Chayrayku ima chʼampaytapis atipanapaj yanapawasunman.

16, 17. 1) ¿Imaynatataj Jehová Palabrannejta yanapawanchej? 2) Diospa Palabran imaynatachus hermana Simoneta yanapasqanmanta parlariy.

¹⁶ Kay tiempopi Jehovaqa Biblianejta yanapawanchej. Jehovaj “Palabranqa usqhayta corren”, imaraykuchus necesitashajtinchejpuni Palabrannejta yuyaychawanchej. Chantapis “allin kamachi yuyayniyoj” publicacionesta orqhosqan, JW Broadcasting, Internetpi jw.org, ancianos, hermanosninchej ima yanapallawanchejtaj (Mat. 24:45). Arí, kay 147 Salmota qhelqaj nin jina, Jehovaqa ‘usqhaytapuni’ yanapawanchej.

¹⁷ Hermana Simonemanta parlarina. Payqa Diospaj mana valesqanta yuyarqa. Jinapis Jehovamanta mañakullajpuni. Chantapis Bibliata estudiananpaj kallpachakullajpuni. Diospa Palabran imaynatachus yanapasqanmanta nin: “Imapi rikukuspapis Jehová yanapashawasqanta, kallpachashawasqantapis repararqani”, nispa. Chayqa yanaparqa mana anchata llakikunanpaj.

18. 1) ¿Imamantataj mayta kusikunchej? 2) ¿Imasraykú qan Jehovata jatunchayta munanki?

¹⁸ Kay 147 Salmota qhelqajqa kusikorqa israelitasta Dios ajllakusqanmanta ‘Palabranta, kamachisqasninta, yachachiykunasnintapis rejsinankupaj’ (Salmo 147:19, 20 leey). Noqanchejpis kusikullanchejtaj Jehová ajllakuwasqanchejmanta sutinta rejsichimunapaj. Jehovaj amigon kayta atinchej Payta rejsisqanchejrayku, Palabranman jinataj kausakusqanchejrayku. Chaymantataj may agradecesqa kashanchej. Kay 147 Salmota qhelqaj jinallataj Jehovata jatunchayta munanchej ashkha imasrayku. Chantapis wajkunata kikinta ruwanankupaj yanapayta munallanchejtaj.